അധ്യായം 32

ദൈവ​കോ​പം ഒരു പൂർത്തീ​ക​ര​ണ​ത്തി​ലേക്കു വരുത്ത​പ്പെ​ടു​ന്നു

1. ഏഴു കലശങ്ങൾ മുഴു​വ​നാ​യും ഒഴിച്ചു​ക​ഴി​യു​മ്പോൾ എന്തു സംഭവി​ച്ചി​രി​ക്കും, കലശങ്ങ​ളെ​ക്കു​റിച്ച്‌ ഇപ്പോൾ ഏതു ചോദ്യ​ങ്ങൾ ഉദിക്കു​ന്നു?

ഏഴു കലശങ്ങൾ ഒഴിക്കു​വാൻ നിയോ​ഗി​ക്ക​പ്പെ​ട്ടി​രുന്ന ദൂതൻമാ​രെ യോഹ​ന്നാൻ അവതരി​പ്പി​ച്ചു കഴിഞ്ഞി​രി​ക്കു​ന്നു. “ഇവർ അവസാ​ന​ത്ത​വ​രാണ്‌, എന്തു​കൊ​ണ്ടെ​ന്നാൽ ഇവർ മുഖാ​ന്തരം ദൈവ​കോ​പം ഒരു പൂർത്തീ​ക​ര​ണ​ത്തി​ലേക്കു വരുത്ത​പ്പെ​ടു​ന്നു” എന്ന്‌ അവൻ നമ്മോടു പറയുന്നു. (വെളി​പാട്‌ 15:1, NW; 16:1) ഭൂമി​യിൽ ദുഷ്ടത​ക്കു​ളള യഹോ​വ​യു​ടെ ശിക്ഷകൾ വെളി​പ്പെ​ടു​ത്തുന്ന ഈ ബാധകൾ മുഴു​വ​നാ​യും ഒഴിക്ക​പ്പെ​ടണം. അവ ഒഴിച്ചു​ക​ഴി​യു​മ്പോൾ ദൈവ​ത്തി​ന്റെ ന്യായ​വി​ധി​കൾ നടപ്പി​ലാ​ക്ക​പ്പെ​ട്ടി​രി​ക്കും. സാത്താന്റെ ലോകം മേലാൽ ഉണ്ടായി​രി​ക്കു​ക​യില്ല! ഈ ബാധകൾ മനുഷ്യ​വർഗ​ത്തി​നും ഇപ്പോ​ഴത്തെ ദുഷ്ടവ്യ​വ​സ്ഥി​തി​യു​ടെ ഭരണാ​ധി​കാ​രി​കൾക്കും എന്ത്‌ അശുഭ​സൂ​ച​ന​യാ​ണു നൽകു​ന്നത്‌? നാശത്തി​നു വിധി​ക്ക​പ്പെ​ട്ടി​രി​ക്കുന്ന ഈ ലോക​ത്തോ​ടൊ​പ്പം ബാധ​യേൽക്കു​ന്നത്‌ ഒഴിവാ​ക്കാൻ ക്രിസ്‌ത്യാ​നി​കൾക്ക്‌ എങ്ങനെ കഴിയും? ഇവ ജീവത്‌പ്ര​ധാ​ന​മായ ചോദ്യ​ങ്ങ​ളാണ്‌, ഇപ്പോൾ അവയ്‌ക്ക്‌ ഉത്തരം ലഭി​ക്കേ​ണ്ടി​യു​മി​രി​ക്കു​ന്നു. നീതി​യു​ടെ വിജയ​ത്തി​നാ​യി നോക്കി​പ്പാർത്തി​രി​ക്കുന്ന ഏവർക്കും യോഹ​ന്നാൻ അടുത്ത​താ​യി കാണു​ന്ന​തിൽ അതീവ​താ​ത്‌പ​ര്യം ഉണ്ടായി​രി​ക്കും.

“ഭൂമി”ക്കെതി​രായ യഹോ​വ​യു​ടെ ക്രോധം

2. ഒന്നാമത്തെ ദൂതൻ ഭൂമി​യി​ലേക്കു തന്റെ കലശം ഒഴിക്കു​ന്ന​തിൽനിന്ന്‌ എന്തു ഫലമു​ണ്ടാ​കു​ന്നു, “ഭൂമി”യാൽ പ്രതീ​ക​വ​ത്‌ക​രി​ക്ക​പ്പെ​ടു​ന്ന​തെന്ത്‌?

² ഒന്നാമത്തെ ദൂതൻ പ്രവർത്ത​ന​ത്തി​ലേക്കു പ്രവേ​ശി​ക്കു​ന്നു! “ഒന്നാമ​ത്തവൻ പോയി തന്റെ കലശം ഭൂമി​യിൽ ഒഴിച്ചു; അപ്പോൾ മൃഗത്തി​ന്റെ മുദ്ര​യു​ള​ള​വ​രും അതിന്റെ പ്രതി​മയെ നമസ്‌ക​രി​ക്കു​ന്ന​വ​രു​മായ മനുഷ്യർക്കു വല്ലാത്ത ദുർവ്രണം ഉണ്ടായി.” (വെളി​പ്പാ​ടു 16:2) ഒന്നാമത്തെ കാഹളം മുഴക്ക​ലി​ന്റെ കാര്യ​ത്തി​ലെ​ന്ന​പോ​ലെ, ഇവിടെ “ഭൂമി” ഉറപ്പു​ള​ള​താ​യി തോന്നി​ക്കുന്ന രാഷ്‌ട്രീ​യ​വ്യ​വ​സ്ഥി​തി​യെ പ്രതീ​ക​പ്പെ​ടു​ത്തു​ന്നു, 4,000-ത്തിലധി​കം വർഷം മുമ്പു നി​മ്രോ​ദി​ന്റെ കാലത്തു സാത്താൻ ഇവിടെ ഭൂമി​യിൽ പടുത്തു​യർത്താൻ തുടങ്ങി​യ​താ​ണത്‌.—വെളി​പ്പാ​ടു 8:7.

3. (എ) പല ഗവൺമെൻറു​ക​ളും അവയുടെ പ്രജക​ളിൽനിന്ന്‌ ആരാധ​നക്കു തുല്യ​മാ​യത്‌ ആവശ്യ​പ്പെ​ട്ടി​രി​ക്കു​ന്ന​തെ​ങ്ങനെ? (ബി) ദൈവ​രാ​ജ്യ​ത്തി​നു പകരമാ​യി ജനതകൾ എന്ത്‌ ഉളവാ​ക്കി​യി​രി​ക്കു​ന്നു, അതിനെ ആരാധി​ക്കു​ന്ന​വ​രു​ടെ മേലുളള ഫലം എന്താണ്‌?

³ ഈ അന്ത്യനാ​ളു​ക​ളിൽ, അനേകം ഗവൺമെൻറു​കൾ ദൈവ​ത്തി​നോ മറേറതു ഭക്തിക്കോ മീതെ സംസ്ഥാ​നത്തെ ഉയർത്ത​ണ​മെന്നു നിഷ്‌കർഷി​ച്ചു​കൊണ്ട്‌ അവയുടെ പ്രജക​ളിൽനിന്ന്‌ ആരാധ​നക്കു തുല്യ​മാ​യത്‌ ആവശ്യ​പ്പെ​ട്ടി​രി​ക്കു​ന്നു. (2 തിമൊ​ഥെ​യൊസ്‌ 3:1; താരത​മ്യം ചെയ്യുക: ലൂക്കൊസ്‌ 20:25; യോഹ​ന്നാൻ 19:15.) തങ്ങളുടെ യുവജ​ന​ങ്ങളെ യുദ്ധം ചെയ്യാ​നോ യുദ്ധത്തി​നാ​യി ഒരുങ്ങാ​നോ നിർബ​ന്ധി​ച്ചു പട്ടാള​ത്തിൽ ചേർക്കു​ക​യെ​ന്നതു ജനതക​ളു​ടെ​യി​ട​യിൽ 1914 മുതൽ സാധാ​ര​ണ​മാ​യി​ത്തീർന്നി​രി​ക്കു​ന്നു, ആധുനിക ചരി​ത്ര​ത്തി​ന്റെ താളു​കളെ വളരെ​യ​ധി​കം രക്തപങ്കി​ല​മാ​ക്കിയ സമഗ്ര​യു​ദ്ധ​ത്തി​നു​തന്നെ. കർത്താ​വി​ന്റെ ദിവസ​ത്തിൽ, ദൈവ​രാ​ജ്യ​ത്തി​നു പകരമാ​യി കാട്ടു​മൃ​ഗ​ത്തി​ന്റെ പ്രതി​മ​യെ​യും—സർവരാ​ജ്യ​സ​ഖ്യ​ത്തെ​യും അതിന്റെ പിൻഗാ​മി​യായ ഐക്യ​രാ​ഷ്‌ട്ര സംഘട​ന​യെ​യും—ജനതകൾ ഉളവാ​ക്കി​യി​രി​ക്കു​ന്നു. ഈയി​ടെ​യു​ളള പാപ്പാ​മാർ ചെയ്‌ത​തു​പോ​ലെ, സമാധാ​ന​ത്തി​നാ​യു​ളള ജനതയു​ടെ ഏകപ്ര​ത്യാ​ശ​യാണ്‌ ഈ മനുഷ്യ​നിർമി​ത​സ്ഥാ​പനം എന്നു പ്രഖ്യാ​പി​ക്കു​ന്നത്‌ എന്തൊരു ദൈവ​ദൂ​ഷ​ണ​മാണ്‌! അതു ദൈവ​രാ​ജ്യ​ത്തെ ശക്തമായി എതിർക്കു​ന്നു. അതിനെ ആരാധി​ക്കു​ന്നവർ ആത്മീയ​മാ​യി അശുദ്ധ​രും വ്രണബാ​ധി​ത​രും ആയിത്തീ​രു​ന്നു, മോശ​യു​ടെ നാളിൽ യഹോ​വയെ എതിർത്ത ഈജി​പ്‌തു​കാർ അക്ഷരാർഥ പരുക്ക​ളാ​ലും വ്രണങ്ങ​ളാ​ലും ബാധി​ക്ക​പ്പെ​ട്ട​തു​പോ​ലെ തന്നെ.—പുറപ്പാ​ടു 9:10, 11.

4. (എ) ദൈവ​കോ​പ​ത്തി​ന്റെ ഒന്നാം കലശത്തി​ന്റെ ഉളളടക്കം എന്തിനു ശക്തമായ ഊന്നൽ നൽകുന്നു? (ബി) കാട്ടു​മൃ​ഗ​ത്തി​ന്റെ മുദ്ര സ്വീക​രി​ക്കു​ന്ന​വരെ യഹോവ എങ്ങനെ കണക്കാ​ക്കു​ന്നു?

⁴ ഈ കലശത്തി​ലെ ഉളളടക്കം മനുഷ്യ​രു​ടെ മുമ്പാകെ സ്ഥിതി​ചെ​യ്യുന്ന തിര​ഞ്ഞെ​ടു​പ്പിന്‌ ശക്തമായ ഊന്നൽ നൽകുന്നു. അവർ ഒന്നുകിൽ ലോക​ത്തി​ന്റെ നിന്ദ അല്ലെങ്കിൽ യഹോ​വ​യു​ടെ ക്രോധം അനുഭ​വി​ക്കണം. “മൃഗത്തി​ന്റെ പേരോ പേരിന്റെ സംഖ്യ​യോ ആയ മുദ്ര​യു​ള​ള​വ​ന​ല്ലാ​തെ വാങ്ങു​ക​യോ വിൽക്കു​ക​യോ ചെയ്‌വാൻ വഹിയാ​തെ” ആക്കുക എന്ന ലക്ഷ്യത്തിൽ കാട്ടു​മൃ​ഗ​ത്തി​ന്റെ മുദ്ര​യേൽക്കാൻ മനുഷ്യ​വർഗം നിർബ​ന്ധി​ത​രാ​ക്ക​പ്പെ​ട്ടി​രി​ക്കു​ന്നു. (വെളി​പ്പാ​ടു 13:16, 17) എന്നാൽ ഇതിന്‌ ഒരു വില ഒടു​ക്കേ​ണ്ട​തുണ്ട്‌! മുദ്ര സ്വീക​രി​ക്കു​ന്ന​വരെ “വല്ലാത്ത ദുർവ്രണം” ബാധി​ച്ച​വ​രാ​യി യഹോവ കണക്കാ​ക്കു​ന്നു. അവർ ജീവനു​ളള ദൈവത്തെ തളളി​ക്ക​ള​ഞ്ഞി​രി​ക്കു​ന്ന​താ​യി 1922 മുതൽ പരസ്യ​മാ​യി മുദ്ര​യി​ട്ടി​രി​ക്കു​ന്നു. അവരുടെ രാഷ്‌ട്രീയ പദ്ധതി​കൾക്കു വിജയം ഇല്ല, അവർ അതി​വേദന അനുഭ​വി​ക്കു​ക​യും ചെയ്യുന്നു. ആത്മീയ​മാ​യി അവർ അശുദ്ധ​രാണ്‌. അവർ അനുത​പി​ക്കു​ന്നി​ല്ലെ​ങ്കിൽ ഈ “വല്ലാത്ത” രോഗം മരണത്തി​ലേക്കു നയിക്കും, എന്തെന്നാൽ ഇപ്പോൾ യഹോ​വ​യു​ടെ ന്യായ​വി​ധി​ദി​വ​സ​മാണ്‌. ലോക​വ്യ​വ​സ്ഥി​തി​യു​ടെ ഒരു ഭാഗമാ​യി​രി​ക്കു​ന്ന​തി​നും ക്രിസ്‌തു​വി​ന്റെ പക്ഷത്തു​നിന്ന്‌ യഹോ​വയെ സേവി​ക്കു​ന്ന​തി​നും ഇടയിൽ ഒരു നിഷ്‌പ​ക്ഷ​സ്ഥാ​നം ഇല്ല.—ലൂക്കൊസ്‌ 11:23; താരത​മ്യം ചെയ്യുക: യാക്കോബ്‌ 4:4.

സമുദ്രം രക്തമാ​യി​ത്തീ​രു​ന്നു

5. (എ) രണ്ടാം കലശം ഒഴിക്കു​മ്പോൾ എന്തു സംഭവി​ക്കു​ന്നു? (ബി) പ്രതീ​കാ​ത്മക സമു​ദ്ര​ത്തിൽ വസിക്കു​ന്ന​വരെ യഹോവ എങ്ങനെ വീക്ഷി​ക്കു​ന്നു?

⁵ ദൈവ​കോ​പ​ത്തി​ന്റെ രണ്ടാമത്തെ കലശം ഇപ്പോൾ ഒഴി​ക്കേ​ണ്ട​തുണ്ട്‌. അതു മനുഷ്യ​വർഗത്തെ സംബന്ധിച്ച്‌ എന്തർഥ​മാ​ക്കും? യോഹ​ന്നാൻ നമ്മോടു പറയുന്നു: “രണ്ടാമ​ത്തവൻ തന്റെ കലശം സമു​ദ്ര​ത്തിൽ ഒഴിച്ചു; അപ്പോൾ അതു മരിച്ച​വന്റെ രക്തം​പോ​ലെ ആയിത്തീർന്നു; സമു​ദ്ര​ത്തി​ലെ ജീവജന്തു ഒക്കെയും ചത്തു​പോ​യി.” (വെളി​പ്പാ​ടു 16:3) രണ്ടാമത്തെ കാഹളം മുഴക്കൽപോ​ലെ ഈ കലശം “സമുദ്ര”ത്തിന്‌—യഹോ​വ​യിൽനിന്ന്‌ അന്യപ്പെട്ട പ്രക്ഷു​ബ്ധ​വും അനുസ​ര​ണ​മി​ല്ലാ​ത്ത​തും ആയ മനുഷ്യ​വർഗ​സ​മൂ​ഹ​ത്തിന്‌—എതിരാണ്‌. (യെശയ്യാ​വു 57:20, 21; വെളി​പ്പാ​ടു 8:8, 9) യഹോ​വ​യു​ടെ ദൃഷ്ടി​യിൽ, ഈ ‘സമുദ്രം’ രക്തം പോ​ലെ​യാണ്‌, ജീവി​കൾക്കു വാസ​യോ​ഗ്യ​മ​ല്ലാ​ത്ത​തു​തന്നെ. ക്രിസ്‌ത്യാ​നി​കൾ ലോക​ത്തി​ന്റെ ഭാഗമാ​യി​രി​ക്ക​രു​താ​ത്തത്‌ അതു​കൊ​ണ്ടാണ്‌. (യോഹ​ന്നാൻ 17:14) ദൈവ​കോ​പ​ത്തി​ന്റെ രണ്ടാം കലശത്തി​ന്റെ ഒഴിക്കൽ, ഈ സമു​ദ്ര​ത്തിൽ വസിക്കുന്ന മുഴു​മ​നു​ഷ്യ​വർഗ​വും യഹോ​വ​യു​ടെ ദൃഷ്ടി​യിൽ മരിച്ച​വ​രാ​ണെന്നു വെളി​പ്പെ​ടു​ത്തു​ന്നു. സാമു​ദാ​യിക ഉത്തരവാ​ദി​ത്വം നിമിത്തം മനുഷ്യ​വർഗം വൻതോ​തിൽ നിർദോ​ഷ​രക്തം ചൊരി​ഞ്ഞ​തിന്‌ അപരാ​ധി​യാണ്‌. യഹോ​വ​യു​ടെ കോപ​ദി​വസം വരു​മ്പോൾ അവർ അവന്റെ വധനിർവാ​ഹക ശക്തിക​ളു​ടെ കരങ്ങളാൽ അക്ഷരാർഥ​ത്തിൽ മരിക്കും.—വെളി​പ്പാ​ടു 19:17, 18; താരത​മ്യം ചെയ്യുക: എഫെസ്യർ 2:1; കൊ​ലൊ​സ്സ്യർ 2:13.

അവർക്കു രക്തം കുടി​പ്പാൻ കൊടു​ക്കു​ന്നു

6. മൂന്നാം കലശം ഒഴിക്കു​മ്പോൾ എന്തു സംഭവി​ക്കു​ന്നു, ഒരു ദൂതനിൽനി​ന്നും യാഗപീ​ഠ​ത്തിൽനി​ന്നും ഏതു വാക്കുകൾ കേൾക്കു​ന്നു?

