Kupupu

Sesusi oe “wamona” omukulukai wokwahiwa-po, pahe “emweetehila-mo onkhenda.” (Luka 7:13) Sesusi katyemwiihamene vala komutima, mahi walingile umwe etyi tyalekesa okuti tyili ankho wemweetehila-mo onkhenda. Mokutala wapopilile konkhenda pokwemuti: ‘Wahalile vali, muta.’ Mwene pahe kohalwae vala, asoko etyi ena okulinga akwateseko oo wokwahiwa-po. Atutilisa ‘omona wae, emwaavela-e.’ (Luka 7:​14, 15) Oityi tulilongesila kwootyo Sesusi alingile tyokututilisa omona womuhepe? Tulilongesila-ko okuti tuna okukala nokankhenda naava veihamenwa. Otyili, onthwe katutyivili okututilisa ovanthu ngeetyi tyalingile Sesusi. Noonthwe tupondola mwene okulihinda, atulingi tyimwe matyilekesa okuti tweveetehila-mo onkhenda, okupopia, hamwe okulinga tyimwe matyivekwatesako, atyivepameka. (Omih. 17:17; 2 Kol. 1:​3, 4; 1 Pet. 3:8) Nokupopia umwe vala oundaka wehehi, hamwe okulinga otyipuka tyimwe pamwe tyilinga ngoti tyitupu-ale apa tyilifwe, tyipondola umwe okupameka ava veihamenwa. w23.04 5-6 §§ 13-15

Sesusi etyiivi umwe okuti epanga liae wanyima-le, mahi no ngootyo oku eli nkhele akalako vali ononthiki onombali ahaende liwa noko Mbetania. Omphango Sesusi ankho ena-yo o yokulinga otyipuka tyimwe matyikwatesako omapanga ae, atyinkhimaneka Huku. (Swau 11:​6, 11, 17) Ehipululo eli litulongesa umwe oityi tyitiwa oupanga wotyotyili. Nkhele tala vala: Etyi oo Maliya na Malata vatuma ondaka ku Sesusi, kavatile opo ende ko Mbetania. Ngwe vemuti vala epanga liove uhole wavela. (Swau 11:3) Etyi Lasalu anyima, Sesusi ankho upondola umwe okumututilisila vala oku eli, mahi hatyoko alingile. Ngwe watile umwe hahe ndyende ko Mbetania nkhatale omapanga ange oo Maliya na Malata. Okuti noove una umwe epanga liove nthiki imwe weile ekukwatesako, mahi ohatile endyu unkhwateseko? Ine una umwe wekulingile-ale ngootyo, okutuka onthiki oyo, tyina una vala tyimwe tyekulemena umuvalula, utyii umwe okuti meya okukukwatesako. (Omih. 17:17) Noonthwe tupondola umwe okulinga nga Sesusi, omapanga etu aetyimono okuti tuyumbwa onthumbi! w23.04 10 §§ 10-11

Tyina tuli movitateka, tupondola atusoko okuti ouye omupe Siovaa apanga kamauya-le vali. Okuti opo ngootyo onthumbi yetu yatenda? Au otyo hatyoko. Tuhole okutyimona tyina pamwe tuli umwe mokati koutalala, kwatenda umwe unene, tupondola atusoko atuti tyafwa kaupwa-apwa-le vali, outokotwe kamauya-le vali. Mahi ngwe mauya umwe. Na tyina twasoya unene, tupondola umwe okusoka okuti ouye omupe kamauya-le vali. Mahi ine onthumbi yetu mu Huku yapama, opo tutyii okuti onomphango mba Huku mambulingwa umwe. (Ovii. 94:​3, 14, 15; Hemb. 6:​17-19) Ine tuyumba-ko onthumbi, opo apeho matupake komutwe ovilinga vya Siovaa. Motyipuka otyikwavo tusukisa umwe okupameka onthumbi yetu mu Huku, omovilinga viokwivisa. Ovanthu ovanyingi twivisa, tyina veiva “oviwa ovipe” tupopia mbokuti Huku maeta-ko ouye omupe, vasoka okuti otyo tyalinga otyiwa unene katyikalinga-le otyili. (Mat. 24:14; Isek. 33:32) Onthwe katuhande okuyambula otyipuka otyo ovanthu ovo vasoka. Mahi opo twehetyiyambule, tuna okupameka onthumbi yetu. w23.04 27 §§ 6-7; 28 § 14

Okuti nthiki imwe welipulile-ale ine Siovaa ukumbulula umwe omalikwambelo ove? Ine welipulile-ale ngootyo, have vala. Ovanthu ovanyingi Onombangi vapopia okuti velipulile-ale ngootyo tyina vena ovitateka. Tyina tulilinga epulo olio tyipondola okutupwiya okunoñgonoka ine Siovaa ukahi umwe nokukumbulula omalikwambelo etu. Omokonda yatyi tuyumbila-ko onthumbi okuti Siovaa ukumbulula omalikwambelo ovafendi vae? Ombimbiliya itupopila okuti Siovaa utuhole unene, twesukisa unene kwe. (Ase. 2:7; 1 Swau 4:10) Otyo atila tuna okufwena kwe melikwambelo. (1 Pet. 5:​6, 7) Siovaa uhanda okutukwatesako tufwene kwe, atutyivili okulwa novitateka viouye uno. M’ombimbiliya mwapopiwa ovanthu ovanyingi velikwambelele ku Siovaa, akumbulula umwe omalikwambelo avo. Okuti ove una kwou wasoka? w23.05 8 §§ 1-4

