Capítulo 1

Revelacion—su culminacion feliz!

 1. Con nos sa cu Dios kier pa nos ser feliz?

UN REVELACION DUNÁ NA JUAN—e buki emocionante aki di Bijbel ta híbanos ne culminacion feliz dje Santa Scritura. Pakico nos ta bisa “feliz”? Wel, e Autor dje Bijbel ta ser yamá “e Dios feliz,” cu ta confia e “glorioso bon nobo” na hende cu ta stimé. E kier pa nos ser feliz també. P’sei, na principio di Revelacion e ta dúnanos e siguranza cu: “Feliz ta esun cu ta leza . . . palabra dje profecía aki.” Nos ta ser bisá den su capítulo final: “Feliz ta hende cu ta warda palabra di profecía dje rol aki.”—1 Timoteo 1:11; Revelacion 1:3; 22:7.

 2. Kico nos tin cu haci pa nos haya felicidad mediante e buki di Revelacion?

² Con nos ta haya felicidad lezando e buki di Revelacion? Nos ta hayé buscando e nificacion di siñal, of símbolo bibo, i andando di acuerdo cu nan. E historia turbulento di humanidad lo yega un culminacion catastrófico pronto, ora Dios i Jesucristo ta ehecuta huicio riba e sistema malbado djawe i ta reemplazé cu un “cielo nobo i tera nobo,” unda ni “morto lo no existi mas.” (Revelacion 21:1, 4) Nos tur no kier biba den un mundo nobo asina, den berdadero paz i siguridad? Nos por si nos ta edifica nos fe den un estudio dje Palabra di Dios, incluyendo e profecía conmovedor di Revelacion.

Apocalipsis—kico esei tá?

 3. Kico hopi hende ta pensa cu Apocalipsis i Armagedón kier men?

³ Revelacion no ta ser yamá Apocalipsis també? Sí, pasobra “revelacion” ta e traduccion na papiamento dje palabra a·po·kaʹly·psis dje texto griego. Hopi hende ta kere cu Apocalipsis ta e gera nuclear cu ta destrui mundo. Den un stad den Texas, EUA, unda nan tabata traha un gran cantidad di bomba nuclear, hende religioso tabatin e costumber di bisa, “Nos lo ser destruí promé.” Segun informe, clero den e becindario ei tabata “convencí cu Armagedón no solamente ta inevitable sino també ta cerca, i cu e bataya final entre forza di bon i di malu, entre Dios i Satanás, lo tuma lugar den forma di holocausto nuclear.”a

 4. Kico e palabra “apocalipsis” realmente kier men, i pakico e último buki di Bijbel ta ser titulá apropiadamente “Revelacion”?

⁴ Pero, realmente, kico ta apocalipsis? Aunque diccionario ta duna su nificacion usando palabra tal como “cataclismo cósmico cercano,” e palabra griego a·po·kaʹly·psis básicamente kier men “kita belo” of “kita tapa.” P’sei, e último buki di Bijbel ta ser titulá correctamente “Revelacion.” Den dje, nos ta haya no simplemente un mensahe fatalista di destruccion mundial, sino un revelacion di berdad divino cu mester edifica den nos curazón un speranza radiante i un fe inmovible.

 5. (a) Ken lo ser destruí den Armagedón, i ken lo sobrebiba? (b) Cua gran futuro ta spera sobrebibiente di Armagedón?

⁵ Ta cierto cu Armagedón ta ser pintá den e último buki di Bijbel como “e gera dje gran dia di Dios Todopoderoso.” (Revelacion 16:14, 16) Pero esei lo ta hopi diferente cu un holocausto nuclear! Tal holocausto probablemente lo nifica exterminacion di tur bida riba tera. Pero al contrario, e Palabra di Dios ta dúnanos e siguranza feliz di cu solamente opositor malbado di Dios lo ser destruí—door di forza bao di control di Dios. (Salmo 37:9, 10; 145:20) Un multitud grandi di hende, di tur nacion, lo sobrebiba e culminacion dje huicio divino na Armagedón. Anto Cristo Jesús lo pastorea i guíanan na bida eterna den un tera paradísico. Bo no kier hayábo hunto cu nan? Felizmente, Revelacion ta mustra cu esei ta posibel!—Revelacion 7:9, 14, 17.

Scudriñando secreto divino

 6. Den pasado, cua buki Testigo di Jehova a publica pa tira luz riba Revelacion?

⁶ Ayá na 1917 e Sociedad Watch Tower a publica na inglés e buki E misterio terminá. Esei tabata un splicacion di cada versículo dje buki bíblico di Ezekiel i Revelacion. Anto, segun cu sosodimento mundial a sigi desaroya den cumplimento di profecía bíblica, nan a prepara un obra oportuno di dos volumen titulá Luz, cu a presenta na 1930. Esei a ofrece un estudio mas moderno di Revelacion. Luz a sigi ‘luzá pa hende husto,’ di manera cu na 1963 Testigo di Jehova a publica na inglés e buki di 704 bladji “Babilonia e Grandi a cai!” e Reino di Dios ta reina! Esei a duna hopi detaye histórico dje subimento i caimento di Babilonia e Grandi, e imperio mundial di religion falso, i a culmina cu un splicacion dje último nuebe capítulo di Revelacion. Mientras cu e ‘berea di hende husto a bira mas cla,’ specialmente en cuanto actividad dje congregacion, na 1971 tabata publicá e buki di 416 bladji, “Entonces queda terminado el misterio de Dios,” cu a splica e promé diestres capítulo di Revelacion.—Salmo 97:11; Proverbio 4:18.

 7. (a) Pakico Testigo di Jehova a percura e buki aki tocante Revelacion? (b) Cua yudanza pa siñamento tin den e buki aki pe beneficio di lector?

⁷ Pakico un otro buki tocante Revelacion a ser publicá i reimprimí ne tempo aki? Hopi dje informacion publicá caba tabata mashá detayá, i no tabata posibel pa traduci i publiqué mundialmente den hopi idioma. P’sei, tabata considerá apropiado pa percura un buki tocante Revelacion den un solo volumen i den un forma cu por ta producí fácilmente den varios idioma. Además, e buki aki ta probecha dje oportunidad di percura yudanza pa siñamento, incluyendo plachi, cuadro, i sumario, cu por yuda lector capta claramente e importancia emocionante dje profecía maraviyoso aki.

 8. Cua motibo asta mas fuerte tin pa publicacion dje buki aki?

⁸ Un motibo asta mas fuerte pa publica e buki aki ta e necesidad di keda den paso cu e berdad actual. Jehova Dios ta sigi tira mas luz ariba e nificacion di su Palabra, i nos por spera pa nos comprendimento di Revelacion, hunto cu otro profecía, bira mas skerpi mientras cu nos ta yega mas cerca e tribulacion grandi. (Mateo 24:21; Revelacion 7:14) Ta importante pa nos keda bon informá. Manera apóstol Pedro a skirbi tocante profecía divino: “Boso ta haci bon prestando atencion na dje manera na un lampi luzando den un lugar scur, te cu e dia ta manece i e strea di madrugá ta subi, den boso curazón.”—2 Pedro 1:19.

 9. (a) Hunto cu otro profecía, kico Revelacion ta mustra cu Dios lo crea? (b) Kico ta e mundo nobo, i con bo por sobrebiba pa drenta den dje?

⁹ Revelacion ta agrega su testimonio na hopi otro profecía bíblica, mustrando cu e propósito di Jehova Dios ta di crea un cielo nobo i un tera nobo. (Isaías 65:17; 66:22; 2 Pedro 3:13; Revelacion 21:1-5) Su mensahe ta ser dirigí principalmente na cristian ungí, cu Jesús a cumpra cu su sanger pa nan bira co-gobernante cuné den e cielo nobo. (Revelacion 5:9, 10) No obstante, e bon nobo també por fortalece e fe dje miyones di hende cu ta spera bida eterna bao di Reino di Cristo. Bo ta un hende asina? Anto Revelacion por fortalece bo speranza di biba den Paradijs, como parti dje mundo nobo, disfrutando di un abundancia di paz, salud excelente, i un sobreabundancia di percuracion di Dios cu lo no caba nunca. (Salmo 37:11, 29, 34; 72:1, 7, 8, 16) Si bo kier sobrebiba pa drenta den e mundo nobo, ta urgente, sí, obligatorio, pa bo presta atencion na detaye gráfico dje culminacion sin igual di Revelacion cu ta cerca awor.—Sofonías 2:3; Juan 13:17.

[Nota]

[Plachi di henter página na página 7]

Capítulo 2

E tema principal di Bijbel

Interpretacion di Scritura Misterio cerá den e buki di Revelacion a confundí studiante sincero di Bijbel pa mashá tempo. Ne debido tempo di Dios, el a duna di conoce tal secreto, pero di ki manera, na ki tempo, i na ken? E spiritu di Dios so por a duna di conoce e nificacion ora e tempo siñalá a yega cerca. (Revelacion 1:3) Dios a revela tal secreto sagrado na esclabo celoso di dje riba tera di manera cu esei a fortalecénan pa duna di conoce su huicio. (Mateo 13:10, 11) Nos no ta bisa cu splicacion den e buki aki ta infalible. Mescos cu Josef di tempo di antigua, nos ta bisa: “Interpretacion no ta pertenece na Dios?” (Génesis 40:8) Sin embargo, ne mesun tempo, nos ta kere firmemente cu splicacion duná aki ta armonizá cu e Bijbel henter, mustrando ki notablemente profecía divino a ser cumplí den loke ta sosode den mundo den nos tempo catastrófico.

 1. Cua propósito magnífico Jehova Dios tini?

UN PROVERBIO bíblico ta bisa: “E fin di un asunto despues ta mihor cu su principio.” (Eclesiastés 7:8) Ta den e buki di Revelacion cu nos ta leza dje culminacion dramático dje propósito magnífico di Jehova Dios di santifica su nomber dilanti di tur creacion. Manera Dios a declara bez tras bez usando un profeta di dje di antigua: “Nan lo tin cu sa cu mi ta Jehova.”—Ezekiel 25:17; 38:23.

 2. Cua conocimento satisfaciente Revelacion, hunto cu buki bíblico anterior, ta yúdanos obtene?

² Mescos cu Revelacion ta duna detaye dje fin triunfante dje asunto, asina e promé bukinan di Bijbel ta splica e principio di dje. Ora nos ta examina e registro, nos por comprende cuestion cu esei ta enbolbe i haya un bista general dje propósito di Dios. Cuanto satisfaccion esei ta duna! Además, esei mester conmovénos na accion, pa nos tene parti den e maraviyoso futuro cu ta spera humanidad. (Salmo 145:16, 20) Ta parce apropiado awor pa considera circunstancia di skirbimento di Bijbel i e tema dje Bijbel henter, pa nos por tene presente e cuestion principal cu ta enfrenta tur humanidad, i també e propósito di Dios, cu el a declara claramente, di resolve tal cuestion.

 3. Cua profecía dje buki di Génesis ta pone tema pe Bijbel henter, incluyendo Revelacion?

³ Génesis, e promé buki di Bijbel, ta duna relato dje “principio” i ta duna detaye dje obra di creacion di Dios, incluyendo hende, locual a corona su creacion terrenal. Génesis també ta contene e promé profecía divino, cu Dios mes a declara den e hofi di Eden mas cu 6.000 aña pasá. Un poco promé cu esei un colebra a wordu usá pa gaña e promé muher, Eva; i Eva despues a convence su esposo, Adam, pa viola cuné e ley di Jehova Dios comiendo dje “palu di conocimento di bon i malu.” Lezando sentencia pe pareha pecaminoso, Dios a bisa e colebra: “Lo mi pone enemistad entre bo i e muher i entre bo simía i su simía. Lo e machica bo cabez i lo bo machica su hilchi.” (Génesis 1:1; 2:17; 3:1-6, 14, 15) E profecía ta establece e tema dje Bijbel henter, incluyendo Revelacion.

 4. (a) Despues cu Dios a declara e promé profecía, kico a sosode nos promé mayornan? (b) Cua pregunta ta presenta tocante e promé profecía, i pakico nos tin cu sa e contesta?

⁴ Un bez despues di a declara e profecía, Dios a saca nos promé mayornan for di Eden. Desde esei, nan no por a spera bida eterna den e Paradijs; nan tabatin cu pasa nan bida pafó ariba un tera no prepará. Bao di sentencia di morto, nan tabatin cu produci yiu cargá cu picá. (Génesis 3:23–4:1; Romano 5:12) Pero, kico e profecía den Eden kier men? Ken e ta enbolbe? Ki conexion e tin cu Revelacion? Ki mensahe e ta contene pa nos djawe? Pa nos haya alivio personal di efecto di sosodimento trágico cu a resulta den e declaracion di Jehova dje profecía, ta mashá importante pa nos conoce contesta pa tal pregunta.

Persona principal den e drama

 5. Ora e colebra a gaña Eva, ki desaroyo tabatin en cuanto e soberanía i nomber di Dios, i con e cuestion lo ser resolví?

⁵ E profecía di Génesis 3:15 tabata dirigí ne colebra cu a gaña Eva, sugeriendo na Eva cu lo e no muri pa su desobedencia sino por bira independiente, bira un diosa. Asina e colebra a yama Jehova mentiroso i a duna idea cu hende por biba mihor rechazando e gobernacion supremo di Dios. (Génesis 3:1-5) Nan a desafiá e soberanía di Jehova Dios i a susha su bon nomber. E buki di Revelacion ta mustra con e Huez husto, Jehova Dios, ta usa e gobernacion dje Reino di su Yiu, Jesucristo, pa vindica su soberanía i haci su nomber limpi di tur reproche.—Revelacion 12:10; 14:7.

 6. Con Revelacion ta identifica e persona cu a papia cu Eva usando un colebra?

⁶ En cuanto e palabra “colebra,” esei ta aplica solamente ne colebra mes? Di ningun manera! Revelacion ta identifica pa nos e persona spiritual malbado cu a papia mediante e colebra. Esei tabata “e dragón grandi . . . , e colebra original, esun yamá Diabel i Satanás, cu ta gaña tur e tera habitá,” cu a “gaña Eva cu su astucia.”—Revelacion 12:9; 2 Corintio 11:3.

 7. Kico ta indica cu e muher di Génesis 3:15 ta pertenece na region spiritual?

⁷ Sigientemente Génesis 3:15 ta menciona “e muher.” Esei tabata Eva? Por tá cu Eva a kere esei. (Compara cu Génesis 4:1.) Pero un enemistad di duracion largu entre Eva i Satanás a bira imposibel ora Eva a muri mas cu 5.000 aña pasá. Además, siendo cu e Colebra cu locual Jehova a papia ta un spiritu invisibel, nos tin cu spera també pe muher ser di region spiritual. Revelacion 12:1, 2 ta confirma esei, indicando cu e muher simbólico ta e organizacion celestial di Jehova Dios componí di persona spiritual.—Mira també Isaías 54:1, 5, 13.

Dos simía oponiendo otro

 8. Pakico nos mester ta profundamente interesá den loke ta ser bisá awor tocante e dos simía?

⁸ Sigientemente Génesis 3:15 ta menciona dos simía. Nos mester ta profundamente interesá den eseinan, pasobra nan ta relacioná cu e cuestion grandi di soberanía correcto dje tera. Esei ta toca cada un di nos, sea cu nos ta hoven of bieu. Bo ta favorece cua dje dos simía?

 9. Simía dje Colebra siguramente ta inclui kico?

⁹ E ta mencioná promé e simía of yiu dje Colebra. Ken nan tá? Siguramente esei ta inclui otro persona spiritual cu a uni cu Satanás den su rebelion i cu finalmente tabata “tirá abao cuné” na region dje tera. (Revelacion 12:9) Siendo cu Satanás, of Beelzebub, ta “gobernante di demoño,” ta keda bisto cu nan ta compone su organizacion invisibel.—Marco 3:22; Efesio 6:12.

10. Con e Bijbel ta identifica otronan como parti dje simía di Satanás?

¹⁰ Además, Jesús a bisa guía religioso hudío di su dia: “Boso ta di boso tata e Diabel, i kier cumpli cu deseo di boso tata.” (Juan 8:44) Cu nan oposicion na Jesús, e Yiu di Dios, tal guía religioso a mustra cu nan també tabata yiu di Satanás. Nan tabata parti dje simía di Satanás, i a sirbié como nan tata simbólico. Hopi otro hende durante e pasado di igual manera a identifica nan mes haciendo e boluntad di Satanás, specialmente oponiendo i persigiendo disípel di Jesús. Nos por bisa cu, en conhunto, tal hende ta compone e organizacion visibel di Satanás riba tera.—Mira Juan 15:20; 16:33; 17:15.

E simía dje muher identificá

11. Através di siglonan di tempo, kico Dios a revela tocante e simía dje muher?

¹¹ Finalmente, e profecía di Génesis 3:15 ta menciona e simía dje muher. Mientras cu Satanás tabata desaroya su simía, Jehova tabata prepara pa su “muher,” of organizacion celestial semehante di esposa, produci un simía. Pa mas cu 4.000 aña, Jehova progresivamente a revela na hende obediente temeroso di Dios detaye relacioná cu binimento dje simía. (Isaías 46:9, 10) Asina, Abraham, Isaac, Jacob, i otronan por a aumenta nan fe den e promesa di cu e simía lo presenta den nan desendencia. (Génesis 22:15-18; 26:4; 28:14) Hopi bez Satanás i catibo di dje a persigi tal sirbidor di Jehova Dios debí na nan fe inquebrantable.—Hebreo 11:1, 2, 32-38.

12. (a) E parti principal dje simía dje muher a yega na ki tempo i kico a sosode? (b) Jesús tabata ungí pa cua propósito?

¹² Pa caba, na aña 29 di nos era común, e homber perfecto Jesús a presenta na rio Jordan i tabata bautizá. Jehova Dios a engendrá Jesús ei cu spiritu santo, bisando: “Esei ta mi Yiu, esun stimá, cu mi a aprobá.” (Mateo 3:17) Jesús tabata identificá asina como esun mandá for dje organizacion spiritual di Dios den cielo. E tabata ungí també como esun nombrá pa ser Rey dje Reino celestial cu lo restora gobernacion riba tera den e nomber di Jehova Dios, poniendo fin asina una bez i pa semper ne cuestion cu ta enbolbe gobernacion, of soberanía. (Revelacion 11:15) Pues, Jesús ta Esun principal di simía dje muher, e Mesías primintí.—Compara cu Galatio 3:16; Daniel 9:25.

13, 14. (a) Pakico no mester sorprendénos pa sa cu e simía dje muher no ta solamente un persona prominente? (b) Cuanto persona Dios a scoge for di humanidad pa bira e parti segundario dje simía, i nan ta compone cua clase di organizacion? (c) Cua otronan ta sirbi den unidad cu e simía?

¹³ E simía dje muher ta un solo persona prominente? Wel, kico dje simía di Satanás? E Bijbel ta mustra cu e simía di Satanás ta inclui un ehército di angel malbado i hende riba tera cu ta desonra Dios. Pues, no mester sorprendénos pa siña dje propósito di Dios di scoge 144.000 wardador di integridad for di humanidad pa bira co-gobernante sacerdotal cu Jesucristo, e Simía mesiánico. Revelacion ta menciona eseinan ora e ta bisa cu e Diabel, den su enemistad contra e organizacion di Dios semehante di muher, “a bai pa haci gera cu e resto di su simía.”—Revelacion 12:17; 14:1-4.

¹⁴ Den e Bijbel, cristian ungí ta ser yamá ruman di Jesús, i como su rumanan, nan tin e mesun Tata i e mesun mama. (Hebreo 2:11) Nan Tata ta Jehova Dios. P’sei, nan mama mester ta e “muher,” e organizacion celestial di Dios semehante di esposa. Nan ta bira un parti segundario dje simía, i Cristo Jesús ta e parti primario. E congregacion di tal hende cristian riba tera, engendrá pa spiritu, ta compone e organizacion visibel di Dios cu ta sirbi bao di su organizacion celestial semehante di muher, unda nan lo ser uní cu Cristo Jesús despues di nan resureccion. (Romano 8:14-17; Galatio 3:16, 29) Aunque nan no ta parti dje simía, miyones di otro carné di tur nacion ta ser uní pa nan sirbi hunto cu e organizacion di Dios riba tera. Bo ta uno dje otro carnénan? Anto bo speranza feliz ta bida eterna riba un tera paradísico.—Juan 10:16; 17:1-3.

Con enemistad a desaroya

15. (a) Splica e desaroyo dje simía humano i angelical di Satanás. (b) Kico a sosode e simía di Satanás durante e diluvio dje dia di Noé?

¹⁵ E simía humano di Satanás a cuminza presenta mashá leu den e pasado di humanidad. Por ehempel, tabatin Caín, e promé hende cu a nace, “cu a origina cu e malbado i a mata su ruman” Abel. (1 Juan 3:12) Despues, Enoc a menciona e binimento di Jehova “cu su miríadas santo, pa ehecuta huicio contra tur, i pa duna prueba di culpa di tur malechor dje maldad cu nan a comete na mal manera, i di tur e cosnan ofensivo cu pecador malbado a papia contra dje.” (Hudas 14, 15) Además, angel rebelde a unínan cu Satanás i a bira parti di su simía. Nan a “bandona nan propio i debido lugar di biba” den cielo pa nan materializa curpa carnal i casa cu yiu muher di hende. Nan a produci yiu bruhá superhumano i abusador. Mundo a yena cu violencia i maldad, di manera cu Dios a destruyé den e diluvio, cu fiel Noé i su famía como e único carni humano cu a sobrebiba. Angel desobediente—awor demoño bao di control di Satanás—a keda obligá di bandona nan esposa humano i yiunan bruhá condená na destruccion. Nan a desmaterializá i a bolbe na region spiritual unda nan ta spera ehecucion di huicio di Dios cu ta yegando rápidamente pa Satanás i su simía.—Hudas 6; Génesis 6:4-12; 7:21-23; 2 Pedro 2:4, 5.

16. (a) Cua tirano a presenta riba tera despues di diluvio, i con el a mustra cu e tabata parti dje simía di Satanás? (b) Con Dios a stroba esnan cu kier a traha e toren di Babilonia?

¹⁶ Poco despues dje diluvio grandi, un tirano yamá Nimrod a nace riba tera. E Bijbel ta yamé “un jagdor poderoso den oposicion cu Jehova”—berdaderamente un parti dje simía dje Colebra. Mescos cu Satanás, el a mustra un spiritu di rebelion i a traha e stad di Babel, of Babilonia, den desafío dje propósito di Jehova pa humanidad plama i yena e tera. E edificio principal di Babilonia tabata un toren grandi “cu su top den cielo.” Dios a stroba esnan cu kier a traha e toren. El a bruha nan idioma i a “plámanan djei riba tur e cara dje tera” pero a permiti Babilonia mes keda.—Génesis 9:1; 10:8-12; 11:1-9.

Poder político a presenta

17. Segun cu humanidad a aumenta, cua rasgo corrupto dje arreglo humano a presenta, i como resultado, cua imperio enorme a lanta?

¹⁷ Den Babilonia a presenta rasgo dje arreglo humano cu a desaroya den desafío dje soberanía di Jehova. Uno di eseinan tabata político. Ora hende a aumenta, otro homber ambicioso a sigi ehempel di Nimrod cogiendo mando. Hende a cuminza domina hende pa nan mes daño. (Eclesiastés 8:9) Por ehempel, durante e tempo di Abraham, Sodoma i Gomorra, i stad beciña a cai bao di mando di rey di Sinar i otro tera di leu. (Génesis 14:1-4) Cu tempo, experto militar i organizador a establece imperio enorme pa nan mes riqueza i gloria. E Bijbel ta menciona algun di eseinan, incluyendo Egipto, Asiria, Babilonia, Medo-Persia, Grecia, i Roma.

18. (a) Cua actitud e pueblo di Dios ta adopta en cuanto gobernante político? (b) Con autoridad político aveces a sirbi interés di Dios? (c) Con hopi gobernante a mustra cu nan ta parti dje simía dje Colebra?

¹⁸ Jehova Dios a tolera existencia di tal autoridad político, i su pueblo a rindi obedencia relativo na nan ora nan a biba riba tera bao di nan mando. (Romano 13:1, 2) Tabatin bez cu autoridad político asta a sirbi pe adelanto dje propósito di Dios of como proteccion pa su pueblo. (Esdras 1:1-4; 7:12-26; Echo 25:11, 12; Revelacion 12:15, 16) No obstante, hopi gobernante político a opone cruelmente e adoracion berdadero, mustrando cu nan tabata parti dje simía dje Colebra.—1 Juan 5:19.

19. Con poder mundial ta ser pintá den e buki di Revelacion?

¹⁹ Den mayoría di caso, gobernacion humano ta un gran fracaso incapaz pa trece felicidad pa nos como hende of soluciona nos problemanan. Jehova Dios a permiti humanidad experimenta cu tur forma di gobierno, pero e no ta aproba dje corrupcion ni dje mal gobernacion cu nan a eherce riba hende. (Proverbio 22:22, 23) Revelacion ta pinta poder mundial opresivo como un bestia salbahe orguyoso i monstruoso.—Revelacion 13:1, 2.

Traficante comercial egoísta

20, 21. Cua grupo segundario mester ta incluí hunto cu “comandante militar” i “homber fuerte” cu ta pertenece ne mal simía di Satanás, i pakico?

²⁰ A presenta den alianza estrecha cu lider político, hende desonrado traficante den producto material. Registro descubrí den resto di Babilonia di antigua ta mustra cu trámite comercial explotando circunstancia tristu di otro hende tabata mashá común den e tempo ayá. Comerciante di mundo ta sigi traha pa ganashi egoísta te ne dia djawe, unda den hopi país algun hende a bira mashá ricu mientras cu e mayoría di pueblo ta sufri den pobreza. Den e época industrial aki, comerciante i industrialista tin ganashi grandi trahando pa autoridad político un montón di arma militar diabólico di destruccion, incluyendo e armanan di destruccion masal cu awendia ta motibo di gran preocupacion. Tal haragán comercial i otronan di nan clase mester ta incluí den “comandante militar” i “homber fuerte” cu ta parti dje mal simía di Satanás. Nan tur ta parti dje organizacion terrenal cu Dios i Cristo ta huzga como mereciendo ehecucion.—Revelacion 19:18.

²¹ Mester ta agregá na político corrupto i na comercio golós un tercer elemento dje arreglo humano cu ta merece e huicio desfavorable di Dios. Cua ta esei? Loke Revelacion ta bisa tocante tal organizacion mundial bon conocí por sorprendébo.

Babilonia e Grandi

22. Cua clase di religion a desaroya den Babilonia di antigua?

²² Construccion di Babilonia original tabata mas cu un empresa político. Siendo cu e stad tabata establecí den desafío dje soberanía di Jehova, esei a enbolbe religion. Realmente, Babilonia di antigua a bira e fuente di idolatría religioso. Sacerdote di dje a siña doctrina cu a desonra Dios, tal como curpa ta muri pero cu alma ta spiritu cu no ta muri nunca i p’sei despues di morto di curpa, alma ta wordu tormenta pa semper den un lugar di horror cu demoño ta domina. Nan a promove adoracion di hende i di un multitud di dios i diosa. Nan a inventa leyenda pa splica e origen dje tera i di hende riba dje i a celebra ceremonia i sacrificio degradante, supuestamente pa segura fertilidad den reproduccion di yiu i di cosecha, i den victoria den gera.

23. (a) Ora e pueblo a plama for di Babilonia, kico nan a hiba cu nan, i cu ki resultado? (b) Cua nomber Revelacion ta usa pa referi ne imperio mundial di religion falso? (c) Religion falso semper a bringa contra kico?

²³ Ora varios grupo di hende dje mesun lenga a plama riba tera, nan a hiba e religion babilónico cu nan. Asina, ceremonia i creencia similar cu esnan di Babilonia di antigua a florece den habitante original di Europa, Africa, Nort i Zuid América, i den Oriente Lehano, i na isla di Lamá Pacífico; i hopi di tal creencia ta persisti te ne dia djawe. Apropiadamente, anto, Revelacion ta menciona e imperio mundial di religion falso como un stad yamá Babilonia e Grandi. (Revelacion, capítulo 17, 18) Unda cu el a wordu sembrá, religion falso a produci sacerdocio opresivo, supersticion, ignorancia, i inmoralidad. E ta un instrumento fuerte den man di Satanás. Babilonia e Grandi semper a bringa ferozmente contra e adoracion berdadero di Señor Soberano Jehova Dios.

24. (a) Con e Colebra por a machica e Simía dje muher “den e hilchi”? (b) Pakico machicamento dje simía dje muher ta ser yamá solamente un herida di hilchi?

²⁴ Como e parti mas reprensible dje simía dje Colebra, scriba i fariseo dje religion hudío dje promé siglo a hiba delantera persigiendo i finalmente asesinando e representante principal dje simía dje muher. Asina, e Colebra por a “machica e hilchi” dje “simía.” (Génesis 3:15; Juan 8:39-44; Echo 3:12, 15) Pakico esei ta ser yamá solamente un herida di hilchi? Pa motibo cu tal herida a toqué brevemente so aki riba tera. E no tabata permanente pasobra Jehova Dios a resusita Jesús dia tres i a halzé te na un bida spiritual.—Echo 2:32, 33; 1 Pedro 3:18.

25. (a) Con Jesús glorificá a dal paso caba contra Satanás i su angelnan? (b) Na ki tempo e simía terrenal di Satanás lo ser eliminá? (c) Ora e Simía dje muher di Dios ta aplasta e “cabez” dje colebra, Satanás, kico esei lo nifica?

²⁵ Jesucristo glorificá awor ta sirbi ne man drechi di Dios, huzgando enemigo di Jehova. El a dal paso caba contra Satanás i su angelnan, tirando nan abao i limitando nan actividad ne tera—locual ta responsabel pe aumento di calamidad den nos tempo. (Revelacion 12:9, 12) Pero ta bini eliminacion profetizá dje simía terrenal di Satanás ora Dios ta ehecuta huicio riba Babilonia e Grandi i riba tur otro elemento dje organizacion di Satanás riba tera. Finalmente, Jesucristo, e Simía dje muher di Dios, lo aplasta Satanás, e astuto colebra bieu, den su “cabez,” i esei lo nifica cu Satanás lo ser exterminá i kitá por completo for di asunto di humanidad.—Romano 16:20.

26. Pakico ta di sumo importancia pa nos examina e profecía di Revelacion?

²⁶ Con tur esei lo sosode? Esei ta loke e buki bíblico di Revelacion ta dúnanos di conoce. Esei ta ser revelá na nos den un serie di vision cu siñal i símbolo ta enfatiza. Ansiosamente, láganos examina e profecía di sumo importancia. Nos ta keda feliz en berdad si nos ta tende i ta warda e palabra di Revelacion! Haciendo esei, nos por participa den dunamento di onor ne nomber di Señor Soberano Jehova i hereda su bendicion eterno. Haci fabor di sigi leza i aplica sabiamente loke bo ta siña. Esei por nifica bo salbacion den e tempo culminante aki den e historia di humanidad.

[Kuadro/Plachi na página 13]

Trámite di antigua skirbí riba tabla di clei

E buki di James B. Pritchard (na inglés) Texto Antiguo di Oriente Cercano, tin un lista di casi 300 ley cu Hamurabi a compila den tempo babilónico. Eseinan ta mustra cu tabata necesario pa prohibi falta abierto di onradez cu aparentemente a domina e mundo comercial dje tempo ei. Esaki ta un ehempel: “Si un shon a cumpra of a recibi pa warda sea plata of oro of esclabo of esclaba of baca of carné of burricu of cualkier cos for di man dje yiu di un shon of for di esclabo di un shon sin testigo ni contrato, desde cu e shon ta ladrón, e tin cu haya castigo di morto.”

Capítulo 3

Loke mester sosode pronto

 1. Con bo por scapa for di ehecucion di huicio di Dios riba e mundo aki?

LOKE ta sosode den mundo djawe mester interesábo hopi. Pakico? Pasobra mundo no por scapa for di ehecucion di huicio di Dios. Pero bo por scapa. Bo por haci esei door di “no sea parti di mundo” cu ta condená na destruccion. Esei no kier men adopta un moda di biba severo scondí den conbento. Esei kier men cu mientras cu bo ta disfruta di un bida sano i significativo, bo ta separábo for di corrupcion político, for di comercio golós, i for di religion cu ta desonra Dios, i també for di conducta violento i inmoral. Ne mesun tempo, bo mester sigi ley halto di conducta di Dios i percura pa haci su boluntad. (Juan 17:14-16; Sofonías 2:2, 3; Revelacion 21:8) E buki bíblico di Revelacion ta mustra cu ta ki importante pa bo aplica na bo mes tal ley i principio i haci cambio necesario den bo moda di biba.

 2. Con apóstol Juan a introduci e gran profecía di Revelacion, i Dios a duna e mensahe importante na ken?

² Apóstol Juan a introduci e magnífico profecía cu e sigiente palabra: “Un revelacion mediante Jesucristo, cu Dios a duné, pa mustra su esclabonan loke mester sosode pronto.” (Revelacion 1:1a) Pues, Jesucristo resusitá tabata esun cu a recibi e mensahe importante di Dios. Leu di ser parti di un trinidad misterioso, esei ta mustra cu Jesús ta sumiso na su Tata. Di igual manera, “esclabo” cu ta compone e congregacion cristian ta sumiso na Jesucristo, di manera cu nan ta ‘sigi tras di dje no ta importa unda e ta bai.’ (Revelacion 14:4; Efesio 5:24) Pero, ken djawe ta berdaderamente “esclabo” di Dios, i con Revelacion ta beneficiánan?

 3. (a) Ken ta “esclabo” cu ta sumiso na Jesucristo? (b) Cua trabao tal “esclabo” fiel ta haci bao di guía di angel?

³ Apóstol Juan, cu a skirbi Revelacion, a yama su mes un esclabo asina. E tabata e último apóstol na bida i uno dje grupo escogí di “esclabo” ungí cu e spiritu, locual ta hereda bida inmortal den cielo. Awe, ta keda poco mil so di eseinan riba tera. Dios tin otro sirbidor també, un multitud grandi di nan di homber, muher, i mucha, un total awor di miyones. Bao di direccion di angel, nan ta participa cu “esclabo” ungí pa declara e bon nobo eterno pa tur humanidad. Ai, cuanto tur “esclabo” asina ta gasta nan mes pa nan yuda hende manso dje tera haya salbacion! (Mateo 24:14; Revelacion 7:9, 14; 14:6) Revelacion ta indica loke bo tin cu haci pa beneficiá dje bon nobo cu ta duna felicidad.

 4. (a) Desde cu ta haci mas cu 1.900 aña cu Juan a skirbi Revelacion, con e por a papia di “loke lo sosode pronto”? (b) Kico evidencia ta indica awor tocante e cosnan profetizá?

⁴ Sin embargo, con Juan por a bisa cu tal “esclabo” lo ser mustrá “loke mester sosode pronto”? E palabra no tabata bisá mas cu 1.900 aña pasá? Desde e punto di bista di Jehova, cu ta mira mil aña solamente “como ayera,” 1.900 aña ta poco tempo na comparacion cu e miles i miles di aña di tempo cu el a dedica ne creacion i preparacion dje tera pa habitacion humano. (Salmo 90:4) Apóstol Pablo a skirbi di su mes “anticipacion anhelante i speranza,” pasobra sin duda e realidad di su recompensa a parcele cerca. (Filipense 1:20) Sin embargo, awe evidencia ta abunda di cu tur loke tabata profetiza lo yega na ora. Nunca na antes den historia e sobrebibencia mes di humanidad tabata den e wega. Dios so tin e solucion!—Isaías 45:21.

Canal di comunicacion

 5. Con Revelacion tabata comunicá cu apóstol Juan i despues ne congregacion?

⁵ Revelacion 1:1b, 2 ta sigi: “I [Jesús] a manda su angel i mediante dje a presenta [Revelacion] cu siñal na su esclabo Juan, cu a duna testimonio dje palabra cu Dios a duna i dje testimonio cu Jesucristo a duna, asta di tur loke el a mira.” Asina Juan a recibi e registro inspirá mediante un mensahero angelical. El a skirbi esei den un rol, i a pasé pe congregacionan di su tempo. Felizmente pa nos, Dios a conserba esei pe animacion di casi 100.000 congregacion di su sirbidornan uní riba tera awe.

 6. Con Jesús a identifica e canal cu e lo usa pa percura alimento spiritual pa “esclabo” di dje djawe?

⁶ Dios tabatin un canal pa comunica Revelacion den e tempo di Juan, i Juan tabata e parti terrenal dje canal. Di igual manera, Dios tin un canal pa duna alimento spiritual na su ‘esclabonan’ djawe. Den su gran profecía tocante e conclusion dje sistema di cosnan, Jesús a identifica e parti terrenal dje canal como e “sclabo fiel i prudente cu su doño ta nombra riba su domésticonan, pa dúnanan nan cuminda ne tempo apropiado.” (Mateo 24:3, 45-47) E ta usa tal grupo semehante di Juan pa revela e nificacion dje profecía.

 7. (a) Con siñal di Revelacion mester afectános? (b) Pa cuanto tempo algun di esnan dje grupo cu Juan a simboliza a participa den cumplimento di vision di Revelacion?

⁷ Apóstol Juan a skirbi cu Jesús a presenta Revelacion “cu siñal,” of símbolo. Nan ta símbolo bibo i examinacion di nan ta emocionante. Nan ta pinta actividad dinámico i tin cu tene efecto di estimulános pa haci esfuerzo celoso pa duna di conoce na otronan e profecía i su nificacion. Revelacion ta presentá na nos varios vision electrizante, den cada un di locual Juan a participa sea activamente of como observador. Esnan dje grupo cu Juan a simboliza, algun di locual a participa pa hopi década den cumplimento di tal vision, ta alegra cu e spiritu di Dios a revela nan nificacion di manera cu nan por splícanan na otro hende.

 8. (a) Kico ta distinto di cada vision di Revelacion? (b) Con e profecía di Daniel ta yúdanos comprende identidad di bestia di Revelacion?

⁸ Tal vision den Revelacion no ta ser presentá den ordu cronológico. Cada un tin su mes tempo di cumplimento. Hopi vision ta repiti profecía di antes cu ta duna clave pa nan interpretacion. Por ehempel, e profecía di Daniel a duna detaye di cuater bestia spantoso, splicando cu nan a simboliza poder gobernante di mundo. Asina, nos ta ser yudá pa comprende cu bestia di Revelacion ta representa gobierno político, incluyendo esnan cu ta existi awor.—Daniel 7:1-8, 17; Revelacion 13:2, 11-13; 17:3.

 9. (a) Mescos cu Juan, e grupo di hende cu Juan a simboliza ta mustra cua actitud? (b) Con Juan a mustra e camina pa nos sigi pa nos ser feliz?

⁹ Juan tabata fiel dunando testimonio dje mensahe cu Dios mediante Jesucristo a duné. El a duna detaye di “tur loke el a mira.” Hende dje grupo cu Juan a simboliza a pidi encarecidamente e guía di Dios i di Jesucristo pa nan comprende e profecía completamente i duna di conoce detaye di dje ne pueblo di Dios. Pe beneficio dje congregacion ungí (i també pe multitud grandi internacional cu Dios lo conserbá bibo durante e tribulacion grandi), Juan a skirbi: “Feliz ta hende cu ta leza na boz halto i hende cu ta scucha e palabra dje profecía aki, i hende cu ta warda loke ta pará skirbí den dje; pasobra e tempo siñalá ta cerca.”—Revelacion 1:3.

10. Kico nos mester haci en cuanto Revelacion pa nos alcanza felicidad?

¹⁰ Bo por beneficiá mashá door di leza Revelacion i asta mas tanto door di warda loke tin skirbí den dje. Juan a splica den un carta di dje: “Esaki ta loke amor di Dios ta nifica, pa nos warda su mandamento; i toch su mandamento no ta un carga pisá, pasobra tur loke ta nace di Dios ta vence mundo. I esaki ta e victoria cu a vence mundo, nos fe.” (1 Juan 5:3, 4) Bo por keda mashá feliz edificando tal fe!

11. (a) Pakico ta urgente pa nos warda e palabra dje profecía? (b) Cua tempo mester ta peligrosamente cerca awor?

¹¹ Ta urgente pa nos warda e palabra dje profecía, “pasobra e tempo siñalá ta cerca.” E tempo siñalá di kico? Di cumplimento di profecía di Revelacion, incluyendo e huicio di Dios. E tempo ta cerca pa Dios i Jesucristo ehecuta e huicio final riba e sistema di mundo di Satanás. Ora Jesús tabata aki riba tera, el a bisa cu su Tata so a conoce e “dia i ora.” Mirando den futuro te na dificultad cu a aumenta riba tera den nos tempo, Jesús a bisa també: “E generacion ei lo no pasa di ningun manera te cu tur e cosnan ei ta sosode.” Pues, e tempo siñalá pa ehecuta e decision di Dios mester a yega peligrosamente cerca. (Marco 13:8, 30-32) Manera Habacuc 2:3 ta bisa: “E vision ainda ta pe tempo siñalá, i ta sigi anshá te na fin, i lo no papia mentira. Aunque e ta tarda, sigi den anticipacion di dje; pasobra lo e ser cumplí sin falta. Lo e no yega laat.” Nos salbacion durante e tribulacion grandi ta depende di nos wardamento dje Palabra profético di Dios.—Mateo 24:20-22.

[Kuadro na página 15]

Pa comprende e buki di Revelacion nos tin cu:

● Recibi e yudanza dje spiritu di Jehova

● Comprende e tempo cu e dia di Señor a cuminza

● Reconoce e sclabo fiel i prudente djawe

Capítulo 4

Jesús ta bini cu animacion

 1. Pa ken Juan a skirbi e ora ei, i ken djawe mester haya su mensahe di interés intenso?

LOKE ta sigi mester ta di interés intenso pa tur hende asociá cu congregacion dje pueblo di Dios awe. Esei ta un serie di mensahe. Nan tin aplicacion special segun cu e “tempo siñalá” ta yega cerca. (Revelacion 1:3) Ta pa nos beneficio eterno pa nos presta atencion na tal mensahe. E Scritura ta bisa: “Juan, pe siete congregacion cu tin den e districto di Asia: Bondad inmerecida i paz sea cu boso di parti di ‘Esun cu tá i cu tabata i cu ta bini,’ i di e siete spiritu cu ta dilanti su trono, i di Jesucristo.”—Revelacion 1:4, 5a.

 2. (a) Kico e cifra “siete” ta significa? (b) Durante e dia di Señor, na ken mensahe dirigí ne “siete congregacion” ta aplica?

² Ei Juan a dirigié ne “siete congregacion,” i eseinan ta ser mencioná pa nos despues den e profecía. E cifra, “siete,” ta ser repiti hopi bez den Revelacion. E ta nifica loke ta completo, specialmente en relacion cu cosnan di Dios i su congregacion ungí. Siendo cu e cantidad di congregacion dje pueblo di Dios mundialmente a aumenta te na cientos di miles durante e dia di Señor, nos por keda sigur cu loke ta ser bisá primeramente ne “siete congregacion” di esnan ungí ta aplica també na tur e pueblo di Dios djawe. (Revelacion 1:10) Sí, Juan tabatin un mensahe vital pa tur congregacion di Testigo di Jehova i tur hende cu ta asociá cu nan, na tur parti di mundo.

 3. (a) Den saludo di Juan, di unda e “bondad inmerecida i paz” ta bini? (b) Cua expresion di apóstol Pablo ta similar cu e saludo di Juan?

³ “Bondad inmerecida i paz”—ki deseable esei tá i specialmente ora nos ta comprende ken a bisa esei! “Esun” cu a bisa esei ta Señor Soberano Jehova mes, “e Rey di eternidad,” cu ta biba “desde tempo indefinitivo te na tempo indefinitivo.” (1 Timoteo 1:17; Salmo 90:2) Enbolbí den esei, també, ta e “siete spiritu,” cua expresion ta indica cu e forza activo of spiritu santo di Dios ta funciona plenamente, dunando comprendimento i bendicion na tur hende cu ta presta atencion ne profecía. També, hungando un papel importante den esei ta “Jesucristo,” di locual Juan a skirbi despues: “E tabata yen di bondad inmerecida i berdad.” (Juan 1:14) Pues, e saludo di Juan tabatin e mesun elemento cu apóstol Pablo a menciona concluyendo su segunda carta pe congregacion di Corinto: “E bondad inmerecida di Señor Jesucristo i e amor di Dios i e participacion den e spiritu santo sea cu boso tur.” (2 Corintio 13:14) Laga e palabra ei aplica també na cada un di nos cu ta stima e berdad den e dia djawe!—Salmo 119:97.

“E fiel Testigo”

 4. Con Juan a sigi pa duna detaye di Jesucristo, i pakico tal detaye ta tanto apropiado?

⁴ Despues di Jehova Dios, Jesús ta e persona di mas glorioso den universo, manera Juan a reconoce, i a yamé “‘e fiel Testigo,’ ‘E primogénito dje mortonan,’ i ‘E Gobernante di reynan di tera.’” (Revelacion 1:5b) Mescos cu e luna den cielo, el a ser establecí firmemente como e Testigo mas grandi di cu Jehova ta Dios. (Salmo 89:37) Despues di a warda su integridad te na un morto sacrificial, el a bira e promé hende pa ser resusitá na un bida spiritual inmortal. (Colosense 1:18) Awor, den e presencia di Jehova Dios, e ta ser halzá hopi mas halto cu tur rey terrenal, siendo duná “tur autoridad . . . den cielo i riba tera.” (Mateo 28:18; Salmo 89:27; 1 Timoteo 6:15) Na 1914 e tabata instalá como Rey pe reina entre nacionan terrenal.—Salmo 2:6-9.

 5. (a) Con Juan a sigi expresa aprecio pa Señor Jesucristo? (b) Ken ta beneficiá dje don di bida humano perfecto di Jesús, i con cristian ungí a participa di un bendicion special?

⁵ Juan a sigi expresando aprecio pa Señor Jesucristo usando palabra caloroso: “Na esun cu ta stímanos i cu a líbranos di nos picánan pa medio di su mes sanger—i el a hácinos ser un reino, sacerdotenan pa su Dios i Tata—sí, na dje sea gloria i poder pa semper. Amén.” (Revelacion 1:5c, 6) Jesús a entrega su bida humano perfecto pa hende di mundo di humanidad cu ta eherce fe den dje por ta restorá na un bida perfecto. Abo, estimado lector, por ta incluí den esei! (Juan 3:16) Pero e morto sacrificial di Jesús a habri camina pa un bendicion special pa hende cu ta bira cristian ungí manera Juan. Nan a ser declará husto riba e base dje sacrificio di rescate di Jesús. Esnan dje trupa chikito, ya cu nan a renuncia tur derecho di bida terrenal, manera Jesús a haci, a ser engendrá pe spiritu di Dios, cu e anticipacion di haya resureccion pa sirbi como rey i sacerdote cu Jesucristo den su Reino. (Lucas 12:32; Romano 8:18; 1 Pedro 2:5; Revelacion 20:6) Ki un gran privilegio! No ta straño cu Juan a sclama asina positivamente cu gloria i poder ta pertenece na Jesús!

“Bini cu nubia”

 6. (a) Kico Juan a anuncia tocante ‘binimento di Jesús cu nubia,’ i esei por a haci Juan corda cua profecía di Jesús? (b) Con Jesús “ta bini,” i ken ta experimenta gran afliccion riba tera?

⁶ Sigientemente, Juan a anuncia cu gran alegría: “Mira! e ta bini cu nubia, i tur wowo lo miré, i esnan cu a traspasé; i tur tribu dje tera lo bati nan mes den desconsuelo pa motibo di dje. Sí, amén.” (Revelacion 1:7) Sin duda esei a haci Juan corda e profecía anterior di Jesús tocante e conclusion dje sistema di cosnan. Jesús a bisa ei: “Anto e siñal dje Yiu di hende lo presenta den cielo, anto tur tribu dje tera lo bati nan mes den lamentacion, i nan lo mira e Yiu di hende bini riba nubia di cielo cu poder i gran gloria.” (Mateo 24:3, 30) Pues, Jesús ta ‘bini’ dirigiendo su atencion na ehecucion di huicio di Jehova riba e nacionan. Esei lo resulta den cambio importante riba tera, i siendo cu “tur tribu dje tera” a ignora e realidad dje gobernacion real di Jesús, nan en berdad lo experimenta “e rabia dje furia di Dios Todopoderoso.”—Revelacion 19:11-21; Salmo 2:2, 3, 8, 9.

 7. Con “tur wowo” por mira Jesús, incluyendo wowo di hende desobediente?

⁷ Durante e último anochi di Jesús cerca su disípelnan, el a bísanan: “Aki un poco i mundo lo no mirámi mas.” (Juan 14:19) Di ki manera, anto, “tur wowo lo miré”? Nos no por spera pa enemigo di Jesús miré cu nan wowo mes, pasobra apóstol Pablo a bisa, despues di subimento di Jesús na cielo, cu Jesús awor “ta biba den luz inacercable,” i “ningun hende a miré ni no por miré.” (1 Timoteo 6:16) Ta parce cu Juan kier men “mira” den e sentido di “distingi,” mescos cu nos por mira, of distingi, calidadnan invisibel di Dios den su creacion visibel. (Romano 1:20) Jesús ta “bini cu nubia” pasobra e lo ser tanto invisibel pa wowo mes como solo tá ora nubia ta tapé. Asta ora nubia ta tapa solo den dia, nos sa cu e tei pasobra tin claridad rond di nos. Di igual manera, aunque Señor Jesús ta invisibel, lo e ser revelá manera ‘flam di candela, ora e ta trece vinganza riba esnan cu no ta obedece e bon nobo tocante dje.’ Eseinan també lo keda obligá di “miré.”—2 Tesalonicense 1:6-8; 2:8.

 8. (a) Ken ta “esnan cu a traspasé” na aña 33 EC, i ken ta hende asina den e dia djawe? (b) Siendo cu Jesús no ta aki riba tera mas, con hende por ‘traspasé’?

⁸ “Esnan cu a traspasé” també lo ‘mira’ Jesús. Ken eseinan por tá? Ora Jesús tabata ehecuta na aña 33 EC, soldad romano a traspasé cu lanza literalmente. Hudío tabata responsabel pa un parti dje culpa dje asesinato, pasobra Pedro a bisa algun di nan na Pentecoste: “Dios a hacié Señor i també Cristo, e Jesús cu boso a claba ne staca.” (Echo 2:5-11, 36; compara cu Zacarías 12:10; Juan 19:37.) Tal romano i hudío tin casi 2.000 aña morto. Pues, esnan cu ta “traspasé” awe, mester representa nacion i pueblo djawe cu ta manifesta e mesun actitud i odio cu hende a demonstra ora nan a claba Jesús ne staca. Jesús no ta aki riba tera mas. Pero ora opositor activamente ta persigi Testigo di Jehova, cu ta duna testimonio di Jesús, of ta para ketu i ta wak tal persecucion, ta como si tal opositor ta ‘traspasa’ Jesús mes.—Mateo 25:33, 41-46.

“E Alfa i Omega”

 9. (a) Ken ta papia awor, i cuanto bez Revelacion ta bisa cu el a papia? (b) Ora Jehova ta yama su mes “Alfa i Omega” i “Todopoderoso,” kico esei kier men?

⁹ Awor, maraviya di maraviya! Señor Soberano Jehova mes ta papia. Esei ta ki apropiado como introduccion pa vision cu ta cla pa ser manifestá, siendo cu e ta nos Gran Instructor i e Fuente mes dje Revelacion! (Isaías 30:20) Nos Dios a declara: “Mi ta e Alfa i Omega, . . . Esun cu tá i cu tabata i cu ta bini, e Todopoderoso.” (Revelacion 1:8) Esei ta e promé di tres bez den Revelacion cu Jehova mes ta papia foi cielo. (Mira també Revelacion 21:5-8; 22:12-15.) Cristian dje promé siglo por a reconoce alfa i omega un bez como e promé i último letter dje alfabet griego. Ora Jehova Dios a usa e dos letter pa indica su mes el a duna énfasis ne echo cu promé cuné, no a existi Dios Todopoderoso, i lo no existi ningun despues di dje. Lo e pone fin cu bon éxito, pa tur eternidad, ne cuestion di ken ta e Dios berdadero. Lo e ser vindicá pa semper como e solo i único Dios Todopoderoso, Soberano Supremo riba tur su creacion.—Compara cu Isaías 46:10; 55:10, 11.

10. (a) Ki detaye Juan a duna di su mes sigientemente, i unda e tabata preso? (b) E rol cu Juan a skirbi mester a ser mandá ne congregacionan cu e cooperacion di ken? (c) Con alimento spiritual ta ser percura hopi bez awe?

¹⁰ Teniendo confianza di cu Jehova Dios lo dirigi e resultado final dje asunto, Juan a bisa esclabo compañé: “Ami, Juan, boso ruman i participante cu boso den e tribulacion i reino i awante den compañía cu Jesús, a yega di ser riba e isla di Patmos pasobra mi a papia tocante Dios i a duna testimonio di Jesús.” (Revelacion 1:9) Preso riba Patmos pa causa dje bon nobo, wantando tribulacion cu su rumanan, sperando firmemente di tene parti den e binidero Reino, e anciano Juan awor a mira e promé vision di Revelacion. Sin duda el a keda mashá animá debí na tal vision, mescos cu e grupo di hende cu Juan a simbolizá ta keda animá awe ora nan ta mira nan cumplimento. Nos no sa con Juan a manda e rol di Revelacion pe congregacionan, siendo cu e tabata preso ne tempo ei. (Revelacion 1:11; 22:18, 19) Angel di Jehova Dios mester a coopera den hacimento di esei, mescos cu nan a haci tanto bez protehando fiel Testigo di Jehova cu ta sirbi bao di prohibicion i restriccion awe, di manera cu nan por a hiba alimento spiritual oportuno pa nan ruman cu tin hamber pe berdad.—Salmo 34:6, 7.

11. Similar cu e privilegio cu Juan a aprecia, e grupo cu Juan a simbolizá ta aprecia cua privilegio awe?

¹¹ Ki profundamente Juan mester a aprecia e privilegio di cu Jehova a usé como Su canal di comunicacion pe congregacionan! Di igual manera, e grupo di hende djawe cu Juan a simbolizá ta apreciá mashá e privilegio di percura “alimento spiritual ne tempo apropiado” pe cas di Dios. (Mateo 24:45) Laga tal percuracion spiritual fortalecébo també pa bo por alcanza e meta glorioso di bida eterna!—Proverbio 3:13-18; Juan 17:3.

[Kuadro na página 21]

Obteniendo alimento spiritual den tempo dificultoso

Durante e último dianan, ora Testigo di Jehova ta sufri di tanto persecucion i dificultad, ta vital pa nan recibi alimento spiritual pa nan keda fuerte den e fe. Den casi tur caso, nan a recibi sostén adecuado, hopi bez gracias na demonstracion notable dje poder di Jehova Dios.

Por ehempel, den Alemania bao di Hitler, Testigo di Jehova a traha Toren di Vigilancia usando stencil i a pártinan, locual tabata oficialmente prohibí pa autoridad nazista cruel. Den Hamburg, e gestapo a invadi un cas unda nan tabata traha revista. E cas tabata chikito, i no tabatin bon lugar pa sconde nada. Nan a warda e mashín di skirbi den cashi di cushina, i e mashín mas grandi di stencil tabata wardá den caha den bodega. Además, tras dje caha tabatin un maleta yen di revista! A parce inevitable cu gestapo lo haya esei. Pero, kico a pasa? E poliz cu a habri e cashi a hacié di tal manera cu e no a mira e mashín di skirbi. En cuanto e bodega, e doño di cas a bisa: “Imaginábo, tres poliz a para den centro dje bodega, net unda cu tabatin e caha i e maleta yen di Toren di Vigilancia tras di dje. Pero ta parce cu ningun a ripara; tabata como si nan tabata ciegá.” Gracias na tal percuracion notable, e famía por a sigi suministra alimento spiritual den tempo dificultoso i peligroso.

Rond di aña 1960, tabatin gera civil entre Nigeria i e provincia rebelde di Biafra. Siendo cu Biafra tabata completamente rondoná pa territorio di Nigeria, e único conexion entre Biafra i e mundo djafuera tabata un aéropista. Esei a nifica cu Testigo di Jehova den Biafra tabata den peliger di perde nan abastecimento di alimento spiritual. Anto, na principio di 1968, autoridad di Biafra a asigna un miembro di nan personal civil na un puesto importante den Europa i un otro tabata asigná ne aéropista di Biafra. A sosode cu nan dos tabata Testigo di Jehova, i awor nan tabata ne dos punta dje único conexion entre Biafra i e mundo djafuera. Nan dos a reconoce cu tabata Jehova Dios cu a haci tal arreglo. P’sei boluntariamente nan a ofrece di haci e trabao delicado i peligroso di manda alimento spiritual na Biafra. I nan por a haci esei durante tur e gera. Uno di nan a bisa: “Hende no por a planeá tal arreglo.”

[Tabèl na página 19]

Cifra simbólico den Revelacion

Cifra E nificacion simbólico

Algun cifra mencioná den Revelacion mester ta tumá den un sentido literal. Hopi bez e contexto ta yúdanos determiná esei. (Mira Revelacion 7:4, 9; 11:2, 3; 12:6, 14; 17:3, 9-11; 20:3-5.)

Capítulo 5

Juan a mira Jesús glorificá

Vision 1—Revelacion 1:10–3:22

Tema: Jesús ta inspecciona Israel spiritual riba tera i ta duna animacion caloroso

Tempo di cumplimento: Tal rasgo dje dia di Señor ta extende for di 1914 te cu e último fiel ungí ta muri i ta ser resusitá

 1. Con e promé vision tabata presentá, i con Juan a indica e tempo di su berdadero aplicacion?

E PROMÉ vision den e buki di Revelacion ta cuminza den versículo 10 di capítulo 1. Mescos cu otro vision di Revelacion, un declaracion di Juan di cu el a tende of a mira algo extraordinario ta forma su introduccion. (Revelacion 1:10, 12; 4:1; 6:1) E promé vision ta ser presentá na moda dje promé siglo den locual mensahe ta ser dirigí ne siete congregacion contemporario cu Juan. Pero Juan a indica e tempo di su berdadero aplicacion ora el a bisa: “Via inspiracion mi a hayámi den e dia di Señor.” (Revelacion 1:10a) Na ki tempo ta tal “dia”? Sosodimento dramático di e temponan tempestuoso aki tin algun conexion cuné? Si ta asina, anto nos tin cu presta suma atencion ne profecía, pasobra e ta afecta nos bida mes—asta nos sobrebibencia.—1 Tesalonicense 5:20, 21.

Den e dia di Señor

 2. Na ki tempo e dia di Señor a cuminza, i na ki tempo e ta termina?

² Durante ki tempo exacto esei ta pone cumplimento di Revelacion? Wel, cua ta e dia di Señor? Apóstol Pablo a mencioné como e tempo di huzgamento i cumplimento di promesa divino. (1 Corintio 1:8; 2 Corintio 1:14; Filipense 1:6, 10; 2:16) Cu yegamento dje “dia,” e gran propósito di Jehova ta marcha progresivamente cu triunfo pa su culminacion. E “dia” a cuminza cu coronacion di Jesús como Rey celestial. Asta despues cu Jesús ta ehecuta huicio riba e mundo di Satanás, e dia di Señor ta sigi, cu e restoracion di Paradijs i cu perfeccionamento di humanidad, te cu Jesús finalmente ta “entrega e reino na su Dios i Tata.”—1 Corintio 15:24-26; Revelacion 6:1, 2.

 3. (a) Con e profecía di Daniel dje “siete tempo” ta yúdanos mira e tempo di comienzo dje dia di Señor? (b) Ki sosodimento riba tera ta confirma aña 1914 como e principio dje dia di Señor?