⁶ മൂന്നാം കാഹളം മുഴക്കൽപോ​ലെ, ദൈവ​കോ​പ​ത്തി​ന്റെ മൂന്നാ​മത്തെ കലശത്തി​നും ശുദ്ധജല ഉറവു​ക​ളു​ടെ​മേൽ ഒരു ഫലമുണ്ട്‌. “മൂന്നാ​മത്തെ ദൂതൻ തന്റെ കലശം നദിക​ളി​ലും നീരു​റ​വു​ക​ളി​ലും ഒഴിച്ചു; അവ രക്തമാ​യി​ത്തീർന്നു. അപ്പോൾ ജലാധി​പ​തി​യായ ദൂതൻ ഇവ്വണ്ണം പറയു​ന്നതു ഞാൻ കേട്ടു: ഇരിക്കു​ന്ന​വ​നും ഇരുന്ന​വ​നു​മാ​യി പരിശു​ദ്ധ​നാ​യു​ളേ​ളാ​വേ, നീ ഇങ്ങനെ ന്യായം വിധി​ച്ച​തു​കൊ​ണ്ടു നീതി​മാൻ ആകുന്നു. വിശു​ദ്ധൻമാ​രു​ടെ​യും പ്രവാ​ച​കൻമാ​രു​ടെ​യും രക്തം അവർ ചിന്നി​ച്ച​തു​കൊ​ണ്ടു നീ അവർക്കു രക്തം കുടി​പ്പാൻ കൊടു​ത്തു; അതിന്നു അവർ യോഗ്യർ തന്നേ. അവ്വണ്ണം യാഗപീ​ഠ​വും: അതേ, സർവ്വശ​ക്തി​യു​ളള ദൈവ​മായ കർത്താവേ, നിന്റെ ന്യായ​വി​ധി​കൾ സത്യവും നീതി​യു​മു​ളളവ എന്നു പറയു​ന്നതു ഞാൻ കേട്ടു.”—വെളി​പ്പാ​ടു 16:4-7.

7. ‘നദിക​ളാ​ലും നീരു​റ​വു​ക​ളാ​ലും’ എന്തു ചിത്രീ​ക​രി​ക്ക​പ്പെ​ടു​ന്നു?

⁷ ഈ ‘നദിക​ളും നീരു​റ​വു​ക​ളും’ മമനു​ഷ്യ​ന്റെ തീരു​മാ​ന​ങ്ങ​ളെ​യും പ്രവർത്ത​ന​ങ്ങ​ളെ​യും നയിക്കുന്ന രാഷ്‌ട്രീ​യ​വും സാമ്പത്തി​ക​വും ശാസ്‌ത്രീ​യ​വും വിദ്യാ​ഭ്യാ​സ​പ​ര​വും സാമൂ​ഹി​ക​വും മതപര​വു​മായ തത്ത്വജ്ഞാ​നങ്ങൾ പോലെ ഈ ലോകം അംഗീ​ക​രി​ച്ചി​രി​ക്കുന്ന മാർഗ​നിർദേ​ശ​ത്തി​ന്റെ​യും ജ്ഞാനത്തി​ന്റെ​യും ശുദ്ധമായ ഉറവുകൾ എന്നു വിളി​ക്ക​പ്പെ​ടു​ന്ന​വയെ ചിത്രീ​ക​രി​ക്കു​ന്നു. ജീവദാ​യ​ക​മായ സത്യത്തി​നാ​യി ജീവന്റെ ഉറവായ യഹോ​വ​യി​ലേക്കു നോക്കു​ന്ന​തി​നു​പ​കരം മനുഷ്യർ ‘പൊട്ട​ക്കി​ണ​റു​കളെ കുഴി​ക്കു​ക​യും’ ‘ദൈവ​മു​മ്പാ​കെ ഭോഷ​ത്വ​മായ ഈ ലോക​ത്തി​ന്റെ ജ്ഞാനത്തിൽനിന്ന്‌’ ആഴത്തിൽ കുടി​ക്കു​ക​യും ചെയ്‌തി​രി​ക്കു​ന്നു.—യിരെ​മ്യാ​വു 2:13; 1 കൊരി​ന്ത്യർ 1:19; 2:6; 3:19; സങ്കീർത്തനം 36:9.

8. മനുഷ്യ​വർഗം രക്തക്കു​ററം വരുത്തി​ക്കൂ​ട്ടി​യി​രി​ക്കു​ന്നത്‌ ഏതു വിധങ്ങ​ളിൽ?

⁸ അത്തരം മലിന ‘വെളളം’ രക്തക്കു​റ​റ​മു​ള​ളവർ ആയിത്തീ​രു​ന്ന​തി​ലേക്കു മനുഷ്യ​രെ നയിച്ചി​രി​ക്കു​ന്നു, ദൃഷ്ടാ​ന്ത​ത്തിന്‌, പത്തു​കോ​ടി​യി​ല​ധി​കം ജീവൻ അപഹരി​ച്ചി​രി​ക്കുന്ന ഈ നൂററാ​ണ്ടി​ലെ യുദ്ധങ്ങ​ളിൽ ഗംഭീ​ര​മായ അളവിൽ രക്തം ചിന്താൻ അവരെ പ്രോ​ത്സാ​ഹി​പ്പി​ച്ച​തി​നാൽ തന്നെ. രണ്ടു ലോക​മ​ഹാ​യു​ദ്ധങ്ങൾ പൊട്ടി​പ്പു​റ​പ്പെട്ട ക്രൈ​സ്‌ത​വ​ലോ​ക​ത്തിൽ വിശേ​ഷി​ച്ചും മനുഷ്യർ ‘കുററ​മി​ല്ലാത്ത സാധു​ക്ക​ളു​ടെ രക്തം ചിന്നു​വാ​നു​ളള ബദ്ധപ്പാ​ടിൽ’ ആയിരു​ന്നു, ഇതിൽ ദൈവ​ത്തി​ന്റെ സ്വന്തം സാക്ഷി​ക​ളു​ടെ രക്തവും ഉൾപ്പെ​ട്ടി​രു​ന്നു. (യെശയ്യാ​വു 59:7; യിരെ​മ്യാ​വു 2:34) യഹോ​വ​യു​ടെ നീതി​യു​ളള നിയമങ്ങൾ ലംഘിച്ച്‌, മനുഷ്യ​വർഗം രക്തപ്പകർച്ച​കൾക്കാ​യി വൻതോ​തിൽ രക്തം ദുരു​പ​യോ​ഗ​പ്പെ​ടു​ത്തി​ക്കൊ​ണ്ടും സ്വയം രക്തക്കു​ററം വരുത്തി​യി​രി​ക്കു​ന്നു. (ഉല്‌പത്തി 9:3-5; ലേവ്യ​പു​സ്‌തകം 17:14; പ്രവൃ​ത്തി​കൾ 15:28, 29) ഇക്കാര​ണ​ത്താൽ, അവർ ഇപ്പോൾതന്നെ രക്തപ്പകർച്ച​ക​ളി​ലൂ​ടെ എയ്‌ഡ്‌സി​ന്റെ​യും കരൾവീ​ക്ക​ത്തി​ന്റെ​യും മററു​രോ​ഗ​ങ്ങ​ളു​ടെ​യും വർധനവു നിമിത്തം ദുഃഖം കൊയ്‌തി​രി​ക്കു​ന്നു. “ദൈവ​കോ​പ​ത്തി​ന്റെ വലിയ ചക്കിൽ” മെതി​ക്ക​പ്പെട്ട്‌ കുററ​വാ​ളി​കൾ ഏററവും വലിയ ശിക്ഷയ​നു​ഭ​വി​ക്കു​മ്പോൾ ഉടൻതന്നെ സകല രക്തപാ​ത​ക​ത്തി​നു​മു​ളള പൂർണ​പ്ര​തി​കാ​രം വരും.—വെളി​പ്പാ​ടു 14:19, 20.

9. മൂന്നാം കലശത്തി​ന്റെ ഒഴിക്ക​ലിൽ എന്തുൾപ്പെ​ടു​ന്നു?

⁹ മോശ​യു​ടെ നാളിൽ നൈൽനദി രക്തമാ​യി​ത്തീർന്ന​പ്പോൾ മററു ജലഉറ​വു​കൾ തേടി ഈജി​പ്‌തു​കാർക്കു ജീവി​ച്ചി​രി​ക്കാൻ കഴിഞ്ഞു. (പുറപ്പാ​ടു 7:24) എങ്കിലും ഇന്ന്‌, ആത്മീയ​ബാ​ധ​യു​ടെ സമയത്തു സാത്താന്റെ ലോക​ത്തിൽ ഒരിട​ത്തും ആളുകൾക്കു ജീവദാ​യ​ക​മായ വെളളം കണ്ടെത്താൻ കഴിയില്ല. ഈ മൂന്നാ​മത്തെ കലശത്തി​ന്റെ ഒഴിക്ക​ലിൽ ലോക​ത്തി​ലെ ‘നദിക​ളും നീരു​റ​വു​ക​ളും’ അവയിൽനി​ന്നു വലിച്ചു​കു​ടി​ക്കുന്ന എല്ലാവർക്കും ആത്മീയ​മ​രണം കൈവ​രു​ത്തുന്ന രക്തം പോ​ലെ​യാ​ണെന്നു ഘോഷി​ക്കു​ന്നത്‌ ഉൾപ്പെ​ടു​ന്നു. ആളുകൾ യഹോ​വ​യി​ലേക്കു തിരി​യു​ന്നി​ല്ലെ​ങ്കിൽ അവർ അവന്റെ പ്രതി​കൂല ന്യായ​വി​ധി കൊയ്യു​ന്നു.—താരത​മ്യം ചെയ്യുക: യെഹെ​സ്‌കേൽ 33:11.

10. “ജലാധി​പ​തി​യായ ദൂതൻ” എന്തറി​യി​ക്കു​ന്നു, ‘യാഗപീ​ഠം’ എന്തു സാക്ഷ്യം കൂട്ടുന്നു?

¹⁰ “ജലാധി​പ​തി​യായ ദൂതൻ,” അതായത്‌ ഈ കലശം വെളള​ത്തി​ലേക്ക്‌ ഒഴിക്കുന്ന ദൂതൻ യഹോ​വയെ സാർവ​ത്രിക ന്യായാ​ധി​പ​തി​യാ​യി മഹത്ത്വീ​ക​രി​ക്കു​ന്നു, അവന്റെ നീതി​യു​ളള വിധികൾ പരിപൂർണ​മാണ്‌. അതു​കൊണ്ട്‌ ഈ ന്യായ​വി​ധി​യെ​ക്കു​റിച്ച്‌ അവൻ പറയുന്നു: “അതിന്നു അവർ യോഗ്യർ.” നിസ്സം​ശ​യ​മാ​യും, ആയിര​ക്ക​ണ​ക്കി​നു വർഷങ്ങ​ളിൽ ഈ ദുഷ്ട​ലോ​ക​ത്തി​ന്റെ വ്യാജ ഉപദേ​ശ​ങ്ങ​ളാ​ലും തത്ത്വശാ​സ്‌ത്ര​ങ്ങ​ളാ​ലും വളർത്തിയ ക്രൂര​ത​യു​ടെ​യും രക്തച്ചൊ​രി​ച്ചി​ലി​ന്റെ​യും അധിക​പ​ങ്കും ദൂതൻ വ്യക്തി​പ​ര​മാ​യി നിരീ​ക്ഷി​ച്ചി​രു​ന്നു. അതു​കൊണ്ട്‌ യഹോ​വ​യു​ടെ ന്യായ​ത്തീർപ്പു നീതി​യു​ള​ള​താ​ണെന്ന്‌ അവനറി​യാം. ദൈവ​ത്തി​ന്റെ ‘യാഗപീ​ഠം’ പോലും സംസാ​രി​ക്കു​ന്നു. വെളി​പ്പാ​ടു 6:9, 10-ൽ രക്തസാ​ക്ഷി​മ​രണം വരിച്ച​വ​രു​ടെ ദേഹികൾ യാഗപീ​ഠ​ത്തി​ന്റെ കീഴിൽ ആയിരി​ക്കു​ന്ന​താ​യി പറയുന്നു. അതു​കൊണ്ട്‌, ‘യാഗപീ​ഠം’ യഹോ​വ​യു​ടെ വിധി​ക​ളു​ടെ ന്യായ​വും നീതി​യും സംബന്ധി​ച്ചു ശക്തമായ സാക്ഷ്യം കൂട്ടുന്നു.a തീർച്ച​യാ​യും, വളരെ​യ​ധി​കം രക്തം ചിന്തു​ക​യും ദുരു​പ​യോ​ഗ​പ്പെ​ടു​ത്തു​ക​യും ചെയ്‌തവർ യഹോവ അവരെ മരണവി​ധിക്ക്‌ ഏല്‌പി​ക്കു​ന്ന​തി​ന്റെ പ്രതീ​ക​മാ​യി രക്തം കുടി​ക്കാൻ നിർബ​ന്ധി​ത​രാ​ക്ക​പ്പെ​ടു​ന്നത്‌ ഉചിത​മാണ്‌.

മനുഷ്യ​രെ തീകൊ​ണ്ടു പൊള​ളി​ക്കു​ന്നു

11. ദൈവ​കോ​പ​ത്തി​ന്റെ നാലാം കലശത്തി​ന്റെ ലക്ഷ്യം എന്താണ്‌, അത്‌ ഒഴിക്ക​പ്പെ​ടു​മ്പോൾ എന്തു സംഭവി​ക്കു​ന്നു?

¹¹ ദൈവ​കോ​പ​ത്തി​ന്റെ നാലാം കലശത്തിന്‌ അതിന്റെ ലക്ഷ്യമാ​യി സൂര്യൻ ഉണ്ട്‌. യോഹ​ന്നാൻ നമ്മോടു പറയുന്നു: “നാലാ​മ​ത്തവൻ തന്റെ കലശം സൂര്യ​നിൽ ഒഴിച്ചു; അപ്പോൾ തീകൊ​ണ്ടു മനുഷ്യ​രെ ചുടു​വാൻ [പൊളളിക്കുവാൻ, NW] തക്കവണ്ണം അതിന്നു അധികാ​രം ലഭിച്ചു. മനുഷ്യർ അത്യു​ഷ്‌ണ​ത്താൽ വെന്തു​പോ​യി; ഈ ബാധക​ളു​ടെ​മേൽ അധികാ​ര​മു​ളള ദൈവ​ത്തി​ന്റെ നാമത്തെ ദുഷി​ച്ച​ത​ല്ലാ​തെ അവന്നു മഹത്വം കൊടു​പ്പാൻ തക്കവണ്ണം മാനസാ​ന്ത​ര​പ്പെ​ട്ടില്ല.”—വെളി​പ്പാ​ടു 16:8, 9.

12. ഈ ലോക​ത്തി​ന്റെ ‘സൂര്യൻ’ എന്താണ്‌, ഈ പ്രതീ​കാ​ത്മക സൂര്യന്‌ എന്ത്‌ അനുവ​ദി​ക്ക​പ്പെ​ടു​ന്നു?

¹² ഇന്ന്‌, വ്യവസ്ഥി​തി​യു​ടെ സമാപ​ന​ത്തിൽ, യേശു​വി​ന്റെ ആത്മീയ സഹോ​ദ​രൻമാർ “തങ്ങളുടെ പിതാ​വി​ന്റെ രാജ്യ​ത്തിൽ സൂര്യ​നെ​പ്പോ​ലെ പ്രകാശി”ക്കുന്നു. (മത്തായി 13:40, 43) യേശു​തന്നെ “നീതി​സൂ​ര്യൻ” ആണ്‌. (മലാഖി 4:2) എങ്കിലും മനുഷ്യ​വർഗ​ത്തിന്‌ അതിന്റെ സ്വന്തം “സൂര്യൻ” ഉണ്ട്‌, ദൈവ​രാ​ജ്യ​ത്തോ​ടു​ളള എതിർപ്പിൽ ശോഭി​ക്കാൻ ശ്രമി​ക്കുന്ന അതിന്റെ സ്വന്തം ഭരണാ​ധി​കാ​രി​ക​ളാ​ണവർ. ക്രൈ​സ്‌ത​വ​ലോ​ക​ത്തി​ന്റെ ആകാശ​ത്തി​ലു​ളള ‘സൂര്യ​നും ചന്ദ്രനും നക്ഷത്ര​ങ്ങ​ളും’ യഥാർഥ​ത്തിൽ വെളി​ച്ചമല്ല, അന്ധകാ​ര​ത്തി​ന്റെ ഉറവി​ട​ങ്ങ​ളാ​ണെന്നു നാലാം കാഹളം പ്രഖ്യാ​പി​ച്ചു. (വെളി​പ്പാ​ടു 8:12) ദൈവ​കോ​പ​ത്തി​ന്റെ നാലാം കലശം ഇപ്പോൾ ലോക​ത്തി​ന്റെ ‘സൂര്യൻ’ അസഹനീ​യ​മാ​യി ചൂടാ​കു​മെന്നു പ്രകട​മാ​ക്കു​ന്നു. സൂര്യ​നെ​പ്പോ​ലു​ളള നേതാ​ക്കൻമാ​രാ​യി വീക്ഷി​ക്ക​പ്പെ​ടു​ന്നവർ മനുഷ്യ​വർഗത്തെ ‘പൊള​ളി​ക്കും.’ ഇതിന്‌ പ്രതീ​കാ​ത്മക സൂര്യനെ അനുവ​ദി​ക്കും. മററു വാക്കു​ക​ളിൽ പറഞ്ഞാൽ, മനുഷ്യ​വർഗ​ത്തിൻമേ​ലു​ളള തന്റെ അഗ്നിമയ ന്യായ​വി​ധി​യു​ടെ ഭാഗ​മെ​ന്ന​നി​ല​യിൽ യഹോവ ഇതിന്‌ അനുവ​ദി​ക്കും. ഏതു വിധത്തി​ലാണ്‌ ഈ പൊള​ളി​ക്കൽ സംഭവി​ച്ചി​രി​ക്കു​ന്നത്‌?

13. ഈ ലോക​ത്തി​ലെ സൂര്യ​തു​ല്യ ഭരണാ​ധി​കാ​രി​കൾ മനുഷ്യ​വർഗത്തെ ‘പൊള​ളി​ച്ചി’രിക്കു​ന്നത്‌ ഏതു വിധത്തിൽ?

