Ebangedi ya Mateo

24 Ge Jesu a tloga tempeleng, barutiwa ba gagwe ba ile ba ya go yena gore ba mmontšhe meago ya tempele. 2 Ke moka Jesu a re go bona: “Na dilo tše di a le kgahla? Ruri ke le botša gore maswika a a lego mo a tlo wišwa, ebile ga go le le letee leo le tlago go tlogelwa le le godimo ga le lengwe le se la wišwa.”+

3 Ge Jesu a be a dutše Thabeng ya Mehlware, barutiwa ba gagwe ba ile ba tla go yena ka sephiring ba re: “Re botše gore dilo tše di tlo direga neng, le gore re tlo bona ka eng gore o gona,*+ o be o re botše gore re tlo bona ka eng gore re phela mehleng ya bofelo.”*+

4 Jesu a re go bona: “Le hlokomeleng gore go se be le motho yo a le forago,+ 5 ka gobane ba bantši ba tla tla ba diriša leina la ka ba re: ‘Ke nna Kriste,’ gomme ba tla timetša ba bantši.+ 6 Le tlo kwa ka dintwa mafelong a go fapafapana, eupša le hlokomeleng gore le se ke la tšhoga. Ka gobane dilo tše di swanetše go direga, eupša e tla be e se ya hlwa e eba bofelo.+

7 “Setšhaba se tla lwa le setšhaba se sengwe gomme mmušo wa lwa le mmušo o mongwe,+ le gona go tla ba le tlhaelelo ya dijo+ le ditšhišinyego tša lefase lefelong le lengwe ka morago ga le lengwe.+ 8 Dilo tše ka moka e tla ba e le mathomo a dinako tšeo di kwešago bohloko kudu.*

9 “Ke moka batho ba tla dira gore le tlaišwe+ gomme ba le bolaya,+ le gona batho ba ditšhaba ka moka ba tla le hloya ka baka la leina la ka.+ 10 Go oketša moo, batho ba bantši ba tla wa tumelong, ba rekiša banababo bona ba ba ba hloyana. 11 Go tlo tšwelela baporofeta ba bantši ba maaka gomme ba timetša ba bantši.+ 12 Le gona, ka baka la go oketšega ga go hloka molao, lerato la ba bantši le tla fola. 13 Eupša yo a kgotlelelago* go fihla bofelong o tla phološwa.+ 14 Le gona ditaba tše tše dibotse tša Mmušo wa Modimo di tla bolelwa lefaseng ka moka e le gore e be bohlatse go ditšhaba ka moka,+ ke moka bofelo bo tla tla.

15 “Ka baka leo, ge le bona selo se se šišimišago seo se senyago se eme lefelong le lekgethwa,+ go etša ge Modimo a boletše a diriša moporofeta Daniele, (anke mmadi a diriše temogo) 16 bao ba lego Judea ba thome go tšhabela dithabeng.+ 17 Anke motho yo a lego ka godimo ga ntlo a se ke a fologa a re o tlo ntšha dilo tšeo di lego ka ntlong ya gagwe, 18 le yoo a lego mašemong a se ke a boela morago ntlong ya gagwe e le ge a eya go tšea seaparo sa gagwe sa ka ntle. 19 Ruri basadi ba baimana le bao ba nyantšhago mehleng yeo, e tla ba ba madimabe! 20 Dulang le rapela gore nakong ya ge le tšhaba e se ke ya ba e le marega goba letšatši la Sabatha, 21 ka gobane go tla ba le masetlapelo a magolo+ ao a sa kago a ba gona ga e sa le go tloga ge lefase le eba gona go fihla gona bjale, ebile a ka se sa hlwa a e ba gona gape.+ 22 Ge e le gabotse, ge nkabe Modimo a se a fokotša matšatši ao, go be go ka se be le motho yo a ka phološwago, eupša Modimo o tla fokotša matšatši ao e le gore bakgethwa ba phološwe.+

23 “Bjale ge e ba motho yo mongwe a ka re go lena: ‘Bonang! Kriste šo,’+ goba a re: ‘Kriste ke yola!’ Le se ke la mo tshepa.+ 24 Ka gobane go tla ba le boKriste ba maaka le baporofeta ba maaka+ gomme ba tla dira mehlolo e mentši e megolo e le gore ba leke go timetša+ bakgethwa ba Modimo. 25 Gopolang gore ke le lemošitše e sa le pele. 26 Ka gona, ge e ba batho ba ka re go lena: ‘O lešokeng!’ Le se ke la ya, le ge ba ka re go lena: ‘O ka diphapošing tša ka gare!’ Le se ke la ba tshepa.+ 27 Ka gobane go ba gona ga Morwa wa motho go tla swana le legadima leo le gadimago le etšwa ka bohlabela gomme le gadimela ka bodikela.+ 28 Kae le kae moo go nago le phoofolo yeo e hwilego, go tla kgobokana dintšhu.+