³ Cumplimento di otro profecía bíblica ta yúdanos mira na ki tempo e dia di Señor ta cuminza. Por ehempel, Daniel a menciona e terminacion di gobernacion den e liña di rey David; despues di “siete tempo” hende lo sa cu e “Haltísimo ta Gobernante den e reino di humanidad, cu e ta duné na ken cu e kier.” (Daniel 4:23, 24, 31, 32) E cumplimento mayor dje profecía a cuminza cu e desolacion dje reino di Hudá, locual segun evidencia bíblico a ser completá na October di 607 PEC. Revelacion 12:6, 14 ta mustra cu 3 1/2 tempo ta igual cu 1.260 dia; pues, siete tempo (dos bez 3 1/2) mester ta 2.520 dia. Calculando “un dia pa un aña,” nos ta determiná cu 2.520 aña ta e duracion di “siete tempo.” (Ezekiel 4:6) P’sei, Cristo Jesús a cuminza su gobernacion celestial den e último parti di 1914. E comienzo dje promé gera mundial na 1914 a marca “un principio di dolor di afliccion” cu a sigi plaga humanidad. Desde 1914, ki notablemente sosodimento ariba e planeta aki manchá cu sanger ta confirmá cu 1914 tabata e principio dje “dia” dje presencia di Jesús!—Mateo 24:3-14.a

 4. (a) Kico palabra di Revelacion mes ta indica en cuanto e tempo di cumplimento dje promé vision? (b) Na ki tempo cumplimento dje promé vision ta termina?

⁴ P’sei e promé vision i e conseho cu e ta contene ta pe dia di Señor, desde 1914 padilanti. E tempo ei ta haya apoyo dje echo cu, despues den Revelacion, e registro ta detaya ehecucion di huicio berdadero i husto di Dios—sosodimento den locual Señor Jesús ta hunga un papel sobresaliente. (Revelacion 11:18; 16:15; 17:1; 19:2, 11) Ya cu cumplimento dje promé vision a cuminza na 1914, na ki tempo e ta termina? Manera e mensahe mes ta mustra, e organizacion cu ta recibi e mensahe ta e congregacion di Dios dje ungídonan riba tera. Cumplimento dje promé vision ta terminá, pues, ora e último miembro fiel dje congregacion ungí ta muri i ta ser lantá na bida celestial. No obstante, e Dia di Señor, cu bendicion pe otro carnénan terrenal, ta sigi te ne fin dje reino di mil aña di Jesucristo.—Juan 10:16; Revelacion 20:4, 5.

 5. (a) Un boz a yama Juan pa haci kico? (b) Pakico e sitio dje “siete congregacion” tabata favorable pa manda un rol pa nan?

⁵ Den e promé vision, promé cu Juan a mira algo, el a tende algo: “I mi a tende tras di mi un boz fuerte manera esei di trompet, bisando: ‘Loke bo ta mira, skirbi den un rol i mandé pe siete congregacion, den Efeso i den Smirna i den Pérgamo i den Tiatira i den Sardis i den Filadelfia i den Laodicea.’” (Revelacion 1:10b, 11) Cu autoridad di manda manera tocamente di trompet, un boz a yama Juan pa skirbi ne “siete congregacion.” E tabatin cu recibi un serie di mensahe i publica loke el a mira i a tende. Ripara cu congregacion mencioná ei realmente a existi den dia di Juan. Nan tur tabata situá den Asia Menor, net na otro banda di lamá foi Patmos. Tabata fácil pa bai di un pa otro usando camina romano excelente cu a existi den e tera. Un mensahero no por tin problema hibando rol di un congregacion pa otro. E siete congregacion por a parce un seccion di circuito di Testigo di Jehova djawe.

 6. (a) Kico kier men “e cosnan cu tá”? (b) Pakico nos por keda sigur cu e situacion den e congregacion di cristian ungí djawe mester ta similar cu e situacion dje dia di Juan?

⁶ Mayor parti di profecía di Revelacion tabatin cu ser cumplí despues di dia di Juan. Nan ta referi “na loke lo sosode despues di esei.” Pero e conseho duná ne siete congregacion a trata cu “cosnan cu tá,” esta, situacion cu realmente a existi den e siete congregacion dje tempo ei. Tal mensahe tabata yudanza balioso pa fiel anciano nombrá den e siete congregacion, i també den tur otro congregacion di cristian ungí dje tempo ei.b Siendo cu e vision tabatin su aplicacion principal den e dia di Señor, loke Jesús a bisa ta duna spiertamento di cu situacion similar por ta sperá den congregacion di cristian ungí di nos mes dia.—Revelacion 1:10, 19.

 7. Ken Juan a mira den e promé vision, i pakico esei ta tanto importante i emocionante pa nos djawe?

⁷ Den e promé vision, Juan a mira Señor Jesucristo radiante den su gloria celestial. Kico por ta mas apropiado pa un buki di profecía relacioná cu e gran dia dje Señor comisioná pa cielo? I kico por ta mas importante pa nos, cu ta biba awor den tal periodo di tempo i prestando atencion cuidadoso na tur mandamento di dje? Además, ta ki emocionante pa apoyador dje soberanía di Jehova Dios recibi siguranza di cu e Simía mesiánico, despues di a wanta tur prueba i persecucion cu Satanás a manda riba dje i di a sufri di morto den agonía ora su “hilchi” tabata machicá casi 2.000 aña pasá, awor ta bibo den cielo, duná poder pa duna triunfo completo ne gran propósito di Dios!—Génesis 3:15.

 8. Jesús tabata puesto pa cua accion e ora ei?

⁸ Ta keda bisto cu Jesús ta puesto awor pa dal paso como Rey entronizá. El a ser nombrá como Ehecutor Principal di Jehova pa cumpli cu huicio final di Jehova Dios contra e mal sistema di cosnan bieu i su dios diabólico, Satanás. E ta presente també pa huzga esnan di su congregacion di ungínan i e multitud grandi di hende cu ta asociá cu nan, i també huzga mundo.—Revelacion 7:4, 9; Echo 17:31.

 9. (a) Ki detaye Juan a duna di Jesucristo glorificá meimei di candelaria di oro? (b) E sitio semehante di tempel i e bistí cu Jesús tabatin bistí, ta indica kico? (c) Kico su faha di oro ta nifica?

⁹ Ora Juan a tende e sonido di un boz fuerte, el a bira i lo sigiente ta loke el a mira: “Mi a bira pa mira e boz cu a papia cu mi, i, despues di a bira, mi a mira siete candelaria di oro.” (Revelacion 1:12) Mas tardi, Juan a haya sa loke e siete candelaria a simboliza. Pero e persona meimei dje candelaria ta loke a hala su atencion. Tabatin “meimei dje candelaria un persona semehante dje yiu di hende, bistí na paña cu a yega te na su pia, i fahá rond di pecho cu faha di oro.” (Revelacion 1:13) Jesús, e “yiu di hende,” a presenta dilanti Juan, un testigo temorizá, den forma magnífico i resplandiente. El a presenta den gloria briyante meimei di candelaria di oro na flam. E lugar parecido di tempel a duna e impresion na Juan di cu Jesús tabata presente hungando papel dje gran Sumosacerdote di Jehova, cu poder di huzga. (Hebreo 4:14; 7:21-25) Su impresionante bistí largu a cuadra cu su puesto sacerdotal. Mescos cu sumosacerdote hudío di antigua, el a bisti faha—un faha di oro riba su pecho pe cubri su curazón. Esei ta nifica cu, cu tur su curazón, lo e cumpli cu su comision divino cu el a recibi di Jehova Dios.—Éxodo 28:8, 30; Hebreo 8:1, 2.

10. (a) E cabei blancu di Jesús manera sneu i su wowo ardiente, a indica kico? (b) E pia di Jesús manera coper briyante tin ki nificacion?

¹⁰ Juan a sigi duna detaye: “Además, su cabez i su cabei tabata blancu manera lana blancu, manera sneu, i su wowo manera flam di candela.” (Revelacion 1:14) Su cabei blancu manera sneu ta indica sabiduría cu ta bini cu un bida largu. (Compara cu Proverbio 16:31.) I su wowo ardiente ta mustra cu e ta spierto, alerto, mientras cu e ta scudriña, ta haci prueba, of ta expresa indignacion. Asta e pia di Jesús a hala atencion di Juan: “I su pia tabata manera coper fini briyando den fornu; i su boz tabata manera e sonido di hopi awa.” (Revelacion 1:15) Den e vision, e pia di Jesús tabata manera coper, briyando fuertemente—mashá apropiado pa un persona cu sa camna celosamente i cu ta bon pará den e presencia di Jehova Dios. Además, aunque den e Bijbel hopi bez oro ta simboliza cosnan divino, tin bez cu coper ta representa cosnan humano.c Pues, e pia di Jesús briyando manera coper fini ta hácinos corda ki “bonita” su pia tabata ora el a camna riba tera predicando e bon nobo.—Isaías 52:7; Romano 10:15.

11. (a) E pia glorioso di Jesús ta hácinos corda kico? (b) E boz di Jesús cu “tabata manera e sonido di hopi awa” a indica kico?

¹¹ Siguramente, como un hende perfecto, Jesús a manifesta un splendor cu angel i hende a mira. (Juan 1:14) Su pianan glorioso ta hácinos corda també cu e ta camna riba tera santo den e organizacion di Jehova Dios, den locual e ta Sumosacerdote. (Compara cu Éxodo 3:5.) Además, su boz ta klink manera donder mescos cu catarata enorme di awa. E ta impresiona i ta inspira temor, locual ta apropiado pa un persona yamá oficialmente e Palabra di Dios, esun cu ta bini “pa huzga e tera habitá cu husticia.”—Echo 17:31; Juan 1:1.

12. Kico e “spada largu i skerpi di dos fila” ta nifica?

¹² “I e tabatin den su man drechi siete strea, i saliendo for di su boca tabatin un spada largu i skerpi cu dos fila, i su cara tabata manera solo ora e ta kima cu forza. I ora mi a miré, mi a cai manera morto na su pia.” (Revelacion 1:16, 17a) Poco despues, Jesús mes a splica e nificacion dje siete strea. Pero ripara loke ta sali for di su boca: “un spada largu i skerpi cu dos fila.” Ki un rasgo apropiado! Pasobra Jesús ta esun nombrá pa pronuncia e huicio final di Jehova contra Su enemigonan. Declaracion decisivo for di su boca ta resulta den ehecucion di tur e malbadonan.—Revelacion 19:13, 15.

13. (a) E cara briyante i radiante di Jesús ta hácinos corda kico? (b) Detaye cu Juan a duna di Jesús ta dúnanos cua impresion general?

¹³ E cara briyante i relombrante di Jesús ta hácinos corda cu e cara di Moisés a saca luz radiante despues cu Jehova a comunica cuné riba e Ceru di Sinaí. (Éxodo 34:29, 30) Corda, també, cu ora Jesús tabata transformá dilanti tres apóstol di dje casi 2.000 aña pasá, “su cara a briya manera solo, i su bistí exterior a bira briyante manera luz.” (Mateo 17:2) Awor, den un representacion di Jesús den un vision durante e dia di Señor, su cara di igual manera a refleha e splendor radiante di un persona cu tabata den e presencia di Jehova. (2 Corintio 3:18) Realmente, e impresion general cu e vision di Juan a comunica ta di gloria briyante. For di su cabei blancu manera sneu, su wowo ardiente, i su cara briyante te na su pia radiante, tabata un vision sublime di Esun cu ta biba awor “den luz inacercable.” (1 Timoteo 6:16) Ki bibo tabata e realismo dje vision! Con Juan asombrá a reaccioná? Segun e apóstol: “I ora mi a miré, mi a cai manera morto na su pia.”—Revelacion 1:17.

14. Ora nos ta leza dje vision di Juan di Jesús glorificá, con esei mester afectános?

¹⁴ Awe, detaye dje vision di Juan, yen di color, ta yena e pueblo di Dios cu aprecio sincero. Ya caba, mas cu 90 aña a pasa di dia di Señor, durante locual e vision ta sigi cu su cumplimento emocionante. E gobernacion dje Reino di Jesús ta un realidad bibiente i presente i no ta un speranza pa futuro. P’sei, ta apropiado pa nos como e pueblo leal dje Reino sigi investiga, maraviyando na loke Juan a detaya den e promé vision aki i scucha obedientemente ne palabra di Jesucristo glorificá.

[Nota]

[Plachinan na página 23]

Resto arqueológico di stad unda e siete congregacion tabata situá ta confirma e relato bíblico. Esei tabata e lugar unda hende cristian dje promé siglo a recibi mensahe animador di Jesús cu awe ta estimula e congregacion mundial

PÉRGAMO

SMIRNA

TIATIRA

SARDIS

EFESO

FILADELFIA

LAODICEA

Capítulo 6

Revelando un secreto sagrado

 1. Con nos mester reaccioná ne vision briyante cu ta pará skirbí den Revelacion 1:10-17?

ASOMBROSO en berdad ta e vision di Jesús den cielo! Sin duda, si nos tabatei cu apóstol Juan pa miré, nos també lo a keda pasmá pe gloria briyante i lo a cai flau mescos cuné. (Revelacion 1:10-17) E sublime vision inspirá a ser conserbá pa estimulános djawe na accion. Mescos cu Juan, nos humildemente tin cu demonstra aprecio pa tur loke e vision ta nifica. Láganos semper tene respet reverencial pe puesto di Jesús como Rey entronizá, como Sumosacerdote, i Huez.—Filipense 2:5-11.

“E promé i e último”

 2. (a) Jesús a presenta su mes cu cua título? (b) Kico Jehova kier men ora el a bisa: “Mi ta e promé i e último”? (c) E título di Jesús “e Promé i e Ultimo” ta hala atencion na kico?

² No obstante, nos temor reverencial no mester bira un miedu enfermo. Jesús a duna Juan fortaleza, manera e apóstol a sigi bisa: “I el a pone su man drechi riba mi i a bisa: ‘No tene miedu. Mi ta e Promé i e Ultimo, i esun bibiente.’” (Revelacion 1:17b, 18a) Den Isaías 44:6, cu derecho Jehova a pinta su mes posicion como e único Dios Todopoderoso, bisando: “Mi ta e promé i último, i fuera di mi no tin Dios.”a Ora Jesús a presenta su mes cu e título “e Promé i e Ultimo,” e no a bisa cu e tabata igual cu Jehova, e Gran Creador. E tabata usa e título cu Dios a duné correctamente. Den Isaías, Jehova a saca un declaracion tocante su puesto único como e Dios berdadero. E ta Dios eterno, i fuera di dje no ta existi Dios en berdad. (1 Timoteo 1:17) Den Revelacion, Jesús tabata papia tocante e título duná na dje, halando atencion na su resureccion único.

 3. (a) Di ki manera Jesús tabata e “Promé i e Ultimo”? (b) Kico kier men cu Jesús tin “yabi di morto i di Hades”?

³ Jesús en berdad tabata e “Promé” hende pa ser resusitá na un bida inmortal spiritual. (Colosense 1:18) Además, e ta “Ultimo” pa ser resusitá asina pa Jehova Dios personalmente. Asina, el a bira “esun bibiente . . . bibando pa semper hamás.” E ta disfruta di inmortalidad. Asina, e ta mescos cu su Tata inmortal, cu ta ser yamá e “Dios bibo.” (Revelacion 7:2; Salmo 42:2) Pa tur lo demás di humanidad, Jesús mes ta e “resureccion i e bida.” (Juan 11:25) Na armonía cu esei, el a bisa Juan: “Mi a bira morto, pero, mira! mi ta biba pa semper hamás, i mi tin e yabi di morto i di Hades.” (Revelacion 1:18b) Jehova a duné autoridad di resusita hende morto. P’sei Jesús por a bisa cu e tin e yabi pa habri porta pa hende morto cu morto i Hades (graf) tin cerá den nan.—Compara cu Mateo 16:18.

 4. Jesús a repiti cua mandamento, i pe beneficio di ken?

⁴ Awor Jesús a repiti su mandamento di skirbi e vision, bisando Juan: “Skirbi loke bo a mira, i loke tá i loke lo sosode despues di esei.” (Revelacion 1:19) Kico excitante Juan a sigi duna di conoce pa nos instruccion?

Strea i Candelaria

 5. Con Jesús a splica e “siete strea” i e “siete candelaria”?

⁵ Juan a mira Jesús meimei di siete candelaria di oro cu siete strea den su man drechi. (Revelacion 1:12, 13, 16) Awor Jesús a splica lo sigiente: “En cuanto e secreto sagrado dje siete strea cu bo a mira den mi man drechi, i dje siete candelaria di oro: E siete strea kier men angel di siete congregacion, i e siete candelaria kier men siete congregacion.”—Revelacion 1:20.

 6. Kico e siete strea ta representa, i pakico mensahe tabata dirigí specialmente na nan?

⁶ “Strea” ta “angel dje siete congregacion.” Den Revelacion, tin bez cu strea ta simboliza angel mes, pero apenas Jesús lo usa un skirbidor humano pa skirbi na persona spiritual invisibel. P’sei, “strea” mester ta superintendente humano, of anciano di congregacion, considerá como mensahero di Jesús.b Mensahe ta ser dirigí ne strea, pasobra eseinan ta responsabel pa atende ne tao di Jehova Dios.—Echo 20:28.

 7. (a) Kico ta mustra cu e papiamento di Jesús cu un angel so den cada congregacion no kier men cu tin un anciano so den cada congregacion? (b) E siete strea den e man drechi di Jesús realmente ta representa ken?

⁷ Siendo cu Jesús a papia cu un solo “angel” den cada congregacion, esei kier men cu cada congregacion tin un anciano so? No. Asta den dia di Pablo caba, e congregacion di Efeso tabatin varios anciano, i no un so. (Revelacion 2:1; Echo 20:17) Pues, den dia di Juan, ora mensahe tabata mandá ne siete strea pa ser lezá pe congregacionan (incluyendo esun den Efeso), strea mester a representa tur esnan cu a sirbi den cuerpo di anciano den e congregacion ungí di Jehova. Di igual manera, superintendente djawe ta leza pa nan congregacion tur carta cu nan ta recibi dje Cuerpo Gobernante, componí di superintendente ungí cu ta sirbi bao di Jesús como Cabez. E cuerpo di anciano local tin cu percura pa nan congregacion sigi e conseho di Jesús. Naturalmente, e conseho ta pe beneficio di tur hende cu ta asocia cu e congregacion, i no pa anciano so.—Mira Revelacion 2:11a.

 8. Jesús teniendo anciano den su man drechi ta indica kico?

⁸ Siendo cu Jesús ta Cabez dje congregacion, e texto ta bisa correctamente cu anciano ta den su man drechi, esta, bao di su control i direccion. (Colosense 1:18) Jesús ta e Wardador Principal, i anciano ta subwardador.—1 Pedro 5:2-4.

 9. (a) Kico e siete candelaria ta representa, i pakico candelaria ta un símbolo apropiado pa nan? (b) Probablemente e vision a haci apóstol Juan corda kico?

⁹ E siete candelaria ta e siete congregacion na ken Juan a dirigi e buki di Revelacion: Efeso, Smirna, Pérgamo, Tiatira, Sardis, Filadelfia, i Laodicea. Pakico candelaria ta simboliza e congregacionan? Pasobra hende cristian, sea individualmente of en conhunto como congregacion, tin cu ‘laga nan luz luzá dilanti hende’ den e mundo aki den scuridad. (Mateo 5:14-16) Además, candelaria tabata un parti dje muebel dje tempel di Salomón. Yamando congregacion candelaria probablemente a haci Juan corda cu, den un sentido simbólico, cada congregacion local dje ungínan ta e “tempel di Dios,” un lugar di biba pe spiritu di Dios. (1 Corintio 3:16) Además, cumpliendo cu loke arreglo dje tempel hudío a simboliza, miembro dje congregacion di ungínan ta sirbi como “un sacerdocio real” den e gran arreglo dje tempel spiritual di Jehova, di locual Jesús ta Sumosacerdote i unda Jehova ta biba personalmente den e Lugar Santísimo celestial.—1 Pedro 2:4, 5, 9; Hebreo 3:1; 6:20; 9:9-14, 24.

E apostasía grandi

10. Kico a sosode e sistema hudío na aña 70 EC, i apoyador di dje cu no a arrepentínan?

¹⁰ Ora Juan a skirbi Revelacion, cristianismo tabatin mas cu 60 aña di existencia. Na principio, el a sobrebiba 40 aña di oposicion constante dje religion hudío. Anto e sistema hudío a recibi un golpi mortal na aña 70 EC ora hudío no arrepentido a perde nan identidad nacional i loke pa nan tabata casi un ídolo—e tempel den Jerusalem.

11. Pakico tabata tanto oportuno pe Wardador Principal adverti e congregacionan tocante tendencia cu tabata desaroya?

¹¹ No obstante, apóstol Pablo a profetiza cu lo tin un apostasía den cristian ungí, i mensahe di Jesús a mustra cu den e behez di Juan tal apostasía tabata desaroya caba. Juan tabata e último di esnan cu a actua como frena contra esfuerzo total di Satanás di corrumpi e simía dje muher. (2 Tesalonicense 2:3-12; 2 Pedro 2:1-3; 2 Juan 7-11) Pues, tabata un tempo apropiado pe Wardador Principal di Jehova Dios skirbi na anciano dje congregacionan, advertiendo di tendencia cu tabata desaroya i animando esnan cu curazón sincero pa para firme na fabor di husticia.

12. (a) Con apostasía a desaroya den siglonan despues dje dia di Juan? (b) Con cristiandad a yega di existi?

¹² Nos no sa con congregacion di aña 96 EC a reacciona na mensahe di Jesús. Pero nos sí sa cu e apostasía a desaroya rápidamente despues di morto di Juan. Hende yamá “cristian” a bandona uso dje nomber di Jehova i a pone “Señor” of “Dios” den su lugar den manuscrito di Bijbel. Na siglo cuater, e siñanza falso dje trinidad a infiltra den e congregacion. Durante e mesun tempo, nan a adopta e idea di inmortalidad di alma. Finalmente, emperador romano Constantino a duna aprobacion estatal ne religion “cristian,” i esei a hiba ne formacion di cristiandad, unda religion i político a uni hunto pa manda pa mil aña. Tabata fácil pa bira “cristian” dje moda nobo. Tribu henter a ahusta nan creencia pagano di antes pa conforma cu tal religion. Hopi lider di cristiandad a bira tirano político opresivo, usando spada pa forza hende di acepta nan religion apóstata.

13. Apesar dje spiertamento di Jesús contra secta, cua camina cristian apóstata a scoge?

¹³ Cristian apostatando a pasa por halto por completo dje palabra di Jesús dirigí ne siete congregacion. Jesús a adverti efesionan pa rebiba e amor cu nan tabatin na principio. (Revelacion 2:4) No obstante, miembro di cristiandad, ya cu nan no tabata uní den amor pa Jehova Dios, a bringa gera cruel i a persigi un e otro horriblemente. (1 Juan 4:20) Jesús a adverti e congregacion den Pérgamo contra formacion di secta. Pero, secta a presenta asta den siglo dos, i awe cristiandad tin miles di secta i religion den pelea cu otro.—Revelacion 2:15.

14. (a) Aunque Jesús a adverti contra caimento den morto spiritual, hende cu a yama nan mes cristian a scoge cua camina? (b) Di ki manera hende cu a yama nan mes cristian no a presta atencion ne spiertamento di Jesús contra idolatría i inmoralidad?

¹⁴ Jesús a spierta e congregacion di Sardis contra morto spiritual. (Revelacion 3:1) Mescos cu hende di Sardis, hende yamá cristian a lubida lihé obra cristian i pronto a duna e trabao sumamente importante di predica na un grupo chikito di clero cu nan a paga salario. Jesús a spierta e congregacion den Tiatira contra idolatría i fornicacion. (Revelacion 2:20) Sin embargo, cristiandad ta acepta abiertamente e uso di imagen, i també ta promove e idolatría menos abierto di nacionalismo i materialismo. I inmoralidad, cu aveces nan ta condena den nan predicashi, nan semper a tolera na tur parti.

15. E palabra di Jesús pe siete congregacion a desenmascara kico en cuanto religion di cristiandad, i clero di cristiandad a resulta di ser kico?

¹⁵ Asina, e palabra di Jesús pe siete congregacion ta saca na cla e fracaso total di tur religion di cristiandad di ser e pueblo special di Jehova Dios. Realmente, e clero di cristiandad ta miembro di mas prominente dje simía di Satanás. Mencionando nan como ‘e malbadonan,’ apóstol Pablo a profetiza cu nan “presencia ta segun e obramento di Satanás cu tur obra poderoso i siñal i seña mentiroso i cu tur engaño inhusto.”—2 Tesalonicense 2:9, 10.

16. (a) Lider di cristiandad ta mustra odio special pa ken? (b) Kico a sosode den cristiandad entre aña 476 i 1450 EC? (c) E rebelion protestante, of reformacion, a cambia e camina apóstata di cristiandad?

¹⁶ Aunque lider político i religioso di cristiandad ta bisa cu nan ta wardador dje tao di Dios, nan a manifesta un odio special pa hende cu a purba di anima lezamento di Bijbel of hende cu a desenmascará nan costumber antibíblico. Tanto Johannes Hus como William Tyndale, un traductor di Bijbel, tabata persigí i martirizá. Entre aña 476 te 1450 EC, yamá época di ignorancia, e gobernacion di hende apóstata a culmina den e diabólico Inquisicion católico. Ken cu a desmenti e siñanza of autoridad dje iglesia tabata sofocá sin misericordia, i miles di hende incontable yamá herético tabata matá cu tortura of kimá mará na staca. Asina Satanás a haci esfuerzo pa aplasta rápidamente cualkier berdadero simía dje organizacion di Dios semehante di su esposa. Ora e rebelion, of reformacion, protestante a cuminza (desde 1517 padilanti), hopi religion protestante a manifesta un spiritu di intolerancia similar. Nan també a bira culpable di dramamento di sanger martirizando hende cu a haci esfuerzo di keda leal na Dios i Cristo. Berdaderamente, “e sanger dje santonan” a basha libremente!—Revelacion 16:6; compara cu Mateo 23:33-36.

E simía ta persevera

17. (a) E comparacion di trigo i mal yerba di Jesús a profetiza di kico? (b) Kico a sosode na 1918, resultando den cua rechazo i cua nombramento?

¹⁷ Den su comparacion dje trigo i mal yerba, Jesús a profetiza dje tempo di scuridad cu lo existi ora cristiandad tabata na pleno mando. No obstante, durante tur e siglonan di apostasía, a existi hende cristian semehante di trigo, hende berdaderamente ungí. (Mateo 13:24-29, 36-43) P’sei, ora e dia di Señor a habri den October di 1914, ainda tabatin cristian berdadero riba tera. (Revelacion 1:10) Ta parce cu Jehova a bini na su tempel spiritual pa huzgamento rond di tres aña i mei despues, na 1918, i Jesús, su “mensahero di pacto,” a compañé. (Malaquías 3:1; Mateo 13:47-50) Esei tabata e tempo pe Doño rechaza finalmente cristian falso i nombra e ‘sclabo fiel i prudente riba tur su propiedad.’—Mateo 7:22, 23; 24:45-47.

18. Cua “ora” a yega na 1914, i tabata tempo pe sclabo haci kico?

¹⁸ També tabata tempo pe sclabo presta atencion special na loke tabata pará skirbí den mensahe di Jesús dirigí ne siete congregacion, segun cu nos ta mira den loke e ta bisa. Por ehempel, Jesús a menciona su binimento pa huzga e congregacionan, cua huzgamento a cuminza na 1918. (Revelacion 2:5, 16, 22, 23; 3:3) El a bisa cu lo e proteha e congregacion di Filadelfia dje “ora di prueba, cu tin cu bini pa tur e tera habitá.” (Revelacion 3:10, 11) Tal “ora di prueba” a yega solamente na habrimento dje dia di Señor na 1914, despues di locual hende cristian a haya prueba di nan lealtad ne Reino establecí di Dios.—Compara cu Mateo 24:3, 9-13.

19. (a) Kico e siete congregacion ta simboliza awe? (b) Ken a asociánan na gran cantidad cu cristian ungí, i pakico e conseho di Jesús i e situacion cu el a pinta ta aplica na nan també? (c) Con nos mester considera mensahe di Jesús pe siete congregacion dje promé siglo?

¹⁹ P’sei, e palabra di Jesús dirigí ne congregacionan tabatin nan aplicacion principal desde 1914. Den tal situacion, e siete congregacion ta simboliza tur congregacion di cristian ungí durante e dia di Señor. Además, durante e último 70 aña of mas, un gran cantidad di creyente cu tin e speranza di biba pa semper den Paradijs riba tera, a unínan cu cristian ungí cu Juan a simboliza. E conseho di Jesucristo glorificá i e situacion cu el a haya den e siete congregacion como resultado di su inspeccion ta aplica cu igual vigor ne multitud grandi, siendo cu tin un solo ley di husticia i fieldad pa tur sirbidor di Jehova Dios. (Éxodo 12:49; Colosense 3:11) Pues, mensahe di Jesús pe siete congregacion dje promé siglo den Asia Menor no ta simplemente un curiosidad di pasado. Nan kier men bida of morto pa cada un di nos. P’sei, láganos scucha cu cuidao e palabra di Jesús.

[Nota]

[Kuadro na página 32]

Un tempo di prueba i huzgamento

Jesús tabata bautizá den e rio Jordan i ungí pa ser Rey rond di October di aña 29 EC. Tres aña i mei despues, na aña 33 EC, el a bai ne tempel den Jerusalem i a saca afó hende cu tabata hacié un cueba di ladrón. Ta parce cu esei ta paralelo cu e tres aña i mei desde e entronizacion di Jesús den cielo den October di 1914 te cu su binimento pa inspecciona hende yamá cristian ora e huzgamento a cuminza cu e cas di Dios. (Mateo 21:12, 13; 1 Pedro 4:17) Pronto na 1918 e sirbishi di Reino dje pueblo di Jehova Dios a topa cu gran oposicion. Esei tabata un tempo di prueba mundial, i hende temeroso tabata seftá. Den Mei di 1918 clero di cristiandad a instiga encarcelacion di oficial dje Sociedad Watch Tower, pero nuebe luna despues nan a sali liber. Mas tardi, nan a retirá e acusacion falso contra nan. Desde 1919 padilanti, e organizacion dje pueblo di Dios, purbá i refiná, a bai dilanti celosamente pa proclama e Reino di Jehova Dios mediante Cristo Jesús como e único speranza pa humanidad.—Malaquías 3:1-3.

Ora Jesús a cuminza su inspeccion na 1918, sin duda e clero di cristiandad a recibi un huicio desfavorable. Nan no solamente a instiga persecucion contra e pueblo di Dios sino també a keda mashá culpable di dramamento di sanger apoyando nacion den conflicto den e promé gera mundial. (Revelacion 18:21, 24) Anto tal clero a pone nan speranza den e Liga di Nacion cu hende a traha. Hunto cu tur e imperio mundial di religion falso, na 1919 cristiandad a cai completamente for di fabor di Dios.

[Mapa na página 28]

(Pa e teksto den su formato kompleto, wak e publikashon)

EFESO

SMIRNA

PÉRGAMO

TIATIRA

SARDIS

FILADELFIA

LAODICEA

[Plachinan na página 31]

Religion di cristiandad ta keda mashá culpabel pa dramamento di sanger ya cu el a persigi i a mata hende cu a traduci, a leza, of solamente tabata doño di Bijbel

Capítulo 7

Rebiba e promé amor!

EFESO

 1. E promé mensahe di Jesús tabata dirigí na cua congregacion, i el a haci superintendente corda kico?

E PROMÉ mensahe di Jesús tabata pe congregacion den Efeso, ne tempo ei un stad próspero na costa di Asia Menor cerca e isla di Patmos. El a manda Juan: “Skirbi e angel dje congregacion di Efeso: Esaki ta loke esun ta bisa cu ta tene e siete strea den su man drechi, i esun cu ta camna meimei dje siete candelaria di oro.” (Revelacion 2:1) Mescos cu den e otro seis mensahe, aki Jesús a hala atencion na un rasgo cu ta indica su puesto di autoridad. El a haci anciano di Efeso corda cu tur anciano ta bao di su mes superintendencia protector i cu e ta inspecciona tur congregacion. Te den nos tempo, el a sigi eherce su hefatura amoroso, vigilando riba anciano i pastoreando bondadosamente tur hende asociá cu e congregacion. De bez en cuando, e ta ahusta arreglo dje congregacion di manera cu e luz por luza cu mayor claridad. Sí, Jesús ta e Wardador Principal riba e tao di Dios.—Mateo 11:28-30; 1 Pedro 5:2-4.

 2. (a) Jesús a encomenda e congregacion di Efeso pa cua cosnan excelente? (b) Ta parce cu anciano di Efeso a obedece cua conseho di apóstol Pablo?

² Anto Jesús a establece un modelo pa tur siete mensahe di dje menos dos, cuminzando cu palabra caloroso di encomendacion. Pa esnan di Efeso, e tabatin e sigiente mensahe: “Mi conoce boso echonan, i boso afán i awante, i cu boso no por soporta mal hende, i cu boso ta pone na prueba esnan cu ta bisa cu nan ta apóstol, pero cu no tá, i boso a háyanan mentiroso. Boso també ta mustra awante, i boso a wanta pa causa di mi nomber, i no a cansa.” (Revelacion 2:2, 3) Hopi aña promé, apóstol Pablo a adverti anciano di Efeso tocante “lobo opresivo,” hende apóstata cu ta molestiá e tao, i el a bisa e ancianonan pa “keda lantá,” sigiendo su mes ehempel di no cansa. (Echo 20:29, 31) Siendo cu Jesús awor a encomendánan pa nan afán i awante i pa nan trabao sin cansa, ta parce cu nan a aplica e conseho di Pablo.

 3. (a) Con “apóstol falso” a purba di gaña hende fiel den nos dia? (b) Pedro a duna cua spiertamento tocante hende apóstata?

³ També, durante e dia di Señor, “apóstol falso” mester a presenta, locual a “papia cosnan trocí pa hiba disípel tras di nan mes.” (2 Corintio 11:13; Echo 20:30; Revelacion 1:10) Nan ta kere cu tur secta di religion den conflicto ta bon, i ta bisa cu Dios no tin un organizacion, i ta nenga cu Jesús a recibi poder di Reino na 1914. Nan ta cumpli cu e profecía di 2 Pedro 3:3, 4: “Den e último dianan lo bini mofador cu nan mofa, andando di acuerdo cu nan mes deseonan i puntrando: ‘Unda ta e presencia primintí di dje? Pues, desde e dia cu nos antepasado a bai drumi den morto, tur cos ta sigi exactamente mescos desde e principio di creacion.’”

 4. (a) Con e orguyo i rebeldía di mofador ta ser manifestá? (b) Hende cristian djawe ta mustra cu nan ta mescos cu efesio mediante cua accion contra opositor mentiroso?

⁴ Tal mofador ta rebela contra e idea di haci declaracion público di nan fe. (Romano 10:10) Nan a busca apoyo di clero di cristiandad i e yudanza di revista noticiero i TV pa plama informe mentiroso tocante nan asociado di antes. Cristian fiel pronto ta descubri cu e papiamento i conducta di tal gañador ta leu for dje berdad. Mescos cu cristian di Efeso, cristian djawe “no por soporta mal hende,” pues nan ta expulsánan for di nan congregacion.a

 5. (a) Jesús a bisa cu efesio tabatin cua debilidad? (b) Efesio mester a corda cua palabra?

⁵ Sin embargo, mescos cu el a haci cu cinco dje siete congregacion, Jesús a concentra riba un problema serio. El a bisa efesio: “No obstante, mi tin esaki contra bo, cu bo a bandona e amor cu bo tabatin na antes.” (Revelacion 2:4) Nan no mester a faya den esei, pasobra Pablo a skírbinan 35 aña promé tocante e ‘gran amor di Dios cu locual el a stímanos,’ i el a urgínan: “Bira imitador di Dios, manera yiunan stimá, i sigi camna den amor, mescos cu Cristo també a stima boso.” (Efesio 2:4; 5:1, 2) Además, e palabra di Jesús tabatin cu ser skirbí permanentemente den nan curazón: “Jehova nos Dios ta un solo Jehova, i bo tin cu stima Jehova bo Dios cu tur bo curazón i cu tur bo alma i cu tur bo mente i cu tur bo forza.” (Marco 12:29-31) Efesio a perde nan promé amor.

 6. (a) Sea cu nos ta haci hopi tempo den e congregacion of ta nobo, nos tin cu vigila contra cua peliger i tendencia? (b) Nos amor pa Dios mester impulsános pa haci kico?

⁶ Sea cu nos ta haci hopi aña den e congregacion of nos ta recién asociá, nos mester vigila pa no perde nos promé amor pa Jehova Dios. Con nos por perdé? Nos por laga pegamento na trabao seglar, e deseo di gana hopi placa, of sigimento tras di placer bira e cos grandi den nos bida. Asina nos por bira hende cu mente carnal en bez di spiritual. (Romano 8:5-8; 1 Timoteo 4:8; 6:9, 10) Nos amor pa Jehova Dios mester impulsános pa corrigi cualkier tendencia asina i ‘sigi busca promé e Reino di Dios i su hustica,’ afin di ‘warda pa nos mes tesoro den cielo.’—Mateo 6:19-21, 31-33.

 7. (a) Kico mester motivános pa sirbi Jehova? (b) Kico Juan a bisa tocante amor?

⁷ Laga un amor sincero i profundo pa Jehova semper ser nos motibo di sirbié. Láganos tene un aprecio fervoroso pa tur loke Jehova i Cristo a haci pa nos. Manera Juan mes a skirbi despues: “Amor ta consisti di esaki, no cu nos a stima Dios, sino cu el a stima nos i a manda su Yiu como sacrificio di reconciliacion pa nos picánan.” Juan a sigi bísanos: “Dios ta amor, i ken cu ta permanece den amor ta permanece den union cu Dios i Dios ta permanece den union cuné.” Nunca laga nos perde nos amor pa Jehova, i pa nos Señor Jesucristo, i pe Palabra bibo di Dios! Nos por expresa tal amor no solamente den sirbishi celoso pa Dios sino també den obedencia ne “mandamento cu nos tin di dje, cu ken cu ta stima Dios mester stima su ruman també.”—1 Juan 4:10, 16, 21; Hebreo 4:12; mira també 1 Pedro 4:8; Colosense 3:10-14; Efesio 4:15.

“Haci e echonan di antes”

 8. Con Jesús a bisa cu efesio mester actua?

⁸ Tal efesio tabatin cu rebiba e amor cu nan tabatin na antes si nan no kier a bai perdí. Jesús a bísanan: “P’sei, corda for di kico bo a cai, i arrepentíbo, i haci e echonan di antes. Si bo no hacié, mi ta bini cerca bo i kita bo candelaria for di su lugar, amenos cu bo arrepentíbo.” (Revelacion 2:5) Con hende cristian den e congregacion di Efeso a recibi tal palabra? Nos no sa. Nos ta spera cu nan a arrepentínan i a logra rebiba nan amor pa Jehova. Si nan no a hacié, anto nan lampi por a ser pagá i nan candelaria kitá. Nan por a perde nan privilegio di haci e berdad briya.

 9. (a) Ki palabra di animacion Jesús tabatin pa efesio? (b) Despues di dianan di Juan, con e congregacionan a pasa por halto dje conseho di Jesús pa efesio?

⁹ No obstante, Jesús tabatin e sigiente mensahe animador pa efesio: “Sin embargo, bo sí tin esaki: bo ta odia echo dje secta di Nicolás, cu ami també ta odia.” (Revelacion 2:6) Por lo menos nan a odia desunion di secta, mescos cu nos Señor Jesucristo ta odié. Sin embargo, cu transcurso di hopi aña, hopi congregacion no a presta atencion ne palabra ei di Jesús. Falta di amor pa Jehova, pe berdad, i pa otro a resulta cu e corriente a híbanan na scuridad spiritual. Nan a bira desuní den hopi secta den conflicto. Copista “cristian” cu no tabatin amor pa Jehova a kita e nomber di Dios mes for di manuscrito griego di Bijbel. Falta di amor també a habri camina pa nan siña den e nomber di cristianismo doctrina babilónico i griego, tal como candela di fiernu, purgatorio, i trinidad. Faltando amor pa Dios i pe berdad, mayor parti di hende cu a yama nan mes cristian a bandona predicacion dje bon nobo dje Reino di Dios. Nan a cai bao di dominacion di un clase di clero egoísta cu a traha su mes reino aki riba tera.—Compara cu 1 Corintio 4:8.

10. Ki situacion religioso a existi den cristiandad na 1918?

¹⁰ Ora cu huzgamento a cuminza cu e cas di Dios na 1918, e clero sectario di cristiandad tabata duna apoyo abierto na Gera Mundial I, urgiendo católico i protestante na tur dos banda pa mata otro. (1 Pedro 4:17) Distinto dje congregacion di Efeso cu a odia loke e secta di Nicolás tabata haci, pa mashá tempo religion di cristiandad tabata infestá cu doctrina na conflicto i contrario cu Dios, i nan clero tabata un parti di mundo, di locual Jesús a bisa cu su disípelnan no mester ta un parti. (Juan 15:17-19) Nan congregacion, cu no a conoce e tema dje Bijbel, e Reino di Dios, no tabata candelaria lagando briya berdad bíblico, ni tampoco nan miembro no tabata un parti dje tempel spiritual di Jehova. Nan homber (i muher) prominente no tabata strea sino tabata revelá di ser miembro dje “malbadonan.”—2 Tesalonicense 2:3; Malaquías 3:1-3.

11. (a) Cua grupo cristian riba esenario di mundo na 1918 a pone na práctico e palabra di Jesús pe efesionan? (b) Kico e grupo cu Juan a simboliza a haci desde 1919 padilanti?

¹¹ Sin embargo, e grupo cu Juan a simboliza a sali for dje dianan tumultuoso dje promé gera mundial cu un amor pa Jehova i pe berdad cu a impulsánan pa sirbié cu celo ardiente. Nan a resisti contra hende cu a purba di introduci secta casi adorando Charles T. Russell, e promé presidente dje Sociedad Watch Tower, despues di su morto na 1916. E grupo cristian ei, cu persecucion i situacion desfavorable a disipliná, claramente a recibi un huicio di nan Doño di “bon hací” i un invitacion pa drenta den su gozo. (Mateo 25:21, 23) Nan a reconoce den loke a sosode den mundo i den nan mes experencia, e cumplimento dje siñal cu Jesús a duna pa marca su presencia invisibel den poder di Reino. Desde 1919 padilanti, nan a progresa pa participa den mas cumplimento dje gran profecía di Jesús: “I e bon nobo di reino lo ser predicá den tur e tera habitá como testimonio pa tur nacion; anto e fin lo yega.” (Mateo 6:9, 10; 24:3-14) Si di algun manera nan a falta amor pa Jehova, e tabata wayá manera flam pa bira ardiente dje tempo ei padilanti.

12. (a) Ki conseho tabata duná den un asamblea histórico na 1922? (b) Cua nomber cristian berdadero a acepta na 1931, i nan a arrepentínan di kico?

¹² Den un asamblea histórico, unda 18.000 di tal cristian a asisti na Cédar Point, Ohío, EUA, dia 5-13 di September, 1922, nan a tende e conseho: “Bolbe ne sirbishi di feld, boso, e yiunan di Dios Haltísimo! . . . Mundo mester sa cu Jehova ta Dios i cu Jesucristo ta Rey di reynan i Señor di señornan. . . . P’sei, anuncia, anuncia, anuncia, e Rey i su Reino.” E nomber precioso di Jehova tabata hací cada bez mas prominente. Na 1931 tal cristian, reuní den un asamblea den Columbus, Ohío, EUA, a alegra pa recibi i acepta e nomber cu Dios mes a indica den e profecía di Isaías, esta, Testigo di Jehova. (Isaías 43:10, 12) Den su número di 1 di Mart, 1939, (na inglés) e nomber dje revista principal dje organizacion tabata cambiá na Toren di Vigilancia Anunciando e Reino di Jehova Dios, asina dunando onor principalmente na nos Creador i su gobierno real. Testigo di Jehova, cu amor renobá pa Jehova, a arrepentínan di posible fayo di antes di onra i engrandece su nomber ilustre i su Reino.—Salmo 106:6, 47, 48.

“Na esun cu ta vence”

13. (a) Cua bendicion a spera efesio si nan a ‘vence’? (b) Con efesio cristian por a ‘vence’?

¹³ Finalmente, manera el a haci també den tur otro mensahe, Jesús a hala atencion ne spiritu di Dios dunando di conoce mediante Jesús e recompensa pa fieldad. El a bisa na efesio: “Laga ken cu tin orea tende loke e spiritu ta bisa ne congregacionan: Na esun cu ta vence lo mi permitié come dje palu di bida, cu ta den e paradijs di Dios.” (Revelacion 2:7) Hende cu tabatin orea pa tende a keda mashá puesto pa obedece e mensahe vital, sabiendo cu e no a bini dje iniciativa di Jesús sino a bini di Señor Soberano Jehova mes mediante su spiritu santo, of forza activo. Con nan por ‘vence’? Door di sigi cuidadosamente e pasonan di Jesús, cu a warda integridad te na morto i p’sei por a bisa: “Tuma curashi! mi a vence mundo.”—Juan 8:28; 16:33; mira també 1 Juan 5:4.

14. E “paradijs di Dios” cu Jesús a menciona mester referi na kico?

¹⁴ Siendo cu nan no ta spera di biba den un tera paradísico, pakico cristian ungí, tal como efesionan, ta ser duná e recompensa di come “dje palu di bida, cu ta den e paradijs di Dios”? Esei no por ta e Paradijs restora aki riba tera, siendo cu e 144.000 cristian ungí, incluyendo esnan dje congregacion di Efeso, ta ser cumprá for di den humanidad pa goberna cu e Lamchi, Cristo Jesús, riba e Ceru di Sion celestial como yiu spiritual di Dios. (Efesio 1:5-12; Revelacion 14:1, 4) P’sei, e palabra ei mester referi ne region celestial parecido di un parque cu tal vencedor ta hereda. Ei, “den e paradijs di Dios,” sí, den e presencia di Jehova Dios mes, tal vencedor cu a ser duná inmortalidad lo sigi biba eternamente, locual nan comimento dje palu di bida ta simboliza.

15. Pakico e animacion di Jesús di vence ta di interés vital pe multitud grandi djawe?

¹⁵ Anto, con ta para cu leal apoyador terrenal dje 144.000 ungínan? Un multitud grandi di Testigo compañé també ta vence. Pero nan tin e speranza di drenta den un paradijs terrenal, unda nan por bebe dje “rio di awa di bida” i haya curacion den “foyo di palu” plantá cant’i rio. (Revelacion 7:4, 9, 17; 22:1, 2) Si bo ta dje grupo ei, abo també expresa bo amor caloroso pa Jehova Dios i sali triunfante den e conquista di fe. Asina bo por alcanza e felicidad di bida eterna den e tera paradísico.—Compara cu 1 Juan 2:13, 14.

[Nota]

[Kuadro na página 36]

Alabanza amoroso pa Jehova i pa su Yiu

Den e buki di cantica cu e pueblo di Jehova a produci na 1905, cantica alabando Jesús tabata dobel esnan alabando Jehova Dios. Den nan buki di cantica di 1928, cantica alabando Jesús tabata mas of menos igual cu esnan alabando Jehova. Pero den e último buki di cantica di 1984, cuater bez mas cantica ta onra Jehova cu ta onra Jesús. Esei ta di acuerdo cu e palabra di Jesús mes: “E Tata ta mayor cu mi.” (Juan 14:28) Amor pa Jehova mester ta promé, compañá cu un amor profundo pa Jesús i un aprecio pa su precioso sacrificio i su puesto como Sumosacerdote i Rey cu Dios a nombra.

[Tabèl na página 34]

Modelo di Jesús di duna conseho

(citando capítulo i versículo di Revelacion)

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pérgamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodicea 3:14 — 3:15-17 3:18-20 3:21

Capítulo 8

Forzando pa ser vencedor

SMIRNA

 1. (a) Sigientemente, cua congregacion a recibi un mensahe di Jesús glorificá? (b) Yamando su mes “e Promé i e Ultimo,” Jesús a haci hende cristian den e congregacion corda kico?

AWE, Efeso di antigua ta solamente ruina. Pero ainda tin un stad druk ne sitio unda Jesús a manda su segundo mensahe. Rond di 56 kilometer panort dje ruina di Efeso den e stad turco di Izmir, tin asta awe kuater congregacion celoso di Testigo di Jehova. Den e promé siglo Smirna tabata situá ei. Awor, leza e sigiente palabra di Jesús: “I pe angel dje congregacion di Smirna, skirbi: Esaki ta loke e ta bisa, ‘e Promé i e Ultimo,’ cu a yega di ser morto i a bolbe biba di nobo.” (Revelacion 2:8) Bisando esei na hende cristian den Smirna, Jesús a hácinan corda cu e tabata e promé wardador di integridad cu Jehova Dios a resusitá directamente na un bida spiritual inmortal i e último pa ser lantá asina. Jesús mes lo resusita tur otro cristian ungí. P’sei e ta bon capacitá pa duna conseho na su rumanan, cu ta spera di participa di bida celestial inmortal cuné.

 2. Pakico e palabra di Esun cu a “yega di ser morto pero a bolbe biba di nobo” ta consola tur hende cristian?

² Jesús a hiba delantera wantando persecucion pa causa di husticia, i el a recibi e debida recompensa. Su fieldad te na morto i su resureccion despues ta e fundeshi di speranza di tur hende cristian. (Echo 17:31) E echo cu Jesús “a yega di ser morto i a bolbe biba di nobo” ta duna prueba cu nada cu tin cu ser wantá pa causa dje berdad ta en bano. E resureccion di Jesús ta un fuente di profundo estímulo pa tur hende cristian, specialmente ora nan tin cu sufri pa nan fe. Esei ta bo situacion? Anto e sigiente palabra di Jesús pe congregacion den Smirna por animábo també:

 3. (a) Cua estímulo Jesús a duna hende cristian den Smirna? (b) Aunque hende cristian den Smirna tabata pober, pakico Jesús a bisa cu nan tabata “ricu”?

³ “Mi conoce bo tribulacion i bo pobreza—pero bo ta ricu—i e blasfemia di parti di esnan cu ta yama nan mes hudío pero cu no tá sino ta un sinagoga di Satanás.” (Revelacion 2:9) Jesús no tabatin ningun crítico pa su rumanan den Smirna, solamente encomendacion caloroso. Nan a sufri di hopi tribulacion pa causa di nan fe. Materialmente nan tabata pober, probablemente pasobra nan tabata fiel. (Hebreo 10:34) Sin embargo, nan interés principal tabata den cosnan spiritual, i nan a warda tesoro den cielo, manera Jesús a consehá. (Mateo 6:19, 20) P’sei, pe Wardador Principal, nan tabata “ricu.”—Compara cu Santiago 2:5.

 4. Hende cristian den Smirna a sufri di oposicion di parti di ken, i con Jesús a considera tal opositor?

⁴ Jesús specialmente a menciona cu cristian den Smirna tabatin cu soporta hopi oposicion di hudío carnal. Na tempo anterior, hopi hende dje religion hudío a persisti di opone e plamamento di cristianismo. (Echo 13:44, 45; 14:19) Awor, poco aña so despues di caimento di Jerusalem, hudío den Smirna tabata demonstra e mesun spiritu satánico. No ta straño cu Jesús a míranan como “un sinagoga di Satanás”!a

 5. Cua prueba di futuro a spera cristian den Smirna?

⁵ Enfrentá cu tal odio, cristian di Smirna a recibi consuelo di Jesús: “No tene miedu di loke boso ta bai sufri. Mira! e Diabel lo sigi tira algun di boso den prisón pa boso ser poní na prueba plenamente, i pa boso tene tribulacion diez dia. Resulta di ser fiel te na morto mes, i lo mi duna boso e corona di bida.” (Revelacion 2:10) Den esei Jesús a usa tres bez e palabra griego meervoud “boso,” mustrando cu su palabra ta inclui e congregacion en general. Jesús no por a primintí cu e prueba di hende cristian den Smirna lo termina pronto. Algun di nan a sigi recibi persecucion i encarcelacion. Nan tabatin tribulacion pa “diez dia.” Diez ta un cifra cu ta simboliza loke ta completo of e total di cosnan terrenal. Asta tal wardador di integridad spiritualmente ricu tabatin cu recibi un prueba cabal durante nan bida humano.

 6. (a) Pakico cristian den Smirna no tabatin cu tene miedu? (b) Con Jesús a conclui su mensahe pe congregacion den Smirna?

⁶ No obstante, hende cristian den Smirna no mester a tene miedu ni haci compromiso. Si nan a keda fiel te na fin, tabatin wardá pa nan como recompensa e “corona di bida,” cu den nan caso ta bida inmortal den cielo. (1 Corintio 9:25; 2 Timoteo 4:6-8) Apóstol Pablo a considera cu tal premio precioso a merece e sacrificio di tur otro cos, asta su bida terrenal. (Filipense 3:8) Ta claro cu hende fiel den Smirna a pensa mescos. Jesús a conclui su mensahe, bisando: “Ken cu tin orea tende loke e spiritu ta bisa e congregacionan: Ken cu ta vence di ningun manera lo recibi daño dje segundo morto.” (Revelacion 2:11) Vencedor ta ser duná e siguranza di bida celestial inmortal cu morto no por toca.—1 Corintio 15:53, 54.

“Tribulacion diez dia”

7, 8. Mescos cu e congregacion den Smirna, con e congregacion cristian tabata “poní na prueba cabalmente” na 1918?

⁷ Mashá parecido di hende cristian di Smirna, e grupo cu Juan a simbolizá i nan compañénan djawe a “ser poní na prueba plenamente,” i esei ta sigi. Nan fieldad durante prueba ta márcanan como e propio pueblo di Dios. (Marco 13:9, 10) Poco despues cu e dia di Señor a cuminza, e palabra di Jesús dirigí na cristian den Smirna a duna berdadero consuelo ne grupito internacional dje pueblo di Jehova Dios. (Revelacion 1:10) Desde 1879 nan tabata saca for dje Palabra di Dios riqueza spiritual cu nan ta compartí libremente cu otro hende. Pero durante Gera Mundial I, nan a contra cu odio i oposicion intenso, en parti pasobra nan no a laga histeria di gera contagiánan i en parti pasobra sin miedu nan tabata desenmascará error di cristiandad. E persecucion cu nan a recibi bao di instigacion di algun lider di cristiandad a culmina den 1918 i tabata comparabel cu loke cristian den Smirna a recibi for di pueblo hudío ei.

⁸ Un ola di persecucion den Estados Unidos di América a culmina ora Joseph F. Rutherford, e presidente nobo dje Sociedad Watch Tower, i siete asociado tabata encarcelá dia 22 di Juni di 1918, mayoría di locual a recibi sentencia di 20 aña. Nan a haya nan libertad bao di fianza nuebe luna despues. Dia 14 di Mei, 1919, e corte di apelacion a rechaza acusacion falso hací contra nan; mustrando cu tabatin 130 error den e huicio. Huez Manton, un católico romano i caballero di ordu di San Gregorio Magno, cu na 1918 a nenga di acepta fianza pa e grupo di hende cristian, tabata sentenciá despues, na 1939, na dos aña di prisón i un boet di $10.000 pa seis condenacion di a solicita i acepta soborno.

 9. Con Hitler a trata Testigo di Jehova den Alemania nazista, i cu cua reaccion di parti di clero?

⁹ Durante e gobierno nazista den Alemania, Hitler a prohibi totalmente e trabao di predica di Testigo di Jehova. Pa hopi aña miles di Testigo di Jehova tabata cerá cruelmente den concentrasicamp i prisón, unda hopi di nan a muri, i mientras cu rond di 200 homber hoven cu a nenga di acepta sirbishi militar di ehército di Hitler tabata matá. E palabra di un pastor católico publicá den e curant The German Way di 29 di Mei, 1938, ta duna prueba cu clero a apoya tur esei: “Awor tin un solo país riba tera unda loke ta yamá . . . Studiante di Bijbel [Testigo di Jehova] ta prohibí. Esei ta Alemania! . . . Ora Adolf Hitler a subi na poder, i obispado católico alemán a bolbe presenta nan peticion, Hitler a bisa: ‘Loke ta yamá Studiante Sincero di Bijbel [Testigo di Jehova] ta causa problema; . . . Mi ta consideránan charlatán; mi no ta tolera e huez americano Rutherford di susha e nomber di católico alemán asina; mi ta liquida [Testigo di Jehova] den Alemania.’” Anto e pastor a dal un “Biba!”

10. (a) Segun cu e dia di Señor a sigi, cua persecucion a enfrenta Testigo di Jehova? (b) Ki resultado tabatin frecuentemente ora hende cristian a lucha pa libertad di religion dilanti raad?

¹⁰ Durante e dia di Señor, e Colebra i su simía no a para den nan lucha contra cristian ungí i nan compañénan. Hopi di eseinan tabata encarcelá i persigí cruelmente. (Revelacion 12:17) Tal enemigo a sigi ‘traha ley pa causa daño,’ pero e pueblo di Jehova Dios ta insisti firmemente: “Nos tin cu obedece Dios como gobernante mas bien cu hende.” (Salmo 94:20; Echo 5:29) Na 1954 e revista Toren di Vigilancia (na inglés) a informa cu: “Mas cu setenta país na un tempo of otro durante e último cuarenta aña a saca decreto di prohibicion i a persigi Testigo di Jehova.” Unda cu tabata posibel pa lucha pa libertad di religion dilanti raad, tal hende cristian a hacié i den varios país a gana victoria redonda. Den e Corte Supremo di América so, Testigo di Jehova a gana 50 victoria.

11. Cua profecía di Jesús tocante e siñal di su presencia a ser cumplí den Testigo di Jehova durante e dia di Señor?

¹¹ Ningun otro grupo a keda tanto conciencial pa obedece e mandamento di Jesús di paga na César e cosnan di César. (Lucas 20:25; Romano 13:1, 7) Sin embargo, ningun otro grupo tabatin miembro encarcelá den tanto país bao di tanto diferente forma di gobierno, i esei ta sigi te ne tempo actual den Nort i Suramérica, den Europa, den Africa, i den Asia. E gran profecía di Jesús tocante e siñal di su presencia a inclui e sigiente palabra: “Anto hende lo entrega boso na tribulacion i lo mata boso, i boso lo ta obheto di odio di parti di tur nacion pa causa di mi nomber.” (Mateo 24:3, 9) Esei siguramente a ser cumplí den Testigo cristian di Jehova durante e dia di Señor.

12. Con e grupo cu Juan a simboliza a fortalece e pueblo di Dios contra persecucion?

¹² Pa fortalece e pueblo di Dios contra tribulacion, e grupo cu Juan a simboliza semper a hácinan corda e mensahe dje palabra di Jesús dirigí na cristian di Smirna. Por ehempel, ora persecucion nazista a cuminza, The Watchtower na 1933 i 1934 a contene artículo tal como “No tene miedu di nan,” cu a trata cu Mateo 10:26-33; “E prueba severo,” basá riba Daniel 3:17, 18; i “Den e boca di león,” cu Daniel 6:22 como e texto clave. Den década di 1980, durante cua tempo e buki aki a ser publica pa promé bez i Testigo di Jehova a sufri di persecucion cruel den mas cu 40 tera, Toren di Vigilancia a fortalece e pueblo di Dios cu artículo tal como “Feliz aunque persigí!” i “Hende cristian ta enfrenta persecucion cu awante.”b

13. Mescos cu hende cristian di Smirna, pakico Testigo cristian di Jehova no ta tene miedu di persecucion?

¹³ Berdaderamente, Testigo cristian di Jehova ta sufri di persecucion fisical i di otro prueba pa diez dia simbólico. Mescos cu hende cristian di Smirna ayá, nan no ta tene miedu; ni ningun di nos tin cu tene miedu mientras cu dificultad ta empeora aki riba tera. Nos ta keda prepará pa wanta sufrimento i gozosamente wanta asta ‘plundermento di nos pertenencia.’ (Hebreo 10:32-34) Door di studia e Palabra di Dios i hacié nos mes guía, nos ta keda armá pa para firme den e fe. Keda sigur cu Jehova Dios por protehábo i lo protehábo den bo integridad. “Tira tur boso ansha riba dje, pasobra e ta stima boso.”—1 Pedro 5:6-11.

