Onondaka Mbombimbiliya Mbahangununwa

A E F H I K L M N O P S T V W

A

• Akasiya.

  Ombao yomuti utiwa omu akasiya (Cinnamomum cassia), omuti umwe welifwa nomiti vimwe vitiwa cinamomo. Ombao yomu akasiya yali yokunikisa nawa ovipuka, yapakailwe umwe no momulela ukola wokulembula. — Oku 30:24; Ovii 45:8; Ise 27:19.

• Akaya.

  Epunda-umbo limwe liali mo Loma kombwelo yo Ngelesia liapopiwa Movihonekwa Viovakwa-Kilisitu mo Ngeleku. Ombala yatyo yepunda-umbo lyo Kolindu. O Akaya yaoyele umwe no Peloponeso aiho novilongo vimwe vyo mo Ngelesia. (Ovi 18:12) — Tala Ovipuka Viapotoyolwa B13.

• Alaa; Ova Alaa.

  Ovanthu vokwatuka mu Alaa omona wa Sei, haunene vokwakalaile motyilongo Tyonomphunda mbo Limbanu atee ko Mesopotamia, no Konomphunda mbutiwa Tauro mbahula kombanda atee ko Ndamasiku, avakaoyela kombwelo. Otyilongo otyo mo Hembeleu ankho tyitiwa o Alaa, konyima pahe atyitiwa o Silia, ovanthu vatyo vakala-mo vatiwa ova Silia. — Ehi 25:20; Epa 26:5; Os 12:12.

• Alakandyu.

  Otyo okuti “omunene, omutumini wonoandyu.” Okuti “alak” ngootyo okuti, “omutumini,” “omunene watyo.” Mokonda Mombimbiliya ondaka “alakandyu” ipopia vala omunthu wike, tyilekesa okuti kuna vala alakandyu wike. Ombimbiliya yatumbula umwe enyina lya alakandyu, yemuti o Mingeli. — Nda 12:1; Sud 9; Eho 12:7.

• Alamaiku.

  Elaka liapopailwe no vokwatuka mu Sei lielifwa no Hembeleu, no ambesendaliu yatyo ike. Mwene velipopaile ova Alaa, mahi pahe konyima alipopiwa movilongo ovinyingi novakwa-niñgoso, no pweetyi o Asilia itumina ovilongo ovinyingi, no pweetyi o Mbambilonia itumina ovilongo ovinyingi. Tupu olio liapopailwe movilongo ovinyingi pweetyi o Pelesa itumina ovilongo ovinyingi. (Esi 4:7) Onovelesikulu mbumwe mbomukanda wa Esitala, no wa Selemiya no wa Ndaniyele mbahonekelwe mo Alamaiku. — Esi 4:8–6:18; 7:12-26; Sel 10:11.

• Alambasitulu.

  Ongootyo ankho tyitumbulwa ounthenda umwe oututu upakwa omulela unika nawa walingwa nomamanya o konthele ko Alabastron, ko Isitu. Ounthenda oo ankho una okamunyino okalaale notyipato opo omulela unika nawa utyindwa-mo wahanenguke-mo. Nemanya liatyo ankho otyo litumbulwa ngootyo. — Mku 14:3.

• Alamote.

  Ondaka ipopiwa novaimbi, otyo okuti: “Ovakainthu,” mokutala ipopia onondaka mbovakainthu vaimba. Mokutala tupu ankho pohika yatyo opo omunthu pokwiimba una okukaluluka. — 1Eh 15:20; Ovii 46:Onondaka mbokwahimbika.

• Aleopaku.

  Otyipunda tyaya peulu mo Atena, tyikala kombanda okuyemba katutu koutakelo mo Acrópole. Tupu otyo tyitumbulwa vombonge veliongiyila-mo. Paulu watwailwe mo Aleopaku novanongo ova Sitoiku nova Epikuleu akapotoyole nawa evi alongesa. — Ovi 17:19.

• Alfa, Omenga.

  Alfa oletela yo tete mo ambesendaliu yo Ngeleku, Omenga o yokwahulilila; mbapopiwa ambuho tutatu momukanda Eholololo pokupopia Huku. Apa mbapopiwa mbupopia okuti, “wo tete, wokwahulilila” tupu mbuti, “onthyimbi, onthyulilo.” — Eho 1:8; 21:6; 22:13.

• Alumangendom.

  Mo Hembeleu Har Meghiddóhn, otyo okuti “Omphunda yo Mesitu.” Ondaka oyo ipopia “ovilwa vionthiki onene ya Huku, Omuvili wa Atyiho,” onthiki “onohamba kombanda yohi aiho” mambulikongolola mbulwise Siovaa. (Eho 16:14, 16; 19:11-21) — Tala pokwati ELAMBA ENENE.

• Amb.

  Etyi ova Sundaa vatunda koukonde ko Mbambilonia, ongootyo vahambika okutumbula ohanyi ya tano pokuvalulila ovilinga vikola, mahi mokuvalula kwovaunyingi oyo ankho ohanyi 11. Ihimbikila pokati kohanyi ya Kakwenye aikapwila pokati ka Kwenye Kunene. Mombimbiliya kayatumbulilwe-mo, yatiwa vala “ohanyi ya tano.” (Omb 33:38; Esi 7:9) — Tala Ovipuka Viapotoyolwa B15.

• Ambimbe.

  Olio enyina liatyo mwene liohanyi yo tete mokuvalula kwova Sundaa, mahi mokuvalula kwovaunyingi, oyo ohanyi ya pandu-vali. Enyina olio okuti, “Ovikuna Viasangula,” ihimbikila pokati kohanyi ya Tyitalale aikapwila pokati ka Tyikukutu. Etyi ova Sundaa vatunda koukonde ko Mbambilonia, pahe aveiti o Nisaa. (Epa 16:1) — Tala Ovipuka Viapotoyolwa B15.

• Amem.

  “Otyo yatyo,” “Otyo umwe.” Ondaka oyo mo Hembeleu yatuka kondaka ʼamán, otyo okuti, “okuyumba-ko onthumbi, tyiyumbwa onthumbi.” Ovanthu ankho vati “amem” tyina umwe ena etyi apopia aane, no pokulikwambela, na tyina pena etyi tyatolwa. Momukanda Eholololo ondaka oyo ipopia Sesusi. — Epa 27:26; 1Eh 16:36; Eho 3:14.

• Andale.

  Etyi ova Sundaa vatunda koukonde ko Mbambilonia, ongootyo vahimbika okutumbula ohanyi 12 pokuvalulila ovilinga vikola, mahi mokuvalula kwovaunyingi oyo ohanyi 6. Ihimbikila pokati ka Hitandyila atee pokati ka Tyitalale. (Sit 3:7) — Tala Ovipuka Viapotoyolwa B15.

• Apa pahininwa onouva.

  Haunene omatoto evali atembwa monkhanda imwe yatena, omatoto atyo atyiti eli likala peulu eli likala pombwelo. Onouva ankho mbuhininwa petoto liatembwa monkhanda peulu, omaande atyo otyo akunkhunukila petoto lyo pombwelo, aendela mokamukungu kahonyeka omatoto oo evali. Tupu omo ankho vahinina tyina valinga omulela wo asete. Ondaka oyo, pamwe ipopiwa ngonthengele-popia pokupopia onyengo ya Huku. — Is 5:2; Eho 19:15.

• Asaseli.

  Enyina lyo Hembeleu hamwe lihangununa “Otyinkhombo Tyivomba.” Monthiki Yokukohwa Ononkhali, otyinkhombo tya Asaseli tyitahelwa moluhandya, ngatyina tyatyinda ononkhali ova Isilayeli valinga menima liokwalamba. — Le 16:8, 10.

• Aselgeia.

  — Tala pokwati EVI VIKUNDISA.

• Asitolete.

  O huku yova Kanaa, huku yovilwa, nolutyito, omukai wa Mbaale. — 1Sa 7:3.

• Asiya.

  Movihonekwa vyo Ngeleku enyina liepunda-umbo lyo Loma, tupu mwati notyilongo tyo Tulukiya koutakelo, noulongo wokukala pokati komeva, o Samu no Patamu. Epunda-umbo liatyo enene o Efesu. (Ovi 20:16; Eho 1:4) — Tala Ovipuka Viapotoyolwa B13.

E

• Efa.

  Oyokweeleka evi viakukuta, oyo vaeleka nayo ovilia. Ilifwe nombatu, nayo ityinda omapati 22 (otyiyongelo). (Oku 16:36; Ise 45:10) — Tala Ovipuka Viapotoyolwa B14.

• Efalaii.

  Omona wa vali wa Susee; enyina olio ngalio litumbulwa omuhoko umwe pomihoko vya Isilayeli. Etyi ova Isilayeli pahe veliyapauka, omihoko aviho 10 avitumbulilwa vala kenyina lya Efalii, omuhoko omunene-po vali. — Ehi 41:52; Sel 7:15.

• Ekaka liefendelo.

  Ekaka liokutyindwa-tyindwa, omu ova Isilayeli vafendelele Huku etyi vatunda ko Isitu. Mwali otyikasa tyomphango tya Siovaa tyilekesa okuti Huku opo eli, omo valingilile ovilikutila tupu omo vafendelele Huku. Pamwe liatilwe “ohinge yomaliongiyo.” Lialingilwe nomavai, liali novinyanga viaundaiswa onokelumbii. Liayapulilwe tuvali, nthele imwe Okomphangu Ikola, konthele onkhwavo Okomphangu Ikola Unene. (Sus 18:1; Oku 25:9) — Tala Ovipuka Viapotoyolwa B5.

• Ekunga.

  Omunthu weenda na ava ehelinepele navo otyo afetwa. (Mo Ngeleku ondaka ipopia “ekunga,” yatuka mondaka pórne, ipopia “okulandesa.”) Ondaka oyo mwene haunene ipopia ovakai, namali Mombimbiliya mwapopiwa ovalume vali omakunga. Movitumino viapelwe Mwisesi tyailikilwe, tyafetwa ekunga katyitavela okutyipakula momphangu ikola ya Siovaa. Mahi ovanthu vahafende Huku ankho vapola umwe onombongo momakunga o monondywo mbavo vafendela ovika-huku. (Epa 23:17, 18; 1Oh 14:24) Ombimbiliya tupu ipopia ondaka oyo momihe, pokupopia ovanthu, novilongo vielipaka momafendelo ovilolo otyo vati tufenda Huku. “O Mbambilonia Onene” momukanda Eholololo nayo yatiwa ekunga, mokonda ilipaka kumwe novatumini imone omunkhima, imonene-mo. — Eho 17:1-5; 18:3; 1Eh 5:25.

• Elamba enene; ononkhumbi ononene.

  Ondaka yo Ngeleku “elamba” ipopia olwihamo nemone lituka kweevi vitumonekela. Sesusi wapopile “elamba enene” lieheneende-ko liamonekele mo Selusalei, malimonekela ovanthu komutwe tyina ameya ‘momunkhima wae.’ (Mt 24:21, 29-31) Paulu tupu wapopia elamba olio okuti otyipuka tyaviuka Huku makalinga vana vehemwii, “vehetavela oviwa ovipe” vipopia Sesusi Kilisitu. Omukanda Eholololo okapitulu 19 wapopia Sesusi omutumini wovita vyo keulu makalwisa “enyama nonohamba mbo pohi novita viambo.” (2Te 1:6-8; Eho 19:11-21) “Ovanthu ovanyingi-nyingi” mavakahupa kemone olio. (Eho 7:9, 14) — Tala pokwati ALUMANGENDOM.

• Elangalo lihinangelwa.

  Opapa papakwa otyivimbi, eendo. Ondaka oyo yatuka mondaka yo Ngeleku mnemeíon, yatuka mondaka imwe iti “okuhinangela,” yeeta olusoko lwokuti omunthu wokwanyima makahinangelwa. — Swa 5:28, 29.

• Eliapu.

  Ongootyo Satanasi atumbulwa Movihonekwa Viovakwa-Kilisitu mo Ngeleku, enyina olio lipopia okuti, “Omutendeleyi.” Satanasi walukwa tupu enyina olio omokonda oe omutendeleyi omunene watyo, wetyihimbika-le kohale, utendeleya Siovaa, nondaka Yae ongwa, nenyina Liae likola. — Mt 4:1; Swa 8:44; Eho 12:9.

• Elilimu.

  Onombongo omunthu ena okufeta kovatumini. (Ne 5:4; Lo 13:7) Ondaka oyo tupu ipopia onombongo omutumini afeta komutumini mukwavo, opo akale nombembwa, tupu opo ayakulilwe. — 2Oh 3:4; 18:14-16; 2Eh 17:11.

• Elomaa.

  Otyinyango tyimwe tyelifwa nepelu, tyilinga ngoti tyina ohala konyima yatyo. Omapeta atyo atena ahika konoñgima mbuli mokati katyo mbuna omeva, mbuna outindi ukuhukila. Kotyikutu otyingole tyehena omavoko omale tyomunene-nakwa, kwatungaililwe oupuka wafwa omalomaa. Konomphandyi mbali komutwe wondywo ya Huku, nako kwanthindailwe omalomaa, ankho tyati ei itiwa o Sakii ei o Mbowasi. — Oku 28:34; Omb 13:23; 1Oh 7:18.

• Elongeso.

  Ovanthu vena ondongeso imwe vetavela, tupu valandula etyi tyipopia onkhalamutwe yongeleya neetyi mwene vetavela. Ova Faliseu nova Sanduseu vali nelongeso liavo. Ovanthu vehevakwa-Kilisitu valukile Ovakwa-Kilisitu aveveti o “velongeso liova Nasalee,” mokutala vasokele okuti vatuka mongeleya yova Sundaa. Mewaneno Liovakwa-Kilisitu mwatundile omalongeso amwe. Omukanda Eholololo upopia “elongeso lya Nikolau.” — Ovi 5:17; 15:5; 24:5; 28:22; Eho 2:6; 2Pe 2:1.

• Elule.

  Ohanyi ya 6 mokuvalula kwova Sundaa etyi pahe vatunda koukonde ko Mbambilonia, kovanyingi ohanyi ya 12. Ihimbikila pokati kohanyi ya Kwenye Kunene aikapwila pokati ka Tungonkhe. (Ne 6:15) — Tala Ovipuka Viapotoyolwa B15.

• Emanya liokukunkha.

  Emanya lieliseta elola litenthekwa kombanda yekwavo likunkhe ovilia. Pokati-nakati kemanya enene liatyo patonthwa apakala okatoto muhukikwa otyimuti tyikanyingila memanya etutu liatyo tyitavele okuliseta. No kohale momaumbo omanyingi mwali omamanya omakwavo matutu vali ovakai vakunkhila. Ovitumino viapelwe Mwisesi vialikile okukwata opinyolo emanya liokukunkha, mokonda momaumbo omanyingi oko umwe vala vakunkha. Omamanya omanene atyo pokunkha pamwe eliseteswa umwe notyimbulu. — Epa 24:6; Mku 9:42.

• Emanya Liopevindi; Lioponthomba.

  Emanya lipakwa pevindi liondywo (ponthomba) apa ovimato vihonyena, olio lihonyeka ovimato, avieheliaanunuka. Emanya liatyo mwene liopevindi, lipakwa melisesu; emanya limwe liakola likoywa umwe pokutunga onondywo ononene, novimato viepunda-umbo. Ondaka oyo tupu yapopiwa ngomuhe pokupopia ehina liohi, Sesusi nae watiwa “emanya liatyo mwene liopevindi” liewaneno Liovakwa-Kilisitu, ewaneno liapopiwa ngatyina ondywo ya Huku. — Ef 2:20; Som 38:6.

• Endoo.

  Enyina ekwavo lya Isauu omona wa Isake. Vokwatuka mu Isauu (Endoo) vakalaile mo Seile, motyilongo tyonomphunda pokati okuti oku Elunga Liankhia oku eiva liokwatunda melunga litiwa Aqaba. Otyilongo otyo atyitiwa o Endoo. (Ehi 25:30; 36:8) — Tala Ovipuka Viapotoyolwa B3 no po B4.

• Enyingilikilo.

  Otyipuka tyeya vala pamwe tyalingwa, otyipuka tyahakakele tyina etyi tyilekesa haa matyimoneka. — Ehi 9:12, 13; 2Oh 20:9; Mt 24:3; Eho 1:1.

• Enyingilikilo likola lielipakulo.

  Omulami umwe uliaima woolu yatyo mwene wahonekwa onondaka mbumwe mo Hembeleu mbuti “Ousukuki owa Siovaa.” Upakwa mombamba yomunene-nakwa kombanda yombuya. (Oku 39:30) — Tala Ovipuka Viapotoyolwa B5.

• Epata.

  Mombimbiliya ondaka oyo ipopia okaluhandya akeho kali pekaka liefendelo, etyi pakala, etyi pahe ondywo ya Huku yatungwa, epata olio alikala mokati kotyimato. Omutala wokuyokela ovilikutila wali pepata liekaka liefendelo, tupu wali mepata liomokati liondywo ya Huku. (Tala Ovipuka Viapotoyolwa B5, B8, B11.) Ombimbiliya tupu ipopia omapata omaumbo no onombala. — Oku 8:13; 27:9; 1Oh 7:12; Sit 4:11; Mt 26:3.

• Epunda-umbo lya Ndaviti.

  Enyina liapelwe epunda-umbo lyo Sembusi etyi Ndaviti anyingila-mo elilwisa ngaamo atunga ombala yae. Tupu liatiwa o Siyau. Liahula kombwelo yo Selusalei, epunda-umbo ekulu-ale. — 2Sa 5:7; 1Eh 11:4, 5.

• Epundi.

  Monovelesikulu mbumwe Mombimbiliya epundi omomu mukutilwa omunthu tyina ena etyi alinga tyapenga. Vamwe vevekutila-mo vala onomphai, mahi vamwe vakutilwa-mo nomavoko nomunyino, pahe elionyo. — Sel 20:2; Ovi 16:24.

• Etala liotupia.

  Otyilekesa tyomphangu imwe “ina otupia, no isofele,” tupu ondaka oyo ipopia “ononkhia mba vali.” Vokulinga ononkhali avehelivele, Eliapu, atee umwe nononkhia, nondyembo (o Hades), atyiho tyayumbwa metala omo. Mokonda papopiwa ovipuka viahapi-ale, Eliapu, nononkhia, nondyembo, otyo tyilekesa okuti etala olio otyilekesa vala, hakuti opofika ovanthu vapakwa otyo vamoneswa vala emone, mahi tyilekesa okuhanyaunwa-ko umwe atyikala-po. — Eho 19:20; 20:14, 15; 21:8.

• Etambu.

  Apa yapopiwa Mombimbiliya yapopia omunthu wokutavela okuti, omunthu nga ankhia omphepo yatyo kainkhi, ikapopia novanthu vokuna omwenyo, haunene umwe novitapi. Ondaka yo Ngeleku “etambu” farmakía, ipopia “ovihemba.” Ondaka oyo yelikwata netambu mokonda omunthu wokupopia novilulu una ovihemba. — Nga 5:20; Eho 21:8.

• Etanii.

  Ohanyi ya pandu-vali mokuvalula kwova Sundaa, kovanyingi ohanyi yo tete. Ihimbikila pokati kohanyi ya Tungonkhe aikapwila pokati ka Kulindi. Etyi ova Sundaa vatunda koukonde ko Mbambilonia, pahe aveiti o Tisili. (1Oh 8:2) — Tala Ovipuka Viapotoyolwa B15.

• Etemba liovilwa.

  Etemba lina omalola evali likokwa nononkhambe. Omatemba atyo oo alingililwe umwe vala ovilwa. — Oku 14:23; Vak 4:13; Ovi 8:28.

• Etiopia; ova Etiopia.

  Ovanthu vamwe vali-ko kohale vakalaile kombwelo yo Isitu. Ohika yavo yaoyelele kombwelo yo Isitu yo hono, aikakwata kombanda yo Sudão yo hono. Ondaka oyo pamwe yapinga pondaka yo Hembeleu “Kusi.” — Sit 1:1.

• Etoto liaya kohi.

