Isaías

 2 Den e parti final di e dianan,*

e seru riba kua e kas di Yehova ta situá

lo ta firmemente establesí, mas haltu ku tur e serunan.

Lo e ser hisá mas haltu ku e seritunan,

i tur nashon lo basha bai einan.

“Ban; laga nos bai na* e seru di Yehova;

laga nos ban kas di e Dios di Yákòb.

Lo e siña nos su boluntat,*

i nos lo biba manera e ke pa nos biba.”*

For di Siòn, lo anunsiá lei,*

i for di Herúsalèm, lo anunsiá e palabranan di Yehova.

 4 Dios lo sirbi komo hues pa e nashonnan,

i lo e korigí* tur kos pa benefisiá e pueblonan.

Nan lo bati nan spadanan i traha plug ku nan;

ku nan spernan, nan lo traha kuchú pa snui mata.

Nashon lo no hisa spada pa bringa kontra otro nashon,

ni nan lo no siña pa bringa den guera mas.

 5 Desendientenan di Yákòb, bini!

Laga nos kana den e lus di Yehova.

 6 Dios, bo a bandoná bo pueblo, e desendientenan di Yákòb,

pasobra nan a tuma hopi kustumber for di Oriente.

Nan ta praktiká magia meskos ku e filisteonan,

i entre nan, tin hopi yu di estranhero.

 7 Nan pais ta yen di plata i oro,

i no por konta tur nan tesoronan.

Nan pais ta yen di kabai,

i nan tin garoshi di guera pa no kaba.

Nan ta bùig pa kos ku nan mes a traha;

sí, nan ta bùig pa kos ku nan mes man a traha.

 9 Di e manera ei, hende ta rebahá nan mes, sí, nan ta humiá nan mes,

i bo no por pordoná nan.

10 Pa motibu di Yehova su furia spantoso

i su grandesa glorioso,

nan lo drenta den kueba den baranka; nan lo koba buraku den tera i skonde den nan.

11 Hende arogante lo ser humiá,

i hende orguyoso lo ser rebahá.

E dia ei, lo e kastigá tur hende ku ta orguyoso i arogante.

Lo e kastigá tur hende, sea ku nan ta hende importante òf nò.

13 Lo e kastigá tur palu di seda di Líbanòn ku ta haltu i halsá,

tur palu di eik di Básan,

14 tur seru halsá,

tur seritu haltu,

15 tur toren haltu i tur muraya fortifiká,

16 tur barku di Társis

i tur boto luhoso.

17 Hende orguyoso lo ser rebahá,

i hende arogante lo ser humiá.

19 Hende lo drenta den e kuebanan den baranka

i den e burakunan den suela

pa motibu di Yehova su furia spantoso

i su grandesa glorioso

ora e pone tera tembla i e hendenan haña miedu.

20 E dia ei, e hendenan lo kohe nan diosnan di plata i di oro ku no ta bal nada

i ku nan a traha pa nan bùig dilanti di dje,

i nan lo tira nan afó kaminda raton di mondi* i raton djanochi ta biba.

21 Nan lo drenta den e kuebanan den baranka,

i nan lo skonde entre e barankanan

pa motibu di Yehova su furia spantoso

i su grandesa glorioso

ora e pone tera tembla i e hendenan haña miedu.

22 Pa boso mes bon, stòp di konfia den hende;

nan no ta nada mas ku un rosea.*