[Nota]

[Kuadro/Plachi na página 39]

Pa hopi aña, historiador a duna testimonio di integridad di Testigo di Jehova alemán durante e dominacion nazista. E buki na inglés Mamanan den e patria, di historiador Claudia Koonz, publicá na 1986, a bisa lo sigiente: “E gran mayoría di tur alemán cu no tabata nazista a haci arreglo pa existi bao dje gobierno cu nan a desprecia. . . . Ne otro extremo dje escala di dato i ideología tabata 20.000 Testigo di Jehova cu, casi totalmente a nenga inequibocadamente di rindi cualkier forma di obedencia ne gobierno nazista. . . . Religion a sostene e grupo di mas uní di resistidor. Desde principio Testigo di Jehova a nenga di coopera cu tur rasgo dje gobierno nazista. Asta despues cu e gestapo a destrui nan oficina central nacional na 1933 i a prohibi e secta na 1935, nan a nenga di sikiera bisa ‘Heil Hitler.’ Rond di mitá (principalmente homber) di tur Testigo di Jehova tabata mandá na concentrasicamp, mil tabata matá, i otro mil a muri entre 1933 i 1945. . . . Hende católico i protestante a tende nan pastor urgínan pa coopera cu Hitler. Si nan a resisti, nan a hacié contrario cu ordu dje iglesia i dje gobierno.”

Capítulo 9

Teniendo firmemente gará e nomber di Jesús

PÉRGAMO

 1. Cua congregacion a recibi e sigiente mensahe di Jesús, i tal hende cristian a biba den ki clase di stad?

CORRIENDO 80 kilometer nort den camina di costa for di Smirna anto 24 kilometer den interior door di valle dje rio Caico, nos ta yega na Pérgamo, yamá awor Bergama. E stad tabata famoso pa su tempel di Zeus, of Jupiter. Den siglo 19, arqueólogo a hiba altar dje tempel na Alemania, unda hende por miré ainda, hunto cu hopi imagen i grabacion di dios pagano, den e Museo di Pérgamo den Berlín. Cua mensahe Señor Jesús a manda pe congregacion cu a biba ei den tanto idolatría?

 2. Con Jesús a establece su identidad, i e echo cu e tin un ‘spada di dos fila’ ta nifica kico?

² Pa cuminza, Jesús a establece su identidad, bisando: “I pe angel cu ta dje congregacion den Pérgamo skirbi: Esaki ta loke esun ta bisa cu tin un spada largu i skerpi cu dos fila.” (Revelacion 2:12) Ei Jesús a repiti detaye duná di dje den Revelacion 1:16. Como Huez i Ehecutor, lo e ehecuta esnan cu ta persigi disípel di dje. Ki consolador ta tal garantía! Sin embargo, en cuanto e huicio, laga esnan den e congregacion també recibi e advertencia di cu Jehova, usando su “mensahero di pacto,” Jesucristo, “lo bira un testigo lihé” contra tur hende yamando nan mes cristian pero cu ta practica idolatría, inmoralidad, gañamento, i falta di onradez i cu no ta cuida esnan den necesidad. (Malaquías 3:1, 5; Hebreo 13:1-3) Nan tin cu presta atencion ne conseho i reprendimento cu Dios a haci Jesús duna!

 3. Cua adoracion falso tabata practicá den Pérgamo, i con e por bisa cu e “trono di Satanás” tabatei?

³ Awor Jesús a bisa e congregacion: “Mi sa unda bo ta biba, esta, unda e trono di Satanás tá.” (Revelacion 2:13a) Ta cierto cu cristian ei tabata biba rondoná pa adoracion satánico. Además dje tempel di Zeus, tabatin un santuario di Asclepio, e dios di curacion. Pérgamo també tabata un centro famoso pe culto di adoracion dje emperador. E palabra hebreo traducí “Satanás” kier men “Resistidor,” i su “trono” ta representa su gobernacion mundial cu Dios ta permiti pa un tempo. (Job 1:6, nota di Bijbel Traduccion di Mundo Nobo [Cu Referencia]) E abundancia di idolatría den Pérgamo a mustra cu e “trono” di Satanás tabata firmemente establecí den e stad. Ki rabiá Satanás mester a keda siendo cu hende cristian djei no a buig pe den adoracion nacionalista!

 4. (a) Cua encomendacion Jesús a duna na cristian den Pérgamo? (b) Kico e diputado romano Plinio a skirbi na emperador Trahano tocante tratamento di hende cristian? (c) Apesar dje peliger, cristian den Pérgamo a scoge cua camina?

⁴ Sí, e “trono di Satanás” tabata ei mes den Pérgamo. “I sin embargo,” segun Jesús, “bo ta sigi tene mi nomber firmemente gará, i bo no ta nenga bo fe den mi ni sikiera den e dianan di Antipas, mi testigo, esun fiel, cu tabata matá cant’i boso, unda Satanás ta biba.” (Revelacion 2:13b) Ki un encomendacion conmovedor! Sin duda e martirio di Antipas tabata e resultado di su nengamento di participa den e práctica di demonismo i e adoracion dje emperador romano. Poco tempo despues cu Juan a recibi e profecía, Plinio e Hoven, diputado personal di emperador Trahano di Roma, a skirbi Trahano i a splica su moda di trata cu hende acusá di ser cristian—un moda cu e emperador a aproba. Hende cu a nenga di ser cristian a haya libertad ora, segun Plinio, “nan a repiti despues di dje un inbocacion dje diosnan, a ofrece censia i biña na imagen [di Trahano] . . . i, además a plega Cristo.” Esnan cu tabata cristian, nan a mata. Aunque un peliger asina a enfrentánan, hende cristian den Pérgamo no a nenga nan fe. Nan a ‘tene e nomber di Jesús firmemente gará’ pasobra nan a sigi onra su puesto halto como Vindicador di Jehova i su Huez nombrá. Nan a sigi e pasonan di Jesús lealmente como testigo dje Reino.

 5. (a) Ki paralelo djawe dje culto di adoracion dje emperador a causa prueba severo pa hende cristian den nos tempo? (b) Cua yudanza The Watchtower a duna hende cristian?

⁵ Na varios ocasion, Jesús a duna di conoce cu Satanás ta manda den e mundo malbado aki, pero debí na su integridad, Satanás no a haya gara di dje. (Mateo 4:8-11; Juan 14:30) Den nos tempo, nacion fuerte, notablemente e “rey di nort” i “rey di zuid,” a lucha pa domina mundo. (Daniel 11:40) Nan ta instiga fervor patriótico, i e culto di adoracion di emperador tin su paralelo moderno den e ola di nacionalismo cu ta bari mundo. Artículo tocante neutralidad den The Watchtower di 1 di November, 1939, i atrobé dia 1 di November, 1979, i 1 di September, 1986, a declara claramente loke e Bijbel ta siña tocante e cuestion, dunando guía pa hende cristian cu kier camna den e nomber di Jehova i vence mundo, manera Jesús a haci cu curashi.—Miqueas 4:1, 3, 5; Juan 16:33; 17:4, 6, 26; 18:36, 37; Echo 5:29.

 6. Mescos cu Antipas, con Testigo di Jehova a para firme den e dia djawe?

⁶ Conseho asina tabata urgentemente necesario. Enfrentá cu fervor patriótico irrazonabel, Testigo di Jehova, tanto e ungínan como nan compañénan, tabatin cu para firme den e fe. Na América, cientos di mucha i maestro tabata sacá for di scol pasobra nan no a saluda e bandera nacional, mientras cu den Alemania Testigo di Jehova tabata persigí cruelmente pasobra nan a nenga di saluda e swastica. Manera nos a mencioná caba, nazista di Hitler a mata miles di sirbidor leal di Jehova pasobra nan a nenga di participa den tal idolatría nacionalista. Entre 1930 i 1940, durante e culminacion di adoracion dje emperador di Hapón den e religion sintoísta, dos predicador pionero a sembra hopi simía di Reino den Taiwan cu Hapón a domina. Gobernante militar a encarcelánan, unda uno di nan a muri debí na tratamento cruel. E otro tabata duná libertad, solamente pa nan tiré mata den lomba—un Antipas djawe. Te ne dia djawe, tin país unda nan ta exigi adoracion di símbolo nacionalista i debocion exclusivo ne gobierno. Hopi Testigo di Jehova hoven a ser encarcelá, i hopi matá, debí na nan curashi como cristian neutral. Si bo ta un hoven i tal cuestion ta enfrentábo, studia e Palabra di Dios tur dia pa bo “tene fe pa conserbacion bibo di alma,” cu bida eterna na bista.—Hebreo 10:39–11:1; Mateo 10:28-31.

 7. Con muchanan di India a enfrenta e cuestion di adoracion nacionalista, i cu cua resultado?

⁷ Mucha di scol tin cu enfrenta cuestion similar. Na 1985, den estado di Kerala di India, tres yiu di Testigo di Jehova a nenga di compromete nan fe fundá ariba e Bijbel, nengando di canta e himno nacional. Cu respet nan a lanta ora e otronan a canta, pero toch nan tabata sacá for di scol. Nan tata a apela e accion te ne Corte Supremo di India, unda dos huez a decidi na fabor dje muchanan, bisando cu curashi: “Nos tradicion ta siña tolerancia; nos filosofía ta siña tolerancia; nos ley ta practica tolerancia; láganos no debilité.” Noticia di curant i editorial favorable como resultado dje caso a informa e nacion, cu e tempo ei tabata forma casi un vijfde parti di poblacion di mundo, di cu tin hende cristian den e país cu ta adora e Dios berdadero Jehova i cu nan ta pega lealmente na principio bíblico.

Influencia corruptivo

 8. Jesús a haya cu tabata necesario pa duna cua censura na hende cristian den Pérgamo?

⁸ Sí, cristian den Pérgamo a warda integridad. “No obstante,” segun Jesús, “mi tin algun cos contra bo.” Kico nan a haci pa merece censura? Jesús a bísanos: “Bo tin ei esnan cu ta tene firmemente gará e siñanza di Balam, cu a bai siña Balac pone tropiezo dilanti dje yiunan di Israel, pa nan come cosnan sacrificá na ídolo i comete fornicacion.”—Revelacion 2:14.

 9. Ken tabata Balam, i con su conseho a pone “tropieza dilanti e yiunan di Israel”?

⁹ Den e dia di Moisés, rey Balac di Moab a paga Balam, un profeta no israelita cu tabata sa algo dje camina di Jehova, pa maldiciona Israel. Jehova a resisti contra Balam i a forzé di pronuncia un bendicion riba Israel i calamidad pa nan enemigo. Balam a calma e rencor resultante di Balac sugeriendo un atake mas astuto: Laga muher di Moab tenta homber di Israel pa comete inmoralidad sexual grosero i adoracion idólatra dje dios falso Baal di Peor! Tal táctico tabatin éxito. Pero e rabia husto di Jehova a cende i el a manda un plaga cu a mata 24.000 fornicador israelita—un plaga cu a para solamente ora sacerdote Finés a dal paso positivo pa elimina e maldad for di Israel.—Número 24:10, 11; 25:1-3, 6-9; 31:16.

10. Cua tropieza a infiltra den e congregacion di Pérgamo, i pakico cristian ei por a kere cu Dios lo pasa por halto di nan picánan?

¹⁰ Pues, den dia di Juan, tabatin tropieza similar den Pérgamo? Sí, tabatin! Inmoralidad i idolatría a infiltra den e congregacion. Cristian ei no a presta atencion ne advertencia cu Dios a duna via apóstol Pablo. (1 Corintio 10:6-11) Siendo cu nan a wanta persecucion, kizás nan a kere cu Jehova lo pasa por halto di nan picánan sexual. Pues, Jesús a haci claro cu nan tabatin cu evita tal maldad.

11. (a) Hende cristian mester vigila contra kico, i nan mester evita cua clase di pensamento? (b) Através dje añanan, cuanto hende a ser expulsá for dje congregacion cristian, i principalmente pakico?

¹¹ Di igual manera den e dia djawe, hende cristian tin cu keda vigilante contra ‘biramento dje bondad inmerecida di nos Dios na excuus pa conducta inmoral.’ (Hudas 4) Nos ta keda obligá di odia loke ta malu i ‘domina nos curpa’ pe sigi e camina di decencia cristian. (1 Corintio 9:27; Salmo 97:10; Romano 8:6) Nos no mag pensa nunca cu nos celo den e sirbishi di Dios i nos integridad bao di persecucion ta dúnanos licencia pa enbolbénos den mal conducta sexual. Através dje añanan, diez di miles di malechor a ser expulsá for dje congregacion cristian mundialmente, principalmente pa inmoralidad sexual. Durante algun aña tabatin asta mas cu a ser matá den Israel di antigua debí ne adoracion di Baal di Peor. Láganos sigi vigila pa nos nunca cai hunto cu hende asina!—Romano 11:20; 1 Corintio 10:12.

12. Mescos cu sirbidor di Dios den tempo di promé, cua principio ta aplica na hende cristian djawe?

¹² Jesús a reprende també hende cristian di Pérgamo pasobra nan ‘a come cosnan sacrificá na ídolo.’ Kico esei a encerra? Den bista di palabra di Pablo dirigí na corintio, kizás algun hende tabata haci abuso di nan libertad cristian i tabata ofende expresamente e concenshi di otro hende. Pero, mas probablemente, nan realmente tabata participa di algun manera den ceremonia pagano. (1 Corintio 8:4-13; 10:25-30) Fiel cristian djawe mester mustra amor sin egoísmo eherciendo nan libertad cristian, teniendo cuidao pa no haci otro hende trompica. Siguramente, nan mester evita tur forma moderno di idolatría, tal como adoracion di strea di TV, di cine, i di deporte, of di haci placa nan dios, of haci nan mes barica nan dios!—Mateo 6:24; Filipense 1:9, 10; 3:17-19.

Evita sectarismo!

13. Cua palabra di reprendimento Jesús a duna despues na hende cristian den Pérgamo, i pakico e congregacion tabatin mester di dje?

¹³ Jesús a sigi reprende hende cristian den Pérgamo, bisando: “També, bo tin esnan cu di igual manera ta tene firmemente gará e siñanza dje secta di Nicolás.” (Revelacion 2:15) Anteriormente, Jesús a encomenda efesio pa nan odio di echo di tal secta. Pero hende cristian den Pérgamo tabatin mester di conseho pa tene e congregacion liber di sectarismo. Nan a falta firmeza defendiendo ley cristian afin di mantene e unidad cu Jesús a pidi den Juan 17:20-23. Tabata necesario “pa conseha usando siñanza cu ta saludable i també reprende esnan cu ta contradici.”—Tito 1:9.

14. (a) Desde tempo di promé, e congregacion tabatin cu enfrenta ken, i ki detaye apóstol Pablo a duna di nan? (b) Hende cu ta keda incliná di sigi un grupo cu ta alehánan mester obedece cua palabra di Jesús?

¹⁴ Desde su principio, e congregacion cristian tabatin cu enfrenta hende apóstata orguyoso, locual cu nan papiamento suave i engañoso, “a causa desunion i ocasion pa trompica contrario cu e siñanza” cu e canal di Jehova Dios a percura. (Romano 16:17, 18) Apóstol Pablo a duna spiertamento dje amenaza den casi tur carta di dje.a Den e dia djawe, ya cu Jesús a restora e berdadero congregacion na su pureza i unidad cristian, tin e peliger di sectarismo ainda. P’sei, ken cu ta keda incliná di sigi un grupo cu ta alehá, i asina forma secta, mester obedece e sigiente palabra di Jesús: “Arrepentíbo, pues. Si bo no ta hacié, mi ta bini cerca bo pronto, i haci gera cu nan cu e spada largu di mi boca.”—Revelacion 2:16.

15. Con sectarismo ta cuminza?

¹⁵ Con sectarismo ta cuminza? Kizás un persona cu ta considera cu e ta maestro ta sembra duda, nengando un berdad bíblico (tal como cu nos ta den e último dianan), i asina un grupito ta aparta i ta sigi tal hende. (2 Timoteo 3:1; 2 Pedro 3:3, 4) Of un persona ta critica e manera cu Jehova Dios ta laga haci su trabao i ta cultiva e spiritu di floheza, bisando cu no ta ni bíblico ni necesario pa camna di cas pa cas pa hiba e mensahe di Reino. Participacion den tal sirbishi sigiendo ehempel di Jesús i su apóstolnan por mantene tal hende humilde; pero nan ta prefera di aparta i sosega, kizás solamente lezando e Bijbel de bez en cuando como un grupo particular. (Mateo 10:7, 11-13; Echo 5:42; 20:20, 21) Hende asina ta inventa nan mes idea tocante conmemoracion dje morto di Jesús, e mandamento bíblico di abstene di sanger, celebracion di dia di fiesta, i uso di tabaco. Además, nan ta desprecia e nomber di Jehova; i mashá pronto nan ta bolbe cai den camina complaciente di Babilonia e Grandi. Pior ainda, Satanás ta impulsa algun di nan pa bira contra nan rumanan di antes i ‘golpea esclabo compañé.’—Mateo 24:49; Echo 15:29; Revelacion 17:5.

16. (a) Pakico esnan cu ta vacila bao di influencia di hende apóstata mester arrepentínan lihé? (b) Kico lo sosode hende cu ta nenga di arrepenti?

¹⁶ Ken cu ta vacilá debí na influencia di hende apóstata mester ta lihé pa obedece e yamada di Jesús di arrepentínan! Propaganda di hende apóstata mester ta rechazá manera veneno pasobra esei ta loke e tá! Su fundeshi ta envidia i odio, na contraste cu e berdad husto, decente, i amable cu Jesús ta duna su congregacion como cuminda. (Lucas 12:42; Filipense 1:15, 16; 4:8, 9) En cuanto hende cu ta nenga di arrepentínan, Señor Jesús en berdad ta haci “gera cu nan cu e spada largu di [su] boca.” E ta sefta su pueblo pe conserba e unidad cu el a pidi durante su último anochi cu su disípelnan riba tera. (Juan 17:20-23, 26) Siendo cu hende apóstata ta nenga e conseho i yudanza amoroso cu strea den su man drechi ta ofrece, Jesús ta huzga i ta castigánan cu “mayor severidad,” i ta tíranan “den scuridad djafó.” Nan ta ser expulsá, pa nan no sirbi como zuurdeeg mas den e pueblo di Dios.—Mateo 24:48-51; 25:30; 1 Corintio 5:6, 9, 13; Revelacion 1:16.

‘Maná scondí i un piedra chikito blancu’

17. Cua recompensa ta spera cristian ungí cu ta ‘vence,’ i cristian den Pérgamo tabatin cu vence kico?

¹⁷ Un gran recompensa ta spera tur hende cu ta presta atencion ne conseho di Jesús, duná bao di direccion dje spiritu santo di Jehova Dios. Scucha! “Laga ken cu tin orea tende loke e spiritu ta bisa e congregacionan: Na ken cu ta vence lo mi duna algun dje maná scondí, i lo mi duné un piedra chikito blancu, i riba e piedra chikito un nomber nobo skirbí cu ningun hende conoce sino esun cu ta recibié.” (Revelacion 2:17) Asina, hende cristian den Pérgamo, mescos cu cristian den Smirna, tabata animá pa ‘vence.’ Pa nan logra, cristian den Pérgamo, unda e trono di Satanás tabata, nan tabatin cu evita idolatría. Nan tabatin cu vence inmoralidad, sectarismo, i apostasía enlazá cu Balac, Balam, i e secta di Nicolás. Haciendo esei, tal cristian ungí ta haya invitacion pa come dje “maná scondí.” Kico esei kier men?

18, 19. (a) Kico tabata e maná cu Jehova a percura pa israelita? (b) Cua maná tabata scondí? (c) Comemento dje maná scondí ta simboliza kico?

¹⁸ Den e dia di Moisés, Jehova a percura maná pa sostene israelita durante nan biahe den desierto. Tal maná no tabata scondí, pasobra tur maínta—fuera di sabat—el a presenta milagrosamente, manera foyo blancu tapando e tera. Esei tabata un percuracion divino pa mantene israelita bibo. Como recuerdo, Jehova a manda Moisés warda algun dje “pan” den un baso di oro den e arca sagrado di pacto “durante tur generacion [di Israel].”—Éxodo 16:14, 15, 23, 26, 33; Hebreo 9:3, 4.

¹⁹ Ki un símbolo apropiado! E maná tabata scondí den e Lugar Santísimo dje tabernáculo, unda cu e luz milagroso cu a para riba tapa dje arca a simboliza e presencia mes di Jehova. (Éxodo 26:34) Ningun hende tabata permití di drenta den e lugar sagrado pa come dje maná scondí. Pero, Jesús a bisa cu sigidor ungí di dje cu a vence por come dje “maná scondí.” Mescos cu Cristo promé cu nan, nan ta permití di drenta, “no den un lugar santo cu man a traha, locual ta un copia dje realidad, sino den cielo mes.” (Hebreo 9:12, 24) Ora nan ta ser resusitá, nan ta bisti incorrupcion i inmortalidad—un percuracion maraviyoso di Jehova, simbolizá pe echo cu nan ta ser duná e “maná scondí” incorruptible. Ki un privilegio e grupito di vencedor ta recibi!—1 Corintio 15:53-57.

20, 21. (a) E dunamento dje piedra blancu na cristian ungí ta simboliza kico? (b) Siendo cu tin 144.000 piedra blancu so, cua speranza e multitud grandi tin?

²⁰ Nan també ta recibi “un piedra chikito blancu.” Den tribunal romano, nan a usa piedra pa declara decision.b Piedra blancu a nifica un declaracion di inocencia, pero piedra pretu a nifica condenacion, i hopi bez condenacion na morto. E echo cu Jesús ta duna “piedra blancu” na hende cristian den Pérgamo a indica cu el a declaránan inocente, puro, i limpi. Pero e palabra di Jesús por tin un otro nificacion. Den tempo romano, nan a usa piedra també manera tiket pa drenta pa suceso importante. Pues, e piedra blancu por a indica algo mashá special pa cristian ungí vencedor—permiso pa nan drenta den un lugar di onor den cielo pe casamento dje Lamchi. Tin 144.000 piedra so.—Revelacion 14:1; 19:7-9.

²¹ Esei kier men cu bo no ta recibi consideracion si bo ta dje multitud grandi di adorador compañé? Di ningun manera! Aunque bo no ta recibi un piedra blancu pa drenta den cielo, si bo ta persevera bo por sali for dje tribulacion grandi pa tene parti den e trabao gozoso di restora Paradijs riba tera. Participando cu bo den esei lo ta fiel hende resusitá cu a biba promé cu Cristo i otro carné cu por a muri mas recientemente. Cu tempo, tur otro hende morto rescatá lo recibi e fabor di un resureccion na bida riba un tera paradísico.—Salmo 45:16; Juan 10:16; Revelacion 7:9, 14.

22, 23. E nomber skirbí riba e piedra duná na cristian ungí ta nifica kico, i esei mester duna cua animacion?

²² Ki nomber nobo ta ser skirbí riba e piedra? Nomber ta loke ta indentifica hende i ta distingínan for di otro. Tal cristian ungí ta recibi e piedra despues cu nan ta termina nan carreda terrenal como vencedor. Claramente, anto, e nomber riba e piedra tin cu ber cu nan privilegio di ser uní cu Jesús den cielo—un posicion di sirbishi real mashá íntimo cu locual solamente esnan cu ta hereda e Reino celestial ta comprende i ta disfruta. Pues, esei ta un nomber, of indicacion di puesto, “cu ningun ta conoce sino esun cu ta recibié.”—Compara cu Revelacion 3:12.

²³ Ki un motibo pe grupo cu Juan a simboliza “scucha loke e spiritu ta bisa e congregacionan” i apliqué! I ki un animacion pa nan socio, e multitud grandi, sirbi fielmente hunto cu nan mientras cu nan por disfruta di nan compañía aki riba tera i participa cu nan dunando di conoce e Reino di Jehova!

[Nota]

[Plachinan na página 43]

Tin mashá evidencia di adoracion pagano na exhibicion den e Museo di Pérgamo den Berlín

[Plachi na página 45]

Algun maná tabata scondí den e arca di pacto. Dunamento di maná scondí simbólico a nifica pa cristian ungí vencedor cu nan ta recibi inmortalidad

[Plachi na página 45]

E piedra chikito blancu ta pa esnan permití di drenta pe casamento dje Lamchi

Capítulo 10

Odio intenso pe “cosnan profundo di Satanás”

TIATIRA

 1. Unda Tiatira tabata situá en relacion cu e otro congregacionan, i den cua clase di ambiente religioso?

ROND di 64 kilometer zuidoost di Bergama (Pérgamo) tin e pueblo próspero turco di Akhisar. Mas cu 1.900 aña pasá, e pueblo tabata e sitio di Tiatira. Un superintendente biahero por a yega Tiatira fácilmente sigiendo e camina interior for di Pérgamo, anto dal un circuito pa bishita e otro congregacionan mencioná den Revelacion capítulo 3—Sardis, Filadelfia, i Laodicea. Distinto di Pérgamo, ta parce cu Tiatira no tabata un centro importante di adoracion di emperador, pero e sí tabatin santuario i tempel dedicá na dios pagano. Tiatira tabata conocí como un centro comercial.

2, 3. (a) Kico tabata skirbí na antes tocante un persona di Tiatira cu a bira cristian? (b) Tabata di ki importancia pa cristian den Tiatira cu Jesús ta “Yiu di Dios” i cu e tabatin “wowo manera flam di candela”?

² Ora Pablo tabata predica den Macedonia, el a contra cu un señora di Tiatira yamá Lidia, un bendedor di púrpura. Lidia i tur hende di su cas a acepta gustosamente e mensahe cu Pablo a predica i a mustra hospitalidad extraordinario. (Echo 16:14, 15) El a bira e promé persona di Tiatira mencioná cu a aceptá cristianismo. Cu transcurso di tempo, e stad mes a yega di haya un congregacion di hende cristian. Jesús a dirigí su mensahe di mas largu ne congregacion: “I ne angel dje congregacion di Tiatira skirbi: Esaki ta loke e Yiu di Dios ta bisa, esun cu tin wowo manera flam di candela, i tin pia manera coper fini.”—Revelacion 2:18.

³ Esei ta e único biaha cu Revelacion ta usa e expresion “Yiu di Dios,” aunque den otro texto Jesús a menciona Jehova Dios como “mi Tata.” (Revelacion 2:27; 3:5, 21) Uso dje título ei probablemente a haci hende cristian di Tiatira corda cu Jesús tabata íntimo cu Jehova. E Yiu ‘tabatin wowo manera flam di candela’—un spiertamento pa hende cristian den Tiatira di cu su huicio lo bira manera flam contra cualkier cos cu el a mira cu por mancha e congregacion. Mencionando pe segunda bez su pia radiante manera coper, el a duna énfasis na su mes ehempel briyante di fieldad ora el a camna riba tera. Sin duda hende cristian den Tiatira tabatin mester di su conseho, i nos djawe també!—1 Pedro 2:21.

4, 5. (a) Pakico Jesús por a encomenda hende cristian den Tiatira? (b) Di ki manera e congregacion den Tiatira tabata típico dje congregacionan di Testigo di Jehova djawe?

⁴ Felizmente, Jesús por a encomenda hende di Tiatira. El a bisa: “Mi conoce bo echonan, i bo amor i fe i sirbishi i awante, i cu bo echonan reciente ta mas cu esnan di antes.” (Revelacion 2:19) Distinto di efesio, cristian ungí di Tiatira no a perde nan promé amor pa Jehova Dios. Nan fe tabata fuerte. Además, nan echonan tabata mas cu na antes, i mescos cu e tres congregacion mencioná promé, cristian di Tiatira a wanta. Ki típico dje casi 100.000 congregacion di Testigo di Jehova den tur e mundo djawe! Luz di nan amor pa Jehova ta briya, mientras cu celo den e sirbishi ta plama den tur e organizacion, estimulando hoven i bieu. Un cantidad aumentante ta gasta nan mes como pionero, asina usando sabiamente e tempo cu ta keda pa proclama e glorioso speranza dje entrante Reino di Dios!—Mateo 24:14; Marco 13:10.

⁵ Pa mashá aña, hopi cristian fiel, tanto dje resto ungí como dje multitud grandi, a manifesta perseverancia ehemplar den e sirbishi di Dios, mientras cu mundo rond di nan ta baha cada bez mas den scuridad sin speranza. Pero, tene curashi! Revelacion ta confirma e testimonio di profeta di Dios di antes. “E gran dia di Jehova ta cerca. E ta cerca, i e tin mashá purá.”—Sofonías 1:14; Joël 2:1; Habacuc 2:3; Revelacion 7:9; 22:12, 13.

“E muher Jezabel”

 6. (a) Apesar di rasgo digno di alabanza, cua problema Jesús a mira den e congregacion den Tiatira cu tabatin mester di atencion inmediato? (b) Ken tabata Jezabel, i e tabatin derecho válido pa ser profetisa?

⁶ E wowo ardiente di Jesús a penetra mas leu. El a mira algo cu tabatin mester di atencion inmediato. El a bisa hende cristian den Tiatira: “No obstante, ami sí tin esaki contra bo, cu bo ta tolera e muher Jezabel, cu ta yama su mes profetisa, i ta siña i ta desvia mi esclabonan pa comete fornicacion i come cosnan sacrificá na ídolo.” (Revelacion 2:20) Den siglo diez PEC, reina Jezabel, esposa adorador di Baal di rey Acab di Israel, tabatin e mala fama como asesinata, adúltera, tirana. Jehú, como ungí di Jehova, a percura pe ser matá. (1 Rey 16:31; 18:4; 21:1-16; 2 Rey 9:1-7, 22, 30, 33) Jezabel idólatra no tabatin derecho di ser profetisa. E no tabata manera Míriam i Débora, cu a rindi sirbishi di profetisa fiel den Israel. (Éxodo 15:20, 21; Huez 4:4; 5:1-31) I e spiritu di Jehova no a inspira Jezabel pa profetiza manera el a inspira e anciana Ana i e cuater yiu muher di Felipe e evangelizador.—Lucas 2:36-38; Echo 21:9.

 7. (a) Ora Jesús a menciona “e muher Jezabel,” ta parce cu e tabata referi na cua influencia? (b) Con algun hende muher cu tabata asociá cu e congregacion por a hustifica nan actuacion rebelde?

⁷ Claramente, anto, e “muher Jezabel” cu a yama su mes profetisa den Tiatira tabata falso. E no tabatin e apoyo dje spiritu di Dios. Ken e tabata? Probablemente e tabata un muher of grupo di muher cu a eherce un influencia malu sin bergüenza den e congregacion. Tal bez algun muher asociá cu e congregacion por a enbolbe algun miembro den inmoralidad, mientras cu sin bergüenza nan a hustifica nan actuacion rebelde cu texto bíblico aplicá incorrectamente. Profetizando falsamente en berdad! Nan por a tenta otronan pa cai den e mesun camina di “fornicacion, impureza, apetit sexual, deseo perhudicial, i cudishi, locual ta idolatría.” (Colosense 3:5) Nan tabata kier pa hende dje congregacion sigi un moda di biba inmoral i egoísta cu ta ser aceptá awor, den mayor parti di religion di cristiandad.

 8. (a) Ki declaracion formal Jesús a haci tocante “Jezabel” den Tiatira? (b) Con algun a sinti influencia impropio di hende muher den e dia djawe?

⁸ Jesús a sigi bisa anciano di Tiatira: “I mi a duné tempo pa arrepenti, pero e no kier a arrepentié di su fornicacion. Mira! mi ta puesto pa tiré riba cama di hende enfermo, i tira esnan cu ta comete adulterio cuné den un tribulacion grandi, amenos cu nan arrepentínan di echo di dje.” (Revelacion 2:21, 22) Mescos cu a parce cu Jezabel original a domina Acab anto a desafiá Jehú, e ehecutor cu Dios a manda, asina tal influencia di muher por purba di domina esposo i ancianonan. Ta parce cu anciano den Tiatira tabata tolera tal influencia di Jezabel sin bergüenza. P’sei, Jesucristo a duna un spiertamento fuerte pa nan, i també pe congregacion mundial dje pueblo di Jehova djawe. Den e dia djawe, algun hende muher asina cu kier manda a tenta nan casá pa bira apóstata i asta a instiga accion civil contra fiel sirbidor di Jehova Dios.—Compara cu Hudas 5-8.

 9. (a) Pakico loke Jesús a bisa tocante Jezabel no ta papia desfavorablemente di tur hende muher den e congregacion? (b) Na ki tempo so influencia di un Jezabel ta presenta?

⁹ Esei di ningun manera ta papia desfavorablemente di fiel hende muher den e congregacion cristian. Awendia, fiel hermana ta efectua un parti grandi dje trabao di duna testimonio; mediante estudio bíblico di cas cu nan ta tene, nan ta introduci un gran cantidad di hende nobo den e congregacion. Dios mes ta bendiciona tal arreglo, manera Salmo 68:11 ta indica: “Jehova mes ta declara e palabra; hende muher cu ta anuncia e bon nobo ta un ehército grandi.” E conducta manso i respetuoso di esposa, cu ta di “gran balor den e bista di Dios,” por tene un bon influencia riba nan esposo. (1 Pedro 3:1-4) Rey Lemuel a elogia hende muher capaz i balente. (Proverbio 31:10-31) Ta solamente ora hende muher ta desvia tentando homber of desafiando of ignorando hefatura di homber cu e influencia tal como esei di Jezabel ta presenta.—Efesio 5:22, 23; 1 Corintio 11:3.

10. (a) Pakico Jezabel i su yiunan ta recibi un huicio? (b) Esnan cu ta bira yiu di Jezabel ta den cua estado peligroso, i kico hende asina mester haci?

¹⁰ Jesús a sigi mencioná e “muher Jezabel”: “I lo mi mata su yiunan cu un plaga fatal, di manera cu tur e congregacion lo sa cu mi ta esun cu ta rista riñon i curazón, i lo duna na boso individualmente segun boso echonan.” (Revelacion 2:23) Jesús a permiti Jezabel i su yiunan tempo pa arrepenti, pero nan a persisti den nan camina di inmoralidad i p’sei tabatin cu recibi huicio. Tin un mensahe fuerte den esei pa hende cristian djawe. Hende cu ta imita Jezabel, sea cu nan ta homber of muher, i asina ta bira yiu di dje, violando principio bíblico tocante hefatura i moralidad of birando cabezura pasando por halto di ordu teocrático, ta spiritualmente den un estado enfermo peligroso. Ta cierto cu si hende asina ta pidi anciano dje congregacion haci oracion pa nan, “oracion di fe por sana hende enfermo, i Jehova lo lanté”—si nan ta manifesta humildad i ta anda di acuerdo cu tal oracion. Pero ningun hende kere cu nan por gaña Dios of Cristo, haciendo esfuerzo pa sconde echo di inmoralidad of presentando un aparencia exterior di sirbishi celoso.—Santiago 5:14, 15.

11. Con congregacion djawe ta ser yudá pa keda alerta na invasion di influencia ilegítimo di hende muher?

¹¹ Felizmente, mayor parti di congregacion di Testigo di Jehova djawe ta alerto na tal peliger. Anciano ta vigila tendencia hibando den direccion di actitud no teocrático i malecho. Nan ta purba di yuda tanto homber como muher den peliger pa nan edificánan spiritualmente i reahustánan promé cu ta laat. (Galatio 5:16; 6:1) Cu amor i firmeza, tal superintendente cristian ta frena cualkier esfuerzo di hende muher pa forma grupo pa promove movimento similar cu esei di emancipacion di hende muher. Además, literatura di Testigo di Jehova ta duna conseho oportuno aveces.a

12. Di ki manera e grupo djawe cu Juan a simboliza ta demonstra un celo igual cu esei di Jehú?

¹² Sin embargo, unda cu tin inmoralidad grosero, i specialmente ora esei ta bira un costumber, pecador cu no ta arrepentínan tin cu ser expulsá. Nos ta corda e celo di Jehú pa libra Israel di tur mancha dje influencia di Jezabel. Di igual manera, e grupo djawe cu Juan a simboliza ta dal paso firme, poniendo ehempel pa nan compañénan semehante di “Jonadab” i mustrando cu nan ta mashá distinto di pastor complaciente di cristiandad.—2 Rey 9:22, 30-37; 10:12-17.

13. Kico lo sosode esnan cu ta sucumbi ne mal influencia di hende muher?

¹³ Como Mensahero i Huez di Jehova Dios, e Yiu di Dios ta actua correctamente identificando i tirando Jezabel djawe den cama di hende enfermo, pasobra su enfermedad spiritual realmente ta crónica. (Malaquías 3:1, 5) Hende cu ta sucumbi ne mal influencia dje muher també lo sufri di un tribulacion grandi—e dolor di ser expulsá, cortá for dje congregacion cristian como si fuera morto. Amenos cu nan ta arrepentínan, ta cambia, i ta ser aceptá di nobo den e congregacion, morto fisical dje “plaga fatal” ta enfrentánan—lo mas tardi den e tribulacion grandi. Mientras tanto, restoracion ta posibel si nan ta arrepentínan totalmente di nan malecho.—Mateo 24:21, 22; 2 Corintio 7:10.

14. (a) Con Jesús ta usa anciano pa trata cu cierto problema, tal como influencia parecido di esei di Jezabel? (b) Con e congregacion mester apoya anciano cu ta trata cu tal problema?

¹⁴ “Tur congregacion” tin cu yega di sa cu Jesús ta rista “riñon,” emocion di mas profundo, i ‘curazón,’ bo persona padén, incluyendo motibo fundamental. P’sei, e ta usa strea of anciano cu e ta confia pa trata cu cierto problema, tal como cualkier influencia di Jezabel cu ta presenta. (Revelacion 1:20) Despues cu tal anciano a examina a fondo un asunto dje clase ei i a yega na un decision hudicial, no ta toca miembro individual dje congregacion di investiga pakico i pa ki motibo nan a tuma tal accion. Tur mester humildemente acepta decision dje ancianonan i sigi duna apoyo na tal strea dje congregacion. Lealtad na Jehova Dios i na arreglo di su organizacion lo ser recompensá. (Salmo 37:27-29; Hebreo 13:7, 17) Di bo parti, bo por haya un bendicion ora Jesús ta duna na cada un individualmente segun nan obra.—Galatio 5:19-24; 6:7-9.

“Tene firmemente gará loke boso tin”

15. (a) Kico Jesús a bisa esnan cu Jezabel no a corrumpi? (b) Kico ta mustra cu cristiandad apóstata no a corrumpi tur hende cu a yama nan mes cristian ayá na 1918?

¹⁵ E sigiente palabra di Jesús ta duna consuelo: “Sin embargo, mi ta bisa lo demás di boso den Tiatira, tur esnan cu no tin e siñanza aki, net esnan cu no a yega di conoce e ‘cosnan profundo di Satanás,’ manera nan ta bisa: Lo mi no pone riba boso ningun otro carga. Sin embargo, tene firmemente gará loke boso tin te cu mi yega.” (Revelacion 2:24, 25) Tabatin alma fiel den Tiatira cu Jezabel no a influenciá. Di igual manera, pa 40 aña promé cu 1918 i desde esei, tur hende yamá cristian no a tolera e camina inmoral i corrupto cu ta tanto común den cristiandad. E grupito di Studiante di Bijbel, conocí awor como Testigo di Jehova, cu a purba di yuda miembro di religion mira e origen no cristian di hopi doctrina di cristiandad, a dal paso pa libré di tur kerimento i costumber babilónico cu nan a recibi for di cristiandad apóstata. Esei ta inclui e siñanza complaciente dje “muher Jezabel.”

16. Aunque Jesús i e cuerpo gobernante cristian dje promé siglo no a agrega mas carga, kico mester ta evitá?

¹⁶ E grupo cu Juan a simboliza awe també ta anima nan compañénan, e multitud grandi, pa evita influencia inmoral, tal como influencia dje mundo degradá di diverticion moderno. No ta necesario pa laga curiosidad tentábo pa wak of experimenta corrupcion pa bo siña kico pa evita. E camina sabí ta di keda leu for di “cosnan profundo di Satanás.” Manera Jesús a bisa: “Mi no ta pone riba boso ningun otro carga.” Esei ta hácinos corda e decreto dje cuerpo gobernante cristian dje promé siglo: “Spiritu santo i nos mes a favorece di no pone ningun otro carga riba boso, fuera dje cosnan necesario aki, sigi abstene boso di cosnan sacrificá na ídolo i di sanger i di cosnan sofocá i di fornicacion. Si boso ta warda boso cuidadosamente di tal cosnan, boso lo prospera.” (Echo 15:28, 29) Pa disfruta di prosperidad spiritual, evita religion falso, mal uso di sanger (manera den transfusion di sanger), i di inmoralidad! I probablemente esei lo proteha bo salud fisical també.

17. (a) Con Satanás ta tenta hende djawe cu “cosnan profundo”? (b) Kico mester ta nos actitud en cuanto “cosnan profundo” dje mundo sofisticá di Satanás?

¹⁷ Satanás tin otro “cosnan profundo” awe, tal como teoría complicá i filosofía cu ta halza intelecto. Además di razonamento complaciente i inmoral, eseinan ta inclui spiritismo i e teoría di evolucion. Con e Creador cu tin tur sabiduría ta considera tal “cosnan profundo”? Segun apóstol Pablo, el a bisa: “Lo mi destrui e sabiduría dje sabínan.” Na contraste cu esei, “e cosnan profundo di Dios” ta senciyo, claro, i animador. Cristian sabí ta evita e “cosnan profundo” dje mundo sofisticá di Satanás. No lubida, “mundo ta pasa forbij i també su deseo, pero ken cu ta haci e boluntad di Dios ta permanece pa semper.”—1 Corintio 1:19, Kingdom Interlinear; 2:10; 1 Juan 2:17.

18. Cua bendicion Jesús a priminti na cristian ungí cu ta keda fiel te na fin, i cua privilegio esnan resusitá lo haya na Armagedón?

¹⁸ Awor Jesús a sigi papia palabra di animacion pa hende cristian den Tiatira. Nan també ta anima cristian ungí djawe: “I na esun cu ta vence i ta observa mi echonan te na fin lo mi duna autoridad riba e nacionan, i lo e pastorea e pueblo cu un bara di heru di manera cu nan lo ser kibrá na pida pida manera wea di clei, mescos cu mi a recibi di mi Tata.” (Revelacion 2:26, 27) Berdaderamente un privilegio maraviyoso! E autoridad cu vencedor ungí ta recibi na nan resureccion ta di participa cu Jesús usando e “bara di heru” di destruccion contra nacion rebelioso na Armagedón. Alomas, arma nuclear dje nacionan lo spat manera un donderbos muhá ora Cristo ta kibra su enemigonan na werki como si nan ta wea di clei.—Salmo 2:8, 9; Revelacion 16:14, 16; 19:11-13, 15.

19. (a) Ken ta e “strea di madrugá,” i con e lo ser duná na esnan cu ta vence? (b) Cua animacion ta ser ofrecí ne multitud grandi?

¹⁹ Jesús a agrega: “I lo mi duné e strea di madrugá.” (Revelacion 2:28) Jesús mes a splica despues loke ta tal “strea,” bisando: “Mi ta e raíz i desendiente di David, i e strea briyante di madrugá.” (Revelacion 22:16) Sí, ta Jesús mes cu ta cumpli cu e profecía cu Jehova a haci sali for di boca di Balam cu no kier a bisé: “Un strea siguramente lo sali for di Jacob, i un bara real en berdad lo lanta for di Israel.” (Número 24:17) Con Jesús ta duna e “strea di madrugá” na esnan cu ta vence? Evidentemente door di duna su mes na nan, recibiendo nan den e relacion di mas íntimo, di mas estrecha cuné. (Juan 14:2, 3) Esei siguramente ta motibo fuerte pa persevera! Ta estimulante també pe multitud grandi sa cu e “strea briyante di madrugá” pronto lo eherce su autoridad real pa restora Paradijs aki riba tera!

Mantene integridad

20. Kico a sosode den cristiandad cu ta hácinos corda algun debilidad den e congregacion den Tiatira?

²⁰ Tal mensahe mester a anima cristian den Tiatira mashá. Imaginábo—e Yiu glorificá di Dios den cielo a papia personalmente cu cristian den Tiatira tocante algun problema cu nan tabatin! Siguramente por lo menos algun hende den e congregacion a reacciona na tal pastoreamento amoroso. Tal mensahe di mas largu di tur siete també ta yúdanos identifica e berdadero congregacion cristian djawe. Na 1918 ora Jesús a bini ne tempel di Jehova pa huzgamento, e mayoría grandi di organizacion cu a yama nan mes cristian tabata manchá cu idolatría i inmoralidad spiritual. (Santiago 4:4) Algun a funda nan kerimento riba e siñanza di muher dominante di siglo 19, tal como Ellen White di adventista di séptimo dia i Mary Baker Eddy di Ciencia Cristian, i mas recientemente hopi hende muher a predica riba preekstoel. (Haci contraste cu 1 Timoteo 2:11, 12.) Den e varios forma dje religion católico, hopi bez nan ta duna mas onor na María cu nan ta duna na Dios i Cristo. Jesús no a duné onor asina. (Juan 2:4; 19:26) Organizacion cu ta permiti tal influencia ilegítimo di muher realmente por ta aceptá como cristian?

21. Den e mensahe di Jesús pa Tiatira, cua les tin pa hende individual?

²¹ Cristian individual, sea dje grupo cu Juan a simboliza of dje otro carnénan, ta haci bon tumando e mensahe na cuenta. (Juan 10:16) Por ta un tentacion pa algun sigi un camina menos dificultoso, manera disípel di Jezabel a haci den Tiatira. També tin un tentacion pa haci compromiso. Awe, hende tin cu enfrenta cuestion tal como comemento di sanger yená, of aceptacion di transfusion di sanger. Algun por kere cu celo den e sirbishi di feld of dunamento di discurso ta dúnanan e derecho di ser menos estricto den otro aspecto, tal como wakmento di cine i video violento i inmoral, of bebemento di mucho alcohol. E spiertamento cu Jesús a duna na cristian den Tiatira ta bísanos cu nos no mag tuma tal libertad. Jehova Dios kier pa nos keda limpi, rindiendo sirbishi cu tur nos alma, i no keda na dos, manera hopi cristian tabata den Tiatira.

22. Con Jesús a duna énfasis ne importancia di tin orea cu ta tende?

²² Finalmente, Jesús a declara: “Laga ken cu tin orea tende loke e spiritu ta bisa e congregacionan.” (Revelacion 2:29) Pa di cuater bez, Jesús a repiti tal expresion animador, i esei a conclui tur tres mensahe cu ta sigi ainda. Bo tin orea cu ta tende? Anto sigi scucha atentamente mientras cu Dios, cu su spiritu, ta sigi duna conseho usando su canal.

[Nota]

[Plachinan na página 51]

Awe, fiel hermana ta efectua un parti grandi dje trabao di duna testimonio mientras cu nan modestamente ta duna apoyo na autoridad teocrático

Capítulo 11

Bo nomber ta den e buki di bida?

SARDIS

 1. E congregacion di Sardis tabata den cua estado spiritual, i con Jesús a cuminza su mensahe?

MAS cu 48 kilometer zuid di Akhisar (Tiatira) djawe, ta e sitio di Sardis, e sigiente congregacion pa recibi un mensahe di Jesús glorificá. Den siglo seis promé cu nos era común, e stad tabata e capital orguyoso dje reino di Lidia di antigua i asiento dje enormemente ricu rey Creso. Promé cu e dia di Juan tempo duro a dalé, i su splendor di antes bao di Creso tabata simplemente cuenta di pasado. Di igual manera, e congregacion cristian situá ei a bira pober spiritualmente. Pe promé bez, Jesús no a cuminza su mensahe cu un palabra di encomendacion. En bez di esei, el a bisa: “I skirbi ne angel dje congregacion den Sardis: Esaki ta loke esun cu tin e siete spiritu di Dios i e siete strea ta bisa, ‘Mi conoce bo echonan, cu bo tin e nomber di cu bo ta bibo, pero bo ta morto.’”—Revelacion 3:1.

 2. (a) E echo cu Jesús tin e “siete spiritu” tin cua nificacion pa cristian den Sardis? (b) E congregacion di Sardis tabatin cua nomber, pero kico tabata e berdad?

² Pakico Jesús a identifica su mes como esun cu “tin e siete spiritu”? Pasobra e siete spiritu ta representa e spiritu santo di Jehova Dios bashando den su plenitud. Despues, Juan també a yámanan “siete wowo,” indicando e bista penetrante cu e spiritu santo di Dios a duna Jesús. (Revelacion 5:6) Asina e por destapa i trata cu cualkier situacion cu por existi. (Mateo 10:26; 1 Corintio 4:5) E congregacion den Sardis tabatin e nomber di ser bibo i activo. Pero Jesús por a mira cu e tabata morto spiritualmente. Ta parce cu mayor parti di su miembronan a cai den un indiferencia igual cu nan estado promé cu nan a bira cristian.—Compara cu Efesio 2:1-3; Hebreo 5:11-14.

 3. (a) Pakico e “angel dje congregacion den Sardis” mester a ripara specialmente e echo cu Jesús tabatin e “siete strea”? (b) Cua conseho fuerte Jesús a duna e congregacion den Sardis?

³ Jesús a haci e “angel dje congregacion den Sardis” corda també cu Jesús ta esun cu tin e “siete strea.” E ta tene anciano di congregacion den su man drechi, teniendo autoridad di dirigínan den nan trabao di pastorea. Nan tin cu dedica nan curazón pa ‘conoce positivamente aparencia dje tao.’ (Proverbio 27:23) P’sei, mihor nan scucha atentamente ne sigiente palabra di Jesús: “Bira vigilante, i fortalece e cosnan restante cu tabata cla pa muri, pasobra mi no a haya bo echonan plenamente ehecutá dilanti mi Dios. P’sei, sigi tene presente con bo a recibi i con bo a tende, i sigi wardé, i arrepentíbo. Siguramente, amenos cu bo lanta, lo mi bini manera ladrón, i lo bo no sa mes ki ora mi ta bini riba bo.”—Revelacion 3:2, 3.

 4. Con e palabra di Pedro por a yuda e congregacion den Sardis “fortalece e cosnan restante”?

⁴ Anciano den Sardis mester corda e gozo cu nan tabatin promé ora nan a siña e berdad i bendicion cu nan a recibi ne tempo ei. Ma awor nan tabata morto en cuanto actividad spiritual. Flam di lampi dje congregacion tabata faya debí na falta di obra di fe. Hopi aña promé, apóstol Pedro a skirbi na congregacion den Asia (probablemente incluyendo Sardis) pa nan cultiva aprecio pe glorioso bon nobo cu hende cristian a acepta i cu a ser declará cu “spiritu santo mandá foi cielo”—cu e siete spiritu dje vision di Juan a representa. Pedro també a haci cristian di Asia corda cu nan a pertenece na ‘un raza escogí, un sacerdocio real, un nacion santo, un pueblo pa un posesion special, pa nan declara na tur parti excelencia di esun cu a yámanan for di scuridad na su luz maraviyoso.’ (1 Pedro 1:12, 25; 2:9) Meditacion riba tal berdad spiritual por a yuda e congregacion den Sardis arrepentié i “fortalece e cosnan restante.”—Compara cu 2 Pedro 3:9.

 5. (a) Kico a sosode e aprecio di hende cristian den Sardis? (b) Kico por sosode si cristian den Sardis no reacciona ne conseho di Jesús?

⁵ Ne momento ei, nan aprecio i amor dje berdad tabata manera un candela cu ta cerca di paga. Poco chispa so a keda cendí. Jesús a animánan pa waya e chispa, lanta un candela, arrepentínan di nan picá den locual negligencia a híbanan, i bira un congregacion spiritualmente bibo atrobé. (Compara cu 2 Timoteo 1:6, 7.) Di otro manera, ora Jesús a yega inesperadamente—“manera ladrón”—pa ehecuta huicio, e congregacion den Sardis lo no ta prepará.—Mateo 24:43, 44.

Biniendo “manera ladrón”

 6. Con Jesús a bini “manera ladrón” na 1918, i cua situacion el a haya den hende cu a yama nan mes sigidor di dje?

⁶ E spiertamento cu Jesús a duna di cu lo e bini “manera ladrón” ta yega te ne dia djawe. E tabatin un aplicacion special pa hende cristian cu a sobrebiba pa drenta den e dia di Señor. Pronto despues di 1914, tabatin un cumplimento dje profecía di Malaquías: “‘Di ripiente e berdadero Señor lo bini na su tempel, locual boso ta busca, i e mensahero di pacto cu boso ta gusta. Mira! e ta bini siguramente,’ Jehova di ehército a bisa.” (Malaquías 3:1; Revelacion 1:10) Como “mensahero di pacto,” Jesús a bini pa inspecciona i huzga hende cu a yama nan mes sigidor di dje. (1 Pedro 4:17) Ne tempo ei, na 1918, cristiandad tabata enbolbí den dramamento di sanger den Gera Mundial I i tabata completamente morto den un sentido spiritual. Asta cristian berdadero, cu promé cu e gera a predica tanto celosamente, a pasa door di un tempo di cabeshamento spiritual. Algun anciano prominente di nan tabata encarcelá, i e trabao di predica casi a para. Ora e spiritu di Jehova Dios a lanta tal cristian foi soño e sigiente aña, tur no tabata cla. Algun, mescos cu birgen bobo dje comparacion di Jesús, no tabata armá spiritualmente pe privilegio di sirbi Jehova. Pero, felizmente, tabatin hopi cu, mescos cu birgen prudente, a obedece e spiertamento di Jesús: “Sigi vigila, pues, pasobra boso no sa ni e dia ni e ora.”—Mateo 25:1-13.

 7. Pakico hende cristian djawe tin cu keda lantá?

⁷ E necesidad pa hende cristian keda alerta no a termina ne principio dje dia di Señor. Den su gran profecía tocante e “siñal ora tur cos ta destiná pa yega na un conclusion,” Jesús a duna un advertencia fuerte: “En cuanto e dia i e ora ningun hende no sa . . . Sigi wak, keda lantá, pasobra boso no sa e ora dje tempo siñalá. Pero loke mi ta bisa boso mi ta bisa tur, Sigi vigila.” (Marco 13:4, 32, 33, 37) Sí, te na net e ora aki, cada un di nos, sea cu nos ta dje ungínan of dje multitud grandi, nos tin cu keda alerta i lucha pe corriente no híbanos na soño spiritual. Ora e dia di Jehova ta yega “manera ladrón den anochi,” laga esei háyanos completamente lantá pa nos recibi un huicio favorable.—1 Tesalonicense 5:2, 3; Lucas 21:34-36; Revelacion 7:9.

 8. Con e grupo djawe cu Juan a simboliza ta estimula e pueblo di Dios pa nan keda bibo spiritualmente?

⁸ E mesun grupo djawe cu Juan a simboliza ta na haltura dje necesidad di estimula e pueblo di Dios pa nan keda na bida spiritualmente. P’sei, nan ta haci arreglo pa reunion special den tur e mundo varios bez pa aña. Den un aña reciente, asistencia na 2.981 asamblea di districto tabata un total di 10.953.744, i 122.701 creyente nobo a bautiza. Pa mas cu cien aña caba, e grupo cu Juan a simboliza a usa e revista Toren di Vigilancia pa anuncia e nomber i propósito di Jehova Dios. Reaccionando na persecucion severo durante dos gera mundial, Toren di Vigilancia a lanta Testigo di Jehova na celo renobá, publicando artículo tal como “Bendicioná ta esnan sin miedu” (1919), “Un yamada pa accion” (1925), i “Derota di persecucion” (1942).

 9. (a) Kico tur hende cristian mester puntra nan mes? (b) Cua animacion Toren di Vigilancia a duna?

⁹ Mescos cu a sosode den Sardis, asina tá den tur congregacion djawe, un examinacion propio continuo ta vital pa tur hende cristian. Nos tur tin cu sigi puntra nos mes: Nos “echonan ta plenamente ehecutá” dilanti nos Dios? Sin huzga otro hende, nos personalmente ta cultiva e spiritu di sacrificio propio i ta lucha pa rindi na Dios un sirbishi di tur nos alma? En cuanto esei, e revista Toren di Vigilancia a duna animacion publicando tópico tal como “Sigi duna prueba di loke boso mes ta” i “No biba mas pa nos mes.”a Recibiendo tal yudanza bíblico, láganos examina nos mes lo mas profundamente mientras cu nos ta purba di camna humildemente, pidiendo yudanza den oracion, den nos integridad dilanti Jehova Dios.—Salmo 26:1-3; 139:23, 24.

“Algun nomber”

10. Cua rasgo animador Jesús a mira den e congregacion di Sardis, i con esei mester afectános?

¹⁰ Loke Jesús a sigi bisa ne congregacion den Sardis ta mashá animador. El a bisa: “No obstante, abo sí tin algun nomber den Sardis cu no a mancha nan bistí exterior, i nan lo camna cu mi den bistí blancu pasobra nan ta digno. Ken cu vence lo ser bistí asina den bistí exterior blancu; i di ningun manera lo mi paga su nomber for dje buki di bida, sino lo mi haci reconocimento di su nomber dilanti mi Tata i dilanti su angelnan.” (Revelacion 3:4, 5) E palabra ei no ta animános i fortalece nos determinacion di keda fiel? Debí na negligencia di parti di un cuerpo di anciano, un congregacion henter por cai den un soño spiritual profundo. Pero, algun hende den dje por lucha balentemente pa mantene nan identidad cristian puro i sin mancha i asina sigi tene un bon nomber cu Jehova Dios.—Proverbio 22:1.

11, 12. (a) Asta durante e apostasía grandi, con algun mester a keda manera “algun nomber” fiel den Sardis? (b) Cua alivio a yega pa hende cristian semehante di trigo durante e dia di Señor?

¹¹ Sí, tal “bistí exterior” ta referi na identidad husto di un persona como cristian. (Compara cu Revelacion 16:15; 19:8.) Mester ta un animacion pa Jesús pe mira cu, apesar dje indiferencia dje mayoría grandi, “algun nomber,” algun cristian ungí den Sardis ainda a logra mantene tal identidad. Di igual manera, ora hende yamá cristian a bolbe na Babilonia e Grandi, e imperio mundial di religion falso, durante siglonan largu dje gran apostasía, semper tabatin cu ser algun hende individual cu a purba, contra obstáculo grandi, di haci e boluntad di Jehova. Nan tabata husto manera trigo scondí den un cunucu yen di mal yerba sectaria.—Revelacion 17:3-6; Mateo 13:24-29.

¹² Jesús a priminti di keda cu tal hende cristian parecido di trigo “tur dia te ne conclusion dje sistema di cosnan.” E sa ken nan tá i cua bon nomber nan a traha pa nan mes. (Mateo 28:20; Eclesiastés 7:1) Imaginábo e gozo dje “algun” fielnan cu tabata na bida ainda ne principio dje dia di Señor! Finalmente nan tabata separá for di cristiandad spiritualmente morto i tabata recogí den un congregacion husto cu a parce mas e congregacion den Smirna.—Mateo 13:40-43.