Maliya mwene nae wali noupanga wapama na Siovaa. Ankho wii nawa Ovihonekwa. Mwene nae wapamekele onthumbi yae mu Huku, ankho ketei vala ku Susee. Mwene nae ankho utaindya omuvo wokusoka umwe nawa kweevi alongeswa. (Luka 2:​19, 51) Tyotyili, mokonda Maliya wali noupanga wapama na Huku, tyemukalesile umwe omukai omuwa weumbo. No hono, kuna ovakai ovanyingi momaumbo velikwatehila umwe valinge nga Maliya. Tala vala, omukai umwe itiwa o Emiko wati: “Pweetyi nehenenepwe, mwene ankho ndyilinga-le apeho ovipuka vipameka oupanga wetu na Huku. Etyi pahe nanepwa, mokonda omulume wange oe ulikwambela, oe ulinga-ko efendelo liombunga, nkhati ñgaa pahe oupanga wange na Huku utei vala komulume wange. Andyityimono okuti naame mwene ndyina okutyinda omutengi wange, okupameka oupanga wange na Siovaa. Pahe andyitaindya-taindya omuvo wokukala vala andyike, atukala vala na Siovaa, okulikwambela, nokutanga, nokusoka kweevi Huku apopia.” (Ngal. 6:5) Vakai vokwanepwa, ine noonwe apeho mwene mupameka oupanga wenyi na Siovaa, ovalume venyi matyivepe umwe okumuhilivika, nokumuhumba vali. — Omih. 31:30. w23.05 22 § 6

Onthwe tyokutila owoma Siovaa katutyitwa-le natyo, tuna okulilonga-tyo. Otyipuka tyimwe tuna okulinga, okutala umwe nawa ‘ovipuka Huku atunga,’ mokonda oko tutyimonena okuti omunongo, una ononkhono, utuhole, ya otyo matyitutwala kokumulinga unene onthilo, nokumuhumba. (Loma 1:20) Otyikwavo tyipondola okututwala kokutila owoma Huku, okulikwambela apeho. Tyina tulikwambela vali unene ku Siovaa, tutyimona vali okuti ngwe okweeli umwe. Apeho tyina tumwiita etwavele ononkhono tutyivile okukoleleya, tyitusokesa kononkhono onene ena-mbo. Tyina tumupandula motyali etulinga tyokwetwavela Omona wae, tyitusokesa kokuti Siovaa utuhole. Tyina tuliyava kwe etukwateseko tyina tuna ovitateka, ngootyo tuli nokupaka momutima wetu okuti Siovaa oe omunongo. Omalikwambelo atyo ngoo etutwala kokulinga vali unene onthilo Siovaa. Etwavela umwe ononkhono atuliyungu kovipuka vipondola okunyona oupanga wetu nae. w23.06 15 §§ 6-7

Siovaa apeho upa ovanthu vae ovitumino vikahi nawa. Pomuvo wovalongwa vo tete va Kilisitu, ovakulu vokululika ovanthu va Huku, vapopile ovipuka vitatu ovanthu va Huku ankho vena okulandula: (1) okufenda vala Siovaa, avahafende ovilolo, (2) okulinga onthilo ohonde mokonda ikola, (3) okulandula vala ovitumino vya Siovaa avehelipake movinepo viasila. (Ovilinga 15:​28, 29) Pahe oñgeni hono ovanthu va Huku valandula ovipuka ovio vitatu viapopiwa? Oputyina tufenda vala Siovaa nokumutavela. Siovaa wapele ova Isilayeli otyitumino tyokuti oe vala vena okufenda aike. (Epal. 5:​6-10) Pweetyi Sesusi alolelwe n’Eliapu, welipopilile umwe eheliholeka ati, o Siovaa vala tuna okufenda kwapwa. (Mat. 4:​8-10) Otyo onthwe twahafendela kovilolo no kovanthu. Onthwe katutale omalombe, novatumini, novanthu ovakwavo vali vankhimana ngatyina ovo huku. Twahula vala ku Siovaa, oe vala tufenda “wokuatunga ovipuka viatyo aviho.” — Ehol. 4:11. w23.07 14-15 §§ 3-4

Ouye wa Satanasi weyula mouhayo wovinepo viasila, no mokutanga, nokutala ovipuka vitwala ovanthu kokulinga ovinepo viasila. (Efe. 4:19) Otyo tyahandela tulilonge okutila owoma Huku, atuliyungu kovivi. Momukanda Omihe okapitulu 9 mwapopiwa omihe vivali, umwe upopia omukai omunongo, omukwavo upopia omukai omuhima. Ovakai ovo veli nokwiihana ava nkhele vehena etyi vei, “vokwehena onondunge.” Aveho vevali veli nokuti: ‘Endywei, twendei no meumbo liange, twendei tukalie.’ (Omih. 9:​1, 4-6) Mahi etyi tyituka-ko kokutavela kuvo, tyelikalela unene, katyilii. Nkhele tala vala etyi tyapopia “omukai omuhima.” (Omih. 9:​13-18) Ngwe utupu-ale ohonyi, uli umwe nokwiihana ava vokwehena onondunge, uli nokuti: “Endywei na kuno,” endywei tulie. Mahi ava vemutavela vakakala-vo ñgeni? “Vokulele mononkhia vehena vali etyi vevila, omo veli omo.” Twalondolelwe-ale “komukai wehena onondunge,” “omukai otyihayo.” Pokulondolwa twatiwa: “Eumbo liae lilaula no mononkhia.” (Omih. 2:​11-19) Momukanda Omihe 5:​3-10, namo twalondolwa ñgoo vali ‘komukai omukwavo wehena onondunge,’ omukai “wonomphai mbulauka no mononkhia.” w23.06 21-22 §§ 6-7