¹³ ഒന്നാം ലോക​മ​ഹാ​യു​ദ്ധ​ത്തി​നു​ശേഷം ഈ ലോക​ത്തി​ന്റെ ഭരണാ​ധി​കാ​രി​കൾ ലോക​സു​ര​ക്ഷി​ത​ത്വ​ത്തി​ന്റെ പ്രശ്‌നം പരിഹ​രി​ക്കു​ന്ന​തി​നു​ളള ശ്രമത്തിൽ സർവരാ​ജ്യ​സ​ഖ്യം രൂപീ​ക​രി​ച്ചു, എന്നാൽ ഇതു പരാജ​യ​പ്പെട്ടു. അതു​കൊ​ണ്ടു ഫാസി​സ​വും നാസി​സ​വും പോലു​ളള മററു പരീക്ഷണ ഭരണവി​ധങ്ങൾ പരി​ശോ​ധി​ക്ക​പ്പെട്ടു. കമ്മ്യൂ​ണി​സം വികാസം പ്രാപി​ച്ചു​കൊ​ണ്ടി​രു​ന്നു. മനുഷ്യ​വർഗ​ത്തി​ന്റെ ഭാഗ​ധേയം മെച്ച​പ്പെ​ടു​ത്തു​ന്ന​തി​നു പകരം ഈ വ്യവസ്ഥി​തി​യി​ലെ സൂര്യ​തു​ല്യ ഭരണാ​ധി​കാ​രി​കൾ ‘അത്യു​ഷ്‌ണ​ത്താൽ മനുഷ്യ​വർഗത്തെ പൊള​ളി​ക്കാൻ’ തുടങ്ങി. സ്‌പെ​യി​നി​ലെ​യും എത്യോ​പ്യ​യി​ലെ​യും മഞ്ചൂറി​യ​യി​ലെ​യും പ്രാ​ദേ​ശി​ക​യു​ദ്ധങ്ങൾ രണ്ടാം ലോക​മ​ഹാ​യു​ദ്ധ​ത്തി​ലേക്കു നയിച്ചു. നേരി​ട്ടോ പരോ​ക്ഷ​മാ​യോ തങ്ങളുടെ ദേശക്കാർ ഉൾപ്പെടെ കോടി​ക്ക​ണ​ക്കിന്‌ ആളുക​ളു​ടെ മരണത്തി​നു സ്വേച്ഛാ​ധി​പ​തി​ക​ളാ​യി​രുന്ന മുസ്സോ​ളി​നി​യും ഹിററ്‌ല​റും സ്‌ററാ​ലി​നും ഉത്തരവാ​ദി​ക​ളാ​യി​ത്തീർന്നു​വെന്ന്‌ ആധുനി​ക​ച​രി​ത്രം രേഖ​പ്പെ​ടു​ത്തു​ന്നു. കുറേ​ക്കൂ​ടെ അടുത്ത കാലത്ത്‌, സാർവ​ദേ​ശീ​യ​മോ ആഭ്യന്ത​ര​മോ ആയ സംഘട്ട​നങ്ങൾ വിയറ​റ്‌നാ​മും കമ്പൂച്ചി​യാ​യും ഇറാനും ലബനോ​നും അയർല​ണ്ടും പോലു​ളള രാജ്യ​ങ്ങ​ളി​ലെ​യും ലാററിൻ അമേരി​ക്കൻ രാജ്യ​ങ്ങ​ളി​ലെ​യും ആഫ്രി​ക്ക​യി​ലെ​യും ആളുകളെ ‘പൊള​ളി​ക്കു’കയുണ്ടാ​യി. തങ്ങളുടെ ബൃഹത്തായ അണുവാ​യു​ധ​ശേ​ഖ​ര​ത്താൽ മനുഷ്യ​വർഗത്തെ കത്തിച്ചു ചാമ്പലാ​ക്കാൻ കഴിയുന്ന വൻശക്തി​കൾ തമ്മിൽ നടക്കുന്ന പോരാ​ട്ടം ഇതി​നോ​ടു കൂട്ടുക. ഈ അന്ത്യനാ​ളു​ക​ളിൽ മനുഷ്യ​വർഗം തീർച്ച​യാ​യും ഒരു പൊള​ളി​ക്കുന്ന ‘സൂര്യന്‌’, അതിന്റെ നീതി​കെട്ട ഭരണാ​ധി​കാ​രി​കൾക്കു വിധേ​യ​രാ​ക്ക​പ്പെ​ട്ടി​രി​ക്കു​ന്നു. ദൈവ​കോ​പ​ത്തി​ന്റെ നാലാം കലശത്തി​ന്റെ ഒഴിക്കൽ ഈ ചരി​ത്ര​വ​സ്‌തു​തകൾ ചൂണ്ടി​ക്കാ​ണി​ച്ചി​രി​ക്കു​ന്നു, ദൈവ​ത്തി​ന്റെ ജനം അവ മുഴു​ഭൂ​മി​യി​ലും ഘോഷി​ക്കു​ക​യും ചെയ്‌തി​ട്ടുണ്ട്‌.

14. മനുഷ്യ​വർഗ​ത്തി​ന്റെ പ്രശ്‌ന​ങ്ങ​ളു​ടെ ഏക പരിഹാ​ര​മെ​ന്ന​നി​ല​യിൽ യഹോ​വ​യു​ടെ സാക്ഷികൾ സ്ഥിരമാ​യി എന്തു പഠിപ്പി​ച്ചി​ട്ടുണ്ട്‌, മൊത്ത​ത്തിൽ മനുഷ്യ​വർഗ​ത്തിൽനിന്ന്‌ എന്തു പ്രതി​ക​ര​ണ​ത്തോ​ടെ?

¹⁴ മനുഷ്യ​വർഗ​ത്തി​ന്റെ കുഴക്കുന്ന പ്രശ്‌ന​ങ്ങ​ളു​ടെ ഏകപരി​ഹാ​രം, യഹോവ എന്തിലൂ​ടെ തന്റെ നാമം വിശു​ദ്ധീ​ക​രി​ക്കാൻ ഉദ്ദേശി​ക്കു​ന്നു​വോ ആ ദൈവ​രാ​ജ്യ​മാ​ണെന്ന്‌ യഹോ​വ​യു​ടെ സാക്ഷികൾ സ്ഥിരമാ​യി പഠിപ്പി​ച്ചി​ട്ടുണ്ട്‌. (സങ്കീർത്തനം 83:4, 17, 18; മത്തായി 6:9, 10) എന്നിരു​ന്നാ​ലും മനുഷ്യ​വർഗം മൊത്ത​ത്തിൽ ഈ പരിഹാ​ര​മാർഗ​ത്തി​നു ചെവി​യ​ട​ച്ചു​ക​ള​ഞ്ഞി​രി​ക്കു​ന്നു. ഫറവോൻ യഹോ​വ​യു​ടെ പരമാ​ധി​കാ​രം അംഗീ​ക​രി​ക്കാൻ വിസമ്മ​തി​ച്ച​പ്പോൾ ചെയ്‌ത​തു​പോ​ലെ, രാജ്യത്തെ തളളി​ക്ക​ള​യുന്ന അനേകർ ദൈവ​നാ​മ​ത്തെ​യും ദുഷി​ക്കു​ന്നു. (പുറപ്പാ​ടു 1:8-10; 5:2) മിശി​ഹൈ​ക​രാ​ജ്യ​ത്തിൽ യാതൊ​രു താത്‌പ​ര്യ​വു​മി​ല്ലാ​തെ, ഈ എതിരാ​ളി​കൾ തങ്ങളുടെ സ്വന്തം മർദക മനുഷ്യ​ഭ​ര​ണാ​ധി​പ​ത്യ​മാ​കുന്ന ‘സൂര്യനു’ കീഴിൽ കഷ്ടപ്പെ​ടു​ന്ന​തി​നെ തിര​ഞ്ഞെ​ടു​ത്തി​രി​ക്കു​ന്നു.

കാട്ടു​മൃ​ഗ​ത്തി​ന്റെ സിംഹാ​സ​നം

15. (എ) അഞ്ചാമത്തെ കലശം എന്തിൻമേൽ ഒഴിക്ക​പ്പെ​ടു​ന്നു? (ബി) ‘കാട്ടു​മൃ​ഗ​ത്തി​ന്റെ സിംഹാ​സനം’ എന്താണ്‌, അതിൻമേൽ കലശം ഒഴിക്കു​ന്ന​തിൽ എന്തുൾപ്പെ​ടു​ന്നു?

¹⁵ അടുത്ത ദൂതൻ തന്റെ കലശം ഒഴിക്കു​ന്നത്‌ എന്തിൻമേ​ലാണ്‌? “അഞ്ചാമ​ത്തവൻ തന്റെ കലശം മൃഗത്തി​ന്റെ സിംഹാ​സ​ന​ത്തിൻമേൽ ഒഴിച്ചു”. (വെളി​പ്പാ​ടു 16:10എ) ‘മൃഗം’ സാത്താന്റെ ഭരണ വ്യവസ്ഥി​തി​യാണ്‌. കാട്ടു​മൃ​ഗം​തന്നെ അക്ഷരീ​യ​മ​ല്ലാ​ത്ത​തു​കൊണ്ട്‌ അതിന്‌ ഒരു അക്ഷരീയ സിംഹാ​സ​ന​മില്ല. എന്നിരു​ന്നാ​ലും ഒരു സിംഹാ​സ​ന​ത്തി​ന്റെ പരാമർശം കാട്ടു​മൃ​ഗം മനുഷ്യ​വർഗ​ത്തിൻമേൽ രാജകീയ അധികാ​രം പ്രയോ​ഗി​ച്ചി​രി​ക്കു​ന്ന​താ​യി പ്രകട​മാ​ക്കു​ന്നു; ഇതു മൃഗത്തി​ന്റെ തലകളിൽ ഓരോ​ന്നും ഒരു രാജമു​ടി ധരിച്ചി​രു​ന്നു​വെന്ന വസ്‌തു​ത​യോ​ടു ചേർച്ച​യി​ലാണ്‌. വാസ്‌ത​വ​ത്തിൽ ‘മൃഗത്തി​ന്റെ സിംഹാ​സനം’ ആ അധികാ​ര​ത്തി​ന്റെ അടിസ്ഥാ​നം അഥവാ ഉറവി​ട​മാണ്‌.b “അതിന്നു മഹാസർപ്പം തന്റെ ശക്തിയും സിംഹാ​സ​ന​വും വലിയ അധികാ​ര​വും കൊടു​ത്തു” എന്നു പറയു​മ്പോൾ കാട്ടു​മൃ​ഗ​ത്തി​ന്റെ രാജകീയ അധികാ​ര​ത്തി​ന്റെ യഥാർഥ അവസ്ഥ ബൈബിൾ വെളി​പ്പെ​ടു​ത്തു​ന്നു. (വെളി​പ്പാ​ടു 13:1, 2; 1 യോഹ​ന്നാൻ 5:19) അങ്ങനെ, കാട്ടു​മൃ​ഗ​ത്തി​ന്റെ സിംഹാ​സ​ന​ത്തിൻമേ​ലു​ളള കലശത്തി​ന്റെ ഒഴിക്ക​ലിൽ കാട്ടു​മൃ​ഗത്തെ പിന്താ​ങ്ങു​ന്ന​തി​ലും പ്രോ​ത്സാ​ഹി​പ്പി​ക്കു​ന്ന​തി​ലും സാത്താൻ വഹിച്ചി​ട്ടു​ള​ള​തും ഇപ്പോ​ഴും വഹിക്കു​ന്ന​തു​മായ യഥാർഥ പങ്കു വെളി​പ്പെ​ടു​ത്തുന്ന ഒരു ഘോഷണം ഉൾപ്പെ​ടു​ന്നു.

16. (എ) അറിഞ്ഞാ​യാ​ലും അല്ലെങ്കി​ലും ജനതകൾ ആരെ സേവി​ക്കു​ന്നു? വിശദീ​ക​രി​ക്കുക. (ബി) ലോകം സാത്താന്റെ വ്യക്തി​ത്വ​ത്തെ പ്രതി​ഫ​ലി​പ്പി​ക്കു​ന്ന​തെ​ങ്ങനെ? (സി) കാട്ടു​മൃ​ഗ​ത്തി​ന്റെ സിംഹാ​സനം എപ്പോൾ മറിച്ചി​ട​പ്പെ​ടും?

¹⁶ സാത്താ​നും ഈ ജനതക​ളും തമ്മിലു​ളള ബന്ധം നിലനിർത്ത​പ്പെ​ടു​ന്നത്‌ എങ്ങനെ? യേശു​വി​നെ പരീക്ഷി​ച്ച​പ്പോൾ സാത്താൻ ലോക​ത്തി​ലെ എല്ലാ രാജ്യ​ങ്ങ​ളെ​യും ഒരു ദർശന​ത്തിൽ അവനെ കാണി​ക്കു​ക​യും “ഈ അധികാ​രം ഒക്കെയും അതിന്റെ മഹത്വ​വും” വാഗ്‌ദത്തം ചെയ്യു​ക​യും ചെയ്‌തു. എന്നാൽ ഒരു വ്യവസ്ഥ​യു​ണ്ടാ​യി​രു​ന്നു—യേശു ആദ്യം സാത്താന്റെ മുമ്പാകെ ആരാധ​ന​യു​ടെ ഒരു ക്രിയ ചെയ്യണ​മാ​യി​രു​ന്നു. (ലൂക്കൊസ്‌ 4:5-7) ലോക​ത്തി​ലെ ഗവൺമെൻറു​കൾക്ക്‌ അവയുടെ അധികാ​രം അതിലും കുറഞ്ഞ വിലയ്‌ക്കു ലഭിക്കു​ന്ന​താ​യി നമുക്കു പ്രതീ​ക്ഷി​ക്കാൻ കഴിയു​മോ? ഒരിക്ക​ലു​മില്ല. ബൈബിൾ പറയു​ന്ന​ത​നു​സ​രി​ച്ചു സാത്താ​നാണ്‌ ഈ വ്യവസ്ഥി​തി​യു​ടെ ദൈവം, അതു​കൊ​ണ്ടു ജനതകൾ അറിഞ്ഞാ​യാ​ലും അല്ലെങ്കി​ലും അവനെ സേവി​ക്കു​ന്നു. (2 കൊരി​ന്ത്യർ 4:3, 4)c ഇപ്പോ​ഴത്തെ ലോക​വ്യ​വ​സ്ഥി​തി​യു​ടെ ഘടനയിൽ ഈ അവസ്ഥ വെളി​പ്പെ​ടു​ത്ത​പ്പെ​ടു​ന്നു, അത്‌ ഇടുങ്ങിയ ദേശീ​യ​ത​യു​ടെ​യും വിദ്വേ​ഷ​ത്തി​ന്റെ​യും സ്വാർഥ​താ​ത്‌പ​ര്യ​ത്തി​ന്റെ​യും മീതെ പണിയ​പ്പെ​ട്ടി​രി​ക്കു​ന്നു. സാത്താൻ ആഗ്രഹി​ക്കുന്ന വിധത്തിൽ അതു സംഘടി​പ്പി​ക്ക​പ്പെ​ട്ടി​രി​ക്കു​ന്നു—മനുഷ്യ​വർഗത്തെ അവന്റെ നിയ​ന്ത്ര​ണ​ത്തിൽ നിർത്തു​ന്ന​തി​നു​തന്നെ. ഭരണകൂ​ട​ത്തി​ലെ അഴിമതി, അധികാ​ര​മോ​ഹം, വഞ്ചനാ​പ​ര​മായ നയതന്ത്രം, ആയുധ​മ​ത്സരം—ഇവ സാത്താന്റെ അധഃപ​തിച്ച വ്യക്തി​ത്വ​ത്തെ പ്രതി​ഫ​ലി​പ്പി​ക്കു​ന്നു. ലോകം സാത്താന്റെ നീതി​കെട്ട നിലവാ​ര​ങ്ങളെ പിന്തു​ണ​ക്കു​ന്നു, അങ്ങനെ അവനെ അതിന്റെ ദൈവ​മാ​ക്കു​ന്നു. ആ മൃഗം നശിക്കു​ക​യും ദൈവ​ത്തി​ന്റെ സ്‌ത്രീ​യു​ടെ സന്തതി ഒടുവിൽ സാത്താനെ അഗാധ​ത്തിൽ അടയ്‌ക്കു​ക​യും ചെയ്യു​മ്പോൾ കാട്ടു​മൃ​ഗ​ത്തി​ന്റെ സിംഹാ​സനം മറിച്ചി​ട​പ്പെ​ടും.—ഉല്‌പത്തി 3:15; വെളി​പ്പാ​ടു 19:20, 21; 20:1-3.

അന്ധകാ​ര​വും കഠിന​വേ​ദ​ന​യും

17. (എ) കാട്ടു​മൃ​ഗ​ത്തി​ന്റെ രാജ്യത്തെ എപ്പോ​ഴും മൂടി​യി​രുന്ന ആത്മീയ അന്ധകാ​ര​ത്തോട്‌ അഞ്ചാം കലശത്തി​ന്റെ ഒഴിക്കൽ എങ്ങനെ ബന്ധപ്പെ​ട്ടി​രി​ക്കു​ന്നു? (ബി) ദൈവ​കോ​പ​ത്തി​ന്റെ അഞ്ചാം കലശം ഒഴിക്കു​ന്ന​തി​നോട്‌ ആളുകൾ എങ്ങനെ പ്രതി​ക​രി​ക്കു​ന്നു?

¹⁷ ഈ കാട്ടു​മൃ​ഗ​ത്തി​ന്റെ രാജ്യം അതു തുടങ്ങി​യ​തു​മു​തൽ ആത്മീയ അന്ധകാ​ര​ത്തിൽ ആണ്‌. (താരത​മ്യം ചെയ്യുക: മത്തായി 8:12; എഫെസ്യർ 6:11, 12.) അഞ്ചാം കലശം ഈ അന്ധകാ​ര​ത്തി​ന്റെ തീവ്ര​മായ പരസ്യ​പ്ര​ഖ്യാ​പനം കൈവ​രു​ത്തു​ന്നു. ദൈവ​കോ​പ​ത്തി​ന്റെ ഈ കലശം പ്രതീ​കാ​ത്മക കാട്ടു​മൃ​ഗ​ത്തി​ന്റെ സിംഹാ​സ​ന​ത്തിൻമേൽ തന്നെ ഒഴിക്കു​ന്ന​താ​യി അതു ചിത്രീ​ക​രി​ക്കു​ക​പോ​ലും ചെയ്യുന്നു. “അപ്പോൾ അതിന്റെ രാജ്യം ഇരുണ്ടു​പോ​യി. അവർ കഷ്ടതനി​മി​ത്തം നാവു കടിച്ചും​കൊ​ണ്ടു കഷ്ടങ്ങളും വ്രണങ്ങ​ളും ഹേതു​വാൽ സ്വർഗ്ഗ​ത്തി​ലെ ദൈവത്തെ ദുഷി​ച്ച​ത​ല്ലാ​തെ തങ്ങളുടെ പ്രവൃ​ത്തി​കളെ വിട്ടു മാനസാ​ന്ത​ര​പ്പെ​ട്ടില്ല.”—വെളി​പ്പാ​ടു 16:10ബി, 11.

18. അഞ്ചാമത്തെ കാഹള​വും ദൈവ​കോ​പ​ത്തി​ന്റെ അഞ്ചാം കലശ​മൊ​ഴി​ക്ക​ലും തമ്മിൽ എന്തു യോജി​പ്പുണ്ട്‌?