29 “Ge masetlapelo a mehleng yeo a se no fela, letšatši le tla swifala+ gomme ngwedi wa se ntšhe seetša sa wona, ke moka dinaledi tša wa legodimong gomme dilo tše maatla tšeo di lego magodimong tša šišinywa.+ 30 Ke moka legodimong go tla bonagala selo seo se bontšhago gore Morwa wa motho o a tla, gomme meloko ka moka ya lefase e tla itshetla dihuba e lla go bontšha gore e nyamile,+ gomme e tla bona Morwa wa motho+ a tšwelela legodimong ka maru a legodimo a na le maatla le letago le legolo.+ 31 O tla roma barongwa ba gagwe ba leletša diphalafala godimo kudu gomme ba kgoboketša bakgethwa ba gagwe go tšwa mahlakoreng a mane a lefase,* go tloga karolong e nngwe yeo magodimo a felelago go yona go fihla karolong e nngwe ya ona.+

32 “Bjale ithuteng papišong ye ya mogo: Gateetee ge lekalana la wona le eba boleta gomme le hloga matlakala, le tseba gore selemo se batametše.+ 33 Ka mo go swanago, ge le bona dilo tše ka moka, le tsebe gore Morwa wa motho o kgauswi, ge e le gabotse o eme mabating.+ 34 Ruri ke le botša gore moloko wo o ka se hlokofale ka moka go fihla ge dilo tše ka moka di direga. 35 Legodimo le lefase di tla fela, eupša mantšu a ka a tla dula a le gona.+

36 “Ge e le letšatši leo le iri, ga go yo a di tsebago,+ barongwa ba magodimo le Morwa le bona ga ba di tsebe, eupša di tsebja ke Tate feela.+ 37 Go no swana le kamoo dilo di bego di le ka gona mehleng ya Noa,+ le go ba gona ga Morwa wa motho go tla ba bjalo.+ 38 Ka gobane go no swana le ge batho bao ba phetšego pele ga ge go ka ba le Meetsefula ba be ba eja le go nwa, banna ba nyala le basadi ba nyalwa, go fihla letšatšing leo Noa a tsenego ka lona ka arekeng,+ 39 gomme ba se ele hloko seo se bego se direga go fihla Meetsefula a etla a ba gogola ka moka,+ le go ba gona ga Morwa wa motho go tla ba bjalo. 40 Le gona banna ba babedi ba tla be ba le tšhemong, yo mongwe o tla tšewa gomme yo mongwe a tlogelwa. 41 Basadi ba babedi ba tla be ba šila lwaleng, yo mongwe o tla tšewa gomme yo mongwe a tlogelwa.+ 42 Ka baka leo, dulang le phakgame ka gobane ga le tsebe letšatši leo Morena wa lena a tlago ka lona.+

43 “Eupša se le swanetšego go se tseba se se: Ge nkabe mong wa ntlo a be a tsebile gore lehodu le tlo tla nako mang,+ o be a ka se ye go robala ebile o be a ka se dumelele gore ntlo ya gagwe e thubje.+ 44 Ka baka leo le lena dulang le itokišitše,+ ka gobane Morwa wa motho o tla tla ka nako yeo le sego la nagana gore o tla tla ka yona.

45 “Ke mang yo ruri e lego mohlanka yo a botegago le wa temogo, yo mong wa gagwe a mo kgethilego gore a hlokomele ba ntlo ya gagwe, gore a ba fe dijo tša bona ka nako e swanetšego?+ 46 Mohlanka yoo o tla thaba ge e ba mong wa gagwe a ka re a fihla a mo hwetša a dira bjalo.+ 47 Ruri ke re go lena: O tla mo kgetha gore a hlokomele dilo tša gagwe ka moka.

48 “Eupša ge e ba mohlanka yoo yo mobe ka pelong ya gagwe a ka ipotša a re: ‘Mong wa ka o a diega,’+ 49 ke moka a thoma go betha bahlankagotee le yena, a ja a ba a nwa le batho bao ba tsebjago e le matagwa, 50 mong wa mohlanka yoo o tla tla ka letšatši leo a sa le letelago le ka nako yeo a sa e tsebego,+ 51 gomme o tla mo otla kudu a mmea le baikaketši. O tla lla a ba a lomantšha meno* a le moo.+