Ovakulu vewaneno vesukisa umwe okulinga ononkhono opo ovanthu vevemone okuti vapola pokati. (1 Tim. 3:​2, 3) Omukulu wewaneno omukulu pu vakwavo, kapondola vala okusoka okuti atyiho apopia matyitavelwa, mokonda vala oe omukulu-po. Ngwe utyii okuti, ononkhono mba Huku mbutei vala mwou mbamatumbukila apopie umwe etyi matyivekwatesako avalingi etyi tyikahi nawa. Ine otyipuka tyimwe tyapopia omukulu umwe wewaneno katyilipono novitumino vya Huku, ya ovakulu vewaneno aveho vetyitavela, omukulu wewaneno wapola pokati, wapepuka omutima, nae una umwe okutyitavela namphila hamwe ankho asoka otyikwavo. Ovafendi va Huku vapola pokati, vapewa oviwa ovinyingi. Vakala noupanga omuwa na vakwavo mewaneno, mewaneno amukala ombembwa. Tuna ehambu limwe enene liokukala na vakwetu vo kovilongo ovikwavo, vena ovituwa vielikalaila, mahi aveho vafenda vala Siovaa tyelikwata-po. Otyipuka tyituhambukiswa vali unene, okunoñgonoka okuti tyina tulinga ngootyo tukahi nokuhetekela tate yetu Siovaa, wapola pokati. w23.07 25 §§ 16-17

Ndaniyele pokulilongesa omaulo ankho una umwe etyi elilongesila-o tyitiwa umwe otyetyi, okuhanda okunoñgonoka otyili. Ndaniyele tupu wali omunthu weliola omutima, ankho utyii okuti Siovaa memukwatesako anoñgonoka omaulo putyina ngwe akakatela umwe mwe, emutavela. (Ndan. 2:​27, 28) Tyimoneka okuti wali omunthu weliola omutima etyi ayumbile vala onthumbi mu Siovaa, emukwateseko. (Ndan. 2:18) Ndaniyele tupu wali omunthu utala umwe nawa ovipuka pokulilongesa. Waovololele umwe nawa Movihonekwa vya Huku ali navio. (Sele. 25:​11, 12; Ndan. 9:2) Oñgeni noonthwe matuhetekela Ndaniyele? Tala umwe nawa oityi ulilongesila omaulo Ombimbiliya. Okuti ulilongesa tupu omaulo Ombimbiliya okwesuka umwe nokunoñgonoka otyili? Ine otyo, opo Siovaa mekukwatesako. (Swau 4:​23, 24; 14:​16, 17) Vamwe velilongesa-o vala mokonda vahanda okuvasa-mo otyipuka tyilekesa okuti Ombimbiliya ha ndaka-ko ya Huku. Ovo yatyo vokulinga ngootyo vati: Mwene ame tyaviuka ndyityii, tyapenga ndyityii, hilulikwa-le n’Ombimbiliya mokonda ha ndaka-ko-ale ya Huku. Mahi, onthwe tuna umwe okulilongesa-yo tyokwahanda umwe okunoñgonoka otyili. w23.08 9 §§ 7-8

Tupondola okulipwilisa vala nokututumbila evi twahamevili-ale, tyina tulieleka na vakwetu. (Ngal. 6:4) Ine tukalela vala okulieleka na vakwetu, matyitutwala umwe kokuvelwa onkhi, no kokulilolela. (Ngal. 5:26) Pamwe pokuli nokututumba tulinge evi vakwetu valinga, tuli vala nokulipa otyipuka twahamevili-ale, ya otyo tyipondola okutuponeswa. Ine “okulityinkha-tyinkha tyivelesa-le omutima,” ya pahe okututumbila umwe etyi twahamevili-ale! (Omih. 13:12) Ine otyo tulinga otyo, matyitupolo vala ononkhono, katutu-katutu umwe atuyeke-ko kokuhateka mondyila ei itwala komwenyo. Wahatutumbile vala evi wahamevili, evi Siovaa ehekwiitile. Ngwe petupu-ale apa mekwiiti ove umupe etyi wehena. (2 Kol. 8:12) Tula omutima, Siovaa una kaeleka-le evi ulinga neevi vakwenyi valinga. (Mat. 25:​20-23) Una uhambukwa unene tyina atala ovilinga ove ulinga nomutima auho, onthumbi ove una-yo, neetyi uli nokukoleleya. w23.08 29 §§ 10-11