¹⁸ അഞ്ചാമത്തെ കാഹളം മുഴക്ക​ലും ദൈവ​കോ​പ​ത്തി​ന്റെ അഞ്ചാമത്തെ കലശവും തികച്ചും ഒന്നുത​ന്നെയല്ല, എന്തു​കൊ​ണ്ടെ​ന്നാൽ ആ കാഹള​നാ​ദം ഒരു വെട്ടു​ക്കി​ളി​ബാ​ധയെ പ്രസി​ദ്ധ​മാ​ക്കി. എന്നാൽ ആ വെട്ടു​ക്കി​ളി​ബാധ അഴിച്ചു​വി​ട്ട​പ്പോൾ സൂര്യ​ന്റെ​യും വായു​വി​ന്റെ​യും ഒരു ഇരുട്ടാ​ക്കൽ ഉണ്ടായി എന്നതു കുറി​ക്കൊ​ള​ളുക. (വെളി​പ്പാ​ടു 9:2-5) പുറപ്പാ​ടു 10:14, 15-ൽ യഹോവ ഈജി​പ്‌തിൽ ബാധ വരുത്താൻ ഉപയോ​ഗിച്ച വെട്ടു​ക്കി​ളി​ക​ളെ​ക്കു​റി​ച്ചു നാം വായി​ക്കു​ന്നു: “അതു​പോ​ലെ വെട്ടു​ക്കി​ളി ഉണ്ടായി​ട്ടില്ല, ഇനി അതു​പോ​ലെ ഉണ്ടാക​യു​മില്ല. അതു ഭൂതലത്തെ ഒക്കെയും മൂടി ദേശം അതിനാൽ ഇരുണ്ടു​പോ​യി.” അതെ, അന്ധകാരം! അഞ്ചാം കാഹളം മുഴക്ക​ലി​ന്റെ​യും ദൈവ​കോ​പ​ത്തി​ന്റെ അഞ്ചാം കലശം ഒഴിക്ക​ലി​ന്റെ​യും ഫലമായി ലോക​ത്തി​ന്റെ ആത്മീയ അന്ധകാരം ഇന്ന്‌ അങ്ങേയ​ററം സ്‌പഷ്ട​മാ​യി​രി​ക്കു​ന്നു. ആധുനിക വെട്ടു​ക്കി​ളി​സ​മൂ​ഹം ഘോഷി​ക്കുന്ന കുത്തുന്ന ദൂതു “വെളി​ച്ച​ത്തെ​ക്കാൾ ഇരുളി​നെ സ്‌നേഹി”ക്കുന്ന ആ ദുഷ്ടൻമാർക്കു വേദന​യും ദണ്ഡനവും കൈവ​രു​ത്തു​ന്നു.—യോഹ​ന്നാൻ 3:19.

19. വെളി​പ്പാ​ടു 16:10, 11-നു ചേർച്ച​യിൽ, സാത്താനെ ഈ വ്യവസ്ഥി​തി​യു​ടെ ദൈവ​മാ​യി പരസ്യ​മാ​യി തുറന്നു​കാ​ട്ടു​ന്നത്‌ എന്തിനി​ട​യാ​ക്കു​ന്നു?

¹⁹ ലോക​ഭ​ര​ണാ​ധി​കാ​രി​യെന്ന നിലയിൽ സാത്താൻ വളരെ അസന്തു​ഷ്ടി​യും കഷ്ടപ്പാ​ടും കൈവ​രു​ത്തി​യി​രി​ക്കു​ന്നു. ക്ഷാമം, യുദ്ധം, അക്രമം, മയക്കു​മ​രു​ന്നു ദുരു​പ​യോ​ഗം, ദുർമാർഗം, ലൈം​ഗി​ക​മാ​യി പകരുന്ന വ്യാധി​കൾ, സത്യസ​ന്ധ​ത​യി​ല്ലായ്‌മ, മതപര​മായ കാപട്യം—ഇവയും മററു​ള​ള​വ​യും സാത്താന്റെ വ്യവസ്ഥി​തി​യു​ടെ മുഖമു​ദ്ര​യാണ്‌. (താരത​മ്യം ചെയ്യുക: ഗലാത്യർ 5:19-21.) അതു​പോ​ലെ​തന്നെ, സാത്താനെ ഈ വ്യവസ്ഥി​തി​യു​ടെ ദൈവ​മെ​ന്ന​നി​ല​യിൽ പരസ്യ​മാ​യി തുറന്നു​കാ​ട്ടി​യത്‌ അവന്റെ പ്രമാ​ണ​ങ്ങ​ള​നു​സ​രി​ച്ചു ജീവി​ക്കു​ന്ന​വർക്കു വേദന​യും ലജ്ജയും കൈവ​രു​ത്തി. “അവർ കഷ്ടതനി​മി​ത്തം നാവു കടിച്ചു”തുടങ്ങി, വിശേ​ഷി​ച്ചും ക്രൈ​സ്‌ത​വ​ലോ​ക​ത്തിൽ. സത്യം അവരുടെ ജീവി​ത​രീ​തി തുറന്നു​കാ​ട്ടു​ന്ന​തു​കൊണ്ട്‌ അനേകർ നീരസ​പ്പെ​ടു​ന്നു. അതു ഭീഷണി​യാ​യി ചിലർ കാണുന്നു, അതു പ്രസി​ദ്ധ​മാ​ക്കു​ന്ന​വരെ അവർ പീഡി​പ്പി​ക്കു​ക​യും ചെയ്യുന്നു. അവർ ദൈവ​രാ​ജ്യ​ത്തെ തളളി​ക്ക​ള​യു​ക​യും യഹോ​വ​യു​ടെ വിശു​ദ്ധ​നാ​മത്തെ ദുഷി​ക്കു​ക​യും ചെയ്യുന്നു. അവരുടെ മതപര​മാ​യി അധഃപ​തിച്ച വ്രണാവസ്ഥ തുറന്നു​കാ​ട്ടു​ന്ന​തു​കൊണ്ട്‌ അവർ സ്വർഗ​ത്തി​ലെ ദൈവത്തെ ദുഷി​ക്കു​ന്നു. ഇല്ല, അവർ തങ്ങളുടെ പ്രവൃ​ത്തി​കൾ സംബന്ധി​ച്ചു “മാനസാ​ന്ത​രപ്പെ”ടുന്നില്ല. അതു​കൊണ്ട്‌ ഈ വ്യവസ്ഥി​തി​യു​ടെ അവസാ​ന​ത്തി​നു​മു​മ്പു കൂട്ട​ത്തോ​ടെ​യു​ളള ഒരു പരിവർത്തനം നമുക്കു പ്രതീ​ക്ഷി​ക്കാൻ കഴിയില്ല.—യെശയ്യാ​വു 32:6.

യൂഫ്ര​ട്ടീസ്‌ നദി വററി​പ്പോ​യി

20. ആറാമത്തെ കാഹള​നാ​ദ​വും ആറാമത്തെ കലശ​മൊ​ഴി​ക്ക​ലും യൂഫ്ര​ട്ടീസ്‌ നദിയെ ഉൾപ്പെ​ടു​ത്തു​ന്ന​തെ​ങ്ങനെ?

²⁰ ആറാം കാഹള​നാ​ദം “യൂഫ്രാ​ത്തേസ്‌ എന്ന മഹാന​ദീ​തീ​രത്തു ബന്ധിച്ചി​രി​ക്കുന്ന നാലു ദൂതൻമാ​രു”ടെ അഴിച്ചു​വി​ടൽ പ്രഖ്യാ​പി​ച്ചു. (വെളി​പ്പാ​ടു 9:14) ചരി​ത്ര​പ​ര​മാ​യി യൂഫ്ര​ട്ടീസ്‌ നദീതീ​രത്ത്‌ സ്ഥിതി​ചെ​യ്‌തി​രുന്ന മഹാന​ഗരം ബാബി​ലോൻ ആയിരു​ന്നു. മഹാബാ​ബി​ലോ​ന്റെ സുപ്ര​ധാന വീഴ്‌ച​യെ​ത്തു​ടർന്ന്‌ 1919-ൽ നാലു പ്രതീ​കാ​ത്മക ദൂതൻമാ​രു​ടെ അഴിച്ചു​വി​ട​ലു​ണ്ടാ​യി. (വെളി​പ്പാ​ടു 14:8) അപ്പോൾ, ദൈവ​കോ​പ​ത്തി​ന്റെ ആറാം കലശത്തി​ലും യൂഫ്ര​ട്ടീസ്‌ നദി ഉൾപ്പെ​ടു​ന്നു​വെ​ന്നതു ശ്രദ്ധാർഹ​മാണ്‌: “ആറാമ​ത്തവൻ തന്റെ കലശം യൂഫ്രാ​ത്തേസ്‌ എന്ന മഹാന​ദി​യിൽ ഒഴിച്ചു; കിഴക്കു​നി​ന്നു വരുന്ന രാജാ​ക്കൻമാർക്കു വഴി ഒരു​ങ്ങേ​ണ്ട​തി​ന്നു അതിലെ വെളളം വററി​പ്പോ​യി.” (വെളി​പ്പാ​ടു 16:12) ഇതും മഹാബാ​ബി​ലോ​നു ദുർവാർത്ത​യാണ്‌!

21, 22. (എ) ബാബി​ലോ​ന്റെ സംഗതി​യിൽ പൊ.യു.മു. 539-ൽ യൂഫ്ര​ട്ടീസ്‌ നദിയി​ലെ സംരക്ഷ​ണാ​ത്മക വെളളം വററി​പ്പോ​യ​തെ​ങ്ങനെ? (ബി) മഹാബാ​ബി​ലോൻ ഇരിക്കുന്ന ‘വെളളം’ എന്താണ്‌, ഈ പ്രതീ​കാ​ത്മക വെളളം ഇപ്പോൾതന്നെ വററി​ക്കൊ​ണ്ടി​രി​ക്കു​ന്നത്‌ എങ്ങനെ​യാണ്‌?

²¹ പുരാതന ബാബി​ലോ​ന്റെ പ്രതാ​പ​നാ​ളിൽ, യൂഫ്ര​ട്ടീ​സി​ലെ ജലസമൃ​ദ്ധി അവളുടെ പ്രതി​രോധ സംവി​ധാ​ന​ത്തിൽ ഒരു പ്രമുഖ ഘടകമാ​യി​രു​ന്നു. പൊ.യു.മു. 539-ൽ പേർഷ്യൻ നായക​നായ സൈറസ്‌ അതിന്റെ ഗതി തിരി​ച്ചു​വി​ട്ട​പ്പോൾ ആ വെളളം വററി​പ്പോ​യി. അങ്ങനെ, “കിഴക്കു​നി​ന്നു വരുന്ന” രാജാ​ക്കൻമാ​രായ പേർഷ്യ​നായ സൈറ​സി​നും മേദ്യ​നായ ദാര്യാ​വേ​ശി​നും ബാബി​ലോ​നിൽ പ്രവേ​ശി​ക്കാ​നും അതിനെ കീഴട​ക്കാ​നും വഴി തുറക്ക​പ്പെട്ടു. പ്രതി​സ​ന്ധി​യു​ടെ നാഴി​ക​യിൽ, ആ മഹാന​ഗ​രത്തെ പ്രതി​രോ​ധി​ച്ചു നിർത്തു​ന്ന​തിൽ യൂഫ്ര​ട്ടീസ്‌ നദി പരാജ​യ​മ​ടഞ്ഞു. (യെശയ്യാ​വു 44:27–45:7; യിരെ​മ്യാ​വു 51:36) വ്യാജ​മ​ത​ത്തി​ന്റെ ലോക​വ്യ​വ​സ്ഥി​തി​യാ​കുന്ന ആധുനിക ബാബി​ലോ​നും സമാന​മായ ചിലതു സംഭവി​ക്കാ​നി​രി​ക്കു​ന്നു.

²² മഹാബാ​ബി​ലോൻ “പെരു​വെ​ള​ള​ത്തിൻമീ​തെ ഇരിക്കു”ന്നു. വെളി​പ്പാ​ടു 17:1, 15 അനുസ​രിച്ച്‌ ഇവ ‘വംശങ്ങ​ളെ​യും പുരു​ഷാ​ര​ങ്ങ​ളെ​യും ജാതി​ക​ളെ​യും ഭാഷക​ളെ​യും’ പ്രതീ​ക​പ്പെ​ടു​ത്തു​ന്നു—അവൾ ഒരു സംരക്ഷ​ണ​മാ​യി കണക്കാ​ക്കി​യി​രി​ക്കുന്ന അനുയാ​യി​ക​ളു​ടെ കൂട്ടം​തന്നെ. എന്നാൽ “വെളളം” വററു​ക​യാണ്‌! മുമ്പ്‌ അവൾക്കു വലിയ സ്വാധീ​ന​മു​ണ്ടാ​യി​രുന്ന പശ്ചിമ​യൂ​റോ​പ്പിൽ പത്തു​കോ​ടി ആളുകൾ മതത്തെ പരസ്യ​മാ​യി തളളി​പ്പ​റ​ഞ്ഞി​ട്ടുണ്ട്‌. മററു ചില ദേശങ്ങ​ളിൽ മതത്തിന്റെ സ്വാധീ​നം നശിപ്പി​ക്കു​ന്ന​തി​നു ശ്രമി​ക്കുന്ന ഒരു പ്രഖ്യാ​പിത നയംത​ന്നെ​യുണ്ട്‌. ആ ദേശങ്ങ​ളി​ലെ പൊതു​ജ​നങ്ങൾ അവൾക്കു​വേണ്ടി നില​കൊ​ണ്ടി​ട്ടില്ല. അതു​പോ​ലെ​തന്നെ, മഹാബാ​ബി​ലോൻ നശിപ്പി​ക്ക​പ്പെ​ടാ​നു​ളള സമയം ആഗതമാ​കു​മ്പോൾ അവളുടെ അനുയാ​യി​ക​ളു​ടെ ക്ഷയിച്ചു​കൊ​ണ്ടി​രി​ക്കുന്ന സംഖ്യ ഒട്ടും​തന്നെ സംരക്ഷ​ണ​മ​ല്ലെന്നു തെളി​യും. (വെളി​പ്പാ​ടു 17:16) ശതകോ​ടി​ക​ളു​ടെ അംഗബ​ല​മു​ണ്ടെന്ന്‌ അവൾ അവകാ​ശ​പ്പെ​ടു​ന്നു​ണ്ടെ​ങ്കി​ലും മഹാബാ​ബി​ലോൻ “കിഴക്കു​നി​ന്നു വരുന്ന രാജാ​ക്കൻമാർ”ക്കെതിരെ പ്രതി​രോ​ധ​മ​റ​റ​വ​ളാ​യി സ്വയം കണ്ടെത്തും.

23. (എ) പൊ.യു.മു. 539-ൽ “കിഴക്കു​നി​ന്നു വരുന്ന” രാജാ​ക്കൻമാർ ആരായി​രു​ന്നു? (ബി) കർത്താ​വി​ന്റെ ദിവസ​ത്തിൽ ‘കിഴക്കു​നി​ന്നു വരുന്ന രാജാ​ക്കൻമാർ’ ആരാണ്‌, അവർ മഹാബാ​ബി​ലോ​നെ നശിപ്പി​ക്കു​ന്ന​തെ​ങ്ങനെ?

²³ ഈ രാജാ​ക്കൻമാർ ആരാണ്‌? പൊ.യു.മു. 539-ൽ അവർ പുരാതന ബാബി​ലോൻ നഗരത്തെ ജയിച്ച​ട​ക്കാൻ യഹോ​വ​യാൽ ഉപയോ​ഗി​ക്ക​പ്പെ​ട്ട​വ​രായ മേദ്യ​നായ ദാര്യാ​വേ​ശും പേർഷ്യ​നായ സൈറ​സും ആയിരു​ന്നു. കർത്താ​വി​ന്റെ ഈ ദിവസ​ത്തിൽ മഹാബാ​ബി​ലോ​നാ​കുന്ന വ്യാജ​മ​ത​വ്യ​വ​സ്ഥി​തി​യും മനുഷ്യ​ഭ​ര​ണ​കർത്താ​ക്ക​ളാൽ നശിപ്പി​ക്ക​പ്പെ​ടും. എന്നിരു​ന്നാ​ലും, വീണ്ടും ഇതൊരു ദിവ്യ​ന്യാ​യ​വി​ധി​യാ​യി​രി​ക്കും. മഹാബാ​ബി​ലോ​നെ​തി​രെ തിരി​യാ​നും അവളെ തീർത്തും നശിപ്പി​ക്കാ​നു​മു​ളള “ആശയം” ‘കിഴക്കു​നി​ന്നു വരുന്ന രാജാ​ക്കൻമാ​രായ’ യഹോ​വ​യാം ദൈവ​വും യേശു​ക്രി​സ്‌തു​വും മാനു​ഷ​ഭ​ര​ണാ​ധി​കാ​രി​ക​ളു​ടെ ഹൃദയ​ങ്ങ​ളിൽ നിവേ​ശി​പ്പി​ച്ചി​രി​ക്കും. (വെളി​പാട്‌ 17:16, 17, NW) ഈ ന്യായ​വി​ധി നടപ്പാ​ക്കാ​റാ​യി​രി​ക്കു​ക​യാ​ണെന്ന്‌ ആറാം കലശത്തി​ന്റെ ഒഴിക്കൽ പരസ്യ​മാ​യി പ്രഖ്യാ​പി​ക്കു​ന്നു!

24. (എ) യഹോ​വ​യു​ടെ കോപ​ത്തി​ന്റെ ആദ്യത്തെ ആറു കലശങ്ങ​ളു​ടെ ഉളളടക്കം പ്രസി​ദ്ധ​പ്പെ​ടു​ത്തി​യി​രി​ക്കു​ന്ന​തെ​ങ്ങനെ, എന്തു ഫലത്തോ​ടെ? (ബി) ദൈവ​കോ​പ​ത്തി​ന്റെ ശേഷി​ക്കുന്ന കലശ​ത്തെ​ക്കു​റി​ച്ചു നമ്മോടു പറയു​ന്ന​തി​നു​മുമ്പ്‌ വെളി​പാട്‌ എന്തു വെളി​പ്പെ​ടു​ത്തു​ന്നു?