  Mo Ngeleku tyatiwa abyssos, otyo okuti “kohi kwahavahiwa-le” tupu okuti, “tyehena apa tyehikila, tyekelitaha-taha.” Movihonekwa Viovakwa-Kilisitu mo Ngeleku, ondaka oyo ipopia okupaka otyipuka pohika tyahamatundu, nokupaka otyipuka momukalelo umwe ngamo tyipangaila vala. Tupu ipopia eendo, mahi hatyo vala ipopia. — Lu 8:31; Lo 10:7; Eho 20:3.

• Etutilo.

  Ondaka oyo ipopia omunthu wankhile akala vali nomwenyo. Mo Ngeleku anástasis, ondaka ipopia “okukatuka; okutalama.” Ombimbiliya ipopia ovanthu vena etyive vatutilisilwe, umwe pwoovo o Sesusi watutilisilwe na Siovaa Huku. Ovanthu vamwe vatutilisile vokwankhia, tyati na Iliya, na Eliseu, na Sesusi, na Petulu, na Paulu, mahi vetyivilile tupu ononkhono mba Huku mbevepele-tyo. Omphango Huku ena-yo o yokututilisa ovanthu pano pohi, “onondinga-viwa naava vehenondinga-viwa.” (Ovi 24:15) Ombimbiliya tupu ipopia etutilo “lyo tete” lya ava mavaende keulu, onondenge mba Sesusi vokwalembulwa nomphepo ikola. — Flp 3:11; Eho 20:5, 6; Swa 5:28, 29; 11:25.

• Etyi tyasila.

  Ondaka oyo pamwe ipopia umwe omunthu wasila pamwe oyouna ulinga evi viasila. Mahi Mombimbiliya ondaka oyo ipopia etyi tyehetavelwa, tyasila Movitumino viapelwe Mwisesi. (Le 5:2; 13:45; Mt 10:1; Ovi 10:14; Ef 5:5) — Tala pokwati OKUSUKUKA.

• Eufalate.

  Ondongi imwe onene yatuka kokule ili mo Asiya yahula kombwelo, o imwe ponondongi onombali ononene vali mo Mesopotamia. Apa yapopiwa umwe tete o momukanda Ehimbikilo 2:14, o imwe ponondongi ononkhwana mo Endene. Popanyingi yapopaiwa yatiwa vala “Ondongi.” (Ehi 31:21) Omo mwaoyelele otyilongo tyo Isilayeli kombanda. (Ehi 15:18; Eho 16:12) — Tala Ovipuka Viapotoyolwa B2.

• Eulo.

  Omu mutyipopila Ombimbiliya, oyo ondaka imwe yafiminwa pamwe ihololola etyi Huku ahanda, tupu pamwe ipopia etyi matyilingwa. Ondaka oyo eulo pamwe ipopia ondongeso yonondunge mbafiminwa, pamwe aipopi otyitumino tya Huku, okuti hatyo omphela yae, oku pamwe aipopi etyi matyiya komutwe. — Ise 37:9, 10; Nda 9:24; Mt 13:14; 2Pe 1:20, 21.

• Evi Vikundisa.

  Yatunda mondaka yo Ngeleku asélgeia, ipopia ovituwa ovivi unene vipikiya ovitumino vya Huku vilingwa umwe nomunthu wahakundu-ale, wehena onthilo; okwehena onthilo naava vatumina, novitumino. Ondaka oyo kaipopi vala otyipuka tyitiwa tyapenga, ipopia umwe etyi tyapenga unene. — Nga 5:19; 2Pe 2:7.

• Ewaneno.

  Ovanthu vawanena vena etyi mavalingi. Movihonekwa vyo Hembeleu itona vali okupopia ova Isilayeli aveho. Movihonekwa Viovakwa-Kilisitu mo Ngeleku, ipopia omawaneno Ovakwa-Kilisitu, mahi popanyingi ipopia Ovakwa-Kilisitu aveho. — 1Oh 8:22; Ovi 9:31; Lo 16:5.

• Eyungu, olungu.

  Otyetyi tyitunda kovilia no kotiliku tyina yayelwa. Ombimbiliya apa yamapopi eyungu ngootyo ili nokupopia otyipuka tyehesilivila, tyehekahi nawa. — Ovii 1:4; Mt 3:12.

F

• Falaoo.

  Enyina lionohamba mbo Isitu. Ombimbiliya ipopia ovo Faloo vetano, (Sisake, na Soo, na Tilaka, na Neku, na Hofala), mahi ovo Faloo ovakwavo vokwamwene ovo Ambalayau, na Mwisesi, na Susee ovo kavatumbulilwe-mo. — Oku 15:4; Lo 9:17.

• Filisitiya; ova Filisitiya.

  Otyilongo tyikala kombwelo yo Isilayeli, konyima tyatilwe o Filisitiya. Ova Filisitiya vailaukile, vali ko Keleta aveya ko Filisitiya. Ndaviti wevelwisile avahaveteko kwe, mahi kavatumininwe notyilongo otyikwavo, vali onondyale mbova Isilayeli. (Oku 13:17; 1Sa 17:4; Am 9:7) — Tala Ovipuka Viapotoyolwa B4.

H

• Hades.

  Ondaka yo Ngeleku, mo Hembeleu o “Sheol.” Pokweipitiya yatiwa “Ondyembo; o Kondyembo.” — Tala pokwati KONDYEMBO.

• Heleme.

  O huku yo Ngelesia omona wa Seusi. Etyi Paulu eli ko Lisitala avemuti o Heleme, mokonda huku yatyo oo vati omutumwa-ndaka wono huku, o huku younongo wokupopia. — Ovi 14:12.

• Helonde.

  Enyina lyo vombunga imwe yatuminwe nova Loma vatumine ova Sundaa. Helonde Omunene, wankhimanene etyi atunga ondywo ya Huku mo Selusalei, neetyi atumine okwiipaa ovana aveho ovakwendye mokwahanda okwiipaa Sesusi. (Mt 2:16; Lu 1:5) Helonde Alukelau, na Helonde Antipa, ovana va Helonde Omunene, vatuminine ovilongo vimwe povilongo viatumininwe na tate yavo. (Mt 2:22) Antipa wali omutumini, ovanthu ovanyingi vemutile vala “ohamba,” oe wali-ko kokutumina omanima etatu nomeya Kilisitu aundapa movilinga viokulongesa ovanthu atee pomuvo wapopiwa momukanda Ovilinga okapitulu 12. (Mku 6:14-17; Lu 3:1, 19, 20; 13:31, 32; 23:6-15; Ovi 4:27; 13:1) Etyi pakala, Helonde Angilipa I, omutekula wa Helonde Omunene, aipawa noandyu ya Huku. Kokutumina wakalele-ko vala kapii. (Ovi 12:1-6, 18-23) Omona wae Helonde Angilipa II, ngae upinga kovipundi, atumina umwe atee pononthiki ova Sundaa valungulula pahe avati katutuminwa vali no Loma. — Ovi 23:35; 25:13, 22-27; 26:1, 2, 19-32.

• Hingayoo.

  Ondaka ipopiwa no vokululika vokwiimba. Ondaka oyo yapopiwa momukanda Oviimbo 9:16, ipondola ipopia okuhika konongoi mbokwahatonene unene mbotyisandyi, okuti hatyo, ipopia okutalama-po kapii omwiimbi nkhele asoke.

• Holembe; Omphunda yo Holembe.

  Onomphunda mbokweliseta Nomphunda yo Sinai. Olio enyina ekwavo Liomphunda yo Sinai. (Oku 3:1; Epa 5:2) — Tala Ovipuka Viapotoyolwa B3.

• Huku yotyotyili.

  Mo Hembeleu ondaka oyo okuti “Huku.” Popanyingi ondaka oyo mo Hembeleu ipopia okuti Siovaa ae vala Huku yotyotyili, welikalela nono huku mbomatutu. Ondaka “Huku yotyotyili” ipopia umwe nawa-nawa etyi tyapopia o Hembeleu. — Ehi 5:22, 24; 46:3; Epa 4:39.

I

• Ililiku.

  Epunda-umbo limwe lyo Loma likala kombanda yo Ngelesia okuyemba katutu koutakelo. Motyilongo omo Paulu wakwatele-mo pokuli movilinga viokwivisa, mahi katyapopilwe ine waivisile-mo ine walambelele-mo vala ondyila. (Lo 15:19) — Tala Ovipuka Viapotoyolwa B13.

• Isilayeli.

  Enyina Huku alukile Sakoo. Etyi pakala alipopi aveho vatuka mwe. Vokwatuka movana 12 va Sakoo pamwe vatiwa-tiwa ovana va Isilayeli, eumbo lya Isilayeli, ovanthu va Isilayeli, ova Isilayeli. Vomihoko 10 vouhamba wo kombanda vokwelitipukile nouhamba wo kombwelo navo vatilwe ova Isilayeli. Konyima pahe enyina olio alipewa Ovakwa-Kilisitu valembulwa o “Isilayeli ya Huku.” — Nga 6:16; Ehi 32:28; 2Sa 7:23; Lo 9:6.

• Isopu.

  Otyifo tyimwe tyina oufo oututu ovanthu vanyanya natyo ohonde, nomeva poviso viokusukula ovipuka, novanthu. Mokutala ovifo vitiwa manjerona (Origanum maru; Origanum syriacum). Omu tyapopilwa mu Swau 19:29, tyipondola o manjerona yakutilwa kotyingenge tyomaha (Sorghum vulgare). Mokonda omaha ekula enda umwe unene peulu, kotyingenge tyatyo kutavela umwe okukutila-ko otyiyavo vayava movinyu yalula aveipake komulungu wa Sesusi. — Oku 12:22; Ovii 51:7.

K

• Kalindeya; Ova Kalindeya.

  Kohale tyali otyilongo ova Kalindeya vakalaile konthele kondongi yo Tingele no Eufalate; etyi pakala, ngootyo tyitumbulwa o Mbambilonia aiho naava vakala-mo. Ondaka oyo “ova Kalindeya” tupu ipopia ovanthu vokwatanga unene, vanoñgonoka ouye, vahipulula etyi tyaenda-enda ovipuka, vei omalaka, vei nononthungululu, vati nokwatambula vatambula, vatalela kononthungululu. — Esi 5:12; Nda 4:7; Ovi 7:4.

• Kambu.

  Oyokweeleka evi viakukuta, ityinda 1.22 L, nayo yeelekwa mombatu. (2Oh 6:25) — Tala Ovipuka Viapotoyolwa B14.

• Kanaa.

  Omutekula wa Nowee, omona wa kwana wa Kaa. Omihoko 11 viokwatukile mu Kaa, vakakalele mo Menditelaniu okuyemba koutundilo pokati okuti oku o Isitu oku o Silia. Otyilongo tyatyo otyo atyitiwa “otyilongo tyo Kanaa.” (Le 18:3; Ehi 9:18; Ovi 13:19) — Tala Ovipuka Viapotoyolwa B4.

• Kemosi.

  O huku omunene watyo wova Moambe. — 1Oh 11:33.

• Kilisitu.

  Enyina litumbulwa Sesusi liatunda mondaka yo Ngeleku Khristós, melaka lyo Hembeleu o “Mesiya,” “Omulembulwa.” — Mt 1:16; Swa 1:41.

• Kisileu.

  Olio enyina liohanyi ya tyive mokuvalula kwova Sundaa etyi vatunda ko Mbambilonia, kovanyingi ohanyi ya tatu. Ihimbikila pokati ka Kulindi atee pokati ka Kayovo. (Ne 1:1; Sak 7:1) — Tala Ovipuka Viapotoyolwa B15.

• Kolu.

  Oyokweeleka viokunuwa nomilela. Inyingila onolitulu 220, yeelekelwa mombatu. (1Oh 5:11) — Tala Ovipuka Viapotoyolwa B14.

• Kondyembo.

  Ondaka oyo mo Hembeleu yatiwa “Sheol” mo Ngeleku “Hades.” Mombimbiliya ondaka oyo ipopiwa ngomuhe pokupopia omunthu waya apa pahalingwa vali natyike, pahasokwa vali, tupu pamwe omunthu uli momukalelo umwe wokuti ehena vali etyi alinga ehena vali etyi asoka. — Ehi 47:30; Omp 9:10; Ovi 2:31.

L

• Laambe.

  Ondaka oyo yapopiwa momukanda wa Sombe, nomomukanda Oviimbo, nowa Isaiya (kaipopi omukai Laambe wokwapopiwa momukanda wa Susuwee). Momukanda wa Sombe ondaka Laambe ipopia enyama limwe enene lyo melunga; monotesitu ononkhwavo enyama olio enene lipopia o Isitu. — Som 9:13; Ovii 87:4; Is 30:7; 51:9, 10.

• Levii; Vomuhoko wa Levii.

  Omona wa tatu woo Sakoo na Leya; na vana vokwatuka mwe ongootyo vatumbulwa. Ovana vetatu va Levii ovo vaukile omihoko vitatu viae. Tupu ondaka yatyo oyo “vomuhoko wa Levii” pamwe ipopia aveho vomuhoko oo, mahi pamwe vokwatuka mu Alau kavavalulilwa-mo. Vomuhoko wa Levii kavapelwe onohika Motyilongo Tyatolelwe, mahi vapelwe omapunda-umbo 48 monohika mbomihoko omikwavo. — Epa 10:8; 1Eh 6:1; Heb 7:11.

• Leviyataa.

  Enyama limwe mokutala likala momeva. Mu Sombe 3:8 nomo 41:1, mokutala ipopia ongandu, okuti hayo enyama ekwavo lina unene ononkhono likala momeva. Momukanda Oviimbo 104:26 tyipondola ombisi imwe onene (baleia). Momikanda omikwavo yapopiwa ngomuhe, katyiiwe otyinyama patyi. — Ovii 74:14; Is 27:1.

M

• Maalate.

  Mokutala ondaka ipopiwa novaimbi, ili ponondaka mbokwahimbika momukanda Oviimbo 53 no 88. Mokutala yatuka mondaka yo Hembeleu ipopia okuti “okusosoloka; okuvela,” ipopia okwiimbila konkhenda, nondaka yokweihamenwa. Ngwe oviimbo ovio vivali otyo vikahi.

• Malikaa.

  Mokutala enyina olio like nenyina Moleke, huku omunene watyo wova Amoo. (Sof 1:5) — Tala pokwati MOLEKE.

• Masendonia.

  Otyilongo tyimwe tyahula kombanda yo Ngelesia tyankhimanene unene pweetyi Alesandele Omunene atumina, tyakalele vala ngootyo tyahatuminwa novilongo ovikwavo atee pahe ova Loma veya-mo. Etyi omutumwa Paulu aya lyo tete ko Eulopa, epunda-umbo lyo Masendonia liali limwe pomapunda-umbo o Loma. Motyilongo omo Paulu waile-mo tutatu. (Ovi 16:9) — Tala Ovipuka Viapotoyolwa B13.

• Masikili.

  Ondaka yo Hembeleu yeheiwe nawa etyi ipopia ili ponondaka mbokwahimbika oviimbo 13. Mokutala ipopia okuti, “onondaka mbuhiwa.” Vamwe vati ondaka oyo ipondola mbulii nondaka ipopia okuti, ‘okuundapa nounkhengela.’ — 2Eh 30:22; Ovii 32: Onondaka mbokwahimbika.

• Mbaale.

  O huku yova Kanaa ou vati ohekulu yeulu, vati oe ulokesa ombila, oe ukulisa ovikuna. Tupu ipopia ono huku mbo potyilongo. Melaka lyo Hembeleu okuti “Hekulu; Mwene.” — 1Oh 18:21; Lo 11:4.

• Mbelesembu.

  Enyina lya Satanasi, omunene, omutumini wovilulu. Tyipondola enyina Mbaale-Sembumbe liapilululwa, o Mbaale yokufendwa nova Filisitiya vakala ko Ekoloo. — 2Oh 1:3; Mt 12:24.

• Mbule.

  Enyina liohanyi ya tyinana mokuvalula kwova Sundaa, kovanyingi ohanyi ya vali. Yatuka mondaka ipopia “okutyitisa; okuyawisa,” ihimbikila pokati kohanyi ya Kulindi aikapwila pokati ka Kuhuhu. (1Oh 6:38) — Tala Ovipuka Viapotoyolwa B15.

• Melondake.

  O huku omunene watyo wepunda-umbo lyo Mbambilonia. Etyi ohamba yo Mbambilonia Hammulambi, omuhindi wovitumino, epunda-umbo lyo Mbambilonia elilinga epunda-umbo enene liatyo liotyilongo, Melondake (Malunduke) ankhimana vali, apingi pono huku ononyingi mbotyilongo, alingi omunene watyo wono huku mo Mbambilonia. Etyi pakala, Melondake (Malunduke) alukwa enyina ekwavo, atiwa “Mbelu” “(Ohekulu).” Pahe Melondake avemuti o Mbele. — Sel 50:2.

• Mesiya.

  Ondaka oyo yatuka mondaka yo Hembeleu ipopia okuti “omulembulwa,” “omunthu walembulwa.” Mo Ngeleku o “Kilisitu.” — Nda 9:25; Swa 1:41.

• Mikitau.

  Ondaka yo Hembeleu yapopiwa monondaka mbokwahimbika oviimbo epandu (Ovii. 16; 56–60). Ondaka ipopiwa novaimbi, etyi ipopia katyiiwe nawa, namphila mokutala iyemba kondaka “okuhoneka.”

• Milikoo.

  O huku ufendwa nova Amoo, tyipondola o Moloke. (1Oh 11:5, 7) Etyi Salomau akulupa atungila o huku oyo yomatutu onomphangu mbukola mbaya peulu. — Tala pokwati MOLEKE.

• Moleke.

  O huku yova Amoo; mokutala enyina olio like nenyina Malikaa, nenyina Milikoo, nenyina Moloke. Tyipondola enyina lilukwa ono huku, hakuti lipopia vala otyika-huku tyike. Movitumino viapelwe Mwisesi mwatilwe omunthu wiipaa omona wae alingila otyika-huku otyo otyilikutila wiipawa. — Le 20:2; Sel 32:35; Ovi 7:43.

• Moloke.

  — Tala pokwati MOLEKE.

• Mute-laben.

  Ondaka ili ponondaka mbokwahimbika Oviimbo 9. Moviso vyo kohale tyina vameipopi iti “ononkhia mbomona.” Vamwe vati enyina, okuti hatyo onondaka mbokuhimbika otyiimbo tyiiwe-ale, vetyiimbe pokwiimba otyiimbo otyo.

N

• Ndaliku.

  Ombongo yoolu yova Pelesa ilema 8.4 g. (1Eh 29:7) — Tala Ovipuka Viapotoyolwa B14.

• Ndangoo.

  O huku yova Filisitiya. Ondaka oyo katyiiwe nawa ipopia-tyi, mahi vamwe vokwatanga vati ilii nondaka yo Hembeleu dagh (ombisi). — Vak 16:23; 1Sa 5:4.

• Ndekapoli.

  Omapunda-umbo o Ngelesia, po tete o Ndekapoli yali nomapunda-umbo 10 (yatuka mo Ngeleku déka, ihangununa “10,” no pólis, “epunda-umbo”). Tupu otyo tyitumbulwa ngootyo omapunda-umbo akala koutundilo Kelunga lyo Ngalileya no Kondongi yo Solondau, oko kwali omapunda-umbo omanyingi atyo. Omo omo ina yatyo yoviso viova Ngeleku, nononiñgoso mbavo. Motyilongo omo Sesusi wakwatele-mo, mahi petupu apa tyapopiwa okuti waendele momapunda-umbo atyo oo. (Mt 4:25; Mku 5:20) — Tala Ovipuka Viapotoyolwa A7 no po B10.

• Neilote.

  Ondaka imwe yeheiwe nawa etyi ipopia, ili ponondaka mbokwahimbika Oviimbo okapitulu 5. Vamwe vati otyipuka tyimwe tyihikwa nomulungu. Ondaka oyo ilii nondaka yo Hembeleu hhalilʼ (ongayeta). Mahi, mokutala ondaka oyo ina otyiimbo ipopia.

• Ngehena.