Siovaa wapele umwe Sasau etyi aita, aikula ondyivi-ndyivi yomeva komahuviso. Etyi Sasau anwa omeva oo, amono vali ononkhono, akala umwe nawa. (Ovak. 15:19) Mokutala ondyivi-ndyivi yaikulilwe monthiki omo, yakalele-po omanima omanyingi no pweetyi umwe omuuli Samuwele ahoneka omukanda Ovakoyesi nkhele ankho opo ili. Tyina ova Isilayeli ankho vatala pondyivi-ndyivi oyo, tyivesokesa kokuti ine vayumba onthumbi mu Siovaa mevekwatesako movipuka viatyo aviho vivetumbukila. Noonthwe apeho tuna okwiita ku Siovaa etukwateseko atuhatale kounongo tuna-o no kweevi twalinga-linga-le movilinga viae. Twesukisa umwe okuliola omutima atunoñgonoka okuti matutyivili vala okulinga ovipuka aviho putyina tuyumba onthumbi mu Siovaa. Ngeetyi Sasau amwene ononkhono etyi anwa omaande ana Siovaa emupele, noonthwe matukala vala nononkhono moupanga wetu na Siovaa putyina tutavela aviho etwavela. — Mat. 11:28. w23.09 4 §§ 8-10

Oityi tuna okulinga ine umwe upopia omapita enyina lya Huku, hamwe tupu otyetyi tyili m’Ombimbiliya? Tuna okwiita ku Siovaa na etwavela ononkhono mbae, nekungunyiko tutyivile okukumbulula nomapole. Matulingi ñgeni ine tukati ñgaa etyi twalinga ñgeno ankho hatyo-ko tulinga? Tuna okulikwambela vali, atusoko kweetyi haa matulingi tyina tyameya-po vali. Ine otyo tulinga otyo, Siovaa metwavela ononkhono mbae mbukola, atutyivili okuliondweya, atukumbulula nomapole. M’ombimbiliya muna onovelesikulu ononyingi mbupondola okutukwatesako atupopi nomapole tyina twatumbukilwa na tyimwe tyipwilisa. Ononkhono mba Huku mbupondola okutuhinangelesa onotesitu mbatyo ombo. (Swau 14:26) Nkhele tala vala, onondunge tuvasa mu Provérbios mbupondola umwe okutukwatesako atulingi ovanthu vomapole. (Omih. 15:18) Omukanda oo upopia umwe nawa oityi twesukisila okulinga ovanthu vokwapoleya povipuka viokwalema. — Omih. 10:19; 17:27; 21:23; 25:15. w23.09 15 §§ 6-7

Omu apositolu Petulu pahe ankho ulieete utupu-ale vali ononthiki, pahe wakulupa umwe. Omanima akala movilinga vya Siovaa, waendele na Sesusi movilinga viokwivisa, waivisile movilongo vimwe ankho nkhele muheneiviswe-ale, tupu wali umwe pononkhalamutwe Mbovakilisitau. Mahi nkhele ovilinga vya Petulu kavinepwe. Okuhimbikila menima lyo 62 atee mo 64, watuminwe na Huku ahoneka omikanda vivali pahe vili m’Ombimbiliya, omukanda wo tete nowa vali wa Petulu. ( 2 Pet. 1:​13-15) Petulu wahonekele omikanda ovio momuvo umwe Ovakilisitau ankho veli nokukondya “novitateka ovinyingi.” (1 Pet. 1:6) Ovalume vamwe onondingavivi ankho veli nokweeta mewaneno omalongeso omatutu, novituwa ovivi. (2 Pet. 2:​1, 2, 14) Ovakilisitau vakala mo Selusalei ankho vehungi kokumona “onthyulilo yovipuka aviho” — ova Loma ankho mavahanye-po epandu-umbo lyo Selusalei, avanyimi-ko aviho vilingwa nova Sundaa. (1 Pet. 4:7) Naina, omikanda ovio vya Petulu viakwatesileko umwe Ovakilisitau vetyivile okukoleleya ovitateka ovio vena-vio neevi ankho haa maviya. w23.09 26 §§ 1-2

Noonthwe pamwe ovitateka ovio vitulongesa okutavela. Ongeetyi umwe twamona etyi omukihi wokolona wahimbika, twatilwe tuna okutalama okuliongiyila Monondywo Mbomaliongiyo, nokwivisa umbo na umbo. Tyipondola tyekupwiyile okutavela, mahi etyi wetavela tyekuhupisa, tyakwatesa-ko ewaneno alitwalako tyelikwata-po, wahambukiswa Siovaa. Pahe twafwapo umwe, matuketyivila okutavela atyiho tutolelwa mononkhumbi ononene. Okutavela otyo matyiketuhupisa! (Som. 36:11) Onthwe tutavela tupu Siovaa omokonda tumuhole unene, twahanda okulinga etyi ahanda. (1 Swau 5:3) Siovaa wetulingila ovipuka ovinyingi katutyivili-ale okumufeta. (Ovii. 116:12) Mahi etyi tuvila, okumutavela nokutavela ava apa otyilinga tyokutululika. Ine tutavela, matyimoneka umwe okuti tuvanongo. Ngwe omunthu omunongo uhambukiswa omutima wa Siovaa. — Omih. 27:11. w23.10 11 §§ 18-19