²⁴ യഹോ​വ​യു​ടെ കോപ​ത്തി​ന്റെ ഈ ആദ്യത്തെ ആറു കലശങ്ങൾ ഗൗരവ​മു​ളള ഒരു സന്ദേശം വഹിക്കു​ന്നു. ദൈവ​ത്തി​ന്റെ ഭൗമിക ദാസൻമാർ ദൂതൻമാ​രു​ടെ പിന്തു​ണ​യോ​ടെ അവയുടെ ഉളളടക്കം ഭൂവ്യാ​പ​ക​മായ ഒരളവിൽ പ്രസി​ദ്ധ​പ്പെ​ടു​ത്തു​ന്ന​തിൽ തിരക്കു​ള​ള​വ​രാ​യി​രു​ന്നി​ട്ടുണ്ട്‌. ഈ വിധത്തിൽ, സാത്താന്റെ ലോക​വ്യ​വ​സ്ഥി​തി​യു​ടെ എല്ലാ ഘടകങ്ങൾക്കും വേണ്ടത്ര മുന്നറി​യി​പ്പു നൽക​പ്പെ​ട്ടി​രി​ക്കു​ന്നു, വ്യക്തി​കൾക്കു നീതി​യി​ലേക്കു തിരി​യു​ന്ന​തി​നും ജീവി​ച്ചി​രി​ക്കു​ന്ന​തി​നും യഹോവ ഒരവസരം നൽകു​ക​യും ചെയ്‌തി​രി​ക്കു​ന്നു. (യെഹെ​സ്‌കേൽ 33:14-16) ഇനിയും ദൈവ​കോ​പ​ത്തി​ന്റെ ഒരു കലശം​കൂ​ടെ ശേഷി​ക്കു​ന്നു. എന്നാൽ അതേക്കു​റിച്ച്‌ നമ്മോടു പറയു​ന്ന​തി​നു​മുമ്പ്‌, സാത്താ​നും അവന്റെ ഭൗമിക ഏജൻറൻമാ​രും യഹോ​വ​യു​ടെ ന്യായ​വി​ധി​ക​ളു​ടെ പ്രസി​ദ്ധ​മാ​ക്കൽ നിർവീ​ര്യ​മാ​ക്കാൻ ശ്രമി​ക്കു​ന്ന​തെ​ങ്ങ​നെ​യെന്നു വെളി​പാട്‌ വെളി​പ്പെ​ടു​ത്തു​ന്നു.

അർമ​ഗെ​ദോ​നി​ലേ​ക്കു​ളള കൂട്ടി​ച്ചേർക്കൽ

25. (എ) അശുദ്ധ​മായ തവളസ​മാന “നിശ്വ​സ്‌ത​മൊ​ഴിക”ളെക്കു​റിച്ച്‌ യോഹ​ന്നാൻ നമ്മോട്‌ എന്തു പറയുന്നു? (ബി) കർത്താ​വി​ന്റെ ദിവസ​ത്തിൽ ‘അശുദ്ധ നിശ്വ​സ്‌ത​മൊ​ഴി​ക​ളു​ടെ’ മ്ലേച്ഛമായ തവളസ​മാന പീഡ ഉണ്ടായ​തെ​ങ്ങനെ, എന്തു ഫലത്തോ​ടെ?

²⁵ യോഹ​ന്നാൻ നമ്മോടു പറയുന്നു: “മഹാസർപ്പ​ത്തി​ന്റെ വായിൽനി​ന്നും മൃഗത്തി​ന്റെ വായിൽനി​ന്നും കളള​പ്ര​വാ​ച​കന്റെ വായിൽനി​ന്നും തവള​യെ​പ്പോ​ലെ മൂന്നു അശുദ്ധാ​ത്മാ​ക്കൾ [അശുദ്ധ നിശ്വസ്‌തമൊഴികൾ, NW] പുറ​പ്പെ​ടു​ന്നതു ഞാൻ കണ്ടു. ഇവ സർവ്വഭൂ​ത​ല​ത്തി​ലും ഉളള രാജാ​ക്കൻമാ​രെ സർവ്വശ​ക്ത​നായ ദൈവ​ത്തി​ന്റെ മഹാദി​വ​സ​ത്തി​ലെ യുദ്ധത്തി​ന്നു കൂട്ടി​ച്ചേർപ്പാൻ അത്ഭുതങ്ങൾ ചെയ്‌തു​കൊ​ണ്ടു അവരുടെ അടുക്ക​ലേക്കു പുറ​പ്പെ​ടുന്ന ഭൂതാ​ത്മാ​ക്കൾ തന്നേ.” (വെളി​പ്പാ​ടു 16:13, 14) മോശ​യു​ടെ നാളിൽ, ഫറവോ​ന്റെ ഈജി​പ്‌തിൻമേൽ യഹോവ തവളക​ളു​ടെ ഒരു അറയ്‌ക്കത്തക്ക ബാധ വരുത്തി, തന്നിമി​ത്തം ‘ദേശം നാറാൻ തുടങ്ങി.’ (പുറപ്പാ​ടു 8:5-15) ഒരു വ്യത്യ​സ്‌ത​മായ ഉറവിൽനി​ന്നാ​യി​രു​ന്നെ​ങ്കി​ലും കർത്താ​വി​ന്റെ ദിവസ​ത്തി​ലും മ്ലേച്ഛമായ ഒരു തവളസ​മാന പീഡ ഉണ്ടായി. അതിൽ സാത്താന്റെ “അശുദ്ധ നിശ്വ​സ്‌ത​മൊ​ഴി​കൾ” ഉൾപ്പെ​ടു​ന്നു, വ്യക്തമാ​യും എല്ലാ മനുഷ്യ​ഭ​ര​ണാ​ധി​കാ​രി​ക​ളെ​യും, അതായതു “രാജാ​ക്കൻമാ​രെ” വശീക​രിച്ച്‌ യഹോ​വ​യാം ദൈവ​ത്തിന്‌ എതിരാ​ക്കി​നിർത്തു​ന്ന​തി​നു മെന​ഞ്ഞെ​ടു​ത്തി​ട്ടു​ളള പ്രചാ​ര​ണത്തെ വ്യക്തമാ​യി പ്രതീ​ക​പ്പെ​ടു​ത്തു​ന്ന​തു​തന്നെ. ദൈവ​കോ​പ​ത്തി​ന്റെ കലശങ്ങ​ളു​ടെ ഒഴിക്ക​ലി​നാൽ അവർ വ്യതി​ച​ലി​ക്കു​ന്നി​ല്ലെ​ന്നും ‘സർവ്വശ​ക്ത​നായ ദൈവ​ത്തി​ന്റെ മഹാദി​വ​സ​ത്തി​ലെ യുദ്ധം’ തുടങ്ങു​മ്പോൾ സാത്താന്റെ പക്ഷത്ത്‌ ഉറച്ചു​നിൽക്കു​ന്നു​വെ​ന്നും സാത്താൻ അങ്ങനെ ഉറപ്പു​വ​രു​ത്തു​ന്നു.

26. (എ) സാത്താന്യ പ്രചാ​രണം ഏതു മൂന്ന്‌ ഉറവു​ക​ളിൽനി​ന്നു വരുന്നു? (ബി) ‘കളള​പ്ര​വാ​ചകൻ’ എന്താണ്‌, നാം എങ്ങനെ അറിയു​ന്നു?

²⁶ പ്രചാ​രണം “മഹാസർപ്പ”ത്തിൽനി​ന്നും (സാത്താൻ) “മൃഗ”ത്തിൽനി​ന്നും (സാത്താന്റെ ഭൗമിക രാഷ്‌ട്രീയ സംവി​ധാ​നം) വരുന്നു, വെളി​പാ​ടിൽ നാം ഇതിനകം കണ്ടുക​ഴിഞ്ഞ ജീവികൾ തന്നെ. എന്നാൽ ‘കളള​പ്ര​വാ​ചകൻ’ എന്താണ്‌? പേരിൽ മാത്രം ഇതൊരു നവാഗ​ത​നാണ്‌. മുമ്പ്‌, ഏഴുത​ല​യു​ളള കാട്ടു​മൃ​ഗ​ത്തിൻമു​മ്പാ​കെ വലിയ അടയാ​ളങ്ങൾ കാണിച്ച കുഞ്ഞാ​ടി​നു​ള​ള​തു​പോ​ലെ രണ്ടു​കൊ​മ്പു​ളള ഒരു കാട്ടു​മൃ​ഗത്തെ നമുക്കു കാണി​ച്ചു​തന്നു. ഈ വഞ്ചകജീ​വി ആ കാട്ടു​മൃ​ഗ​ത്തി​ന്റെ ഒരു പ്രവാ​ച​ക​നെ​പ്പോ​ലെ പ്രവർത്തി​ച്ചു. അതു കാട്ടു​മൃ​ഗ​ത്തിന്‌ ഒരു പ്രതിമ ഉണ്ടാക്കി​ച്ചു​കൊ​ണ്ടു​പോ​ലും അതിന്റെ ആരാധ​നയെ പ്രോ​ത്സാ​ഹി​പ്പി​ച്ചു. (വെളി​പ്പാ​ടു 13:11-14) ഒരു കുഞ്ഞാ​ടി​നു​ള​ള​തു​പോ​ലെ രണ്ടു​കൊ​മ്പു​ളള ഈ കാട്ടു​മൃ​ഗം തന്നെയാ​യി​രി​ക്കണം ഇവിടെ പരാമർശി​ച്ചി​രി​ക്കുന്ന ‘കളള​പ്ര​വാ​ചകൻ.’ ഇതു സ്ഥിരീ​ക​രി​ച്ചു​കൊണ്ട്‌, രണ്ടു​കൊ​മ്പു​ളള പ്രതീ​കാ​ത്മക കാട്ടു​മൃ​ഗ​ത്തെ​പ്പോ​ലെ കളള​പ്ര​വാ​ചകൻ “[ഏഴുത​ല​യു​ളള കാട്ടു​മൃ​ഗ​ത്തിൻ] മുമ്പാകെ താൻ ചെയ്‌ത അടയാ​ള​ങ്ങ​ളാൽ മനുഷ്യ​രെ ചതിച്ചു മൃഗത്തി​ന്റെ മുദ്ര ഏല്‌പി​ക്ക​യും അതിന്റെ പ്രതി​മയെ നമസ്‌ക​രി​പ്പി​ക്ക​യും ചെയ്‌ത”തായി നാം പിന്നീടു വായി​ക്കു​ന്നു.—വെളി​പ്പാ​ടു 19:20.

27. (എ) ഏതു കാലോ​ചിത മുന്നറി​യിപ്പ്‌ യേശു​ക്രി​സ്‌തു​തന്നെ നൽകുന്നു? (ബി) ഭൂമി​യി​ലാ​യി​രു​ന്ന​പ്പോൾ യേശു ഏതു മുന്നറി​യി​പ്പു നൽകി? (സി) അപ്പോ​സ്‌ത​ല​നായ പൗലോസ്‌ യേശു​വി​ന്റെ മുന്നറി​യി​പ്പു പ്രതി​ധ്വ​നി​പ്പി​ച്ച​തെ​ങ്ങനെ?

²⁷ ഇത്രയ​ധി​കം സാത്താന്യ പ്രചാ​രണം ചുററു​മു​ണ്ടാ​യി​രി​ക്കെ, യോഹ​ന്നാൻ രേഖ​പ്പെ​ടു​ത്തുന്ന അടുത്ത വാക്കുകൾ തീർച്ച​യാ​യും കാലോ​ചി​ത​മാണ്‌: “ഞാൻ കളള​നെ​പ്പോ​ലെ വരും; തന്റെ ലജ്ജ കാണു​മാ​റു നഗ്നനായി നടക്കാ​തി​രി​പ്പാൻ തന്റെ ഉടുപ്പു [മേലങ്കികൾ, NW] സൂക്ഷി​ച്ചും ജാഗരി​ച്ചും കൊള​ളു​ന്നവൻ ഭാഗ്യ​വാൻ.” (വെളി​പ്പാ​ടു 16:15) “കളള​നെ​പ്പോ​ലെ” വരുന്നത്‌ ആരാണ്‌? യഹോ​വ​യു​ടെ വധാധി​കൃ​ത​നാ​യി അപ്രഖ്യാ​പിത സമയത്തു വരുന്ന യേശു​തന്നെ. (വെളി​പ്പാ​ടു 3:3; 2 പത്രൊസ്‌ 3:10) ഭൂമി​യി​ലാ​യി​രു​ന്ന​പ്പോൾ യേശു​വും തന്റെ വരവിനെ ഒരു കളള​ന്റേ​തി​നോട്‌ ഉപമിച്ചു, ഇപ്രകാ​രം പറഞ്ഞു​കൊണ്ട്‌: “നിങ്ങളു​ടെ കർത്താവു ഏതു ദിവസ​ത്തിൽ വരുന്നു എന്നു നിങ്ങൾ അറിയാ​യ്‌ക​കൊ​ണ്ടു ഉണർന്നി​രി​പ്പിൻ. അങ്ങനെ നിങ്ങൾ നിനെ​ക്കാത്ത നാഴി​ക​യിൽ മനുഷ്യ​പു​ത്രൻ വരുന്ന​തു​കൊ​ണ്ടു നിങ്ങളും ഒരുങ്ങി​യി​രി​പ്പിൻ.” (മത്തായി 24:42, 44; ലൂക്കൊസ്‌ 12:37, 40) ഈ മുന്നറി​യിപ്പ്‌ പ്രതി​ധ്വ​നി​പ്പി​ച്ചു​കൊണ്ട്‌ അപ്പോ​സ്‌ത​ല​നായ പൗലോസ്‌ പറഞ്ഞു: “കളളൻ രാത്രി​യിൽ വരു​മ്പോ​ലെ​തന്നെ യഹോ​വ​യു​ടെ ദിവസം വരുന്നു. അവർ ‘സമാധാ​ന​വും സുരക്ഷി​ത​ത്വ​വും!’ എന്നു പറയു​ന്ന​തെ​പ്പോ​ഴോ അപ്പോൾ പെട്ടെ​ന്നു​ളള നാശം അവരു​ടെ​മേൽ ക്ഷണത്തിൽ വരുന്നു.” “സമാധാ​ന​വും സുരക്ഷി​ത​ത്വ​വും” എന്ന ആ വ്യാജ​പ്ര​ഖ്യാ​പനം നടത്തു​ന്ന​തി​ലേക്കു സാത്താൻ ഇപ്പോൾപോ​ലും ജനതകളെ വശീക​രി​ച്ചു​കൊ​ണ്ടി​രി​ക്കു​ക​യാണ്‌.—1 തെസ​ലോ​നി​ക്യർ 5:2, 3, NW.

28. ലൗകിക സമ്മർദങ്ങൾ ചെറു​ത്തു​നിൽക്കു​ന്നതു സംബന്ധിച്ച്‌ യേശു എന്തു മുന്നറി​യി​പ്പു നൽകി, ക്രിസ്‌ത്യാ​നി​കൾ ഒരു “കെണി​പോ​ലെ” തങ്ങളു​ടെ​മേൽ വന്നുഭ​വി​ക്കാൻ ആഗ്രഹി​ക്കാത്ത “ആ ദിവസം” എന്താണ്‌?

²⁸ പ്രചാ​ര​ണ​പൂ​രി​ത​മായ ഈ ലോകം ക്രിസ്‌ത്യാ​നി​ക​ളു​ടെ​മേൽ വരുത്തി​യേ​ക്കാ​വുന്ന സമ്മർദ​ങ്ങ​ളെ​ക്കു​റി​ച്ചും യേശു മുന്നറി​യി​പ്പു നൽകി. അവൻ പറഞ്ഞു: “നിങ്ങളു​ടെ ഹൃദയം അതിഭ​ക്ഷ​ണ​ത്താ​ലും മദ്യപാ​ന​ത്താ​ലും ഉപജീ​വ​ന​ചി​ന്ത​ക​ളാ​ലും ഭാര​പ്പെ​ട്ടി​ട്ടു ആ ദിവസം നിങ്ങൾക്കു പെട്ടെന്നു കണി​പോ​ലെ [കെണിപോലെ, NW] വരാതി​രി​പ്പാൻ സൂക്ഷി​ച്ചു​കൊൾവിൻ. . . . ആകയാൽ ഈ സംഭവി​പ്പാ​നു​ളള എല്ലാറ​റി​ന്നും ഒഴിഞ്ഞു​പോ​കു​വാ​നും മനുഷ്യ​പു​ത്രന്റെ മുമ്പിൽ നില്‌പാ​നും നിങ്ങൾ പ്രാപ്‌ത​രാ​കേ​ണ്ട​തി​ന്നു സദാകാ​ല​വും ഉണർന്നും പ്രാർത്ഥി​ച്ചും​കൊ​ണ്ടി​രി​പ്പിൻ.” (ലൂക്കൊസ്‌ 21:34-36) “ആ ദിവസം” ‘സർവ്വശ​ക്ത​നായ ദൈവ​ത്തി​ന്റെ മഹാദി​വസം’ ആണ്‌. (വെളി​പ്പാ​ടു 16:14) യഹോ​വ​യു​ടെ പരമാ​ധി​കാ​ര​ത്തി​ന്റെ സംസ്ഥാ​പ​ന​ത്തി​നു​ളള “ആ ദിവസം” സമീപി​ക്കവേ, ജീവ​തോ​ത്‌ക​ണ്‌ഠ​കളെ തരണം ചെയ്യു​ന്നത്‌ പൂർവാ​ധി​കം പ്രയാ​സ​ക​ര​മാ​യി​ത്തീ​രു​ന്നു. ആ ദിവസം വരുന്ന​തു​വരെ ഉണർന്നി​രു​ന്നു​കൊണ്ട്‌, ക്രിസ്‌ത്യാ​നി​കൾ ജാഗ്ര​ത​യും ശ്രദ്ധയു​മു​ള​ള​വ​രാ​യി​രി​ക്കേണ്ട ആവശ്യ​മുണ്ട്‌.

29, 30. (എ) ഉറങ്ങു​ന്ന​വ​രാ​യി കണ്ടെത്ത​പ്പെ​ടു​ന്നവർ അവരുടെ “മേലങ്കി”കളുടെ നഷ്ടത്താൽ ലജ്ജിത​രാ​ക്ക​പ്പെ​ടു​മെ​ന്നു​ളള യേശു​വി​ന്റെ മുന്നറി​യി​പ്പി​നാൽ എന്ത്‌ അർഥമാ​ക്ക​പ്പെ​ടു​ന്നു? (ബി) മേലങ്കി​കൾ ധരിക്കു​ന്ന​യാ​ളെ എന്തായി തിരി​ച്ച​റി​യി​ക്കു​ന്നു? (സി) ഒരു വ്യക്തിക്ക്‌ അയാളു​ടെ പ്രതീ​കാ​ത്മക മേലങ്കി​കൾ എങ്ങനെ നഷ്ടപ്പെ​ട്ടേ​ക്കാം, എന്തു ഫലത്തോ​ടെ?