  Ondaka oyo yatuka mo Ngeleku ipopia Elola lya Hinoo liali kombwelo yo Selusalei yo kohale okuyemba katutu koutakelo. (Sel 7:31) Ondaka oyo yapopilwe ngatyina uti eulo pokupopia apa ovivimbi vikayumbwa. (Sel 7:32; 19:6) Petupu etyi tyipopia okuti ovinyama hamwe ovanthu, vayumbailwe mo Ngehena ngaamo vayokelwa nomwenyo, hamwe ngaamo vamonena vala emone omo. Naina, ondaka oyo kaipopi okuti pena apa pahamonwa onohande mbovanthu mbupakwa ambumoneswa vala emone apeho motupia. Mahi ovo Sesusi novalongwa vae vapopaile ondaka Ngehena ngomuhe upopia ovanthu mavakaipawa “mononkhia mba vali” vahakapindauka-po vali, otyo okuhanywa-ko umwe atyikala-po, okunyimwa-ko umwe. — Eho 20:14; Mt 5:22; 10:28.

• Ngeleku.

  Elaka lipopia ovanthu vakala mo Ngelesia; ondaka oyo tupu ipopia omunthu watyitilwa mo Ngelesia, watuka mova Ngelesia. Movihonekwa Viovakwa-Kilisitu mo Ngeleku hatyo vala ipopia, ipopia ovanthu veheva Sundaa, na vana vapopia elaka liova Ngeleku, na ava valinga oviso viova Ngeleku. — Sow 3:6; Swa 12:20.

• Nisaa.

  Etyi ova Sundaa vatunda koukonde ko Mbambilonia, ongootyo pahe vatumbaulile ohanyi ya Ambimbe, ohanyi yo tete mokuvalula kwova Sundaa, kovanyingi oyo ohanyi ya pandu-vali. Ihimbikila pokati ka Tyitalale (Março) aikapwila pokati ka Tyikukutu (Abril). (Ne 2:1) — Tala Ovipuka Viapotoyolwa B15.

O

• Ofeto yeyovo.

  Oyo ondaka ipopia etyi omunthu afeta ayovole omupika, hamwe tupu ayovola ou wakwatwa, no ou una ongele. Tyifetwa-po haapeho ombongo. (Is 43:3) Ofeto yeyovo ankho iitwa povipuka ovinyingi. Kohale mova Isilayeli omona otyiveli ankho ulinga wa Siovaa, notyinyama haityo ñgoo, pala viahahule vala kokuundapela Siovaa, ankho vina okuyekelwa ofeto yeyovo. (Omb 3:45, 46; 18:15, 16) Ongombe onthwei ivanga ovanthu, ayahayungwa aiipaa omunthu, hekulu ufeta eliyovole ahaipawe. (Oku 21:29, 30) Mahi okufeta opo uyovole ou walingila wina aipaa omunthu, ankho katyitavelwa. (Omb 35:31) Haunene Ombimbiliya ipopia otyilikutila tyeyovo tya Kilisitu etyi aipawa opo ayovole ovanthu vokutavela, eveyovole konkhali no kononkhia. — Ovii 49:7, 8; Mt 20:28; Ef 1:7.

• Ofika yonomphunda mboko Limbanu.

  Onofika onombali mbuna onomphunda motyilongo tyo Limbanu. Ofika oyo yonomphunda mbo Limbanu yahula koutakelo, ofika onkhwavo itiwa Antilimbanu yahula koutundilo. Onofika ombo onombali mbonomphunda mbatetwa pokati nelola limwe enene lina ofika yavova (yanina) nawa. Ofika oyo yonomphunda mbo Limbanu yakalondeka umwe atee kongengeso yo Menditelaniu, onomphunda mbatyo mbaya unene peulu, mbumwe mbuhika ponometulu 1.800 mbumwe onometulu 2.100. Kohale, mo Limbanu mwali omiti vimwe ominene omisendulu, ovanthu aveho vakala monofika mbatyo omo ankho vevihole navi. (Epa 1:7; Ovii 29:6; 92:12) — Tala Ovipuka Viapotoyolwa B7.

• Ofolono.

  Omomu muyokelwa omamanya novivela; omo ñgoo mukangulilwa onombiya novilindo novipuka ovikwavo vialingwa neema. Kohale, onofolono pamwe mbatungailwe nomatisolu pamwe ambutungwa nomamanya. Tupu pamwe omo vayokela ompheyu. — Ehi 15:17; Nda 3:17; Eho 9:2.

• Ohande.

  Ongootyo twapopia ondaka yo Hembeleu néfesh noyo Ngeleku psykhé. Omu Ombimbiliya yetyipopila mokutala ipopia (1) ovanthu, (2) ovinyama, (3) omwenyo womunthu ine owotyinyama. (Ehi 1:20; 2:7; Omb 31:28; 1Pe 3:20 tupu noutoi) Etyi onongeleya ononyingi mbupopia “ohande” tyelikalela unene neetyi Ombimbiliya ipopia. Ombimbiliya tyina ipopia ondaka néfesh nondaka psykhé, ipopia etyi tyitavela okuyamwa, tyitavela okukwatwa, etyi tyinkhia. Mombimbilya ei ondaka oyo yapitiywa okutalela kweetyi tyikahi nokupopiwa, pamwe yati “omwenyo,” “otyitungwa,” “omunthu,” “aviho vina omwenyo,” pamwe patiwa umwe vala “ame” apahatiwa vali “ohande yange.” Pamwe pena outoi upopia “ohande.” Apa papakwa ondaka “ohande” tyilinge motesitu tyilinge moutoi tyina okunoñgonokwa ngeetyi tyahangununwa pombanda. Tyina tyamatiwa okulinga otyipuka nohande aiho tyihangununa okuti una okutyilinga umwe nawa, nomutima auho nomwenyo auho. (Epa 6:5; Mt 22:37) Ondaka néfesh nondaka psykhé pamwe mbupopia omunthu wahanda okulia, hamunthu vala novinyama. Tupu mbupopia otyipuka tyankhia. — Omb 6:6; Omih 23:2; Is 56:11; Ase 2:13.

• Ohanyi yaviala.

  Onthiki yo tete ohanyi imoneka, ei ova Sundaa vati onthiki yokuliongiya, onthiki yotyipito, yokulinga ovilikutila vikola. Konyima oku pahe, ailingi onthiki imwe yokulinga otyipito motyilongo atyiho, monthiki yatyo omo ovanthu ankho kavalingi otyilinga natyike. — Omb 10:10; 2Eh 8:13; Klo 2:16.

• O him.

  Oyokweeleka viokunuwa nomilela. Ityinda onolitulu 3.67. Otyo tyatalelwa kweetyi tyapopile Josefo uhipulula viokohale watile o him ike inyingila ono kolu onombali mbo ko Atena. (Oku 29:40) — Tala Ovipuka Viapotoyolwa B14.

• Ohinge yomaliongiyo.

  Ondaka oyo ipopia ohinge ya Mwisesi nekaka likola liefendelo, liokwatungililwe moluhandya. — Oku 33:7; 39:32.

• Ohongoi Onene.

  Ondaka oyo mo Ngeleku iti “Omutumini Omunene watyo.” Ondaka oyo ipopia otyilinga otyinene tya Sesusi mokwayovola ovanthu ovataveli monkhali yaeta ononkhia, evetwala komwenyo wahapu. — Ovi 3:15; 5:31; Heb 2:10; 12:2.

• Okanga.

  Pamwe ipopia omutengi omunthu atyinda potyipepe, tupu pamwe ipopia okanga ipandekwa ovinyama vinane (haunene onongombe). Ovapika kohale ankho komitengi vatyindako ovipuka vialema unene. Apa okanga yapopiwa, pamwe yapopia omunthu uli moupika, okuti hatyo oyou uli nokumona ononkhumbi, wamona emone. Okuteya okanga tyilekesa okuyovoka moupika, mononkhumbi no memone. — Le 26:13; Mt 11:29, 30.

• Okankhenda okanene.

  Ondaka yo Ngeleku ipopia etyi tyikahi nawa, otyiwa. Ondaka oyo ipopia okwava otyipuka tyimwe nehambu. Tyina ipopia okankhenda ka Huku ipopia otyipuka tyimwe Huku aava kotyali tyae tyahakevela okutyikondolelwa. Nanyo ondaka oyo ipopia okankhenda okanene kamoma ka Huku, nolwembia ena novanthu. Tupu ondaka yatyo oyo yapitiywa okuti “otyali,” “otyetyi tyaawa kotyali.” Otyali tyimwe tyituka vala komwavi, hakuti oo wokwetyipewa mwene ñgeno utyipewa umwe. — 2Ko 6:1; Ef 1:7.

• Okovandu.

  Otyipuka tyokweeleka tyihimbikila pongolo yenkhanya atee kondungu yomunwe wo pokati-nakati. Haunene okovandu ova Isilayeli kohale vaelaikile nayo o yokuna onosendimetulu 44.5, mahi tupu vaeleka nokovandu ononene vali kuyawiswa okuvoko kwike mounthanda, ina onosendimetulu 51.8. (Ehi 6:15; Lu 12:25) — Tala Ovipuka Viapotoyolwa B14.

• Okukoha ononkhali.

  Movihonekwa vyo Hembeleu ipopia ovilikutila ovanthu valinga vivefweneka ku Huku avemufende. Movitumino viapelwe Mwisesi ovilikutila ovio vilingwa Monthiki Yokukoha Ononkhali, omunthu afwene ku Huku namphila alinga onkhali, tyilinge omunthu wike vala tyilinge otyilongo atyiho. Ovilikutila ovio vilekesa otyilikutila tya Sesusi tyokwevela ononkhali mbovanthu aveho tyalingwa vala like, opo ovanthu vafwene ku Siovaa. — Le 5:10; 23:28; Klo 1:20; Heb 9:12.

• Okulembula.

  Ondaka yatyo mwene mo Hembeleu ipopia “okuwaveka.” Otyipuka okutilwa omulela, tyilinge omunthu tyilinge otyipuka otyikwavo, otyilekesa tyokuti tyapakulwa tyilinge ovilinga vikola. Movihonekwa Viovakwa-Kilisitu mo Ngeleku ipopia okuuyulila omphepo ikola kwaava vakoywa vakakale keulu. — Oku 28:41; 1Sa 16:13; 2Ko 1:21.

• Okulila.

  Ondaka ipopia okwihamenwa kombanda yononkhia, hamwe okombanda yotyipuka otyikwavo vali otyivi. Kohale tyakakele okukala umwe ononthiki mbumwe tyilila. Vokulila ankho kaveliyavela vala mahi tupu pena umwe ovikutu viatyo vavala, velipaka etwe momitwe, vatandula ovikutu viavo, veliveta monthulo. Ovalili vatyo vokutyivila umwe nawa pamwe ankho vakongwa umwe pomitambo. — Ehi 23:2; Sit 4:3; Eho 21:4.

• Okulinepa pounawa.

  Otyipuka tyimwe tyalingailwe kohale, pahe atyipakwa Movitumino vya Mwisesi. Omukwendye unepa omuhepe wahiwa-po no ou velilandula nae tyina ahasile-po omona omukwendye, opo atyitile ovana ou velilandula nae. Tupu vetyiti otyinepo tyounawa. — Ehi 38:8; Epa 25:5.

• Okulinga etyi tyapenga.

  Okuliatela kotyitumino; okulinga etyi tyailikwa motyitumino. Mombimbiliya ondaka oyo mbulii nondaka “onkhali.” — Ovii 51:3; Lo 5:14.

• Okulivela.

  Mombimbiliya ipopia omunthu upiluluka monondunge, waihamenwa umwe komutima, watoya etyi ankho ekahi, watoya ovivi alingaile okuti hatyo otyetyi maa alinga. Okulivela tyina ovinyango viatyo vityilekesa, okuyekapo umwe ondyila omunthu aile nayo. — Mt 3:8; Ovi 3:19; 2Pe 3:9.

• Okupata ononkhali.

  — Tala pokwati OKUKOHA ONONKHALI.

• Okupita ekwendye.

  Okupola otyikova kolutu lwomukwendye. Wetyituminwe umwe etyilinge o Ambalayau, mahi Ovakwa-Kilisitu kavetyituminwe vali. Ponofika ononyingi yapopiwa ngomuhe. — Ehi 17:10; 1Ko 7:19; Flp 3:3.

• Okupupulula.

  Okukoyaulula etyi vokuteya vasapo vahamwene, hamwe otyetyi vasila-po umwe tyawina. Ovitumino viapelwe Mwisesi viapopilile umwe nawa ovanthu okuti kavapondola okuteya momapia avo avamane umwe no kononthele, tupu kavapondola okunyanga omindyambi viavo, nomiti viavo vionouva avamane umwe. Okupupulula otyipuka umwe Huku apele vokwahepa, vokwehulilwa, nononthunda-vilongo, novana vehena ovohe, novahepe. — Lut 2:7.

• Okusukuka.

  Mombimbiliya ondaka oyo kaipopi vala okusukuka molutu, mahi tupu ipopia okwehena otyinthembia, okwehena onkhako, okwehena natyike tyasila, tyinyona, tyisilisa omunthu monondunge no moupanga wae na Huku. Movitumino viapelwe Mwisesi ipopia otyiso tyokulisukula. — Le 10:10; Ovii 51:7; Mt 8:2; 1Ko 6:11.

• Okutalesa.

  Pokutalesa vatalesa noumanya umwe oututu, pamwe oumuti, pamwe omamanya umwe omanene kapii. Apakwa kevava liotyikutu, pamwe omokamulindi okuti hatyo omokapopo pahe aapuñginywa. Lina liamatoko-po hamwe olieli liapolwa-po, olio liholovonwa-po. Pokutyilinga vatona okulikwambela. Ondaka “okutalesa” pamwe ipopiwa umwe pokutalesa, pamwe ipopiwa vala ngomuhe pokuyapaula “ovipuka.” — Sus 14:2; Ovii 16:5; Omih 16:33; Mt 27:35.

• Okutila Huku.

  Okulinga onthilo onene Siovaa Huku, okumufenda, okumuundapela, tyikakatela umwe vala mo yokuti oe wata-mo mokutumina. — 1Ti 4:8; 2Ti 3:12.

• Okutwalwa koukonde.

  Okupolwa motyilongo tyenyi hamwe o motyilongo watyitilwa novanthu vatilisa otyilongo. Ondaka yo Hembeleu ipopia “okwenda.” Ova Isilayeli vatwailwe koukonde tuvali. Omihoko 10 vyo kombanda, vatwailwe koukonde nova Asilia, etyi pakala, omihoko vivali vyo kombwelo, avatwalwa koukonde nova Mbambilonia. Vokwesalaile-ko avakondolwa kotyilongo tyavo na Silu, omutumini omu Pelesa. — 2Oh 17:6; 24:16; Esi 6:21.

• Okutyitukila-po otyili.

  Ondaka oyo mo Ngeleku (apostasía) yatuka mondaka imwe ipopia “okuyapuka, okukala kokule.” Ondaka yatyo oyo tupu ipopia “okuhondovoka, okuyeka-po, okupilukila-po.” Movihonekwa Viovakwa-Kilisitu mo Ngeleku, ondaka “okutyitukila-po otyili” haunene ipopia ava vayeka-po efendelo liotyotyili. — Omih 11:9; Ovi 21:21; 2Te 2:3.

• Okutyopa; Otyipale.

  Okuyapula onoñgima keyungu, apa payungulilwa vala opotyipale. Okuyungula tyilingwa novimuti (ombulo), mahi tyina ovilia ovinyingi ovinyama ovio vityopa ovilia, vikutilwa emuti enene otyo viliseta-seta movilia okuyungula. Putyina vamamane okuyungula avayele. — Le 26:5; Is 41:15; Mt 3:12.

• Okuveta.

  Ondaka oyo Movihonekwa vyo Ngeleku ipopia okuveta omunthu nosikoti ina omamphu konondungu, yakutailwa omankhipa, pamwe ovivela. — Swa 19:1.

• Okuyambeka omavoko.

  Kohale omunthu uyambekwa omavoko pokumupa otyilinga tyimwe otyinene, no pokumupeleyila oviwa, no pokumuhakula, okuti hatyo o pokumupa otyali tyomphepo ikola. Pamwe tupu otyinyama tyiyambekwa omavoko tyina tyeheneipawe tyilingwe otyilikutila. — Oku 29:15; Omb 27:18; Ovi 19:6; 1Ti 5:22.

• Okuya.

  Ponovelesikulu mbumwe Movihonekwa vyo Ngeleku, ondaka oyo ipopia okuya kwa Sesusi Kilisitu okuhimbikila pomuvo avialekwa alinge Ohamba Mesiya atee kononthiki mbahulilila mbouye. Okweya kwa Kilisitu katyipopi okukatuka vala liwa eya akondoka, mahi otyipuka tyeenda-po umwe katutu ehimbwe. — Mt 24:3.

• Okwaana.

  Omunthu waana tyina ati etyi apopia otyili umwe, ine otyipuka tyilingwa opo metyilingi, okuti wati hityilingi opo kametyilingi. Omunthu pokwaana utukaila omunthu omunene vali kwe (omunthu alinga onthilo), haunene Huku. Siovaa pokwapopile etyi makalingila Ambalayau nae waanene. (Ehi 14:22; Heb 6:16, 17) Pamwe tupu omphango ikola omunthu alingila Huku, ati mandyilingi tyongandi pamwe otyilikutila, pamwe otyaawa, pamwe oyokulipaka motyilinga, okuti hatyo, omphango yokuti ovipuka viapenga hilingi. Okwaana ankho otyipuka tyike umwe nokulinga omphango. — Omb 6:2; Omp 5:4; Mt 5:33.

• Okwahali.

  Okukala umwe omuvo tyiliyunga kovikulia aviho. Ova Isilayeli otyo valingaile otyo Monthiki Yokukoha Ononkhali, na tyina veihamenwa, na tyina veli nokwiita Huku evelulike. Ova Sundaa vetyipakele-ko umwe avetyilinga-linga tukwana menima, okuhinangela ovihuna vamwene-mwene kohale. Okukala omuvo umwe tyahali Ovakwa-Kilisitu kavetyituminwe vali. — Esi 8:21; Is 58:6; Lu 18:12.

• Olepita.

  Pomuvo Ovihonekwa Viovakwa-Kilisitu mo Ngeleku viahonekwa, oyo yali ombongo onthutu vali yova Sundaa ilingwa notyitasu, pamwe ailingwa notyivela tyahonyaikwa (bronze). Mo Nombimbiliya mbumwe ombongo oyo yatiwa “óbolo.” (Mku 12:42; Lu 21:2) — Tala Ovipuka Viapotoyolwa B14.

• Olimbanu.

  Omaka atunda komiti no kovifo vimwe vitiwa Boswellia. Omaka oo okweepaka potupia aeta omuniko umwe omuwa. Omaka oo ahonyekelwe mombao ikola iyokelwa mekaka liefendelo no mondywo ya Huku. Tupu tyina omunthu aava ovilia utentheka-ko omaka oo, aakapakwa kombanda yonombolo mbokulekeswa Momphangu Ikola. — Oku 30:34-36; Le 2:1; 24:7; Mt 2:11.

• Olonge.

  Otyipuka otyitutu vali tyokweeleka viokunuwa nomilela tyapopiwa Mombimbiliya. Momukanda wova Sundaa utiwa Talmude, olonge yatiwa mo him inyingila-mo 1/12, otyo tyilekesa okuti molonge munyingila 0.31 L. (Le 14:10) — Tala Ovipuka Viapotoyolwa B14.

• Olwembia olunene.

  Apa yapopiwa vali unene yatunda mondaka yo Hembeleu hhésedh, ipopia olwembia lutuka kokwelihinda, kokwahayeke otyipuka, okukakatela otyipuka, okutyikwata-po umwe ohetyiyeke. Haunene yapopiwa pokupopia olwembia Huku ena novanthu, tupu ipopia olwembia ovanthu velilinga poyavo. — Oku 34:6; Lut 3:10.

• Omaelema; Ovilinga ovinene.