Ine ukati ñgaa oandyu yeya okupopia noove, okuti moitehela? Hono kuna oandyu imwe ili nokupopia novanthu ‘vovilongo aviho, vomihoko aviho, vomalaka aeho, ovanthu vatyo aveho.’ Oityi ina nokuvepopila? Ina nokuveti: “Tilei Huku iya amumuavela omunkhima, . . . fendei Una walinga eulu nohi.” (Ehol. 14:​6, 7) Huku yotyotyili ovanthu aveho ñgeno vena okufenda, o Siovaa vala. Onthwe tupandula unene omphitilo etwavela yokumufendela meumbo liae enene! Eumbo lya Huku enene tuli nokupopia apa, eumbo patyi? Opi papopia umwe nawa eumbo liatyo olio? Eumbo tuli nokupopia apa, heumbo-ko liovitunge. Eumbo tuli nokupopia, elao Siovaa apa ovanthu aveho liokumufenda, etyi apakula Sesusi. Otyipuka otyo Paulu wetyipopia umwe nawa momukanda ahonekelele Ovakilisitau ova Hembeleu ankho vakala mo Sundeya. w23.10 24 §§ 1-2

Menima lyo 522 Pweetyi Kilisitu Eheneye, onondyale mbova Sundaa avetyivili umwe okutalameka otyilinga tyokupindula-po ondywo ya Siovaa. Mahi Sakaliya apopila ova Sundaa okuti, Siovaa mevepe omphepo yae ine ononkhono ononene, ivehondovole atyiho tyahanda okuvetyika. Menima lyo 520 Pweetyi Kilisitu Eheneye, Ohamba Ndaliu aipolo-ko otyitumino otyo tyokwailikile otyilinga tyokupindula-po ondywo ya Huku, nkhele aipe ova Sundaa onombongo, aipopila ovatumini vovilongo vielihula no Selusalei vakwatesako otyilinga otyo. (Esit. 6:​1, 6-10) Siovaa wapopilile ovanthu vae okuti mevekwatesako ine navo vapaka komutwe otyilinga tyokupindula-po ondywo yae. (Ase. 1:​8, 13, 14; Sak. 1:​3, 16) Ova Sundaa avapewa umwe ondundo novauli ovo, menima lyo 520 Pweetyi Kilisitu Eheneye, avahimbika vali otyilinga tyokupindula-po ondywo ya Huku. Kapakalele-ale omanima etano ondywo aipu. Mokonda ova Sundaa vapakele umwe komutwe okulinga etyi Huku ahanda, Huku evekwatesako. Pahe avetyivili umwe okufenda Siovaa nehambu. — Esit. 6:​14-16, 22. w23.11 15 §§ 6-7

Namphila ovanthu ovanyingi vehole-ale okwiiva-iva Ambalayau, vamwe kavemwii nawa, mahi ove Ambalayau umwii nawa. Tyimwe wii otyokuti, oe watiwa o “he yovanthu aveho vena eyumba-nthumbi.” (Loma 4:11) Mahi pahe upondola olipulu oti, okuti naame ndyipondola umwe okupolesa-po onomphai mba Ambalayau, andyityivili okuyumba onthumbi mu Huku ngeetyi ngwe alingile? Yoo, upondola umwe okutyivila. Tyimwe tuna okulinga tuyumbe onthumbi mu Huku nga Ambalayau, okulilongesa umwe nawa etyi alingile. Huku wapopilile Ambalayau emuti motyilongo tyove tunda-mo oende kotyilongo tyimwe kokule, okakala monohinge. Nthiki imwe, emwiiti alinge otyilikutila omona wae ehole Isake. Tyemutwaile kokulinga ovipuka ovio aviho atolaililwe, okuyumba onthumbi mu Huku. Ambalayau wali omunthu uholwe na Huku, avalingi umwe omapanga mokonda yokuyumba onthumbi mu Huku, novipuka alingaile. (Tia. 2:​22, 23) Siovaa wahanda atuho — wahanda noove — tulinge ovanthu ehole, atukala omapanga ae. Otyo atumina ovo Paulu na Tiaku vahoneke evi vialingaile Ambalayau. w23.12 2 §§ 1-2

Vahikwena lilongei okutomphola nawa na vakwenyi. Ovanthu aveho va Huku, vena okutomphola nawa na vakwavo. Pokwapopia etyi tyiyemba kwootyo, omulongwa Tiaku wapopia otyipuka tyimwe tyikahi nawa tyivasiwa motesitu yo hono. Ine uti tyina vakwenyi vapopia, ove otehelela umwe nawa, matyimoneka umwe nawa okuti ove una ‘okankhenda novanthu.’ (1 Pet. 3:8) Ine kwetyinoñgonokele nawa etyi mukwenyi apopia, neetyi eli nokusoka, pula umwe nawa utyinoñgonoke. Tyina wehenepopie, nkhele soka umwe nawa. (Omih. 15:​28, okatoi) Lipula ñgaa: ‘Etyi nahanda okupopia otyili umwe, tyipameka? Omu mandyityipopila, matyiivala umwe okuti napopia nonthilo, nokankhenda?’ Lilongesila kovakulu muna-vo mewaneno vetyivila okutomphola nawa na vakwavo. (Omih. 31:26) Vetehelela umwe nawa tyina vapopia, noomu vapopila. Ine ulilonga okutumphola nawa na vakwenyi, mokala noupanga omuwa navo. w23.12 21 § 12