13. Cua bendicion ta wardá pa cristian ungí cu no ta “mancha nan bistí exterior”?

¹³ Esnan den Sardis cu a keda fiel te na fin i no a mancha nan identidad cristian ta alcanza cumplimento di nan speranza maraviyoso. Despues di establecimento dje Reino mesiánico di Jesús na 1914, nan a haya resureccion na bida spiritual i como vencedor ta wordu bistí cu bistí exterior blancu como símbolo di nan husticia inmaculada i sin defecto. Ya cu nan a camna riba e camina pretá cu ta hiba na bida, nan lo disfruta di un recompensa eterno.—Mateo 7:14; mira també Revelacion 6:9-11.

Pa semper den e buki di bida!

14. Kico ta e “buki di bida,” i e nomber di ken ta skirbí den dje?

¹⁴ Kico ta e “buki di bida,” i e nomber di ken lo keda den dje? E buki, of rol, di bida ta referi ne registro di sirbidor di Jehova cu ta merece di recibi e don di bida eterna. (Malaquías 3:16) Den Revelacion tin referencia específica hací na nomber di cristian ungí. Pero e nomber di esnan cu lo recibi bida eterna riba tera també ta ser skirbí den dje. Además, nomber por ta ‘pagá’ foi dje buki. (Éxodo 32:32, 33) No obstante, esnan dje grupo cu Juan a simboliza kende nan nomber ta keda den e buki di bida te na nan morto ta recibi bida inmortal den cielo. (Revelacion 2:10) Esei ta nomber cu Jesús specialmente ta duna reconocimento special dilanti su Tata i dilanti su angelnan. Ki un recompensa magnífico!

15. Con miembro dje multitud grandi lo haya nan nomber skirbí permanentemente den e buki di bida?

¹⁵ E multitud grandi, kende nan nomber també ta skirbí den e buki di bida, lo sali for dje tribulacion grandi na bida. Door di eherce fe durante tur e Reino di mil aña di Jesús i durante e prueba decisivo cu ta sigi, eseinan lo recibi e recompensa di bida eterna den Paradijs riba tera. (Daniel 12:1; Revelacion 7:9, 14; 20:15; 21:4) Anto nan nomber lo ser skirbí permanentemente den e buki di bida. Ya cu bo sa loke ta ser presentá ei mediante e spiritu santo, bo no ta reacciona na moda entusiasmá ne conseho cu Jesús a repiti: “Laga ken cu tin orea tende loke e spiritu ta bisa e congregacionan”?—Revelacion 3:6.

[Nota]

[Plachi na página 57]

Nos peticion tá pa bo nomber permanece den e buki di bida

Capítulo 12

“Sigi tene firmemente gará loke bo tin”

FILADELFIA

 1. E mensahe di seis di Jesús tabata dirigí ne congregacion den cua stad, i kico kier men e nomber dje stad?

CARIÑO FRATERNAL—ki un calidad deseabel! Sin duda Jesús tabata pensa di esei ora el a presenta su mensahe di seis, cu el a dirigí ne congregacion den Filadelfia, pasobra e nomber kier men “Cariño fraternal.” E anciano Juan a corda ainda e ocasion, mas cu 60 aña promé, ora Pedro a segura Jesús tres bez cu e, Pedro, tabatin cariño caloroso pa su Señor. (Juan 21:15-17) Di nan parti, hende cristian den Filadelfia tabata desplega cariño fraternal? Ta parce cu Sí!

 2. Filadelfia tabata ki clase di stad, i cua clase di congregacion tabata situá ei, i kico Jesús a bisa e angel dje congregacion?

² Situá rond di 48 kilometer zuidoost di Sardis (ne sitio dje stad turco moderno di Alasehir), Filadelfia di dia di Juan tabata un stad basta próspero. Sin embargo, mas notable tabata e prosperidad dje congregacion cristian ei. Cu cuanto gozo nan mester a recibi e mensahero cu a haci biahe cerca nan, probablemente biniendo di Sardis! E mensahe cu el a trece tabatin conseho conmovedor pa nan. Pero promé el a referi ne autoridad dje Persona ilustre cu a mandé. El a bisa: “I skirbi ne angel dje congregacion di Filadelfia: Esaki ta loke esun cu ta santo ta bisa, esun cu ta berdadero, cu tin e yabi di David, cu ta habri di manera cu ningun hende por cera, i cu ta cera di manera cu ningun hende por habri.”—Revelacion 3:7.

 3. Pakico ta apropiado pa Jesús ser yamá “santo,” i con e por bisa cu Jesús ta “berdadero”?

³ Juan a tende Pedro bisa e homber Jesucristo: “Bo tin e palabra di bida eterna; i nos a kere i a yega di sa cu bo ta e Santo di Dios.” (Juan 6:68, 69) Siendo cu Jehova Dios ta berdaderamente santidad mes, su Yiu unigénito també mester ta “santo.” (Revelacion 4:8) Jesús també ta “berdadero.” E palabra griego usá asina (a·le·thi·nós) ta indica autenticidad. Den e sentido ei, Jesús ta e berdadero luz i e berdadero pan cu a baha foi cielo. (Juan 1:9; 6:32) E ta e berdadero mata di wijndruif. (Juan 15:1) Jesús ta berdadero també den e sentido di cu e ta digno di confianza. E semper ta papia e berdad. (Mira Juan 8:14, 17, 26.) E Yiu di Dios en berdad ta merece di sirbi como Rey i Huez.—Revelacion 19:11, 16.

“E yabi di David”

4, 5. E “yabi di David” tabata asociá cu cua pacto?

⁴ Jesús tin e “yabi di David.” Usando e yabi e ta “habri di manera cu ningun hende por cera, i ta cera di manera cu ningun hende por habri.” Kico ta e “yabi di David”?

⁵ Jehova a cera un pacto pa un reino eterno cu rey David di Israel. (Salmo 89:1-4, 34-37) Desendiente di David a reina riba e trono di Jehova den Jerusalem for di 1070 te 607 PEC, anto Dios a ehecuta su huicio riba e reino pasobra el a bira corrupto. Asina Jehova a cuminza cumplimento di su profecía den Ezekiel 21:27: “Lo mi haci [Jerusalem terrenal] un ruina, ruina, ruina. En cuanto esei [e bara di autoridad dje reinado den desendencia di David] també, siguramente lo no yega di ser di ningun hende te cu esun ta bini cu tin derecho legal, i mi mester duné na dje.”

6, 7. Na ki tempo i di ki manera esun cu tin “derecho legal” tabatin cu presenta?

⁶ Na ki tempo i di ki manera esun cu tabatin “derecho legal” a presenta? Con e bara di autoridad dje reino di David por ta duná na dje?

⁷ Rond di 600 aña despues, un desendiente di rey David, e birgen hudía, María, a sali den estado pe spiritu santo. Dios a manda angel Gabriel pa informa María di cu lo e haya un yiu homber, pa ser yamá Jesús. Gabriel a agrega: “Esei lo ta grandi i lo ser yamá Yiu dje Haltísimo; i Jehova Dios lo duné e trono di David su tata, i lo e reina como rey riba e cas di Jacob pa semper, i lo no tin fin di su reino.”—Lucas 1:31-33.

 8. Con Jesús a duna prueba cu el a califica pa hereda e trono di David?

⁸ Na aña 29 EC, ora Jesús a bautiza den e rio Jordan i tabata ungí cu e spiritu santo, e tabata nombrá pa ser Rey den e liña di David. El a demonstra celo ehemplar predicando e bon nobo dje Reino i a comisiona su disípelnan pa predica també. (Mateo 4:23; 10:7, 11) Jesús a humiya su mes, asta te na morto riba staca di tormento, asina dunando prueba cu e tabata plenamente capacitá pa hereda e trono di David. Jehova Dios a resusita Jesús como un spiritu inmortal i a halzé te na su mes man drechi den cielo. Ei el a hereda tur derecho dje reino di David. Ne debido tempo Jesús por a eherce su derecho di “bai dominando meimei di [su] enemigonan.”—Salmo 110:1, 2; Filipense 2:8, 9; Hebreo 10:13, 14.

 9. Di ki manera Jesús a usa e yabi di David pa habri i cera?

⁹ Mientras tanto Jesús a usa e yabi di David, habriendo oportunidad i privilegio relacioná cu e Reino di Dios. Mediante Jesús, awor Jehova a liberta cristian ungí riba tera “for di autoridad di scuridad,” transportando nan ne “reino dje Yiu di su amor.”(Colosense 1:13, 14) El a usa e yabi també pa cera tal privilegio pa cualkier hende cu a resulta di ser infiel. (2 Timoteo 2:12, 13) Siendo cu e heredero permanente dje reino di David tabatin e apoyo di Jehova, ningun persona por strobé di cumpli cu su trabao.—Compara cu Mateo 28:18-20.

10. Cua estímulo Jesús a duna e congregacion den Filadelfia?

¹⁰ Biniendo di un fuente asina autoritativo, e palabra di Jesús dirigí na hende cristian den Filadelfia tabatin cu ser specialmente consolador! El a encomendánan, bisando: “Mi conoce bo echonan—mira! Mi a pone dilanti bo un porta habrí, cu ningun hende por cera—cu bo tin un poco poder, i bo a warda mi palabra i no a resulta di ser falso na mi nomber.” (Revelacion 3:8) E congregacion tabata activo, i un porta a ser habrí dilanti dje—sin duda un porta di oportunidad pa sirbishi ministerial. (Compara cu 1 Corintio 16:9; 2 Corintio 2:12.) P’sei, Jesús a conseha e congregacion pa probecha plenamente dje oportunidad di predica. Nan a wanta i a mustra cu nan tabatin suficiente poder, cu e yudanza di spiritu di Dios, pa nan sigi haci mas “echo” den e sirbishi di Jehova. (2 Corintio 12:10; Zacarías 4:6) Nan a obedece mandamento di Jesús i no a nenga Cristo, ni cu palabra ni cu accion.

“Nan lo buig dilanti bo”

11. Cua bendicion Jesús a priminti hende cristian, i con esei tabata realizá?

¹¹ P’sei, Jesús a primintínan fruta: “Mira! lo mi duna esnan dje sinagoga di Satanás cu ta bisa cu nan ta hudío, i toch nan no tá sino ta gaña—mira! lo mi hácinan bini i rindi homenahe dilanti boso pia i hácinan sa cu mi a stimábo.” (Revelacion 3:9) Kizás, mescos cu den Smirna, e congregacion tabatin problema cu hudío local. Jesús a yama eseinan “e sinagoga di Satanás.” No obstante, por lo menos algun hudío asina tabata cla pa yega di sa cu loke hende cristian tabata predica tocante Jesús tabata e berdad. Nan ‘rindimento di homenahe’ por ta dje manera cu Pablo a detaya den 1 Corintio 14:24, 25, di manera cu nan realmente a arrepentínan i a bira cristian, comprendiendo claramente e gran amor di Jesús entregando asta su alma na fabor di su disípelnan.—Juan 15:12, 13.

12. Pakico probablemente tabata un sorpresa pa miembro dje sinagoga hudío den Filadelfia tende cu algun di nan lo “buig” pe comunidad cristian local?

¹² Probablemente tabata un sorpresa pa miembro dje sinagoga hudío den Filadelfia tende cu algun di nan lo “rindi homenahe” ne comunidad cristian local. Den bista dje echo cu indudablemente tabatin hopi hende no hudío den e congregacion, nan a spera net lo contrario sosode. Pakico? Pasobra Isaías a profetiza: “Rey [no hudío] tin cu bira cuidador di bo [hende di Israel], i nan princesa lo bira yaya pa bo. Cu cara pa tera nan lo buig dilanti bo.” (Isaías 49:23; 45:14; 60:14) També, Zacarías tabata inspirá pa skirbi: “Lo ta den e dianan ei cu diez homber [no hudío] di tur lenga dje nacionan lo haya gara, sí, nan realmente lo haya gara di saya di hende cu ta hudío, bisando: ‘Nos ta bai cu boso, pasobra nos a tende cu Dios ta cu boso.’” (Zacarías 8:23) Sí, hende no hudío tabatin cu buig pa hudío, i no lo contrario!

13. Ken tabata hudío cu a experimenta cumplimento di profecía dirigí na Israel di antigua?

¹³ Tal profecía tabata dirigí ne nacion escogí di Dios. Ora tal profecía tabata declará, Israel carnal a ocupa tal puesto di onor. Pero ora e nacion hudío a rechaza Mesías, Jehova a rechazánan. (Mateo 15:3-9; 21:42, 43; Lucas 12:32; Juan 1:10, 11) Na Pentecoste di aña 33 EC, el a scoge den nan lugar e berdadero Israel di Dios, e congregacion cristian. Miembro di dje ta hudío spiritual cu berdadero circuncision di curazón. (Echo 2:1-4, 41, 42; Romano 2:28, 29; Galatio 6:16) Despues, e único manera pa hudío carnal individual bolbe na un relacion favorecida cu Jehova ta di pone fe den Jesús como Mesías. (Mateo 23:37-39) Ta parce cu esei tabata loke tabata cla pa sosode cu algun hende den Filadelfia.a

14. Con Isaías 49:23 i Zacarías 8:23 tabatin un cumplimento significativo den nos tempo?

¹⁴ Den e dia djawe, profecía tal como Isaías 49:23 i Zacarías 8:23 tabatin un cumplimento mashá significante. Como resultado dje predicamento dje grupo cu Juan a simboliza, un gran cantidad di hende a drenta door dje porta habrí ne sirbishi di Reino.b E mayor parti di eseinan a sali for di cristiandad, e religion di locual ta pretende falsamente di ser Israel spiritual. (Compara cu Romano 9:6.) Hende asina, un multitud grandi, a laba nan mantel i a hácinan blancu eherciendo fe den e sanger sacrificial di Jesús. (Revelacion 7:9, 10, 14) Nan ta obedece e gobernacion dje Reino di Cristo i ta spera di hereda bendicion di dje aki riba tera. Nan ta acudi ne rumanan ungí di Jesús i ta “buig” pa nan, den un sentido spiritual, pasobra ‘nan a tende cu Dios ta cu nan.’ Nan ta ministra ne ungínan, cu ken nan mes a bira uní den un asociacion mundial di rumanan.—Mateo 25:34-40; 1 Pedro 5:9.

“E ora di prueba”

15. (a) Kico Jesús a priminti na cristian den Filadelfia, i nan tabata estimula pa haci kico? (b) Hende cristian tabata spera di recibi cua “corona”?

¹⁵ Jesús a sigi bisa: “Door cu bo a warda e palabra tocante mi awante, ami també lo wardábo dje ora di prueba, cu tin cu bini riba tur e tera habitá, pa somete na prueba esnan cu ta biba riba tera. Mi ta bini pronto. Sigi tene firmemente gará loke bo tin, pa ningun hende tuma bo corona.” (Revelacion 3:10, 11) Aunque hende cristian dje dia di Juan no a sigi biba te ne dia di Señor (cu a cuminza na 1914), nan confianza di cu Jesús lo bini a dúnanan e poder di sigi predica. (Revelacion 1:10; 2 Timoteo 4:2) E “corona,” of premio di bida eterna, a spéranan den cielo. (Santiago 1:12; Revelacion 11:18) Si nan a keda fiel te na morto, ningun hende por a stróbanan di recibi e recompensa.—Revelacion 2:10.

16, 17. (a) Kico ta e “ora di prueba, cu tin cu bini riba tur e tera habitá”? (b) E ungínan tabata den cua estado na principio dje “ora di prueba”?

¹⁶ Sin embargo, kico ta e “ora di prueba”? Sin duda, hende cristian den Asia tabatin cu enfrenta un otro ola di terribel persecucion biniendo di Roma imperial.c No obstante, e cumplimento principal ta e ora di seftamento i di huzgamento cu ta yega finalmente durante e dia di Señor, culminando desde 1918 padilanti. E prueba ta di determina si hende ta na fabor dje Reino establecí di Dios of na fabor dje mundo di Satanás. Esei ta pa un periodo di tempo comparativamente cortico, un “ora,” pero e no a caba ainda. Te cu e caba, nos no mag lubida cu nos ta biba durante e “ora di prueba.”—Lucas 21:34-36.

¹⁷ Na 1918, e grupo di cristian ungí cu Juan a simboliza—mescos cu e congregacion firme di Filadelfia—tabatin cu enfrenta oposicion dje “sinagoga di Satanás” djawe. Líder religioso di cristiandad, cu a yama nan mes hudío spiritual, cu astucia a influenciá homber gobernante pa silenciá cristian berdadero. No obstante, esei a haci esfuerzo duro pa ‘warda e palabra dje awante di Jesús’; p’sei, cu yudanza spiritual, un significante “poco poder,” nan a sobrebiba i tabata lantá pa drenta den e porta cu awor a habri pa nan. Di ki manera?

“Un porta habrí”

18. Cua nombramento Jesús a haci na 1919, anto con esnan nombrá asina a bira manera e fiel mayordomo di Ezequías?

¹⁸ Na 1919 Jesús a cumpli cu su promesa i a reconoce e grupito di berdadero cristian ungí como su “esclabo fiel i prudente.” (Mateo 24:45-47) Eseinan a drenta den un privilegio similar cu esun cu e fiel mayordomo Eliaquim a goza den e tempo di rey Ezequías.d Jehova a bisa di Eliaquim: “Lo mi pone e yabi dje cas di David riba su scouder, i e mester habri sin cu ningun hende ta cera, i e mester cera sin cu ningun hende ta habri.” Eliaquim a carga responsabilidad pisá pa Ezequías, e yiu real di David. Di igual manera den e dia djawe, e grupo ungí cu Juan a simboliza a haya e “yabi dje cas di David” poní riba su scouder pasobra e grupo a ser confiá cu interés terrenal dje Reino mesiánico. Jehova a fortalece su sirbidornan pa tal privilegio, ampliando e poco poder cu nan tabatin pe bira energía dinámico, suficiente pa duna un testimonio gigantesco mundial.—Isaías 22:20, 22; 40:29.

19. Con e grupo cu Juan a simboliza a cumpli cu e responsabilidad cu Jesús a duné na 1919, i cu ki resultado?

¹⁹ Desde 1919 padilanti e resto ungí, sigiendo ehempel di Jesús, a principiá un campaña vigoroso di declara na tur parti e bon nobo di Reino. (Mateo 4:17; Romano 10:18) Como resultado, algun dje sinagoga moderno di Satanás, esta, cristiandad, a acudi ne resto ungí, a arrepenti i a ‘buig,’ reconociendo e autoridad dje esclabo. Nan també a bini pa sirbi Jehova Dios den union cu anciano dje grupo cu Juan a simboliza. Esei a sigi te cu e cantidad completo dje rumanan ungí di Jesús tabata recogí. Despues di esei, “un multitud grandi . . . di tur nacion” a bini pa “buig” pe esclabo ungí. (Revelacion 7:3, 4, 9) En conhunto, e sclabo i e multitud grandi ta sirbi como e solo tao di Testigo di Jehova.

20. Pakico Testigo di Jehova djawe mester ta specialmente fuerte den fe i activo den e sirbishi di Dios?

²⁰ Uní mescos cu hende cristian den Filadelfia den un enlace di berdadero cariño fraternal, Testigo di Jehova djawe ta comprende e urgencia di nan predicacion. Pronto, e tribulacion grandi lo haci e cortina cai riba e mundo malbado di Satanás. Laga e tempo ei haya nos tur fuerte den e fe i activo den e sirbishi di Dios, pa nos nomber no ser gescrap for dje buki di bida di Jehova. (Revelacion 7:14) Láganos tuma mashá na serio e conseho di Jesús pe congregacion den Filadelfia pa nos tene firmemente gará nos privilegio di sirbishi i alcanza e recompensa di bida eterna.

Bendicion di vencedor

21. Con cristian ungí djawe a ‘warda e palabra dje awante di Jesús,’ i cua prospecto ta spéranan?

²¹ E grupo djawe cu Juan a simboliza ta ‘warda e palabra tocante e awante di Jesús,’ esta, nan ta sigi su ehempel i ta wanta. (Hebreo 12:2, 3; 1 Pedro 2:21) P’sei, nan ta recibi mashá estímulo for dje sigiente palabra di Jesús dirigí ne congregacion den Filadelfia: “Ken cu vence—lo mi hacié pilar den e tempel di mi Dios, i lo e no sali djei nunca mas.”—Revelacion 3:12a.

22. (a) Kico ta e tempel di e Dios di Jesús? (b) Con cristian ungí cu ta vence lo bira pilar dje tempel?

²² Ta ki un privilegio pa un persona ser pilar den e tempel di Jehova! Den Jerusalem di antigua, e tempel mes tabata e centro dje adoracion di Jehova. Den e tempel, e sumosacerdote a ofrece e sanger di bestia sacrificá, un dia cada aña, dilanti dje luz milagroso cu a representa e presencia di Jehova den e “Lugar santísimo.” (Hebreo 9:1-7) Ne bautismo di Jesús, a yega di existi un otro tempel, un gran arreglo spiritual semehante dje tempel, pe adoracion di Jehova. E lugar santísimo dje tempel ei ta den cielo, unda Jesús a presenta debidamente “dilanti dje persona di Dios.” (Hebreo 9:24) Jesús ta e sumosacerdote, i tin un solo sacrificio ofrecí pa picá, pa cubrínan completamente, esta, e sanger dramá dje homber perfecto Jesús. (Hebreo 7:26, 27; 9:25-28; 10:1-5, 12-14) Tan tempo cu nan ta keda fiel, cristian ungí riba tera ta sirbi como subsacerdote den e curá terrenal dje tempel. (1 Pedro 2:9) Pero despues di a vence, nan també ta drenta den e lugar santísimo di cielo i ta bira apoyo inmovible, manera pilar, dje arreglo semehante dje tempel pa adoracion. (Hebreo 10:19; Revelacion 20:6) No ta existi peliger di cu nan lo “sali djei nunca mas.”

23. (a) Cua sigiente promesa Jesús a duna na cristian ungí cu ta vence? (b) Ki resultado tin di skirbimento dje nomber di Jehova i dje nomber di Jerusalem nobo riba vencedor cristian?

²³ Jesús a sigi: “I lo mi skirbi riba dje e nomber di mi Dios i e nomber dje stad di mi Dios, Jerusalem nobo cu ta baha foi cielo foi mi Dios, i e nomber nobo di mi.” (Revelacion 3:12b) Sí, tal vencedor tin skirbí riba nan e nomber di Jehova—nan Dios i e Dios di Jesús. Esei ta mustra claramente cu Jehova i Jesús ta dos persona distinto i no ta dos persona dje “tres divina persona,” of trinidad. (Juan 14:28; 20:17) Tur creacion mester yega di mira cu esnan ungí ta pertenece na Jehova. Nan ta testigo di DJE. Nan també tin skirbí riba nan e nomber di Jerusalem nobo, e stad celestial cu ta baha foi cielo den e sentido di cu e ta extende su gobernacion bondadoso riba tur humanidad fiel. (Revelacion 21:9-14) Asina tur carné cristian terrenal també lo sa cu tal vencedor ungí ta ciudadano dje Reino, Jerusalem celestial.—Salmo 87:5, 6; Mateo 25:33, 34; Filipense 3:20; Hebreo 12:22.

24. Kico e nomber nobo di Jesús ta representa, i con esei ta skirbí riba fiel cristian ungí?

²⁴ Finalmente, vencedor ungí ta haya e nomber nobo di Jesús skirbi riba nan. Esei ta referi ne puesto nobo di Jesús i privilegio cu Jehova ta duna na né so. (Filipense 2:9-11; Revelacion 19:12) Ningun otro persona ta yega di conoce su nomber, den e sentido di cu ningun otro persona tabatin tal experencia ni no ta ser confiá cu tal privilegio. Sin embargo, ora Jesús ta skirbi su nomber riba su fiel rumanan, nan ta drenta den un relacion íntimo cuné den region celestial i asta ta participa den su privilegio. (Lucas 22:29, 30) No ta straño cu Jesús a conclui su mensahe pa esnan ungí repitiendo e conseho: “Laga ken cu tin orea tende loke e spiritu ta bisa e congregacionan.”—Revelacion 3:13.

25. Con cada cristian individual djawe por aplica e principio tras dje conseho cu Jesús a duna ne congregacion den Filadelfia?

²⁵ Ki un gran animacion e mensahe tabatin cu ser pa fiel cristianan den Filadelfia! I siguramente ta un les fuerte pe grupo djawe cu Juan a simboliza, durante e dia di Señor. Pero principio di dje ta importante pa cada hende cristian, sea cu nan ta dje ungínan of dje otro carnénan. (Juan 10:16) Cada un di nos ta haci bon sigiendo produciendo fruta di Reino mescos cu hende cristian di Filadelfia. Nos tur tin por lo menos un poco poder. Nos tur por haci algo den e sirbishi di Jehova. Láganos usa nos poder! En cuanto e aumento di privilegio di Reino, láganos keda alerto pa drenta den cualkier porta cu ta habri pa nos. Nos asta por pidi Jehova habri un porta asina. (Colosense 4:2, 3) Mientras cu nos ta sigi e modelo di awante di Jesús i ta keda fiel na su nomber, nos ta mustra cu nos, també, tin orea cu ta tende loke e spiritu santo di Dios ta bisa e congregacionan.

Nota]

[Kuadro na página 63]

Yudando hopi hende buig

Dje 144.000 ungínan cu ta hereda e Reino celestial, ta parce cu un resto, e grupo cu Juan a simboliza, di menos cu 9.000 ainda tin cu completa nan carreda riba tera. Ne mesun tempo, e multitud grandi a aumenta pa bira un multitud di 6.600.000 i mas. (Revelacion 7:4, 9) Ki factor a contribui na tal aumento grandi? E varios scol cu Testigo di Jehova a inaugura ta haci un contribucion grandi. Mashá distinto di seminario di cristiandad cu ta siña filosofía di mundo i ta desprecia e Bijbel, scol di Testigo di Jehova ta inculca fe profundo den e Palabra di Dios. Nan ta mustra cu su aplicacion práctico ta resulta den un bida limpi i moral i den sirbishi dedicá na Dios. Mundialmente desde 1943, cada congregacion di Testigo di Jehova ta conduci den nan Salón di Reino un Scol di Ministerio Teocrático local. Miyones di hende ta asisti ne scol tur siman, sigiendo un programa unificá di educacion bíblico.

Desde 1959 Testigo di Jehova també ta conduci e Scol di Ministerio di Reino pa entrenamento di anciano i sirbidor ministerial di congregacion. I desde 1977, e Scol di Sirbishi di Pionero a entrená cientos di miles di ruman homber i muher, ken, cu e berdadero spiritu di Filadelfia, ta sirbi Jehova di tempo completo den e trabao di predica. Na 1987 e Scol di Entrenamento Ministerial a cuminza pa entrena ruman homber pa asignacion special den e campo mundial.

Sobresaliente den scol cu Testigo di Jehova ta mantene ta e Scol Bíblica di Galad di Watchtower. Desde 1943 e scol di misionero, situá den estado di New York, a gradua dos grupo di alumno casi tur aña. En total, el a entrena mas cu 7.000 sirbidor di Jehova pa sirbishi di misionero den stranhería. Graduado dje scol a sirbi den mas cu cien país, den hopi di locual nan a duna comienzo ne trabao di Reino. Despues di mas of menos 60 aña, tin algun misionero di promé ta traha ainda, participando cu misionero mas reciente den adelanto dje expansion mundial dje organizacion di Jehova. Ki un expansion maraviyoso tini!

[Tabèl na página 64]

Na 1919 Jesucristo, e Rey reinante, a habri un porta di oportunidad pa sirbishi cristian. Un cantidad aumentante di cristian deboto a probecha dje oportunidad.

1918 14 3,868 591

1928 32 23,988 1,883

1938 52 47,143 4,112

1948 96 230,532 8,994

1958 175 717,088 23,772

1968 200 1,155,826 63,871

1978 205 2,086,698 115,389

1988 212 3,430,926 455,561

1998 233 5,544,059 698,781

2005 235 6,390,022 843,234

[Nota]

[Tabèl na página 65]

E actividad di Testigo di Jehova ta di tur e curazón. Considera, por ehempel, e tempo cu nan ta dedica ne trabao di predica i siña i e gran cantidad di estudio bíblico gratis cu nan ta conduci den cas di hende.

1918 19,116 No tin registro

1928 2,866,164 No tin registro

1938 10,572,086 No tin registro

1948 49,832,205 130,281

1958 110,390,944 508,320

1968 208,666,762 977,503

1978 307,272,262 1,257,084

1988 785,521,697 3,237,160

1998 1,186,666,708 4,302,852

2005 1,278,235,504 6,061,534

[Plachi na página 59]

Yabi romano dje promé siglo

Capítulo 13

Cumpra oro cu candela a refina

LAODICEA

1, 2. Unda ta e sitio dje último di e siete congregacion pa recibi un mensahe di Jesús glorificá, i e stad tin cua rasgo distintivo?

LAODICEA ta e último di e siete congregacion pa recibi un mensahe di Jesús resusitá. I ki informacion iluminador i animador e ta comunica!

² Awe bo por haya e resto di Laodicea cerca Denizli, rond di 89 kilometer pazuid di Alasehir. Den e promé siglo, Laodicea tabata un stad próspero. Situá na cruzada di camina principal, e tabata un centro bancario i comercial clave. Benta di un ungüento famoso pa wowo a aumenta su riqueza, i e tabata famoso també pa su bistí di alta calidad trahá localmente di excelente lana pretu. E falta di awa, un problema principal pe stad, tabata resolví ora nan a traha un canal for di fuente di awa cayente pa hiba awa te ne stad. Asina, e awa tabata tibio so ora el a yega e stad.

 3. Con Jesús a introduci su mensahe pe congregacion den Laodicea?

³ Laodicea tabata cerca Colosas. Ora apóstol Pablo a skirbi na colosense, el a menciona un carta cu el a manda na laodicense. (Colosense 4:15, 16) Nos no sa loke Pablo a skirbi den e carta, pero e mensahe cu Jesús a manda awor pa laodicense ta mustra cu nan a cai den un estado spiritual lamentable. Pero, segun su costumber, Jesús a menciona promé e autoridad cu e tabatin, bisando: “I skirbi ne angel dje congregacion di Laodicea: Esaki ta loke e Amén ta bisa, e testigo fiel i berdadero, e principio dje creacion di Dios.”—Revelacion 3:14.

 4. Con Jesús ta e “Amén”?

⁴ Pakico Jesús a yama su mes e “Amén”? E título a duna peso hudicial na su mensahe. “Amén” ta un palabra hebreo skirbí cu letter romano cu kier men “di sigur,” “asina tá,” i ta ser usá pa termina oracion pa confirma loke nan a bisa. (1 Corintio 14:16) Jesús ta e “Amén” debí na su integridad perfecto i su morto sacrificial a confirma i a garantiza cumplimento di tur promesa precioso di Jehova. (2 Corintio 1:20) Desde e tempo ei, ta correcto pa dirigi tur oracion na Jehova Dios mediante Jesús.—Juan 15:16; 16:23, 24.

 5. Di ki manera Jesús ta e “testigo fiel i berdadero”?

⁵ També, Jesús ta e “testigo fiel i berdadero.” Hopi bez den profecía e ta ser asociá cu fieldad, berdad, i husticia, pasobra e ta completamente digno di confianza como un sirbidor di Jehova Dios. (Salmo 45:4; Isaías 11:4, 5; Revelacion 1:5; 19:11) E ta e Testigo di mas grandi di Jehova. Realmente, como e “principio dje creacion di Dios,” Jesús a declara e gloria di Dios desde e principio mes. (Proverbio 8:22-30) Como un hende riba tera, el a duna testimonio dje berdad. (Juan 18:36, 37; 1 Timoteo 6:13) Despues di su resureccion, el a priminti spiritu santo na su disípelnan i a bísanan: “Boso lo ta testigo di mi tanto den Jerusalem como den tur Hudea i Samaria i te ne parti mas lehano dje tera.” Desde Pentecoste di aña 33 EC padilanti, Jesús a dirigi cristian ungí den e predicacion dje bon nobo “den tur creacion cu ta bao di cielo.” (Echo 1:6-8; Colosense 1:23) En berdad, Jesús ta merece di ser yamá e testigo fiel i berdadero. Si cristian ungí di Laodicea a scucha su palabra, nan por a recibi beneficio.

 6. (a) Con Jesús a pinta estado spiritual dje congregacion den Laodicea? (b) Hende cristian di Laodicea no a sigi cua ehempel excelente di Jesús?

⁶ Cua mensahe Jesús tabatin pa laodicense? E no tabatin ningun palabra di encomendacion. El a bísanan francamente: “Mi conoce boso echonan, cu boso no ta ni friu ni cayente. Mi kier pa boso sea friu of cayente. Pues, pa motibo cu boso ta tibio i ni friu ni cayente, mi ta bai saca boso for di mi boca.” (Revelacion 3:15, 16) Con bo ta reacciona na un mensahe asina di Señor Jesucristo? Lo bo no lanta i examina bo mes? Siguramente laodicense tabatin cu lanta, pasobra nan a bira spiritualmente floho, aparentemente pensando cu mucho cos a bini di mes. (Compara cu 2 Corintio 6:1.) Jesús, como esun cu nan como hende cristian mester a imita, semper a desplega un celo ardiente pa Jehova Dios i pa su sirbishi. (Juan 2:17) Además, hende manso semper a haya cu e tabata tierno i suave, tanto refrescante como un copi di awa friu na un dia di calor intenso. (Mateo 11:28, 29) Pero hende cristian den Laodicea no tabata ni friu ni cayente. Mescos cu e awa cu a yega na nan stad, nan a bira lauw, tibio. Nan tabata den peliger di ser rechazá completamente pa Jesús, ‘sacá for di su boca’! Láganos, di nos parti, semper haci esfuerzo celosamente, manera Jesús a haci, pa percura refrescamento spiritual pa otro hende.—Mateo 9:35-38.

“Bo ta bisa: ‘Mi ta ricu’”

 7. (a) Con Jesús a identifica e causa dje problema di hende cristian di Laodicea? (b) Pakico Jesús a bisa cu cristian laodicense ta “ciegu i desnudo”?

⁷ Realmente, kico tabata e raíz dje problema di laodicense? Nos ta haya un bon idea den e sigiente palabra di Jesús: “Pasobra bo ta bisa: ‘Mi ta ricu i a gana riqueza i no tin mester di nada mes,’ pero bo no sa cu bo ta miserabel i lastimoso i pober i ciegu i desnudo.” (Revelacion 3:17; compara cu Lucas 12:16-21.) Bibando den un stad ricu, nan a síntinan sigur pasobra nan tabatin riqueza. Probablemente, nan moda di biba tabata afectá pe stadion, teater, i gimnasio, di manera cu nan a bira “stimador di placer mas bien cu stimador di Dios.”a (2 Timoteo 3:4) Pero laodicense materialmente ricu tabata pober spiritualmente. Nan tabatin poco, of ningun, ‘tesoro wardá den cielo.’ (Mateo 6:19-21) Nan no a mantene nan wowo senciyo, dunando e promé lugar den nan bida ne Reino di Dios. Nan realmente tabata den scuridad, ciegu, sin bista spiritual. (Mateo 6:22, 23, 33) Además, apesar di bistí elegante cu nan riqueza material por a cumpra, den bista di Jesús nan tabata desnudo. Nan no tabatin bistí spiritual pa identificánan como hende cristian.—Compara cu Revelacion 16:15.

 8. (a) Di ki manera un situacion semehante di esei den Laodicea ta existi també awe? (b) Con algun hende cristian a gaña nan mes den e mundo golós aki?

⁸ Ki un estado escandaloso! Pero, nos no ta mira hopi bez un situacion similar awendia? Kico ta e raíz di esei? Esei ta un actitud di confianza den nan mes cu ta brota di confianza den cosnan material i recurso humano. Mescos cu miembro di religion di cristiandad, algun Testigo di Jehova ta gaña nan mes, pensando cu nan por agrada Dios door di simplemente asisti na reunion de bez en cuando. Nan ta purba di alcanza simplemente dunando un muestra di cu nan ta “hacidor dje palabra.” (Santiago 1:22) Apesar di spiertamento bez tras bez di e grupo cu Juan a simboliza, nan ta fiha nan curazón riba bistí di última moda, auto, i cas, i ta concentra nan bida riba recreo i placer. (1 Timoteo 6:9, 10; 1 Juan 2:15-17) Tur esei ta resulta den ciegamento di bista spiritual. (Hebreo 5:11, 12) En bez di keda den un estado tibio i floho, nan tin cu rebiba e “candela di spiritu” i desplega un deseo refrescante pa “predica e palabra.”—1 Tesalonicense 5:19; 2 Timoteo 4:2, 5.

 9. (a) Cua palabra di Jesús mester sagudi algun cristian tibio, i pakico? (b) Con e congregacion por yuda “carné” gedwal?

⁹ Con Jesús ta considera cristianan lauw? Su palabra francu mester sagudínan: “Bo no sa cu bo ta miserabel i lastimoso i pober i ciegu i desnudo.” Nan concenshi ta asina dof te cu nan no ta consiente mes di nan estado deplorable. (Compara cu Proverbio 16:2; 21:2.) Tal situacion serio den e congregacion no por ta halá un banda como di poco importancia. Door di pone un ehempel excelente di celo i di pastorea cu amor, anciano i otronan cu nan ta asigna kizás por lanta tal “carné” gedwal foi soño pa nan disfruta di nobo di sirbishi rindí cu tur nan curazón.—Lucas 15:3-7.

Conseho tocante ‘birando ricu’

10. Kico ta e “oro” cu Jesús a bisa cristian di Laodicea cumpra foi dje?

¹⁰ Tabatin un remedi pe estado tristu di Laodicea? Sí, si hende cristian ei a sigi e conseho di Jesús: “Mi ta consehábo pa cumpra foi mi oro cu candela a refina pa bo bira ricu.” (Revelacion 3:18a) Berdadero “oro” cristian cu candela a refina i cu tur escoria kitá, por a hácinan “ricu pa cu Dios.” (Lucas 12:21) Unda nan por a cumpra oro asina? No for di bankero local sino for di Jesús! Apóstol Pablo a splica loke ta oro asina ora el a bisa Timoteo pa duna ordu na cristian ricu “pa traha na loke ta bon, sea ricu den bon obra, sea generoso, cla pa comparti, wardando siguramente pa nan mes un fundeshi excelente pe futuro.” Solamente door di gasta nan mes asina nan por a “haya un gara firme riba e berdadero bida.” (1 Timoteo 6:17-19) Laodicense materialmente ricu mester a sigi e conseho di Pablo i asina bira spiritualmente ricu.—Mira també Proverbio 3:13-18.

11. Menciona algun ehempel cu nos tin den e dia djawe di hende cumprando “oro cu candela a refina”?

¹¹ Tin ehempel den e dia djawe di hende cu ta cumpra “oro cu candela a refina”? Sí, tin! Asta durante cu e dia di Señor tabata yegando cerca, un grupito di studiante di Bijbel tabata lanta foi soño pa mira e falsedad dje cantidad di siñanza babilónico di cristiandad, tal como e trinidad, inmortalidad di alma, tormento den candela di fiernu, bautismo di mucha chikito, i adoracion di imagen (incluyendo e cruz i imagen di María). Defendiendo e berdad di Bijbel, tal cristian a proclama e Reino di Jehova Dios como e único speranza pa humanidad i e sacrificio di rescate di Jesús como e base pa salbacion. Casi 40 aña promé cu 1914, nan a siñala ne aña ei como e aña cu profecía bíblica ta indica como e fin di tempo gentil, cu lo a bai acompañá cu desaroyonan sorprendente riba tera.—Revelacion 1:10.

12. Ken tabata uno di esnan cu a hiba delantera den cristian lantando foi soño, i con el a pone un ehempel sobresaliente wardando tesoro den cielo?

¹² Esun cu a hiba delantera den hende cristian lantando foi soño tabata Charles Taze Russell, cu, poco despues di 1870, a forma un klas pa estudio bíblico den Allegheny (awor un parti di Pittsburg), Pensilvania, EUA. Ora el a cuminza busca e berdad, Russell tabata un socio den un negoshi cu su tata i tabata riba camina pa bira miyonario. Pero el a bende su parti den e negoshi di tienda en cadena i a gasta su fortuna yudando financiá e publicacion dje Reino di Dios den tur e mundo. Na 1884 Russell a bira e promé presidente dje corporacion yamá awor e Sociedad Watch Tower Bible and Tract di Pensilvania. Na 1916 el a muri na bordu di un trein cerca Pampa, Texas, rumbo New York, gastá despues di su gira final di predicacion den west di América. El a pone un ehempel sobresaliente di warda tesoro spiritual den cielo, un ehempel sigí awe pa cientos di miles di predicador pionero cu ta haci sacrificio propio.—Hebreo 13:7; Lucas 12:33, 34; compara cu 1 Corintio 9:16; 11:1.

Aplicacion di ungüento spiritual pa wowo

13. (a) Con ungüento spiritual di wowo por mehora estado di laodicense? (b) Jesús a recomenda cua clase di bistí, i pakico?

¹³ Jesús també a duna conseho firme na laodicense: “Cumpra . . . bistí blancu exterior pa bistíbo cuné i pe bergüenza di bo desnudez no sali na cla, i ungüento pa wowo, pa hunta wowo cuné pa bo por mira.” (Revelacion 3:18b) Nan tabatin cu busca curacion pa nan cieguedad spiritual, cumprando remedi di ungüento pa wowo, no remedi di curioso local, sino e remedi cu Jesús tabatin. Esei por a yúdanan haya bista spiritual, yúdanan camna den e “camina di hende husto” cu nan wowo briyante enfocá riba hacimento dje boluntad di Dios. (Proverbio 4:18, 25-27) Asina, nan por a bisti, no e bistí costoso di lana pretu trahá localmente den Laodicea, sino excelente “bistí blancu exterior” pa proclama cu nan tabatin e privilegio di ser sigidor di Jesucristo.—Compara cu 1 Timoteo 2:9, 10; 1 Pedro 3:3-5.

14. (a) Cua ungüento spiritual pa wowo ta disponibel desde 1879? (b) Menciona e fuente principal di apoyo financiero di Testigo di Jehova. (c) Con Testigo di Jehova ta diferente di otro hende usando contribucion?

¹⁴ Tin ungüento spiritual pa wowo den nos tempo? Sigur cu sí! Na 1879 pastor Russell, su nomber di cariño, pa defende e berdad, a cuminza publica e revista cu ta conocí mundialmente como E Toren di Vigilancia Anunciando e Reino di Jehova Dios. Den su segundo número, el a declara: “Nos ta kere cu [e revista aki] tin JEHOVA como su apoyador, i ya cu ta asina, e nunca lo suplica ni pidi apoyo di hende. Ora Esun cu a bisa: ‘Tur e oro i plata di montaña ta di mi,’ no ta percura e fondo necesario, nos lo comprende cu ta tempo pa termina publicacion.” Algun evangelista di television a montona fortuna enorme i ta biba den luho sin bergüenza (i aveces inmoral). (Revelacion 18:3) Na contraste, Studiante di Bijbel, yamá awe Testigo di Jehova, ta usa contribucion boluntario cu nan ta recibi pa organiza i promove e predicacion mundial dje binidero Reino di Jehova Dios. E grupo cu Juan a simboliza te ne dia djawe ta dirigi publicacion di Toren di Vigilancia i Despertad!, cua 2 revista hunto tin un drukmento na 2006 di mas cu 59 miyón ehemplar. E Toren di Vigilancia ta ser publicá den rond di 150 idioma. Esei ta e publicacion oficial dje congregacion di mas cu seis miyón cristian cu a usa e ungüento spiritual pa wowo pa habri nan wowo pa mira loke ta religion falso i e urgencia di predica e bon nobo na tur nacion.—Marco 13:10.

Probechando di reprendimento i disiplina

15. Pakico Jesús a duna conseho fuerte na hende cristian den Laodicea, i con e congregacion mester a reacciona?

¹⁵ Láganos bolbe na laodicense. Con nan a reacciona ne conseho severo di Jesús? Nan a keda desanimá i a kere cu Jesús no tabata kier nan mas como sigidor? No, esei no tabata e caso absolutamente. E mensahe ta sigi bisa: “Tur esnan pa locual mi tin cariño mi ta reprende i ta disipliná. P’sei, sea celoso i arrepenti.” (Revelacion 3:19) Mescos cu e disiplina di Jehova, e disiplina di Jesús ta un indicacion di su amor. (Hebreo 12:4-7) E congregacion di Laodicea mester a probecha di su interés cariñoso i aplica su conseho. Nan mester a arrepentínan, reconociendo cu nan estado lauw tabata mescos cu pecamento. (Hebreo 3:12, 13; Santiago 4:17) Nan anciano mester a bandona nan camina materialista i ‘cende manera candela’ e don cu nan a recibi di Dios. Cu e curacion dje ungüento spiritual pa wowo, tur e congregacion mester a haya refrescamento como si fuera di awa friu di fontein.—2 Timoteo 1:6; Proverbio 3:5-8; Lucas 21:34.

16. (a) Con Jesús ta demonstra su amor i cariño awe? (b) Si nos ta recibi conseho fuerte, con nos mester reacciona?

¹⁶ Kico di nos djawe? Jesús ta sigi ‘stima loke ta di dje den mundo.’ E ta haci esei “tur dia te na conclusion dje sistema di cosnan.” (Juan 13:1; Mateo 28:20) E ta desplega su amor i cariño usando e grupo djawe cu Juan a simboliza i strea, of anciano, dje congregacion cristian. (Revelacion 1:20) Den e tempo mashá dificultoso aki, anciano ta profundamente interesá pa yuda nos tur, bieu i hoven, keda bao di proteccion dje curá teocrático, resistiendo contra independencia, golosidad materialista, i sushidad inmoral di mundo. Si aveces nos recibi conseho of disiplina fuerte, nos tin cu corda cu e “reprendimento di disiplina ta e camina di bida.” (Proverbio 6:23) Nos tur ta imperfecto i mester keda celoso pa arrepenti ora ta necesario pa nos cambia i permanece den e amor di Dios.—2 Corintio 13:11.

17. Con riqueza por ta spiritualmente peligroso pa nos?

¹⁷ Nos no mag laga materialismo, riqueza, of falta di riqueza hácinos lauw. Riqueza por habri posibilidad nobo di sirbishi, pero també e por ta peligroso. (Mateo 19:24) Hende bon situá por kere cu nan no tin cu ser tanto celoso den e trabao di predica como e otronan, con tal cu nan ta duna contribucion generoso de bez en cuando. Of nan por kere cu nan riqueza ta dúnanan derecho di recibi cierto fabor. Además, tin hopi placer i pasatempo disponibel pa hende ricu cu otronan no por paga. Pero diverticion asina ta exigi tempo i por hiba hende descuidá leu for dje ministerio cristian, i asina haci hende imprudente lauw. Láganos evita tal trampa i sigi “traha duro i haci esfuerzo vigoroso” cu tur nos curazón, cu bida eterna na bista.—1 Timoteo 4:8-10; 6:9-12.

‘Participa dje cena’

18. Cua oportunidad Jesús a pone dilanti hende cristian di Laodicea?

¹⁸ Jesús a sigi bisa: “Mira! mi ta para na porta i ta bati. Si hende ta tende mi boz i ta habri e porta, lo mi drenta su cas i tuma cena cuné i e cu mi.” (Revelacion 3:20) Si cristian di Laodicea solamente a recibi Jesús den nan congregacion, e por a yúdanan vence nan estado lauw!—Mateo 18:20.

19. Jesús a duna di comprende kico ora el a priminti di tuma cena cu e congregacion den Laodicea?

¹⁹ Sin duda ora Jesús a menciona cena, esei a haci laodicense corda e tempo ora el a tuma cuminda cu su disípelnan. (Juan 12:1-8) Tal ocasion semper a resulta den bendicion spiritual pa esnan presente. Di igual manera, tabatin ocasion notable despues di resureccion di Jesús ora e tabata presente pa come cu su disípelnan, cua ocasion a fortalecénan hopi. (Lucas 24:28-32; Juan 21:9-19) P’sei, su promesa di drenta den e congregacion di Laodicea i tuma cena cu nan tabata un promesa di trece beneficio spiritual ricu pa nan si nan solamente recibié.

20. (a) Na principio dje dia di Señor, kico tabata e resultado dje estado tibio di cristiandad? (b) Con e huicio di Jesús a afecta cristiandad?

²⁰ E conseho amoroso di Jesús pa laodicense tin un gran nificacion pe resto di cristian ungí djawe. Algun di eseinan ta corda cu, ne principio dje dia di Señor, hende religioso di cristiandad tabata sorprendiblemente tibio. En bez di alegra ora Señor a bolbe na 1914, e clero a enbolbénan den e matamento di Gera Mundial I, den locual 24 dje 28 nacion combatiendo a yama nan mes cristian. Ki un culpa grandi pa dramamento di sanger! Durante Gera Mundial II, locual també tabata bringá principalmente den cristiandad, e picánan di religion falso di nobo “a montona te na cielo.” (Revelacion 18:5) Además, e clero a bira lomba pe binidero Reino di Jehova, apoyando e Liga di Nacion, Naciones Unidas, i movimento nacionalista i revolucionario, ningun di locual por resolve problema di humanidad. Leu ayá Jesús a rechaza tal clero, huzgando nan desfavorablemente i rechazando nan, mescos cu piscador ta tira afó piscá cu no ta sirbi pa nada cu nan ta coge den reda. Estado tristu di religion di cristiandad djawe ta duna testimonio di tal huzgamento di dje. Laga su destino despues sirbi como un advertencia pa nos!—Mateo 13:47-50.

21. Desde 1919 padilanti, con hende cristian den e berdadero congregacion a responde ne palabra di Jesús pa cristian den Laodicea?

²¹ Asta den e berdadero congregacion, tin hende tibio cu ta manera co’i bebe cu no ta estimula pasobra e no ta cayente ni no ta refresca pasobra e no ta friu. Pero Jesús tin un cariño pa su congregacion ainda. E ta haci su mes disponibel pa hende cristian cu ta reacciona hospitalariamente, i hopi ta recibié, como si ta pa un cena. Como resultado, desde 1919 padilanti nan wowo a keda habrí ne nificacion di profecía bíblica. Nan a disfruta di un tempo di gran iluminacion.—Salmo 97:11; 2 Pedro 1:19.

22. Jesús por a pensa di cua cena di futuro, i ken lo participa den dje?

²² Ora Jesús tabata papia cu laodicense, e por a corda un otro cena. Despues den Revelacion, nos ta leza: “Feliz ta esnan invitá ne cena dje casamento dje Lamchi.” Esei ta e mahestuoso banquete di victoria pe alabanza di Jehova despues cu e ta ehecuta huicio contra religion falso—un banquete gozá pa Cristo i su bruid completo di 144.000 den cielo. (Revelacion 19:1-9) Miembro dje congregacion di Laodicea di antigua cu a responde—sí, i e fiel rumanan di Cristo Jesús djawe, cu ta bisti bistí limpi di identificacion como berdadero cristianan ungí—lo come cu nan Bruidegom ne cena. (Mateo 22:2-13) Ki un estímulo vigoroso pa keda celoso i arrepenti!

Un trono pa vencedor

23, 24. (a) Jesús a menciona cua otro recompensa? (b) Na ki tempo Jesús a sinta riba su trono mesiánico, i na ki tempo el a cuminza huzgamento di hende yamá cristian? (c) Cua promesa maraviyoso Jesús a duna su disípelnan ora el a institui e Conmemoracion di su morto?

²³ Jesús a menciona un otro recompensa, bisando: “Na esun cu ta vence, lo mi lagué sinta cu mi riba mi trono, mescos cu mi a vence i a sinta cu mi Tata riba su trono.” (Revelacion 3:21) Na cumplimento dje palabra di David den Salmo 110:1, 2, Jesús, wardador di integridad, despues di a vence mundo, tabata resusitá na aña 33 EC i halzá pe sinta cu su Tata riba su trono celestial. (Echo 2:32, 33) Na 1914, un otro aña importante, Jesús a yega pa sinta riba su mes trono mesiánico como Rey i Huez. Su huzgamento a cuminza evidentemente na 1918 cu hende yamá cristian. Vencedor ungí cu a muri promé cu e aña ei tabata resusitá pa ser hunto cu Jesús den su Reino. (1 Pedro 4:17) Jesús a priminti esei na nan ora el a institui e Conmemoracion di su morto, bisando su disípelnan: “Mi ta cera un pacto cu boso, mescos cu mi Tata a cera un pacto cu mi, pa un reino, pa boso come i bebe na mi mesa den mi reino, i sinta riba trono pa huzga e diesdos tribu di Israel.”—Lucas 22:28-30.

²⁴ Ki un asignacion maraviyoso—pa sinta cu e Rey reinante durante e “recreacion” i participa cuné, riba e base di su sacrificio perfecto, restorando e mundo di humanidad obediente na perfeccion di Eden! (Mateo 19:28; 20:28) Manera Juan ta bísanos, Jesús ta haci esnan cu ta vence ser “un reino, sacerdote pa su Dios i Tata,” pa ocupa trono rond dje propio magnífico trono celestial di Jehova. (Revelacion 1:6; 4:4) Láganos tur—sea dje ungínan of dje arreglo social dje tera nobo cu e speranza di participa den e restoracion di Paradijs—tuma na pecho e palabra di Jesús dirigí na laodicense!—2 Pedro 3:13; Echo 3:19-21.

25. (a) Mescos cu mensahe di antes, con Jesús a termina su mensahe pa laodicense? (b) Con hende cristian individual djawe mester responde ne palabra di Jesús pe congregacion den Laodicea?

²⁵ Mescos cu mensahe di antes, Jesús a termina esei cu palabra di conseho: “Laga ken cu tin orea tende loke e spiritu ta bisa ne congregacionan.” (Revelacion 3:22) Nos ta biba leu den e tempo di fin. Tin evidencia tur rond di nos cu cristiandad ta friu den loke tin cu ber cu amor. Na contraste, láganos como berdadero cristian responde fervorosamente ne mensahe di Jesús pa e congregacion den Laodicea, sí, na tur siete mensahe di nos Señor dirigí ne congregacionan. Nos por haci esei teniendo un parti vigoroso den cumplimento dje gran profecía di Jesús pa nos dia: “I e bon nobo di reino lo ser predicá den tur e tera habitá como testimonio pa tur nacion; anto e fin lo yega.”—Mateo 24:12-14.

26. Na ki tempo Jesús a papia directamente atrobé cu Juan, pero el a participa den kico?

²⁶ E conseho di Jesús pe siete congregacion a termina. E no a papia cu Juan atrobé den Revelacion te cu e capítulo final; pero el a participa den hopi vision, por ehempel, den ehecucion dje huicio di Jehova. Láganos unínos awor cu e grupo cu Juan a simboliza pa examina e segundo vision notable cu nos Señor Jesucristo a revela.

[Nota]

[Kuadro na página 73]

Materialismo contra sabiduría

Ayá na 1956, un columnista di curant a skirbi: “Nan ta calcula cu siglo pasá hende gewoon tabatin 72 deseo, di locual 16 tabata necesario. Awe, nan ta calcula cu hende gewoon tin 474 deseo, 94 di locual ta ser considerá como necesario. Siglo pasá, bendedor a purba di bende hende 200 artículo—pero awe hende tin cu resisti contra 32.000 artículo. Necesidad cu hende tin ta poco—loke nan kier ta infinito.” Awe, hende ta ser bombardeá cu e idea di cu riqueza material i cosnan material ta e cosnan principal den bida. P’sei, hopi hende ta pasa por halto dje conseho sabí di Eclesiastés 7:12: “Sabiduría ta pa un proteccion mescos cu placa ta pa un proteccion; pero e bentaha di conocimento tá cu sabiduría ta conserba bibo su doño.”

[Plachi na página 67]

Awa cu a yega na Laodicea tabata desagradablemente tibio. Hende cristian den Laodicea tabatin un spiritu tibio no satisfactorio

Capítulo 14

E magnificencia dje trono celestial di Jehova

Vision 2—Revelacion 4:1–5:14

Tema: Suceso asombroso dilanti dje trono di huicio di Dios

Tempo di cumplimento: E vision ta presenta suceso cu ta ser cumplí desde 1914 te na fin dje mil aña i mas ayá, ora tur persona den cielo i riba tera ta alaba Jehova.—Revelacion 5:13

 1. Pakico nos mester ta intensamente interesá den e vision cu Juan ta comparti cu nos?

JUAN a cuminza comparti cu nos otro vision emocionante. Bao di inspiracion e tabata den e dia di Señor ainda. Pues, loke el a pinta tin un nificacion profundo pa nos cu realmente ta biba den e dia ei. Mediante tal vision, Jehova a hiza belo di invisibilidad di realidad celestial i a revela na nos su mes bista di su huicio cu lo ser ehecuta riba tera. Además, sea cu nos tin speranza celestial of terrenal, tal revelacion ta yúdanos mira nos lugar den e propósito di Jehova. P’sei, nos tur mester sigi ser intensamente interesá den e expresion di Juan: “Feliz ta esun cu ta leza na boz halto i esnan cu ta scucha e palabra dje profecía aki, i cu ta warda loke ta pará skirbí den dje.”—Revelacion 1:3.

 2. Cua experencia Juan tabatin e ora ei?

² Loke Juan a mira sigientemente ta surpasa tur loke video ta presenta na hende djawe! El a skirbi: “Despues di esei mi a wak, i, mira! un porta a habri den cielo, i e promé boz cu mi a tende tabata manera trompet, papiando cu mi, bisando: ‘Subi aki, i lo mi mustrábo loke mester sosode.’” (Revelacion 4:1) Den e vision, Juan a penetra den cielo invisibel dje presencia di Jehova, hizá hopi mas halto cu espacio exterior fisical cu astronauta humano ta explora, asta hopi mas halto cu galaxia dje universo material. Como si el a drenta pa un porta habrí, Juan tabata invitá pa laga su wowo goza di un panorama asombroso di cielo spiritual sublime unda Jehova Dios mes ta entronizá. (Salmo 11:4; Isaías 66:1) Ki un privilegio!

 3. E boz “manera trompet” ta hácinos corda kico, i ken, sin duda, ta e Fuente di dje?

³ E Bijbel no a identifica e “promé boz.” Mescos cu e boz fuerte di Jesús cu el a caba di tende, e tabatin e sonido comandante manera esei di trompet. (Revelacion 1:10, 11) Esei ta hácinos corda e tocamento di trompet penetrante cu a siñala e presencia di Jehova riba e Ceru di Sinaí. (Exodo 19:18-20) Sin duda, Jehova ta e Fuente mahestuoso dje yamada. (Revelacion 1:1) El a habri e porta pa Juan, mediante e vision, por a drenta den e lugar di mas santo di tur e dominio grandísimo dje soberanía di Jehova.

E presencia resplandiente di Jehova

 4. (a) Ki nificacion e vision di Juan tin pa cristian ungí? (b) Ki nificacion e vision tin pa hende cu ta spera di biba pa semper riba tera?

⁴ Kico Juan a mira? Scucha, mientras cu e ta conta pa nos su gran experencia: “Despues di esei, un bez mi a yega di ser den e poder dje spiritu: i, mira! un trono tabata den su posicion den cielo, i tabatin un persona sintá riba e trono.” (Revelacion 4:2) Den un instante, Juan tabata transporta spiritualmente pe forza activo di Dios te ne trono mes di Jehova. Ki emocionante pa Juan! Ei e tabata duná un bista briyante di cielo mes unda e i otro cristian ungí tin reserbá pa nan “un herencia incorruptible i incontaminá i imperecedero.” (1 Pedro 1:3-5; Filipense 3:20) Pa hende cu tin e speranza di biba pa semper riba tera, e vision di Juan tin un nificacion profundo també. E ta yúdanan comprende e gloria dje presencia di Jehova i dje estructura di gobernacion celestial cu Jehova ta usa pa huzga e nacionan i despues goberna bida humano riba tera. Jehova en berdad ta e Dios di organizacion sublime!