²⁹ ഉറങ്ങു​ന്ന​വ​രാ​യി കണ്ടെത്ത​പ്പെ​ടു​ന്നവർ അവരുടെ “മേലങ്കി”കളുടെ നഷ്ടത്താൽ ലജ്ജിത​രാ​യി​ത്തീ​രു​മെ​ന്നു​ളള മുന്നറി​യി​പ്പി​നാൽ എന്തർഥ​മാ​ക്ക​പ്പെ​ടു​ന്നു? പുരാതന ഇസ്രാ​യേ​ലിൽ, ആലയത്തിൽ കാവൽ ചുമത​ല​യു​ളള ഏതു പുരോ​ഹി​ത​നും അല്ലെങ്കിൽ ലേവ്യ​നും ഒരു ഭാരിച്ച ഉത്തരവാ​ദി​ത്വ​മു​ണ്ടാ​യി​രു​ന്നു. ആ കർത്തവ്യ​ത്തി​നി​ട​യിൽ ആരെങ്കി​ലും ഉറങ്ങു​ന്ന​വ​നാ​യി പിടി​ക്ക​പ്പെ​ട്ടാൽ അയാളു​ടെ അങ്കികൾ ഉരിഞ്ഞു കത്തിച്ചു​ക​ള​ഞ്ഞി​രു​ന്ന​താ​യി യഹൂദ ഭാഷ്യ​കാ​രൻമാർ നമ്മോടു പറയുന്നു, അങ്ങനെ അയാളെ പരസ്യ​മാ​യി ലജ്ജിപ്പി​ച്ചി​രു​ന്നു.

³⁰ സമാന​മായ ഒന്ന്‌ ഇന്നു സംഭവി​ച്ചേ​ക്കാ​മെന്ന്‌ യേശു ഇവിടെ മുന്നറി​യി​പ്പു നൽകുന്നു. പുരോ​ഹി​ത​രും ലേവ്യ​രും യേശു​വി​ന്റെ അഭിഷിക്ത സഹോ​ദ​രൻമാ​രെ മുൻനി​ഴ​ലാ​ക്കി. (1 പത്രൊസ്‌ 2:9) എന്നാൽ യേശു​വി​ന്റെ മുന്നറി​യി​പ്പു വിശാ​ല​ത​യിൽ മഹാപു​രു​ഷാ​ര​ത്തി​നും ബാധക​മാ​കു​ന്നു. ഇവിടെ പരാമർശി​ക്കുന്ന മേലങ്കി​കൾ അതു ധരിക്കു​ന്ന​യാ​ളി​നെ യഹോ​വ​യു​ടെ ഒരു ക്രിസ്‌തീ​യ​സാ​ക്ഷി​യാ​യി തിരി​ച്ച​റി​യി​ക്കു​ന്നു. (താരത​മ്യം ചെയ്യുക: വെളി​പ്പാ​ടു 3:18; 7:14.) തന്നെ താരാ​ട്ടി​യു​റ​ക്കു​ന്ന​തിന്‌ അഥവാ നിഷ്‌ക്രി​യ​നാ​ക്കു​ന്ന​തി​നു സാത്താന്റെ ലോക​ത്തി​ന്റെ സമ്മർദ​ങ്ങളെ ആരെങ്കി​ലും അനുവ​ദി​ക്കു​ന്നെ​ങ്കിൽ അവർക്ക്‌ ഈ മേലങ്കി​കൾ നഷ്ടപ്പെ​ടാൻ ഇടയുണ്ട്‌—മററു വാക്കു​ക​ളിൽ പറഞ്ഞാൽ അവർക്കു ക്രിസ്‌ത്യാ​നി​ക​ളെന്ന നിലയി​ലു​ളള ശുദ്ധമായ വ്യക്തി​ത്വം നഷ്ടമാ​കും. അത്തരം ഒരവസ്ഥ ലജ്ജാക​ര​മാ​യി​രി​ക്കും. അത്‌ ഒരുവനെ പൂർണ​നഷ്ടം ഭവിക്കു​ന്ന​തി​ന്റെ അപകട​ത്തി​ലാ​ക്കും.

31. (എ) വെളി​പ്പാ​ടു 16:16 ക്രിസ്‌ത്യാ​നി​കൾ ഉണർന്നി​രി​ക്കേ​ണ്ട​തി​ന്റെ ആവശ്യം ഊന്നി​പ്പ​റ​യു​ന്ന​തെ​ങ്ങനെ? (ബി) ചില മതനേ​താ​ക്കൾ അർമ​ഗെ​ദോ​നെ സംബന്ധിച്ച്‌ ഏത്‌ ഊഹാ​പോ​ഹം നടത്തി​യി​രി​ക്കു​ന്നു?

³¹ വെളി​പാ​ടി​ലെ അടുത്ത വാക്യം നിവൃ​ത്തി​യോ​ടു കൂടുതൽ അടുക്കു​മ്പോൾ ക്രിസ്‌ത്യാ​നി​കൾ ഉണർന്നി​രി​ക്കേ​ണ്ട​തി​ന്റെ ആവശ്യം കൂടുതൽ അടിയ​ന്തി​ര​മാ​ക്കി​ത്തീർക്കു​ന്നു: “അവ [ഭൂതനി​ശ്വ​സ്‌ത​മൊ​ഴി​കൾ] അവരെ [ഭൗമിക രാജാ​ക്കൻമാർ അഥവാ ഭരണാ​ധി​കാ​രി​കൾ] എബ്രാ​യ​ഭാ​ഷ​യിൽ ഹർമ്മ​ഗെ​ദ്ദോൻ എന്നു പേരുളള സ്ഥലത്തിൽ കൂട്ടി​ച്ചേർത്തു.” (വെളി​പ്പാ​ടു 16:16) ഏറെ സാധാ​ര​ണ​മാ​യി അർമ​ഗെ​ദോൻ എന്നു വിവർത്തനം ചെയ്യ​പ്പെ​ടുന്ന ഈ പേര്‌, ബൈബി​ളിൽ ഒരിക്കൽ മാത്രമേ പ്രത്യ​ക്ഷ​പ്പെ​ടു​ന്നു​ളളൂ. എന്നാൽ അതു മനുഷ്യ​വർഗ​ത്തി​ന്റെ ഭാവനയെ ആളിക്ക​ത്തി​ച്ചി​രി​ക്കു​ന്നു. ലോക​നേ​താ​ക്കൻമാർ ഒരു ന്യൂക്ലി​യർ അർമ​ഗെ​ദോ​ന്റെ സാധ്യത സംബന്ധി​ച്ചു മുന്നറി​യി​പ്പു നൽകി​യി​ട്ടുണ്ട്‌. ബൈബിൾ കാലങ്ങ​ളിൽ അനേകം നിർണാ​യക യുദ്ധങ്ങ​ളു​ടെ സ്ഥാനമാ​യി​രുന്ന പുരാതന മെഗി​ദോ നഗര​ത്തോ​ടും അർമ​ഗെ​ദോ​നെ ബന്ധപ്പെ​ടു​ത്തി​യി​രി​ക്കു​ന്നു, അതു​കൊണ്ട്‌, ചില മതനേ​താ​ക്കൻമാർ ഭൂമി​യി​ലെ അന്തിമ​യു​ദ്ധം ആ പരിമി​ത​മായ സ്ഥലത്തു നടക്കു​മെന്ന്‌ ഊഹാ​പോ​ഹം നടത്തി​യി​രി​ക്കു​ന്നു. ഇതിൽ അവരുടെ പക്ഷത്ത്‌ ഒട്ടും സത്യമില്ല.

32, 33. ഒരു അക്ഷരാർഥ സ്ഥലമാ​യി​രി​ക്കു​ന്ന​തി​നു​പ​കരം ഹർമ​ഗെ​ദോൻ അഥവാ അർമ​ഗെ​ദോൻ എന്ന പേര്‌ എന്തിനെ പ്രതി​നി​ധാ​നം ചെയ്യുന്നു? (ബി) മറേറതു ബൈബിൾ പദങ്ങൾ ‘അർമ​ഗെ​ദോ​നു’ സമാന​മാണ്‌, അല്ലെങ്കിൽ അതി​നോ​ടു ബന്ധമു​ള​ള​താണ്‌? (സി) ഏഴാമത്തെ ദൂതൻ ദൈവ​കോ​പ​ത്തി​ന്റെ അന്തിമ കലശം ഒഴിക്കു​ന്ന​തി​നു​ളള സമയം ഏതായി​രി​ക്കും?

³² ഹർമ​ഗെ​ദോൻ എന്ന പേരിന്റെ അർഥം “മെഗി​ദോ പർവതം” എന്നാണ്‌. എന്നാൽ ഒരു അക്ഷരാർഥ സ്ഥലമാ​യി​രി​ക്കു​ന്ന​തി​നു പകരം, അത്‌ എല്ലാ ജനതക​ളും യഹോ​വ​ക്കെ​തി​രെ എവിടെ കൂട്ടി​ച്ചേർക്ക​പ്പെ​ടു​ക​യും ഒടുവിൽ എവി​ടെ​വെച്ച്‌ അവൻ അവരെ നശിപ്പി​ക്കു​ക​യും ചെയ്യു​മോ ആ ലോക സാഹച​ര്യ​ത്തെ പ്രതി​നി​ധാ​നം ചെയ്യുന്നു. വ്യാപ്‌തി​യിൽ ഇത്‌ ആഗോ​ള​മാണ്‌. (യിരെ​മ്യാ​വു 25:31-33; ദാനീ​യേൽ 2:44) അതു “ദൈവ​കോ​പ​ത്തി​ന്റെ വലിയ ചക്കി”നും യഹോ​വ​യാ​ലു​ളള വധനിർവ​ഹ​ണ​ത്തി​നാ​യി ജനതകൾ കൂട്ടി​ച്ചേർക്ക​പ്പെ​ടുന്ന “വിധി​യു​ടെ താഴ്‌വര”ക്കും അഥവാ “യഹോ​ശാ​ഫാത്ത്‌ താഴ്‌വര”ക്കും സമാന​മാണ്‌. (വെളി​പ്പാ​ടു 14:19; യോവേൽ 3:12, 14) കൂടാതെ, അതു മാഗോ​ഗി​ലെ ഗോഗി​ന്റെ സാത്താന്യ സൈന്യ​ത്തെ നശിപ്പി​ക്കുന്ന സ്ഥലമായ ‘ഇസ്രാ​യേൽ മണ്ണി​നോ​ടും’ വടക്കേ ദേശത്തെ രാജാവു മഹാ​പ്ര​ഭു​വായ മീഖാ​യേ​ലി​ന്റെ കരങ്ങളാൽ “അന്തരിക്കു”ന്നതിനു വരുന്ന “സമു​ദ്ര​ത്തി​ന്നും മഹത്വ​മു​ളള വിശു​ദ്ധ​പർവ്വ​ത​ത്തി​ന്നും മദ്ധ്യേ”യുളള സ്ഥാന​ത്തോ​ടും ബന്ധപ്പെ​ട്ടി​രി​ക്കു​ന്നു.—എസെക്കി​യേൽ 38:16-18, 22, 23, NW; ദാനീ​യേൽ 11:45–12:1.

³³ സാത്താ​നിൽനി​ന്നും അവന്റെ ഭൗമിക ഏജൻറൻമാ​രിൽനി​ന്നും ഉത്ഭവി​ക്കുന്ന തവളക്ക​ര​ച്ചിൽ പ്രചാ​ര​ണ​ത്താൽ ജനതകൾ ഈ സാഹച​ര്യ​ത്തി​ലേക്കു വശീക​രി​ക്ക​പ്പെട്ടു കഴിയു​മ്പോൾ, അത്‌ ഏഴാമത്തെ ദൂതനു ദൈവ​കോ​പ​ത്തി​ന്റെ അന്തിമ കലശം ഒഴിക്കു​ന്ന​തി​നു​ളള സമയമാ​യി​രി​ക്കും.

“സംഭവി​ച്ചു തീർന്നു”

34. ഏഴാമത്തെ ദൂതൻ തന്റെ കലശം എന്തിൽ ഒഴിക്കു​ന്നു, “ദൈവാ​ല​യ​ത്തി​ലെ സിംഹാ​സ​ന​ത്തിൽനി​ന്നു” ഏതു പ്രഖ്യാ​പനം പുറ​പ്പെ​ടു​ന്നു?

³⁴ “ഏഴാമ​ത്തവൻ തന്റെ കലശം ആകാശ​ത്തിൽ [വായുവിൽ, NW] ഒഴിച്ചു; അപ്പോൾ സംഭവി​ച്ചു​തീർന്നു എന്നു ഒരു മഹാശബ്ദം ദൈവാ​ല​യ​ത്തി​ലെ സിംഹാ​സ​ന​ത്തിൽനി​ന്നു വന്നു.”—വെളി​പ്പാ​ടു 16:17.

35. (എ) വെളി​പ്പാ​ടു 16:17-ലെ “വായു” എന്താണ്‌? (ബി) തന്റെ കലശം വായു​വിൽ ഒഴിക്കു​ന്ന​തി​നാൽ ഏഴാമത്തെ ദൂതൻ എന്തു പ്രകട​മാ​ക്കു​ന്നു?

³⁵ ബാധ ഏൽക്കേണ്ട ജീവൻ നിലനിർത്തുന്ന അന്തിമ മാധ്യമം “വായു” ആണ്‌. എന്നാൽ ഇത്‌ അക്ഷരാർഥ വായുവല്ല. അക്ഷരാർഥ ഭൂമി​യോ സമു​ദ്ര​മോ ശുദ്ധജല ഉറവു​ക​ളോ സൂര്യ​നോ യഹോ​വ​യു​ടെ കയ്യാൽ ന്യായ​വി​ധി അനുഭ​വി​ക്കേ​ണ്ട​തി​ല്ലാ​ത്ത​തു​പോ​ലെ അക്ഷരാർഥ വായു​വി​നെ സംബന്ധി​ച്ചും യഹോ​വ​യു​ടെ പ്രതി​കൂല ന്യായ​വി​ധി​കൾ അർഹി​ക്ക​ത്ത​ക്ക​താ​യി യാതൊ​ന്നും ഇല്ല. പകരം, ഇതു പൗലോസ്‌ സാത്താനെ ‘വായു​വിൻ അധികാ​ര​ത്തി​ന്റെ ഭരണാ​ധി​കാ​രി’ എന്നു വിളി​ച്ച​പ്പോൾ അവൻ ചർച്ച​ചെയ്‌ത “വായു” ആണ്‌. (എഫേസ്യർ 2:2, NW) അത്‌ ഇന്നു ലോകം ശ്വസി​ക്കുന്ന സാത്താന്യ “വായു,” അവന്റെ മുഴു​ദു​ഷ്ട​വ്യ​വ​സ്ഥി​തി​യു​ടെ​യും വിശേ​ഷ​ല​ക്ഷ​ണ​മായ ആത്മാവ്‌ അഥവാ പൊതു മാനസിക ചായ്‌വ്‌, യഹോ​വ​യു​ടെ സ്ഥാപന​ത്തി​നു വെളി​യി​ലു​ളള ഓരോ ജീവി​ത​വ​ശ​ത്തും വ്യാപി​ച്ചു​കി​ട​ക്കുന്ന സാത്താന്യ ചിന്താ​ഗതി ആണ്‌. അതു​കൊണ്ട്‌, തന്റെ കലശം വായു​വി​ലേക്ക്‌ ഒഴിക്കു​ന്ന​തി​നാൽ, ഏഴാമത്തെ ദൂതൻ സാത്താ​നും അവന്റെ സ്ഥാപന​ത്തി​നും യഹോ​വ​യു​ടെ പരമാ​ധി​കാ​രത്തെ നിന്ദി​ക്കു​ന്ന​തിൽ സാത്താനെ പിന്തു​ണ​ക്കാൻ മനുഷ്യ​വർഗത്തെ പ്രചോ​ദി​പ്പി​ക്കുന്ന സകലതി​നും എതി​രെ​യു​ളള യഹോ​വ​യു​ടെ ക്രോധം പ്രകട​മാ​ക്കു​ന്നു.

36. (എ) ഏഴു ബാധകൾ എന്താണ്‌? (ബി) “സംഭവി​ച്ചു​തീർന്നു” എന്ന യഹോ​വ​യു​ടെ പ്രഖ്യാ​പ​ന​ത്താൽ എന്തു സൂചി​പ്പി​ക്ക​പ്പെ​ടു​ന്നു?

³⁶ ഇതും ആറ്‌ മുൻബാ​ധ​ക​ളും സാത്താ​നും അവന്റെ വ്യവസ്ഥി​തി​ക്കും എതി​രെ​യു​ളള യഹോ​വ​യു​ടെ ന്യായ​വി​ധി​ക​ളു​ടെ ആകെത്തു​കയെ കാണി​ക്കു​ന്നു. അവ സാത്താ​നും അവന്റെ സന്തതി​ക്കും നാശത്തി​ന്റെ പ്രഖ്യാ​പ​ന​മാണ്‌. ഈ അന്തിമ കലശം ഒഴിക്കു​മ്പോൾ യഹോ​വ​തന്നെ ഇപ്രകാ​രം പ്രഖ്യാ​പി​ക്കു​ന്നു: “സംഭവി​ച്ചു​തീർന്നു”. മറെറാ​ന്നും പറയാ​നില്ല. ദൈവ​കോ​പ​ത്തി​ന്റെ കലശങ്ങ​ളു​ടെ ഉളളടക്കം യഹോ​വക്കു തൃപ്‌തി​യാ​കു​വോ​ളം പ്രസിദ്ധം ചെയ്‌തു കഴിയു​മ്പോൾ ഈ സന്ദേശങ്ങൾ പ്രഖ്യാ​പനം ചെയ്‌ത ന്യായ​വി​ധി​കൾ നടപ്പാ​ക്കു​ന്ന​തിന്‌ അവന്റെ ഭാഗത്ത്‌ യാതൊ​രു താമസ​വു​മു​ണ്ടാ​യി​രി​ക്കു​ക​യില്ല.

37. ദൈവ​കോ​പ​ത്തി​ന്റെ ഏഴാമത്തെ കലശം ഒഴിച്ച​ശേഷം സംഭവി​ക്കു​ന്ന​തി​നെ യോഹ​ന്നാൻ വർണി​ക്കു​ന്ന​തെ​ങ്ങനെ?