Hono Siovaa upondola okutuma vakwetu meumbo, nomapanga etu, novakulu vewaneno opo vetukwateseko. Mahi tyina omunthu wameihamenwa, pamwe ulitehela ñgaa wahanda vala okukala awike, kuhande povanthu. Hatyiviko okukala ngootyo. Mahi pahe, oityi tuna okulinga opo Siovaa etukwateseko? Tutumba umwe, weheliyekele olusoko lwokwahanda vala okukala awike. Tyina omunthu wamakala awike, uyemba vala kokusoka kwoove, no kovitateka uli nokukondya navio. Omalusoko atyo ngoo apondola umwe okutulingisisa atulingi evi viahaviukile. Otyili, atuho tyina twatumbukilwa notyipuka tyimwe tyitwiihama unene, pena umwe onoola mbumwe utehela ñgaa wahanda vala okukala awike. Mahi tupu ine tukala vala ehimbwe atwike, tyipondola okutupumbiswa evi Siovaa eli nokulinga na etukwateseko. Naina, tyina vakwenyi meumbo, nomapanga ove, novakulu vomawaneno vekukwatesako, tavela namphila pamwe tyilema. Tyina vakwenyi vekukwatesako, noñgonoka okuti muvo omo Siovaa eli nokukukwatesilako. — Omih. 17:17; Isa. 32:​1, 2. w24.01 24 §§ 12-13

Omu Nasileu ankho kapondola okukululwa. Ya otyo, otyo ankho matyilekesa okuti utavela umwe vala ku Siovaa. Mahi pena omuvo umwe ova Isilayeli ankho vahalingi onthilo ova Nasileu, nii ankho kavevepe ondundo. Pamwe ankho omu Nasileu, una umwe okulikwatehila alinge etyi apopile elikalele na vakwavo. (Amo. 2:12) Mokonda noonthwe twakoya okulinga etyi Siovaa ahanda, twelikalela na vakwetu tukala navo. Twesukisa umwe okulikwatehila tulipopie ku vakwetu tuundapa navo, no kosikola okuti onthwe Tunombangi mba Siovaa. Tyina ouye ou uvilapo vala okukala vali omapita, matyitulemena unene okulandula onondunge mbuli m’Ombimbiliya, nokupopila vakwetu oviwa ovipe. (2 Tim. 1:8; 3:13) Mahi wahalimbwe-ko okuti, tyina tulikwatesila tulikalele naava vahafende Siovaa ‘tuhambukiswa omutima wae.’ — Omih. 27:11; Mal. 3:18. w24.02 16 § 7; 17 § 9

Tala ovanthu ankho veli mewaneno lyo Loma. Ankho mwati umwe omo muna ova Sundaa, valongesiwa vala okuti vena okulandula Ovitumino Viapelwe Mwisesi, omo muna ava veheva Sundaa. Mwali ovanthu velikalaila, vena ovituwa vielikalaila. Ovalongwa vamwe va Kilisitu mokutala ankho ovapika, vamwe ankho havapika-ko, vamwe ankho atee umwe vena ovapika. Mahi pahe oñgeni ankho mavelihumbu ngwe velikalaila? Omutumwa Paulu wevetile: “Liyakulei-vo nawa na vakwenyi.” Otyo ngootyo ankho wahanda okutiwi? Ondaka liyakulei, ipopia okuyakula nawa omunthu, okumuyakula nolwembia, tyilinge omeumbo, tyilinge okukala noupanga nae. Otyo tutyitalela nawa konondaka Paulu apopilile Filemo, ayakule nawa Onesimu, omupika wa Filemo yatyo wemuhenene. Paulu wemutile: “Muyakula nolwembia.” (File. 17) Oo Pilisila na Akila vayakulile nawa Apolo ankho wehei nawa evi ovalongwa va Kilisitu valinga, ‘avaende umwe nae.’ (Ovil. 18:26) Ovalongwa ovo vo tete va Kilisitu kaveliyapaukile mokonda yokwelikalela, mahi ankho veliyakula nawa na vakwavo. w23.07 6 § 13

Otyipuka otyinene vali tyitwala omunthu kokulipakula ku Siovaa, okumuhole. Okuhole kwove Siovaa hatyotyindywe vala tya vakwenyi weete. Mahi tyituka ‘kenoñgonoko liotyotyili,’ no kokukungunyika “evi vituka komphepo yae.” Ovio yatyo, ovievi wanoñgonoka viyemba ku Siovaa viekutwala kokumuhumba vali. (Kolo. 1:9) Etyi welilongesa Ovihonekwa wanoñgonoka okuti, (1) kouye kuna Huku, Siovaa, (2) Ombimbiliya Ondaka yae, (3) uli nokululika eongano liae afwisepo etyi ahanda. Ovanthu vokwelipakula ku Siovaa vena okunoñgonoka etyi Ondaka yae ipopia, avalandula ovitumino viae. Velikwatesila umwe vapopile vakwavo evi valongeswa m’Ombimbiliya. (Mat. 28:​19, 20) Pahe vehole vali Siovaa ya vapanga okumufenda vala aike kwapwa. Okuti noove otyo ukahi ngootyo? w24.03 4-5 §§ 6-8