  Ovipuka ovinene vihuvisa, viehevilwa novanthu, viahalingwa-le kononkhono mbovanthu. Onondaka ngoombu, “ovilekesa,” “omahuviso,” ponofika pamwe mbapopaiwa mbupopia vala otyipuka tyike. — Oku 4:21; Ovi 4:22; Heb 2:4.

• Omakihi.

  Ondaka oyo yapopia ovanthu vamwe ovakalavi vatukile monoandyu mbeile pano pohi ambunepe ovahikwena pweetyi Ombila Onene yeheneye. — Ehi 6:4.

• Omamanya omawa.

  Otyipuka tyimwe tyatena, tyilinga umwe ngemanya tyituka komankhipa ovinyama ovitutu viomelunga. Omamanya atyo oo avahiwa melunga, ena ovivala ovinyingi, amwe akuhuka, amwe atwela, amwe anthikovela. Avahailwe vali unene Melunga Likuhuka. Kohale omamanya okukuhuka oo ovanthu ankho vehole vali unene, alingailwe ovilanda, novipuka ovikwavo vali viomafiwe. — Omih 8:11.

• Omanaa.

  Okulia ova Isilayeli valile momanima 40 vakala moluhandya. Okulia oko kwatundile ku Siovaa. Mwene kuya vala omaelema, kuya vala neyombo apeho komuhuka, o Motyasapalo vala kweheya. Onthiki yo tete ova Isilayeli veimona, vatile “Etyi otyityi?” mo Hembeleu ngootyo vati “man huʼ?” (Oku 16:13-15, 35) Monovelesikulu mbumwe yatiwa “ovilia vyo keulu” (Ovii 78:24), “ombolo itunda keulu” (Ovii 105:40), “ombolo yovanene vatyo” (Ovii 78:25). Sesusi nae wapopile omanaa mokweipopia vala lwomuhe. — Swa 6:49, 50.

• Omapunda-umbo okutilila.

  Omapunda-umbo o vomuhoko wa Levii, mutilila ou waipaa mukwavo motyiponyo ahupe ko wokuyavala ohonde yo wae. Motyilongo atyiho tyo Kanaa mwali omapunda-umbo epandu, po tete akoyelwe na Mwisesi, konyima pahe aakoywa vali na Susuwee, mokwalulikwa na Siovaa. Wokwaipaa nga ehika kombundi yepunda-umbo upopila ovakulu vomepunda-umbo etyi tyaenda-enda, uyakulwa nawa. Opo wokwaipaela tyawina omunthu ahahupile-mo vala, omphela yae ipopilwa umwe mepunda-umbo liatyo omu aipaela omunthu, tyitalwe ine wetyilinga umwe motyiponyo. Okuti wetyilinga motyiponyo ukondoka mepunda-umbo liokutilila, utunda-mo vala tyina omunene-nakwa amankhi. — Omb 35:6, 11-15, 22-29; Sus 20:2-8.

• Ombalasa.

  Oyokweeleka apa pehikila omeva okwenda no kohi, ina onometulu 1.8 (onomphai 6). (Ovi 27:28) — Tala Ovipuka Viapotoyolwa B14.

• Ombao.

  Ombao imwe yokunika nawa yahonyaikwa nomaka nombasamu iseta okupia. Mombao yatyo omo muhonya ovipuka vikwana, oyo yayokaililwe mekaka liefendelo no mondywo ya Huku. Yayokaililwe komutala ukala Momphangu Ikola wokuyokelwa ombao komuhuka no kongulohi. Monthiki Yokukoha ononkhali iyokelwa Momphangu Ikola Unene. Ilekesa omalikwambelo etavelwa alingwa novanthu va Huku vakakatela mwe. Ovakwa-Kilisitu kavaitwa vali vaave ombao oyo. — Oku 30:34, 35; Le 16:13; Eho 5:8.

• Ombatisimu; Okumbatisala.

  Ondaka oyo ipopia “okunyingiya” momaande, okunyingiya onthwitwi. Sesusi wati ovalanduli vae vena okumbatisalwa. Ovihonekwa tupu vipopia Ombatisimu ya Swau, nombatisimu yomphepo ikola, nombatisimu yotupia, no nombatisimu ononkhwavo. — Mt 3:11, 16; 28:19; Swa 3:23; 1Pe 3:21.

• Ombatu.

  Oyokweeleka evi viokunuwa nomilela. Vokuheya apa pakalailwe vavasa ovimphemu viahonekwa enyina olio, vati ityinda onolitulu mbukehika 22. Ovipuka ovikwavo viokuyonga ovilia novikwavo vali, no viokuyonga evi viokunuwa nomilela viapopiwa Mombimbiliya navio vieelekwa mombatu. (1Oh 7:38; Ise 45:14) — Tala Ovipuka Viapotoyolwa B14.

• Ombinga.

  Ipopia onombinga mbovinyama, tupu yali yokunwina, no kohale yali yokupaka omulela, notinda, novipuka viomafwiwe, no pokwiimba ihikwa-po. (1Sa 16:1, 13; 1Oh 1:39; Ise 9:2) Popanyingi “ombinga” yapopiwa ngomuhe pokupopia ononkhono, no pokutilisa onondyale. — Epa 33:17; Mik 4:13; Sak 1:19.

• Ombitola yolumbungu.

  Olumbungu lwokweeleka. Olu lwapopiwa Mombimbiliya lwali nonokovandu epandu moulaale. Okulweeleka mokovandu yokwakaka vali, luna onometulu 2.67; okulweeleka mokovandu ondaande yatyo, luna onometulu 3.11. (Ise 40:3, 5; Eho 11:1) — Tala Ovipuka Viapotoyolwa B14.

• Ombonge Onene.

  Yatiwa ombonge onene, ombonge yova Sundaa mo Selusalei. Pononthiki mba Sesusi yali novanthu 71, okuti umwe nomunene-nakwa novanthu ovakwavo vali-ale ovanene-nakwa, novanthu vamwe vombunga yovanene-nakwa, novakulu, nonohongoi mbomihoko no mbomaumbo, novahoneki vovitumino. — Mku 15:1; Ovi 5:34; 23:1, 6.

• Ombuya.

  Otyinyanga tyikutilwa momutwe. Ombuya yomunakwa yali yomulinya ukahi nawa, komutwe watyo akupakwa omulami woolu, wakutwa nokangoi okangole. Onohamba nambo mbavalaile ombuya, kombanda yatyo ambupakeko omulami. Sombe ondaka oyo weipopia ngomuhe, waeleka ouviuki wae nombuya. — Oku 28:36, 37; Som 29:14; Ise 21:26.

• Ombwingwa.

  Omukanda uwingilwa kotyimuti walingwa nonole, pamwe oseta ihonekwa vala nthele ike. Ovihonekwa viahonekelwe monombwingwa. Pomuvo Ombimbiliya yahonekwa ovanthu vahonekele monombwingwa. — Sel 36:4, 18, 23; Lu 4:17-20; 2Ti 4:13.

• Ombwingwa yoseta.

  Ombwingwa yalingwa nombandwa yongi, pamwe o yotyinkhombo, pamwe o yongombe yahikwa umwe nawa, tyitavele okuhoneka-ko. Oseta yakola vali konole, oko kwahonaikilwe onotesitu mbumwe Mbombimbiliya. Onombwingwa mboseta Paulu atumine Timotiu emutwailile-mbo, mokutala Ovihonekwa vimwe vyo Hembeleu. Onombwingwa mbumwe mbavahiwa Kelunga Liankhia omboseta. — 2Ti 4:13.

• Omele.

  Oyokweeleka evi viakukuta, ilifwe po kolu. Yeelekwa mombatu, ityinda 220 L. (Le 27:16) — Tala Ovipuka Viapotoyolwa B14.

• Omila.

  Omaka amwe anika nawa apolwa kovifo vimwe vielikalaila vina omakete pamwe okomiti vimwe omitutu vitiwa Commiphora. Omila tupu nayo yahonyaikilwe momulela ukola wokulembula. Tupu yali yokunikisa nawa ovikutu, no komaula, no momulela wokusula yapakailwe-mo. Kohale no pokuviukaisa omunthu akapakwe uwavekwa omila. — Oku 30:23; Omih 7:17; Swa 19:39.

• Omina.

  Mu Isekiyele yatiwa o manee. Tyati oyo ipeyala oyo tupu yokutala onombongo. Vokuheyaulula apa pakalailwe vavasa ovipuka vimwe vilekesa okuti omina ityinda onosikulu 50, ngwe osikulu ilema 11.4 g, omina yapopiwa Movihonekwa vyo Hembeleu ilema 570 g. Tupu tyipondola kwali omina yo mombonge ngeetyi tyali onokovandu. Movihonekwa Viovakwa-Kilisitu mo Ngeleku, omina yapopiwa-mo ilifwe ponondalakima 100. Ilema 340 g. Motalendu ike munyingila onomina 60. (Esi 2:69; Lu 19:13) — Tala Ovipuka Viapotoyolwa B14.

• Omona wa Ndaviti.

  Onondaka mbupopia Sesusi mbulekesa okuti oe Omphinga yomphango Youhamba Ovihonekwa viatile maupingwa na umwe matuku mu Ndaviti. — Mt 12:23; 21:9.

• Omona womulume.

  Ondaka oyo mono Evandyeliu yapalaikwa-mo tyikehika umwe 80. Ipopia Sesusi Kilisitu mokonda yokwatyitilwa pano pohi akala omunthu, wali umwe omunthu-munthu nolutu lwatyo olwomunthu umwe. Ondaka oyo ipopia okuti Sesusi oe wafwisa-po etyi tyapopia Ndaniyele 7:13, 14. Tupu Movihonekwa vyo Hembeleu ondaka oyo ongootyo yapopile Isekiyele na Ndaniyele opo ilikese okuti ovanthu ovo velikalela no ou wevetumine Muhekulu wondaka. — Ise 3:17; Nda 8:17; Mt 19:28; 20:28.

• Omphandyi ikola.

  Omphandyi oyo haunene otyimato tyatungwa nomamanya, mokutala onomphandyi ombo o mbotyimo tyotyika-huku Mbaale novika-huku ovikwavo vali. — Oku 23:24.

• Omphandyi.

  Kuna onomphandyi mbokuyaka otyitunge, kuna mbokuyaka ovimato. Mahi kwali onomphandyi mbumwe mbatungaililwe ovipito, noombu mbatungililwe ovipuka ovinene ovanthu valingaile. Ondywo ya Huku Salomau atungile, nayo yapakelwe onomphandyi mbokwiiyaka, nonondywo ononkhwavo atungile mombala. Ovanthu vokwahafende Huku vatungaile ovimato vikola vilinga ngonomphandyi ngapo valingila oviso vionongeleya mbomatutu, nova Isilayeli pamwe vatokailile-mo moviso viatyo omo. (Vak 16:29; 1Oh 7:21; 14:23) — Tala pokwati OMUTWE WOMPHANDYI.

• Omphango.

  Oputyina ovanthu velitavela na Huku, hamwe mwene ovanthu vevali vetyilinga, velitavela vahalinge otyipuka tyimwe, hamwe okutyilinga. Pamwe tupu omunthu wike vala malingi etyi tyelipakelwa-mo (omphango ilingwa vala nomunthu wike, otyipuka omunthu ati metyilingi). Tupu pamwe aveho vevali vokwelipakelamo vena okutyilinga (omphango yalingwa novanthu vevali). Ombimbiliya kaipopi vala onomphango Huku alingaile novanthu, mahi tupu ipopia onomphango ovalume valingaile na vakwavo, pamwe omihoko nomihoko, ovilongo novilongo, ovikundyi novikundyi. Onomphango mbaenda-ko vali ehimbwe tyati, omphango Huku alingile na Ambalayau, neei alingile na Ndaviti, neei alingile nova Isilayeli (omphango Yovitumino), neei alinga no Isilayeli ya Huku (omphango omphe). — Ehi 9:11; 15:18; 21:27; Oku 24:7; 2Eh 21:7.

• Omphangu ikola.

  Omomu utenga okuvasa mwahandyuka vali mekaka liefendelo, no mondywo ya Huku, mwelikalela no koluhinyi, Momphangu Ikola Unene. Momphangu Ikola yo mekaka liefendelo, omo mwali okandiyelo konomphalavinga koolu, nomutala wokuyokela ombao woolu, nomesa yonombolo mbokulekeswa, novityuma vioolu; Momphangu Ikola yo mondywo ya Huku, mwali omutala wovilikutila woolu, novikandiyelo 10 vionomphalavinga vioolu, nonomesa 10 mbonombolo mbokulekeswa. (Oku 26:33; Heb 9:2) — Tala Ovipuka Viapotoyolwa B5 no po B8.

• Omphangu Ikola Unene.

  Okoluhunyi mekaka liefendelo no mondywo ya Huku omu mwapakelwe otyikasa tyomphango; tupu mutiwa Omphangu Ikola Yovasukuki. Ngeetyi tyipopia Ovitumino viapelwe Mwisesi, Momphangu Ikola Unene omunene-nakwa vala unyingila-mo kwapwa, mahi unyingila-mo vala like menima Monthiki Yokukoha Ononkhali. — Oku 26:33; Le 16:2, 17; 1Oh 6:16; Heb 9:3.

• Omphangu yaya peulu.

  Opapa pafendelwa, haunene o kovipunda, pamwe o komphunda, pamwe tupu o pohika paya peulu patungwa vala novanthu. Namphila opo yatyo pokwaya peulu pamwe pafendaililwe umwe Huku, mahi haunene pafendaililwe vali vala ono huku mbomatutu. — Omb 33:52; 1Oh 3:2; Sel 19:5.

• Omphepo (Osipilitu).

  Ondaka yo Hembeleu rúahh nondaka yo Ngeleku pneúma, pamwe mbapitiywa okuti “omphepo,” mbupopia ovipuka ovinyingi. Onondaka ombo ambuho mbupopia etyi omunthu ahamono kamaiho, tupu mbupopia ononkhono mbuundapa. Ondaka oyo mo Hembeleu nomo Ngeleku ipopia (1) omphepo, (2) ononkhono mbukala movipuka vina omwenyo vikala pano pohi, (3) ononkhono mbuhinda omunthu okupopia, nokulinga ovipuka, (4) onondaka mbokwafiminwa mbutunda oku kuhamoneka, (5) ovanthu vokwahamonwa, (6) ononkhono mba Huku mbuundapa, omphepo ikola. — Oku 35:21; Ovii 104:29; Mt 12:43; Lu 11:13.

• Omphepo ikola.

  Ononkhono mbuundapa mbahamonwa Huku alinga nambo etyi ahanda. Mbutiwa mbukola mokonda mbatunda ku Siovaa, omusukuki, waoya umwe kokuviukisa, tupu ombo Huku aundapa nambo alinge evi vikola. — Lu 1:35; Ovi 1:8.

• Omu Hembeleu.

  Omunthu wo tete watilwe omu Hembeleu o Ambalau (Ambalayau), otyo atyimwimbukisa kova Amoleu. Konyima enyina olio alipopi ava vatuka mu Ambalayau ovana va Sakoo omutekula wae, nelaka vapopia. Pononthiki mba Sesusi o Hembeleu yahonyene kapii no Alamaiku, elaka liapopile Kilisitu novalongwa vae. — Ehi 14:13; Oku 5:3; Ovi 26:14.

• Omuhe.

  Onondaka mbovakulu mbulonga onondunge. Mombimbiliya pamwe omuhe ulinga ngoluñgano. Mahi omuhe upopia umwe otyili, pamwe pokuupopia patumbulwa otyipuka, pamwe otyinyama. Omihe vimwe pahe viakakele umwe unene movanthu no pokulipenya hamwe o pokulileva ovio vapopia. — Omp 12:9; 2Pe 2:22.

• Omuhoneki wovitumino.

  Omunthu wokukopiyala Ovihonekwa vyo Hembeleu. Mahi pweetyi Sesusi ali pano pohi, ondaka oyo yapopaile ovanthu vokwii ovitumino, vokuyele Sesusi. — Esi 7:6; okatoi Mku 12:38, 39; 14:1.

• Omuhongi wonombiya.

  Mo Hembeleu ondaka oyo ipopia omunthu “wokumata.” Omuhongi wonombiya mwene oe utyii etyi malingi onthata, ngwe otyo tyihole okupopiwa pokupopia etyi Siovaa alinga. Mokonda oe omunene, tyilinge omunthu wike tyilinge ovanthu aveho ovilongo novilongo vetei kwe. — Is 64:8; Lo 9:21.

• Omuhonyeki.

  Omunthu uhonyeka ava veliyapuka. Movihonekwa, Mwisesi watiwa omuhonyeki momphango Yovitumino, Sesusi watiwa omuhonyeki momphango omphe. — Nga 3:19; 1Ti 2:5.

• Omukihi.

  Ouvela umwe omuvi wiipaa, uliyambuliswa, uhahana vala liwa. Mombimbiliya ondaka oyo haunene ipopia onomphela mba Huku. — Omb 14:12; Ise 38:22, 23; Am 4:10.

• Omukulu; Ombwale.

  Omulume pahe wakola, mahi Movihonekwa, omukulu omulume una otyilinga tyokululika vakwavo, una otyilinga otyinene pomaumbo, hamwe o motyilongo. Ondaka oyo tupu yapopiwa pokwapopia evi vikala keulu momukanda Eholololo. Ondaka yo Ngeleku presbýteros yatiwa “omukulu” pokupopia ava vena otyilinga tyokululika ewaneno. — Oku 4:29; Omih 31:23; 1Ti 5:17; Eho 4:4.

• Omukwa-Kilisitu.

  Enyina Huku aluka ovalanduli va Sesusi Kilisitu. — Ovi 11:26; 26:28.

• Omukwatesiko Wohamba.

  Pweetyi o Mbambilonia oyo itumina ovilongo ovikwavo no pweetyi o Pelesa yatuminine, omunthu watilwe omukwatesiko wohamba, oyou utumina epunda-umbo. Ovakwatesiko vohamba vanakwa umwe nohamba. — Esi 8:36; Nda 6:1.

• Omulavi.

  Omunthu uyunga haunene pamwe kounthiki opo alondole ovanthu, tyina pamwe ena etyi amona ahiki onkhwino. Ovalavi haunene ankho vakala kombanda yovimato, pamwe o keulu lietala, opo vetyivila okutala ovanthu veya tyina vehenehike popepi. Pokati kovita pakala omulavi ou vati omuyungi. Ovauli navo ankho vaundapa ngovalavi mova Isilayeli, ankho valondola ovanthu tyina onondyale mbuhungi kokuhanyapo otyilongo, na tyina Huku maeta ehanyauno. — 2Oh 9:20; Ise 3:17.

• Omulinya wokwatyika.

  Oo omulinya wokulipalakana-palakana nomulinya wokwaenda olulaale kotyinyanga. — Le 13:59.

• Omulinya wokweenda olulaale.

  Oo omulinya wokutunga otyinyanga moulaale. — Le 13:48.

• Omululiki.

  Ondaka oyo yapopia omulume wotyilinga tyokuyunga ewaneno, wokunthita ewaneno. Yatunda mondaka yo Ngeleku epískopos, ipopia okuyunga otyipuka utyiyakulile. Ondaka “omululiki” nondaka “omukulu” (presbýteros) mbupopia vala otyilinga tyike mewaneno Liovakwa-Kilisitu. Ondaka “omukulu” ipopia vali haunene omunthu wakola monondunge wapewa otyilinga, ondaka “omululiki” ipopia vali unene ovilinga viatyo omunthu ena-vio. — Ovi 20:28; 1Ti 3:2-7; 1Pe 5:2.

• Omulume watukanwa.

  Ovalume vatyo ngoovo ovo haunene vapewa otyilinga mombala yohamba, vaundape-mo, pamwe avalingi vokuyunga tembwa-otyilongo, nononthawa mbohamba. Ondaka oyo tupu ipopia omulume uundapa mombala mahi wahatukanenwe. Yapopiwa ngomuhe pokwapopia omunthu ‘wahanepele wetyilingila Ouhamba,’ omunthu uliyunga etyivile okuundapa vali unene movilinga vya Huku. — Mt 19:12; Sit 2:15; Ovi 8:27.