 5. Ki realidad Juan a mira cu e tapadera dje arca di pacto a simboliza?

⁵ Hopi di locual Juan a mira ayá den cielo ta parce rasgo dje tabernáculo den desierto. Nan a traha esei rond di 1.600 aña promé como un santuario dje adoracion berdadero di israelita. Den e Lugar Santísimo dje tabernáculo tabata e arca di pacto, i Jehova mes a papia desde ariba dje tapadera dje arca di oro puro. (Exodo 25:17-22; Hebreo 9:5) P’sei, e tapadera dje arca a sirbi como un símbolo dje trono di Jehova. Awor Juan a mira e realidad dje representacion simbólico: Señor Soberano Jehova mes sintá den exquisita grandeza ariba su trono halto celestial!

 6. Juan a dúnanos cua impresion di Jehova, i pakico esei ta apropiado?

⁶ Distinto di profeta di antes cu tabatin vision dje trono di Jehova, Juan no a duna detaye dje Santo sintá riba dje. (Ezekiel 1:26, 27; Daniel 7:9, 10) Pero Juan a dúnanos su impresion di Esun entronizá, ne sigiente moda: “I esun sintá, den aparencia, ta manera piedra di jaspe i un piedra precioso di color corá, i rond dje trono tabatin un regenboog di aparencia semehante di esmeralda.” (Revelacion 4:3) Ki magnificencia incomparable! Juan a mira un boniteza trankilu i relumbrante manera esei di piedra precioso briyante i radiante. Ki apropiadamente esei ta cuadra cu detaye cu disípel Santiago a duna di Jehova como e “Tata di luz celestial”! (Santiago 1:17) Poco despues di a skirbi Revelacion, Juan mes a bisa: “Dios ta luz i no tin scuridad mes den union cuné.” (1 Juan 1:5) Ki un Persona sublimemente glorioso Jehova realmente tá!

 7. Kico nos por siña for dje echo di cu tin un regenboog rond dje trono di Jehova?

⁷ Ripara cu Juan a mira rond dje trono un regenboog, di color berde esmeralda. E palabra griego traducí ei como regenboog (ir·is) ta sugeri un forma completamente rondó. E regenboog ta ser mencioná den e Bijbel pe promé bez en relacion cu e dia di Noé. Despues cu awa dje diluvio a seca, Jehova a haci un regenboog parce den un nubia, i el a splica loke el a simbolizá asina aki: “Mi ta duna mi regenboog sí den e nubia, i e mester sirbi como un siñal dje pacto entre mi i e tera. I siguramente lo mi corda mi pacto cu ta entre ami i abo i tur alma bibiente den tur carni; i nunca mas awa lo bira un diluvio pa causa ruina pa tur carni.” (Génesis 9:13, 15) Kico, anto, e vision celestial mester a haci Juan corda? E regenboog cu el a mira mester a hacié corda e necesidad di un relacion di paz cu Jehova, tal como loke e grupo cu Juan a simboliza ta goza awe. Esei també por a impresiona riba dje e trankilidad i paz dje presencia di Jehova, un trankilidad cu lo extende na tur hende obediente ora Jehova ta span su tent riba humanidad den e arreglo social dje tera nobo.—Salmo 119:165; Filipense 4:7; Revelacion 21:1-4.

Identificacion dje 24 anciano

 8. Ken Juan a mira rond dje trono, i ken nan ta representa?

⁸ Juan tabata sa cu sacerdote tabata nombrá pa sirbi den e tabernáculo di antigua. Pues, kizás tabata un sorpresa pe ora el a mira loke el a detaya sigientemente: “I rond dje trono tin binticuater trono, i riba tal trono mi a mira sintá binticuater anciano bistí den bistí exterior blancu, i riba nan cabez corona di oro.” (Revelacion 4:4) Sí, en bez di sacerdote, tabatin 24 anciano, entronizá i coroná manera rey. Ken ta e ancianonan? Nan no ta nada menos cu esnan ungí dje congregacion cristian, resusitá i ocupando e puesto celestial cu Jehova a primintínan. Con nos sa esei?

9, 10. Con nos sa cu e 24 anciano ta representa e congregacion cristian ungí den su puesto glorioso den cielo?

⁹ Foral, nan ta bisti corona. E Bijbel ta menciona cristian ungí como ganando ‘un corona incorruptible’ i alcanzando bida eterna—inmortalidad. (1 Corintio 9:25; 15:53, 54) Pero, siendo cu e 24 anciano ta sintá riba trono, corona di oro den tal contexto ta representa autoridad real. (Compara cu Revelacion 6:2; 14:14.) Esei ta apoya e conclusion di cu e 24 anciano ta representa sigidor ungí di paso di Jesús den nan puesto celestial, pasobra Jesús a cera un pacto cu nan pa sinta riba trono den su Reino. (Lucas 22:28-30) Solamente Jesús i e 24 anciano—ni sikiera e angelnan—ta ser pintá como reinando den cielo den e presencia di Jehova.

¹⁰ Esei ta armonizá cu e promesa cu Jesús a duna e congregacion di Laodicea: “Na esun cu ta vence lo mi duné di sinta cu mi riba mi trono.” (Revelacion 3:21) Pero e asignacion celestial di 24 anciano no ta limitá na puesto di gobernante. Den e introduccion dje buki di Revelacion, Juan a bisa di Jesús: “El a hácinos ser un reino, sacerdote di su Dios i Tata.” (Revelacion 1:5, 6) Eseinan ta tanto rey como sacerdote. “Nan lo ta sacerdote di Dios i di Cristo, i lo reina como rey cuné pe mil aña.”—Revelacion 20:6.

11. Pakico ta apropiado pe total di anciano ta 24, i kico e cantidad ta nifica?

¹¹ Ki nificacion tin den e número 24, ya cu Juan a mira 24 anciano rond dje trono? Di hopi manera, fiel sacerdote di Israel di antigua a simbolizánan. Apóstol Pedro a skirbi cristian ungí: “Boso ta ‘un raza escogí, un sacerdocio real, un nacion santo, un pueblo pa posesion special.’” (1 Pedro 2:9) Interesantemente, e sacerdocio hudío di antigua a yega di ser partí den 24 grupo. Cada grupo tabata asigná na su mes simanan durante e aña pa sirbi dilanti Jehova, di manera cu nan a rindi sirbishi sagrado sin interrupcion. (1 Crónica 24:5-19) Ta apropiado, anto, cu tin 24 anciano pintá den e vision di Juan dje sacerdocio celestial pasobra e sacerdocio ta sirbi Jehova continuamente, sin para. Ora nan ta completo, lo tin 24 grupo, cada un cu 6.000 vencedor, pasobra Revelacion 14:1-4 ta bísanos cu 144.000 (24 x 6.000) tabata “cumprá for di den humanidad” pa nan para riba e Ceru di Sion celestial cu e Lamchi, Jesucristo. Siendo cu e número 12 ta nifica un organizacion balanzá segun e arreglo di Dios, 24 ta haci dobel—of ta fortalece—tal arreglo.

Weerlicht, boz, i donder

12. Kico Juan a mira i a tende sigientemente, i kico “weerlicht i boz i donder” ta hácinos corda?

¹² Kico Juan a mira i a tende despues? “I a sali for dje trono weerlicht i boz i donder.” (Revelacion 4:5a) Ki un recordamento di otro manifestacion impresionante dje poder celestial di Jehova! Por ehempel, ora Jehova a “baha” riba Ceru di Sinaí, Moisés a skirbi: “Ora dia tres a manece a cuminza sosode donder i weerlicht, i un nubia pisá riba e montaña i tocamento mashá fuerte di trompet. . . . Ora e sonido dje trompet a bira cada bez mas fuerte, Moisés a cuminza papia, i e Dios berdadero a cuminza contesté cu un boz.”—Exodo 19:16-19.

13. Kico weerlicht saliendo for di trono di Jehova ta simboliza?

¹³ Durante e dia di Señor, Jehova a manifesta su poder i presencia di manera sublime. No, no cu weerlicht mes, pasobra Juan tabata mira siñal. Kico, anto, e weerlicht a representa? Wel, rayo di weerlicht por ilumina, pero també nan por mata. P’sei, weerlicht saliendo for di trono di Jehova a wel simboliza rayo di iluminacion cu el a sigi duna su pueblo i, asta mas significativo ainda, su ardiente mensahe di huicio.—Compara cu Salmo 18:14; 144:5, 6; Mateo 4:14-17; 24:27.

14. Con nos ta tende sonido di boz awe?

¹⁴ Kico e boznan a simboliza? Ora Jehova a baha riba e Ceru di Sinaí, un boz a papia cu Moisés. (Exodo 19:19) Boz di cielo a saca hopi mandamento i proclamacion dje buki di Revelacion. (Revelacion 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Den e dia djawe, Jehova també a saca mandamento i proclamacion pa su pueblo, iluminando nan comprendimento di profecía i principio bíblico. Informacion iluminador hopi bez ta ser revelá na asamblea internacional, i en buelta, tal berdad bíblico ta ser proclamá mundialmente. Apóstol Pablo a bisa di fiel predicador dje bon nobo: “Pues, realmente, ‘nan sonido a sali den tur e tera, i nan declaracion te na extremidad dje tera habitá.’”—Romano 10:18.

15. Cua donder a sali for dje trono durante e tempo actual dje dia di Señor?

¹⁵ Generalmente donder ta bini despues di weerlicht. David a menciona donder mes como e “boz di Jehova.” (Salmo 29:3, 4) Ora Jehova a bringa pa David contra su enemigonan, el a bisa cu donder a bini di Jehova. (2 Samuel 22:14; Salmo 18:13) Eliú a bisa Job cu e boz di Jehova a sona manera donder, pasobra e ta haci “cosnan grandi cu nos no por sa.” (Job 37:4, 5) Durante e parti aki dje dia di Señor, Jehova a ‘saca donder,’ dunando spiertamento di acto grandi cu lo e haci contra su enemigonan. Tal sonido simbólico di donder a sona i a resona den tur e mundo. Bo ta feliz si bo a presta atencion na tal proclamacion manera donder i ta haci uso sabí di bo lenga pa aumenta e sonido!—Isaías 50:4, 5; 61:1, 2.

Lampi di candela i lamá di glas

16. Kico “e siete lampi di candela” ta nifica?

¹⁶ Kico mas Juan a mira? Esaki: “I tin siete lampi di candela cu ta cendí dilanti dje trono, i eseinan ta nifica e siete spiritu di Dios. I dilanti dje trono tin, den un sentido, un lamá di glas manera cristal.” (Revelacion 4:5b, 6a) Juan mes a bísanos e nificacion dje siete lampi: “Eseinan ta nifica e siete spiritu di Dios.” Número siete ta simboliza lo completo desde e punto di bista di Dios; pues, e siete lampi mester representa e forza iluminador completo di spiritu santo. Ki agradicido e grupo cu Juan a simboliza awe ta keda di a ser confiá cu tal iluminacion, hunto cu e responsabilidad di compartié cu pueblo di mundo cu tin hamber spiritual! Ki contentu nos ta keda cu tur aña cientos di miyones di ehemplar dje revista Toren di Vigilancia ta sigi plama tal luz den rond di 150 idioma!—Salmo 43:3.

17. Kico e “lamá di glas manera cristal” ta simboliza?

¹⁷ Juan també a mira un “lamá di glas manera cristal.” Kico esei por simboliza en relacion cu esnan invitá pa drenta den e corte celestial di Jehova? Pablo a menciona e manera cu Jesús a santifica e congregacion, ‘i a hacié limpi cu e baño di awa pa medio dje palabra.’ (Efesio 5:26) Promé cu su morto, Jesús a bisa su disípelnan: “Boso ta limpi caba pa causa dje palabra cu mi a papia cu boso.” (Juan 15:3) P’sei, e lamá di glas manera cristal mester representa e Palabra skirbí di Dios cu ta haci hende limpi. Esnan dje sacerdocio real cu a drenta den e presencia di Jehova, su Palabra mester a haci completamente limpi.

Mira—“cuater persona bibiente”!

18. Kico Juan a mira meimei dje trono i rond di dje?

¹⁸ Awor Juan a mira un otro rasgo. El a skirbi: “I meimei dje trono i rond dje trono tabatin cuater persona bibiente cu ta yen di wowo dilanti i patrás.”—Revelacion 4:6b.

19. Kico e cuater persona bibiente ta simboliza, i con nos sa esei?

¹⁹ Kico tal persona ta simboliza? Un vision cu Ezekiel, un otro profeta, a skirbi ta yúdanos haya e contesta. Ezekiel a mira Jehova entronizá riba un garoshi celestial, compañá pa persona bibiente teniendo aparencia di esnan cu Juan a pinta. (Ezekiel 1:5-11, 22-28) Despues, Ezekiel a mira atrobé e trono riba e garoshi den compañía di persona bibiente. Pero, awor el a menciona e personanan bibiente como querubín. (Ezekiel 10:9-15) E cuater persona bibiente cu Juan a mira mester representa e cantidad di querubín di Dios—persona di rango halto den su organizacion spiritual. Juan no a kere cu tabata extraordinario pa mira querubín situá tanto cerca e persona di Jehova, pasobra den e arreglo dje tabernáculo di antigua tabatin dos querubín di oro desplegá ariba e tapadera dje arca di pacto, cu a representa e trono di Jehova. For di meimei dje dos querubín e boz di Jehova a saca mandamento pe nacion.—Exodo 25:22; Salmo 80:1.

20. Di ki manera nos por bisa cu e cuater persona bibiente ta “meimei dje trono i rond dje trono”?

²⁰ E cuater persona bibiente ta “meimei dje trono i rond dje trono.” Kico esei kier men, exactamente? Esei por nifica cu nan ta situá rond dje trono di tal manera cu uno ta para meimei na cada banda. P’sei, traductor di Today’s English Version ta splica e expresion griego original dje manera aki: “rondonando e trono na cada banda di dje.” Un splicacion alternativa dje expresion por nifica cu e cuater persona bibiente ta den un puesto central den cielo unda e trono tá. Probablemente, p’sei mes The Jerusalem Bible ta traduci e frase: “den e centro, agrupá rond dje trono mes.” Loke ta importante ta ki cerca e querubínan ta ne trono di Jehova, comparable cu querubín cu Ezekiel a mira na cada skina dje garoshi cu a representa e organizacion di Jehova. (Ezekiel 1:15-22) Tur esei ta armonizá cu e palabra di Salmo 99:1: “Jehova mes a bira rey. . . . E ta sinta mas halto cu querubín.”

21, 22. (a) Ki detaye Juan a duna dje cuater persona bibiente? (b) E aparencia dje cuater persona bibiente ta representa kico?

²¹ Juan a sigi: “I e promé persona bibiente ta manera un león, i e segundo persona bibiente ta manera un torito, i e tercer persona bibiente tin e cara di hende, i e cuarto persona bibiente ta manera un águila bulando.” (Revelacion 4:7) Pakico e cuater persona bibiente tin un aparencia tanto diferente, distinto di otro? Evidentemente, e cuater persona bibiente distinto ta enfatizá calidad divino específico. Promé, tabatin un león. E Bijbel ta usa león como símbolo di curashi, specialmente sigiendo tras di husticia i rectitud. (2 Samuel 17:10; Proverbio 28:1) Pues, e león ta wel representa e calidad divino di husticia baloroso. (Deuteronomio 32:4; Salmo 89:14) E segundo persona bibiente ta parce un torito. Toro ta hacíbo corda cua calidad? Pa israelita un toro tabatin hopi balor pa motibo di su forza. (Proverbio 14:4; mira també Job 39:9-11.) Pues, e torito, anto, a representa poder, energía dinámico cu Jehova ta duna.—Salmo 62:11; Isaías 40:26.

²² E tercer persona bibiente tabatin cara manera esei di hende. Esei mester representa amor divino, siendo cu riba tera hende so tabata creá den imagen di Dios, cu e calidad superlativa di amor. (Génesis 1:26-28; Mateo 22:36-40; 1 Juan 4:8, 16) Sin duda, querubín ta desplega tal calidad mientras cu nan ta sirbi rond dje trono di Jehova. Kico, awor, dje cuater persona bibiente? Esei ta parce un águila bulador. Jehova mes a hala atencion ne bista tremendo di águila: “Leu den distancia su wowo ta sigi wak.” (Job 39:29) P’sei, e águila ta wel simbolizá sabiduría cu bista penetrante. Jehova ta e Fuente di sabiduría. Querubín di dje ta eherce sabiduría divino mientras cu nan ta obedece su mandamento.—Proverbio 2:6; Santiago 3:17.

Alabanza di Jehova ta klink

23. E echo cu e cuater persona bibiente ta “yen di wowo” ta simboliza kico, i e tres par di hala cu nan tin ta enfatiza kico?

²³ Juan a sigi duna detaye: “I en cuanto e cuater persona bibiente, cada un di nan respectivamente tin seis hala; tur rond i bao di nan, nan ta yen di wowo. I nan no tin sosiego dia i anochi mientras cu nan ta bisa: ‘Santo, santo, santo ta Jehova Dios, e Todopoderoso, cu tabata i cu tá i cu ta bini.’” (Revelacion 4:8) Yen di wowo asina ta sugeri cu nan tin bista completo i penetrante. E cuater persona bibiente ta eherce esei sin para, pasobra nan no tin mester di drumi. Nan ta imita Esun di ken ta pará skirbí: “En cuanto Jehova, su wowo ta pasando den tur e tera pe mustra su forza na fabor di hende cu tin curazón completo pa cuné.” (2 Crónica 16:9) Ya cu tal querubín tin tanto wowo, nan por mira na tur parti. Nada ta scápanan. P’sei, nan ta bon equipa pa sirbi Dios den su trabao di huzgamento. E proverbio ta bisa di dje: “E wowo di Jehova ta den tur lugar, vigilando hende malu i hende bon.” (Proverbio 15:3) I cu tres par di hala—e Bijbel ta usa tres pa duna énfasis—querubín por move tanto lihé como weerlicht pa anuncia e huicio di Jehova i cumpli cuné.

24. Con e querubín ta alaba Jehova, i cu cua nificacion?

²⁴ Scucha! e cantica di alabanza cu querubín ta canta pa Jehova ta melodioso i ta conmove e alma: “Santo, santo, santo ta Jehova Dios, e Todopoderoso, cu tabata i cu tá i cu ta bini.” Atrobé, tres ta indica intensidad. Querubín ta confirma fuertemente e santidad di Jehova Dios. E ta e Fuente i Norma supremo di santidad. També, e ta “Rey di eternidad,” semper e “Alfa i Omega, e promé i e último, e principio i e fin.” (1 Timoteo 1:17; Revelacion 22:13) Querubín no tin pausa mientras cu nan ta proclama calidad sin igual di Jehova dilanti tur e creacion.

25. Con e personanan bibiente i e 24 anciano ta uni den e adoracion di Jehova?

²⁵ E cielo di cielonan ta klink cu e alabanza di Jehova! Juan a sigi duna detaye: “I ki ora cu e personanan bibiente ta ofrece gloria i onor i agradicimento na esun sintá ariba e trono, esun cu ta biba pa semper hamás, e binticuater anciano ta cai dilanti Esun sintá ariba e trono i ta adora Esun cu ta biba pa semper hamás, i nan ta tira nan corona dilanti dje trono, bisando: ‘Bo ta digno, Jehova, asta nos Dios, pa recibi gloria i onor i poder, pasobra bo a crea tur cos, i pa causa di bo boluntad nan ta existi i tabata creá.’” (Revelacion 4:9-11) Esei ta un declaracion di homenahe di mas grandi rindí na Jehova, nos Dios i Señor Soberano, den tur e Scritura!

26. Pakico e 24 anciano ta tira nan corona dilanti Jehova?

²⁶ E 24 anciano tin e mesun actitud mental cu Jesús a demonstra, asta tirando nan corona dilanti Jehova. Nan no ta pensa mes di halza nan mes den e presencia di Dios. Nan ta reconoce humildemente cu e único propósito di nan reinado ta di duna onor i gloria na dje, mescos cu Jesús semper ta haci. (Filipense 2:5, 6, 9-11) Cu sumision, nan ta reconoce nan mes inferioridad i ta admiti cu nan gobernacion ta depende dje soberanía di Jehova. Pues, di curazón nan ta na armonía cu e querubínan i e resto dje fiel creacion dunando alabanza i gloria ne Dios cu a crea tur cos.—Salmo 150:1-6.

27, 28. (a) Con detaye cu Juan a duna dje vision mester afectános? (b) Cua pregunta ta presenta en cuanto loke Juan a mira i a tende sigientemente?

²⁷ Ken por keda indiferente ora nan ta leza e relato di Juan dje vision? E ta sublime i magnífico! Pero, con e realidad mester tá? E mahestad mes di Jehova mester anima ken cu tin un curazón apreciativo pa uni cu e cuater persona bibiente i e 24 anciano dunando alabanza na dje, tanto den oracion como den proclamacion público di su nomber. Esei ta e Dios cu hende cristian tin e privilegio di ser testigo di dje awe. (Isaías 43:10) No lubida cu e vision di Juan ta aplica ne dia di Señor, unda nos ta actualmente. “E siete spiritu” ta semper puesto pa guia i fortalecénos. (Galatio 5:16-18) E Palabra di Dios ta disponibel awe pa yúdanos ser santo den e sirbishi di un Dios santo. (1 Pedro 1:14-16) Siguramente, nos ta feliz pa leza na boz halto e palabra dje profecía. (Revelacion 1:3) Ki motivacion nan ta duna pa keda fiel na Jehova i no laga mundo destraénos for di canta su alabanza activamente!—1 Juan 2:15-17.

²⁸ Te aki, Juan a duna detaye di loke el a mira ora e tabata invitá pa drenta pe porta habrí den cielo. Di manera mas sobresaliente, el a informa cu Jehova, den tur e magnificencia di su mahestad i dignidad, ta sintá ariba su trono celestial. E ta rondoná pe organizacion di mas fuerte cu tin—radiante den su splendor i lealtad. E Tribunal divino ta funcionando. (Daniel 7:9, 10, 18) E esenario ta prepará pa algo extraordinario sosode. Kico esei tá, i con esei ta afectános djawe? Láganos wak mientras cu e drama ta sigi!

[Plachi di henter página na página 75]

[Plachi di henter página na página 78]

Capítulo 15

“Ken ta digno di habri e rol?”

 1. Kico a sosode awor den e vision di Juan?

SUBLIME! INSPIRADOR DI TEMOR! Esei ta loke bo por yama e vision conmovedor dje trono di Jehova den su sitio rondoná pa lampi di candela, querubín, 24 anciano, i e lamá di glas. Pero, kico Juan a mira despues? Juan a enfoca riba e centro mes dje vision celestial, bisando nos: “I mi a mira den e man drechi di Esun sintá ariba e trono un rol cu skirbimento padén i patrás, seyá fuertemente cu siete seyo. I mi a mira un angel fuerte puntra cu boz fuerte: ‘Ken ta digno di habri e rol i kibra e seyo?’ Pero ni den cielo ni riba tera ni bao di tera tabatin sikiera un cu por a habri e rol of wak den dje. I mi a entrega na mashá yoramento pasobra ningun a wordu hayá digno di habri e rol ni wak den dje.”—Revelacion 5:1-4.

2, 3. (a) Pakico Juan tabata ansioso pa un persona ser hayá pa habri e rol, pero ki posibilidad tin pa esei? (b) E pueblo ungí di Dios a spera ansiosamente pa kico den nos tempo?

² Jehova mes, Señor Soberano di tur creacion, ta esun cu ta saca su man cu e rol den dje. E mester ta yen di informacion vital, pasobra e tin skirbimento dilanti i patrás. Esei ta lanta nos curiosidad. Kico e rol ta contene? Nos ta corda e invitacion cu Jehova a duna Juan: “Subi aki, i lo mi mustrábo loke mester sosode.” (Revelacion 4:1) Yen di curiosidad, nos casi no por spera pa sa kico ta bini. Pero, ai, e rol ta bon cerá, seyá cu siete seyo!

³ E angel fuerte por haya un persona digno di habri e rol? Literalmente, segun e griego original, e rol ta situá “ariba e man drechi” di Jehova. Esei ta parce di bisa cu e ta saca su man habrí. Pero ta parce cu ningun persona den cielo ni riba tera ta digno di acepta i habri e rol. Ni sikiera bao di tera, den fiel sirbidor di Dios cu a muri, tin hende cu ta califica pe onor halto. No ta straño cu Juan a keda claramente molestiá! Kizás e nunca por tende di “loke mester sosode.” Den nos dia, també, e pueblo ungí di Dios a spera ansiosamente pa Jehova manda su luz i berdad riba Revelacion. El a haci esei progresivamente ne tempo siñalá pe cumplimento dje profecía, pa guia su pueblo den e camina dje “gran salbacion.”—Salmo 43:3, 5.

Esun digno

 4. (a) Ken a wordu descubrí cu ta digno pa habri e rol i seyo di dje? (b) E grupo semehante di Juan i nan compañénan ta participa den cua recompensa i privilegio awor?

⁴ Sí, tin un persona cu ta digno di habri e rol! Juan a bisa: “Pero un anciano a bisámi: ‘Stop di yora. Mira! E León cu ta dje tribu di Hudá, e raíz di David, a vence pe habri e rol i su siete seyo.’” (Revelacion 5:5) Pues, Juan a seca su lágrima! E grupo cu Juan a simboliza i nan compañé leal djawe també a wanta hopi aña di prueba severo mientras cu nan a spera cu pacenshi pa iluminacion. Ki un recompensa consolador nos tin awor den e comprendimento dje vision, i ta ki un privilegio pa participa den su cumplimento proclamando su mensahe na otro!

 5. (a) Cua profecía tabata declará tocante Hudá, i unda desendiente di Hudá a goberna? (b) Ken ta Siló?

⁵ Sí, “e León cu ta dje tribu di Hudá”! Juan a conoce e profecía cu Jacob, antepasado dje raza hudío, a declara tocante Hudá, su yiu di cuater: “Hudá ta yiu di león. Mi yiu, bo siguramente lo lanta for di bo víctima. El a buig, el a rek su curpa mescos cu león i, manera león, ken tin e tribilidad di lanté? E bara di autoridad lo no aparta di Hudá, ni e bastón di comandante di meimei su pia, te cu Siló bini; i obedencia di pueblo lo pertenece na dje.” (Génesis 49:9, 10) E desendencia real dje pueblo di Dios a bini di Hudá. Cuminzando cu David, tur rey cu a manda den Jerusalem te cu babilónico a destrui e stad tabata desendiente di Hudá. Pero ningun di nan tabata Siló di ken Jacob a profetiza. Siló kier men “Esun cu tin e derecho.” Proféticamente e nomber a siñala na Jesús, esun na ken e Reino di David ta pertenece permanentemente awor.—Ezekiel 21:25-27; Lucas 1:32, 33; Revelacion 19:16.

 6. Di ki manera Jesús tabata un “ramita” di Jesé i també e “raíz di David”?

⁶ Juan a comprende un bez e referencia ne “raíz di David.” Proféticamente Mesías primintí ta ser yamá “e ramita dje troncón di Jesé [tata di rey David] . . . un taki” i “e raíz di Jesé lo lanta ariba como siñal pe pueblo.” (Isaías 11:1, 10) Jesús tabata un taki di Jesé, ya cu el a nace di desendencia real di David, yiu di Jesé. Además, como raíz di Jesé, e tabata Esun cu a haci e dinastía di David nace di nobo, dunando na dje bida i sostén pa semper.—2 Samuel 7:16.

 7. Kico a haci Jesús digno di tuma e rol for di man di Esun sintá ariba e trono?

⁷ Principalmente, Jesús tabata esun cu, como un hende perfecto, a sirbi Jehova cu integridad i bao di prueba terribel. El a duna un contesta completo ne desafío di Satanás. (Proverbio 27:11) P’sei, e por a bisa anochi promé cu el a muri como sacrificio, “Mi a vence mundo.” (Juan 16:33) P’sei mes, Jehova a confia na Jesús resusitá “tur autoridad . . . den cielo i riba tera.” E so di tur sirbidor di Dios tabata calificá di recibi e rol, afin di duna di conoce e mensahe importante di dje.—Mateo 28:18.

 8. (a) En cuanto e Reino, kico ta mustra cu Jesús ta digno? (b) Pakico tabata apropiado pa uno dje 24 anciano revela na Juan e persona cu ta digno di habri e rol?

⁸ Ta apropiado, en berdad, pa Jesús habri e rol. Desde l914 e tabata entronizá como Rey dje Reino mesiánico di Dios, i e rol ta revela mashá hopi tocante e Reino i loke lo e haci. Jesús fielmente a duna testimonio dje berdad di Reino ora e tabata aki riba tera. (Juan 18:36, 37) El a siña su sigidornan pidi binimento dje Reino. (Mateo 6:9, 10) El a inicia predicacion dje bon nobo di Reino na principio dje era cristian i a profetiza dje culminacion dje trabao di predica durante e tempo di fin. (Mateo 4:23; Marco 13:10) També tabata apropiado pa un dje 24 anciano revela na Juan cu Jesús tabata esun cu lo habri e seyo. Pakico? Pasobra e 24 anciano ta sinta riba trono i ta bisti corona, siendo cu nan ta coheredero cu Cristo den su Reino.—Romano 8:17; Revelacion 4:4.

‘E Lamchi cu tabata matá’

 9. En bez di un león, kico Juan a mira pará “meimei dje trono,” i ki detaye el a duna di dje?

⁹ Juan a wak pa mira e “León cu ta dje tribu di Hudá.” Pero ki asombroso! Un persona simbólico completamente diferente a presenta: “I mi a mira pará meimei dje trono i dje cuater persona bibiente i meimei dje ancianonan un lamchi como si e tabata matá, teniendo siete cachu i siete wowo, cua wowo kier men e siete spiritu di Dios cu a ser mandá na tur e tera.”—Revelacion 5:6.

10. Ken ta e “lamchi” cu Juan a mira, i pakico e nomber ta apropiado?

¹⁰ Net den centro, cant’i trono, dentro di círculo formá pe cuater persona bibiente i e 24 anciano, tabatin un lamchi! Sin duda, Juan a identifica e lamchi un bez como e “León cu ta dje tribu di Hudá” i como e “raíz di David.” Juan tabata sa cu, mas cu 60 aña promé, Juan bautista papiando cu hudío rond di dje, a presenta Jesús como e “Lamchi di Dios cu ta kita picá di mundo!” (Juan 1:29) Durante tur su bida riba tera, Jesús a keda sin contaminacion di mundo—mescos cu un lamchi sin mancha—di manera cu e por a ofrece su bida perfecto como un sacrificio pa humanidad.—1 Corintio 5:7; Hebreo 7:26.

11. Pakico no ta kita e dignidad di Jesús glorificá pa pinté como “un lamchi como si el a ser matá”?

¹¹ Ta un posibel menosprecio of ta degradante pa representa Jesús glorificá como “un lamchi como si fuera matá”? Di ningun manera! E echo cu Jesús a keda fiel te na morto tabata un derota grandísimo pa Satanás i un gran triunfo pa Jehova Dios. Representando Jesús dje manera ei ta pinta cu palabra bibo su vencimento dje mundo di Satanás i ta un recordatorio dje amor profundo cu Jehova i Jesús tin pa humanidad. (Juan 3:16; 15:13; compara cu Colosense 2:15.) Asina esei ta siñalá na Jesús como e Simía primintí, cu ta calificá sobresalientemente pa habri e rol.—Génesis 3:15.

12. Kico e siete cachu dje Lamchi ta simboliza?

¹² Kico mas ta aumenta nos aprecio dje “lamchi”? E tin siete cachu. Den e Bijbel hopi bez cachu ta símbolo di poder of autoridad, i siete ta indica un condicion completo. (Compara cu 1 Samuel 2:1, 10; Salmo 112:9; 148:14.) Pues, e siete cachu dje Lamchi ta representa e poder completo cu Jehova a confia na Jesús. E ta “hopi mas halto cu tur gobierno i autoridad i poder i dominio i tur nomber nombrá, no solamente den e sistema di cosnan aki, sino també den esun cu ta bini.” (Efesio 1:20-23; 1 Pedro 3:22) Jesús specialmente a eherce poder, poder gobernamental, desde 1914 ora Jehova a entronizé como Rey celestial.—Salmo 2:6.

13. (a) Kico e siete wowo dje Lamchi ta simboliza? (b) E Lamchi a procede di haci kico?

¹³ Además, Jesús ta completamente yená cu spiritu santo, locual e siete wowo dje Lamchi ta simboliza, “nificando e siete spiritu di Dios.” Jesús ta e canal door di cua e plenitud dje forza activo di Jehova ta basha riba Su sirbidornan terrenal. (Tito 3:6) Ta claro cu ta mediante e mesun spiritu cu e ta mira desde cielo loke ta sosode aki riba tera. Mescos cu su Tata, Jesús tin bista perfecto. Nada ta scapé. (Compara cu Salmo 11:4; Zacarías 4:10.) Claramente, anto, e Yiu—e wardador di integridad cu a vence mundo; e León dje tribu di Hudá; e raíz di David; esun cu a ofrece su bida pa humanidad; esun cu a recibi autoridad completo, e plenitud di spiritu santo, i comprendimento perfecto di Jehova Dios, sí, esei ta sobresalientemente digno di tuma e rol for di man di Jehova. El a vacila pa acepta tal comision di sirbishi den e organizacion halto di Jehova? No! Mas bien “el a bai i a tuma un bez [e rol] for di man drechi di Esun sintá ariba e trono.” (Revelacion 5:7) Ki un ehempel excelente di ser dispuesto pa obedece!

Cantica di alabanza

14. (a) Con e cuater persona bibiente i e 24 anciano a reacciona ora Jesús a tuma e rol? (b) Con e informacion cu Juan a recibi tocante e 24 anciano ta confirma nan identidad i posicion?

¹⁴ Con e otronan dilanti dje trono di Jehova a reacciona? “I ora el a tuma e rol, e cuater persona bibiente i e binticuater anciano a cai dilanti dje Lamchi, cada un teniendo un arpa i conchi di oro cu tabata yen di censia, i e censia ta nifica oracion dje santonan.” (Revelacion 5:8) Mescos cu e cuater persona querubín bibiente dilanti dje trono di Dios, e 24 anciano a buig pa Jesús den reconocimento di su autoridad. Pero anciano so tin arpa i conchi di censia.a I awor nan so ta canta e cantica nobo. (Revelacion 5:9) Asina nan ta parce e 144.000 santo “Israel di Dios,” cu també tin arpa i ta canta un cantica nobo. (Galatio 6:16; Colosense 1:12; Revelacion 7:3-8; 14:1-4) Además, e ta mustra cu e 24 anciano ta cumpli cu funcion sacerdotal celestial, locual sacerdote di Israel di antigua a simboliza ora nan a kima censia pa Jehova den e tabernáculo—un funcion cu a termina riba tera ora Dios a kita e Ley di Moisés for di camina, clabando e Ley ne staca di tormento di Jesús. (Colosense 2:14) Ki conclusion nos ta saca for di tur esei? E conclusion di cu nos ta mira vencedor ungí den nan asignacion final como ‘sacerdote di Dios i di Cristo, reinando como rey cuné pe mil aña.’—Revelacion 20:6.

15. (a) Den Israel, ken so tabatin e privilegio di drenta den e Lugar Santísimo dje tabernáculo? (b) Pakico tabata un asunto di bida of morto pe sumosacerdote kima censia promé cu el a drenta den e Lugar Santísimo?

¹⁵ Den Israel di antigua, e sumosacerdote so por a drenta den e Lugar Santísimo dilanti dje presencia simbólico di Jehova. Pe, hibamento di censia tabata un asunto di bida of morto. E ley di Jehova a bisa: “[Arón] mester tuma e panchi yen di piedra di candela di ariba e altar dilanti Jehova, i yena hueco di su dos man di censia fini perfumá, i e mester híbanan padén dje cortina. També e mester pone e censia riba e candela dilanti Jehova, i e nubia di censia tin cu plama ariba e tapadera dje Arca, cu ta ariba dje Testimonio, pe no muri.” (Levítico 16:12, 13) Tabata imposibel pe sumosacerdote logra drenta den e Lugar Santísimo amenos cu el a kima censia.

16. (a) Den e sistema di cosnan cristian, ken por drenta den e Lugar Santísimo dje realidad? (b) Pakico cristian ungí tin cu ‘kima censia’?

¹⁶ Den e sistema cristian di cosnan, no ta e Sumosacerdote dje realidad so, esta, Jesucristo, sino també cada un dje 144.000 subsacerdote cu, cu tempo, ta logra drenta den e Lugar Santísimo dje realidad, den e lugar dje presencia di Jehova den cielo. (Hebreo 10:19-23) Entrada den e Lugar Santísimo ta imposibel pa tal sacerdote, cu e 24 anciano a simboliza, amenos cu nan ta ‘kima censia,’ esta, ofrece constantemente oracion i súplica na Jehova.—Hebreo 5:7; Hudas 20, 21; compara cu Salmo 141:2.

Un cantica nobo

17. (a) Cua cantica nobo e 24 anciano ta canta? (b) Di ki manera e expresion “cantica nobo” ta ser usá den e Bijbel generalmente?

¹⁷ Awor nan ta tende e sonido di un cantica melodioso. E Lamchi i su asociadonan sacerdotal, e 24 anciano, ta canté: “I nan a canta un cantica nobo, bisando: ‘Bo ta digno pa tuma e rol i habri su seyo, pasobra bo tabata matá i cu bo sanger bo a cumpra hende pa Dios di tur tribu i lenga i pueblo i nacion.’” (Revelacion 5:9) E expresion “cantica nobo” ta ser usá varios bez den e Bijbel i generalmente ta referi na alabanza pa Jehova pa algun acto poderoso di liberacion. (Salmo 96:1; 98:1; 144:9) Pues, e cantica ta nobo pasobra awor cantante por proclama mas obra maraviyoso di Jehova i expresa aprecio renobá pa Su nomber glorioso.

18. E 24 anciano ta alaba Jesús cu nan cantica nobo pa cua motibo?

¹⁸ Sin embargo, aki e 24 anciano ta canta un cantica nobo dilanti Jesús en bez di dilanti Jehova. Pero tin e mesun principio. Nan ta alaba Jesús pe cosnan nobo cu e, como Yiu di Dios, a haci pa nan. Pa medio di su sanger, el a media e pacto nobo i asina a haci posibel e nacimento di un nacion nobo como e posesion special di Jehova. (Romano 2:28, 29; 1 Corintio 11:25; Hebreo 7:18-25) Miembro dje nacion spiritual nobo a bini di hopi nacion carnal, pero Jesús a unínan den un solo congregacion como un solo nacion.—Isaías 26:2; 1 Pedro 2:9, 10.

19. (a) Israel carnal no a realiza cua bendicion debí na nan infieldad? (b) E nacion nobo di Jehova ta logra goza di cua bendicion?

¹⁹ Ora Jehova a forma israelita den un nacion ayá den e dianan di Moisés, el a cera un pacto cu nan i a priminti cu si nan ta keda fiel ne pacto, nan lo bira un reino di sacerdote dilanti dje. (Exodo 19:5, 6) Israelita no a keda fiel i nunca a experimenta cumplimento dje promesa. En cambio, e nacion nobo, formá riba base dje pacto nobo cu Jesús a media, a keda fiel. P’sei, miembro di dje ta yega di reina riba tera como rey i també ta sirbi como sacerdote, yudando hende di curazón recto den humanidad bira reconciliá cu Jehova. (Colosense 1:20) Ta net manera e cantica nobo ta expresa: “I bo a hácinan ser un reino i sacerdote di nos Dios, i nan tin cu reina como rey riba tera.” (Revelacion 5:10) Ki gozo e 24 anciano tin cantando e cantica nobo di alabanza pa Jesús glorificá!

Un coro celestial

20. Cua cantica di alabanza pe Lamchi ta ser cantá awor?

²⁰ Con e otronan dje ehército celestial grandi dje organizacion di Jehova ta responde ne cantica nobo? Juan a emociona ora el a mira nan berdadero armonía: “I mi a wak, i a tende boz di hopi angel rond dje trono i dje personanan bibiente i dje ancianonan, i e cantidad di nan tabata miríada di miríada i miles di miles, bisando cu boz fuerte: ‘E Lamchi cu tabata matá ta digno di recibi e poder i riqueza i sabiduría i forza i onor i gloria i bendicion.’” (Revelacion 5:11, 12) Ki un cantica impresionante di alabanza!

21. Alabanza pe Lamchi ta rebaha e soberanía i puesto di Jehova? Splica.

²¹ Esei kier men cu awor di algun manera Jesús a reemplaza Jehova Dios i cu tur e creacion ta duna alabanza na dje en bez di na su Tata? Leu di dje! Mas bien, e cantica di alabanza ta na armonía cu loke apóstol Pablo a skirbi: “Dios a halza [Jesús] na un puesto superior i bondadosamente a duné e nomber cu ta mas halto cu tur otro nomber, di manera cu den e nomber di Jesús tur rudía mester dobla di esnan den cielo i di esnan riba tera i di esnan bao di tera, i tur lenga mester reconoce abiertamente cu Jesucristo ta Señor pe gloria di Dios e Tata.” (Filipense 2:9-11) Jesús ta ser elogiá asina pe parti cu el a hunga resolviendo e cuestion principal dilanti tur creacion—e vindicacion dje soberanía legítimo di Jehova. Sí, ki gloria en berdad esei a trece pe Tata!

Un himno creciente

22. Boz dje region terrenal ta uni den cua himno?

²² Den e cuadro cu Juan a pinta, ehército di cielo ta aclama Jesús cu melodía reconociendo su fieldad i su autoridad celestial. Den esei, otro boz ta uni cu nan dje region terrenal mientras cu eseinan també ta participa den e alabanza dje Tata i també dje Yiu. Mescos cu logramento di yiu humano por duna gran onor ne mayornan, asina e camina leal di Jesús ta resona den tur e creacion “pe gloria di Dios e Tata.” Asina, Juan a sigi informa: “I tur creacion cu ta den cielo i riba tera i bao di tera i den lamá, i tur loke tin den nan, mi a tende bisa: ‘Na Esun cu ta sintá ariba e trono i ne Lamchi sea bendicion i onor i gloria i poder pa semper hamás.’”—Revelacion 5:13.

23, 24. (a) Kico ta indica e tempo pe himno cuminza den cielo, i e tempo pe cuminza riba tera? (b) Con e volumen dje himno a aumenta cu pasamento dje añanan?

²³ Na ki tempo nan a tende e himno sublime ser cantá? Esei a cuminza temprán den e dia di Señor. Despues cu Satanás i su demoñonan tabata sacá for di cielo, “tur creacion cu ta den cielo” por a uni den e cantica di alabanza. I, manera historia ta mustra, desde 1919 un multitud aumentante riba tera a uni nan boz den e alabanza di Jehova, aumentando for di poco mil te na hopi mas cu seis miyón na aña 2005.b Despues di destruccion dje sistema terrenal di Satanás, “tur creacion . . . riba tera” lo canta alabanza di Jehova i di su Yiu. Ne debido tempo di Jehova Dios mes, e resureccion di miyones incontable di hende morto lo cuminza, anto “tur creacion . . . bao di tera” cu ta den e memoria di Dios lo haya oportunidad pa uni den e cantamento dje himno.

²⁴ Ya caba, “desde extremidad dje tera . . . lamá i . . . isla,” miyones di hende ta canta un cantica nobo den asociacion cu e organizacion mundial di Jehova. (Isaías 42:10; Salmo 150:1-6) E alabanza gozoso lo alcanza un máximo na cabamento dje mil aña, ora humanidad ta ser lantá te na perfeccion. E colebra bieu, e gañador principal, Satanás mes, lo ser destruí anto, den e cumplimento completo di Génesis 3:15, i den un culminacion triunfante, tur creacion bibiente, spiritu i humano, lo canta hunto: “Na Esun cu ta sinta ariba e trono i ne Lamchi sea bendicion i onor i gloria i poder pa semper hamás.” Lo no tin ningun boz contra esei den tur e universo.

25. (a) Lezamento dje relato di Juan dje himno universal ta conmovénos pa haci kico? (b) E cuater persona bibiente i e 24 anciano ta pone cua ehempel excelente pa nos durante cu e vision ta termina?

²⁵ Ki un tempo gozoso esei lo tá! Siguramente detaye cu Juan a duna ei ta yena nos curazón cu felicidad i ta animános pa canta cu ehército celestial alabanza sincero pa Jehova Dios i Jesucristo. Nos no ta keda mas determiná cu nunca pa persevera den obra correcto? Si nos ta haci esei, anto nos por spera, cu e yudanza di Jehova, cu nos lo tei individualmente ne culminacion feliz, uniendo nos boz cu e coro universal di alabanza. Siguramente, e cuater persona bibiente querubín i hende cristian ungí resusitá ta den plena armonía, pasobra e vision ta termina cu e palabra: “I e cuater persona bibiente a sigi bisa: ‘Amén!’ i e ancianonan a cai abao i a adora.”—Revelacion 5:14.

26. Nos mester eherce fe den kico, i e Lamchi tabata prepara pa haci kico?

²⁶ Abo, també, estimado lector, eherce fe den e sacrificio dje Lamchi—‘esun digno’—i sea bendicioná den bo esfuerzo humilde pa adora i sirbi Jehova—“Esun cu ta sintá ariba e trono.” Laga e grupo cu Juan a simboliza yudábo awe mientras cu e ta percura e necesario “midí di alimento [spiritual] ne debido tempo.” (Lucas 12:42) Pero, mira! E Lamchi ta prepara pa habri e siete seyo. Ki emocionante revelacion ta spéranos?

[Nota]

[Plachi di henter página na página 86]

Capítulo 16

Cuater ginete na galope!

Vision 3—Revelacion 6:1-17

Tema: E corrí dje cuater ginete, testigo martirizá bao dje altar, i e gran dia di rabia

Tempo di cumplimento: Desde 1914 te na destruccion dje sistema di cosnan aki

 1. Con Jehova a revela na Juan e contenido dje rol interesante cu Jesús a habri?

DEN e tempo aki di crisis, nos no ta intensamente interesá den “loke mester sosode pronto”? Sigur cu sí, pasobra esei ta enbolbénos! Pues, láganos compaña Juan awor mientras cu Jesús ta procede di habri e rol interesante. Notablemente, Juan no tabatin cu leza e rol. Pakico? Pasobra su contenido tabata comunicá cu Juan “den siñal” den un serie di drama dinámico yen di accion.—Revelacion 1:1, 10.

 2. (a) Kico Juan a mira i a tende, i aparencia dje querubín ta sugeri kico? (b) E mandamento dje promé querubín tabata dirigí na ken, i pakico bo ta contestá asina?

² Scucha Juan ora Jesús a habri e promé seyo dje rol: “I mi a mira ora e Lamchi a habri uno di e siete seyo, i mi a tende un dje cuater persona bibiente bisa cu un boz como si di donder: ‘Bin!’” (Revelacion 6:1) Esei tabata e boz dje promé querubín. Su aparencia manera león a indica na Juan cu e organizacion di Jehova ta actua cu curashi ehecutando Su husto huicio. I e mandamento tabata dirigí na ken? No por ta na Juan, pasobra Juan tabata invitá caba pa participa den tal drama profético. (Revelacion 4:1) E “boz como si di donder” tabata un yamada pa otro participante den e promé di un serie di cuater episodio conmovedor.

E cabai blancu i su ginete ilustre

 3. (a) Juan a duna detaye di kico awor? (b) Na armonía cu símbolo di Bijbel, kico e cabai blancu mester simboliza?

³ Juan i hunto cuné e celoso grupo cu Juan a simboliza i nan compañénan djawe, tin e privilegio di mira un drama cu accion rápido! Juan a bisa: “I mi a wak, i, mira! un cabai blancu; i esun sintá ariba dje tabatin un boog; i un corona tabata duná na ne, i el a sali venciendo i pa completa su victoria.” (Revelacion 6:2) Sí, respondiendo ne yamada manera donder di “Bin!” un cabai blancu a sali na carreda. Den e Bijbel, hopi bez cabai ta simboliza gera. (Salmo 20:7; Proverbio 21:31; Isaías 31:1) E cabai, probablemente un bonita macho, a briya cu un blancura cu a indica santidad sin mancha. (Compara cu Revelacion 1:14; 4:4; 7:9; 20:11.) Esei ta ki apropiado, pasobra e ta representa gera cu ta limpi i husto den e bista santo di Jehova!—Mira també Revelacion 19:11, 14.

 4. Ken ta e Ginete dje cabai blancu? Splica.

⁴ Ken ta ginete dje cabai? E tin un boog, un arma di atake den gera, pero també e tabata duná un corona. E úniconan mirá cu corona bistí durante e dia di Señor ta Jesús i e grupo cu e 24 anciano a representa. (Daniel 7:13, 14, 27; Lucas 1:31-33; Revelacion 4:4, 10; 14:14)a Ta improbabel cu un miembro dje grupo di 24 anciano lo ser pintá como recibiendo un corona riba su mes mérito. P’sei, e solo ginete mester ta Jesucristo i ningun otro. Juan a miré den cielo ne momento histórico di 1914 ora Jehova a declara, “Ami, sí ami, a instala mi rey,” i a bisé cu el a haci esei “pa mi dunábo e nacionan como bo herencia.” (Salmo 2:6-8)b Pues, ora el a habri e promé seyo, Jesús a revela con e mes, como Rey recién coroná, ta sali pa haci gera ne tempo siñalá di Dios.

 5. Ki detaye e salmista a duna dje Ginete na moda similar cu Revelacion 6:2?

⁵ E drama ta armonizá bonitamente cu Salmo 45:4-7, dirigí ne Rey cu Jehova a entroniza: “I den bo splendor sigi padilanti te na éxito; corre den e causa dje berdad i humildad i husticia, i bo man drechi lo instruíbo den cosnan inspirador di temor. Bo flechanan ta skerpi—pueblo ta sigi cai bao di bo—den e curazón di enemigo dje rey. Dios ta bo trono te na tempo indefinitivo, asta pa semper; e bara di autoridad di bo gobernacion real ta un bara di rectitud. Bo a stima husticia i a odia maldad. P’sei Dios, bo Dios, a ungíbo cu e azeta di alegría mas cu bo socionan.” Ya cu Juan a conoce tal detaye profético, e por a comprende cu el a aplica ne actividad di Jesús como Rey.—Compara cu Hebreo 1:1, 2, 8, 9.

Saliendo pa vence

 6. (a) Pakico e Ginete mester sali venciendo? (b) E corrí victorioso ta sigi durante cua añanan?

⁶ Sin embargo, pakico e Rey recién coroná tabatin cu sali pa haci gera? Pasobra su gobernacion real tabata establecí enfrentá cu oposicion severo dje enemigo principal di Jehova, Satanás e Diabel, i hende riba tera—sea cu nan sa of no—ta cumpli cu su doel. E nacimento mes dje Reino a exigi bringamento di un gera importante den cielo. Bringando bao dje nomber di Miguel (cu kier men “Ken ta manera Dios?”), Jesús a vence Satanás i su demoñonan i a tíranan abao ne tera. (Revelacion 12:7-12) E corrí triunfante di Jesús a sigi durante e promé décadanan dje dia di Señor mientras cu hende semehante di carné ta ser recogí. Aunque mundo henter ta “bao di poder dje malbado,” Jesús ta sigi pastorea amorosamente su rumanan ungí i nan compañénan, yudando cada un alcanza e victoria di fe.—1 Juan 5:19.

 7. Jesús tabatin cua victoria riba tera durante e promé diez aña dje dia di Señor, i nos mester tin cua determinacion?

⁷ Cua otro victoria Jesús tabatin durante e mas cu 90 aña dje dia di Señor? Rond di mundo, individualmente i como un congregacion, e pueblo di Jehova a experimenta hopi dificultad, presion, i persecucion, similar cu esnan cu apóstol Pablo a menciona pa duna prueba di su ministerio. (2 Corintio 11:23-28) Testigo di Jehova tabatin mester di “poder mas ayá cu loke ta normal,” specialmente unda cu tabatin gera i violencia, pa nan por wanta. (2 Corintio 4:7) Pero, asta den situacion di mas dificultoso, fiel Testigo di Jehova por a bisa manera Pablo: “Señor a para cerca mi i a dunámi poder, afin cu pa medio di mi e predicacion por ta efectuá plenamente.” (2 Timoteo 4:17) Sí, Jesús a vence pa nan. I lo e sigi padilanti venciendo pa nos, tan tempo cu nos ta keda determiná di completa nos victoria di fe.—1 Juan 5:4.

8, 9. (a) E congregacion mundial di Testigo di Jehova a participa den cua victoria? (b) Unda e aumento di Testigo di Jehova ta realmente sobresaliente?

⁸ E congregacion mundial di Testigo di Jehova a participa den hopi victoria bao di guía di nan victorioso Rey. Sobresalientemente el a proteha Studiante di Bijbel for di exterminacion na 1918, ora nan mes a keda ‘vencí’ temporalmente bao dje organizacion político di Satanás. Sin embargo, na 1919, el a kibra bara di prisón pa scápanan, anto a rebibánan pa nan proclama e bon nobo “te ne parti mas lehano dje tera.”—Revelacion 13:7; Echo 1:8.

⁹ Promé cu Gera Mundial II i durante dje, e Triple Alianza dictatorial a purba di extermina Testigo di Jehova den hopi tera unda guía religioso, specialmente esnan dje herarquía católico romano, a duna apoyo abierto of secreto na dictador opresivo. Pero e 71.509 Testigo di Jehova cu tabata predica ora e gera a cuminza na 1939 a bira 141.606 ora el a caba na 1945, aunque mas cu 10.000 a pasa añanan largu den prisón i concentrasicamp, i rond di 2.000 a ser matá. E cantidad di Testigo di Jehova activo mundialmente a aumenta te mas cu seis miyón awe. Aumento a ser sobresaliente den país católico i den país unda persecucion tabata mas severo—tal como Alemania, Italia, i Hapón, unda Testigo di Jehova ta informa awor un total di hopi mas cu 600.000 predicador activo den e feld.—Isaías 54:17; Jeremías 1:17-19.

10. E Rey victorioso a bendiciona su pueblo cu cua victoria “defendiendo i legalmente estableciendo e bon nobo”?

¹⁰ Nos Rey victorioso també a bendiciona su pueblo celoso guiando nan na hopi victoria “defendiendo i legalmente estableciendo e bon nobo,” den tribunal i dilanti gobierno. (Filipense 1:7; Mateo 10:18; 24:9) Esei tabata na escala internacional—na Australia, Argentina, Canadá, Grecia, India, Swazilandia, Suiza, Turkía, i otro tera. Entre 50 victoria legal cu Testigo di Jehova a gana dilanti dje Corte Supremo di Estados Unidos tabata esnan cu ta garantiza e derecho di declara e bon nobo “públicamente i di cas pa cas” i pa abstene di participa den ceremonia patriótico idólatra. (Echo 5:42; 20:20; 1 Corintio 10:14) Esei ta loke a tene e camina habrí pa duna un testimonio mundial aumentante.

11. (a) Con e Ginete a “completa su victoria”? (b) Habrimento di seyo dos, tres i cuater mester tene ki efecto riba nos?

¹¹ Con Jesús ta ‘completa su victoria’?c Nos lo mira cu e ta haci esei disponiendo di religion falso anto tirando tur pida sobrá dje organizacion visibel di Satanás den e simbólico “tanki di candela” di destruccion, pe vindicacion dje soberanía di Jehova Dios. Cu confianza, nos ta spera awor e dia na Armagedón ora nos “Rey di reynan” lo gana e victoria final riba e organizacion político opresivo di Satanás! (Revelacion 16:16; 17:14; 19:2, 14-21; Ezekiel 25:17) Entre tanto, e Vencedor invencible ariba e cabai blancu ta sigi corre mientras cu Jehova ta sigi agrega hende di curazón onrado na Su nacion husto riba tera. (Isaías 26:2; 60:22) Bo ta participa cu e grupo di ungínan cu Juan a simboliza den e gozoso aumento di Reino? Si ta asina, loke apóstol Juan a mira ora e sigiente tres seyo ta habrí sin duda lo conmovébo pa tene asta un parti mas grandi den e trabao di Jehova Dios pe dia djawe.

Mira, un cabai di color di candela!

12. Segun Jesús, kico ta marca su presencia invisibel como Rey?

¹² Cerca e fin dje ministerio di Jesús riba tera, su disípelnan a puntré na privá: “Ki siñal lo tin di bo presencia i di conclusion dje sistema di cosnan?” Contestando, el a profetiza di calamidad cu lo ser “un principio di dolor di ansha.” Jesús a bisa cu: “Nacion lo lanta contra nacion, i reino contra reino; i lo tin temblor grandi, i den un lugar tras di otro pest i scarcidad di cuminda; i lo tin bista spantoso i siñal grandi di cielo.” (Mateo 24:3, 7, 8; Lucas 21:10, 11) Loke Juan a mira ora e otro seyonan dje rol tabata habrí ta percura un paralelo notable cu e profecía. Wak awor mientras cu Jesús glorificá ta habri e segundo seyo!

13. Ki contraste ta cerca di sali na cla pa Juan?

¹³ “I ora el a habri e segundo seyo, mi a tende e segundo persona bibiente bisa: ‘Bin!’” (Revelacion 6:3) Esei tabata e segundo querubín, cu aparencia di toro, cu a saca e mandamento. Poder ta e calidad cu ta ser simbolizá ei, pero poder usá hustamente. Pero, na contraste, Juan a mira awor un demonstracion horrible i fatal di poder.

14. Ki cabai i ginete Juan a mira sigientemente, i kico e vision ta simboliza?

¹⁴ Anto, con e segundo mandamento di “Bin!” ta wordu contestá? Asina aki: “I un otro a sali, un cabai di color di candela; i na esun sintá ariba dje tabata duná di kita paz for di tera di manera cu nan a mata otro; i un spada grandi tabata duná na dje.” (Revelacion 6:4) Un vision spantoso en berdad! I no tin duda di loke e ta simboliza: gera! Esei no ta e gera husto i victorioso dje Rey vencedor di Jehova Dios sino ta gera cruel internacional di hende cu dramamento di sanger i dolor innecesario. Ta ki apropiado cu e ginete ta montá ariba un cabai corá manera candela!

15. Pakico nos no kier ningun participacion den e corrí dje segundo ginete?

¹⁵ Siguramente Juan no tabata kier tene nada cu ber cu e ginete ei i su corrí fuera di control, pasobra tabata profetizá tocante e pueblo di Dios: “Ni nan lo no siña di gera mas.” (Isaías 2:4) Aunque nan ta “den mundo” ainda, Juan i e grupo cu el a simboliza i e multitud grandi “no ta parti” dje sistema aki manchá cu sanger. Nos arma ta spiritual i “poderoso por Dios” pa proclama e berdad activamente, sin participa den gera carnal.—Juan 17:11, 14; 2 Corintio 10:3, 4.

16. Na ki tempo i di ki manera e ginete dje cabai corá tabata duná un “spada grandi”?

¹⁶ Tabatin hopi gera promé cu 1914, e aña ora e Ginete dje cabai blancu a recibi su corona. Pero awor e ginete dje cabai corá ta ser duná un “spada grandi.” Kico esei ta indica? Ora Gera Mundial I a cuminza, gera humano a bira mas salbahe, mas destructivo cu den tur tempo di antes. Durante e dramamento di sanger di 1914-1918, tanki di gera, gas venenoso, avion, submarino, cañon enorme, i arma automático tabata usá, sea pe promé bez of na escala sin igual. Den mas cu 28 nacion, poblacion henter, no soldad profesional so, tabata recluta pa participa den e gera. Matamento tabata horrible. Mas cu nuebe miyón soldad tabata matá, i morto di pueblo tabata astronómico. Asta ora e gera a termina, berdadero paz no a bolbe pe tera. Mas cu 50 aña despues dje gera, e político alemán Konrad Adenauer a comenta: “Siguridad i trankilidad a desparce for di bida di hende desde 1914.” En berdad, tabata duná ne ginete dje cabai di color di candela pa kita paz for di tera!

