Revelashon

7 Despues di esaki mi a mira kuater angel pará na e kuater skinanan di tera, ku e kuater bientunan di tera duru tené, di manera ku bientu no por a supla riba tera ni riba laman ni riba ningun palu. 2 I mi a mira un otro angel subi for di ost,* i e tabatin un seyo di e Dios bibu den su man; i na bos haltu el a yama e kuater angelnan ku a haña pèrmit pa hasi daño na tera i na laman 3 i a bisa nan: “No hasi daño na tera ni na laman ni na e palunan, sino te ora nos kaba di pone seyo riba frenta di e esklabonan di nos Dios.”

4 I mi a tende e kantidat di esnan ku a risibí e seyo: 144.000, seyá for di tur tribu di e yunan di Israel:

5 Di e tribu di Huda, 12.000 a risibí e seyo;

di e tribu di Ruben, 12.000;

di e tribu di Gad, 12.000;

6 di e tribu di Asher, 12.000;

di e tribu di Naftalí, 12.000;

di e tribu di Manases, 12.000;

7 di e tribu di Simeon, 12.000;

di e tribu di Levi, 12.000;

di e tribu di Isakar, 12.000;

8 di e tribu di Zebulon, 12.000;

di e tribu di Yosef, 12.000;

di e tribu di Benyamin, 12.000 a risibí e seyo.

9 Despues di e kosnan akí mi a wak, i ata un multitut grandi ku ningun hende no por a konta, for di tur nashon, tribu, pueblo i idioma, i nan tabata pará dilanti di e trono i dilanti di e Lamchi, bistí na paña largu blanku i ku rama di palma den nan man. 10 I nan tabata grita: “Nos debe nos salbashon na Dios, kende ta sintá riba e trono, i na e Lamchi!”

11 I tur e angelnan tabata pará rònt di e trono, rònt di e ansianonan i di e kuater kriaturanan spiritual, i nan a kai na rudia dilanti di e trono i a adorá Dios, 12 bisando: “Amèn! Alabansa, gloria, sabiduria, gradisimentu, onor, poder i forsa ta pertenesé na nos Dios pa tur eternidat. Amèn.”

13 Awor un di e ansianonan a puntra mi: “Ta ken esnan bistí na paña largu blanku ta, i di unda nan a bini?” 14 Anto mesora mi a bis’é: “Mi señor, ta bo ta esun ku sa esaki.” I el a bisa mi: “Nan ta esnan ku a sobrebibí e tribulashon grandi, i nan a laba nan pañanan largu i a hasi nan blanku den sanger di e Lamchi. 15 Ta p’esei nan ta dilanti di e trono di Dios; i nan ta rindi sirbishi sagrado na dje di dia i anochi den su tèmpel; i Esun sintá riba e trono lo span su tènt riba nan. 16 Nan lo no haña hamber ni set mas, ni solo lo no kima nan ni kalor lo no kaba ku nan, 17 pasobra e Lamchi, ku ta banda di e trono, lo ta nan wardadó, i lo e guia nan na fuentenan di awa di bida. I Dios lo seka tur lágrima for di nan wowo.”