Ambingaili, wanepelwe na Nambale, ou Ombimbiliya yati, “ombuluvulu omukalavi.” (1 Sam. 25:3) Mokutala, Ambingaili tyemulemenene okukala nomulume oo. Okuti Ambingaili wali nomphitilo yokuyeka-po omulume wae? Yoo. Wali nayo pweetyi Ndaviti, una ankho makala ohamba yova Isilayeli, ahandele okwiipaa Nambale, novalume aveho vakala meumbo liae. (1 Sam. 25:​9-13) Ambingaili ankho upondola vala okutunda meumbo akaholama, Ndaviti eya aipaa Nambale. Mahi hatyoko otyo alingile, welipakele-po aamene Nambale. (1 Sam. 25:​23-27) Oityi tyemutwaile kokulinga ngootyo? Ambingaili ankho uhole Siovaa, ya ankho otyinepo utyilinga onthilo nga Siovaa. Ankho utyii okuti, otyinepo ku Siovaa tyikola. Ankho wahanda ahambukiswe Siovaa. Otyo elipakelele-po ayovole vo meumbo liavo, pati umwe nomulume wae. Kasetele-ale vali, akakondola Ndaviti ahaipae Nambale. w24.03 16-17 §§ 9-10

Okuti mewaneno lienyi, muna ava veli nokulikwatehila vayeke-po ovipuka vimwe, vetyivile okuundapa vali unene movilinga vya Huku? Wii ovana vena nokulikwatehila, vahalinge evi vakwavo kosikola valinga na tyina umwe pamwe tyivelemena? Okuti hamwe vakwenyi mufenda-le navo kohale, veyelwe no vavo mahi otyo velikwatehila umwe vahayekepo okufenda Siovaa? Putyina tyitavela okuvepopila onondaka mbupameka, tuvepopilei umwe. Okupopia umwe etyi tyilekesa okuti tuhambukwa tyina tutala ovipuka vayeka-po, nononkhono veli nokulinga. (File. 4, 5, 7) Siovaa utyii okuti tuhanda okumuhambukiswa. Utyii okuti tuna nokulikwatehila tuyeke-po vimwe, tutyivile okulinga etyi twapopile pokwelipakula. Utulinga umwe onthilo, mwene utuyeka tutale etyi tyikahi nawa tuna okulinga matyilekesa okuti tumuhole. (Omih. 23:​15, 16) Naina tulikwatehilei twahayekei-ko okulingila Siovaa, tumupei umwe etyi tyikahi nawa tuna-tyo, okumulingila. w24.02 18 § 14; 19 § 16

Soka ñgeno pahe noove opo uli. Omenima 29, pomuvo Sesusi ahimbika ovilinga viae pano pohi. Pahe tyati nae, na mee yae Maliya, vakongwa kotyipito tyimwe tyotyinepo mo Kanaa. Maliya mokutala nae uli nokuundapa-mo motyipito omo. Pahe vakati umwe ñgana, ovinyu yapwa-po. Maliya aende no pomona wae, ati: “Vetupu ovinyu.” (Swau 2:​1-3) Pahe Sesusi malingi ñgeni? Matyitula omeva aakala ‘ovinyu imwe yapepa nawa.’ (Swau 2:​9, 10) Sesusi hatyo vala otyo alingile, walingile vali ovipuka ovikwavo vihuvisa pweetyi eli pano pohi. Walingile ovipuka vihuvisa akwatesako ovanthu ovanyingi. Nthiki imwe wapele okulia ovalume vena onomili 5, onthiki onkhwavo ape vali okulia ovalume vena onomili 4. Okuvehonyekela aveho, novakai vali-po, novana vali-po, vapondola umwe okukehika ponomili 27. (Mat. 14:​15-21; 15:​32-38) Pononthiki mbatyo opo apele okulia ovanthu, tupu ahakula ovanthu ovanyingi ankho vavela. — Mat. 14:14; 15:​30, 31. w23.04 2 §§ 1-2

Tyina tutumbukilwa novipuka vimwe vitulemena unene, ononthiki mbumwe pamwe ulitehelela umwe ñgaa nomafa utupu-ale, wasoya-soya vala. Tupondola okukala nga Iliya, tyina ulitehela ñgaa, ovipuka aviho pahe ngoti vialema vala, nokupinduka-po atyileme, utehela wahanda vala moula. (1 Oha. 19:​5-7) Noonthwe pamwe opo tutwaleko movilinga vya Siovaa, tusukisa umwe okukwateswako. Tyina twamelitehela ñgaa twasoya, Siovaa wati metukwatesako ngeetyi tyapopia o tesitu yo hono. Ohamba Ndaviti nae wakwatesilweko na Siovaa. Pweetyi ali novitateka ovinyingi, novanthu ovanyingi vemuyele wapopilile Siovaa ati: “Okuvoko kwove kwokulio kunkhwatesako.” (Ovii. 18:35) Siovaa pamwe pokutukwatesako utuma vakwetu veye okutukwatesako. Tala vala etyi tyalingile Ndaviti. Nthiki imwe Ndaviti wasoyele unene, aendelwa nepanga liae Sonataa emuungumanesa, emupopila onondaka mbupameka. (1 Sam. 23:​16, 17) No pweetyi Iliya asoyele, Siovaa atumu Eliseu emukwateseko. — 1 Oha. 19:​16, 21; 2 Oha. 2:2. w24.01 23-24 §§ 10-12