• Omunakwa.

  Omulume ukalela-po Huku uundapela ovanthu, uvelongesa tya Huku novitumino viae. Ovanakwa tupu ankho vaya kotyipala tya Huku, valingile-ko otyilongo ovilikutila, nokuveitilako. Pweetyi nkhele Ovitumino viapelwe Mwisesi viehe-ko, ohongoi yombunga oe ankho uundapa ngomunakwa meumbo liae. Etyi pahe Ovitumino viapelwe Mwisesi viapakwa-ko ovana va Alau ovakwendye, Alau watukile mu Levii ovo vala pahe ankho valinga ovanakwa. Ovalume ovakwavo vokwatuka mu Levii ankho vevekwatesako vala. Etyi omphango omphe yahimbika o Isilayeli ya Huku aikala otyilongo tyovanakwa, Omunene-nakwa watyo o Sesusi Kilisitu. — Oku 28:41; Heb 9:24; Eho 5:10.

• Omu Nasalee.

  Ongootyo tyatumbulilwe Sesusi mokonda watunda mepunda-umbo lyo Nasalee. Ondaka oyo tyipondola ilii nondaka yo Hembeleu yapopiwa mu Isaiya 11:1 ipopia ‘ondyovo.’ Ongootyo tupu tyapopilwe ovalanduli va Sesusi. — Mt 2:23; Ovi 24:5.

• Omu Nasileu.

  Ondaka yapolwa mo Hembeleu iti “Omunthu Wakoywa,” “Omunthu Wapakulwa,” “Omunthu Wapungwa-po.” Ova Nasileu vayapulwa kuvali: vamwe ovo mwene velipakula, ava vamwe vetyipewa umwe na Huku. Ovanthu aveho tyilinge omulume tyilinge omukai, vapondola okulipakula ku Siovaa valinge ova Nasileu. Ovo vokwelipakula mwene, haunene o kovipuka vitatu vena okuliyunga: kavanu evi vipialukisa nii kavali natyike tyatunda komuti wonouva, kavakululwa onohuki, kavayame kweetyi tyankhia. Ava vokwetyipewa na Huku vakala umwe ova Nasileu apeho, mwene Siovaa oe upopia evi vena okulinga neevi vahapondola okulinga. — Omb 6:2-7; Vak 13:5.

• Omunene-nakwa.

  Movitumino vya Mwisesi, oo omunakwa omunene watyo ukakalela-po ovanthu aveho kotyipala tya Huku, tupu oe ululika vanakwa vakwavo. Tupu utiwa “onkhalamutwe yovanakwa.” (2Eh 26:20; Esi 7:5) Oe vala aike unyingila Momphangu Ikola Unene mekaka liefendelo, no mondywo ya Huku. Unyingila-mo vala like menima Monthiki Yokukoha Ononkhali. Sesusi Kilisitu nae watiwa “omunene-nakwa.” — Le 16:2, 17; 21:10; Mt 26:3; Heb 4:14.

• Omunene wovanongo.

  Mo Mbambilonia omunthu ngoo ankho omunene, mahi kalambe povanene vovilongo. Mombimbiliya omunene wovanongo ankho oe utumina ovanongo vo mombonge yo Mbambilonia. Ovanthu vatyo ovo vapopiwa no pweetyi Ohamba Ndaliu omu Mendia eli kovipundi. — Nda 2:48; 6:7.

• Omunthu wayovoka; Omunthu wayovolwa.

  Pweetyi o Loma itumina, omunthu utiwa “wayovoka” oyou watyitwa tyayovoka-le, omutyitwa-tyilongo. Mahi omunthu utiwa “omunthu wayovolwa” oyou wali omupika pahe ayovoka. Omunthu wokwayovoka atyitavelwa umwe nombonge upondola okupewa umwe omikanda mo Loma pahe atiwa omutyitwa-tyilongo, mahi kapondola okulinga otyilinga natyike tyiyemba ko viokutumina otyilongo. Mahi omunthu wokwayovoka vala ngootyo kohalwae kapewa omikanda aviho atiwa umwe pahe omutyitwa-tyilongo. — 1Ko 7:22.

• Omu Sundaa.

  Enyina lipopia omunthu watuka mu Sundaa etyi pahe ouhamba womihoko 10 wo Isilayeli watoka-po. (2Oh 16:6) Ongootyo tyatumbulilwe ova Isilayeli vatuka momihoko ominyingi vakondokele mo Isilayeli pokwatunda koupika ko Mbambilonia. (Esi 4:12) Konyima ngootyo tyitumbulwa ova Isilayeli pokuvepunga kwaava veheva Isilayeli. (Sit 3:6) Ondaka oyo omutumwa Paulu weipopia ngomuhe pokupopia okuti mewaneno Liovakwa-Kilisitu kamulingwa okapungulula komihoko. — Lo 2:28, 29; Nga 3:28.

• Omutala Wovilikutila.

  Omutala ankho utungwa nonthata, nomamanya, pamwe omiti viahotwa notyivela, oko kuyokelwa ovilikutila, nombao pokufenda. Mekaka liefendelo, no mondywo ya Huku, ankho uti vala nyingilee ovasi “okamutala koolu” kokuyokela ombao. Oko katungilwe nomiti viahotwa noolu. ‘Omutala omunene watyo wotyitasu’ wokuyokela ovilikutila ankho ukala pondye pepata. (Oku 27:1; 39:38, 39; Ehi 8:20; 1Oh 6:20; 2Eh 4:1; Lu 1:11) — Tala Ovipuka Viapotoyolwa B5 no po B8.

• Omutali (omuuli).

  Ovauli kohale otyo vatumbaulilwe ngootyo vatilwe ovatali. Ovo vali ovanthu Huku apa ononkhono mbae opo vanoñgonoke etyi ahanda, ovanthu vanoñgonoka evi ovaunyingi vahanoñgonokele. Ondaka oyo mo Hembeleu yatuka mondaka ipopia “okutala,” tyilinge okutala umwe nomaiho, tyilinge okutala vala nomalusoke. Ovanthu ankho vaovola omutali vapakailwemo onondunge, nokutetulula ovitateka viavo. — 1Sa 9:9.

• Omuti wemone.

  Omuti omulaale pamwe otyipandyi mupapelwa omunthu ngamo ankhila, pamwe otyivimbi. Otyo tyalingailwe opo ovanthu valondokele-ko pamwe okuti opo vemukundise. Movitumino viova Sundaa omunthu ulingwa ngootyo tyina amalingi otyipuka otyinene umwe tyapenga, ngeetyi okufenda ovilolo nokupopia omapita Huku, nkhele utyopwa nomamanya ankhi, pamwe avemwipaa notyipuka otyikwavo, otyivimbi tyatyo pahe avaketyiyendyelesa momuti atyikala-mo onthiki ike. (Epa 21:22, 23) Ova Loma pamwe vakutila vala omunthu momuti, omunthu nkhele akala-mo ononthiki otyo ehenenkhie amona vala emone, alilwa-mo nohunga, nondyala, nomutenya. Tupu pamwe ngeetyi tyalingilwe Sesusi, vemupapela komavoko no konomphai. (Mku 15:24; Swa 19:14-16; 20:25; Ovi 2:23, 36) Petupu etyi tyilekesa okuti ondaka oyo mo Ngeleku ipopia ekulusu. Vokuhafende Huku vahimbika-le okukala nekulusu kohale pweetyi Kilisitu eheneye, otyo vati ekulusu otyilimbo tyongeleya. Sesusi nae wapopile ondaka oyo omuti wemone pokupopia ovipuka ovalanduli vae mavalingwa, okumoneswa emone, nononkhumbi, nokukundiswa. — Mt 16:24; Heb 12:2.

• Omuti wenoñgonoko liotyiwa notyivi.

  Omuti umwe Huku apakele motyitaka tyo Endene ulekesa ovitumino viaviuka vya Huku, vipopia etyi tyaviuka neetyi tyapenga. — Ehi 2:9, 17.

• Omuti womwenyo.

  Omuti umwe wali motyitaka tyo Endene. Ombimbiliya kaipopi okuti otyinyango tyatyo tyipa ovanthu omwenyo, mahi omuti ulekesa vala okuti omunthu okuliako, Huku umupa umwe omwenyo wahapu. — Ehi 2:9; 3:22.

• Omuti wo vokutunga.

  Omuti umwe vokutunga ovikutu vapandela omalinya. — Oku 39:27.

• Omutumini wepunda-umbo.

  Mo Loma omunthu ngoo ankho oe Omunene wo mepunda-umbo unakwa Novakwambonge. Wati oe omunene wonomphela, oe omunene wovakwa-vita, namphila etyi amapopi tyina okutalwa vali nawa Novakwambonge vemunakela otyilinga otyo. — Ovi 13:7; 18:12.

• Omutumwa.

  Ondaka oyo ipopia “omunthu watumwa,” Sesusi nae otyo apopiwa ngootyo, novanthu vali ovakwavo vatumainwe vakaundapele vakwavo. Mahi haunene ipopiwa vali pokupopia ovalongwa 12 Sesusi yatyo mwene akoyele evenake vemukalelepo. — Mku 3:14; Ovi 14:14.

• Omutwe womphandyi.

  Okondungu-ndungu yomphandyi kutungwa akufiwiswa nawa. Onomphandyi onombali Salomau atungile komutwe wondywo ya Huku, oo Sakii na Mbowasi nambo mbali nomitwe ovio. (1Oh 7:16) — Tala Ovipuka Viapotoyolwa B8.

• Omuuli.

  Omunthu Huku atuma apopie etyi ahanda haa malingi. Ovauli vali ovatumwa vokutwala ondaka ya Huku, ankho kavapopi vala ovipuka mavikeya komutwe, mahi tupu vapopia ondongeso ya Siovaa, novitumino viae nonomphela mbae. — Am 3:7; 2Pe 1:21.

• Omuundapi wokukwatesako; omukwatesiko wovakulu vewaneno.

  Yatunda mondaka yo Ngeleku diákonos, popanyingi yatiwa “omuundapi” pamwe yatiwa “omulingilili.” Ondaka “omuundapi wokukwatesako” ipopia omunthu uundapa ukwatesako ovakulu mewaneno. Ombimbiliya ipopia etyi omunthu oo ena okulinga opo akale notyilinga otyo. — 1Ti 3:8-10, 12.

• Omuvanda wa Salomau.

  Oo omuvanda wali-ko pononthiki mba Sesusi ukala mepata liondywo ya Huku koutundilo. Ovanthu vati omuvanda oo waliko-ale kohale mondywo Salomau atungilile Huku. Sesusi waendaile-mo momuvanda oo ‘poutalala,’ Novakwa-Kilisitu vo tete omo veliongaiyile pokufenda. (Swa 10:22, 23; Ovi 5:12) — Tala Ovipuka Viapotoyolwa B11.

• Onalundu.

  Omulela umwe unika nawa ukuhukila, ulanda okalu, utunda motyifo tyitiwa onalundu (Nardostachys jatamansi). Mokonda omulela watyo oo ulanda okalu pamwe uhonyekwa momilela omikwavo viahalande okalu pamwe aveulingi umwe ngoti onalundu nanyo hayoko-ale. Oo Maluku na Swau vapopia okuti Sesusi watililwe umwe “onalundu yahahonyaine.” — Mku 14:3; Swa 12:3.

• Ondalakima.

  Movihonekwa Viovakwa-Kilisitu mo Ngeleku, ondaka oyo ipopia ombongo imwe yopalata yova Ngeleku pononthiki mbatyo opo ilema 3.4 g. Movihonekwa vyo Hembeleu, apa yapopiwa ipopia ondalakima yoolu yo ko Pelesa ilifwe vala no ndaliku. (Ne 7:70; Mt 17:24) — Tala Ovipuka Viapotoyolwa B14.

• Ondalelo ya Tatekulu.

  Pakala ombolo yehena onkhiso ilekesa olutu lwa Kilisitu, novinyu ilekesa ohonde yae; okuhinangela ononkhia mba Sesusi. Mokonda otyipuka umwe Ovakwa-Kilisitu vatumwa Novihonekwa vena okulinga, tyatamo umwe okutiwa “Ehinangelo.” — 1Ko 11:20, 23-26.

• Ondenaliu.

  Ombongo yopalata yova Loma, okulema kwayo tyihika 3.85 g, nthele imwe ina otyipala tya Sesale. Kohale omunthu nga aundapa onthiki oyo afetwa, tupu oyo ova Loma vaitaile pokutantha “elilimu” kova Sundaa. (Mt 22:17; Lu 20:24) — Tala Ovipuka Viapotoyolwa B14.

• Ondingavivi.

  Enyina lialukwa Satanasi Eliapu, mokonda upatana Huku, ketavela ovitumino viae viaviuka. — Mt 6:13; 1Swa 5:19.

• Ondyakulilo.

  Omuvalo umwe uvala ovakwa-vita uveyakulila movilwa, tyati, ekapasete, otyikutu tyatyo, ekwamo (epoha), ondyakulilo yo kovikalo, nondyakulilo yopeke. — 1Sa 31:9; Ef 6:13-17.

• Ondyila.

  Ondaka imwe ipopiwa ngonthengele-popia Movihonekwa, ipopia etyi omunthu alinga, tyilinge tyapenga tyilinge tyaviuka ku Siovaa. Ovanthu vokwalandulile Sesusi, ankho vatiwa vaya “Mondyila,” ngokuti, vapaka omwenyo wavo mondyila yokutavela Sesusi Kilisitu, avalandula monomphai mbae. — Ovi 19:9.

• Ondywo Ikola.

  Haunene ipopia omphangu imwe ikola pafendelwa. Mahi apa yapopiwa haunene ipopia ekaka liefendelo nondywo ya Huku ko Selusalei. Ondaka oyo tupu ipopia apa Huku akala keulu. — Oku 25:8, 9; 2Oh 10:25; 1Eh 28:10; Eho 11:19.

• Ondywo ya Huku.

  Ondywo yokwatungilwe ko Selusalei ei yokwapingile pekaka liefendelo omu ova Isilayeli vafendelele Huku. Ondywo ya Huku yo tete yatungilwe na Salomau mahi ova Mbambilonia aveihanyeko. Ya vali yatungilwe na Solombambele etyi atunda koukonde ko Mbambilonia, etyi pakala aihanywa-ko vali, Helonde Omunene eipindula-po vali. Tupu Movihonekwa ondywo ya Huku popanyingi yatiwa vala “ondywo ya Siovaa.” (Esi 1:3; 6:14, 15; 1Eh 29:1; 2Eh 2:4; Mt 24:1) — Tala Ovipuka Viapotoyolwa B8 no B11.

• Ondywo yokufendela.

  Ondaka yatyo mwene o Sinangonga ihangununa “okuwaneka; ovanthu veliongiya.” Monotesitu ononyingi ondaka oyo ipopia ondywo ova Sundaa veliongiyila opo vatange Ovihonekwa, nokulongeswa, nokwiivisa nokulikwambela. Pononthiki mba Sesusi omapunda-umbo omapii mo Isilayeli ali vala nondywo ike yokufendela, mahi omapunda-umbo omanene ali nonondywo ononyingi. — Lu 4:16; Ovi 13:14, 15.

• Onela yotyilimbo.

  Onela imwe ina otyilimbo ipakwa komunwe, pamwe o kokalienge ko pomunyino. Ivalwa vala nomutumini, nomunthu utumina mombonge. (Ehi 41:42) — Tala pokwati OSELU.

• Ongomole.

  Otyipuka tyimwe tyeeleka ovilia novipuka ovikwavo vali, tyityinda 2.2 L, mo efa ike munyingila onongomole 10. (Oku 16:16, 18) — Tala Ovipuka Viapotoyolwa B14.

• Onikisi.

  Emanya limwe ewa liatena, liaunda-unda liati apa patwela, apa panthikovela, apa opopandomba, apa pakuhuka, apa opopambundu, apa opopangole. Nokomuvalo ukola womunene-nakwa liapakelwe-ko. — Oku 28:9, 12; 1Eh 29:2; Som 28:16.

• Onkhai-hamba yo Keulu.

  Enyina liotyika-huku tyafendaile ova Isilayeli vatyitukilile-po Huku pononthiki mba Selemiya. Vamwe vati ondaka oyo ipopia huku yomukai, huku yo Mbambilonia Isitale (Asitalete). Ovanthu voko Mesopotamia otyika-huku otyo vetyiti Inanna otyo okuti, “Onkhai-hamba yo Keulu.” Tyati otyo otyika-huku tyo keulu, otyo otyika-huku no tyolutyito. Pena apa pahonekwa melaka liova Isitu Asitalete vetyiti “Omukai wo Keulu.” — Sel 44:19.

• Onkhalamutwe yovanakwa.

  Oyo ondaka onkhwavo yapopiwa Movihonekwa viova Hembeleu ipopia “omunene-nakwa.” Movihonekwa Viovakwa-Kilisitu mo Ngeleku ondaka “ononkhalamutwe mbovanakwa” ipopia ovanene vatyo vovanakwa, mokutala tyati umwe novanene-nakwa, no vokwakalela komutwe ovikundyi 24 viovanakwa. — 2Eh 26:20; Esi 7:5; Mt 2:4; Mku 8:31.

• Onkhano.

  Okuhingana (okuhinga) omunthu, hamwe otyipuka, okupeleyila omunthu otyivi. Otyo katyilii nokusilisa omunthu, hamwe onyengo onene. Tyina yalingwa na Huku, hamwe o nomunthu umwe wetyipewa umwe, ina ononkhono, etyi tyatolwa otyo umwe tyikamoneka. — Ehi 12:3; Omb 22:12; Nga 3:10.

• Onkhiso.

  Ipakwa menthapi litutuluke (litutumuke), movikunwa onthahi yokuvipisa; konkhiso kupolwa vala kapii ipakwa nawa haa ipakwe vali movipuka ovikwavo. Pamwe Mombimbiliya, ipopia onkhali, neetyi tyavola, tupu ipopia etyi tyikula otyo tyahamoneka, neetyi tyihahana liwa. — Oku 12:20; Mt 13:33; Nga 5:9.

• Onkhume.

  Ouvela womiti, weetwa nomapuka amwe amena momiti alinga ngomalova. Vamwe vati onkhume yapopiwa Mombimbiliya, otyiwiki-wiki (Puccinia graminis). — 1Oh 8:37.

• Onkhunye yomutumini.

  Onkhunye oyo oyei omutumini akala nayo, ilekesa okuti oe omunene, oe ohamba. — Ehi 49:10; Heb 1:8.

• Onkhwino.

  Otyipuka tyokuhikwa. Ononkhwino ononyingi mbapopiwa Mombimbiliya ombotyivela. Momukanda Onombalulo 10:2, Siovaa wapopilile ovanthu valinge ononkhwino onombali mbopalata ankho mambuhikwa mbwihane ovanthu tyina vena otyonge, na tyina vati pokwiluka, na tyina venda kovilwa. Tyipondola hamwe ononkhwino ombo mbaviuka kambelipondaile, kambelifwile nonokhwino mbonombinga mbovinyama. Mondywo ya Huku mwali ononkhwino mahi kambwiiwe ombatyi. Onkhwino tupu yahikailwe tyina pekahi nokupopiwa omphela ya Siovaa, na tyina pena otyipuka tyimwe otyinene tyatunda ku Siovaa. — 2Eh 29:26; Esi 3:10; 1Ko 15:52; Eho 8:7–11:15.

• Onoandyu.