17. Con uso dje “spada grandi” a sigi, despues di Gera Mundial I?

¹⁷ Pues, bao di instigacion di su sed pa sanger, e ginete dje cabai corá a drenta den Gera Mundial II. Arma di matamento a bira asta mas diabólico, i matamento a aumenta lihé te na cuater bez e matamento di Gera Mundial I. Na 1945 e dos bomba atómica a rementa riba Hapón, cada un exterminando—den un solo tiro—diez di miles di víctima. Durante e segundo gera mundial, e ginete dje cabai corá a cosechá un cosécha grandi di mas cu 55 miyón bida, i asta asina e no a keda satisfecho. Segun informe digno di confianza, hopi mas cu 20 miyón alma a muri bao dje “spada grandi” desde Gera Mundial II.

18, 19. (a) En bez di ser un triunfo pa tecnología militar, e matamento desde Gera Mundial II ta duna testimonio di cua echo? (b) Cua peliger ta confronta humanidad, pero kico e Ginete dje cabai blancu lo haci pa evita esei?

¹⁸ Nos por yama esei un triunfo di tecnología militar? Mas bien, esei ta duna testimonio dje cabai corá sin misericordia corriendo na galope. I unda e galope lo termina? Algun científico ta papia dje posibilidad di un gera nuclear accidental—sin menciona un conflicto nuclear planeá! Pero felizmente e Ginete victorioso dje cabai blancu tin otro idea tocante esei.

¹⁹ Tan tempo cu e arreglo social ta fundá ariba orguyo i odio nacionalista, humanidad tin cu keda sintá ariba un barrí di polvo nuclear. Aunque e nacionan, den desesperacion, ta destrui tur arma nuclear, toch nan sa con pa tráhanan di nobo. Den poco tempo nan por reproduci nan arma nuclear di destruccion; pues, cualkier gera cu arma regular pronto por bira un holocausto nuclear. E orguyo i odio cu ta domina e nacionan djawe mester hiba ne suicidio di humanidad, amenos—ai sí, amenos cu e Ginete dje cabai blancu ta detene e galope loco dje cabai di color di candela. Láganos tene e confianza di cu Cristo e Rey lo corre pa completa tanto su victoria riba mundo bao di control di Satanás como pa establece un arreglo social terrenal nobo fundá ariba amor—pa Dios i pa próhimo—un forza pa paz hopi mas superior cu freno swak pa gera nuclear dje tempo di locura actual.—Salmo 37:9-11; Marco 12:29-31; Revelacion 21:1-5.

Ta sali un cabai pretu

20. Nos tin cua siguranza di cu e Ginete dje cabai blancu por enfrenta cualkier situacion calamitoso?

²⁰ Awor Jesús a habri e tercer seyo! Juan, kico bo a mira? “I ora el a habri e tercer seyo, mi a tende e tercer persona bibiente bisa: ‘Bin!’” (Revelacion 6:5a) Felizmente, e tercer querubín “tin un cara manera hende,” loke ta representa e calidad di amor. Amor basá riba principio lo abunda den e mundo nobo di Dios, mescos cu tal calidad excelente ta abunda den tur e organizacion di Jehova Dios djawe. (Revelacion 4:7; 1 Juan 4:16) Nos por keda sigur cu e ginete dje cabai blancu, cu “tin cu reina como rey te cu Dios a pone tur enemigo bao di su pia,” lo kita amorosamente e situacion calamitoso cu ta ser halá na atencion di Juan sigientemente.—1 Corintio 15:25.

21. (a) Kico e cabai pretu i su ginete ta simboliza? (b) Kico ta duna prueba cu e cabai pretu ta sigi corre desenfrená?

²¹ Kico Juan a mira, anto, ora e tercer yamada di “Bin!” ta ser contestá? “I mi a wak, i, mira! un cabai pretu; i esun sintá ariba dje tabatin un balanza den su man.” (Revelacion 6:5b) Hamber mes! Esei ta e mensahe spantoso cu e vision profético a duna. El a siñala padilanti na situacion cu a presenta na principio dje dia di Señor ora nan a midi rantsoen di cuminda cu balanza. Desde 1914 hamber a ser un problema mundial continuo. Gera moderno ta resulta den hamber, pasobra recurso cu normalmente ta ser usá pa produci cuminda pa hende hambrá hopi bez ta ser usá pa produci arma di gera. Cunuquero ta ser reclutá pa gera, i cunucu cu gera ta desola i e táctico di kima e tera ta stroba produccion di cuminda. Ki cierto esei tabata durante e promé gera mundial, ora miyones di hende a sufri di hamber i a muri! Además, e ginete dje cabai pretu di hamber no a bai sosega ora e gera a caba. Despues di 1930, cinco miyón hende a muri den un solo caso di hamber den Ucrania. E segundo gera mundial a resulta den mas scarcidad di cuminda i hamber. Mientras cu e cabai pretu a sigi su galope, e Conseho Mundial riba Cuminda a informa durante 1987 cu 512 miyón hende tabata muri di hamber i cu 40.000 mucha a muri tur dia debí na causa relacioná cu hamber.

22. (a) Kico un boz a bisa, expresando cua necesidad? (b) E prijs di un liter di trigo i tres liter di cebada ta indica kico?

²² Juan tin mas cos pa bísanos: “I mi a tende un boz como si fuera meimei dje cuater persona bibiente bisa: ‘Un liter di trigo pa un denario, i tres liter di cebada pa un denario; i no haci daño ne azeta di oliba ni ne biña.’” (Revelacion 6:6) Tur cuater querubín a uni nan boz pa expresa e necesidad di vigila cuidadosamente e cuminda disponibel—mescos cu hende tabatin cu “come pan pa peso i cu preocupacion ansioso” promé cu e destruccion di Jerusalem na aña 607 PEC. (Ezekiel 4:16) Den e tempo di Juan, nan a calcula cu un liter di trigo tabata e rantsoen diario pa un soldad. Cuanto tal rantsoen a costa? Un denario—e pago pa un dia! (Mateo 20:2)d Kico a sosode si e homber tabatin un famía? Wel, e por a cumpra tres liter di cebada crudo en bez di trigo. Asta esei tabata cuminda pa un famía chikito so. I nan no a considera cu cebada tabatin e calidad di trigo como cuminda.

23. Kico e declaracion, “No haci daño ne azeta di oliba ni ne biña” ta nifica?

²³ Kico kier men e palabra, “No haci daño ne azeta di oliba ni ne biña”? Algun hende ta considera cu esei kier men aunque hopi hende a falta cuminda i asta tabata muri di hamber, cos di luho di hende ricu no a recibi daño. Pero den Medio Oriente, azeta i biña realmente no ta cos di luho. Den tempo bíblico, pan, azeta, i biña tabata considerá como cuminda básico. (Compara cu Génesis 14:18; Salmo 104:14, 15.) Awa no tabata limpi tur ora, pues nan a usa biña na tur parti pa bebe i aveces como medicina. (1 Timoteo 5:23) En cuanto azeta, den e dia di Eliseo e biuda di Sarepta, aunque e tabata pober, a kedé azeta ainda pa usa pa cushiná e poco hariña cu e tabatin. (1 Rey 17:12) P’sei, e mandamento di “no haci daño ne azeta di oliba ni ne biña” ta parce di ser conseho pa no usa tal artículo básico mucho lihé, sino sea pichiri. Di otro manera, nan lo recibi “daño,” esta, nan lo caba promé cu e hamber termina.

24. Pakico e cabai pretu no por sigi cu su galope pa hopi tempo mas?

²⁴ Ki feliz nos por keda cu e Ginete dje cabai blancu pronto lo frena e cabai pretu galopante! Pasobra ta pará skirbí tocante su percuracion amoroso pe mundo nobo: “Den su dianan hende husto lo brota, i e abundancia di paz te cu no ta existi luna mas. . . . Lo yega di tin un abundancia di grano riba tera; i na punta di montaña lo tin un sobreabundancia.”—Salmo 72:7, 16; mira també Isaías 25:6-8.

E cabai pálido i su ginete

25. Ora Jesús a habri seyo di cuater, Juan a tende e boz di ken, i kico esei ta indica?

²⁵ E relato no a caba ainda. Jesús a habri e cuarto seyo, i Juan a bísanos e resultado: “I ora el a habri e cuarto seyo, mi a tende e boz dje cuarto persona bibiente bisa: ‘Bin!’” (Revelacion 6:7) Esei ta e boz dje querubín cu ta parce un águila bulando. Esei ta indica sabiduría cu ta mira leu, i berdaderamente Juan, e grupo cu Juan a simboliza, i tur otro sirbidor terrenal di Dios tin mester di mira i actua cu perspicacia den bista di loke ta ser pintá aki. Haciendo esei, nos por haya algun proteccion for di plaga cu ta zuta e generacion orguyoso i inmoral djawe cu ta sabí na moda mundano.—1 Corintio 1:20, 21.

26. (a) Ken ta ginete di cuater, i pakico e color dje cabai ta apropiado? (b) Ken ta sigi ginete di cuater, i kico ta sosode su víctima?

²⁶ Anto, ki horror nobo a ser gelós ora e cuarto ginete a responde ne yamada? Juan a bísanos: “I mi a wak, i, mira! un cabai pálido; i esun sintá riba dje tabatin e nomber Morto. I Hades a sigié pegá.” (Revelacion 6:8a) E ginete dje último cabai tin un nomber: Morto. E ta e único dje cuater ginete di Revelacion pa revela su identidad asina directamente. Ta apropiado pa Morto monta un cabai pálido, siendo cu e palabra palido (griego, khlo·rós) ta ser usá den literatura griego pa detaya cara cu ta blanchá, como si fuera cu maleza. Ta apropiado també cu pegá tras di Morto na moda sin splicacion ta Hades (graf), siendo cu Hades ta recibi e mayor parti di esnan cu ta víctima di destruccion di ginete di cuater. Felizmente, lo tin un resureccion pa eseinan, ora ‘morto i hades ta entrega esnan morto den nan.’ (Revelacion 20:13) Pero, con nan ta bira víctima di Morto?

27. (a) Con e ginete yamá Morto ta cosechá víctima? (b) Kico kier men “un cuarto parti dje tera” riba locual Morto tin autoridad?

²⁷ E vision ta conta algun manera: “I autoridad tabata duná na nan ariba e cuarto parti dje tera, pa mata cu e spada largu i cu scarcidad di cuminda i cu plaga fatal i cu bestia salbahe dje tera.” (Revelacion 6:8b) No necesariamente un cuarto parti mes di poblacion di mundo ma un parti grandi dje tera, sea cu e tin hopi hende of poco, lo ser afectá pa su corrí. E ginete ta cosechá víctima dje spada grandi dje segundo ginete i di scarcidad di cuminda dje tercer ginete. E ta cosechá su mes cosécha també, di plaga fatal i també di un cosécha di temblor, mencioná den Lucas 21:10, 11.

28. (a) Con e profecía a wordu cumplí tocante e “plaga fatal”? (b) Con e pueblo di Jehova a recibi proteccion for di hopi maleza djawe?

²⁸ Di importancia actual ta e “plaga fatal.” Despues di destruccion di Gera Mundial I, grip spañol a cosechá mas cu 20 miyón bida humano den poco luna so di 1918-1919. E único territorio riba tera pa scapa for dje plaga tabata e isla chikito di Santa Helena. Den lugar unda cu tabatin hopi morto, nan a usa palu pa kima montón di cádaver. I awe tin e spantoso maleza di curazón i cáncer, hopi di locual ta ser causá pa contaminacion di tabaco. Den loke a ser yamá “década mahós” desde 1980, un moda di biba perverso segun ley di Bijbel a agrega e plaga di AIDS ne “plaga fatal.” Na aña 2000, e hefe di departamento di salubridad mericano a bisa segun un informe cu AIDS ta “probablemente e peor epidemia di salud cu mundo a yega di conocé.” Tambe el a bisa cu 52 miyón hende rond mundo a pega cu HIV/AIDS, i 20 miyón di nan a muri. Ki agradicido e pueblo di Jehova ta keda cu e conseho sabí di su Palabra ta protehánan di fornicacion i abuso di sanger, mediante locual tanto maleza ta ser transmití den e dia djawe!—Echo 15:28, 29; compara cu 1 Corintio 6:9-11.

29, 30. (a) E expresion “cuater acto perhudicial” di Ezekiel 14:21 tin cua aplicacion awe? (b) “Bestia salbahe” di Revelacion 6:8 ta dúnanos di comprende kico? (c) Kico ta parce di ser e punto principal dje drama profético?

²⁹ E vision di Juan a menciona bestia salbahe como e cuarto causa pa morto prematuro. En berdad, e cuater cosnan mencioná den e habrimento dje cuarto seyo—gera, hamber, maleza, i bestia salbahe—den tempo di antigua tabata considerá como e motibo principal di morto prematuro. Pues, nan ta simboliza tur causa di morto prematuro djawe. Ta net manera Jehova a adverti Israel: “Asina lo tá també, ora lo tin mi cuater acto perhudicial di huicio—spada i hamber i bestia salbahe perhudicial i pest—cu mi realmente lo manda riba Jerusalem pa corta for di dje hende terrenal i bestia doméstico.”—Ezekiel 14:21.

³⁰ Rara bez awendia curant ta menciona cu bestia salbahe a mata hende, maske den tera tropical bestia salbahe tur ora a mata hende. Den futuro, nan por mata asta mas si gera ta desola e tera of hamber ta swak hende asina hopi cu nan no por defende nan mes contra bestia hambrá. Además, tin hopi hende den e dia djawe cu, manera bestia sin tino, ta desplega disposicion bestial basta contrario cu bestia pintá den Isaías 11:6-9. Hende asina ta principalmente responsabel pe aumento mundial di crimen relacioná cu sexo, asesinato, terrorismo, i bombardeo den e mundo djawe. (Compara cu Ezekiel 21:31; Romano 1:28-31; 2 Pedro 2:12.) E ginete di cuater a cosechá nan víctima també. Realmente, e punto principal dje drama profético ta parce di ser e cosecha dje ginete dje cabai pálido di morto prematuro di humanidad di varios manera.

31. Apesar di destruccion cu ginete dje cabai corá, pretu, i pálido ta causa, pakico nos por keda animá?

³¹ E informacion cu habrimento dje promé cuater seyo a revela ta dúnanos siguranza pasobra esei ta síñanos di no desespera debí ne gera, hamber, maleza, i otro causa di morto prematuro cu ta tanto desenfrená awe; nos no mag perde speranza tampoco door cu lider humano no a resolve problema actual. Si e situacion di mundo djawe ta haci claro cu ginete dje cabai corá, pretu, i pálido ta corre, no lubida cu e Ginete dje cabai blancu tabata e promé pa cuminza su corrí. Jesús a bira Rey, i el a vence caba asina leu tirando Satanás for di cielo. Otro victoria di dje ta inclui recogimento dje resto dje yiunan di Israel spiritual i e multitud grandi internacional, na cantidad di miyones, pa nan sobrebiba durante e tribulacion grandi. (Revelacion 7:4, 9, 14) Su corrí mester sigi te cu e ta completa su victoria.

32. Kico a pasa cada bez cu habrimento dje promé cuater seyo?

³² Despues di habrimento dje promé cuater seyo a sali e mandamento di “Bin!” Cada bez, un cabai i su ginete a sali na carreda. Cuminzando cu seyo di cinco, nos no ta tende e mandamento ei mas. Pero cada ginete ta sigi corre ainda, i nan lo sigi na galope durante e conclusion dje sistema di cosnan aki. (Compara cu Mateo 28:20.) Jesús a revela cua otro suceso importante ora el a habri e otro tres seyo? Algun di tal suceso ta invisibel pa wowo humano. Otronan, aunque nan ta visibel, ta den futuro ainda. No obstante, nan cumplimento ta sigur. Láganos mira kico nan tá.

[Nota]

[Kuadro na página 92]

Victoria dje rey riba cabai

Desde 1930 i 1940, enemigo persistente a purba di pinta e ministerio di Testigo di Jehova como ilegal, criminal, of asta contra e gobierno. (Salmo 94:20) Na aña 1936 tabatin cuenta di 1.149 aresto na América so. Testigo di Jehova a defende hopi caso legal te ne Corte Supremo di Estados Unidos, i lo sigiente ta algun di nan victoria sobresaliente.

Dia 3 di Mei di 1943, e Corte Supremo den e caso di Murdock v. Pennsylvania a decidi cu Testigo di Jehova no tabatin mester di permit pa nan laga literatura den man di hende pa placa. Ne mesun dia, e decision den e caso di Martin v. City of Struthers a declara cu no ta ilegal pa bati porta pa duna invitacion of parti otro pamfleta.

Dia 14 di Juni di 1943, e Corte Supremo a decidi den e caso di Taylor v. Mississippi cu Testigo di Jehova no ta estimula deslealtad ne gobierno cu nan predicacion. Ne mesun dia, den e caso di West Virginia State Board of Education v. Barnette, e Corte a declara cu e directiva dje scol no tabatin derecho di expulsa for di scol yiu di Testigo di Jehova cu a nenga di saluda e bandera. Su mañan mes, e Corte Supremo completo di Australia a kita e prohibicion di Testigo di Jehova, declarando cu esei tabata “arbitrario, caprichoso i opresivo.”

[Kuadro na página 94]

“Permití di kita paz for di tera”

Unda tecnología ta híbanos? E periódico The Globe and Mail di Toronto, Canadá, a informa dia 22 di Januari, 1987, lo sigiente di un discurso di Ivan L. Head, presidente di Centro Internacional di Investigacion pa Desaroyo:

“Un calculacion confiabel tá cu uno di cada cuater científico i tecnólogo di mundo cu ta ocupá den investigacion i desaroyo ta traha riba arma. . . . Na razón di loke a pasa na 1986, e gasto ta mas cu $1,5 miyón pa minut. . . . Nos tur ta disfruta di mayor siguridad como resultado di énfasis duná na tal clase di tecnología? E cantidad di bomba nuclear cu América i Rusia tin ta contene e forza explosivo di tur arma di tur nacion usá den e Segundo Gera Mundial—bez 6.000. Seis mil Segundo Gera Mundial. Desde 1945, tabatin menos cu siete siman ora mundo tabata liber di actividad militar. Tabatin mas cu 150 gera internacional of civil, cu, segun calculacion, a mata 19,3 miyón hende, mayor parti di locual tabata e resultado di uso eficaz di tecnología nobo cu a presenta durante e era di Naciones Unidas.”

Te cu aña 2005, actividad militar a mata hopi mas cu 20 miyón hende.

[Kuadro na página 98 99]

Estructura dje buki di Revelacion

Ya cu nos a progresa asina leu den nos consideracion dje buki di Revelacion, nos ta cuminza mira mas claramente e estructura dje buki. Despues di su introduccion conmovedor (Revelacion 1:1-9), nos por mira cu Revelacion ta partí den 16 vision como lo sigiente:

VISION 1 (1:10–3:22): Bao di inspiracion, Juan a mira Jesús glorificá, locual a manda mensahe caloroso di conseho ne siete congregacion.

VISION 2 (4:1–5:14): Un bista magnífico dje trono celestial di Jehova Dios. El a duna e Lamchi un rol.

VISION 3 (6:1-17): Ora e Lamchi a habri e promé seis seyo dje rol, el a revela progresivamente un combinacion di vision di suceso cu mester pasa den e dia di Señor. E cuater ginete di Revelacion ta sali na galope, esclabo martirizá di Dios ta recibi mantel blancu, i detaye ta ser duná dje gran dia di rabia.

VISION 4 (7:1-17): Angel ta detene bientu di destruccion te cu e 144.000 di Israel spiritual ta wordu seyá. Un multitud grandi di tur nacion ta atribui salbacion na Dios i Cristo i ta ser recogí pa nan sobrebiba e tribulacion grandi.

VISION 5 (8:1–9:21): Cu e habrimento di seyo di siete, tin siete tocá di trompet, e promé seis di locual ta compone vision di cinco. E seis tocá di trompet ta anuncia expresion di huicio di Jehova contra humanidad. Trompet di cinco i di seis també ta introduci calamidad uno i dos.

VISION 6 (10:1–11:19): Un angel fuerte a duna Juan un rol chikito, el a midi e tempel, i nos ta tende experencia di dos testigo. Esei ta culmina cu tocamento di trompet di siete, cu ta anuncia e tercer calamidad pa enemigo di Dios—e Reino entrante di Jehova i di su Cristo.

VISION 7 (12:1-17): Esei ta detaya e nacimento dje Reino, e resultado di locual ta Miguel tirando e colebra, Satanás, abao ne tera.

VISION 8 (13:1-18): E bestia salbahe poderoso ta subi for di lamá, i e bestia cu dos cachu manera lamchi ta urgi humanidad pa adoré.

VISION 9 (14:1-20): Un magnífico bista di antemano dje 144.000 riba e Ceru di Sion. Hende ta tende mensahe di angel rond di mundo, tin e cosecha dje mata di wijndruif, i e baki di pers biña dje rabia di Dios ta ser pisá.

VISION 10 (15:1–16:21): Tin un otro bista dje corte celestial, despues ta sigi bashamento di siete conchi dje rabia di Jehova riba tera. E seccion aki, també, ta termina cu detaye profético dje fin dje sistema di Satanás.

VISION 11 (17:1-18): E gran muher, Babilonia e Grandi, ta monta e bestia salbahe color di scarlata, cu ta baha brevemente den abismo pero ta sali atrobé i ta destrui e muher.

VISION 12 (18:1–19:10): E caimento i destruccion final di Babilonia e Grandi ta ser anunciá. Despues di su ehecucion, algun ta yora, otronan ta alaba Jehova; casamento dje Lamchi ta ser anunciá.

VISION 13 (19:11-21): Jesús ta guia ehército di cielo pa ehecuta e huicio di rabia di Dios contra e sistema di Satanás, su ehército, i su apoyador; páhara comedor di carni ta come nan cadáver.

VISION 14 (20:1-10): E tiramento di Satanás e Diabel den abismo, e Reino di mil aña di Cristo i di rey socio, e prueba final di humanidad, i e destruccion di Satanás i su demoñonan.

VISION 15 (20:11–21:8): E resureccion general i e gran Dia di Huicio; un cielo nobo i tera nobo ta presenta, cu bendicion eterno pa humanidad husto.

VISION 16 (21:9–22:5): Revelacion ta culmina cu un glorioso vision di Jerusalem Nobo, esposa dje Lamchi. E percuracion di Dios di curacion i bida pa humanidad ta sali for dje stad.

Revelacion ta conclui cu palabra caloroso di saludo i conseho di Jehova, di Jesús, dje angel, i di Juan mes. E invitacion duná na tur ta di “Bin!”—Revelacion 22:6-21.

Capítulo 17

Recompensa pa ‘alma matá’

 1. Nos ta biba den cua periodo di tempo awor, i ki evidencia tin di esei?

E REINO di Dios ta reina! E Ginete dje cabai blancu ta cerca di completa su victoria! E cabai corá, e cabai pretu, i e cabai pálido ta pasando na galope den tur e tera! Innengablemente, e propio profecía di Jesús mes tocante su presencia real ta ser cumplí. (Mateo, capítulo 24, 25; Marco, capítulo 13; Lucas, capítulo 21) Sí, nos ta biba den e último dianan dje sistema di cosnan aki. (2 Timoteo 3:1-5) Ya cu ta asina, láganos presta sumo atencion mientras cu e Lamchi, Jesucristo, ta habri seyo di cinco dje rol. Nos ta bai participa den cua otro revelacion awor?

 2. (a) Kico Juan a mira ora seyo di cinco tabata habrí? (b) Pakico no mester ta un sorpresa pa nos pa leza di un altar simbólico di sacrificio den cielo?

² Juan a duna detaye di un bista conmovedor: “I ora el a habri e seyo di cinco, mi a mira bao di altar e alma di esnan matá pa causa dje palabra di Dios i pa causa dje trabao di duna testimonio cu nan tabatin.” (Revelacion 6:9) Kico esei tá? Un altar di sacrificio ayá den cielo? Sí! Esei te promé bez cu Juan a menciona un altar. Pero, el a duna detaye caba di Jehova riba su trono, di querubín rond di dje, dje lamá di glas, di lampi, i dje 24 anciano cu a hiba censia—tur locual ta parce rasgo dje tabernáculo terrenal, e santuario di Jehova den Israel. (Exodo 25:17, 18; 40:24-27, 30-32; 1 Crónica 24:4) Mester ta un sorpresa pa nos, anto, pa haya un simbólico altar di sacrificio den cielo també?—Exodo 40:29.

 3. (a) Den e tabernáculo hudío di antigua, con alma tabata bashá “ne base dje altar”? (b) Pakico Juan a mira alma di testigonan matá bao dje altar simbólico den cielo?

³ Bao dje altar tabatin “alma di esnan matá pa causa dje palabra di Dios i pa causa dje trabao di duna testimonio cu nan tabatin.” Kico esei kier men? Esei no por ta alma sin curpa—manera griego pagano a kere. (Génesis 2:7; Ezekiel 18:4) Mas bien, Juan tabata sa cu sanger a simboliza alma, of bida, i ora sacerdote dje tabernáculo hudío di antigua a mata bestia sacrificial, nan a sprenkel e sanger “tur rond riba e altar” of a bashé “ne base dje altar di ofrenda kimá.” (Levítico 3:2, 8, 13; 4:7; 17:6, 11, 12) Pues, alma di bestia tabatin identificacion estrecha cu e altar di sacrificio. Pero pakico Juan a mira alma, of sanger, di tal sirbidor di Dios bao dje altar simbólico den cielo? Pasobra nan morto tabata considerá como sacrificial.

 4. Di ki manera e morto di cristian ungí cu e spiritu ta sacrificial?

⁴ Realmente, tur esnan cu ta ser engendrá como yiu spiritual di Dios ta entrega nan bida den un morto sacrificial. Pa motibo dje papel cu nan ta hunga den e Reino celestial di Jehova, e boluntad di Dios ta pa nan renuncia i sacrifica tur speranza di bida eterna riba tera. Dje manera ei, nan ta someténan na un morto sacrificial apoyando e soberanía di Jehova Dios. (Filipense 3:8-11; compara cu 2:17.) Esei tabata cierto den un sentido mashá real en cuanto esnan cu Juan a mira bao dje altar. Nan tabata esnan ungí cu den nan dia tabata martirizá pa nan ministerio celoso apoyando e Palabra i soberanía di Jehova. Nan “alma [tabata] matá pa causa dje palabra di Dios i pa causa dje trabao di duna testimonio [mar·ty·rí·an] cu nan tabatin.”

 5. Di ki manera alma di hende fiel, aunque nan ta morto, ta sclama pa vinganza?

⁵ Hungamento dje drama a sigi: “I nan a sclama cu boz fuerte, puntrando: ‘Te na ki tempo, Señor Soberano santo i berdadero, lo bo abstenébo di huzga i vinga nos sanger riba esnan cu ta biba riba tera?’” (Revelacion 6:10) Con nan alma, of sanger, por sclama pa vinganza, ya cu e Bijbel ta mustra cu hende morto ta inconsiente? (Eclesiastés 9:5) Wel, e sanger di husto Abel no a sclama despues cu Caín a maté? Anto Jehova a puntra Caín: “Kico bo a haci? Scucha! E sanger di bo ruman ta sclama na mi for di tera.” (Génesis 4:10, 11; Hebreo 12:24) E sanger mes di Abel no por a sclama. Mas bien, Abel a muri como un víctima inocente, i husticia a sclama pa su asesino ser castigá. Di igual manera, martir cristian tabata inocente, i husticia ta exigi vinganza. (Lucas 18:7, 8) Nan sclamacion pa vinganza ta fuerte pasobra hopi miles di nan a muri asina.—Compara cu Jeremías 15:15, 16.

 6. Cua dramamento di sanger inocente tabata vingá na 607 PEC?

⁶ També, e situacion por ta compará cu esun den Hudá apóstata ora rey Manasés a subi trono na aña 716 PEC. El a drama hopi sanger inocente, probablemente a ‘zag na dos’ profeta Isaías. (Hebreo 11:37; 2 Rey 21:16) Aunque Manasés a arrepentié despues i a reforma, e culpa pa dramamento di sanger a permanece. Na aña 607 PEC, ora babilónico a desola e reino di Hudá, “tabata solamente bao di ordu di Jehova cu esei a tuma lugar contra Hudá, pa kité for di su bista pe picánan di Manasés, conforme cu tur loke el a haci; i també pe sanger inocente cu el a drama, di manera cu el a yena Jerusalem cu sanger inocente, i Jehova no a consenti pa duna pordón.”—2 Rey 24:3, 4.

 7. Ken principalmente tin e culpa pa dramamento di “sanger dje santonan”?

⁷ Mescos cu den tempo bíblico, awe també hopi hende cu a mata testigo di Dios por ta morto pa hopi tempo. Pero e organizacion cu a causa nan martirio ta mashá na bida ainda i tin hopi culpa di sanger. Esei ta e organizacion terrenal di Satanás, su simía terrenal. Un parti prominente di dje ta Babilonia e Grandi, e imperio mundial di religion falso.a E ta ser pintá como “burachi cu e sanger dje santonan i cu e sanger dje testigonan di Jesús.” Sí, “den dje tabata hayá e sanger di profeta i di santonan i di tur esnan cu a ser matá riba tera.” (Revelacion 17:5, 6; 18:24; Efesio 4:11; 1 Corintio 12:28) Ki un carga di culpa pa dramamento di sanger! Tan tempo cu Babilonia e Grandi ta existi, e sanger di víctima di dje ta sclama pa husticia.—Revelacion 19:1, 2.

 8. (a) Cua caso di martirio a tuma lugar durante e bida di Juan? (b) Cua persecucion emperador romano a instiga?

⁸ Juan mes a presenciá martirio den e promé siglo ora e Colebra cruel i su simía terrenal a haci gera contra e congregacion creciente di cristian ungí. Juan a mira e clabamento di nos Señor ne staca i a sobrebiba durante e martirio di Steban, di su mes ruman Santiago, i di Pedro, Pablo, i otro compañé íntimo di dje. (Juan 19:26, 27; 21:15, 18, 19; Echo 7:59, 60; 8:2; 12:2; 2 Timoteo 1:1; 4:6, 7) Na aña 64 EC, emperador romano Nerón a pone riba hende cristian e culpa di kimamento di Roma, afin di contraresta e rumor cu Nerón mes a kimé. Historiador Tácito a informa: “Hende [cristian] a muri na moda di mofa; algun tabata bistí cu cuero di bestia salbahe anto cachó a sker nan, algun tabata [clabá na staca],b algun tabata kimá como flambeo pa iluminacion djanochi.” Como resultado di otro ola di persecucion bao di emperador Domiciano (81-96 EC), Juan tabata desterrá riba isla di Patmos. Manera Jesús a bisa: “Si nan a persigími, nan lo persigi boso també.”—Juan 15:20; Mateo 10:22.

 9. (a) Cua obra maestro di engaño Satanás a produci den siglo cuater EC, i esei ta e parti principal di kico? (b) Con algun gobernante di cristiandad a trata Testigo di Jehova durante Gera Mundial I i II?

⁹ Den siglo cuater caba di EC, e colebra bieu, Satanás e Diabel, a produci su obra maestro di engaño, e religion apóstata di cristiandad—un sistema babilónico bao di disfraz di “cristianismo.” Esei ta e parti principal dje simía dje Colebra i a desaroya den un multitud di secta na conflicto cu otro. Mescos cu infiel Hudá di antigua, cristiandad tin un culpa serio di drama sanger, ya cu e tabata profundamente enbolbí den tur dos banda di Gera Mundial I i II. Algun gobernante político di cristiandad asta a usa e dos gera como excuus pa mata sirbidor ungí di Dios. Informando riba e persecucion di Hitler di Testigo di Jehova, un resumen dje buki di Friedrich Zipfel Kirchenkampf in Deutschland (E lucha di religion den Alemania) a bisa: “Un tercera parti di [Testigo di Jehova] tabata matá, sea pa ehecucion, otro acto violento, hamber, maleza of trabao di esclabo. E severidad dje esfuerzo pa dominánan tabata sin igual i tabata e resultado di fe sin compromiso cu no por a ser armonizá cu e ideología di socialismo nacional.” En berdad, nos por bisa di cristiandad, incluyendo su sacerdocio: “Den bo saya a ser hayá e marca di sanger di alma di pober hende inocente.”—Jeremías 2:34.c

10. Cua persecucion homber hoven dje multitud grandi a experimenta den hopi país?

¹⁰ Desde 1935 fiel hovenan dje multitud grandi a wanta e persecucion di mas severo den hopi país. (Revelacion 7:9) Asta ora Gera Mundial II tabata cerca su fin den Europa, den un pueblo so 14 Testigo hoven di Jehova tabata ehecutá pa horcamento. Ki crimen nan a comete? Nan a nenga di “siña di gera mas.” (Isaías 2:4) Mas recientemente, hovenan den Oriente i den Africa a ser matá cu golpi of fusilá debí ne mesun cuestion. Tal martir hoven, digno apoyador dje rumanan ungí di Jesús, siguramente lo haya un resureccion den e tera nobo primintí.—2 Pedro 3:13; compara cu Salmo 110:3; Mateo 25:34-40; Lucas 20:37, 38.

Un mantel blancu

11. Den ki sentido cristian ungí martirizá ta recibi un “mantel blancu”?

¹¹ Despues di a skirbi dje fe di wardador di integridad di tempo di antigua, apóstol Pablo a skirbi: “I, no obstante, tur eseinan, aunque nan fe a duna testimonio di nan, nan no a recibi cumplimento dje promesa, pasobra Dios a mira di antemano algo mihor pa nos, pa nan no ser hací perfecto fuera di nos.” (Hebreo 11:39, 40) Kico ta e “algo mihor” cu Pablo i otro cristian ungí a anticipa? Juan a miré den e vision aki: “I un mantel blancu tabata duná na cada un di nan; i nan a wordu bisá pa sosega poco tempo mas, te cu e cantidad tabata completá també di esclabonan compañé i nan rumanan cu tabata ne punto di ser matá mescos cu nan tabata matá.” (Revelacion 6:11) E “mantel blancu” duná na nan tin cu ber cu nan resureccion pa ser persona spiritual inmortal. Nan no ta drumi mas como alma matá bao di altar, sino ta ser resusitá pa ser parti dje grupo di 24 anciano cu ta adora dilanti dje trono celestial di Dios. Nan mes ta ser duná trono ei, mustrando cu nan a cuminza disfruta di privilegio real. I nan ta “bistí den bistí exterior blancu,” cu ta nifica cu nan a ser declará husto, i ta digno di ocupa un lugar di onor dilanti Jehova den su corte celestial. Esei també ta den cumplimento dje promesa di Jesús na fiel cristian ungí den e congregacion di Sardis: “Ken cu ta vence lo ser bistí asina cu bistí exterior blancu.”—Revelacion 3:5; 4:4; 1 Pedro 1:4.

12. Di ki manera e ungínan resusitá ta “sosega poco tempo mas,” i te na ki tempo?

¹² Tur evidencia ta indica cu tal resureccion celestial a cuminza na 1918, despues dje entronizacion di Jesús den cielo na 1914 i despues cu el a sali riba cabai pa cuminza su victoria real, haciendo cielo limpi di Satanás i su demoñonan. Sin embargo, e ungínan resusitá a wordu bisá cu nan tabatin cu ‘sosega poco tempo mas, te cu e cantidad tabata completá di esclabonan compañé.’ E grupo cu Juan a simboliza riba tera ainda tin cu duna prueba di nan integridad bao di prueba i persecucion, i algun di eseinan por ta matá ainda. Pero, finalmente, tur sanger husto cu Babilonia e Grandi i su freinan político a drama lo ser vingá. Mientras tanto, esnan resusitá sin duda ta ocupá cu trabao celestial. Nan ta sosega, no door di keda trankilu den inactividad placentero, sino door cu nan ta spera cu pacenshi e dia di vinganza di Jehova. (Isaías 34:8; Romano 12:19) Nan sosiego lo termina ora nan ta presenciá e destruccion di religion falso i, como esnan “yamá i escogí i fiel,” nan ta compaña nos Señor Jesucristo pa ehecuta huicio riba tur otro parti dje mal simía di Satanás aki riba tera.—Revelacion 2:26, 27; 17:14; Romano 16:20.

‘E mortonan ta lanta promé’

13, 14. (a) Segun apóstol Pablo, na ki tempo e resureccion celestial ta cuminza, i ken ta wordu resusitá? (b) Na ki tempo e ungínan cu ta sobrebiba te ne dia di Señor ta ser resusitá pa bai cielo?

¹³ E perspicacia cu habrimento di seyo di cinco ta ofrece ta cuadra completamente cu otro texto bíblico cu tin cu ber cu e resureccion celestial. Por ehempel, apóstol Pablo a skirbi: “Pasobra esaki ta loke nos ta bisa boso pa medio dje palabra di Jehova, cu nos, esnan bibiente, cu ta sobrebiba te na presencia di Señor di ningun manera lo bai dilanti esnan cu a bai drumi den morto; pasobra Señor mes lo baha foi cielo cu un yamada exigente, cu boz di arcangel i cu e trompet di Dios, i esnan cu ta morto den union cu Cristo lo lanta promé. Despues, nos, esnan bibiente, cu ta sobrebiba lo ser hibá den nubia hunto cu nan pa contra cu Señor na laira; i asina nos semper lo ta cu Señor.”—1 Tesalonicense 4:15-17.

¹⁴ Ki un relato conmovedor e texto ta conta! E rumanan ungí di Jesús cu ta sobrebiba te ne presencia di Jesús, esta, esnan cu ta na bida ainda riba tera durante su presencia, no ta bai cielo promé cu esnan cu a muri caba. Tal hende cu a muri den union cu Cristo, ta lanta promé. Jesús ta baha, esta, ta dirigi su atencion na nan, i ta resusitánan na un bida spiritual, dunando nan “un mantel blancu.” Despues, esnan cu ta na bida ainda como hende ta termina nan carreda terrenal, hopi di locual lo muri violentamente den man di opositor. Sin embargo, nan no ta drumi den morto manera esnan promé. Mas bien, ora nan ta muri, nan ta ser cambiá instantáneamente—“den un cerá di wowo”—i ta ser hibá na cielo pa ser cu Jesús i otro miembro dje cuerpo di Cristo. (1 Corintio 15:50-52; compara cu Revelacion 14:13.) Pues, e resureccion di cristian ungí ta cuminza poco tempo despues cu e cuater ginete di Revelacion ta cuminza nan corrí.

15. (a) Habrimento di seyo di cinco a trece cua bon noticia? (b) Con e corrí dje Vencedor ariba e cabai blancu ta culmina?

¹⁵ E habrimento di seyo di cinco dje rol ta duna bon noticia tocante wardador ungí di integridad cu a vence, cu a keda fiel te na morto. Pero e habrimento no ta trece bon noticia pa Satanás i su simía. E corrí dje Vencedor riba e cabai blancu ta sigi irresistiblemente i ta culmina ne tempo di regla cuenta pe mundo cu ta “bao di poder dje malbado.” (1 Juan 5:19) Esei ta keda bisto ora e Lamchi ta habri seyo di seis.

[Nota]

[Kuadro na página 102]

‘Alma matá’

E Cyclopedia di McClintock i Strong ta cita e sigiente palabra di John Jortin, un protestante inglés di siglo 18, cu a nace di mayornan hugonote francés: “Unda persecucion ta cuminza, cristianismo ta termina . . . Tabata despues cu cristianismo a ser establecí como e religion dje imperio [romano], i despues cu riqueza i onor tabata duná na pastor, cu e maldad monstruoso di persecucion a alcanza forza gigantesco, i a tira su influencia ruinoso riba e religion dje evangelio.”

[Plachi na página 103]

“I un mantel blancu tabata duná na cada un di nan”

Capítulo 18

Temblor den e dia di Señor

1, 2. (a) Splica con e tá pa experimenta un temblor severo. (b) Juan a duna detaye di kico ora seyo di seis tabata habrí?

BO A yega di experimenta un temblor severo? Esei no ta un experencia agradabel. Un temblor grandi por cuminza cu un sagudimento cu por haci hende mareá, compañá cu sonido di donder. E temblamento por bai i bin i empeora mientras cu bo ta corre pa sconde—kizás bao di mesa. Of e por yega di ripiente, dal un golpi tremendo, haciendo co’i kibra i pronkstuk cai, of asta e cas mes. E daño por ta catastrófico, cu mas golpi biniendo despues causando mas daño i aumentando e miseria.

² Cu esei presente, considera loke Juan a detaya ora seyo di seis tabata habrí: “I mi a wak ora el a habri seyo di seis, i un temblor grandi a sosode.” (Revelacion 6:12a) Esei mester a sosode durante e mesun espacio di tempo cu e habrimento dje otro seyonan. Exactamente na ki tempo durante e dia di Señor e temblor a yega, i esei ta ki clase di temblor?—Revelacion 1:10.

 3. (a) Jesús a profetiza di cua sosodimento den su profecía tocante e siñal di su presencia? (b) Ki relacion temblor mes tin cu temblor simbólico grandi di Revelacion 6:12?

³ E Bijbel ta menciona temblor literal i simbólico varios bez. Den su gran profecía tocante e siñal di su presencia cu poder di Reino, Jesús a profetizá di “temblor den un lugar tras di otro.” Eseinan ta parti dje “principio di dolor di afliccion.” Desde 1914, cu e poblacion di mundo aumentando rápidamente na miles di miyones di hende, temblor literal a contribui na gran medida na afliccion di nos tempo. (Mateo 24:3, 7, 8) No obstante, aunque temblor ta cumpli cu profecía, nan ta desaster fisical natural. Nan ta yega promé cu e temblor grandi simbólico di Revelacion 6:12. Esei, en berdad, ta yega como un desolador final di un serie di temblor di antemano cu ta sagudi asta e fundeshi dje sistema di cosnan humano di Satanás riba tera.a

Temblor den e arreglo social humano

 4. (a) Desde ki tempo e pueblo di Jehova a anticipa pa suceso catastrófico cuminza na 1914? (b) E aña 1914 a marca e fin di cua periodo di tempo?

⁴ Desde rond di 1875, e pueblo di Jehova Dios tabata anticipa cu suceso catastrófico lo cuminza na 1914 i lo marca e fin di tempo gentil. Esei tabata e periodo di “siete tempo” (2.520 aña) cu a sigi desde destruccion dje reino di David den Jerusalem na aña 607 PEC te na entronizacion di Jesús den Jerusalem celestial na aña 1914 EC.—Daniel 4:24, 25; Lucas 21:24.b

 5. (a) C. T. Russell a haci cua anuncio dia 2 di October, 1914? (b) Cua trastorno político a sosode desde 1914?

⁵ P’sei, ora C. T. Russell a presenta pa adoracion matutina cu e famía di Betel den Brooklyn, New York, den maínta di 2 di October, 1914, el a haci e anuncio dramático: “E tempo gentil a termina; nan rey tabatin nan dia.” En berdad, e trastorno mundial cu a cuminza na 1914 tabata tanto grandi cu hopi reino cu a existi pa mashá tempo a desparce. E destruccion dje dominio di zar den Rusia den e revolucion bolshevik di 1917 a resulta den un confrontacion largo entre marxismo i capitalismo. Sagudimento resultando di cambio político ta sigi molestia e arreglo social humano mundialmente. Awe, hopi gobierno no ta sigi existi pa mas cu un of dos aña. E falta di stabilidad den e mundo político ta ser ilustrá den e caso di Italia, cu tabatin 47 gobierno nobo den 42 aña so despues di Gera Mundial II. Pero tal sagudimento di antemano ta solamente preliminario dje trastorno gobernamental culminante. Cu ki resultado? E Reino di Dios lo coge rienda como e único gobernacion dje tera.—Isaías 9:6, 7.

 6. (a) Ki detaye H. G. Wells a duna dje época nobo importante? (b) Kico un filósofo i un político a bisa tocante e época desde 1914?

⁶ Historiador, filósofo, i lider político a siñala na 1914 como e principio di un época nobo i importante. Diesiete aña despues di principio dje época, historiador H. G. Wells a comenta: “Profeta ta gusta profetiza cosnan agradabel. Pero nan tin deber di bisa loke nan ta mira. Nan ta mira un mundo cu soldad, hende patriótico, haragán, i aventurero financiero ainda ta domina firmemente; un mundo cu a entrega na sospecho i odio, perdiendo mashá lihé loke a resta di libertad privá, trompicando den direccion di conflicto serio entre distinto clase di hende, i preparando pa otro gera.” Na 1953 filósofo Bertrand Russell a skirbi: “Desde 1914, tur hende cu ta consiente di tendencia di mundo ta keda profundamente molestiá riba loke ta parce un marcha predestiná i predeterminá pa desaster cada bez mas grandi. . . . Nan ta mira e raza humano, manera e heroé di un tragedia griego, cu dios rabiá ta domina i cu no por scoge su mes destino.” Na 1980 e político Harold Macmillan, pensando riba e comienzo trankilu di siglo 20, a bisa: “Tur cos por a bira cada bez mas mihor. Esei tabata e mundo den locual mi a nace. . . . Di ripiente i inesperá, den un maínta na 1914, tur esei a yega su fin.”

7-9. (a) Cua trastorno a sagudi humanidad desde 1914? (b) E trastornonan di humanidad durante Jesús su presencia cu tempo lo a inclui ki situacion?

⁷ Gera Mundial II a trece otro ola di trastorno. I gera mas chikito hunto cu terrorismo internacional ta sigi sagudi mundo. E peliger spantoso di terrorista of nacionan cu ta usa arma di destruccion masal ta pone hopi hende puntra nan mes kico lo para di futuro.

⁸ Sin embargo, otro cos fuera di gera, ta sagudi e arreglo social di hende te na su fundeshi desde 1914. Un trastorno di mas perhudicial tabata producí ora e catástrofe económico a sosode na 29 di October di 1929 na América. Esei a resulta den e Gran Depresion, locual a afecta tur país capitalista. E depresion a culmina entre 1932 i 1934, pero ainda nos ta sinti efecto di dje. Desde 1929 hende a inventa proyecto temporario pa cura un mundo enfermo económicamente. Gobierno ta fia placa pa paga debe i gasto. E crisis di petróleo di 1973 i e crisis económico di 1987 a aumenta sagudimento dje imperio financiero. Entretanto, miyones di hende ta sigi cumpra cos principalmente na credit. Un cantidad di hende incontabel ta bira víctima di engaño financiero, piramid di placa, lotería, cartochi, i otro wega di suerte, hopi di locual tin e respaldo di gobierno cu tin deber di proteha e pueblo. Asta evangelista di television di cristiandad tin nan man sacá pa nan ranca nan multimiyones!—Compara cu Jeremías 5:26-31.

⁹ Den pasado, dificultad económico a habri camina pa Mussolini i Hitler coge rienda di poder. Babilonia e Grandi no a perde tempo pa frei cu nan, i Vaticano a firma conbenio cu Italia na 1929 i cu Alemania na 1933. (Revelacion 17:5) E tempo scur cu a sigi siguramente tabata un parti di cumplimento dje profecía di Jesús tocante su presencia, cu lo a inclui “ansia dje nacionan, sin conoce e salida . . . mientras cu hende ta desmaya di miedu i di anticipacion di loke ta bini riba e tera habitá.” (Lucas 21:7-9, 25-31)c Sí, temblor cu a cuminza sagudi e arreglo social di hende na 1914 a sigi, cu sagudimento fuerte despues.

Jehova ta causa sagudimento

10. (a) Pakico tin tanto temblamento den asunto humano? (b) Kico Jehova ta haci, i na preparacion pa kico?

¹⁰ Tal temblor den asunto humano ta mustra cu hende no por dirigi nan mes paso. (Jeremías 10:23) Además, e colebra bieu, Satanás, “cu ta gaña tur e tera habitá,” ta causa calamidad di último minut den su esfuerzo pa aparta tur humanidad for dje adoracion di Jehova Dios. Tecnología moderno a haci mundo bira mas chikito pa bira un solo comunidad, unda odio nacionalista i racial ta sagudi e arreglo social humano te na su fundeshi, i loke ta yamá Naciones Unidas no por haya un curacion efectivo. Manera nunca na antes, hende ta domina hende pa nan daño. (Revelacion 12:9, 12; Eclesiastés 8:9) No obstante, Señor Soberano Jehova, Creador di cielo i tera, a haci su mes clase di sagudimento durante e último 90 aña, na preparacion pa resolve problema di mundo una bez i pa semper. Di ki manera?

11. (a) Ageo 2:6, 7 ta duna detaye di cua sagudimento? (b) Con e profecía di Ageo ta wordu cumplí?

¹¹ Den Ageo 2:6, 7 nos ta leza: “Pasobra esaki ta loke Jehova di ehército ta bisa, ‘Un biaha ainda—ta pa poco tempo—i mi ta bai sagudi cielo i tera i lamá i suelo secu. I lo mi sagudi tur nacion, i e cosnan deseabel di tur nacion mester drenta; i lo mi yena e cas aki cu gloria,’ Jehova di ehército a bisa.” Desde aña 1919 specialmente, Jehova a haci su testigonan proclama su huicio den tur elemento dje arreglo social di humanidad riba tera. E advertencia mundial a notificá e sistema mundial di Satanás.d Mientras cu e advertencia ta intensifica, hende temeroso di Dios, esta, e “cosnan deseabel,” tabata conmoví pa separánan for dje nacionan. Esei no kier men cu e sagudimento dje organizacion di Satanás a sácanan afó. Pero ora nan ta comprende e situacion, nan ta tuma nan mes decision pa participa cu e grupo di hende ungí cu Juan a simboliza pa yena e cas di adoracion di Jehova Dios cu gloria. Con esei ta wordu lográ? Cu e trabao celoso di predica e bon nobo dje Reino establecí di Dios. (Mateo 24:14) E Reino, componí di Jesús i sigidor ungí di dje, lo permanece eternamente pe gloria di Jehova como “un reino cu nunca por ta sagudí.”—Hebreo 12:26-29.

12. Si bo a cuminza responde ne predicacion profetizá den Mateo 24:14, kico bo mester haci promé cu e temblor grandi di Revelacion 6:12 ta yega?

¹² Bo ta un hende cu a cuminza reacciona ne predicacion? Tal bez bo ta un dje miyones di hendenan cu den aña reciente a asisti na celebracion di Conmemoracion dje morto di Jesús? Si ta asina, anto sigi haci progreso den bo estudio di berdad bíblico. (2 Timoteo 2:15; 3:16, 17) Bandona completamente e moda di biba corrupto dje arreglo social di mundo condená di Satanás! Drenta directamente den e sociedad cristian di mundo nobo i participa cabalmente den su actividad promé cu e “temblor” catastrófico final ta kibra e mundo henter di Satanás na pida pida. Pero, cua temblor grandi esei tá? Láganos mira awor.

E temblor grandi!

13. Di ki manera e temblor grandi ta un experencia humano totalmente nobo?

¹³ Sí, e último dianan crítico aki ta un tempo di temblor—literal i símbolico. (2 Timoteo 3:1) Pero ningun di tal temblor ta e sagudimento grandi final cu Juan a mira den e habrimento di seyo di seis. E tempo pa temblor preliminario a termina. Awor ta yega e temblor grandi cu ta totalmente nobo pa experencia humano. Esei ta un temblor asina grandi cu trastorno i sagudimento cu e ta causa no por ta midí riba e scala di Richter ni riba ningun otro wijzer humano. Esei no ta simplemente un golpi local sino un sagudimento cataclísmico cu ta desola henter e “tera,” esta, tur e arreglo social humano degradá.

14. (a) Cua profecía ta profetiza di un temblor grandi i di su consecuencia? (b) E profecía di Joël i di Revelacion 6:12, 13 mester referi na kico?

¹⁴ Otro profeta di Jehova Dios a profetiza di tal temblor i su consecuencia catastrófico. Por ehempel, rond di aña 820 PEC, Joël a menciona “e binimento dje dia di Jehova, grandi i inspirador di temor,” bisando cu e ora ei “solo mes lo bira scur, i luna lo bira sanger.” Despues, el a agrega e sigiente palabra: “Multitud, multitud ta riba e sabana abao di decision, pasobra e dia di Jehova ta cerca den e sabana abao di decision. Solo i luna mes siguramente lo bira scur, i strea mes realmente lo retira nan splendor. I Jehova mes lo brama for di Sion, i lo e saca su boz for di Jerusalem. I cielo i tera siguramente lo sagudi; pero Jehova lo ser un refugio pa su pueblo, i un fortaleza pe yiunan di Israel.” (Joël 2:31; 3:14-16) Tal sagudimento por aplica solamente ne ehecucion di huicio di Jehova durante e tribulacion grandi. (Mateo 24:21) Pues, e relato paralelo den Revelacion 6:12, 13 lógicamente lo tin e mesun aplicacion.—Mira també Jeremías 10:10; Sofonías 1:14, 15.

15. Profeta Habacuc a profetiza di cua sagudimento fuerte?

¹⁵ Mas cu 200 aña despues di Joël, profeta Habacuc a bisa den oracion na su Dios: “Ai, Jehova, mi a tende e informe tocante bo. Mi a haya miedu, O Jehova, di bo actividad. Meimei dje añanan, O hacié yega di biba! Meimei dje añanan, duné di conoce. Durante e trublamento, corda pa mustra misericordia.” Cua “trublamento” esei por tá? Habacuc a sigi pa duna detaye gráfico dje tribulacion grandi, bisando di Jehova: “El a para ketu pe sagudi e tera. El a wak, anto a haci e nacionan salta. . . . Cu denuncio bo a bai marchando através dje tera. Den rabia bo a bai bati e nacionan. Sin embargo, en cuanto ami, lo mi hubila den Jehova mes; lo mi ser gozoso den e Dios di mi salbacion.” (Habacuc 3:1, 2, 6, 12, 18) Ki un sagudimento fuerte Jehova lo causa den tur e tera ora e ta bati e nacionan!

16. (a) Profeta Ezekiel a profetiza di kico pe tempo ora Satanás ta haci su atake final riba e pueblo di Dios? (b) Kico ta e resultado dje temblor grandi di Revelacion 6:12?

¹⁶ Ezekiel també a profetiza cu ora Gog di Magog (Satanás rebahá) ta haci su atake final riba e pueblo di Dios, Jehova lo haci un “temblamento grandi” sosode riba e “suelo di Israel.” (Ezekiel 38:18, 19) Aunque esei por inclui temblor mes, nos tin cu corda cu Revelacion ta ser presentá den siñal. E profecía ei i otro profecía mencioná ta sumamente simbólico. P’sei, e habrimento di seyo di seis ta parce di revela e culminacion di tur sagudimento dje sistema di cosnan terrenal—e temblor grandi den locual tur hende cu ta opone e soberanía di Jehova Dios ta ser destruí.

Un tempo di scuridad

17. Con e temblor grandi ta afecta e solo, luna, i strea?

¹⁷ Manera Juan a sigi mustra, e temblor grandi ta wordu compañá pa suceso spantoso cu ta enbolbe asta cielo. El a bisa: “I solo a bira tanto pretu como paña di sacu di lana, i henter e luna a bira manera sanger, i strea di cielo a cai riba tera, manera ora bientu fuerte ta sagudi mata di figu pa su figu berde cai.” (Revelacion 6:12b, 13) Ki un cos straño sorprendiente! Bo por imaginábo e scuridad spantoso cu lo resulta si e profecía tabata cumplí literalmente? Lo no tin claridad di solo caloroso i beneficioso den dia! Lo no tin claridad amistoso di luna di plata den anochi! I e diez di miles di strea lo no blink den scur di cielo djanochi. Mas bien, lo tin scuridad friu sin fin.—Compara cu Mateo 24:29.

18. Di ki manera ‘cielo a bira scur’ pa Jerusalem na aña 607 PEC?

¹⁸ Den un sentido spiritual, tal scuridad tabata profetizá pa Israel di antigua. Jeremías a adverti: “Henter e tera lo bira un desierto desolá, i mi no tin cu hiba a cabo un berdadero exterminacion? P’sei mes e tera lo yora, i cielo ariba siguramente lo bira scur.” (Jeremías 4:27, 28) Na aña 607 PEC ora e profecía a wordu cumplí, cosnan tabata scur en berdad pe pueblo di Jehova. Jerusalem, nan stad capital, a cai bao di babilónico. Nan tempel tabata destruí, i nan tera tabata bandoná. Pa nan, no tabatin claridad consolador di cielo. Mas bien, tabata manera Jeremías a yora na Jehova: “Bo a mata; bo no a mustra compasion. Bo a cera e camina pa bo mes cu nubia diki, pa oracion no por pasa door di dje.” (Lamentacion 3:43, 44) Pa Jerusalem, tal scuridad celestial a nifica morto i destruccion.

19. (a) Con Isaías, e profeta di Dios, a detaya e scuridad den cielo en cuanto Babilonia di antigua? (b) Na ki tempo i di ki manera e profecía di Isaías tabata cumplí?

¹⁹ Mas tardi, un scuridad similar den cielo a nifica desaster pa Babilonia di antigua. E profeta di Dios tabata inspirá pa skirbi di esei: “Mira! e dia di Jehova mes ta bini, cruel tanto cu furor como cu rabia ardiente, pa haci e tera un obheto di asombro, i pa extermina pecador dje tera for di dje. Pasobra strea mes di cielo i nan constelacion di Kesil lo no luza cu nan luz; e solo lo bira scur ora e sali, i e luna mes lo no haci su luz briya. I siguramente lo mi dal e tera productivo directamente cu su mes maldad, i e malbadonan mes cu nan propio error.” (Isaías 13:9-11) E profecía tabata cumplí na 539 PEC ora Babilonia a cai bao di medo i persiano. Esei a wel pinta e scuridad, e desesperacion, e falta di cualkier luz consolador pa Babilonia ora el a cai pa semper for di su puesto como e poder mundial principal.

20. Cua resultado spantoso ta spera e sistema di cosnan aki ora e temblor grandi ta dalé?

²⁰ Di igual manera, ora e temblor grandi ta yega, tur e sistema mundial lo ser hogá den e desesperacion di scuridad total. Luz briyante i resplandiente dje sistema terrenal di Satanás no por manda rayo di speranza. Ya caba awe, lider político di mundo, specialmente di cristiandad ta famoso pa nan corrupcion, mentira, i moda di biba inmoral. (Isaías 28:14-19) Hende no por confiánan mas. Nan luz swak lo paga completamente ora Jehova ta ehecuta huicio. Nan influencia semehante di luna riba asunto di mundo lo ser denunciá como manchá cu sanger, i fatal. Nan superstrea mundano lo paga manera meteorita cu ta cai i nan lo plama manera figu berde den un tempestad di bientu fuerte. E planeta henter lo tembla bao dje “tribulacion grandi tal como no a sosode desde principio di mundo te awor, no, ni lo no sosode atrobé.” (Mateo 24:21) Ki un prospecto horribel!

“Cielo” ta despidi

21. Den su vision, kico Juan a mira tocante “cielo” i “tur montaña i tur isla”?

²¹ E vision di Juan a sigi: “I cielo a despidi manera un rol cu ta ser lorá, i tur montaña i tur isla a wordu kitá for di nan lugar.” (Revelacion 6:14) Claramente, esei no ta cielo literal ni montaña literal ni isla. Pero, kico nan ta simboliza?