Siovaa una otyali, otyali tyimwe otyinene. Otyo tutyimonena umwe “kounongo wotyotyili” wapopiwa momukanda Omihe okapitulu 9, watiwa omukai omunongo. Onovelesikulu mbapopia okuti, omukai oo waihana ovanthu veye meumbo liae, na valie ohitu imwe yapepa ateleka, avanu ovinyu anyunga. (Omih. 9:​2, okatoi) Mahi, ovelesikulu ya 4 noya 5 mbati: “Ngwe [ounongo wotyotyili] wapopila ava vokwehena onondunge wati: ‘Endywei mulie kombolo yange.’” Oityi tyahandela umwe tutavele tyina tukongwa meumbo liounongo wotyotyili, atuli umwe okulia ounongo oo wateleka? Siovaa wahanda onthwe ovana vae tukale ovanongo, tukale umwe nawa. Kahande tulinge ovipuka viahaviukile, haa pahe atyitwiihama vala. Otyo “ounongo eupakela nawa ulinge wonondingaviwa.” (Omih. 2:7) Tyina tuna owoma na Siovaa, matusuku vala nokulinga evi vimuhambukiswa, matumutehela tyina etupakaila-mo tulinge ovipuka nounongo. Ngwe otyo tyituhambukiswa-le unene. — Tia. 1:25. w23.06 23 §§ 14-15

Na tyina umwe pamwe tyitupwiya okulinga atyiho twahanda movilinga vya Siovaa, tuyumbei-ko onthumbi, Siovaa upandula-le ononkhono tukahi nokulinga tumuhambukiswe. Oityi tupopila ngootyo? Tupopia ngootyo mokonda pononthiki mba Sakaliya Siovaa watumine omuuli wae Sakaliya, apole oolu nopalata yatundile ku vana vali koupika ko Mbambilonia atunge nayo “otyuuya” (ohala). (Sak. 6:11) “Otyuuya” otyo, otyo tyevehinangelesile otyali valingile tyokwava etyi vena-tyo. (Sak. 6:​14, outoi) Noonthwe tuyumbei-ko onthumbi, Siovaa kamalimbwa-le ononkhono tulinga mbokumulingila na tyina umwe ovipuka vialema. Onthwe tutyii umwe okuti mononthiki mbuno mbonthyulilo tuli, pamwe matutumbukilwa umwe novipuka vitulemena, vipondola nkhele mavivilipo vali komutwe oku twenda nako. (2 Tim. 3:​1, 13) Mahi, twahalingei otyiho. Tusokei konondaka Siovaa apopile pononthiki mba Aseu, watile: “Ame ndyina onwe . . . Mwahatilei owoma.” (Ase. 2:​4, 5) Onthwe tuyumbei-ko onthumbi, Siovaa makala noonthwe tyina tulikwatesila atulingi etyi ahanda. w23.11 19 §§ 20-21

Omutumwa Petulu Siovaa ankho upondola okuti ovipuka viahaviukile Petulu alingaile, viahapakwe m’Ombimbiliya. Mahi wevipaka-mo opo noonthwe tulilongesile-ko hono. (2 Tim. 3:​16, 17) Okulilongesa nawa etyi tyalingile omulume oo, wati umwe ankho oe upengesa oe usoka vala ngoonthwe, tutyimona okuti Siovaa utyii okuti pamwe noonthwe matupengesa umwe. Siovaa wahanda tulikwatesile twahasoye, naapa pamwe tuponyauka. Noonthwe ongootyo umwe, pamwe otyipuka tyimwe ankho ulinga tyahaviukile wetyiyeka-po, mahi ukati ñgaa nthiki imwe wetyipaleka vali. No ngootyo tulikwatesila umwe etyi twesuka natyo tutyivile. Atuho pamwe tupopia, nokulinga otyipuka tyimwe haa pahe atulivele, mahi ine katuyeke-ko, Siovaa metukwatesako umwe atutyivili okuyeka-po otyipuka twahahandele. (1 Pet. 5:10) Sesusi walingile okankhenda Petulu, naapa umwe pamwe ankho apengesa, okutyinoñgonoka otyo, matyitwavela umwe ononkhono atwahayeke-ko okulingila Siovaa. w23.09 20-21 §§ 2-3

Omu wetyipopila Malata monondaka mbo tesitu yo hono, Sesusi ankho utyivila umwe okuhakula Lasalu. Mahi ankho wahanda okulinga otyipuka otyinene vali. Ati: “Omphange yove mapinduka-po.” Tupu apopi okuti: “Ame, ame etutilo, ame muenyo.” (Swau 11:​23, 25) Huku wetyipa Sesusi tyokututilisa vokwanyima. Ankho ngootyo watutilisile-ale omukainthu poola yatyo umwe vala anyima, tupu watutilisile omukwendye, tyipondola ankho omonthiki yatyo umwe anyima. (Luka 7:​11-15; 8:​49-55) Pahe okuti ankho metyivili okututilisa omunthu wakala-le ononthiki ononkhwana, nolutu pahe ankho luli-ale nokuvola? Maliya nae ñgoo velilandula na Lasalu, weya vahonyena na Sesusi. Etyi velivasa apopi ñgoo etyi tyapopile-ale mukwavo ati: “Tatekulu, inkha wali kuno, ñgeno omphange yange kankhile.” (Swau 11:32) Etyi Sesusi atala umwe ñgaa ovo Maliya na vakwavo vena-vo vaetesa onkhenda veli nokulila, nae atyimwiihama umwe atokesa ononkhuka. Nae utyii okuti okuhiwa-po nomunthu uhole tyiihama unene. Tyotyili ankho wahanda umwe okutyinyima-po etyi tyili nokuvelilisa! w23.04 10-11 §§ 12-13