  Mo Hembeleu malʼákh, mo Ngeleku ággelos. Onondaka ombo onombali ambuho okuti, “omutumwa-ndaka,” mahi apa patiwa “oandyu” opapa ipopia ovatumwa-ndaka vakala keulu. (Ehi 16:7; 32:3; Tia 2:25; Eho 22:8) Onoandyu mbuna unene ononkhono, Huku wembutunga-le kohale pweetyi ehenetunge ovanthu. Mombimbiliya tupu mbatiwa “ovakwa-ukola ovanyingi-nyingi,” “ovana va Huku,” “ononthungululu mbo kombimba.” (Epa 33:2; Som 1:6; 38:7) Onoandyu kambatungilwe mbulityite, mbatungwa ambuho ike-ike. Mbuna ovityita omakwii-nomakwii. (Nda 7:10) Omu Ombimbiliya ityipopila ilekesa okuti ambuho mbuna-ana omanyina, tupu tyati umwe ei ikahi ñgaa ei ikahi ñgaa, mahi mbulikondola umwe koututu kambutavela okufendwa, mbumwe atee umwe kambulitumbula omanyina. (Ehi 32:29; Lu 1:26; Eho 22:8, 9) Mbatepaulwa ovinkhunkha-ovinkhunkha, mbapewa-pewa ovilinga vielikalaila, mbumwe mbuundapa umwe potyipundi tyounene tya Siovaa, mbutwala ondaka yae, mbwaamena ovanthu va Siovaa pano pohi, mbuteta onomphela mba Huku, mbuyaka movilinga viokupopia movanthu oviwa ovipe. (2Oh 19:35; Ovii 34:7; Lu 1:30, 31; Eho 5:11; 14:6) Komutwe oku mambukakwatesako Sesusi movilwa vyo Alumangendom. — Eho 19:14, 15.

• Ono kelumbii.

  Onoandyu mbumwe mbuna otyilinga tyimwe otyinene. Mbelikalela nono selafii. — Ehi 3:24; Oku 25:20; Is 37:16; Heb 9:5.

• Onole.

  Otyifo tyimwe tyikala pomeva, no kohale ovanthu vatungaile natyo onosesu, novimbala novipuka ovikwavo vali nonowato. Kohale tupu opo ovanthu vahonaikile, kwali onombwingwa ononyingi mbonole. — Oku 2:3.

• Onombapolo mbo ko Talisi.

  Onondaka ombo kohale mbapopile onombapolo mbokwenda ko Talisi (hono o Espanha). Etyi pakala tyipondola onondaka ombo ambupopi onombapolo ononene mbokweenda ovikambo ovilaale. Oo Salomau na Seosafaa vaundapele nonombapolo ombo pokulinga ovitanda viavo. — 1Oh 9:26; 10:22; 22:48.

• Onombinga mbomutala wovilikutila.

  Oumbinga utai utungilwa komavindi omitala vimwe viovilikutila, watala kondye. (Le 8:15; 1Oh 2:28) — Tala Ovipuka Viapotoyolwa B5 no B8.

• Onombolo mbokulekeswa.

  Onombolo 12 mbutenthekwa epandu-epandu mbupakwa kombanda yomesa, Momphangu Ikola mekaka liefendelo no mondywo ya Huku. Tupu mbatiwa “onombolo mbotyiawa.” Tyina tyiti Tyasapalo muna okupakwa ononkhwavo. Onombolo mbapolwa-mo, ankho mbuna vala okuliwa novanakwa. (2Eh 2:4; Mt 12:4; Oku 25:30; Le 24:5-9; Heb 9:2) — Tala Ovipuka Viapotoyolwa B5.

• Onombolo mbotyiawa.

  — Tala pokwati ONOMBOLO MBOKULEKESWA.

• Onondaka mbokuhimbika.

  Onondaka mbokuhimbika Oviimbo, mbupopia omwiimbi, nomuhoneki, mbupopia ovipuka vienda-ko, mbupopia oñgeni tyiimbwa, tupu mbupopia oityi otyiimbo tyaimbilwa. — Tala onondaka mbokuhimbika Oviimbo 3; 4; 5; 6; 7; 30; 38; 60; 92; 102.

• Onongosa.

  Onosaku mbalingwa nonongosa ombombu mbokutyinda ovilia, novipuka ovikwavo vali. Kohale ankho onongosa mbakaka vali mbulingwa nomainya otyinkhombo otyinthikovei, ombo ovanthu vavala tyina valila. — Ehi 37:34; Lu 10:13.

• Ononthiki mbahulilila.

  Ondaka oyo, nondaka “konthyulilo yononthiki,” mbapopiwa momaulo Ombimbiliya pokupopia omuvo makumoneka ovipuka vimwe ovinene. (Ise 38:16; Nda 10:14; Ovi 2:17) Omaulo amwe omu etyipopila, pamwe ononthiki ombo mbukala vala omanima ehehi, pamwe omanima omanyingi. Mahi haunene, Ombimbiliya ipopia ondaka “ononthiki mbahulilila” pokupopia ouye uno, omuvo Sesusi eya-le tyahamoneka. — 2Ti 3:1; Tia 5:3; 2Pe 3:3.

• Ono selafii.

  Onoandyu mbeliseta notyipundi tya Siovaa. Mo Hembeleu ondaka serafím ipopia “etyi tyatema.” — Is 6:2, 6.

• Onthawa.

  Omukai wa vali, mahi haunene ankho omupika. — Oku 21:8; 2Sa 5:13; 1Oh 11:3.

• Onthenda yoseta.

  Okapopo kalingwa nombandwa yotyinyama, pamwe o yotyinkhombo pamwe o yongi, ankho omo ovanthu vapaka ovinyu. Ovinyu tyina yanyungwa pahe ankho ipakwa monthenda omphe, mokonda itutumuka otyo ihiluka. Tyina itutumukila monthenda omphe ombandwa yatyo ilinana vala kaitutana, mahi okupaka ovinyu omphe mononthenda ononkhulu mbututana tyina yamahiluka. — Sus 9:4; Mt 9:17.

• Onthiki Yokukohwa Ononkhali.

  Onthiki onene vali ikola kova Isilayeli, tupu itiwa Yom Kippur (yatuka mo Hembeleu mondaka yohm hakkippurím, “onthiki yokupata”), onthiki yokukoha ononkhali, onthiki ya 10 ya Etanii. Menima, onthiki oyo vala omunene-nakwa anyingila Momphangu Ikola Unene mekaka liefendelo, pahe konyima ngatyo alinga ngootyo mondywo ya Huku. Unyingila-mo akapakula ohonde yononkhali mbae, no mba vakwavo vokwatuka mu Levii, no mbovanthu aveho. Onthiki yotyonge tyimwe tyikola, yokwahali, tupu ilinga otyasapalo, onthiki yokwahalingi otyilinga natyike. — Le 23:27, 28.

• Onthiki yokulifwiika.

  Oyo onthiki ova Sundaa ankho vamanaika ovipuka mavesuku navio Motyasapalo. Onthiki oyo ankho ipwa tyina ekumbi linyingila, monthiki ei hono tuti o Mutano, oola Otyasapalo tyihimbika. Mokuvalula kwova Sundaa onthiki ankho ihimbika kokangulohi aikapwa kokangulohi. — Mku 15:42; Lu 23:54.

• Onthiki Yomphela.

  Onthiki, okuti hatyo omuvo ovanthu vamwe, ovilongo vimwe, okuti hatyo ovanthu aveho vaongelwa omphela na Huku. Momuvo watyo oo, tyipondola ava vata mokwiipawa vaipawa, vamwe atyivepe ombundi yokuyovoka, nokukamona omwenyo wahapu. Sesusi Kilisitu novatumwa vae veipopile “Onthiki Yomphela” maikeya komutwe, yahamaendela vala vokuna omwenyo, mayeendela umwe no vokwankhia-le kohale. — Mt 12:36.

• Onthumbu.

  Otyifo tyimwe tyilula unene, tyati otyo tyilula otyo tyinika. Onthumbu ihole okupopiwa ngomuhe Mombimbiliya pokupopia ovivi vituka kouhayo wokulihanda, no koupika, no koundingavivi, no kokuyapuka mondongeso. Momukanda Eholololo 8:11 ondaka “onthumbu” ipopia etyi tyilula, ipopia ovenenu, pamwe yatiwa otyifo tyilula. — Epa 29:18; Omih 5:4; Sel 9:15; Am 5:7.

• Onthungululu yokutya.

  Ipopia vala otyipuka tyike “nonthungululu yokomuhuka” (munyofi). Oyo isaililwa okutumbuka komuhuka tyina nkhele liehenetunde, oyo iti pahe kwatya. — Eho 22:16; 2Pe 1:19.

• Onthwala.

  Otyipuka tyimwe tyikahi ngotyifuta tyilingwa nombandwa, pamwe onolumbungu, okuti hatyo onomahipa ovinyama, hamwe oneholi, hamwe omainya ovinyama. Kovilongo vimwe kohale ovanthu vakongaile ovakwa-vita vokuyumba nonthwala movilwa. — Vak 20:16; 1Sa 17:50.

• Onthyulilo youye.

  Omuvo pahe wokuhungi konthyulilo youye uno, nomukalelo wao utuminwa na Satanasi. Omuvo oo wahimbika mokweya kwa Kilisitu. Onoandyu mambukalulikwa na Sesusi “ambupungulula onondingavivi konondingaviwa,” ambuvehanye-ko. (Mt 13:40-42, 49) Ovalongwa va Sesusi vahandele unene okunoñgonoka “onthyulilo” oyo. (Mt 24:3) Pweetyi ehenekondoke keulu wapopilile ovalongwa vae okuti makakala navo pomuvo watyo opo. — Mt 28:20.

• Opalaisu; Otyilongo Otyiwa.

  Opofika pamwe pefiwa, payova nawa. Ofika yo tete yali ngootyo, o Endene, ofika Siovaa alingilile ovanthu vo tete. Onondaka Sesusi apopilile omulume umwe otyifwanga nae wapapelelwe momuti apakwa ponthele yae, mbulekesa okuti ohi maikalinga ofika imwe ongwa, opalaisu. Momukanda wa 2 Ova Kolindu 12:4, ondaka oyo mokutala ipopia otyilongo otyiwa, ouye omupe, momukanda Eholololo 2:7, otyilongo otyiwa tyapopiwa-mo o keulu. — Otyii 4:13; Lu 23:43.

• Opasikwa.

  Otyipito ankho tyilingwa like menima monthiki 14 ya Ambimbe (pahe yatilwe o Nisaa) tyokuhinangela onthiki ova Isilayeli vayovoka ko Isitu. Paipawa ongi onthwei, okuti hatyo onkhombo onthwei aiyokwa ailiwa novifo vilula nombolo yahaile onkhiso. — Oku 12:27; Swa 6:4; 1Ko 5:7.

• Opinyolo.

  Otyipuka omunthu asila ou alevala, tyokuti umwe haa meya okufeta. Ovitumino viapelwe Mwisesi vipopia etyi omunthu ena okulinga tyina esala nopinyolo apola komunthu wongele, tyaamene ovanthu vokwahepa nomapongo. — Oku 22:26; Ise 18:7.

• O Samaliya.

  Epunda-umbo liali ombala youhamba wo kombanda womihoko 10 viova Isilayeli mokweenda kwomanima 200, enyina liotyilongo atyiho. Liatungililwe komphunda itumbulwa ngootyo. Pononthiki mba Sesusi o Samaliya yali otyilongo tyituminwa no Loma tyikala pokati okuti o Ngalileya yahula kombanda o Sundeya yahula kombwelo. Movilinga viokwivisa Sesusi motyilongo omo kaivisile-mo, pamwe wakwataile-mo vala ondyila atomphola novanthu vakala-mo. Petulu, osapi ya vali Youhamba waundapa nayo pweetyi ova Samaliya vatambula omphepo ikola. (1Oh 16:24; Swa 4:7; Ovi 8:14) — Tala Ovipuka Viapotoyolwa B10.

• Osandeyu.

  Nayo otiliku (Triticum spelta), onoñgima mbatyo kambutundu liwa kovipeta viatyo. — Oku 9:32.

• Oseaa.

  Otyipuka tyokweeleka ovilia novipuka ovikwavo vali, tyityinda 7.33 L. okweeleka mombatu. (2Oh 7:1.) — Tala Ovipuka Viapotoyolwa B14.

• Osela.

  Ilema 0.57 g. Inyingila etyi tyilifwe po 1/20 mosikulu. (Le 27:25) — Tala Ovipuka Viapotoyolwa B14.

• Oselu.

  Otyipuka tyipaka otyilimbo (haunene tyipaka kema, pamwe o kelohi) tyimoneke okuti otyipuka tyina hekulu, otyotyili, tyelitavelwa. Onoselu mbo kohale mbalingailwe novipuka viatena (omamanya, nomayo ondyamba, nomavai), mbali nonoletela pamwe otyipuka tyayolwa-ko. Tupu ondaka oyo ipopiwa ngomuhe pokupopia okuti etyi tyapopiwa otyili, tyina mwene watyo, neetyi tyaholekwa. — Oku 28:11; Ne 9:38; Eho 5:1; 9:4.

• Osikulu.

  Otyipeyalo tyova Hembeleu, nonombongo mbatyo ongootyo mbutumbulwa. Ilema 11,4 g. Ondaka “osikulu yo momphangu ikola” tyipondola ipopia okuti etyi tyipeyalwa tyina umwe okupeyalwa nawa, hamwe okuti tyina okulifwa notyipeyalo tyomekaka liefendelo. Tyipondola kohale yali osikulu yohamba (yelikalela nonosikulu ononkhwavo), hamwe otyipeyalo otyo tyali mombala yohamba. — Oku 30:13.

• Otalendu.

  Ombongo onene vali yova Hembeleu ivalela vali. Ilema 34,2 kg. Otalendu yova Ngeleku kaileme vali tyipona ko yova Hembeleu, ilema vala 20,4 kg. (1Eh 22:14; Mt 18:24) — Tala Ovipuka Viapotoyolwa B14.

• Otya 10.

  Otyipuka tya 10 ovanthu vapola kovipuka viavo pamwe vetyaava haunene mongeleya pamwe vetyifeta elilimu. Pamwe vetyiti “onthele ya 10.” (Mal 3:10; Epa 26:12; Mt 23:23) Movitumino viapelwe Mwisesi ovipuka vya 10 tyilinge ovinyango neevi vateya momapia avo, tyilinge ovipako, vipewa vomuhoko wa Levii kese nima. Tupu vomuhoko wa Levii vapolaile kovipuka vapelwe vya 10 otyo vaavela ovanakwa vokwatuka mu Alau. Pena vali ovipuka ovikwavo ovanthu vaavaile. Ovakwa-Kilisitu kavesukisile vali okwaava otyipuka tya 10.

• Otyasapalo.

  Ondaka oyo yatuka mo Hembeleu ipopia “okupululukwa; okutalama.” Onthiki ya pandu-vali kosimanu, (mokuvalula kwova Sundaa ihimbikila kokangulohi Mutano atee kokangulohi Motyasapalo). Ononthiki mbovipito ovikwavo menima, ngeetyi enima lya pandu-vali nenima 50 nao atilwe otyasapalo. Onthiki Yotyasapalo ankho kayuundapwa, ovanakwa vala vaundapa monthiki oyo momphangu ikola. Menima Liotyasapalo ovanthu ankho kavapondola okulima, ova Hembeleu kavapondola okutantha va Hembeleu vakwavo ongele. Movitumino viapelwe Mwisesi evi viailikilwe-mo ankho viaviuka umwe, mahi ononkhalamutwe mbonongeleya vayawisile-ko avalemesa ovipuka. Pononthiki mba Sesusi ovanthu tyevepwiyile okulandula ovitumino ovio. — Oku 20:8; Le 25:4; Lu 13:14-16; Klo 2:16.

• Otyiawa tyokunwa.

  Ovinyu yaawa itilwa komutala wovilikutila ipakulilwa kumwe novilikutila ovikwavo. Paulu wetyipopia ngomuhe pokupopia okweliaava kwae aundapele Ovakwa-Kilisitu vakwavo. — Omb 15:5, 7; Flp 2:17.

• Otyiawa tyokupandula.

  Otyiawa tyalingailwe tyokuhilivika Huku mokonda yovipuka apa ovanthu vae nolwembia lwae olunene. Pokutyilinga paliwa ohitu yotyinyama tyaawa, nonombolo mbapakwa onkhiso no ombu mbahaile onkhiso. Ohitu oyo iliwa vala monthiki yatyo. — 2Eh 29:31.

• Otyiawa tyokuvelwa onombei.

  Otyilikutila omunthu alingila ononkhali mbae. Tyelikalela noviawa ovikwavo viononkhali, tyisukula omunthu komphango alinga mahi eheifwisapo, na tyina omunthu alinga onkhali pahe elivele, tyimuyovola ahalingwa natyike. — Le 7:37; 19:22; Is 53:10.

• Otyiawa tyokwendaiswa.

  Otyiawa tyimwe, omunakwa ankho ati tyina omunthu ametyeeta uyambeka omavoko ae kombanda yomavoko a hekulu wokwaeta otyiawa, tyina ngwe etyikwata, omavoko atyo eendaisa eetwala no komutwe, eetwala no konyima; otyiawa ankho tyeendaiswa vala nomunakwa. Otyo ankho otyimo vala tyoviawa vilingilwa Siovaa, ovilikutila. — Le 7:30.

• Otyiawa tyonkhali.

  Otyiawa omunthu alingila ononkhali mbae, ononkhali alinga motyiponyo mokonda youkwankhali. Ovanthu ankho vapakula ovinyama ovinyingi, vapondola okupakula ongombe, okuti hatyo opomba. Omunthu wokwalinga onkhali utei vala etyi ena-tyo opo alinge otyilikutila. — Le 4:27, 29; Heb 10:8.

• Otyiimbo.

  Ondaka oyo Otyiimbo moputu yatiwa o Salmo, ipopia otyiimbo tyihivilika Huku. Oviimbo viatyo ngoovio viaimbailwe novanthu pokufenda Siovaa Huku mondywo yae mo Selusalei. — Lu 20:42; Ovi 13:33; Tia 5:13.

• Otyiimbo tyo Movilondeka.

  Onondaka mbokuhimbika Oviimbo 120-134. Namphila ovanthu ovanyingi tyiti ava vasoka ñgaa ava vasoka ñgaa, mahi ovanyingi vati oviimbo 15 ova Isilayeli vaimbaile tyina ‘valondeka’ vakafenda ko Selusalei yali konomphunda mbo Sundaa, opo vakalinge ovipito vitatu vilingwa menima.

• Otyiimbo tyomutambo.

  Onondaka mbahonekwa, hamwe otyiimbo tyaimbwa nomunthu weihamenwa, omunthu weihama omutima kombanda yokwahiwa-po nomunthu ehole, hamwe epanga liae; ongengeya. — 2Sa 1:17; Ovii 7:Onondaka mbokwahimbika.

• Otyikanda (eke).

  Kohale pokweeleka okovandu vaeleka potyikanda tyokuvoko okuhimbikila komutundanu atee kokamunwe kokonthele tyina otyikanda tyatandavela umwe nawa. Okutalela kokovandu yokuna onosendimetu 44.5, otyikanda tyina onosendimetu 22.2 moule. (Oku 28:16; 1Sa 17:4) — Tala Ovipuka Viapotoyolwa B14.

• Otyikasa tyomphango.

  Otyikasa tyatungilwe nomavai omu akasiya atyisolongololwa noolu. Tyapakelwe Momphangu Ikola Unene mekaka liefendelo ngamo tyikala, pahe konyima oku atyipakwa Momphangu Ikola Unene mondywo ya Huku yatungilwe na Salomau. Kotyipato tyatyo tyoolu kwali ono kelumbii onombali mbelipilukila. Mokati mwali omamanya evali omapapi okuna Ovitumino 10. (Epa 31:26; 1Oh 6:19; Heb 9:4) — Tala Ovipuka Viapotoyolwa B5 no po B8.

• Otyikutu tyounakwa.

  Otyikutu tyivalwa novanakwa. Mahi tyomunene-nakwa tyilikalela, monthulo yatyo omu mwapakwa otyinyanga tyo ponthulo tyina omamanya omawa 12. (Oku 28:4, 6) — Tala Ovipuka Viapotoyolwa B5.

• Otyilikutila.

  Otyetyi omunthu apakulila Huku emupandule, no putyina apengesa, na tyina ahanda vahonye vali na Huku. Tyahimbika umwe na Ambele tyovanthu mwene okulihinda avapakula etyi mwene vasoka, pamwe novinyama umwe, atee pahe kweya umwe otyitumino tyatyo Movitumino viapelwe Mwisesi. Mahi etyi Sesusi apakula omwenyo wae mwene, alingi otyilikutila tyaoya, pahe ovanthu kavesukisa vali okulinga ovilikutila viovinyama, namphila Ovakwa-Kilisitu vapondola okupakula etyi vena-tyo ku Huku, ovilikutila viopamphepo. — Ehi 4:4; Heb 13:15, 16; 1Swa 4:10.