22. Den Edom, cua clase di “cielo” tabata “lorá, mescos cu rol di buki”?

²² En cuanto “cielo,” un profecía similar, mencionando e rabia di Jehova contra tur nacion, ta yúdanos comprende: “I tur esnan di ehército di cielo tin cu putri i caba. I cielo mester ta lorá, mescos cu rol di buki.” (Isaías 34:4) Edom tabatin cu sufri specialmente. Di ki manera? Babilónico a invadié pronto despues di destruccion di Jerusalem na aña 607 PEC. Ne tempo ei nada a wordu skirbí tocante suceso sobresaliente den cielo mes. Pero sí, tabatin suceso catastrófico den “cielo” di Edom.e Su autoridad gobernamental humano tabata rebahá for di nan puesto halto semehante di cielo. (Isaías 34:5) Nan tabata “lorá” i halá un banda, den un sentido, manera un rol bieu cu ya no a sirbi pa nada pa ningun hende.

23. Kico ta “cielo” cu lo ‘despidi manera rol,’ i con e palabra di Pedro ta confirma tal comprendimento?

²³ Asina, “cielo” cu tin cu ‘despidi manera rol’ ta simboliza gobierno anti-Dios cu ta domina e tera. Nan lo ser kitá pa semper bao dje victorioso Ginete dje cabai blancu. (Revelacion 19:11-16, 19-21) Apóstol Pedro a confirma esei ora el a anticipa sosodimento cu a presenta na habrimento di seyo di seis: “Cielo i tera djawor ta ser wardá pa candela i reservá pe dia di huicio i di destruccion di hende malbado.” (2 Pedro 3:7) Pero, kico dje expresion “tur montaña i tur isla tabata kitá for di nan lugar”?

24. (a) Profecía bíblico ta bisa cu na ki tempo montaña i isla lo wordu sagudí of perde nan stabilidad? (b) Con ‘montaña a wordu sagudí’ ora Nínive a cai?

²⁴ Den profecía bíblica, e ta bisa cu montaña i isla ta wordu sagudí of di otro manera ta perde stabilidad den tempo di trastorno político grandi. Por ehempel, ora profeta Nahum a profetiza dje huicio di Jehova contra Nínive, el a skirbi: “Montaña mes a sagudi pa su via, i ceru mes a dirti. I lo tin un lantamento violento dje tera debí na su cara.” (Nahum 1:5) No tin cuenta di kibramento di montaña mes ora Nínive realmente a cai na aña 632 PEC. Pero un poder mundial cu a parce tanto fuerte como montaña a cai di ripiente.—Compara cu Jeremías 4:24.

25. Né binidero fin dje sistema di cosnan aki, con “tur montaña i tur isla” lo ser kitá for di nan lugar?

²⁵ P’sei, “tur montaña i tur isla” cu ta ser mencioná ne habrimento di seyo di seis lógicamente ta gobierno político i organizacion dependiente di nan dje mundo aki cu a parce tanto firme den bista di hopi hende. Nan lo ser sagudí i kitá for di nan lugar, confundiendo i spantando hende cu na antes a confia den nan. Manera e profecía ta sigi bisa, lo no tin ningun duda cu e gran dia dje rabia di Jehova i di su Yiu a yega cu tur su vinganza causando e temblamento final cu ta elimina tur e organizacion di Satanás!

“Cai riba nos i scóndenos”

26. Con hende cu ta opone e soberanía di Dios lo actua den nan terror, i nan lo saca cua expresion di horror?

²⁶ E palabra di Juan ta sigi: “I rey di tera i hende di promé rango i comandante militar i hende ricu i fuerte i tur esclabo i tur hende liber a sconde den cueba i den barranca di montaña. I nan ta sigi bisa montaña i barranca: ‘Cai riba nos i scóndenos for di cara di Esun sintá ariba e trono i for di rabia dje Lamchi, pasobra e gran dia di nan rabia a yega, i ken por wanta?’”—Revelacion 6:15-17.

27. Israelita infiel di Samaria a saca cua sclamacion, i con e palabra a wordu cumplí?

²⁷ Ora Oseas tabata declara e huicio di Jehova contra Samaria, e capital dje reino di nort di Israel, el a bisa: “Lugar halto di Bet-aven, e picá di Israel, realmente lo ser exterminá. Mata di sumpiña i mal yerba lo nace riba nan altar. I hende realmente lo bisa montaña, ‘Tápanos!’ i na ceru, ‘Cai riba nos!’” (Oseas 10:8) Con e palabra ei a wordu cumplí? Wel, ora Samaria a cai bao di asirio cruel na aña 740 PEC, no tabatin lugar pa israelita hui. E palabra di Oseas a expresa e sintimento di impotencia, di terror completo i desamparo cu e pueblo vencí a sinti. Ni ceru mes ni instituto di Samaria semehante di montaña por a protehánan, aunque nan a parce tanto permanente den pasado.

28. (a) Jesús a duna hende muher di Jerusalem cua spiertamento? (b) Con e spiertamento di Jesús a wordu cumplí?

²⁸ Di igual manera, ora soldad romano tabata hiba Jesús pa maté, Jesús a dirigié na hende muher di Jerusalem i a bisa: “Dianan ta bini ora hende lo bisa, ‘Feliz ta hende muher stéril, i matriz cu no a duna luz i pecho cu no a cria!’ Anto nan lo cuminza bisa montaña, ‘Cai riba nos!’ i na ceru, ‘Tápanos!’” (Lucas 23:29, 30) E destruccion di Jerusalem bao di romano na aña 70 EC ta bon documentá, i ta keda bisto cu e palabra di Jesús tabatin un nificacion similar cu e palabra di Oseas. No tabatin lugar pa hudío sconde cu a keda den Hudea. Unda cu nan a purba di sconde den Jerusalem, of asta ora nan a hui ne forte di Masada na punta di montaña, nan no por a scapa for di expresion violento dje huicio di Jehova.

29. (a) Ora e dia di rabia di Jehova ta yega, hende cu a comprometénan pa apoya e sistema di cosnan aki lo ta den ki estado? (b) Cua profecía di Jesús lo ser cumplí ora Jehova ta expresa su rabia?

²⁹ Awor, e habrimento di seyo di seis ta mustra cu algo similar lo sosode durante e binidero dia di rabia di Jehova. Durante e sagudimento final dje sistema di cosnan di mundo, hende comprometí pa apoyé lo busca desesperadamente un lugar pa sconde, pero nan no por haya ningun. Religion falso, Babilonia e Grandi, a fáyanan por completo. Ni cueba den montaña mes ni montaña simbólico di organizacion político i comercial por dúnanan siguridad financiero ni ningun otro sorto di yudanza. Nada por protehánan for dje rabia di Jehova. Jesús a duna bon detaye di nan terror: “Ne tempo ei e siñal dje Yiu di hende lo parce den cielo, anto tur tribu dje tera lo bati nan mes den lamentacion, i nan lo mira e Yiu di hende bini riba nubia di cielo cu poder i gran gloria.”—Mateo 24:30.

30. (a) E pregunta: “Ken por wanta?”, ta indica kico? (b) Lo tin hende cu por para aprobá ne tempo dje huicio di Jehova?

³⁰ Sí, hende cu ta nenga di reconoce e autoridad dje victorioso Ginete riba e cabai blancu lo keda obligá di admiti nan error. Hende cu boluntariamente ta un parti dje simía dje colebra lo háyanan enfrentá cu destruccion ora e mundo di Satanás ta pasa forbij. (Génesis 3:15; 1 Juan 2:17) E situacion di mundo ne tempo ei lo ser asina malu cu hopi hende en efecto lo puntra: “Ken por wanta?” Ta parce cu nan lo pensa cu ningun hende mes por para aprobá dilanti Jehova Dios den e dia di su huicio. Pero, nan ta equibocánan, manera e buki di Revelacion ta sigi mustra.

[Nota]

[Kuadro/Plachi na página 105]

Anticipacion di 1914

“Tabata na 606 PEC, cu e reino di Dios a termina, e diadema tabata kitá, i henter mundo entregá na gentil. 2520 aña despues di 606 PEC, lo termina na 1914 EC.”f—The Three Worlds (Tres mundo), publicá na 1877, bladji 83.

“Evidencia bíblico ta claro i fuerte di cu ‘tempo di gentil’ ta un periodo di 2520 aña, desde aña 606 PEC te cu i incluyendo 1914 EC.”—Studies in the Scriptures (Estudio di Scritura), Volumen 2, skirbimento di C. T. Russell i publicá na 1889, bladji 79.

Charles Taze Russell i otro studiante di Bijbel a comprende hopi aña di antemano cu 1914 lo marca e fin di tempo gentil, of e tempo siñalá dje nacionan. (Lucas 21:24) Aunque den e tempo ayá nan no a comprende completamente loke esei a nifica, nan a keda convencí cu 1914 tabata un fecha importante den historia di mundo, i nan tabatin razón. Ripara e sigiente palabra di curant:

“E tremendo comienzo di ripiente di gera den Europa a cumpli cu un profecía extraordinario. Pa binticinco aña caba, den predicacion i den curant, ‘Studiante Internacional di Bijbel,’ of mihor conocí como ‘creyente den e mil aña,’ a proclama na mundo cu e Dia di Rabia profetizá den e Bijbel lo manece den 1914. ‘Prepara pa 1914!’ tabata e grito di cientos di evangelizador biahero.”—The World, un curant di New York, 30 di Augustus, 1914.

[Nota]

[Kuadro na página 106]

1914—un punto culminante

E buki Politikens Verdenshistorie—Historiens Magt og Mening (Historia Universal, di Politiken.—E poder i nificacion di historia), publicá na 1987 den Copenhague, a bisa lo sigiente na bladji 40:

“E fe di siglo 19 den progreso [di mundo] a recibi un golpi fatal na 1914. E aña promé cu e principio dje gera, Peter Munch, historiador i político danés, a skirbi cu optimismo: ‘Tur evidencia ta indica cu lo no tin gera entre nacion fuerte di Europa. “E peliger di gera” lo desparce també den e futuro, manera el a haci bez tras bez desde 1871.’

Na contraste cu esei, nos ta leza loke el a skirbi despues: ‘E comienzo di gera na 1914 ta e culminacion grandi di historia di humanidad. For di un época briyante di progreso, unda hende por a haci nan negoshi den siguridad razonabel, nos a drenta un época di desaster, horror, i odio, cu insiguridad na tur parti. Ningun hende por a bisa, ni ningun hende por bisa asta awe, si e scuridad cu a baha riba nos ne tempo ei por nifica destruccion permanente di tur e estructura cultural cu hende a crea pa nan mes através di miles di aña.’”

[Plachi na página 110]

‘Tur montaña lo ser kitá for di su lugar’

[Plachi na página 111]

Nan a sconde den cueba

Capítulo 19

Seyamento di Israel di Dios

Vision 4—Revelacion 7:1-17

Tema: E 144.000 ta wordu seyá, i un multitud grandi ta ser mirá pará dilanti dje trono di Jehova i dilanti dje Lamchi

Tempo di cumplimento: Desde entronizacion di Cristo Jesús na 1914 te cu durante su Reino di mil aña

 1. “Ken por wanta” durante e gran dia di rabia divino?

“KEN por wanta?” (Revelacion 6:17) Sí, ken en berdad? Ora e gran dia di rabia divino ta destrui e sistema di Satanás, gobernante i pueblo di mundo por wel haci e pregunta ei. Desde nan punto di bista, e cataclismo binidero por extermina tur bida humano. Pero, esei lo sosode? Felizmente, e profeta di Dios ta dúnanos e siguranza: “Tur hende cu ta inboca e nomber di Jehova lo scapa salbo.” (Joël 2:32) Apóstol Pedro i Pablo a confirma tal echo. (Echo 2:19-21; Romano 10:13) Sí, hende cu ta inboca e nomber di Jehova Dios lo ser sobrebibiente. Ken ta eseinan? Nos por mira den e cumplimento dje sigiente vision.

 2. Pakico ta notable cu lo tin sobrebibiente dje dia di huicio di Jehova?

² Ta realmente notable cu hende por sobrebiba e dia di huicio di Jehova, pasobra un otro profeta di Dios a detayé cu e sigiente palabra: “Mira! un tempestad di bientu di Jehova, furia mes, a sali, un tormenta barriendo padilanti. Lo e remoliná riba cabez di hende malbado. E rabia ardiente di Jehova lo no hala atrás te cu e ehecuta i cumpli cu tur idea di su curazón.” (Jeremías 30:23, 24) Ta urgente pa nos dal paso pa sobrebiba e tormenta!—Proverbio 2:22; Isaías 55:6, 7; Sofonías 2:2, 3.

E cuater bientu

 3. (a) Juan a mira angel rindi cua sirbishi special? (b) Kico e “cuater bientu” a simboliza?

³ Promé cu Jehova ta los su furia, angel celestial ta rindi un sirbishi special. Juan a mira esei awor den un vision: “Despues di esei mi a mira cuater angel pará riba e cuater skina dje tera, reteniendo e cuater bientu dje tera, pa ningun bientu supla riba e tera ni riba lamá ni riba ningun palu.” (Revelacion 7:1) Kico esei ta nifica pa nos djawe? E “cuater bientu” ta un símbolo gráfico dje huicio destructivo cu ta cla pa sali riba e arreglo social malbado di mundo, riba e “lamá” trublá di humanidad perverso, i riba gobernante halzá semehante di palu halto cu ta recibi apoyo i sostén for di pueblo di mundo.—Isaías 57:20; Salmo 37:35, 36.

 4. (a) Kico e cuater angel a representa? (b) Ki efecto lo tin riba e organizacion terrenal di Satanás ora e cuater bientu ta gelós?

⁴ Sin duda, e cuater angel ta representa cuater grupo di angel cu Jehova ta usa pa tarda ehecucion di huicio te cu e tempo siñalá. Ora e angelnan ta los e bientu di rabia divino pa nan supla ne mesun tempo for di nort, zuid, oost i west, e destruccion lo ta tremendo. Esei lo parce, na escala tremendamente mayor, e uso dje cuater bientu di parti di Jehova pa plama elamita di antigua, desbaratando i exterminando nan. (Jeremías 49:36-38) Esei lo ser un tempestad di bientu gigantesco hopi mas destructivo cu e “tempestad” cu Jehova a usa pa extermina e nacion di Amón. (Amós 1:13-15) Ningun parti dje organizacion di Satanás riba tera por wanta e dia dje furia di Jehova, ora e ta vindica su soberanía pa semper hamás.—Salmo 83:15, 18; Isaías 29:5, 6.

 5. Con e profecía di Jeremías ta yúdanos comprende cu e huicio di Dios lo inclui e mundo henter?

⁵ Nos por keda sigur cu e huicio di Dios lo zuta e mundo henter? Leza di nobo e palabra di su profeta Jeremías: “Mira! un calamidad ta bai sali di nacion pa nacion, i un tempestad grandi mes lo ser lantá dje parti di mas remoto dje tera. I hende cu Jehova ta mata siguramente lo yega di ser den e dia ei desde un extremo dje tera te ne otro extremo dje tera.” (Jeremías 25:32, 33) Ta durante tal tempestad di bientu cu scuridad lo tapa mundo. Su agencianan gobernamental lo ser sagudi den destruccion. (Revelacion 6:12-14) Pero e futuro no ta scur pa tur hende. Pues, anto, Dios lo frena e bientu pe beneficio di ken?

Seyamento di esclabo di Dios

 6. Ken a bisa e angelnan wanta e cuater bientu, i esei ta permiti tempo pa haci kico?

⁶ Juan a sigi duna detaye dje manera cu algun lo ser marcá pa sobrebiba, bisando: “I mi a mira un otro angel subi for di salimento di solo, teniendo e seyo di e Dios bibo; i el a grita cu un boz fuerte ne cuater angel na ken tabata permití di haci daño ne tera i lamá, bisando: ‘No haci daño ne tera ni na lamá ni ne palunan, te despues cu nos seya esclabo di nos Dios den nan frenta.’”—Revelacion 7:2, 3.

 7. Ken realmente ta angel di cinco, i cua evidencia ta yúdanos establece su indentidad?

⁷ Aunque e no ta menciona e nomber dje angel di cinco, tur evidencia ta indica cu esei mester ta Señor Jesús glorificá. Siendo cu Jesús ta Arcángel, esei ta indicá cu e tin autoridad riba otro angel. (1 Tesalonicense 4:16; Hudas 9) E ta subi for di oost, mescos cu “rey di salimento di solo”—Jehova i su Cristo—cu ta bini pa ehecuta huicio mescos cu rey Darío i Ciro ora nan a humiya Babilonia di antigua. (Revelacion 16:12; Isaías 45:1; Jeremías 51:11; Daniel 5:31) E angel ta parce Jesús també pasobra e ta ser confiá cu seyamento di cristian ungí. (Efesio 1:13, 14) Además, ora e bientu ta ser gelós, Jesús ta esun cu ta guia ehército celestial pa ehecuta huicio riba e nacionan. (Revelacion 19:11-16) Lógicamente, anto, Jesús ta esun cu ta duna ordu pa tarda destruccion dje organizacion terrenal di Satanás te cu esclabo di Dios ta seyá.

 8. Kico ta e seyamento, i na ki tempo el a cuminza?

⁸ Kico ta tal seyamento, i ken ta esclabo di Dios? E seyamento a cuminza na Pentecoste di aña 33 EC ora e promé cristian hudío tabata ungí cu e spiritu santo. Despues, Dios a procede di yama i ungi “hende dje nacionan.” (Romano 3:29; Echo 2:1-4, 14, 32, 33; 15:14) Apóstol Pablo a skirbi tocante cristian ungí cu tin un garantía di cu nan ta “pertenece na Cristo” i a agrega cu Dios “també a pone su seyo riba nos i a dúnanos e prenda di loke ta bini, esta, e spiritu, den nos curazón.” (2 Corintio 1:21, 22; compara cu Revelacion 14:1.) Asina, ora tal esclabo ta ser adoptá como yiu spiritual di Dios, nan ta recibi di antemano un prenda di nan herencia celestial—un seyo, of promesa. (2 Corintio 5:1, 5; Efesio 1:10, 11) Anto nan por bisa: “E spiritu mes ta duna testimonio cu nos spiritu di cu nos ta yiu di Dios. Pues, anto, si nos ta yiu, nos també ta heredero: heredero en berdad di Dios, pero co-heredero cu Cristo, con tal cu nos ta sufri hunto pa nos també ser glorificá hunto.”—Romano 8:15-17.

 9. (a) Ki perseverancia ta necesario di parti dje resto di yiu di Dios engendrá pa spiritu? (b) Pa cuanto tempo prueba dje ungínan lo sigi?

⁹ “Con tal cu nos ta sufri hunto”—kico esei kier men? Pa nan recibi e corona di bida, cristian ungí tin cu wanta, persevera, kedando fiel te na morto. (Revelacion 2:10) Esei no ta un asunto di ‘una bez salbá semper salbá.’ (Mateo 10:22; Lucas 13:24) Mas bien, nan ta ser consehá: “Haci lo sumo posibel pa boso haci sigur pa boso mes e yamamento i scogimento di boso.” Mescos cu apóstol Pablo, pa caba nan mester por bisa: “Mi a lucha e bon lucha, mi a corre e carreda te na fin, mi a warda e fe.” (2 Pedro 1:10, 11; 2 Timoteo 4:7, 8) Pues, aki riba tera e prueba i seftamento dje resto di yiu di Dios engendrá pa spiritu tin cu sigi te cu Jesús i angel compañé di dje a marca firmemente nan tur ‘den nan frenta’ cu e seyo, indentificando nan conclusivamente, innengablemente, como “esclabo di nos Dios” probá i fiel. Asina, e seyo ta bira un marca permanente. Evidentemente, ora e cuater bientu dje tribulacion ta wordu gelós, tur Israel spiritual lo a ser seyá na moda final, aunque poco di nan ta keda na bida den carni. (Mateo 24:13; Revelacion 19:7) E cantidad total di miembro lo ser completo!—Romano 11:25, 26.

Cuanto ta wordu seyá?

10. (a) Cua texto ta indica cu e cantidad di esnan seyá ta limitá? (b) Cuanto ta e cantidad total seyá, i con nan ta ser mencioná?

¹⁰ Jesús a bisa esnan den fila pa wordu seyá: “No tene miedu, trupa chikito, pasobra boso Tata a aproba di duna boso e reino.” (Lucas 12:32) Otro texto, tal como Revelacion 6:11 i Romano 11:25, ta indica cu e cantidad dje trupa chikito en berdad ta limitá i, realmente, predeterminá. E sigiente palabra di Juan ta confirma esei: “I mi a tende e cantidad di esnan cu tabata seyá, cient’i cuarent’i cuater mil, seyá di tur tribu di yiu di Israel: Dje tribu di Hudá diesdos mil seyá; dje tribu di Rubén diesdos mil; dje tribu di Gad diesdos mil; dje tribu di Aser diesdos mil; dje tribu di Neftalí diesdos mil; dje tribu di Manasés diesdos mil; dje tribu di Simeón diesdos mil; dje tribu di Leví diesdos mil; dje tribu di Isacar diesdos mil; dje tribu di Zabulón diesdos mil; dje tribu di Josef diesdos mil; dje tribu di Benjamín diesdos mil seyá.”—Revelacion 7:4-8.

11. (a) Pakico e lista dje 12 tribu no por aplica na Israel literal den carni? (b) Pakico Revelacion ta menciona e 12 tribu? (c) Pakico no tin un tribu exclusivamente real of sacerdotal den e Israel di Dios?

¹¹ Esei no por ta un referencia na Israel carnal mes? No, pasobra Revelacion 7:4-8 no ta sigi e lista común di tribu. (Número 1:17, 47) Claramente, e lista ei no tin e propósito di identifica hudío carnal segun nan tribu sino ta pa mustra un estructura similar pe organizacion di Israel spiritual. Esei ta balanzá. Tin exactamente 144.000 miembro den e nacion nobo—12.000 di cada 12 tribu. Ningun tribu den Israel di Dios ta exclusivamente real of sacerdotal. E nacion henter ta reina como rey, i e nacion henter ta sirbi como sacerdote.—Galatio 6:16; Revelacion 20:4, 6.

12. Pakico ta apropiado pe 24 anciano canta dilanti dje Lamchi e palabra di Revelacion 5:9, 10?

¹² Aunque hudío natural i disípel di hudío tabata duná e promé oportunidad pa ser escogí como Israel spiritual, un minoría dje nacionan so a acepta. P’sei, Jehova Dios a extende e invitacion na gentil. (Juan 1:10-13; Echo 2:4, 7-11; Romano 11:7) Como den e caso di efesio cu na antes tabata “alehá for dje estado di Israel,” awor hende no hudío por ta seyá cu e spiritu di Dios i bira parti dje congregacion di cristian ungí. (Efesio 2:11-13; 3:5, 6; Echo 15:14) Pues, ta apropiado pe 24 anciano canta dilanti dje Lamchi: “Cu bo sanger bo a cumpra hende pa Dios for di tur tribu i lenga i pueblo i nacion, i bo a hácinan ser un reino i sacerdote pa nos Dios, i nan lo reina como rey riba e tera.”—Revelacion 5:9, 10.

13. Pakico Santiago, mitá ruman di Jesús, por a dirigi su carta correctamente ne “diesdos tribu cu ta plamá na tur parti”?

¹³ E congregacion cristian ta “un raza escogí, un sacerdocio real, un nacion santo.” (1 Pedro 2:9) Reemplazando Israel natural como e nacion di Dios, e ta bira Israel nobo cu ta “realmente ‘Israel.’” (Romano 9:6-8; Mateo 21:43)a P’sei, tabata mashá correcto pa Santiago, mitá ruman di Jesús, dirigi su carta pastoral “ne diesdos tribu cu ta plamá na tur parti,” es decir, dirigié ne congregacion mundial di cristian ungí cu ne tempo ei tabata un total di 144.000.—Santiago 1:1.

Israel di Dios djawe

14. Kico ta mustra cu Testigo di Jehova consistentemente a kere cu e 144.000 ta e cantidad literal di esnan componiendo Israel spiritual?

¹⁴ Interesantemente, Charles T. Russell a reconoce cu e 144.000 ta e cantidad literal di hende cu ta compone Israel spiritual. Den e buki na inglés E creacion nobo, Volumen VI di Estudio den e Scritura (na inglés) publicá na 1904, el a skirbi: “Nos tin tur motibo pa kere cu e cantidad definitivo i fiho di esnan eligí [e ungínan escogí] ta loke ta ser mencioná varios bez den Revelacion (7:4; 14:1); esta, 144.000 ‘cumprá for di den humanidad.’” E buki (na inglés) Luz, Volumen I, cu Studiante di Bijbel a publicá na 1930, també a bisa: “E 144.000 miembro dje cuerpo di Cristo ta ser mustrá reuní asina como scogí i ungí, of seyá.” Testigo di Jehova ta consistente teniendo e punto di bista cu 144.000 cristian ungí literal ta compone Israel spiritual.

15. Net promé cu e dia di Señor, studiante sincero di Bijbel a kere cu hudío natural lo disfruta di kico despues di fin di tempo gentil?

¹⁵ No obstante, Israel natural djawe no ta merece algun fabor special? Poco promé cu cuminzamento dje dia di Señor, ora studiante sincero di Bijbel tabata descubri di nobo hopi berdad básico dje Palabra di Dios, nan a kere cu ora e tempo gentil termina, hudío atrobé lo disfruta di un posicion privilegiá dilanti Dios. P’sei, e buki na inglés E tempo a yega cerca di C. T. Russell (Volumen II di Estudio den e Scritura), publicá na 1889, a aplica Jeremías 31:29-34 na hudío natural, i a comenta: “E mundo ta testigo di cu e castigo di Israel bao di dominio di gentil tabata continuo desde [607] PEC, cu e ta sigi ainda, i cu no tin motibo pa spera nan restoracion nacional promé cu 1914 EC, e límite di nan ‘siete tempo’—2520 aña.” A parce cu hudío ne tempo ei lo experimenta un restoracion nacional, i tal prospecto a parce di bira mas briyante na 1917, ora e Declaracion di Balfour a priminti apoyo di Inglaterra pa haci Palestina un patria nacional pa hudío.

16. Testigo di Jehova a haci cua esfuerzo pa alcanza hudío natural cu e mensahe cristian, i cu ki resultado?

¹⁶ Despues dje promé gera mundial, Palestina a bira un territorio bao di mandato di Inglaterra, i e camina a habri pa hopi hudío bolbe na Palestina. Na 1948 e estado político di Israel a nace. Esei a indica cu hudío por a recibi bendicion divino? Pa hopi aña, Testigo di Jehova a kere esei. P‘sei, na 1925 nan a publica un buki di 128 bladji na inglés, titulá Consuelo pa hudío. Na 1929 nan a publica un buki bonita di 360 bladji na inglés, titulá Bida, skirbí pa atrae hudío i tratando també cu e buki bíblico di Job. Hopi esfuerzo tabata hací, specialmente den e stad di New York, pa alcanza hudío cu e mensahe mesiánico. Felizmente, algun hudío a acepté, pero hudío en general, mescos cu nan antepasado dje promé siglo, a rechaza evidencia dje presencia di Mesías.

17, 18. Esclabo di Dios riba tera a yega di comprende kico tocante e pacto nobo i profecía di restoracion den e Bijbel?

¹⁷ A keda bisto cu hudío, como un pueblo i como un nacion, no tabata Israel mencioná den Revelacion 7:4-8 ni den otro profecía bíblico relacioná cu e dia di Señor. Sigiendo nan tradicion, hudío a sigi evita uso dje nomber divino. (Mateo 15:1-3, 7-9) Den un splicacion di Jeremías 31:31-34, e buki na inglés titulá Jehova cu Testigo di Jehova a publicá na 1934, a bisa conclusivamente: “E pacto nobo no tin nada cu ber cu desendiente natural di Israel i cu humanidad en general, sino . . . ta limitá na Israel spiritual.” Profecía bíblico tocante restoracion no ta relacioná ni cu hudío natural ni cu Israel político, locual ta un miembro di Naciones Unidas i ta un parti di mundo cu Jesús a menciona den Juan 14:19, 30 i 18:36.

¹⁸ Na 1931 esclabo di Dios riba tera a recibi cu gran alegría e nomber Testigo di Jehova. Cu tur nan curazón nan tabata di acuerdo cu Salmo 97:11: “Luz mes a relumbra pa hende husto, i gozamento asta pa esnan recto di curazón.” Nan por a mira claramente cu Israel spiritual so tabata introducí den e pacto nobo. (Hebreo 9:15; 12:22, 24) Israel natural obstiná no tabatin parti den dje, ni humanidad en general. Tal comprendimento a habri camina pa un rayo briyante di luz divino, sobresaliente den e registro di historia teocrático. Esei a revela ki abundantemente Jehova ta extende su misericordia, su bondad amoroso, i su berdad na tur hende cu ta hala cerca dje. (Exodo 34:6; Santiago 4:8) Sí, otro hende además di Israel di Dios por beneficiá ora e angelnan ta wanta e cuater bientu di destruccion. Cua hende esei por tá? Bo por ta uno di nan? Láganos mira awor.

[Nota]

[Plachi di henter página na página 114]

[Plachinan na página 116 117]

E scogimento general dje berdadero Israel di Dios a sigi for di dia di Pentecoste di aña 33 EC te na 1935 ora, den un asamblea histórico di Testigo di Jehova den Washington, D.C., énfasis tabata duná ne recogimento dje multitud grandi cu ta spera di biba riba tera (Revelacion 7:9)

Capítulo 20

Un multitud grandi sin número

 1. Despues di a detayá seyamento dje 144.000, cua otro grupo Juan a mira?

DESPUES di a detaya seyamento dje 144.000, Juan a sigi pa informános di un revelacion di mas excitante di tur e Scritura. Su curazón mester a dal salto di gozo ora el a skirbié, bisando: “Despues dje cosnan ei mi a wak, i, mira! un multitud grandi, cu ningun hende por a conta, di tur nacion i tribu i pueblo i lenga, pará dilanti dje trono i dilanti dje Lamchi, bistí den mantel blancu; i tabatin rama di palmita den nan man.” (Revelacion 7:9) Sí, detencion dje cuater bientu ta permiti salbacion di un otro grupo fuera dje 144.000 miembro di Israel spiritual: un multitud grandi internacional cu ta papia hopi idioma.a—Revelacion 7:1.

 2. Con comentador di mundo a splica e multitud grandi, i con asta Studiante di Bijbel di pasado a considera e grupo?

² Comentador di mundo ta bisa cu e multitud grandi ta hende no hudío cu ta conberti na cristianismo of ta martir cristian destiná pa cielo. Asta Studiante di Bijbel den tempo pasá a kere cu nan tabata un grupo celestial segundario, segun e splicacion den Volumen I di 1886 (na inglés) di Estudio den e Scritura, e plan divino dje siglonan: “Nan ta perde e premio dje trono i dje naturaleza divino, pero finalmente ta alcanza nacimento como ser spiritual di un rango inferior cu e naturaleza divino. Aunque nan ta berdaderamente consagrá, e spiritu di mundo ta dominánan te ne grado cu nan no ta yega di ofrece nan bida den sacrificio.” I tanto reciente como 1930, e sigiente idea tabata expresá den volumen 1 (na inglés) di Luz: “Esnan cu ta compone e multitud grandi no ta acepta e invitacion di bira testigo celoso di Señor.” Nan tabata pintá como un grupo husto den nan mes bista cu tabatin un conocimento dje berdad pero cu a haci poco pa prediqué. Nan por a yega cielo como un grupo segundario cu lo no participa den e reino cu Cristo.

 3. (a) Cua speranza a wordu ofrecí na cierto hende di curazón recto cu despues a bira celoso den e trabao di predica? (b) Con e Watch Tower di 1923 a splica e comparacion di carné i cabrito?

³ Sin embargo, tabatin otronan asociá cu cristian ungí cu despues a bira mashá celoso den e trabao di predica. Nan no tabatin aspiracion di bai cielo. Realmente, nan speranza a armonizá cu e título dje discurso público cu e pueblo di Jehova a presenta desde 1918 te 1922. Originalmente esei tabata “E mundo a terminá—miyones di hende cu ta biba awor lo no muri hamás.”b Poco despues, e revista The Watch Tower di 15 di October di 1923, a splica e comparacion di Jesús di carné i cabrito (Mateo 25:31-46), bisando: “Carné ta representa tur hende dje nacionan, cu no ta engendrá pe spiritu pero ta incliná na husticia i cu mentalmente ta reconoce Jesucristo como Señor i cu ta busca i ta spera un mihor tempo bao di su reinado.”

 4. Con e luz tocante e grupo terrenal a bira mas briyante na 1931? na 1932? na 1934?

⁴ Algun aña despues, na 1931, volumen 1 (na inglés) di Vindicacion, a splica Ezekiel capítulo 9, indentificando hende marcá den nan frenta pa ser conserbá durante e fin di mundo como carné dje comparacion. Volumen 3 (na inglés) di Vindicacion, presentá na 1932 a splica e actitud recto di curazón dje homber no israelita, Jonadab, cu a unié cu Jehú, e rey ungí di Israel den su garoshi di gera i a bai cuné pa mira e celo di Jehú ehecutando hende di religion falso. (2 Rey 10:15-17) E buki a bisa: “Jonadab a representa of a simboliza e grupo di hende riba tera awor durante e tempo cu e trabao di Jehú [di declara e huicio di Jehova] ta na progreso cu ta hende di bon boluntad, cu no ta na armonía cu e organizacion di Satanás, cu ta tuma decision na fabor di husticia, i ta hende cu Señor ta conserba durante e tempo di Armagedón, ta hiba door dje tempo di dificultad, i ta duna bida eterna riba tera. Eseinan ta compone e grupo di ‘carné’.” Na 1934 The Watchtower a haci claro cu tal hende cristian cu speranza terrenal mester haci un dedicacion na Jehova Dios i bautiza. E luz tocante e grupo terrenal a bira cada bez mas briyante.—Proverbio 4:18.

 5. (a) Con e multitud grandi tabata identificá na 1935? (b) Ora J. F. Rutherford na 1935 a pidi delegado dje asamblea cu tabatin e speranza di biba pa semper riba tera lanta, kico a sosode?

⁵ E comprendimento di Revelacion 7:9-17 awor tabata cla pa sali cu tur claridad briyante! (Salmo 97:11) Bez tras bez e revista Watchtower a expresa e speranza di cu un asamblea planeá pa dia 30 di Mei te dia 3 di Juni di 1935, den Washington, D.C. EUA, lo ser “un berdadero consuelo i beneficio” pa esnan cu Jonadab a simboliza. El a resulta di ser esei! Den un discurso conmovedor tocante “E multitud grandi,” pronunciá pa un auditorio di rond di 20.000, J. F. Rutherford, kende e tempo ei tabata hiba delantera den e trabao mundial di predicá, a duna prueba bíblico cu otro carné djawe i e multitud grandi di Revelacion 7:9 ta e mesun grupo di hende. Na culminacion dje discurso, e orador a pidi: “Tur esnan cu tin e speranza di biba pa semper riba tera kier haci e fabor di lanta?” Ora un parti grandi dje auditorio a lanta, e orador a declara: “Mira! e multitud grandi!” Tabatin un momento di silencio, sigí pa un grito i aplauso manera strena. Ki alegría e grupo cu Juan a simboliza a sinti—i també e grupo cu Jonadab a simboliza! Su mañan, 840 Testigo di Jehova nobo a bautiza, mayoría di locual a afirma di ser dje multitud grandi.

Confirmando identidad dje multitud grandi

 6. (a) Pakico nos por comprende claramente cu e multitud grandi ta un grupo di cristian dedicá djawe cu ta spera di biba pa semper riba tera? (b) Kico mantel blancu dje multitud grandi ta simboliza?

⁶ Con nos por declara asina positivamente cu e multitud grandi ta e grupo djawe di cristian dedicá cu ta spera di biba pa semper riba e tera di Dios? Anteriormente, Juan a mira den un vision e grupo celestial ‘cu Dios a cumpra di tur tribu i lenga i pueblo i nacion.’ (Revelacion 5:9-10) E multitud grandi tin un origen similar pero otro destino. Distinto di Israel di Dios, e cantidad di nan no ta predeterminá. Ningun hende por bisa di antemano cuanto lo tin. Nan mantel ta labá blancu den e sanger dje Lamchi, simbolizando cu nan ta den un condicion husto dilanti Jehova debí na nan fe den e sacrificio di Jesús. (Revelacion 7:14) I nan ta waya rama di palmita, aclamando Mesías como nan Rey.

7, 8. (a) Wayamento di rama di palmita sin duda a haci apóstol Juan corda cua suceso? (b) Wayamento di rama di palmita cu hende dje multitud grandi ta haci ta nifica kico?

⁷ Mientras cu Juan a wak e vision, su pensamento mester a bolbe den pasado mas cu 60 aña te ne último siman di Jesús riba tera. Dia 9 di Nisán, di aña 33 EC, ora e multitud a corre pa recibi Jesús drentando Jerusalem, nan “a tuma rama di palmita i a sali pa contra cuné. I nan a cuminza grita: ‘Salba, nos ta pidíbo! Bendito ta esun cu ta bini den e nomber di Jehova, asta e rey di Israel!’” (Juan 12:12, 13) Di igual manera, e multitud grandi wayando rama di palmita i sclamando ta demonstra nan gozo desenfrená aceptando Jesús como e Rey nombrá di Jehova.

⁸ Sin duda, rama di palmita i grito di gozo ta haci Juan corda també e fiesta di tent di Israel di antigua. Jehova a manda pe fiesta: “I boso tin cu tuma pa boso ne promé dia e fruta di palu excelente, hala di palmita i rama di palu cu rama i di mata di álamo di rooi, i boso mester alegra dilanti Jehova boso Dios pa siete dia.” Rama di palmita tabata usá como un siñal di gozamento. Tent temporario tabata un recordatorio di cu Jehova a salba su pueblo for di Egipto, pa nan biba den tent den desierto. “Residente stranhero i yiu sin tata i biuda” a participa den e fiesta. Tur Israel ‘tabatin cu goza so.’—Levítico 23:40; Deuteronomio 16:13-15.

 9. E multitud grandi ta participa den cua grito di gozo?

⁹ Ta apropiado, anto, pe multitud grandi aunque e no ta parti di Israel spiritual, waya rama di palmita, siendo cu, cu gozo i gratitud nan ta atribui victoria i salbacion na Dios i ne Lamchi, manera Juan a mira ei: “I nan ta sigi sclama cu boz fuerte, bisando: ‘Salbacion nos ta debe na nos Dios, cu ta sintá riba e trono, i ne Lamchi.’” (Revelacion 7:10) Aunque nan a ser sacá for di tur grupo racial, e multitud grandi ta sclama cu un solo “boz fuerte.” Con nan por haci esei, apesar di distinto nacion i idioma?

10. Con e multitud grandi por sclama unidamente cu un solo “boz fuerte” apesar di diferencia di nacion i idioma?

¹⁰ E multitud grandi ta parti dje único organizacion multinacional riba tera cu ta berdaderamente uní awe. Nan no tin distinto ley pa distinto país sino ta aplica principio husto di Bijbel consistentemente na unda cu nan ta biba. Nan no ta enbolbí den movimento nacionalista ni revolucionario sino berdaderamente ta ‘bati nan spada na ploeg.’ (Isaías 2:4) Nan no ta partí den secta ni organizacion religioso, pa nan grita lema bruhá cu ta contradici otro manera religion di cristiandad ta haci; ni nan no ta laga un grupo di clero profesional duna alabanza pa nan. Nan no ta grita cu nan ta debe nan salbacion ne spiritu santo, pasobra nan no ta sirbidor di un dios trinitario. Den mas cu 200 territorio geográfico rond di mundo, nan ta uní inbocando e nomber di Jehova mientras cu nan ta papia un solo idioma puro dje berdad. (Sofonías 3:9) Apropiadamente, nan ta declara públicamente cu nan salbacion ta bini di Jehova, e Dios di salbacion, mediante Jesucristo, su Agente Principal di salbacion.—Salmo 3:8; Hebreo 2:10.

11. Con tecnología moderno ta yuda hende dje multitud grandi haci nan boz fuerte asta mas fuerte?

¹¹ Tecnología moderno ta yuda haci e boz fuerte dje multitud grandi uní sali asta mas fuerte. Ningun otro grupo religioso den mundo tin mester di publica buki pa yuda studia e Bijbel den mas cu 400 idioma, siendo cu ningun otro grupo ta interesá pa alcanza tur hende di mundo cu un solo mensahe uní. Como mas yudanza pa haci esei, bao di supervision dje Cuerpo Gobernante di Testigo di Jehova, componí di esnan ungí, nan a desaroya un Sistema Electrónico di Fotocomposicion Multilengua (MEPS). Den e tempo aki cu ta imprimiendo e buki aki, varios forma di MEPS ta ser usá den mas cu 125 lugar rond di mundo, i esei ta yuda haci posibel publicacion di e revista quincenal, The Watchtower, na mas cu 130 idioma simultáneamente. També e pueblo di Jehova ta publica buki simultáneamente, tal como esaki, na varios idioma. Asina, Testigo di Jehova, di locual e multitud grandi ta compone e mayoría grandi, por parti tur aña cientos di miyones di publicacion den tur idioma mihor conocí, haciendo posibel pa un otro multitud di tur tribu i lenga studia e Palabra di Dios i uni nan boz cu e boz fuerte dje multitud grandi.—Isaías 42:10, 12.

Den cielo of riba tera?

12, 13. Di ki manera e multitud grandi ta “pará dilanti dje trono i dilanti dje Lamchi”?

¹² Con nos sa cu “pará dilanti dje trono” no kier men cu e multitud grandi ta den cielo? Tin hopi prueba claro riba e punto ei. Por ehempel, e palabra griego ei traducí “dilanti” (e·nó·pi·on) literalmente kier men “den bista [di]” i ta ser usá varios bez en conexion cu hende riba tera cu ta “dilanti” of “den bista” di Jehova. (1 Timoteo 5:21; 2 Timoteo 2:14; Romano 14:22; Galatio 1:20) Na un ocasion ora israelita tabata den desierto, Moisés a bisa Arón: “Bisa tur e asamblea di yiu di Israel, ‘Bini cerca dilanti Jehova, pasobra el a tende boso murmuracion.’” (Exodo 16:9) Israelita no tabatin cu ser transporta pa cielo pa nan para dilanti Jehova ne ocasion ei. (Compara cu Levítico 24:8.) Mas bien, ei mes den desierto nan a para den bista di Jehova, i su atencion tabata dirigí na nan.

¹³ Además, nos ta leza: “Ora e Yiu di hende ta yega den su gloria . . . tur nacion lo ser reuní dilanti dje.”c Tur e raza humano lo no ta den cielo ora e profecía ta ser cumplí. Siguramente, esnan cu ta “bai den cortamento eterno” lo no ta den cielo. (Mateo 25:31-33, 41, 46) Mas bien, humanidad ta pará riba tera den bista di Jesús, i e ta dirigi su atencion pa húzganan. Di igual manera, e multitud grandi ta “dilanti dje trono i dilanti dje Lamchi” pasobra nan ta para den bista di Jehova i di su Rey, Cristo Jesús, di locual nan ta recibi un huicio favorable.

14. (a) E ta bisa cu ken ta “rond dje trono” i “riba e Ceru di Sion” [celestial]? (b) Aunque e multitud grandi ta sirbi Dios “den su tempel,” pakico esei no ta hácinan un grupo di sacerdote?

¹⁴ Segun e texto, e 24 anciano i e grupo ungí di 144.000 ta “rond dje trono” di Jehova i “riba e Ceru di Sion [celestial].” (Revelacion 4:4; 14:1) E multitud grandi no ta un grupo di sacerdote ni no ta alcanza tal puesto halto. Ta cierto cu mas tardi Revelacion 7:15 ta bisa cu nan ta sirbi Dios “den su tempel.” Pero e tempel no kier men e santuario interior, e Lugar Santísimo. Mas bien, esei ta e curá terrenal dje tempel spiritual di Dios. E palabra griego na·ós, traducí ei como “tempel,” hopi bez ta comunica e sentido amplio di henter e edificio edificá pe adoracion di Jehova. Awe, esei ta un edificio spiritual cu ta encerra tanto cielo como tera.—Compara cu Mateo 26:61; 27:5, 39, 40; Marco 15:29, 30; Juan 2:19-21, nota di Bijbel Traduccion di Mundo Nobo (Cu Referencia).

Un grito di alabanza universal

15, 16. (a) Ki reaccion tin den cielo ora e multitud grandi ta presenta? (b) Con e creacion spiritual di Jehova ta reacciona na cada revelacion nobo di su propósito? (c) Con nos aki riba tera por participa den e cantamento di alabanza?

¹⁵ E multitud grandi ta alaba Jehova, pero otronan també ta canta su alabanza. Juan a informa: “I tur angel tabata pará rond dje trono i anciano i e cuater criatura bibiente, i nan a cai boca abao dilanti dje trono i a adora Dios, bisando: ‘Amén! Bendicion i gloria i sabiduría i agradicimento i onor i poder i forza sea pa nos Dios pa semper hamás. Amén.’”—Revelacion 7:11, 12.

¹⁶ Ora Jehova a crea e tera, tur angel santo di dje “a sclama gozosamente hunto, i tur yiu di Dios a cuminza grita den aplauso.” (Job 38:7) Cada revelacion nobo dje propósito di Jehova mester a conmove angel pa duna grito di alabanza similar. Ora e 24 anciano—e 144.000 den nan gloria celestial—ta sclama cu boz halto den reconocimento dje Lamchi, tur otro criatura celestial di Dios ta uni cu nan dunando alabanza na Jesús i na Jehova Dios. (Revelacion 5:9-14) Ya caba tal criatura a pasa over cu gozo mirando e cumplimento dje propósito di Jehova den su resureccion di fiel hende ungí na un glorioso lugar den region spiritual. Awor, tur fiel criatura celestial di Jehova ta canta alabanza melodioso ora e multitud grandi ta presenta. Berdaderamente, pa tur sirbidor di Jehova, e dia di Señor ta un tempo emocionante pa nan biba den dje. (Revelacion 1:10) Aki riba tera, ki privilegio nos tin di participa den e cantica di alabanza dunando testimonio dje Reino di Jehova!

E multitud grandi ta presenta

17. (a) Uno dje 24 anciano a presenta cua pregunta, i e echo cu e anciano por a duna e contesta ta sugeri kico? (b) Na ki tempo e pregunta dje anciano a wordu contestá?

¹⁷ Dje tempo di apóstol Juan i te ne dia di Señor, cristian ungí no a comprende ken ta compone e multitud grandi. Ta apropiado, anto, pa un dje 24 anciano, representando esnan ungí den cielo caba, activa e pensamento di Juan haciendo un pregunta pertinente. “I respondiendo, un anciano a puntrámi: ‘Esnan bistí den mantel blancu, ken nan tá i di unda nan a bini?’ Anto mi a bisé un bez: ‘Mi shon, bo ta esun cu sa.’” (Revelacion 7:13, 14a) Sí, e anciano por a haya e contesta i duné na Juan. Esei ta sugeri cu esnan resusitá dje grupo di 24 anciano por ta ocupá den e comunicacion di berdad divino awendia. Di nan parti, esnan dje grupo cu Juan a simboliza riba tera a yega di siña ken ta compone e multitud grandi observando cuidadosamente loke Jehova tabata haci den nan. Nan a comprende lihé e rayo briyante di luz divino cu a ilumina e firmamento teocrático na 1935, ne debido tempo di Jehova.

18, 19. (a) E grupo cu Juan a simboliza a duna énfasis na cua speranza entre 1920 i 1935, pero ken a responde ne mensahe na cantidad aumentante? (b) Indentificacion dje multitud grandi na 1935 a indica kico en relacion cu e 144.000? (c) Kico asistencia na Memorial ta revela?

¹⁸ Entre 1920 i 1930 i despues, e grupo cu Juan a simboliza a duna énfasis ne speranza celestial, tanto den nan literatura como den nan trabao di predica. Ta parce cu e cantidad total di 144.000 no tabata completo ainda. Pero e cantidad aumentante di hende cu a scucha e mensahe i cu a demonstra celo pe trabao di duna testimonio a yega di expresa un interés den bida eterna riba tera den Paradijs. Nan no tabatin deseo di bai cielo. Nan no tabata yamá pa esei. Nan no tabata parti dje trupa chikito sino mas bien dje otro carnénan. (Lucas 12:32; Juan 10:16) Nan identificacion na 1935 como e multitud grandi di otro carné tabata un indicacion di cu e scogimento dje 144.000 tabata casi completo.

¹⁹ Dato ta apoya tal conclusion? Sí. Na 1938 mundialmente, 59.047 Testigo di Jehova a participa den e ministerio. Di eseinan, 36.732 a participa di emblema ne celebracion anual dje Conmemoracion dje morto di Jesús, indicando asina cu nan tabata yamá pa cielo. Durante e añanan desde esei, e cantidad di tal participante a mengua continuamente, principalmente pa motibo cu fiel Testigo di Jehova a termina nan carreda terrenal den morto. Na 2005 solamente 8.524 a participa di emblema di Memorial—0,05 porciento so dje 16.390.116 cu a asisti ne celebracion mundial.

20. (a) Durante Gera Mundial II, cua comentario J. F. Rutherford a haci privadamente tocante e multitud grandi? (b) Cua echo ta mustra awor cu e multitud grandi ta grandi en berdad?

²⁰ Ora e segundo gera mundial a cuminza, Satanás a haci esfuerzo severo pa pone fin ne trabao di cosechá e multitud grandi. E trabao di Jehova tabata strobá den hopi país. Durante e tempo scur ei, i poco promé cu su morto den Januari di 1942, nan a tende J. F. Rutherford bisa: “Wel . . . ta parce cu e multitud grandi lo no ta tanto grandi toch.” Pero, un bendicion divino a bisa cu sí! Na 1946 e cantidad di Testigo di Jehova predicando mundialmente a aumenta te na 176.456—mayor parti di locual tabata dje multitud grandi. Na 2005 tabatin 6.390.022 Testigo di Jehova cu tabata sirbi Jehova Dios fielmente den 235 diferente tera—berdaderamente un MULTITUD GRANDI! I e cantidad ta sigi aumenta.

21. (a) Con e cosecha dje pueblo di Dios durante e dia di Señor ta na plena armonía cu e vision di Juan? (b) Con cierto profecía importante a cuminza cumplimento?

²¹ Asina, e cosecha dje pueblo di Dios durante e dia di Señor ta na plena armonía cu e vision di Juan: na principio, e trabao di recoge e resto dje 144.000; anto e recogimento dje multitud grandi. Manera Isaías a profetiza, awor “den e parti final dje dianan,” hende di tur nacion ta corre pa participa den e adoracion puro di Jehova Dios. I, en berdad, nos ta alegra den aprecio dje creacion di Jehova dje “cielo nobo i tera nobo.” (Isaías 2:2-4; 65:17, 18) Dios ta recoge “tur cos hunto di nobo den Cristo, cos den cielo i cos riba tera.” (Efesio 1:10) Heredero ungí dje Reino celestial—escogí através dje siglonan desde e tempo di Jesús—ta “cos den cielo.” I awor, e multitud grandi di otro carné ta presenta como e proménan di “cos riba tera.” Bo sirbishi na armonía cu tal arreglo por nifica felicidad eterno pa bo.

Bendicion dje multitud grandi

22. Cua otro informacion Juan a recibi tocante e multitud grandi?

²² Mediante e canal divino, Juan a recibi mas informacion tocante e multitud grandi: “I [e anciano] a bisámi: ‘Eseinan ta esnan cu ta sali for dje tribulacion grandi, i a laba nan mantel i a hácinan blancu den e sanger dje Lamchi. P’sei nan ta dilanti dje trono di Dios; i ta rindié sirbishi sagrado dia i anochi den su tempel; i Esun sintá riba e trono lo span su tent riba nan.’”—Revelacion 7:14b, 15.

23. Kico ta e tribulacion grandi di locual e multitud grandi ta “sali”?

²³ Na un ocasion anterior, Jesús a bisa cu su presencia den gloria dje Reino lo culmina den e “tribulacion grandi tal como no a sosode desde principio di mundo te awor, no, ni lo no bolbe sosode.” (Mateo 24:21, 22) Na cumplimento dje profecía, angel lo los e cuater bientu dje tera pa destrui e sistema mundial di Satanás. E promé pa bai lo ser Babilonia e Grandi, e imperio mundial di religion falso. Anto, ne culminacion dje tribulacion, Jesús lo libra e resto dje 144.000 riba tera, hunto cu e multitud grandi sin número.—Revelacion 7:1; 18:2.

24. Cua requisito tin pa hende individual dje multitud grandi sobrebiba?

²⁴ Cua requisito tin pa hende individual dje multitud grandi sobrebiba? E anciano a bisa Juan cu nan a “laba nan mantel i a hácinan blancu den e sanger dje Lamchi.” Es decir, nan ta eherce fe den Jesús como nan Rescatador, ta haci un dedicacion na Jehova Dios, ta simboliza nan dedicacion cu bautismo bao di awa, i “tin un concenshi limpi” debí na nan conducta recto. (1 Pedro 3:16, 21; Mateo 20:28) P’sei, nan ta limpi i husto den bista di Jehova. I nan ta mantenénan “sin mancha di mundo.”—Santiago 1:27.

25. (a) Di ki manera e multitud grandi ta rindi na Jehova “sirbishi sagrado dia i anochi den su tempel”? (b) Con Jehova ta “span su tent” riba e multitud grandi?

²⁵ Además, nan ta bira celoso Testigo di Jehova—“ta rindié sirbishi sagrado dia i anochi den su tempel.” Bo ta uno dje multitud grandi dedicá? Si ta asina, bo tin e privilegio di sirbi Jehova sin fin den e curá terrenal di su gran tempel spiritual. Awe, bao di direccion di esnan ungí, e multitud grandi ta haci e parti hopi mas grandi dje trabao di duna testimonio. Apesar di responsabilidad seglar, cientos di miles di nan ta haci lugar pe sirbishi di tempo completo como pionero. Pero, si bo ta pionero of no, como un miembro dedicá dje multitud grandi, bo por alegra cu debí na bo fe i obranan, bo ta ser declará husto como un amigo di Dios i ta wordu recibí como un invitado den su tent. (Salmo 15:1-5; Santiago 2:21-26) Asina Jehova ta ‘span su tent’ riba hende cu ta stimé i, como un bon anfitrión, e ta protehánan.—Proverbio 18:10.

26. E multitud grandi ta disfruta di cua otro bendicion?

²⁶ E anciano a sigi papia: “Nan lo no tin hamber mas ni sed mas, ni solo lo no bátinan ni ningun calor kimador, pasobra e Lamchi, cu ta meimei dje trono, lo pastoreánan, i lo guíanan te na fontein di awa di bida. I Dios lo seca tur lágrima di nan wowo.” (Revelacion 7:16, 17) Sí, Jehova Dios ta berdaderamente hospitalario! Pero, ki nificacion profundo tin den e palabra ei?

27. (a) Con Isaías a profetiza algo similar cu e palabra dje anciano? (b) Kico ta mustra cu e profecía di Isaías a cuminza cumplimento den e congregacion cristian dje dia di Pablo?

²⁷ Láganos considera un profecía cu tin palabra similar: “Esaki ta loke Jehova a bisa: ‘Den un tempo di bon boluntad mi a contestábo, i den un dia di salbacion mi a yudábo . . . Nan lo no padece di hamber, ni padece di sed, ni calor kimador ni solo lo no dalnan. Pasobra Esun cu ta sinti duele di nan lo guíanan, i lo híbanan cerca fontein di awa.’” (Isaías 49:8, 10; mira també Salmo 121:5, 6.) Apóstol Pablo a cita un parti dje profecía i a apliqué ne “dia di salbacion” cu a cuminza na Pentecoste di aña 33 EC. El a skirbi: “Pasobra [Jehova] ta bisa: ‘Den un tempo aceptable mi a tendébo, i den un dia di salbacion mi a yudábo.’ Mira! Awor ta e tempo specialmente aceptable. Mira! Awor ta e dia di salbacion.”—2 Corintio 6:2.

28, 29. (a) Con e palabra di Isaías tabata cumplí den e promé siglo? (b) Con e palabra di Revelacion 7:16 ta wordu cumplí en relacion cu e multitud grandi? (c) Kico lo ta e resultado ora e multitud grandi ta ser guiá cerca e “fontein di awa di bida”? (d) Pakico e multitud grandi ta e úniconan di humanidad cu no tin cu muri?

²⁸ Cua aplicacion e promesa di no tene hamber ni sed ni sufri di calor kimador tabatin den e tempo ayá? Siguramente, hende cristian dje promé siglo sí a sufri di hamber i sed literal aveces. (2 Corintio 11:23-27) Pero, den un sentido spiritual, nan tabatin un abundancia. Nan a recibi provision ricu, di manera cu nan no a padece di hamber ni di sed di cosnan spiritual. Además, Jehova no a haci e calor di su rabia kímanan ora el a destrui e sistema hudío di cosnan na aña 70 EC. E palabra di Revelacion 7:16 tin un cumplimento spiritual similar en relacion cu e mulitud grandi djawe. Hunto cu cristian ungí, nan ta disfruta di provision spiritual abundante.—Isaías 65:13; Nahum 1:6, 7.

²⁹ Si bo ta dje multitud grandi, e bon condicion di bo curazón por hacíbo “sclama gozosamente,” sin importa loke bo tin cu wanta en cuanto falta di cosnan of presion durante e añanan final dje sistema di Satanás. (Isaías 65:14) Den e sentido ei, asta awor, Jehova por ‘seca tur lágrima di bo wowo.’ E “solo” kimador di huicio desfavorable di Dios no ta menazábo mas, i ora e cuater bientu di destruccion ta los, bo por scapa for dje “calor kimador” dje desagrado di Jehova. Despues cu tal destruccion ta pasa, e Lamchi lo guiábo pa saca pleno probecho for di awa revitalizador dje “fontein di awa di bida,” locual ta representa tur percuracion cu Jehova ta haci pa bo gana bida eterna. Bo fe den e sanger dje Lamchi lo ser vindicá pasobra lo bo ser restorá gradualmente na perfeccion humano. Boso dje multitud grandi lo ser e úniconan di humanidad como e ‘miyones’ cu ni sikiera tin cu muri! Den e mas pleno sentido, tur lágrima lo wordu secá for di boso wowo.—Revelacion 21:4.

Haci sigur di alcanza loke ta primintí

30. Cua bista magnífico ta presenta dilanti nos den e vision di Juan, i ken por “para”?

³⁰ Ki un bista magnífico e sigiente palabra ta presenta pa nos! Jehova Dios mes ta riba su trono, i tur sirbidor di dje, celestial i terrenal, ta alabé hunto. Su sirbidornan terrenal ta comprende cu ta ki un privilegio tremendo pa participa den e coro creciente di alabanza. Mashá pronto Jehova i Jesucristo lo ehecuta huicio, i e grito lo sali: “E gran dia di nan rabia a yega, i ken por keda pará?” (Revelacion 6:17) Ki contesta tin? Solamente un menoría di humanidad, incluyendo cualkier dje 144.000 seyá cu lo por tin den carni ainda i un multitud grandi di otro carné por keda “pará,” esta, sobrebiba cu nan.—Jeremías 35:19; 1 Corintio 16:13.

31. Con cumplimento dje vision di Juan mester afecta hende cristian, tanto dje ungínan como dje multitud grandi?

³¹ Den bista di esei, cristian ungí dje grupo cu Juan a simboliza ta haci esfuerzo vigoroso ‘forzando padilanti te ne meta pe premio dje yamada djariba di Dios mediante Cristo Jesús.’ (Filipense 3:14) Eseinan ta wel na haltura di cu sosodimento durante e dianan aki ta exigi di nan parti un awante special. (Revelacion 13:10) Despues di a sirbi Jehova Dios lealmente pa tanto aña, nan ta mantene nan fe firmemente, alegrando cu nan nomber ta “skirbí den cielo.” (Lucas 10:20; Revelacion 3:5) Esnan dje multitud grandi sa també cu solamente “ken cu ta persevera te na fin ta esun cu lo ser salbá.” (Mateo 24:13) Aunque e multitud grandi como un grupo ta ser marcá pa sali for dje tribulacion grandi, hende individual di dje tin cu haci esfuerzo pa permanece limpi i activo.