³⁷ യോഹ​ന്നാൻ തുടരു​ന്നു: “മിന്നലും നാദവും ഇടിമു​ഴ​ക്ക​വും വലിയ ഭൂകമ്പ​വും ഉണ്ടായി; ഭൂമി​യിൽ മനുഷ്യർ ഉണ്ടായ​തു​മു​തൽ അതു​പോ​ലെ അത്ര വലുതാ​യോ​രു ഭൂകമ്പം ഉണ്ടായി​ട്ടില്ല. മഹാന​ഗരം മൂന്നം​ശ​മാ​യി പിരിഞ്ഞു; ജാതി​ക​ളു​ടെ പട്ടണങ്ങ​ളും വീണു​പോ​യി; ദൈവ​കോ​പ​ത്തി​ന്റെ ക്രോ​ധ​മ​ദ്യ​മു​ളള പാത്രം മഹാബാ​ബി​ലോ​ന്നു കൊടു​ക്കേ​ണ്ട​തി​ന്നു അവളെ ദൈവ​സ​ന്നി​ധി​യിൽ ഓർത്തു. സകലദ്വീ​പും ഓടി​പ്പോ​യി; മലകൾ കാൺമാ​നി​ല്ലാ​തെ​യാ​യി. താല​ന്തോ​ളം ഘനമുളള കല്ലായി വലിയ കൻമഴ ആകാശ​ത്തു​നി​ന്നു മനുഷ്യ​രു​ടെ മേൽ പെയ്‌തു; കൻമഴ​യു​ടെ ബാധ ഏററവും വലുതാ​ക​കൊ​ണ്ടു മനുഷ്യർ ആ ബാധനി​മി​ത്തം ദൈവത്തെ ദുഷിച്ചു.”—വെളി​പ്പാ​ടു 16:18-21.

38. പിൻവ​രു​ന്ന​വ​യാൽ എന്തു പ്രതീ​ക​വ​ത്‌ക​രി​ക്ക​പ്പെ​ടു​ന്നു (എ) ‘വലിയ ഭൂകമ്പം’? (ബി) മഹാബാ​ബി​ലോ​നാ​കുന്ന “മഹാന​ഗരം മൂന്നം​ശ​മാ​യി” പിളർന്നു​പോ​യി എന്ന വസ്‌തുത? (സി) “സകല ദ്വീപും ഓടി​പ്പോ​യി; മലകൾ കാൺമാ​നി​ല്ലാ​തെ​യാ​യി” എന്ന വസ്‌തുത? (ഡി) “കൻമഴ​യു​ടെ ബാധ”?

³⁸ ഒരിക്കൽക്കൂ​ടെ യഹോവ വ്യക്തമാ​യി മനുഷ്യ​വർഗ​ത്തി​നു​നേരെ നടപടി സ്വീക​രി​ക്കു​ന്നു, ഇതു “മിന്നലും നാദവും ഇടിമു​ഴ​ക്ക​വും” മുഖാ​ന്തരം അറിയി​ക്ക​പ്പെ​ടു​ന്നു. (താരത​മ്യം ചെയ്യുക: വെളി​പ്പാ​ടു 4:5; 8:5.) വിനാ​ശ​ക​ര​മായ ഒരു ഭൂകമ്പ​ത്താ​ലെ​ന്ന​പോ​ലെ മുമ്പു സംഭവി​ച്ചി​ട്ടി​ല്ലാത്ത ഒരു വിധത്തിൽ മനുഷ്യ​വർഗം ഉലയ്‌ക്ക​പ്പെ​ടും. (താരത​മ്യം ചെയ്യുക: യെശയ്യാ​വു 13:13; യോവേൽ 3:16.) ബോം​ബി​ട്ടാ​ലെ​ന്ന​പോ​ലു​ളള ഈ കുലുക്കം മഹാബാ​ബി​ലോ​നാ​കുന്ന മഹാന​ഗ​രത്തെ തകർത്തു​ക​ള​യും, തന്നിമി​ത്തം അതു “മൂന്നം​ശ​മാ​യി” പിരി​യു​ന്നു—പുനരു​ദ്ധ​രി​ക്കാൻ കഴിയാത്ത നാശത്തി​ലേ​ക്കു​ളള അതിന്റെ തകർച്ച​യു​ടെ പ്രതീ​കം​തന്നെ. കൂടാതെ, “ജാതി​ക​ളു​ടെ പട്ടണങ്ങ​ളും” വീഴും. “സകലദ്വീ​പും” ‘മലകളും’—ഈ വ്യവസ്ഥി​തി​യിൽ വളരെ സ്ഥിരത​യു​ള​ള​താ​യി തോന്നുന്ന സ്ഥാപന​ങ്ങ​ളും സംഘട​ന​ക​ളും—നീങ്ങി​പ്പോ​കും. ഏഴാം ബാധയു​ടെ സമയത്ത്‌ ഈജി​പ്‌തി​നെ ബാധി​ച്ച​തി​നെ​ക്കാൾ വളരെ വലുതായ ഒരു “കൻമഴ” മനുഷ്യ​വർഗത്തെ വേദനാ​ക​ര​മാ​യി ദണ്ഡിപ്പി​ക്കും, ഓരോ കല്ലും ഏതാണ്ട്‌ ഒരു താലന്തു തൂക്കം വരുന്ന​തു​തന്നെ.d (പുറപ്പാ​ടു 9:22-26) ഘനരൂ​പ​ത്തി​ലു​ളള വെളള​ത്തി​ന്റെ ഈ ശിക്ഷി​ക്കുന്ന പെയ്‌ത്ത്‌, സാധ്യ​ത​യ​നു​സ​രിച്ച്‌, ഒടുവിൽ ഈ വ്യവസ്ഥി​തി​യു​ടെ അന്ത്യം വന്നെത്തി​യെന്ന്‌ അറിയി​ക്കുന്ന യഹോ​വ​യു​ടെ ന്യായ​വി​ധി​ക​ളു​ടെ അസാധാ​ര​ണ​മാം​വി​ധം ഭാരിച്ച വാക്കു​കളെ ചിത്രീ​ക​രി​ക്കു​ന്നു! യഹോ​വക്കു നശീക​ര​ണ​വേ​ല​യിൽ അക്ഷരാർഥ കൻമഴ​യെ​യും നന്നായി ഉപയോ​ഗി​ക്കാൻ കഴിയും.—ഇയ്യോബ്‌ 38:22, 23.

39. ഏഴു ബാധക​ളു​ടെ ഒഴിക്കൽ ഗണ്യമാ​ക്കാ​തെ മനുഷ്യ​വർഗ​ത്തിൽ ഭൂരി​പ​ക്ഷ​വും ഏതു പ്രവർത്ത​ന​ഗതി സ്വീക​രി​ക്കും?

³⁹ അങ്ങനെ സാത്താന്റെ ലോകം യഹോ​വ​യു​ടെ നീതി​യു​ളള ന്യായ​വി​ധി​യെ നേരി​ടും. അവസാ​നം​വരെ, മനുഷ്യ​വർഗ​ത്തിൽ അധിക​പ​ങ്കും ദൈവത്തെ നിന്ദി​ക്കു​ന്ന​തി​ലും ദുഷി​ക്കു​ന്ന​തി​ലും തുടരും. പുരാ​ത​ന​കാ​ലത്തെ ഫറവോ​മാ​രെ​പ്പോ​ലെ അവരുടെ ഹൃദയങ്ങൾ ആവർത്തി​ച്ചു​ളള ബാധക​ളാ​ലോ ആ ബാധക​ളു​ടെ മാരക​മായ അന്തിമ പാരമ്യ​ത്താ​ലോ മയപ്പെ​ടു​ക​യില്ല. (പുറപ്പാ​ടു 11:9, 10) അവസാ​ന​നി​മി​ഷ​ത്തിൽ വലിയ അളവി​ലു​ളള ഒരു ഹൃദയ​മാ​ററം ഉണ്ടാവു​ക​യില്ല. അന്ത്യശ്വാ​സം വലിക്കു​മ്പോ​ഴും അവർ, ‘ഞാൻ യഹോവ എന്നു അവർ അറിയും’ എന്നു പ്രഖ്യാ​പി​ക്കുന്ന ദൈവ​ത്തി​നെ​തി​രെ തട്ടിക്ക​യ​റും. (യെഹെ​സ്‌കേൽ 38:23) എന്നുവ​രി​കി​ലും സർവശ​ക്ത​നായ യഹോ​വ​യാം ദൈവ​ത്തി​ന്റെ പരമാ​ധി​കാ​രം സംസ്ഥാ​പി​ക്ക​പ്പെ​ട്ടി​രി​ക്കും.

[അടിക്കു​റി​പ്പു​കൾ]

[221-ാം പേജിലെ ചതുരം]

“ഭൂമി​യിൽ”

യോഹ​ന്നാൻവർഗം പിൻവ​രു​ന്ന​വ​പോ​ലു​ളള പ്രസ്‌താ​വ​ന​ക​ളാൽ “ഭൂമി”ക്കെതി​രെ​യു​ളള യഹോ​വ​യു​ടെ ക്രോധം പ്രസി​ദ്ധ​മാ​ക്കി​യി​രി​ക്കു​ന്നു:

“നൂററാ​ണ്ടു​ക​ളി​ലെ പരി​ശ്ര​മ​ത്തി​നു​ശേഷം രാഷ്‌ട്രീയ പാർട്ടി​കൾ നിലവി​ലു​ളള അവസ്ഥകളെ നേരി​ടാ​നും സങ്കടക​ര​മായ പ്രശ്‌നങ്ങൾ പരിഹ​രി​ക്കാ​നു​മു​ളള അവയുടെ അപ്രാ​പ്‌തി തെളി​യി​ച്ചി​രി​ക്കു​ന്നു. പ്രശ്‌നം ഉത്സാഹ​പൂർവം പഠിക്കുന്ന സാമ്പത്തി​ക​വി​ദ​ഗ്‌ധ​രും രാജ്യ​ത​ന്ത്ര​ജ്ഞ​രും തങ്ങൾക്ക്‌ ഒന്നും ചെയ്യാൻ കഴിയി​ല്ലെന്നു കണ്ടെത്തു​ന്നു.”—ഇപ്പോൾ ജീവി​ക്കുന്ന ദശലക്ഷങ്ങൾ ഒരിക്ക​ലും മരിക്കു​ക​യില്ല, (ഇംഗ്ലീഷ്‌) 1920, പേജ്‌ 61.

“ലോക​ത്തിൽ ഒരു ന്യായ​മായ പങ്കിനെ തൃപ്‌തി​പ്പെ​ടു​ത്തുന്ന ഒരു ഗവൺമെൻറും ഇന്നു ഭൂമി​യിൽ ഇല്ല. പല ജനതക​ളും സ്വേച്ഛാ​ധി​കാ​രി​ക​ളാൽ ഭരിക്ക​പ്പെ​ടു​ന്നു. മുഴു​ലോ​ക​വും അനുഭ​വ​ത്തിൽ പാപ്പരാണ്‌.”—ഒരു അഭികാ​മ്യ​മായ ഗവൺമെൻറ്‌, (ഇംഗ്ലീഷ്‌) 1924, പേജ്‌ 5.

“ഈ വ്യവസ്ഥി​തിക്ക്‌ ഒരു അന്തം വരുത്തു​ക​യാണ്‌ . . . ഭൂമിയെ തിൻമ​യിൽനി​ന്നു വിമു​ക്ത​മാ​ക്കു​ന്ന​തി​നും സമാധാ​ന​വും നീതി​യും പരില​സി​ക്കാ​നി​ട​യാ​ക്കു​ന്ന​തി​നു​മു​ളള ഏകമാർഗ്ഗം.”—“രാജ്യ​ത്തി​ന്റെ ഈ സുവാർത്ത,” 1954, പേജ്‌ 25.

“നിലവി​ലു​ളള ലോക ക്രമം വർധിച്ച പാപത്താ​ലും അനീതി​യാ​ലും ദൈവ​ത്തി​നും അവന്റെ ഇഷ്ടത്തി​നും എതി​രെ​യു​ളള മത്സരത്താ​ലും അതി​നെ​ത്തന്നെ തിരി​ച്ച​റി​യി​ച്ചി​രി​ക്കു​ന്നു. . . . അതു പുനരു​ദ്ധ​രി​ക്കാ​നാ​കാ​ത്ത​താണ്‌. അതു​കൊണ്ട്‌ അതു പോയേ തീരൂ!”—ദ വാച്ച്‌ടവർ, നവംബർ 15, 1981, പേജ്‌ 6.

[223-ാം പേജിലെ ചതുരം]

“സമു​ദ്ര​ത്തിൽ”

പിൻവ​രു​ന്നവ യഹോ​വ​യിൽനിന്ന്‌ അന്യപ്പെട്ട അഭക്ത മനുഷ്യ​വർഗ​മാ​കുന്ന അസ്വസ്ഥ​വും മത്സരാ​ത്മ​ക​വു​മായ “സമുദ്ര”ത്തിനെ​തി​രെ ദൈവ​ക്രോ​ധം ഘോഷി​ക്കുന്ന യോഹ​ന്നാൻവർഗം കഴിഞ്ഞ വർഷങ്ങ​ളിൽ പ്രസി​ദ്ധീ​ക​രിച്ച പ്രസ്‌താ​വ​ന​ക​ളിൽ ഏതാനും ചിലതു​മാ​ത്ര​മാണ്‌:

“ഓരോ ജനതയു​ടെ​യും ചരിത്രം അതു വർഗങ്ങൾ തമ്മിലു​ളള ഒരു പോരാ​ട്ട​മാ​യി​രു​ന്നു​വെന്നു പ്രകട​മാ​ക്കു​ന്നു. അതു ഭൂരി​പ​ക്ഷ​ത്തി​നെ​തി​രെ ഒരു ന്യൂന​പക്ഷം ആയിരു​ന്നി​ട്ടുണ്ട്‌. . . . ഈ പോരാ​ട്ടങ്ങൾ പല വിപ്ലവ​ങ്ങ​ളി​ലും വലിയ ദുരി​ത​ത്തി​ലും വളരെ രക്തച്ചൊ​രി​ച്ചി​ലി​ലും കലാശി​ച്ചി​രി​ക്കു​ന്നു.”—ഗവൺമെൻറ്‌, (ഇംഗ്ലീഷ്‌) 1928, പേജ്‌ 244.

പുതിയ ലോക​ത്തിൽ, “പിശാ​ചി​ന്റെ ഉപയോ​ഗ​ത്തി​നാ​യി ദീർഘ​കാ​ലം മുമ്പു കാട്ടു​മൃ​ഗം കയറിവന്ന അസ്വസ്ഥ​വും മത്സരാ​ത്മ​ക​വു​മായ അഭക്ത ജനത്തിന്റെ പ്രതീ​കാ​ത്മക ‘സമുദ്രം’ പൊയ്‌പോ​യി​രി​ക്കും.”—ദ വാച്ച്‌ടവർ, സെപ്‌റ​റം​ബർ 15, 1967, പേജ്‌ 567.

“ഏതൽക്കാല മനുഷ്യ​സ​മു​ദാ​യം ആത്മീയ​മാ​യി രോഗ​വും സുഖ​ക്കേ​ടും ബാധി​ച്ച​താണ്‌. നമ്മിലാർക്കും​തന്നെ അതിനെ രക്ഷിക്കാൻ കഴിയു​ക​യില്ല, എന്തു​കൊ​ണ്ടെ​ന്നാൽ അതിന്റെ രോഗം അതിനെ മരണത്തി​ലേക്കു നയിക്കു​ക​യാ​ണെന്നു ദൈവ​വ​ചനം പ്രകട​മാ​ക്കു​ന്നു.”—യഥാർത്ഥ സമാധാ​ന​വും സുരക്ഷി​ത​ത്വ​വും—ഏത്‌ ഉറവിൽനിന്ന്‌?, 1973, പേജ്‌ 149.

[224-ാം പേജിലെ ചതുരം]

“നദിക​ളി​ലും നീരു​റ​വു​ക​ളി​ലും”

മൂന്നാ​മത്തെ ബാധ പിൻവ​രു​ന്ന​വ​പോ​ലു​ളള പ്രസ്‌താ​വ​ന​ക​ളാൽ ‘നദിക​ളെ​യും നീരു​റ​വു​ക​ളെ​യും’ തുറന്നു​കാ​ട്ടി​യി​രി​ക്കു​ന്നു:

“വൈദി​കർ [ക്രിസ്‌തു​വി​ന്റെ] ഉപദേ​ശ​ങ്ങ​ളു​ടെ ഉപദേ​ഷ്ടാ​ക്ക​ളെന്ന്‌ അവകാ​ശ​പ്പെ​ടു​ന്ന​വർതന്നെ, യുദ്ധത്തെ പവി​ത്രീ​ക​രി​ക്കു​ക​യും അതിനെ ഒരു വിശു​ദ്ധ​കാ​ര്യ​മാ​ക്കി​ത്തീർക്കു​ക​യും ചെയ്‌തി​രി​ക്കു​ന്നു. അവർ തങ്ങളുടെ ഛായാ​പ​ട​ങ്ങ​ളും പ്രതി​മ​ക​ളും ക്രൂര​രായ യോദ്ധാ​ക്ക​ളു​ടേ​തി​നോ​ടൊ​പ്പം പ്രദർശി​പ്പി​ക്കു​ന്ന​തിൽ പ്രമോ​ദി​ച്ചി​ട്ടുണ്ട്‌.”—ദ വാച്ച്‌ ടവർ, സെപ്‌റ​റം​ബർ 15, 1924, പേജ്‌ 275.

“ആത്മവിദ്യ ഒരു വലിയ അസത്യ​ത്തിൽ, മരണാ​നന്തര അതിജീ​വ​ന​ത്തി​ന്റെ​യും മനുഷ്യ​ദേ​ഹി​യു​ടെ അമർത്ത്യ​ത​യു​ടെ​യും ഭോഷ്‌കിൽ അടിസ്ഥാ​ന​പ്പെ​ട്ട​താണ്‌.”—“മരണാ​നന്തര അതിജീ​വന”ത്തെക്കു​റിച്ച്‌ തിരു​വെ​ഴു​ത്തു​കൾ എന്തു പറയുന്നു?, (ഇംഗ്ലീഷ്‌) 1955, പേജ്‌ 51.

“മനുഷ്യ തത്ത്വശാ​സ്‌ത്രങ്ങൾ, രാഷ്‌ട്രീയ സൈദ്ധാ​ന്തി​കർ, സാമൂ​ഹിക സംഘാ​ടകർ, സാമ്പത്തിക ഉപദേ​ഷ്ടാ​ക്കൾ എന്നിവ​രും മതപാ​ര​മ്പ​ര്യ​ങ്ങ​ളു​ടെ വക്താക്ക​ളും ജീവദാ​യ​ക​മായ യാതൊ​രു ആശ്വാ​സ​ത്തി​ലും കലാശി​ച്ചി​ട്ടില്ല . . . അത്തരം വെളളം കുടി​ക്കു​ന്ന​വരെ അതു രക്തത്തിന്റെ പവിത്രത സംബന്ധിച്ച സ്രഷ്ടാ​വി​ന്റെ നിയമം ലംഘി​ക്കു​ന്ന​തി​ലേ​ക്കും മതപീ​ഡ​ന​ങ്ങ​ളിൽ ഏർപ്പെ​ടു​ന്ന​തി​ലേ​ക്കും നയിക്കു​ക​പോ​ലും ചെയ്‌തി​രി​ക്കു​ന്നു.”—“നിത്യ​സു​വാർത്ത” സാർവ​ദേ​ശീയ കൺ​വെൻ​ഷ​നിൽ 1963-ൽ അംഗീ​ക​രിച്ച പ്രമേയം.