• Otyilikutila tyokuyokwa.

  Otyinyama tyiipawa, atyiho atyiyokelwa Huku komutala wovilikutila; natyike tyipolwa-ko (ongombe onthwei, ongi onthwei, onkhombo onthwei, ekuti, eilona liopomba) tyilinge tyoou wetyaava. — Oku 29:18; Le 6:9.

• Otyilikutila Tyombembwa.

  Otyilikutila tyipakulilwa Siovaa mokwahanda okukala nombembwa nae. Wokwetyipakula, no veumbo liae, nomunakwa metyiyoko, novanakwa ovakwavo veli nokuundapa, aveho valia-ko. Siovaa utambula nawa omwihi unika nawa wovilenga tyina viyokwa. Ohonde yatyo, omwenyo watyo, nayo wiipakulilwa. Ongatyina ovanakwa no wokwetyaava vepumphi valia na Siovaa, ngokuti pokati kavo na Siovaa pena ombembwa. — Le 7:29, 32; Epa 27:7.

• Otyilolo; okufenda ovilolo.

  Otyipuka ovanthu vafenda tyina etyi tyafwa, tyilinge o mokwasoka vala, tyilinge otyo umwe tyili tyafwa. Okufenda ovilolo nokufenda ovika-huku, okulipetamena kuvio, okuvihumba. — Ovii 115:4; Ovi 17:16; 1Ko 10:14.

• Otyilunda; Omunthu una otyilunda.

  Ouvela umwe omuvi ulia-ko vala otyikova tyatyo. Otyilunda tyapopiwa Movihonekwa hatyetyi vala ovanthu vei hono, mokonda tyina katyivele vala movanthu, tyikala no movikutu no monondywo. Omunthu una ouvela watyo oo utiwa una otyilunda. — Le 14:54; Lu 5:12.

• Otyimuti tyina ondungu.

  Otyimuti tyimwe otyilaale tyina otyivela tyatwa kondungu vokulima vaombola natyo. Otyimuti otyo tyaelekwa nonondaka mbomuna-ndunge mbupa omunthu umbwiiva okulinga etyi atolelwa. Onondaka “okusana motyimuti tyina ondungu” mbatuka kondaka ipopia etyi tyilinga ongombe onthwei yokwehetavela iti otyo itomwa otyo isana-mo motyimuti otyo, otyo mwene tyiihama vala kuyo. — Ovi 26:14; Vak 3:31.

• Otyinyanga (Ekulutina).

  Otyo tyali otyinyanga tyimwe otyiwa tyatungailwa ono kelumbii tyiyapula pokati Omphangu Ikola, Nomphangu Ikola Unene mekaka liefendelo, no mondywo ya Huku. (Oku 26:31; 2Eh 3:14; Mt 27:51; Heb 9:3) — Tala Ovipuka Viapotoyolwa B5.

• Otyinyanga tyo ponthulo.

  Otyinyanga tyamatwa-matwa omamanya omawa omunene-nakwa omu Isilayeli apaka monthulo tyina anyingila Momphangu Ikola. Tyitiwa “otyinyanga tyo ponthulo tyonomphela” mokonda tyina o Ulii no Tumii, ovipuka viteta onomphela mba Siovaa. (Oku 28:15-30) — Tala Ovipuka Viapotoyolwa B5.

• Otyipandyi tyikola.

  Ondaka yo Hembeleu, (ʼasheráh) (1) ipopia otyipandyi tyikola, otyilekesa tya Axera o huku yomukai yova Kanaa, huku yolutyito, (2) ipopia otyika-huku tyatyo vala Axera. Tyipondola ovipandyi ovio ankho o viomiti umwe. Pamwe ankho omuti umwe wahongwa, mahi pamwe omuti watyo vala. — Epa 16:21; Vak 6:26; 1Oh 15:13.

• Otyipato tyokuhita ononkhali.

  Otyipato tyo Kotyikasa Tyomphango, komutwe watyo oko omunene-nakwa anyanya ohonde yoviawa vionkhali Monthiki Yokupata Ononkhali. Ondaka oyo yatuka mo Hembeleu, ipopia “okuhika (konkhali),” ine hamwe okuti “okunyima (onkhali).” Otyipato otyo tyalingilwe noolu, atyipakwa ono kelumbii onombali kononthele. Pamwe tyatiwa vala “otyipato.” (Oku 25:17-22; 1Eh 28:11; Heb 9:5) — Tala Ovipuka Viapotoyolwa B5.

• Otyipito Tyokupakula.

  Otyipito tyilingwa like menima tyokuhinangela onthiki ondywo ya Huku yakohwa etyi Antíoco Epifânio eisilisile. Otyipito tyatyo otyo tyihimbika monthiki 25 ya Kisileu atyikala ononthiki etyinana. — Swa 10:22.

• Otyipito Tyokuteya; Otyipito Tyonosimanu.

  — Tala pokwati PENDEKOSITE.

• Otyipito Tyomakaka.

  Tupu tyitiwa Otyipito Tyonohinge, Otyipito Tyokwongiya. Tyihimbika monthiki 15 atyikapwa monthiki 21 yohanyi ya Etanii. Tyilingwa komuteyuko tyina pahe ova Isilayeli vamamane okuteya, omuvo umwe wehambu, wokupandula etyi Siovaa aendeka nawa ovikuna viavo. Mononthiki mbotyipito tyatyo otyo, ovanthu vakala momakaka, monohinge, vahinangele apa vakalaile Pokutunda ko Isitu. Otyimwe povipito vitatu ovalume vatyo vahapondola okukamba, venda ko Selusalei veketyilinge. — Le 23:34; Esi 3:4.

• Otyipito Tyonombolo Mbahaile Onkhiso.

  Otyipito tyo tete povipito vitatu vilingwa like menima nova Isilayeli. Tyihimbika monthiki 15 ya Nisaa, onthiki ilandula ko yo Pasikwa, atyikala ononthiki epandu-vali. Potyipito tyatyo opo paliwa vala onombolo mbahaile onkhiso, vahinangele Pokutunda ko Isitu. — Oku 23:15; Mku 14:1.

• Otyipuka tyikola tyaholekwa.

  Otyo otyipuka Huku apanga, otyipuka mwene tyatuka mwe, tyaumbikwa vala tyikevela omuvo watyo, otyipuka tyatyo otyo tyiholololelwa vala ava mwene ahanda vetyinoñgonoke. — Mku 4:11; Klo 1:26.

• Otyipunda.

  Mo Hembeleu yatuka mondaka imwe itiwa “Milo,” iti “okuyulisa.” Mo Septuaginta yatiwa “ombala.” Mokutala opapa pali epunda-umbo lya Ndaviti, okuti hatyo otyipuka tyatungilwe-mo, mahi mwene etyi otyipunda tyatyo otyo tyali na hono katyiiwe-ale. — 2Sa 5:9; 1Oh 11:27.

• Otyipundi tyonomphela.

  Opofika pamwe patunthama palondeka katutu pena omatyeko okulondela papumphama ovakulu votyilongo pokupopia novanthu, vevepopile etyi vasoka. Ondaka “otyipundi tyonomphela tya Huku,” nondaka “otyipundi tyonomphela tya Kilisitu,” mbapopiwa ngomuhe pokupopia omu Huku makatetela omphela yovanthu aveho. — Lo 14:10; 2Ko 5:10; Swa 19:13.

• Otyitapi.

  Omunthu wokuti utyivila okutala evi vikeya. Ovanakwa vokwatambula, novatali, no vokutalela kononthungululu, novakwavo vali, Ombimbiliya yeveti ovitapi. — Le 19:31; Epa 18:11; Ovi 16:16.

• Otyiveli.

  Mwene-mwene Mombimbiliya ipopia omona wo tete omukwendye omulume aeta kouye (hatyiveli-ko omukai elivelipa). Kohale, omona wotyiveli omukwendye una otyilinga otyinene meumbo, oe ulinga ohongoi yeumbo tyina he amanyimi. Ondaka oyo tupu ipopia ovinyama ovitwei viatetekela okutyitwa, pamwe viatiwa “oviveli.” — Oku 11:5; 13:12; Ehi 25:33; Klo 1:15.

• Otyonge.

  Ovanthu ovanyingi-nyingi veliongiya valinge tyimwe. Movihonekwa vyo Hembeleu ipopia ova Isilayeli veliongiya movipito viokufenda, no movipito ovinene vialingailwe motyilongo. — Epa 16:8; 1Oh 8:5.

• Ouhamba wa Huku.

  Onondaka ombo mbupopia ounene wa Huku wokutumina, ou wakoywa umwe atumine-ko, Omona wae Kilisitu Sesusi. — Mt 12:28; Lu 4:43; 1Ko 15:50.

• Ouhayo wokulihanda.

  Yatunda mondaka yo Ngeleku porneía, ipopia ovinepo aviho viasila. Tyati umwe noumbalehi, noukunga, novanthu valala kumwe vehenelinepe, nomulume okulala na mulume mukwavo, nomukai okulala na mukai mukwavo, nokulala novinyama. Momukanda Eholololo, ondaka oyo yapopiwa ngomuhe pokupopia onongeleya mbomatutu mbatiwa “O Mbambilonia Onene,” mokonda mbulipaka kumwe novatumini vouye uno opo mbunkhimane, mbukale nomalumono. (Eho 14:8; 17:2; 18:3; Mt 5:32; Ovi 15:29; Nga 5:19) — Tala pokwati EKUNGA.

• O Ulii, no Tumii.

  Ovipuka omunene-nakwa atala opo apopie etyi tyatuka ku Siovaa ovanthu votyilongo vahanda okunoñgonoka. Vipakwa kotyinyanga tyoponthulo tyina nkhele omunene-nakwa ehenenyingile mekaka liefendelo. Ovipuka ovio veviyeka-po vala etyi ova Mbambilonia vahanya-po o Selusalei.— Oku 28:30; Ne 7:65.

• Oumbalehi.

  Omulume wanepa hamwe omukai wanepwa ukalala no ou vehelinepele nae. — Oku 20:14; Mt 5:27; 19:9.

• Oumbangi.

  “Oumbangi” haunene ipopia Ovitumino 10 viokwahonekwa komamanya omapapi okwapelwe Mwisesi. — Oku. 31:18.

• Ousukuki; Etyi tyikola.

  Omukalelo wa Siovaa; tyikola otyetyi tyasukuka umwe nawa tyaoya. (Oku 28:36; 1Sa 2:2; Omih 9:10; Is 6:3) Ondaka yatyo mwene mo Hembeleu tyina ipopia ovanthu (Oku 19:6; 2Oh 4:9), novinyama (Omb 18:17), novipuka ovikwavo vali (Oku 28:38; 30:25; Le 27:14), nonohika (Oku 3:5; Is 27:13), nomivo (Oku 16:23; Le 25:12), novilinga (Oku 36:4), ipopia otyipuka tyapungwa povikwavo, tyakoyelwa vala otyilinga tyike, tyakohwa tyilinge tya Huku ukola; otyipuka tyakoywa tyilinge ovilinga vya Siovaa. Movihonekwa Viovakwa-Kilisitu mo Ngeleku, ondaka “ousukuki,” “neetyi tyikola” mbupopia ñgoo etyi tyakoywa tyilinge tya Huku. Onondaka ombo tupu mbupopia okusukula ovituwa viomunthu. — Mku 6:20; 2Ko 7:1; 1Pe 1:15, 16.

• Ouye uno.

  Ondaka yo Ngeleku aión ipopia ovipuka vikahiko ine hamwe ovipuka viakala-ko omuvo umwe. Ombimbiliya pokupopia ondaka “ouye uno,” ipopia otyipuka ouye ukahi, neetyi ovanthu vatyo vekahi. (2Ti 4:10) Huku etyi ahinda omphango Yovitumino wapakeleko ouye vamwe vati omuvo wova Isilayeli no wova Sundaa. Mokonda yotyilikutila tya Sesusi Kilisitu Huku wahimbika ouye omukwavo, omu muna haunene ewaneno Liovakwa-Kilisitu ovalembulwa. Otyo tyahimbika ouye omukwavo, ouye wokuna ovipuka viotyotyili viokwapopilwe momphango Yovitumino. Ondaka oyo tupu ipopia ovipuka viali-ko neevi vili-ko hono neevi vikeya-ko. — Mt 24:3; Mku 4:19; Lo 12:2; 1Ko 10:11.

• Ova Faliseu.

  Elongeso limwe lialiko potyita tyo tete. Kavatukile momuhoko wovanakwa mahi vetyihole tyokweendela movitumino no moupuka umwe vala oututu, kuvo oviso novitumino otyipuka tyike vala. (Mt 23:23) Ova Faliseu ankho kavahande oviso viova Ngeleku, vatuminine vakwavo mokonda vei nawa Ovitumino noviso. (Mt 23:2-6) Vamwe puvo vali vombonge onene. Ankho kavahande Sesusi mokonda uundapa motyasapalo, ukala novanthu valinga ovivi, novatanthi vomalilimu. Tupu vamwe vali Ovakwa-Kilisitu, umwe pwoovo o Saulu woko Talusu. — Mt 9:11; 12:14; Mku 7:5; Lu 6:2; Ovi 26:5.

• Ovalanduli va Helonde.

  Tupu vatiwa ova Helonde. Ovanthu vamwe ankho vahula ku Helonde valinga okapungulula omihoko nomihoko, pweetyi Helonde atumina apakwa-ko no Loma. Mokutala ova Sanduseu vali vamwe pwoovo. Ovo yatyo vokwahula ku Helonde, velipakele kumwe nova Faliseu vaipaese Sesusi. — Mku 3:6.

• Ova Mendia; Mendia.

  Ovanthu vokwatukile mu Mandai omona wa Safee; vakalaile mofika yonomphunda mboko Irão pahe yali otyilongo tyova Mendia. Ova Mendia velipakele kumwe nova Mbambilonia avalwisa ova Asilia. Pomuvo opo, o Pelesa yali epunda-umbo lyo Mendia, mahi etyi pahe Silu alungulula, o Mendia aihonyo no Pelesa aitiwa o Mendo-Pelesa ngayo itumina ovilongo ovikwavo. Menima 539 P.K.E., aitokesa-po o Neo-Mbambilonia yali kokutumina ovilongo ovikwavo. Ova Mendia vamwe vali mo Selusalei monthiki yo Pendekosite menima 33 pononthiki mba Kilisitu. (Nda 5:28, 31; Ovi 2:9) — Tala Ovipuka Viapotoyolwa B9.

• Ovana va Alau.

  Vatuka mu Alau omutekula wa Levii, Alau wali omunthu wo tete wakoyelwe akale omunene-nakwa ngeetyi Ovitumino viapelwe Mwisesi vipopia. Ovana va Alau vali ovanakwa vaundapele mekaka liefendelo no mondywo ya Huku. — 1Eh 23:28.

• Ova Netineu.

  Ovanthu vamwe veheva Isilayeli vaundapele mondywo ya Huku. Ondaka yatyo oyo, mo Hembeleu okuti “Vana Vaawa,” ngokuti ovanthu vaawa umwe vaundape mondywo ya Huku. Mokutala ova Netineu vatukile mova Simbeaa ava Susuwee “alingile ovatiavi vononkhunyi, evelingi ovatapi vomeva, vatapaile ovanthu aveho, nomutala wa Siovaa wovilikutila.” — Sus 9:23, 27; 1Eh 9:2; Esi 8:17.

• Ovanongo ova Epikuleu.

  O vokwapolele tyomunongo umwe omu Ngeleku utiwa o Epikulu (341-270 P.K.E.). Valongesa okuti ovanthu vatungwa mwene valinge vala etyi vahanda. — Ovi 17:18.

• Ova Samaliya.

  Ondaka oyo po tete ankho ipopia ova Isilayeli vomihoko 10 vouhamba wo kombanda. Mahi etyi ova Asilia vatambula-ko o Samaliya menima 740 P.K.E., ondaka oyo pahe aipopi nononthunda-vilongo vaetwa nova Asilia. Tyina tyiti pononthiki mba Sesusi, ondaka oyo pahe ayahapopi vali omuhoko wovanthu, ine hamwe otyilongo, mahi pahe ankho ipopia ovanthu velongeso limwe likala ponthele pomapunda-umbo aliko kohale, o Sikei no Samaliya. Ovo, ovipuka vimwe vetavela vielikalela unene no viova Sundaa. — Swa 8:48.

• Ova Sanduseu.

  Elongeso limwe lialiko ankho liiwe unene liova Sundaa, mwali vala ovahona novanakwa vena otyilinga otyinene mondywo ya Huku. Ovo yatyo ankho kavetavela oviso viavo Faliseu novipuka vimwe valongesa. Kavetavela okuti kuna etutilo nii vala okuti kuna onoandyu. Ankho veyele Sesusi. — Mt 16:1; Ovi 23:8.

• Ova Sitoiku.

  Ovanthu ovanongo vetavela okuti omunthu opo akale nehambu ketavela vala kovipuka aviho, una okusoka nawa oñgeni ovipuka vikahi. Kuvo omunthu omunongo, wati vala eheihamenwa, ahahambukwa. — Ovi 17:18.

• Ovayungi Vohamba.

  Mo Loma ovanthu ovo vokuyunga ohamba valingile umwe ovanene, vati umwe ovo vetyivila okwaamena omunene wotyilongo, ovo tupu vapondola okumutokesako. — Flp 1:13.

• Oviawa viokankhenda.

  Otyetyi tyipewa ou wehulilwa. Movihonekwa vyo Hembeleu katyapopilwe-mo nawa-nawa, mahi Movitumino tyapopilwe umwe nawa etyi ova Isilayeli vena okulingila ava vahepa. — Mt 6:2.

• Oviawa viou wetyipanga.

  Otyaawa omunthu alinga kotyali tyae, mahi pokutyipanga aane. — Le 23:38; 1Sa 1:21.

• Ovihonekwa.

  Ondaka oyo ipopia ovihonekwa vikola Viondaka ya Huku. Ondaka “ovihonekwa” ivasiwa vala Movihonekwa Viovakwa-Kilisitu mo Ngeleku. — Lu 24:27; 2Ti 3:16.

• Ovika-huku viomeumbo; Onotelafii.

  Ovika-huku vionombunga mbumwe oku vatala etyi tyikeya komutwe. (Ise 21:21) Ovika-huku vimwe ovinene vilifwe novanthu, evi ovikwavo ovipii vali. (Ehi 31:34; 1Sa 19:13, 16) Ovanongo vokuheya apa pakalailwe vamona okuti omunthu una wokuna ovilolo viomeumbo, oe ukala omphinga mombunga. (Tyipondola otyo Lakele avakelele ovika-huku vya he.) Mahi mokutala ova Isilayeli hatyo valingilaile namphila pononthiki mbovakoyesi no pononthiki mbonohamba kwali ovanthu vali novika-huku viomeumbo. Ovika-huku viatyo ovio, navio ovio ohamba Sosiya ahanyaunine-ko. — Vak 17:5; 2Oh 23:24; Os 3:4.

• Ovilinga vikola.

  Ovilinga viayemba umwe vala kokufenda Huku. — Lo 12:1; Eho 7:15.

• Ovilulu.

  Onomphepo onombi mbuna vali ononkhono kovanthu. Momukanda Ehimbikilo 6:2 mbatiwa “ovana va Huku yotyotyili,” mu Sunda 6 mbatiwa “onoandyu,” mahi kambatungilwe onondingavivi-ale; mwene ombo mbelityitula ambulingi onondyale mba Huku pokwehemutavelele pononthiki mba Nowee, ambulipake kumwe na Satanasi ambutyitukila-po Siovaa. — Epa 32:17; Lu 8:30; Ovi 16:16; Tia 2:19.

• Ovimphunia-mphunia.