32. E echo cu dos grupo so por “para” den e dia di rabia di Jehova ta enfatiza cua situacion urgente?

³² No tin evidencia di cu hende cu no ta dje dos grupo por “para” den e dia dje rabia di Jehova. Kico esei kier men pe miyones di hende cu tur aña ta mustra un cierto respet pe sacrificio di Jesús asistiendo na celebracion di Conmemoracion di su morto pero cu ainda no a eherce fe den e sacrificio di Jesús te ne punto di bira sirbidor dedicá i bautizá di Jehova Dios, activo den su sirbishi? Además, kico di esnan cu na antes tabata activo pero cu a laga nan curazón “bira cargá cu . . . ansiedad di bida”? Laga tur eseinan lanta foi soño, i keda lantá, pa nan “logra scapa tur loke ta destiná di sosode, i di para dilanti dje Yiu di hende”—Jesucristo. Poco tempo so ta keda!—Lucas 21:34-36.

[Nota]

[Kuadro na página 119]

Interpretacion ta pertenece na Dios

Pa mashá aña e grupo cu Juan a simboliza a haci pregunta tocante identidad dje multitud grandi pero sin haya un splicacion satisfactorio. Pakico? Nos ta haya e contesta den e palabra di fiel Josef ora el a bisa: “Interpretacion no ta pertenece na Dios?” (Génesis 40:8) Na ki tempo i di ki manera Dios ta interpreta cumplimento di su profecía? Generalmente, ta ora cu nan ta cerca e tempo di nan cumplimento of durante nan cumplimento cu sirbidor di Dios haciendo investigacion por comprende claramente nan mensahe. Tal comprendimento ta ser duná “pa nos instruccion, pa mediante nos awante i mediante e consuelo dje Scritura nos por tene speranza.”—Romano 15:4.

[Kuadro na página 124]

Miembro dje multitud grandi

▪ ta sali for di tur nacion i tribu i pueblo i lenga

▪ ta para dilanti dje trono di Jehova

▪ a laba nan mantel i ta hácinan blancu den e sanger dje Lamchi

▪ ta atribui salbacion na Jehova i na Jesús

▪ ta sali for dje tribulacion grandi

▪ ta sirbi Jehova dia i anochi den su tempel

▪ ta recibi e proteccion i cuido amoroso di Jehova

▪ ta ser pastoreá pa Jesús cerca e fontein di awa di bida

[Plachi di henter página 121]

[Plachi na página 127]

E multitud grandi ta debe nan salbacion na Dios i ne Lamchi

[Plachi na página 128]

E Lamchi lo guia e multitud grandi ne fontein di awa di bida

Capítulo 21

Plaga di Jehova riba cristiandad

Vision 5—Revelacion 8:1–9:21

Tema: Tocamento di seis di siete trompet

Tempo di cumplimento: Desde entronizacion di Cristo Jesús na 1914 te ne tribulacion grandi

 1. Kico a pasa ora e Lamchi a habri seyo di siete?

“E CUATER bientu” a ser wantá te cu e 144.000 di Israel spiritual ta seyá i e multitud grandi ta aprobá pa sobrebibencia. (Revelacion 7:1-4, 9) Sin embargo, promé cu e tempestad grandi ta ser mandá riba tera, hende tin cu duna di conoce e huicio desfavorable di Jehova contra e mundo di Satanás! Ora e Lamchi ta sigi pa habri seyo di siete i esun final, sin duda Juan ta wak intensamente pa mira kico lo sosode. Awor e ta comparti su experencia cu nos: “I ora [e Lamchi] a habri seyo di siete, un silencio a sosode den cielo pa rond di mei ora. I mi a mira e siete angel cu ta para dilanti Dios, i nan tabata duná siete trompet.”—Revelacion 8:1, 2.

Un tempo pa oracion fervoroso

 2. Kico a pasa durante e simbólico mei ora di silencio den cielo?

² Esei ta un silencio significante! Mei ora por parce un tempo largu ora bo ta spera pa algo sosode. Awor, nan ni sikiera a tende e coro celestial di alabanza constante. (Revelacion 4:8) Pakico? Juan a mira e motibo den e vision: “I un otro angel a yega i a para ne altar, teniendo un baso di oro pa censia; i e tabata duná un gran cantidad di censia pa ofrece cu oracion di tur e santonan riba e altar di oro cu tabata dilanti dje trono. I huma dje censia a subi for di man dje angel cu oracion dje santonan dilanti Dios.”—Revelacion 8:3, 4.

 3. (a) Kimamento di censia ta hácinos corda kico? (b) Ki propósito e mei ora di silencio den cielo tini?

³ Esei ta hácinos corda cu bao dje sistema di cosnan hudío, nan a kima censia tur dia den e tabernáculo i, hopi aña despues, den e tempel den Jerusalem. (Exodo 30:1-8) Durante tal kimamento di censia, israelita no sacerdote a para pafó dje terreno sagrado, rezando—sin duda den silencio den nan curazón—na Esun na ken e huma dje censia tabata subi. (Lucas 1:10) Awor Juan a mira algo similar sosode den cielo. E censia cu e angel a ofrece ta ser asociá cu “oracion dje santonan.” Realmente, den un vision anterior, e ta bisa cu censia ta representa tal oracion. (Revelacion 5:8; Salmo 141:1, 2) Ta parce, anto, cu e silencio simbólico den cielo ta pa permiti scuchamento di oracion dje santonan riba tera.

4, 5. Ki desaroyo histórico ta yúdanos determina e periodo di tempo cu ta corresponde cu e mei ora di silencio simbólico?

⁴ Nos por determina ki ora esei ta sosode? Sí, nos por, door di rista e contexto, hunto cu desaroyo histórico na comienzo dje dia di Señor. (Revelacion 1:10) Durante 1918 i 1919, suceso riba tera a armoniza notablemente cu loke Revelacion 8:1-4 ta bisa a sosode. Pa 40 aña promé cu 1914, Studiante di Bijbel—e nomber duná na Testigo di Jehova—a anuncia na tur parti cu e tempo gentil lo termina na 1914. Sosodimento penoso di 1914 a duna prueba cu nan tabatin razón. (Lucas 21:24, Testament Nobo; Mateo 24:3, 7, 8) Pero hopi di nan també a kere cu na 1919 nan lo ser hibá for di tera pa haya nan herencia celestial. Esei no a sosode. Mas bien, durante e promé gera mundial, nan a wanta un tempo di persecucion severo. Dia 31 di October, 1916, Charles T. Russell, e promé presidente dje Sociedad Watch Tower a muri. Anto dia 4 di Juli, 1918, e presidente nobo, Joseph F. Rutherford, i siete otro representante dje Sociedad tabata hibá ne prisón di Atlanta, Georgia, EUA, sentenciá inhustamente pa hopi aña largu den prisón.

⁵ Cristian sincero dje grupo cu Juan a simbolizá a keda hopi confundí. Kico Dios tabata kier pa nan haci awor? Na ki tempo nan lo ser hibá cielo? Un artículo titulá “E cosecha a terminá—kico lo bini awor?” tabata publicá den e número di 1 di Mei di 1919 di The Watch Tower. Esei a refleha e estado di insiguridad i a anima hende fiel pa sigi persevera, agregando: “Nos ta kere cu nos ta papia e berdad awor bisando cu e cosecha dje grupo cu lo hereda e Reino a termina, cu nan tur a ser debidamente seyá i cu e porta a cera.” Durante e tempo dificultoso ei, oracion fervoroso dje grupo cu Juan a simbolizá a subi, como si fuera e huma di un gran cantidad di censia. I nan oracion a wordu scuchá!

Candela tirá riba tera

 6. Kico a pasa despues dje silencio den cielo, i como contesta na kico?

⁶ Juan a bísanos: “Pero un bez e angel a tuma e baso di censia, i el a yené cu candela dje altar i a tiré riba tera. I a sosode donder i boz i weerlicht i temblor.” (Revelacion 8:5) Despues dje silencio, tabatin actividad dramático di ripiente! Ta parce cu esei a sosode pa contesta e oracion dje santonan, siendo cu e candela tumá for dje altar di censia a principiá esei. Ayá na 1513 PEC, na Ceru di Sinaí, donder i weerlicht, sonido fuerte, candela, i temblamento dje montaña a siñala cu Jehova tabata dirigí su atencion na su pueblo. (Exodo 19:16-20) Manifestacion similar cu Juan a menciona ta indica també cu Jehova tabata presta atencion na su sirbidornan riba tera. Pero, loke Juan a mira tabata presentá cu siñal. (Revelacion 1:1) Pues, con e candela, donder, boz, weerlicht, i temblor simbólico mester ta interpreta awe?

 7. (a) Jesús a pega cua candela simbólico riba tera durante su ministerio? (b) Con e rumanan spiritual di Jesús a pega un candela den cristiandad?

⁷ Na un ocasion, Jesús a bisa su disípelnan: “Mi a bini pa pega un candela riba tera.” (Lucas 12:49) El a pega un candela en berdad. Cu su predicacion celoso, Jesús a haci e Reino di Dios e cuestion principal enfrentando e pueblo hudío, i esei a principiá un discusion cayente den tur e nacion. (Mateo 4:17, 25; 10:5-7, 17, 18) Na 1919 ruman spiritual di Jesús riba tera, un grupo chikito di cristian ungí cu a sobrebiba e dianan dificultoso di Gera Mundial I, a pega un candela similar den cristiandad. Den September di 1919, e spiritu di Jehova a keda notablemente manifestá den su Testigonan leal reuní, biniendo di leu i cerca na Cedar Point, Ohío, EUA. Joseph F. Rutherford, cu a sali recientemente for di prisón i cu pronto lo a mira tur acusacion contra dje retirá, a dirigí su mes cu franqueza ne asamblea, bisando: “Den obedencia ne mandamento di nos Doño, i reconociendo nos privilegio i deber pa haci gera contra fortaleza di error cu a tene pueblo catibo pa tanto tempo, nos trabao tabata i tá pa anuncia e binidero reino glorioso di Mesías.” Esei ta e cuestion principal—e Reino di Dios!

8, 9. (a) Con J. F. Rutherford a splica e actitud i deseo dje pueblo di Dios durante e añanan dificultoso dje gera? (b) Di ki manera candela tabata tirá riba tera? (c) Di ki manera a sosode donder, boz, weerlicht, i temblor?

⁸ Haciendo referencia na experencia dificultoso reciente dje pueblo di Dios, e orador a bisa: “Atake dje enemigo tabata asina cruel cu hopi dje estimado tao di Señor a keda turdí i a para ketu cu asombro, rezando i sperando pa Señor indica su boluntad. . . . Pero apesar dje desanimacion temporal, nan tabatin un deseo ardiente pa proclama e mensahe di reino.”—Mira e número di The Watch Tower di 15 di September di 1919, bladji 280.

⁹ Na 1919 tal deseo a keda satisfecho. E grupo chikito ma activo di hende cristian a keda pegá na candela den un sentido spiritual, pa cuminza un campaña di predicacion di alcance mundial. (Compara cu 1 Tesalonicense 5:19.) Candela a basha riba tera den e sentido di cu nan a haci e Reino di Dios e cuestion ardiente, i ta sigi ser asina! Boz fuerte a reemplaza e silencio, proclamando e mensahe di Reino cu claridad. Spiertamento bíblico a sali manera donder promé cu un tempestad. Luz briyante dje berdad a luza manera rayo di weerlicht for dje Palabra profético di Jehova, i, como si tabatin un temblor fuerte, e mundo di religion tabata sagudí te na su fundeshi. E grupo cu Juan a simboliza a mira cu tabatin trabao pa ser hací. I te ne dia djawe, e trabao ta sigi aumenta gloriosamente den tur e tera habitá!—Romano 10:18.

Preparando pa tocamento di trompet

10. E siete angel a prepara pa haci kico, i pakico?

¹⁰ Juan a sigi bisa: “I e siete angel cu siete trompet a prepara pa tócanan.” (Revelacion 8:6) Kico tocamento di tal trompet ta nifica? Den e dianan di Israel, tocamento di trompet tabata usá pa indica dianan importante of suceso notable. (Levítico 23:24; 2 Rey 11:14) Di igual manera, tocamento di trompet cu Juan a tende a hala atencion na asunto di importancia di bida of morto.

11. E grupo cu Juan a simboliza a keda mashá ocupá den cua trabao preparatorio entre 1919 te 1922?

¹¹ Mientras cu angel a preparánan pa toca trompet, sin duda nan també tabata duná direccion na un trabao preparatorio riba tera. Desde 1919 te cu 1922, e grupo revitalizá cu Juan a simboliza a keda ocupá reorganizando e ministerio público i edificando facilidad pa publica literatura. Na 1919 e revista na inglés Epoca di Oro, yamá awe Despertad!, a wordu publicá como un “revista cu ta presenta echo, speranza, i conviccion”—un instrumento semehante di trompet cu a hunga un papel clave denunciando e participacion di religion falso den político.

12. Cada tocá di trompet a anuncia kico, i ta hácinos corda kico den e dia di Moisés?

¹² Manera nos ta bai mira awor, cada tocá di trompet ta anuncia un esena dramático den locual plaga terribel ta afecta un parti di mundo. Algun di eseinan ta hácinos corda plaga cu Jehova Dios a manda pa castiga egipcio den e dianan di Moisés. (Exodo 7:19–12:32) Eseinan tabata expresion di huicio di Jehova riba Egipto, i nan a habri camina pe pueblo di Dios scapa for di sclabitud. Plaga cu Juan a mira a logra algo similar. Pero, nan no tabata plaga literal. Nan tabata siñal cu a simboliza huicio husto di Jehova.—Revelacion 1:1.

Identificacion dje “tercera parti”

13. Kico ta pasa ora e promé cuater trompet ta toca, esei a haci cua pregunta presenta?

¹³ Manera nos ta bai mira, ora e promé cuater trompet tabata tocá, plaga a basha riba “un tercera parti” di tera, di lamá, i di rio i fontein di awa, i di fuente di luz pe tera. (Revelacion 8:7-12) Un tercera parti di algo ta basta hopi di dje pero no ta tur. (Compara cu Isaías 19:24; Ezekiel 5:2; Zacarías 13:8, 9.) Pues, cua “tercera parti” a merece mas e bashamento di tal plaga? Satanás i su simía a ciega i a corrumpi e mayoría grandi di humanidad. (Génesis 3:15; 2 Corintio 4:4) E situacion ta manera David a bisa: “Nan tur a desviá, nan tur ta igualmente corrupto; no tin ningun cu ta haci bon, ni sikiera un.” (Salmo 14:3) Sí, humanidad henter ta den peliger di recibi un huicio desfavorable. Pero un seccion di dje ta specialmente culpable. Un parti—“e tercera parti”—tabatin deber di sa mihor! Cua ta e “tercera parti”?

14. Kico ta e tercera parti simbólico cu ta recibi mensahe manera plaga for di Jehova?

¹⁴ Esei ta cristiandad! Despues di 1920, e dominio di dje a alcanza rond di un tercera parti di humanidad. Su religion ta e fruta dje gran apostasía for di berdadero cristianismo—e apostasía di locual Jesús i su disipelnan a profetiza. (Mateo 13:24-30; Echo 20:29, 30; 2 Tesalonicense 2:3; 2 Pedro 2:1-3) E clero di cristiandad ta yama nan mes e tempel di Dios i ta presenta nan mes como siñador di cristianismo. Pero nan doctrina ta mashá leu for dje berdad di Bijbel, i nan ta sigi susha e nomber di Dios. Cristiandad, cu e tercera parti ta representa asina aptamente, ta recibi mensahe fuerte manera plaga for di Jehova. Tal tercera parti di humanidad no ta merece ningun fabor divino cualkiera!

15. (a) Cada tocá di trompet ta limitá na un cierto aña? Splica. (b) E boz di ken a uni cu e boz dje grupo cu Juan a simboliza proclamando e huicio di Jehova?

¹⁵ Na armonía cu e serie di tocamento di trompet, declaracion special tabata presentá den siete asamblea desde 1922 te cu 1928. Pero tocamente di trompet no tabata limitá ne tempo ei. E denuncio fuerte dje mal camina di cristiandad a sigi, continuamente, segun cu e dia di Señor ta progresa. E huicio di Jehova mester ta proclama na tur parti, pa tur nacion, apesar di odio i persecucion internacional. Solamente ne ora ei e fin dje sistema di Satanás ta bini. (Marco 13:10, 13) Felizmente, e multitud grandi a agrega su boz ne boz dje grupo cu Juan a simboliza haciendo declaracion formidable di importancia mundial.

Un tercera parti di mundo ta kima

16. Kico ta sigi ora e promé angel a toca su trompet?

¹⁶ Juan a skirbi e sigiente informe tocante e angelnan: “I e promé a toca su trompet. I a sosode piedra di ijs i candela bruhá cu sanger, i e tabata tirá riba tera; i un tercera parti dje tera a kima, i un tercera parti di palu a kima, i tur mata berde a kima.” (Revelacion 8:7) Esei ta similar cu plaga di siete riba Egipto, pero kico esei kier men pa nos tempo?—Exodo 9:24.

17. (a) Kico e palabra “tera” ta simboliza den Revelacion 8:7? (b) Con e tercera parti dje tera correspondiendo cu cristiandad ta ser kimá?

¹⁷ Den e Bijbel, e palabra “tera” hopi bez ta referi na humanidad. (Génesis 11:1; Salmo 96:1) Siendo cu e segunda plaga a cai riba lamá, locual també tabatin cu ber cu humanidad, e “tera” tin cu referi na loke ta parce un arreglo social humano firme cu Satanás a edifica i cu tin cu ser destruí. (2 Pedro 3:7; Revelacion 21:1) E bista dje plaga ta revela cu e tercera parti di mundo di cristiandad ta ser kimá pa un calor ardiente di desaprobacion di Jehova. Su grandinan—pará manera palu den dje—ta ser kimá pe proclamacion dje huicio desfavorable di Jehova. Tur su cientos di miyones di miembro religioso, si nan ta sigi apoya religion di cristiandad, ta bira manera foyo di yerba kimá, spiritualmente morto den bista di Dios.—Compara cu Salmo 37:1, 2.a

18. Con e mensahe di huicio di Jehova tabata proclamá ne asamblea di Cedar Point na 1922?

¹⁸ Con e mensahe di huicio ta ser proclamá? Generalmente esei no ta door di canal di comunicacion di noticia, locual ta parti di mundo i hopi bez ta mofador dje “esclabo” di Dios. (Mateo 24:45) E mensahe tabata proclamá na moda notable ne segundo asamblea histórico dje pueblo di Dios na Cedar Point, Ohío, 10 di September di 1922. Cu entusiasmo i unánimamente nan a adopta un declaracion titulá “Un desafío pa lider di mundo.” Cu franqueza, el a informa e tera simbólico djawe di lo sigiente: “Nos ta dirigi un yamada na nacion di mundo, na nan gobernante i lidernan, i na tur clero di tur religion di mundo, nan sigidor i aliadonan, na comerciante grandi i na político astuto, pa duna prueba pa hustifica e tarea cu nan a acepta di cu nan por establece paz i prosperidad riba tera i trece felicidad pe pueblo. I ya cu nan no por haci esei, nos ta peticionánan pa scucha e testimonio cu nos ta ofrece como testigo di Señor, anto láganan bisa si nos testimonio ta berdadero of no.”

19. Cua testimonio e pueblo di Dios a duna na cristiandad tocante e Reino di Dios?

¹⁹ Cua testimonio tal cristianan a ofrece? Lo sigiente: “Nos ta mantene i ta declara cu e reino di Mesías ta e remedi absoluto pa tur enfermedad cu humanidad tini i por trece paz riba tera i bon boluntad pa hende, e deseo di tur nacion; i cu hende cu ta someténan boluntariamente na su gobernacion husto cu a cuminza caba lo ser bendicioná cu paz i bida eterna, cu libertad i felicidad sin fin.” Den e tempo aki di corrupcion, ora gobierno di hende, specialmente esnan di cristiandad, no por di ningun manera resolve problema di mundo, tal desafío presentá cu e vigor di tocamento di trompet, ta klink awor cu asta mas forza cu na 1922. Ta ki cierto cu e Reino di Dios den man di su Cristo vencedor ta e solo i único speranza di humanidad!

20. (a) Di ki manera mensahe di huicio a ser proclama manera tocamento di trompet na 1922 i despues mediante e congregacion di cristian ungí? (b) E promé tocamento di trompet a resulta den kico den cristiandad?

²⁰ E proclamacion ei i otronan despues, mediante e congregacion di cristian ungí, usando declaracion, tratado, foyeto, buki, revista, i discurso, tabata presentá manera tocamento di trompet. E promé tocá di trompet a resulta den e golpeamento di cristiandad como si fuera cu awa cu a bira piedra di ijs i a dalé duro. Su culpa pa dramamento di sanger debí na su participacion den gera di siglo 20, tabata desenmascará locual ta mustra cu e ta merece expresion ardiente di rabia di Jehova. E grupo cu Juan a simbolizá, cu e apoyo despues dje multitud grandi, a sigi repiti e mensahe dje promé tocá di trompet, halando atencion ne manera cu Jehova Dios ta mira cristiandad, como mereciendo destruccion.—Revelacion 7:9, 15.

Manera un montaña kimando

21. Kico a pasa ora e segundo angel a toca su trompet?

²¹ “I e segundo angel a toca su trompet. I algo manera un montaña grandi kimando cu candela tabata tirá den lamá. I un tercera parti di lamá a bira sanger; i un tercera parti di bestia cu ta den lamá, locual tin alma, a muri, i un tercera parti di barcu tabata destrozá.” (Revelacion 8:8, 9) Kico tal bista spantoso ta simboliza?

22, 23. (a) Cua declaracion indudablemente a bini como resultado di tocamento dje segundo trompet? (b) Kico un “tercera parti di lamá” a simboliza?

²² Nos por comprendele mihor cu informacion tocante loke a sosode den un asamblea dje pueblo di Jehova celebrá den Los Angeles, California, EUA, dia 18-26 di Augustus, 1923. E discurso principal cu J. F. Rutherford a presenta diasabra atardi tabata riba e tema “Carné i cabrito.” El a identifica e “carnénan” claramente como hende cu ta stima husticia cu lo hereda e dominio terrenal dje Reino di Dios. Un declaracion cu a sigi a hala atencion ne hipocresía di “clero apóstata i na ‘esnan principal di nan tao,’ cu ta hende mundano di hopi influencia financiero i político.” El a pidi e “multitud di hende amante di paz i ordu den tur religion . . . apartánan for dje sistema religioso malbado cu Señor ta yama ‘Babilonia’” i preparánan pa “recibi bendicion dje Reino di Dios.”

²³ Sin duda, e declaracion a sali como resultado di tocamento dje segundo trompet. Esnan cu despues a responde ne mensahe a separánan for dje grupo tocante locual Isaías a skirbi lo sigiente: “Pero hende malbado ta manera lamá cu ta ser trublá, ora e no por calma, e awa di locual ta arroha yerba i lodo.” (Isaías 57:20; 17:12, 13) Pues, “lamá” ta wel simboliza humanidad inketu, indeciso, i rebelde cu ta crea inketud i revolucion. (Compara cu Revelacion 13:1.) E tempo lo yega ora tal “lamá” lo no existi mas. (Revelacion 21:1) Mientras tanto, cu e tocá dje segundo trompet, Jehova a declara su huicio contra un tercera parti di lamá—esta, e parti ingobernabel cu ta den e dominio di cristiandad mes.

24. E tiramento di e bulto di un montaña kimando den lamá a simboliza kico?

²⁴ Un bulto grandi manera montaña kimando cu candela tabata tirá den “lamá.” Den e Bijbel, hopi bez montaña ta simboliza gobierno. Por ehempel, e Reino di Dios ta ser pintá como montaña. (Daniel 2:35, 44) Babilonia ruinoso a bira un “montaña totalmente kimá.” (Jeremías 51:25) Pero e bulto montañoso cu Juan a mira tabata kima ainda. Su tiramento den lamá ta wel representa con, durante i despues dje promé gera mundial, e cuestion di gobernacion a bira un cuestion ardiente den humanidad, specialmente den cristiandad. Den Italia, Mussolini a introduci fascismo. Alemania a acepta e nazismo di Hitler, mientras cu otro país a purba diferente forma di socialismo. Un cambio radical a sosode den Rusia, unda e revolucion bolcheviki a produci e promé gobierno comunista, cu e resultado di cu lider religioso di cristiandad a perde poder i influencia den loke na antes tabata un fortaleza di nan.

25. Con gobernacion a sigi ser un cuestion ardiente despues di Gera Mundial II?

²⁵ Experimento di fascista i nazista tabata exterminá den e segundo gera mundial, pero gobernacion a sigi como un cuestion ardiente, i lamá di humanidad ta sigi su trublamento i ta arroha gobierno revolucionario nobo. Durante e añanan despues di 1945, gobernacion asina tabata establecí den hopi lugar, tal como China, Vietnam, Cuba, i Nicaragua. Den Grecia un experimento cu un dictadura militar a fracasa. Den Cambodia un esfuerzo pa establece comunismo fundamental a resulta den mas cu dos miyón morto, segun informe.

26. Con e “montaña kimando cu candela” a sigi lanta ola den lamá di humanidad?

²⁶ E “montaña kimando cu candela” a sigi crea ola den lamá di humanidad. Segun informe, tin lucha tocante gobernacion na Africa, Sur i Centroamérica, Asia, i isla di Lamá Pacífico. Hopi lucha asina a tuma lugar den tera di cristiandad of unda misionero di cristiandad ta bira activista. Pastor católico romano asta a bira miembro di grupo di guerrillero comunista i a bringa hunto cu nan. Ne mesun tempo, grupo di protestante evangélico a traha den América Central pa combati loke nan a yama e “cruel i persistente sed di poder” di comunista. Pero ningun trublamento asina di lamá di humanidad a trece paz i siguridad.—Compara cu Isaías 25:10-12; 1 Tesalonicense 5:3.

27. (a) Con “un tercera parti di lamá” a bira manera sanger? (b) Con ‘un tercera parti di bestia di lamá’ a muri i kico a pasa “un tercera parti di barcu”?

²⁷ E segundo tocá di trompet ta revela cu esnan di humanidad cu ta enbolbénan den conflicto revolucionario riba gobernacion en bez di someténan ne Reino di Dios tin culpa pa dramamento di sanger. Specialmente e “tercera parti di lamá” di cristiandad ta bira manera sanger. Tur cos bibiente den dje ta morto den bista di Dios. Ningun organizacion radical cu ta flotando manera barcu den e “tercera parti di lamá” por evita naufragio finalmente. Ki feliz nos ta keda cu miyones di hende semehante di carné awor ta responde ne yamada manera tocamento di trompet pa separánan for di hende cu ainda ta lora rond den nacionalismo estrecho i den culpa pa dramamento di sanger di tal lamá!

Un strea ta cai foi cielo

28. Kico a pasa ora e tercer angel a toca su trompet?

²⁸ “I e tercer angel a toca su trompet. I un strea grandi cendí manera lampi a cai foi cielo, i a cai riba un tercera parti di rio i riba fontein di awa. I e nomber duná ne strea ta Absintio. I un tercera parti di awa a bira absintio, i hopi hende a muri pa causa dje awa, pasobra nan a wordu hací amarga.” (Revelacion 8:10, 11) Una bez mas, otro parti di Bijbel ta yúdanos mira con e texto ta aplica den e dia di Señor.

29. Kico ta cumpli cu e simbolismo dje “strea grandi cendí manera lampi,” i pakico?

²⁹ Nos ta conoce caba e símbolo di strea den e mensahe di Jesús duná ne siete congregacion, den locual siete strea ta simboliza anciano di congregacion.b (Revelacion 1:20) “Strea” ungí, hunto cu e otronan ungí, ta biba den lugar celestial den un sentido spiritual desde e tempo di nan seyamento cu e spiritu santo como un prenda di nan herencia celestial. (Efesio 2:6, 7) Sin embargo, apóstol Pablo a adverti cu for di tal hende semehante di strea lo sali hende apóstata, formando secta, cu ta gaña e tao. (Echo 20:29, 30) Tal infieldad a resulta den un gran apostasía, i anciano cu a cai ta compone en conhunto e homber malbado cu ta halza su mes na puesto di dios den humanidad. (2 Tesalonicense 2:3, 4) E spiertamento cu Pablo a duna a wordu cumplí ora e clero di cristiandad a presenta den mundo. E símbolo dje “strea grandi cendí manera lampi” ta wel representa tal grupo.

30. (a) Ora e rey di Babilonia tabata mencioná como esun cu a cai foi cielo, kico esei a nifica? (b) Un caimento for di cielo por referi na kico?

³⁰ Juan a mira e strea special ei cai for di cielo. Di ki manera? Experencia di un rey di antigua ta yúdanos comprende. Mencionando e rey di Babilonia, Isaías a bisa: “Ai, con bo a cai foi cielo, abo, esun resplandiente, yiu di madrugá! Con bo a ser cortá te na tera, abo, cu a incapacitá e nacionan!” (Isaías 14:12) E profecía a wordu cumplí ora ehército di Ciro a derota Babilonia, i su rey a cai di ripiente for di gobernacion di mundo te na un derota bergonzoso. Asina, un caimento for di cielo por referi na perdimento di puesto halto i caimento den bergüenza.

31. (a) Na ki tempo e clero di cristiandad a cai for di nan puesto “celestial”? (b) Con e awa cu clero ta comparti a bira “absintio,” i cu ki resultado pa hopi hende?

³¹ Ora clero di cristiandad a apostatá for di berdadero cristianismo, nan a cai for dje puesto halto “celestial” cu Pablo a mencioná den Efesio 2:6, 7. En bez di ofrece awa frescu dje berdad, nan ta comparti “absintio,” mentira amarga tal como un fierno di candela, purgatorio, e trinidad, i predestinacion; també, nan ta hiba e nacionan na gera, i no ta edifica nan pueblo como sirbidor moral di Dios. Cu ki resultado? Venenamento spiritual pa hende cu ta kere nan mentira. Nan caso ta similar cu esun di israelita infiel di dia di Jeremías, cu ken Jehova a bisa: “Atá mi ta hácinan come absintio, i lo mi dúnanan awa venená pa bebe. Pasobra for di profeta di Jerusalem apostasía a sali den tur e tera.”—Jeremías 9:15; 23:15.

32. Na ki tempo e caimento di cristiandad for di cielo spiritual a bira bisto, i con esei tabata dramatizá?

³² Tal caimento for di cielo spiritual a keda bisto na aña 1919 ora, en bez di clero di cristiandad, un resto chikito di cristian ungí tabata nombrá riba interés di Reino. (Mateo 24:45-47) I desde 1922 padilanti e caimento a keda dramáticamente bisto ora tal grupo di hende cristian a renoba nan campaña di denuncia cu franqueza e fracaso di clero di cristiandad.

33. Cua denuncio dje clero di cristiandad a sosode na 1924 den un asamblea na Columbus, Ohío, EUA?

³³ En cuanto esei, sobresaliente tabata e proclamacion den loke e revista yamá Despertad! awe a yama e “asamblea di mas grandi di Studiante di Bijbel celebrá te awor.” E asamblea a reuni den Columbus, Ohío, dia 20 te 27 di Juli di 1924. Indudablemente bao di direccion dje angel cu a toca e tercer trompet, nan a adopta un declaracion fuerte ei, i despues 50 miyón copia tabata plamá como un tratado. E tabata publicá bao di título Guía religioso denunciá. Un subtítulo a presenta e cuestion: “E simía dje promesa contra e simía dje Colebra.” E declaracion mes a denuncia redondamente e clero di cristiandad i nan aceptacion di título religioso cu a hálzanan, nan hacimento di gigante comercial i político profesional miembro principal di nan tao, nan deseo di briya dilanti hende, i nan nengamento di predica e mensahe dje Reino di Mesías ne pueblo. El a enfatiza cu Dios ta comisiona tur cristian dedicá pa proclama “e dia di vinganza di nos Dios; pa consola tur hende cu ta yora.”—Isaías 61:2, Version Moderna.

34, 35. (a) Kico a sosode e poder i influencia dje clero desde cu e tercer angel a cuminza toca su trompet? (b) Kico tin den futuro pe clero di cristiandad?

³⁴ Desde cu e tercer angel a cuminza toca su trompet, e puesto dje clero dominando humanidad ta mengua te cu, den e dia i época djawe, mashá poco di nan tin poder como dios cu nan tabatin den siglo di antes. Debí ne predicacion di Testigo di Jehova, un gran cantidad di hende a yega di realiza cu hopi doctrina cu e clero ta siña ta veneno spiritual—“absintio.” Además, e poder dje clero den e nort di Europa casi a desparece, mientras cu den algun otro país e gobierno ta limita estrictamente nan influencia. Den e parti católico di Europa i den Nort i Suramérica, e conducta escandaloso di clero den asunto financiero, político, i moral a mancha nan nomber. Djawor padilanti, nan puesto por solamente empeora, siendo cu nan lo sufri dje mesun destino cu hende di tur otro religion falso.—Revelacion 18:21; 19:2.

³⁵ Plaga di Jehova Dios riba cristiandad no a caba ainda. Considera loke a sosode despues dje cuarto tocamento di trompet.

Scuridad!

36. Kico a pasa despues cu angel di cuater a toca su trompet?

³⁶ “I angel di cuater a toca su trompet. I un tercera parti di solo tabata heridá i un tercera parti di luna i un tercera parti di strea, pa un tercera parti di nan bira scur i dia no haya iluminacion durante un tercera parti, ni anochi tampoco.” (Revelacion 8:12) Plaga di nuebe riba Egipto tabata un plaga di scuridad mes. (Exodo 10:21-29) Pero, kico ta e scuridad simbólico cu a bini como plaga riba hende?

37. Ki detaye apóstol Pedro i Pablo a duna dje estado spiritual di hende pafó dje congregacion cristian?

³⁷ Apóstol Pedro a bisa otro hende creyente cu nan tabata den scuridad, den un sentido spiritual, promé cu nan a bira cristian. (1 Pedro 2:9) Pablo també a usa e palabra “scuridad” detayando estado spiritual di hende pafó dje congregacion cristian. (Efesio 5:8; 6:12; Colosense 1:13; 1 Tesalonicense 5:4, 5) Pero, kico di hende den cristiandad cu ta bisa cu nan ta kere den Dios i cu ta bisa cu nan ta acepta Jesús como nan Salbador?

38. Angel di cuater a proclama manera tocamento di trompet cua echo tocante e “luz” di

³⁸ Jesús a bisa cu fruta di berdadero cristian ta identificánan i cu hopi hende cu ta yama nan mes sigidor di dje ta “hacidor di maldad.” (Mateo 7:15-23) Ningun hende cu ta wak fruta dje tercera parti di mundo cu cristiandad ta domina por nenga cu e ta fulando den profundo scuridad spiritual. (2 Corintio 4:4) E ta culpable na extremo, pasobra e ta yama su mes cristian. P’sei, ta solamente correcto pe angel di cuater duna di conoce, como si fuera cu trompet, cu e “luz” di cristiandad realmente ta scuridad, i cu su fuente di “luz” ta babilónico—i no ta cristian.—Marco 13:22, 23; 2 Timoteo 4:3, 4.

39. (a) Ki detaye tabata duná dje luz falso di cristiandad den e declaracion cu nan a adoptá na asamblea di 1925? (b) Cua otro denuncio tabatin na 1955?

³⁹ Di acuerdo cu e proclamacion di cielo, un asamblea dje pueblo di Dios a yena e stadión den Indianapolis, Indiana, EUA, dia 29 di Augustus, 1925, i a adopta pa publicacion un declaracion francu titulá “Mensahe di speranza.” Atrobé, mas cu 50 miyón ehemplar dje declaracion tabata partí den varios idioma. El a detaya e luz falso cu e combinacion di haragán comercial, lider político, i clero religioso ta ofrece, e resultado di locual ta cu “pueblo a cai den scuridad.” I el a siñala ne Reino di Dios como e berdadero speranza pa recibi “e bendicion di paz, prosperidad, salud, bida, libertad i felicidad eterno.” Curashi tabata necesario pe grupito di cristian ungí proclama tal mensahe contra e organizacion gigante di cristiandad. Pero nan tabatin mester di curashi pa haci esei desde poco despues di 1920 te awor. Den tempo mas reciente, na 1955, un otro denuncio di tur clero tabata hací mundialmente na hopi idioma den e partimento dje foyeto titulá Cristiandad of cristianismo—cua ta “luz di mundo”? Awe, e hipocresía di cristiandad ta keda tanto bisto cu hopi hende di mundo ta mira esei pa nan mes. Pero e pueblo di Jehova no a floha den nan denuncio di dje pa mustra loke e tá: un reino di scuridad.

Un águila bulando

40. E cuater tocamento di trompet a mustra cu cristiandad ta kico?

⁴⁰ E promé cuater tocá di trompet berdaderamente a resulta den e manifestacion dje estado desolá i fatal di cristiandad. Su parti dje “tera” tabata denunciá como mereciendo e huicio di Jehova. Tabata mustrá cu gobierno revolucionario cu a nace den país di dje i den otro parti tabata enemigo di bida spiritual. E estado degradá di su clero a keda desenmascará, i e scuridad general di su estado spiritual a keda bisto pa tur hende mira. Berdaderamente, cristiandad ta e parti mas reprensible dje sistema di cosnan di Satanás.

41. Kico Juan a mira i a tende durante un pausa den e serie di tocamento di trompet?

⁴¹ Kico mas ta keda pa ser revelá? Promé cu nos ta haya e contesta pe pregunta, tin un pausa breve den e serie di tocamento di trompet. Juan a duna detaye di loke el a mira despues: “I mi a wak, i a tende un águila bulando den centro di cielo bisa cu boz fuerte: ‘Ai, ai, ai pa hende bibando riba tera debí ne resto di tocamento di trompet dje tres angel cu ta na punto di toca nan trompet!’”—Revelacion 8:13.

42. E águila bulador por nifica kico, i cua mensahe e tin?

⁴² Aguila ta bula halto na laira, di manera cu hende di leu por miré. E tin bista mashá skerpi i por mira leu dilanti dje. (Job 39:29) Un di e cuater querubín, un criatura bibiente rond dje trono di Dios, tabata pintá como un águila bulador. (Revelacion 4:6, 7) Sea cu ta e querubín ei of un otro sirbidor di Dios cu bista penetrante, e ta proclama cu boz halto un mensahe dinámico: “Ai, ai, ai”! Laga habitante di tera ripara, ora nan ta tende e otro tres tocamento di trompet, cu cada tocamento ta conectá cu un dje tres calamidad ei.

[Nota]

cristiandad?

[Tabèl na página 139]

Awa di cristiandad revelá di ser absintio

[Plachi na página 132]

Habrimento di siete seyo a resulta den tocamento di siete trompet

[Plachi na página 140]

“Un desafío pa lider di mundo” (1922)

E declaracion a yuda duna di conoce e plaga di Jehova contra e “tera”

[Plachi na página 140]

“Un spiertamento pa tur hende cristian” (1923)

E huicio desfavorable di Jehova contra “un tercera parti di lamá” tabata proclama na tur parti mediante e declaracion

[Plachi na página 141]

“Hende religioso denunciá” (1924)

Plamamento dje tratado ei na tur parti a yuda avisa pueblo cu e “strea” di clero di cristiandad a cai

[Plachi na página 141]

“Mensahe di speranza” (1925)

E declaracion francu tabata usá pa denunciá cu e supuesto fuente di luz di cristiandad berdaderamente ta fuente di scuridad

Capítulo 22

E promé calamidad—sprinkhan

 1. Ken a haci anuncio riba tera ora angel a toca nan trompet, i kico tocamento di trompet di cinco a anuncia?

ANGEL di cinco a prepara pa toca su trompet. Cuater trompet celestial a toca caba, i cuater plaga a wordu mandá riba un tercera parti dje tera cu Jehova ta considera mas reprensible—esta, cristiandad. Su estado di enfermedad mortal a sali na cla. Mientras cu angel ta toca nan trompet, proclamador humano ta haci anuncio riba tera. Awor angel di cinco ta cla pa anuncia e promé calamidad, mas spantoso cu loke a sosode promé. Esei tin cu ber cu un spantoso plaga di sprinkhan. Pero, promé cu esei, láganos examina otro texto cu por yúdanos comprende e plaga mihor.

 2. Cua buki bíblico ta detayá e plaga di sprinkhan similar cu esun cu Juan a mira, i kico tabata efecto di dje riba Israel di antigua?

² E buki bíblico di Joël, skirbí durante siglo nuebe PEC, ta duna detaye di un plaga di insecto, incluyendo sprinkhan, cu ta similar cu loke Juan a mira. (Joël 2:1-11, 25)a E plaga a causa hopi molester pa Israel apóstata pero a resulta també den e arrepentimento di hudío individual i un bolbimento na favor di Jehova. (Joël 2:6, 12-14) Ora e tempo a yega, Jehova a basha su spiritu riba “tur sorto di carni,” mientras cu siñal spantoso i seña alarmante a yega promé cu “binimento dje dia di Jehova, grandi i inspirador di temor.”—Joël 2:11, 28-32.

Un plaga dje promé siglo

3, 4. (a) Na ki tempo tabatin cumplimento di capítulo 2 di Joël, i di ki manera? (b) Di ki manera tabatin un plaga manera nubia di sprinkhan den e promé siglo di EC, i pa cuanto tempo e plaga a sigi?

³ Tabatin un cumplimento di Joël capítulo 2 den e promé siglo. Tabata ne tempo ei, na Pentecoste di aña 33 EC, cu e spiritu santo tabata bashá, pa ungi e promé hendenan cristian i dúnanan e poder pa papia “e cosnan magnífico di Dios” den hopi idioma. Como resultado, un multitud grandi a reuni. Apóstol Pedro a papia cu mirones asombrá, citando Joël 2:28, 29 i splicando cu nan tabata testigo di su cumplimento. (Echo 2:1-21) Pero no tin cuenta di un plaga di insecto mes ne tempo ei, pa causa irritacion pa algun hende i arrepentimento di otro.

⁴ Tabatin un plaga simbólico ne tempo ei? Sigur cu sí! El a bini como resultado di predicamento sin fin di hende cristian recién ungí.b Mediante nan, Jehova a invita hudío cu a scucha pa arrepenti i disfruta di bendicion biniendo di dje. (Echo 2:38-40; 3:19) Hende individual cu a responde a recibi su fabor te na un grado notable. Pero pa hende cu a rechaza e invitacion, hende cristian dje promé siglo a bira manera un nubia destructivo di sprinkhan. Cuminzando den Jerusalem, nan a plama den tur Hudea i Samaria. Pronto nan tabata na tur parti, tormentando hudío no creyente, declarando públicamente e resureccion di Jesús, hunto cu tur loke esei a encerra. (Echo 1:8; 4:18-20; 5:17-21, 28, 29, 40-42; 17:5, 6; 21:27-30) E plagamento a sigi te cu e “dia inspirador di temor,” na aña 70 EC, ora Jehova a manda ehército romano contra Jerusalem pa destruyé. E úniconan pa scapa tabata hende cristian cu a inboca e nomber di Jehova cu fe.—Joël 2:32; Echo 2:20, 21; Proverbio 18:10.

E plaga di sprinkhan awe

 5. Di ki manera e profecía di Joël tabatin un cumplimento desde 1919?

⁵ Ta razonabel pa nos spera e cumplimento final dje profecía di Joël den e tempo di fin. Esei a resulta di ser ki cierto! Den e asamblea di Studiante di Bijbel na Cedar Point, Ohío, EUA, dia 1-8 di September di 1919, un bashamento notable dje spiritu di Jehova a activa su pueblo pa organiza un campaña mundial di predicamento. Di tur hende cu a yama nan mes cristian, nan so, cu a reconoce entronizacion di Jesús como Rey celestial, a haci tur esfuerzo pa publica na tur parti e bon noticia. Nan testificacion sin fin, na cumplimento dje profecía, a bira un plaga, tormentando cristiandad apóstata.—Mateo 24:3-8, 14; Echo 1:8.

 6. (a) Kico Juan a mira ora angel di cinco a toca su trompet? (b) Ken e “strea” ta simboliza, i pakico?

⁶ Revelacion, skirbí mas cu 26 aña despues di destruccion di Jerusalem, també ta duna detaye dje plaga. Kico e ta agrega na detaye di Joël? Láganos leza e relato, cu Juan a skirbi: “I angel di cinco a toca su trompet. I mi a mira un strea cu a cai foi cielo na tera, i e yabi di poz dje abismo tabata duná na ne.” (Revelacion 9:1) E “strea” no ta e mesun strea di Revelacion 8:10 cu Juan a mira cai. El a mira “un strea cu a cai foi cielo” i cu awor tin un asignacion en relacion cu e tera. Esei ta un persona spiritual of carnal? Mas tardi e ta bisa cu esun cu tin “e yabi di poz dje abismo” ta tira Satanás den e “abismo.” (Revelacion 20:1-3) Pues, e tin cu ser un persona spiritual fuerte. Den Revelacion 9:11, Juan ta bísanos cu sprinkhan tin “un rey, e angel dje abismo.” E dos texto ta referi ne mesun persona, siendo cu e angel cu tin e yabi dje abismo lógicamente ta e angel dje abismo. I e strea mester simboliza e Rey ungí di Jehova, siendo cu cristian ungí ta reconoce un solo Rey angelical, Jesucristo.—Colosense 1:13; 1 Corintio 15:25.

 7. (a) Kico a sosode ora e “poz dje abismo” a habri? (b) Kico ta e “abismo,” i ken a pasa un tempo breve den dje?

⁷ E relato ta sigi: “I el a habri e poz dje abismo, i huma a subi for dje poz manera huma di un fornu grandi, i solo a bira scur, també e aire, pe huma dje poz. I dje huma a sali sprinkhan riba tera; i autoridad tabata duná na nan, e mesun autoridad cu scorpion dje tera tin.” (Revelacion 9:2, 3) Bíblicamente, e “abismo” ta un lugar di inactividad, i di asta morto. (Compara cu Romano 10:7; Revelacion 17:8; 20:1, 3.) E grupito di rumanan di Jesús tabata den e “abismo” di relativo inactividad pa poco tempo na fin dje promé gera mundial (1918-1919). Pero ora Jehova a basha su spiritu riba su sirbidornan cu a arrepenti na 1919, un nubia di nan a sali pa acepta e desafío dje trabao cu tabatin pa ser hací.

 8. Pakico tin hopi “huma” ora sprinkhan ta sali?

⁸ Segun cu Juan a mira, hopi huma a subi hunto cu salimento di sprinkhan, manera e “huma di un fornu grandi.”c Esei ta loke a sosode na 1919. E situacion a bira scur pa cristiandad i pe mundo en general. (Compara cu Joël 2:30, 31.) E salimento di sprinkhan, esta, e grupo cu Juan a simboliza, realmente tabata un derota pe clero di cristiandad, cu a conspirá i a traha complot pa caba cu e trabao di Reino pa semper i cu awor a rechaza e Reino di Dios. Evidencia di un nubia di huma simbólico a cuminza plama riba cristiandad apóstata ora e nubia di sprinkhan tabata duná autoridad divino i nan a cuminza eherce esei proclamando mensahe fuerte di huicio. E “solo” di cristiandad—esta, e aparencia di iluminacion cu el a presenta—a haya eclipse, i e “aire” a yena cu declaracion di huicio divino ora “sprinkhan” a mustra cu e “gobernante di autoridad di laira” dje mundo aki ta dios di cristiandad.—Efesio 2:2; Juan 12:31; 1 Juan 5:19.

Sprinkhan tormentador!

 9. Cua instruccion pa bataya sprinkhan a recibi?

⁹ Cua instruccion di bataya sprinkhan a recibi? Juan ta informa: “I nan a wordu bisá pa no daña mata dje tera ni nada berde ni ningun palu, sino solamente hende cu no tabatin e seyo di Dios riba nan frenta. I tabata permiti pa sprinkhan no mátanan sino tormentánan pa cinco luna, e tormento riba nan tabata manera tormento di scorpion ora e ta pica hende. I den e dianan ei hende lo busca morto pero di ningun manera hayé, i nan kier muri pero morto ta sigi hui di nan.”—Revelacion 9:4-6.

10. (a) E plaga tabata mandá directamente contra ken principalmente, i cu cua efecto riba nan? (b) Esei ta enbolbe ki clase di tormento? (Mira nota també.)

¹⁰ Ripara cu e plaga no ta dirigí promé contra e pueblo ni contra esnan prominente di nan—esta, ‘mata i palu dje tera.’ (Compara cu Revelacion 8:7.) Sprinkhan tin cu causa daño solamente na hende cu no tin e seyo di Dios riba nan frenta, hende di cristiandad cu ta bisa cu nan ta seyá pero kende nan historia ta desmenti nan palabra. (Efesio 1:13, 14) Pues, declaracion tormentador di sprinkhan djawe tabata dirigí promé contra guía religioso di cristiandad. Cuanto tormento tal hende halzá mester a sufri ora nan a tende anuncio público di cu nan no solamente no por hiba nan tao cielo ma ni nan mes no por yega cielo!d Siguramente esei ta un caso di ‘ciegu ta guia ciegu’!—Mateo 15:14.

11. (a) Pa cuanto tempo sprinkhan ta autorizá pa tormenta enemigo di Dios, i pakico esei realmente no ta poco tempo? (b) Ki severo ta e tormento?

¹¹ E tormento ta dura pa cinco luna. Esei ta relativamente poco tempo? No desde e punto di bista di sprinkhan mes. Cinco luna ta normalmente e duracion dje bida di tal insecto. P’sei, pa tanto tempo cu sprinkhan djawe ta na bida, nan ta sigi pica enemigo di Dios. Además, e tormento ta asina severo cu hende ta busca morto. Ta cierto cu no tin cuenta di cu ningun hende cu sprinkhan a pica realmente ta purba di mata nan curpa. Pero e expresion ta dúnanos un idea dje intensidad dje tormento—como si nan ta bao di atake sin fin di scorpion. Esei ta manera e sufrimento cu Jeremías a mira di antemano pa infiel israelita cu conquistador babilónico a plama i cuanan a prefera di muri en bez di biba.—Jeremías 8:3; mira també Eclesiastés 4:2, 3.

12. Pakico sprinkhan ta permití di tormenta lider religioso di cristiandad, den un sentido spiritual, pero pa no mátanan?

¹² Pakico tabata permiti pa tormentá den un sentido spiritual i no mata tal hende? Esei ta un calamidad inicial denunciando mentira di cristiandad i su fracaso, pero solamente despues, cu e pasamento dje dia di Señor, su estado spiritual como si fuera morto lo ser hací público completamente. Lo ta durante e segundo calamidad cu un tercera parti di humanidad lo ser matá.—Revelacion 1:10; 9:12, 18; 11:14.

Sprinkhan armá pe bataya

13. Splica aparencia di sprinkhan.

¹³ Ki un aparencia extraordinario tal sprinkhan tini! Juan a duna detaye: “I e aparencia di sprinkhan ta parce cabai prepará pa bataya; i riba nan cabez tabatin loke a parce corona di oro, i nan cara tabata manera cara di hende, pero nan tabatin cabei manera cabei di muher. I nan djente tabata manera djente di león; i nan tabatin coraza manera coraza di heru. I e sonido di nan hala tabata manera sonido di garoshi di gera di hopi cabai corriendo pa bataya.”—Revelacion 9:7-9.

14. Pakico detaye cu Juan a duna di sprinkhan ta apropiado pe grupo di cristian rebibá na 1919?

¹⁴ Esei ta wel pinta e grupo leal di cristian rebibá na 1919. Manera cabai, nan tabata cla pe bataya, ansioso pa bringa pe berdad manera apóstol Pablo a detayá. (Efesio 6:11-13; 2 Corintio 10:4) Riba nan cabez Juan a mira loke a parce corona di oro. No ta propio pa nan bisti corona mes pasobra nan no ta cuminza reina durante cu nan ta riba tera ainda. (1 Corintio 4:8; Revelacion 20:4) Pero na 1919 nan tabatin caba un aparencia real. Nan tabata ruman dje Rey, i nan corona celestial tabata reserbá pa nan, con tal cu nan a sigi fiel te na fin.—2 Timoteo 4:8; 1 Pedro 5:4.

15. Kico ta ser indicá, ya cu sprinkhan tin (a) coraza di heru? (b) cara di hende? (c) cabei di muher? (d) djente di león? (e) ta haci hopi ruido?

¹⁵ Den e vision, sprinkhan tabatin coraza di heru, simbolizando husticia inquebrantable. (Efesio 6:14-18) Nan també tabatin cara di hende, locual a señalá ne calidad di amor, ya cu hende tabata trahá den imagen di Dios, cu ta amor. (Génesis 1:26; 1 Juan 4:16) Nan cabei tabata largu manera cabei di muher, locual ta wel simboliza nan sumision na nan Rey, e angel di abismo. I nan djente a parce djente di león. León ta usa nan djente pa sker carni. Desde 1919 padilanti, e grupo cu Juan a simboliza por a recibi alimento spiritual sólido atrobé, specialmente e berdad tocante e Reino di Dios goberná pe “León cu ta dje tribu di Hudá,” esta, Jesucristo. Mescos cu león ta símbolo di curashi, asina hopi curashi ta necesario pa acepta e mensahe machicador, pa saqué den literatura, i pa plamé rond di mundo. Tal sprinkhan simbólico a haci hopi ruido, manera “e sonido di garoshi di gera di hopi cabai corriendo pa bataya.” Sigiendo ehempel di hende cristian dje promé siglo, nan no tin intencion di keda ketu.—1 Corintio 11:7-15; Revelacion 5:5.

16. E echo cu sprinkhan tin “rabu i pui manera scorpion” ta nifica kico?

¹⁶ Tal predicacion ta encerra mas cu palabra papiá! “També, nan tin rabu i pui manera scorpion; i den nan rabu nan tin autoridad pa lastimá hende pa cinco luna.” (Revelacion 9:10) Kico esei por nifica? Mientras cu nan ta haci nan trabao di Reino, Testigo di Jehova, haciendo uso di palabra papiá i publicacion imprimí, ta proclamá declaracion autoritativo fundá ariba e Palabra di Dios. Nan mensahe tin pui manera scorpion pasobra nan ta adverti hende dje dia binidero di vinganza di Jehova. (Isaías 61:2) Promé cu e generacion actual di sprinkhan spiritual ta pasa nan bida, e trabao cu Dios a ordena di declara e huicio di Jehova lo ser completá—pe lástima di tur blasfemador terco.

17. (a) Kico tabata anunciá den e asamblea di 1919 di Studiante di Bijbel cu a haci nan testimonio mas picante? (b) Di ki manera e clero a ser tormentá, i con nan a reacciona na esei?

¹⁷ E ehército di sprinkhan a alegra hopi ora e revista nobo yamá awor Despertad! tabata anunciá den nan asamblea na 1919. Esei tabata un revista publicá dos bez pa luna, pa intensifica picamento di nan testimonio.e Den su número 27, di 29 di September di 1920, el a denuncia e hipocresía dje clero persigiendo Studiante di Bijbel na América durante 1918 i 1919. Desde 1920 te cu 1930, Despertad! a tormenta e clero cu mas artículo picante i caricatura cu a denuncia nan astuto metemento den político, i specialmente conbenio cu e herarquía católico a cera cu dictador fascista i nazista. Reaccionando, e clero a ‘forma penoso afán mediante decreto’ i a organiza multitud desordená violento contra e pueblo di Dios.—Salmo 94:20.

Advertencia duná na gobernante di mundo

18. Sprinkhan tin cua trabao pa haci, i kico a sosode como reaccion ne tocamento di trompet di cinco?

¹⁸ Sprinkhan djawe tabatin un trabao pa haci. Nan tabatin cu predica e bon nobo di Reino. Nan tabatin cu denunciá error. Nan tabatin cu haya e carnénan perdí. Durante cu sprinkhan a haci nan trabao, mundo a keda obligá di tuma nota di loke tabata sosode. Den obedencia na tocamento di trompet di angel, e grupo cu Juan a simboliza a sigi denuncia cristiandad, mustrando cu e ta merece e huicio desfavorable di Jehova. Reaccionando na tocamento di trompet di cinco, nan a duna énfasis na un aspecto special dje huicio den un asamblea di Studiante di Bijbel den Londres, Inglaterra, dia 25 te 31 di Mei di 1926. Nan a presenta un declaracion, “Un testimonio pa gobernante di mundo,” i un discurso público den Royal Albert Hall tocante “Pakico poder mundial ta tambaleá—e remedi,” i e discurso i declaracion completo tabata publicá den e curant principal di Londres su mañan. Despues, e ehército di sprinkhan a parti mundialmente, den forma di tratado, 50 miyón copia dje declaracion—un tormento en berdad pe clero! Hopi aña despues, hende di Inglaterra tabata papia ainda dje denuncio picante.

19. Cua otro arma di combate sprinkhan simbólico a recibi, i kico el a bisa tocante e declaracion di Londres?

¹⁹ Ne asamblea, sprinkhan simbólico a recibi mas equipo di combate, notablemente e buki nobo titulá Liberacion. El a contene un splicacion bíblico dje siñal dunando prueba cu e gobierno cu e ‘yiu homber’ ta simboliza, esta, e Reino celestial di Cristo, a nace na 1914. (Mateo 24:3-14; Revelacion 12:1-10) Despues, el a cita e declaracion publicá den Londres na 1917 cu ocho clero a firma, locual tabata pintá como “entre e mihor predicadornan di mundo.” Nan a representa religion protestante principal—bautista, congregacional, presbiteriano, anglicano, i metodista. E declaracion a bisa cu “e crisis actual ta siñalá ne fin di tempo gentil” i cu “nos por spera e revelacion di Señor na cualkier momento.” Sí, tal clero a reconoce e siñal dje presencia di Jesús! Pero, nan a deseá di haci algo tocante dje? E buki Liberacion ta bísanos: “E parti mas notable dje asunto ta cu e mesun hendenan cu a firma e declaracion a nengué despues i a rechaza evidencia cu ta duna prueba cu nos ta na fin di mundo i den e dia dje segunda presencia di Señor.”

20. (a) Cua decision e clero a tuma en cuanto e ehército di sprinkhan i nan Rey? (b) Segun Juan, ken ta cabez dje ehército di sprinkhan, i con su nomber tá?

²⁰ En bez di anuncia e binidero Reino di Dios, e clero di cristiandad a decidi di keda den e mundo di Satanás. Nan no kier tene nada cu ber cu e ehército di sprinkhan i nan Rey, tocante locual Juan a bisa lo sigiente: “Nan tin un rey riba nan, e angel di abismo. Na hebreo su nomber ta Abadón [cu kier men “Destruccion”], pero na griego e tin e nomber Apolión [cu kier men “Destructor”].” (Revelacion 9:11) Como “angel di abismo” i “Destructor,” Jesús realmente a los un calamidad manera plaga riba cristiandad. Pero mas ta sigi!

[Nota]

[Plachi na página 143]

E tocamento di trompet di cinco a introduci e promé di tres calamidad

[Plachi na página 146]

Bo flecha ta skerpi den curazón di enemigo dje rey. (Salmo 45:5) E caricatura, hunto cu e título, ta típico di hopi publicá despues di 1930 cu a pica “hende cu no tin e seyo di Dios”

[Plachi na página 147]

Royal Albert Hall, unda e buki Liberacion tabata presentá i nan a adopta e declaracion “Un testimonio pa gobernante di mundo”