“ശാസ്‌ത്രീയ രക്ഷയല്ല, പിന്നെ​യോ മാനവ​രാ​ശി​യു​ടെ നാശമാ​ണു മനുഷ്യ​നിൽനി​ന്നു പ്രതീ​ക്ഷി​ക്കേ​ണ്ടത്‌. . . . മനുഷ്യ​വർഗ​ത്തി​ന്റെ ചിന്താ​ഗതി മാററാൻ നമുക്കു ലോക​ത്തി​ലെ എല്ലാ മനഃശാ​സ്‌ത്ര​ജ്ഞ​രി​ലേ​ക്കും മനോ​രോഗ വിദഗ്‌ധ​രി​ലേ​ക്കും നോക്കാൻ കഴിക​യില്ല . . . ഈ ഭൂമിയെ താമസി​ക്കാ​നു​ളള ഒരു സുരക്ഷിത സ്ഥാനമാ​ക്കി​ത്തീർക്കു​ന്ന​തി​നു രൂപീ​ക​രി​ക്ക​പ്പെ​ടാ​നി​രി​ക്കുന്ന ഏതെങ്കി​ലും സാർവ​ദേ​ശീയ പൊലീസ്‌ സേനയെ നമുക്ക്‌ ആശ്രയി​ക്കാൻ കഴിയില്ല.”—മനുഷ്യ​വർഗത്തെ രക്ഷിക്കൽ—രാജ്യ മാർഗ​ത്തിൽ, (ഇംഗ്ലീഷ്‌) 1970, പേജ്‌ 5.

[225-ാം പേജിലെ ചതുരം]

“സൂര്യ​നിൽ”

മനുഷ്യ​ഭ​ര​ണാ​ധി​പ​ത്യം ആകുന്ന ‘സൂര്യൻ’ കർത്താ​വി​ന്റെ ദിവസ​ത്തിൽ മനുഷ്യ​വർഗത്തെ “പൊളളി”ച്ചിരിക്കെ, യോഹ​ന്നാൻവർഗം പിൻവ​രു​ന്നവ പോലു​ളള പ്രസ്‌താ​വ​ന​ക​ളാൽ സംഭവി​ച്ചു​കൊ​ണ്ടി​രി​ക്കു​ന്ന​തി​ലേക്കു ശ്രദ്ധ ആകർഷി​ച്ചി​രി​ക്കു​ന്നു:

“ഇന്നു ഹിററ്‌ല​റും മുസ്സോ​ളി​നി​യും, തന്നിഷ്ട​ക്കാ​രായ സ്വേച്ഛാ​ധി​കാ​രി​കൾ, മുഴു​ലോ​ക​ത്തി​ന്റെ​യും സമാധാ​നത്തെ ഭീഷണി​പ്പെ​ടു​ത്തു​ന്നു, അവരുടെ സ്വാത​ന്ത്ര്യ ധ്വംസ​ന​ത്തിൽ റോമൻ കത്തോ​ലി​ക്കാ പുരോ​ഹി​താ​ധി​പ​ത്യം അവരെ പൂർണ​മാ​യി പിന്താ​ങ്ങു​ന്നു.”—ഫാസി​സ​മോ സ്വാത​ന്ത്ര്യ​മോ, (ഇംഗ്ലീഷ്‌) 1939, പേജ്‌ 12.

“ചരി​ത്ര​ത്തി​ലു​ട​നീ​ളം മനുഷ്യ സ്വേച്ഛാ​ധി​പ​തി​കൾ പിൻപ​റ​റിയ നയം ഭരിക്കുക അല്ലെങ്കിൽ മുടി​ക്കുക എന്നതാ​യി​രു​ന്നു! എന്നാൽ ദൈവ​ത്തി​ന്റെ അവരോ​ധി​ക്ക​പ്പെട്ട രാജാ​വായ യേശു​ക്രി​സ്‌തു​വി​നാൽ മുഴു​ഭൂ​മി​ക്കും ഇപ്പോൾ ബാധക​മാ​ക്കാൻ പോകുന്ന വ്യവസ്ഥ ഭരിക്ക​പ്പെ​ടുക അല്ലെങ്കിൽ നശിപ്പി​ക്ക​പ്പെ​ടുക എന്നതാണ്‌.”—എല്ലാ ജനതക​ളും ദൈവ​രാ​ജ്യ​ത്തിൻ കീഴിൽ ഒന്നിക്കു​മ്പോൾ, (ഇംഗ്ലീഷ്‌) 1961, പേജ്‌ 23.

“ഗോളം എമ്പാടും നടത്തപ്പെട്ട ഏതാണ്ട്‌ 150 യുദ്ധങ്ങ​ളി​ലാ​യി 1945-നു ശേഷം രണ്ടര കോടി​യി​ല​ധി​കം ആളുകൾ കൊല്ല​പ്പെ​ട്ടി​ട്ടുണ്ട്‌.”—ദ വാച്ച്‌ടവർ, ജനുവരി 15, 1980, പേജ്‌ 6.

“ലോക​മെ​മ്പാ​ടു​മു​ളള ജനതകൾ . . . സാർവ​ദേ​ശീയ കടമ​യെ​യോ പെരു​മാ​ററ ചട്ടങ്ങ​ളെ​യോ സംബന്ധി​ച്ചു ഗൗനി​ക്കു​ന്നേ​യില്ല. കാര്യം സാധി​ക്കു​ന്ന​തിന്‌ ആവശ്യ​മെന്ന്‌ അവർക്കു​തോ​ന്നുന്ന ഏതു മാർഗ​വും—കൂട്ട​ക്കൊ​ല​യും രഹസ്യ​നി​ഗ്ര​ഹ​വും തട്ടി​ക്കൊ​ണ്ടു​പോ​ക​ലും ബോം​ബി​ട​ലും മററും ഉപയോ​ഗി​ക്കു​ന്ന​തിൽ ചില ജനതകൾക്കു പൂർണ​മായ നീതീ​ക​രണം തോന്നു​ന്നു . . . ജനതകൾ അന്യോ​ന്യം എത്രകാ​ലം അത്തരം ബോധ​ര​ഹി​ത​വും നിരു​ത്ത​ര​വാ​ദ​പ​ര​വും ആയ പെരു​മാ​ററം സഹിച്ചു​നിൽക്കും?”—ദ വാച്ച്‌ടവർ, ഫെബ്രു​വരി 15, 1985, പേജ്‌ 4.

[227-ാം പേജിലെ ചതുരം]

“മൃഗത്തി​ന്റെ സിംഹാ​സ​ന​ത്തിൻമേൽ”

യഹോ​വ​യു​ടെ സാക്ഷികൾ കാട്ടു​മൃ​ഗ​ത്തി​ന്റെ സിംഹാ​സ​നത്തെ തുറന്നു​കാ​ട്ടു​ക​യും പിൻവ​രു​ന്ന​വ​പോ​ലു​ളള പ്രസ്‌താ​വ​ന​ക​ളോ​ടെ അതിൻമേ​ലു​ളള യഹോ​വ​യു​ടെ കുററ​വി​ധി പ്രസി​ദ്ധ​മാ​ക്കു​ക​യും ചെയ്‌തി​ട്ടുണ്ട്‌:

“ജനതക​ളു​ടെ ഭരണാ​ധി​കാ​രി​ക​ളും രാഷ്‌ട്രീയ വഴികാ​ട്ടി​ക​ളും ദുഷ്ട അമാനു​ഷ​ശ​ക്തി​ക​ളാൽ സ്വാധീ​നി​ക്ക​പ്പെ​ടു​ന്നു, അവ അർമ​ഗെ​ദോ​നി​ലെ നിർണാ​യക ഏററു​മു​ട്ട​ലി​ലേ​ക്കു​ളള ഒരു ആത്മഹത്യാ​മാർച്ചിൽ അവരെ അപ്രതി​രോ​ധ്യ​മാ​യി നയിച്ചു​കൊ​ണ്ടു​പോ​കു​ന്നു.”—അർമ​ഗെ​ദോ​നു​ശേഷം—ദൈവ​ത്തി​ന്റെ പുതിയ ലോകം, (ഇംഗ്ലീഷ്‌) 1953, പേജ്‌ 8.

“‘കാട്ടു​മൃഗ’ത്തിന്‌, ദിവ്യാ​ധി​പ​ത്യ​പ​ര​മ​ല്ലാത്ത മാനു​ഷ​ഗ​വൺമെൻറിന്‌ അതിന്റെ ശക്തിയും അധികാ​ര​വും സിംഹാ​സ​ന​വും സർപ്പത്തിൽനി​ന്നു ലഭിച്ചു. അതു​കൊണ്ട്‌ അതിനു കക്ഷിയു​ടെ ഇഷ്ടം, സർപ്പത്തി​ന്റെ ഇഷ്ടം നിറ​വേ​റേ​റ​ണ്ട​തുണ്ട്‌.”—അർമ​ഗെ​ദോ​നു​ശേഷം—ദൈവ​ത്തി​ന്റെ പുതിയ ലോകം, 1953, പേജ്‌ 15.

“പുറജാ​തി ജനതകൾക്ക്‌ ദൈവ​ത്തി​ന്റെ മുഖ്യ​എ​തി​രാ​ളി​യായ പിശാ​ചായ സാത്താന്റെ പക്ഷത്തു മാത്രമേ നില​കൊ​ള​ളാൻ കഴിയു​ക​യു​ളളൂ.”—“ദിവ്യ വിജയ” സാർവ​ദേ​ശീയ കൺ​വെൻ​ഷ​നിൽ 1973-ൽ അംഗീ​ക​രിച്ച പ്രമേയം.

[229-ാം പേജിലെ ചതുരം]

“അതിലെ വെളളം വററി​പ്പോ​യി”

ഇപ്പോൾ പോലും, പല സ്ഥലങ്ങളി​ലും ബാബി​ലോ​ന്യ​മ​ത​ങ്ങ​ളു​ടെ പിന്തുണ വററി​പ്പോ​വു​ക​യാണ്‌, “കിഴക്കു​നി​ന്നു വരുന്ന രാജാ​ക്കൻമാർ” ആക്രമി​ക്കു​മ്പോൾ എന്തു സംഭവി​ക്കു​മെന്ന്‌ അതു സൂചി​പ്പി​ക്കു​ന്നു.

“ദേശവ്യാ​പ​ക​മാ​യി നടത്തിയ ഒരു സർവേ, [തായ്‌ല​ണ്ടി​ലെ] മുൻസി​പ്പൽ പ്രദേ​ശ​ങ്ങ​ളിൽ താമസി​ക്കുന്ന 75 ശതമാനം പേരും പ്രസംഗം കേൾക്കു​ന്ന​തി​നു​പോ​ലും ബുദ്ധ​ദേ​വാ​ല​യ​ങ്ങ​ളിൽ പോകു​ന്നി​ല്ലെന്നു കണ്ടെത്തി, അതേസ​മയം ഗ്രാമ​പ്ര​ദേ​ശത്തു ദേവാ​ല​യ​ങ്ങ​ളിൽ സന്ദർശി​ക്കു​ന്ന​വ​രു​ടെ എണ്ണം ഏതാണ്ട്‌ അമ്പതു ശതമാ​ന​ത്തി​ലേക്കു ക്രമേണ കുറയു​ക​യാണ്‌.”—ബാങ്കോക്ക്‌ പോസ്‌ററ്‌, സെപ്‌റ​റം​ബർ 7, 1987, പേജ്‌ 4.

“രണ്ടു സഹസ്രാ​ബ്ദം മുമ്പു താവോ​മതം സ്ഥാപി​ക്ക​പ്പെട്ട ദേശത്ത്‌ [ചൈന​യിൽ] അതിന്റെ ജാലവി​ദ്യ പൊയ്‌പോ​യി​രി​ക്കു​ന്നു. . . . അവരും അവരുടെ മുൻഗാ​മി​ക​ളും വലിയ ജനാവ​ലി​യെ ആകർഷി​ച്ചു​നിർത്താൻ ഉപയോ​ഗി​ച്ചി​രുന്ന മാന്ത്രി​ക​വി​ദ്യ​കൾ പൊയ്‌പോ​യ​തോ​ടെ പുരോ​ഹി​ത​വർഗ​ത്തി​ലെ അംഗങ്ങൾക്കു പിൻഗാ​മി​കൾ ഇല്ലാ​തെ​യാ​യി, ഫലത്തിൽ ചൈന​യി​ലെ ഒരു സംഘടി​ത​വി​ശ്വാ​സ​മെന്ന നിലയിൽ താവോ​മതം വംശനാ​ശത്തെ അഭിമു​ഖീ​ക​രി​ക്കു​ന്നു.”—ദി അററ്‌ലാൻറാ ജേർണൽ ആൻഡ്‌ കോൺസ്‌റ​റി​റ​റ്യൂ​ഷൻ, സെപ്‌റ​റം​ബർ 12, 1982, പേജ്‌ 36-A.

“ജപ്പാൻ ആയിരു​ന്നു ലോക​ത്തിൽ വിദേ​ശ​മി​ഷ​ന​റി​മാ​രു​ടെ കൂടിയ സാന്ദ്ര​ത​യു​ളള ഒരു ദേശം, 5,200-ഓളം പേർ, എങ്കിലും . . . ജനസം​ഖ്യ​യു​ടെ 1 ശതമാ​ന​ത്തിൽ താഴെ​മാ​ത്രമേ ക്രിസ്‌ത്യാ​നി​യു​ളളൂ. . . . ‘ജപ്പാനിൽ വിദേ​ശ​മി​ഷ​ന​റി​യു​ടെ നാൾ അവസാ​നി​ച്ച​താ​യി’ . . . 1950-കൾ മുതൽ ഇവിടെ പ്രവർത്തി​ക്കുന്ന ഒരു ഫ്രാൻസി​സ്‌ക്കൻ പുരോ​ഹി​തൻ വിശ്വ​സി​ക്കു​ന്നു.”—ദ വോൾ സ്‌ട്രീ​ററ്‌ ജേർണൽ, ജൂലൈ 9, 1986, പേജ്‌ 1.

ഇംഗ്ലണ്ടിൽ കഴിഞ്ഞ മൂന്നു പതിറ​റാ​ണ്ടു​കാ​ലത്ത്‌, “16,000 ആംഗ്ലിക്കൻ പളളി​ക​ളിൽ ഏതാണ്ട്‌ 2,000 എണ്ണം ഉപയോ​ഗ​മി​ല്ലാ​ത്ത​തി​നാൽ അടച്ചു​പൂ​ട്ടു​ക​യു​ണ്ടാ​യി. പ്രഖ്യാ​പിത ക്രിസ്‌തീയ രാജ്യ​ങ്ങ​ളിൽ ഹാജർ ഏററവും താഴ്‌ന്ന നിലയി​ലേക്കു നിപതി​ച്ചു. . . . ‘ഇംഗ്ലണ്ട്‌ ഇപ്പോൾ ഒരു ക്രിസ്‌തീയ രാജ്യ​മാ​ണെന്നു പറയാ​നാ​വില്ല,’ എന്നു [ദർഹമി​ലെ ബിഷപ്പ്‌] പറഞ്ഞു.”—ദ ന്യൂ​യോർക്ക്‌ ടൈംസ്‌, മേയ്‌ 11, 1987, പേജ്‌ A4.

“മണിക്കൂ​റു​കൾ നീണ്ട ചൂടു​പി​ടിച്ച വാദ​പ്ര​തി​വാ​ദ​ത്തി​നു​ശേഷം [ഗ്രീസ്സി​ലെ] പാർല​മെൻറ്‌, ഗ്രീക്ക്‌ ഓർത്ത​ഡോ​ക്‌സ്‌ സഭ കൈവശം വെച്ചി​രുന്ന വലിയ തോട്ടങ്ങൾ ദേശസാൽക്ക​രി​ക്കാൻ സോഷ്യ​ലി​സ്‌ററ്‌ ഗവൺമെൻറി​നെ അനുവ​ദി​ക്കുന്ന നിയമം അംഗീ​ക​രി​ച്ചു . . . അതിനു​പു​റമേ, നിയമം സഭാസ​മി​തി​ക​ളു​ടെ​യും ഹോട്ട​ലു​ക​ളും മാർബിൾ മടകളും ഓഫീസ്‌ കെട്ടി​ട​ങ്ങ​ളും ഉൾപ്പെടെ വിലപി​ടിച്ച സഭാസ്വ​ത്തു​ക്ക​ളു​ടെ ഭരണസ​മി​തി​ക​ളു​ടെ​യും നിയ​ന്ത്രണം പുരോ​ഹി​ത​ര​ല്ലാ​ത്ത​വർക്കു നൽകുന്നു.”—ദ ന്യൂ​യോർക്ക്‌ ടൈംസ്‌, ഏപ്രിൽ 4, 1987, പേജ്‌ 3.

[222-ാം പേജിലെ ചിത്രം]

ദൈവകോപത്തിന്റെ ആദ്യത്തെ നാലു കലശങ്ങൾ ആദ്യത്തെ നാലു കാഹളം മുഴക്ക​ലിൽനി​ന്നു​ണ്ടാ​യ​തി​നു സമാന​മായ ബാധകൾ കൈവ​രു​ത്തു​ന്നു

[226-ാം പേജിലെ ചിത്രം]

കാട്ടുമൃഗത്തിന്റെ സിംഹാ​സനം സാത്താൻ കാട്ടു​മൃ​ഗ​ത്തി​നു നൽകി​യി​രി​ക്കുന്ന അധികാ​രം ആയിരി​ക്കു​ന്ന​താ​യി അഞ്ചാമത്തെ കലശം തുറന്നു​കാ​ട്ടു​ന്നു

[231-ാം പേജിലെ ചിത്രം]

ഭൂതപ്രചാരണം ഭൂമി​യി​ലെ ഭരണാ​ധി​കാ​രി​കളെ യഹോ​വ​യു​ടെ ന്യായ​വി​ധി​കൾ അവരു​ടെ​മേൽ ഒഴിക്ക​പ്പെ​ടുന്ന ഇടമായ കേന്ദ്ര സാഹച​ര്യ​ത്തി​ലേക്ക്‌, ഹർമ​ഗെ​ദോ​നി​ലേക്കു കൂട്ടി​വ​രു​ത്തു​ന്നു

[233-ാം പേജിലെ ചിത്രം]

സാത്താന്റെ മലീമ​സ​മായ “വായു”വിനാൽ പ്രചോ​ദി​ത​രാ​യവർ യഹോ​വ​യു​ടെ നീതി​യു​ളള ന്യായ​വി​ധി​ക​ളു​ടെ നടപ്പാക്കൽ സഹിച്ചേ തീരൂ