  Ovinyama ovitutu vieenda ovinyingi viilauka. Movitumino viapelwe Mwisesi viatilwe ovinyama viasukuka vitavela okulia. Tyina ovimphunia-mphunia ovinyingi-nyingi vilia atyiho viavasa, avinyono umwe unene, tyitiwa ovihuna, elamba. — Oku 10:14; Mt 3:4.

• Ovinepo ovivi.

  Tala pokwati OUHAYO WOKULIHANDA.

• Ovipuka vyo tete.

  Ovikuna viokutetekela okuteywa; otyipuka omunthu atetekela okumona, hamwe okuteya. Siovaa waitile ova Isilayeli vemupe ovipuka aviho vatetekela okumona tyilinge omunthu, tyilinge otyinyama, tyilinge ovikuna. Kohale ova Isilayeli ankho vapakula ovipuka vyo tete ku Huku potyipito Tyonombolo Mbahaile onkhiso, no po Pendekosite. Ondaka “ovipuka vyo tete” tupu yapopiwa ngomuhe pokupopia Kilisitu novalanduli vae ovalembulwa. — 1Ko 15:23; Omb 15:21; Omih 3:9; Eho 14:4.

• Ovitumino.

  Tyina yahimbika noletela onene, ipopia Ovitumino viapelwe Mwisesi, okuti hatyo omikanda vitano vyo tete vyo Mbimbiliya. Tyina yahimbika noletela onthutu, pamwe tyipondola Povitumino viapelwe Mwisesi ipopia-po vala tyike, okuti hatyo, onondunge tupola motyitumino tyatyo otyo. — Omb 15:16; Epa 4:8; Mt 7:12; Nga 3:24.

• Ovitumino vya Mwisesi.

  Ovitumino Siovaa apele ova Isilayeli evi Mwisesi evetolelele moluhandya lwo Sinai menima 1513 P.K.E. Omikanda vitano vyo tete Viombimbiliya pamwe vitiwa Ovitumino. — Sus 23:6; Lu 24:44.

• Oviwa ovipe.

  Movihonekwa Viovakwa-Kilisitu mo Ngeleku viatiwa oviwa ovipe Viouhamba wa Huku, oviwa ovipe vieyovo, viyovola ou uyumba onthumbi mu Sesusi Kilisitu. — Lu 4:18, 43; Ovi 5:42; Eho 14:6.

• Oviyukilo viotupia.

  Ovityiyo vialingwa noolu, pamwe opalata, pamwe otyitasu, apa vayokela ombao yokunika nawa mekaka liefendelo no mondywo ya Huku, ovio vapola navio omakala komutala wovilikutila, netwe kotyinyanga tyokandiyelo konomphalavinga koolu. Tupu vitiwa ovityiyo vietwe. — Oku 37:23; 2Eh 26:19; Heb 9:4.

P

• Pelesa; ova Pelesa.

  O Pelesa otyilongo, ova Pelesa ovanthu vatyo, popanyingi vatumbaulilwa kumwe nova Mendia. Mokutala ova Pelesa ankho velii nova Mendia. Ova Pelesa po tete vakalele koutakelo, okuyemba kombwelo mo Ilau. Ova Pelesa vatumininwe na Silu Omunene (vamwe vokwatanga valiko kohale vati, Silu tate yae wali omu Pelesa ina omu Mendia), ova Pelesa vatuminine ova Mendia, pahe atyiti navo nova Mendia avatumina ovilongo ovikwavo. Menima 539 P.K.E. Silu anyingila mepunda-umbo lyo Mbambilonia alilingi liae, ova Sundaa vokwali koupika avakondoka kotyilongo tyavo. O Pelesa yatuminine okuhimbikila kondongi yo Indu koutundilo atee kelunga Engeu koutakelo. Ova Sundaa vatumininwe nova Pelesa atee menima 331 P.K.E., pweetyi Alesandele Omunene alwisa ova Pelesa avatiliko. Ndaniyele wapopile outumini wo Pelesa movililenya amwene, omukanda wa Esitala no wa Neemiya nowa Sitele tupu navio vipopia outumini oo. (Esi 1:1; Nda 5:28) — Tala Ovipuka Viapotoyolwa B9.

• Pendekosite.

  Otyipito tya vali povipito vitatu ovalume aveho ova Sundaa vahapondola okukamba tyilingilwa mo Selusalei. Ondaka Pendekosite okuti “(Onthiki) 50.” Movihonekwa Viovakwa-Kilisitu mo Ngeleku otyipito otyo tyatiwa o Pendekosite, movihonekwa vyo Hembeleu tyatiwa Otyipito Tyokuteya, Otyipito Tyonosimanu. Vavalula okuhimbikila monthiki 16 ya Nisaa, tyina palamba ononthiki 50 avalingi otyipito. — Oku 23:16; 34:22; Ovi 2:1.

• Pim.

  Ombongo ova Filisitiya ankho vafetesa tyina vamalipikilako omunthu otyivela tyae. Vokuheya apa pakalaile ovanthu vavasa omamanya omanyingi mo Isilayeli kwahonaikwa onoletela mbelaka lyo Hembeleu yo kohale, mbupopia o “pim;” omamanya atyo alema 7.8 g. — 1Sa 13:20, 21.

• Porneia.

  — Tala pokwati OUHAYO WOKULIHANDA.

• Pulii.

  Otyipito tyilingwa like menima monthiki 14 atee 15 ya Andale. Ova Sundaa valingaile otyipito otyo vahinangele onthiki vayovolwa etyi maa vaipawa pononthiki mbonkhai-hamba Sitele. Ondaka oyo purím okuti “elao” mahi kayatukile melaka lyo Hembeleu. Otyipito tyo Pulii, Otyipito Tyelao, tyatuka apa Hamaa akatalesile no Puli (Elao) atale onthiki maipaa ova Sundaa. — Sit 3:7; 9:26.

S

• Sakoo.

  Omona woo Isake na Lembeka. Etyi pakala Huku emuluku enyina ekwavo Isilayeli, oe wali ohongoi yova Isilayeli (pahe konyima oku vakatilwe ova Sundaa). Oe ohe yovana 12, ava vokwatilwe navo no vokwatuka muvo omihoko 12 viova Isilayeli. Tupu enyina olio lipopia ovanthu vo Isilayeli. — Ehi 32:28; Mt 22:32.

• Satanasi.

  Ondaka yatuka mo Hembeleu ipopia okuti “Ondyale.” Momalaka okonthuko ipopia, Satanasi Eliapu, ondyale onene ya Huku. — Som 1:6; Mt 4:10; Eho 12:9.

• Selaa.

  Ondaka ipopiwa novaimbi ivasiwa momukanda Oviimbo no wa Hambakuke. Tyipondola ipopia okutalama-po pokwimba, omunthu nkhele asoke kweetyi otyiimbo tyipopia. Mo Septuaginta mo Ngeleku ondaka oyo yatiwa diápsalma, tyihangununa “okutalama-po kapii.” — Ovii 3:4; Hab 3:3.

• Sembate.

  Etyi ova Sundaa vatunda koukonde ko Mbambilonia, ongootyo vahambika okutumbula ohanyi 11 pokuvalulila ovilinga vikola, mahi mokuvalula kwovaunyingi oyo ankho ohanyi ya tano. Ihimbikila pokati kohanyi ya Kupupu (Janeiro) aikapwila pokati ka Hitandyila (Fevereiro). (Sak 1:7) — Tala Ovipuka Viapotoyolwa B15.

• Seminite.

  Ondaka yovaimbi ihangununa okuti “etyinana,” mokutala ipopia okwimbila pombwelo. Tyina ipopia evi viokuhika, ondaka oyo mokutala ipopia okuhikila pombwelo otyipuka tyiivala nawa. Tyina ipopia oviimbo, tyipondola ipopia omunthu wiimbila pombwelo etyi tyiivala nawa, otyo alandulila mweetyi tyikahi nokuhikwa. — 1Eh 15:21; Ovii 6:Onondaka mbokwahimbika; Ovii 12:Onondaka mbokwahimbika.

• Sendutuu.

  Ondaka yeheiwe nawa etyi ipopia yapopiwa ponondaka mbokwahimbika omukanda Oviimbo 39, 62, no 77. Onondaka ombo mokutala mbululika ovaimbi oñgeni vena okwiimba, ine hamwe oñgeni vena okuhika otyiimbo tyatyo. Kwali omwiimbi umwe utiwa o Sendutuu watukile mu Levii, mokutala oviimbo viatyo ovio oe vipopia, okuti hatyo, opo vipopia ovana vae.

• Seol.

  Ondaka yo Hembeleu, mo Ngeleku o “Hades.” Pokweipitiya yatiwa “Ondyembo; o Kondyembo.” — Ehi 37:35; Ovii 16:10; Ovi 2:31 (okatoi).

• Sesale.

  Olio liali enyina liomuhoko umwe, mahi pahe alilingi enyina liovatumini vomo Loma. Ovo Angusitu, na Timbeliu na Kalaundiu vatumbulwa umwe Mombimbiliya, tupu na Nelu olio atumbulilwe namali ahatumbulilwe Mombimbiliya. Ondaka “Sesale” yapopiwa Movihonekwa Viovakwa-Kilisitu mo Ngeleku pokupopia ovatumini vovilongo. — Mku 12:17; Ovi 25:12.

• Seusi.

  O Huku yova Ngeleku vamwe, omunene. Mbalanambee ko Lisitala vemutile o Seusi. Ovipuka vimwe viahonaikwa viavasiwa ko Lisitala, vipopia ‘ovanakwa vamwe vatiwa ova Seusi,’ na ‘Seusi utiwa o huku-ekumbi.’ Mombapolo omu Paulu aendelele itunda ko Malata, ankho ina ovilolo “Ovana va Seusi,” ovo ovana vevali vatiwa ovo Kasitu na Polusi. — Ovi 14:12; 28:11.

• Sileyande.

  Otyilongo tyimwe tyavova (tyanina) nawa tyahula koutundilo Ondongi yo Solondau, tyahimbikila kombanda Yelola lyo Samboke atyikehikila kombwelo yalio. Pamwe ondaka oyo ipopia otyilongo atyiho tyova Isilayeli tyahula koutundilo ondongi yo Solondau, omu mwakalaile vomuhoko wa Lumbe, no wa Ngande, novana vamwe va Manasesi. (Omb 32:1; Sus 12:2; 2Oh 10:33) — Tala Ovipuka Viapotoyolwa B4.

• Silia; Ova Silia.

  — Tala pokwati ALAA; OVA ALAA.

• Siliti.

  Omaiva evali omanene okwatunda melunga lyo Limbia kombanda yo Afilika. Kohale ovanthu vokutaha onombapolo vali unene nowoma wokukwata melunga olio mokonda lina unene ononthunthu mbeheke, mbahakala vala omphangu ike, mbuti hono mbakahula oku hono mbakahula oku. (Ovi 27:17) — Tala Ovipuka Viapotoyolwa B13.

• Siovaa.

  Ongootyo tyapitiywa o Tetragrama Molunyaneka (oneletela ononkhwana melaka lyo Hembeleu mbupopia enyina lya Huku), enyina olio Mombimbiya omu lili-mo tyikalamba 7.000. — Tala Ovipuka Viapotoyolwa A4 no po A5.

• Sitite.

  Ondaka ipopiwa novaimbi yeheiwe nawa etyi ipopia, namali mokutala yatuka mondaka yo Hembeleu gath. Vamwe vati ondaka oyo ipopiwa poviimbo vipopia okunyunga ovinyu, mokonda ondaka gath ipopia apa pahininwa onouva. — Ovii 81:Onondaka mbokwahimbika.

• Siva.

  Etyi ova Sundaa vatunda koukonde ko Mbambilonia, ongootyo vahambika okutumbula ohanyi ya tatu pokuvalulila ovilinga vikola, mahi mokuvalula kwovaunyingi oyo ohanyi yatyinana. Ihimbikila pokati kohanyi ya Kapepo (Maio) aikapwila pokati ka Pepo Linene (Junho). (Esi 8:9) — Tala Ovipuka Viapotoyolwa B15.

• Sive.

  Enyina liatyo mwene liohanyi ya vali mokuvalula kwova Sundaa, mokuvalula kwovaunyingi ohanyi ya tyinana. Ohanyi ankho ivalulwa okuhimbikila pokati kohanyi ya Tyikukutu (Abril) atee pokati kohanyi ya Kapepo (Maio). Mo Talumunde yo Sundaa yatiwa Iyale, no movipuka ovikwavo ova Sundaa valingaile etyi vatunda koukonde ko Mbambilonia. (1Oh 6:37) — Tala Ovipuka Viapotoyolwa B15.

• Siyau; Omphunda yo Siyau.

  Enyina liepunda-umbo liova Sembuseu, ankho likala ko Selusalei okutala kombanda. Etyi Ndaviti atambula-ko epunda-umbo olio, atungu-mo ombala yae, pahe alitiwa “epunda-umbo lya Ndaviti.” (2Sa 5:7, 9) Etyi Ndaviti atwala-ko otyikasa tyomphangu, omphunda yo Siyau ailingi omphunda ya Siovaa ikola. Konyima pahe enyina olio Siyau alipopi umwe ohika yatyo aiho yondywo ya Huku Komphunda yo Moliaa. Movihonekwa Viovakwa-Kilisitu mo Ngeleku, yapopiwa-mo unene ngomuhe. — 2Sa 5:7, 9.

• Sumbileu.

  Enima 50. Ova Isilayeli vahimbika okupitaisa-po omanima 50 avalingi o Sumbileu etyi vanyingila Motyilongo Tyatolelwe. Menima lyo Sumbileu kavalimi, ovapika ova Hembelu vayovoka. Omaheke okwapingailwe aalandeswa, pahe akondolwa ku vahekulu. Enima lyo Sumbileu, otyipito umwe enima aliho, enima lieyovo, ova Isilayeli aveho vakondoka vali momukalelo Huku evehandelele po tete. — Le 25:10.

• Sundaa.

  Omona wa kwana woo Sakoo na Leya. Etyi Sakoo eli poula wae pahe mayeke omwenyo, wapopile okuti omutumini omunene makatumina apeho, makatuka mu Sundaa. Sesusi watukile mu Sundaa. Enyina olio tupu lipopia vala omuhoko watyo wa Sundaa, nouhamba wo Sundaa. Ouhamba watyo oo watilwe owo kombwelo, mwatile nova Isilayeli vokwatuka mu Sundaa, no vokwatuka mu Mbesamii, novanakwa, no vokwatuka mu Levii. Ofika yo Sundaa yahulile kombwelo yotyilongo oku kwali o Selusalei nondywo ya Huku. — Ehi 29:35; 49:10; 1Oh 4:20; Heb 7:14.

T

• Talatalu.

  Movihonekwa Viovakwa-Kilisitu mo Ngeleku ipopia okupakwa unene pombwelo, okukala umwe ngatyina uli mokaleya, omu mwapakwa onoandyu mbokwehetavelele pononthiki mba Nowee. Omukanda wa 2 Petulu 2:4, upopia ondaka tartaróo (“okuyumbwa mo Talatalu”) katyilikesa okuti “onoandyu mbokwalingile onkhali” mbayumbwa mo Talatalu yokupopiwa novanthu vahafende Huku (vokuti okaleya keli pohi mwanthikovela mukala ovika-huku viahasilivila). Tyilekesa okuti Huku wembupola keulu embupolo ovilinga viambo embutahela pano pohi, wembupaka unene pombwelo menthiki liokuhamono vali nawa-nawa etyi Huku ahanda. Ovihonekwa tupu vipopia okuti enthiki olio, oliokukahanywa-ko ngeetyi matyikalingwa Satanasi Eliapu omutumini wambo. Naina o Talatalu ilekesa etyi onoandyu mbokwatyitukila-po Huku mbalingwa. O Talatalu “hetoto-ko liaya kohi” liokwapopiwa momukanda Eholololo 20:1-3.

• Tamusi.

  (1) O huku yomatutu ovakai ova Hembeleu vokwatyitukilile-po Huku valililile mo Selusalei. Vamwe vati Tamusi wali ohamba, etyi pahe anyima atyilingi otyika-huku. Monotesitu mbova Mesopotamia enyina Tamusi tupu veliti Dumúzi, vati omulume wotyika-huku tyolutyito tyomukai tyitiwa Inanna (ova Mbambilonia vetyiti o Isitale). (Ise 8:14) (2) Etyi ova Sundaa vatunda koukonde ko Mbambilonia otyo vatumbulile ngootyo ohanyi ya kwana mokuvalulila ovilinga vikola, mahi mokuvalula kwovanyingi oyo ohanyi 10. Ihimbikila pokati kohanyi ya Pepo Linene (Junho) aikapwila pokati kohanyi ya Kakwenye (Julho). — Tala Ovipuka Viapotoyolwa B15.

• Tembete.

  Etyi ova Sundaa vatunda koukonde ko Mbambilonia otyo vatumbulile ngootyo ohanyi ya 10 mokuvalulila ovilinga vikola, mahi kovanyingi ohanyi ya kwana. Ihimbikila pokati kohanyi ya Kayovo (Dezembro) atee pokati kohanyi ya Kupupu (Janeiro). Popanyingi yatiwa vala “ohanyi ya 10.” (Sit 2:16) — Tala Ovipuka Viapotoyolwa B15.

• Tisili.

  —Tala pokwati ETANII, Novipuka Viapotoyolwa B15.

V

• Viokukwata ovipuka.

  Ovipuka vilingwa noolu, mokutala vielifwa novityiyo vietwe, ovanthu vaundapele navio mekaka liefendelo no mondywo ya Huku opo vanyime navio omutemo wovikandiyelo. — Oku 37:23.

• Viokunyima omutemo.

  Ovipuka viaundapailwe navio mekaka liefendelo, no mondywo ya Huku, vimwe vialingailwe noolu pamwe opalata. Mokutala oviokunyima ovikandiyelo, vilinga ngoti otisola ondaande. — 2Oh 25:14.

• Viokwapundwa.

  Ovipuka viapolwa konondyale tyilinge ovinyama tyilinge ovityuma ine ovipuka ovikwavo vali. — Sus 7:21; 22:8; Heb 7:4.

• Vokukoya onomphela.

  Ovalume Siovaa akoyele vayovole ovanthu vae pweetyi mo Isilayeli mwehenekale onohamba. — Vak 2:16.

• Vovitumino.

  Pweetyi o Mbambilonia itumina, ovanthu ovo vatiwa o vovitumino, ovanthu vamwe vaundapele momapunda-umbo vei nawa ovitumino, mahi tyiti umwe ou utumina apa ou utumina apa. Movilongo o Loma yatumainine, ovanthu ovo, ovaluliki votyilongo. Otyilinga tyavo okululika ovipuka, okuyunga nawa onombongo mbotyilongo, nokupopia etyi tyilingwa ou wapikiya ovitumino, nokutuma umwe alingwe etyi tyatolwa. — Nda 3:2; Ovi 16:20.

W

• Wokupondakana Kilisitu.

  Ondaka oyo mo Ngeleku ipopia ovipuka vivali. Ipopia ou wehetavela, waanya Kilisitu. Tupu ipopia Kilisitu younkhembi, omunthu uliti ame Kilisitu. Ipopia ovanthu aveho, nomaongano aeho vakemba vati vakalelapo Kilisitu, hamwe avati o Mesiya, vehetavela Kilisitu novalongwa vae, ovanthu ngoovo tyatamo umwe okuveti o vokupondakana Kilisitu. — 1Swa 2:22.

• Wokutalela kononthungululu.

  Omunthu utala kekumbi, no kononthungululu, no kohanyi, opo atale etyi matyiya. — Nda 2:27; Mt 2:1.

• Wokutumbula-mo.

  Ondaka yapopiwa momukanda Oviimbo. Mo Hembeleu ondaka oyo, mokutala ipopia omunthu uhinda oviimbo, ululika vokwiimba, ulongesa vokwatuka mu Levii ovaimbi, ukalela umwe komutwe no vokwiimbila pounyingi. Onombimbiliya mbumwe mbuti, “omunene watyo wovaimbi,” “omutumbuli pokwiimba.” — Ovii 4:Onondaka mbokwahimbika; 5:Onondaka mbokwahimbika.