ලෙවී කතාව
5 “‘යමෙකු යම් වරදකට+ අදාළ වන දෙයක් දැක ඇත්නම් හෝ දැන සිටිනවා නම් හෝ ඔහු එම වරදට සාක්ෂිකරුවෙකි. ඒ ගැන සාක්ෂි දරන්න කියා ප්‍රසිද්ධ නිවේදනයක්* දුන් පසුවත් ඔහු ඒ ගැන සාක්ෂි නොදී සිටියොත්+ එය පාපයකි. ඔහු තම වරදට වග කිව යුතුයි.
2 “‘යමෙකු අපවිත්‍රයයි සැලකෙන වනමෘගයෙකුගේ හෝ හීලෑ සතෙකුගේ හෝ කුඩා සතෙකුගේ හෝ මළ කඳක් ස්පර්ශ කළොත්+ ඔහු අපවිත්‍රය. ඒ නිසා ඔහු වරදකරුවෙක් වන්නේය.+ 3 යමෙකු මිනිසෙකුව අපවිත්‍ර කළ හැකි ඕනෑම දෙයක්+ එනම්, අපවිත්‍ර මිනිසෙකු හෝ අපවිත්‍ර යමක් ස්පර්ශ කළොත් ඔහු එය නොදැනුවත්කමින් කළත් ඒ ගැන දැනගත් පසු ඔහු වරදකරුවෙක් වන්නේය.
4 “‘යමෙකු දුර දිග නොබලා නපුරක්+ හෝ යහපතක් හෝ කරන බවට දිවුරුමක්+ දුන් විට ඔහු වරදකරුවෙක් වන්නේය. එම දිවුරුම දෙන අවස්ථාවේදී එහි බැරෑරුම්කම ගැන ඔහු නොදැන සිටියත් ඔහු වරදකරුවෙක් වන්නේය.+
5 “‘යමෙකු ඉහත කී එක් කාරණයක් සම්බන්ධයෙන් හෝ වරදකරුවෙකු වේ නම් ඔහු තමා කළ පාපය හෙළි+ කළ යුතුයි. 6 ඔහු තමා කළ පාපයට වන්දියක් වශයෙන් යෙහෝවා දෙවි වන මට පූජාවක් ඔප්පු කළ යුතුයි. එය වන්දි පූජාවකි.+ ඔහු පූජාව සඳහා රැළෙන් බැටළු පැටවෙකුව හෝ එළු පැටවෙකුව හෝ ගෙනා යුතුයි. ඔහු එම පාප පූජාව සඳහා ගෙනා යුත්තේ ගැහැනු සතෙකි.+ ඔහු කළ පාපයට සමාව ලබාගන්නා පිණිස පූජකයා ඔහු ගෙනා පූජාව ඔප්පු කළ යුතුයි.+
7 “‘ඔහුට බැටළුවෙකු ගෙන ඒමට තරම් වත්කමක් නැත්නම්+ තමා කළ පාපය වෙනුවෙන් වන්දි පූජාවක් ලෙස යෙහෝවා දෙවි වන මට කොබෙයියන් දෙදෙනෙකුව+ හෝ පරෙවි පැටවුන් දෙදෙනෙකුව හෝ ගෙනා යුතුයි. ඉන් එක් කුරුල්ලෙකු පාප පූජාව සඳහාය.+ අනික් කුරුල්ලා දවන පූජාව සඳහාය. 8 ඔහු කුරුල්ලන් දෙදෙනාව පූජකයා වෙත ගෙනා යුතුයි. පූජකයා මුලින්ම ඔප්පු කළ යුත්තේ පාප පූජාව සඳහා ගෙනා කුරුල්ලාවය. ඔහු උගේ බෙල්ල කැඩිය+ යුතුයි. නමුත් එසේ කළ යුත්තේ බෙල්ල කඳෙන් වෙන් නොවන ආකාරයටය. 9 ඔහු පාප පූජාව සඳහා ඔප්පු කරන කුරුල්ලාගේ ලේ ස්වල්පයක් පූජාසනයේ පැත්තකින් ගලා යන්න සැලැස්විය යුතුයි. ඉතුරු ලේ ටික පූජාසනයේ පාමුලට වත් කළ යුතුයි.+ එය පාප පූජාවකි. 10 ඔහු අනික් කුරුල්ලාව දවන පූජාවක් ලෙස ඔප්පු කළ යුතුයි. සාමාන්‍යයෙන් දවන පූජා ඔප්පු කරන ආකාරයටම එයද ඔප්පු කළ යුතුයි.+ ඔහු කළ පාපයට සමාව+ ලබාගන්නා පිණිස පූජකයා එම පූජා ඔප්පු කළ යුතුයි. එවිට ඔහුට සමාව ලැබෙයි.+
11 “‘ඔහුට කොබෙයියන් දෙදෙනෙකුව හෝ පරෙවි පැටවුන් දෙදෙනෙකුව ගෙන ඒමට තරම්වත් වත්කමක් නැත්නම්+ ඔහු තමා කළ පාපය වෙනුවෙන් සිහින් පිටි ඒපාවකින්*+ දහයෙන් කොටසක් ගෙනා යුතුයි. එය පාප පූජාවකි.+ එය පාප පූජාවක් වන නිසා ඔහු ඒ මත තෙල්වත්+ කට්ටකුමංජල්වත් නොදැමිය යුතුයි. 12 ඔහු එය පූජකයා වෙතට ගෙනා යුතුයි. පූජකයාද සිහිගැන්වීමක්+ වශයෙන් එයින් අහුරක් ගෙන, යෙහෝවා දෙවි වන මට පූජාසනය මත ඔප්පු කළ අනික් පූජාවන් සමඟ එයද දැවිය යුතුයි.+ එය පාප පූජාවකි.+ 13 යමෙකු ඉහත කී එක් කාරණයක් සම්බන්ධයෙන් හෝ වරදකරුවෙකු වේ නම් ඔහුගේ පාපයට සමාව ලබාගන්නා පිණිස+ පූජකයා ඔහු ගෙනා පූජාව ඔප්පු කළ යුතුයි. එවිට ඔහුට සමාව ලැබෙයි. ධාන්‍ය පූජාවෙන් ඉතුරු වන කොටස මෙන් එම පූජාවෙන් ඉතුරු වන කොටසද පූජකයන්ට අයිති වන්නේය.’”+
14 යෙහෝවා දෙවි මෝසෙස්ට තවදුරටත් මෙසේ කීවේය. 15 “යමෙකු යෙහෝවා දෙවි වන මාගේ ශුද්ධ දේවල් කෙලෙසන අයුරින් ක්‍රියා කර නොදැනුවත්වම පව් කළොත්+ ඔහු අවිශ්වාසවන්ත ලෙස කටයුතු කළ නිසා යෙහෝවා දෙවි වන මට වන්දි පූජාවක් ඔප්පු කළ යුතුයි.+ ඔහු වන්දි පූජාව සඳහා නිකැළැල් බැටළුවෙකුව ගෙනා යුතුයි. ඌ නියම කරන ලද රිදී ෂෙකෙල්*+ ප්‍රමාණයේ වටිනාකමට සරිලන බැටළුවෙකු විය යුතුයි. නියම කරන ලද ෂෙකෙලයේ බර ශුද්ධස්ථානයේ තිබෙන ෂෙකෙලයේ බරට සමාන විය යුතුයි. 16 ඔහු ශුද්ධස්ථානයට විරුද්ධව කළ පාපය වෙනුවෙන් වන්දියක් ගෙවිය යුතුයි. නියම කළ වන්දියද එයින් පහෙන් කොටසක්ද+ ඔහු ගෙනැවිත් පූජකයාට දිය යුතුයි. ඔහු කළ පාපයට සමාව ලබාගන්නා පිණිස+ වන්දි පූජාව සඳහා ගෙනා බැටළුවාව පූජකයා ඔප්පු කළ යුතුයි. එවිට ඔහුට සමාව ලැබෙයි.+
17 “යමෙකු යෙහෝවා දෙවි වන මාගේ ආඥාවක් කඩ කර පව් කළොත්, ඔහු එය නොදැනුවත්කමින් කළත්+ වරදකරුවෙක් වන්නේය. ඔහු තම වරදට වග කිව යුතුයි.+ 18 ඔහු වන්දි පූජාවක් වශයෙන් නිකැළැල් බැටළුවෙකුව ගෙනැවිත් පූජකයාට දිය යුතුයි.+ ඌ, නියම කරන ලද වටිනාකමට සරිලන බැටළුවෙකු විය යුතුයි. නොදැනුවත්කමින් හෝ ඔහුගේ අතින් සිදු වූ වරදට සමාව ලබාගන්නා පිණිස+ පූජකයා එම බැටළුවාව ඔප්පු කළ යුතුයි. එවිට ඔහුට සමාව ලැබෙයි.+ 19 එය වන්දි පූජාවකි. මන්ද ඔහු යෙහෝවා දෙවි වන මා ඉදිරියේ වරදකරුවෙකි.”+