යෙසායා
1 ආමොෂ්ගේ පුත් යෙසායාට+ යූදා සෙනඟ ගැනත් යෙරුසලමේ වැසියන් ගැනත් ලැබුණු දර්ශනය+ මෙයයි. ඔහුට මෙම දර්ශනය ලැබුණේ යූදාහි රජවරුන්+ වන උසියා,+ යෝතම්,+ ආහස්+ සහ හෙසකියාගේ+ පාලන සමයේදීය.
2 ස්වර්ගයෙත් පොළොවෙත් ජීවත් වන සියල්ලෙනි, දැන් යෙහෝවා දෙවි පවසන මේ දේට සවන් දෙන්න.+ “මා හදා වඩා ගත්+ මගේම පුත්‍රයෝ මට ද්‍රෝහි වුණෝය.+ 3 ගවයෙක් උගේ අයිතිකරුවද බූරුවෙක් උගේ ගාලද හොඳින් හඳුනාගෙන සිටින්නේය. එහෙත් ඊශ්‍රායෙල්වරු මාව හඳුනාගෙන නැත.+ මගේම සෙනඟ දැනුම් තේරුම් ඇතුව කටයුතු කරන්නේ නැත.”+
4 මොවුහු පව්කාර ජාතියකි.+ බරපතළ වැරදි කරන දුෂ්ට සෙනඟකි.+ යෙහෝවා දෙවිව අත්හැර+ ගිය මේ සෙනඟ දරුණු ලෙස හැසිරෙන පුත්‍රයෝය.+ ඔවුහු ඊශ්‍රායෙල්හි ශුද්ධ තැනැත්තාණන්ට පිටු පාමින්+ ඔහුට අගෞරව කළෝය.+ ඒ නිසා ඔවුන්ට අත් වන්නේ දුක පමණි! 5 ඔබ දිගින් දිගටම දෙවිට විරුද්ධව කැරලිගසමින්+ තව තවත් දඬුවම් විඳින්නේ+ මන්ද? ඔබේ හිස තුවාල වී ඇත. සිත හොඳටම දුර්වල වී ඇත.+ 6 ඔබේ හිස මුදුනේ සිට පතුල දක්වාම කැපුම්ද තැළුම්ද දරුණු තුවාලද පෙනෙන්න තිබේ.+ ඔබේ තුවාලවලින් සැරව ගලන්නේය. ඒවා පිරිසිදු කර බෙහෙත් තෙල් දමා බැඳ නැත.+ 7 ඔබේ දේශය පාළුවට ගොස්+ ඔබේ නගර ගිනිබත් වී ඇත.+ විදේශිකයෝ+ ඔබේ ඇස් පනාපිටම ඔබේ දේශය නැති නාස්ති කළෝය.+ එය සතුරු ආක්‍රමණයට හසු වී පාළුවට ගිය දේශයක් මෙනි.+ 8 සියොන්+ දියණියව අත්හැර ගොස් ඇත. ඇය මිදිවත්තක මඩුවක් මෙන්ද පිපිඤ්ඤා වත්තක පැල්පතක් මෙන්ද වැටලූ නගරයක් මෙන්ද පාළුවට ගොස් ඇත.+ 9 ස්වර්ගයේ සේනාවල අධිපති වන යෙහෝවා දෙවිගේ කරුණාව නිසා අපෙන් අතළොස්සක් ඉතුරු වී සිටිති.+ එසේ නොවුණා නම් අප සොදොම් සහ ගොමෝරාව මෙන් නැත්තටම නැති වී යනු ඇත.+
10 සොදොම්හි+ කෲර පාලකයෙනි,+ යෙහෝවා දෙවිගේ වදන්වලට ඇහුම්කන් දෙන්න.+ ගොමෝරාවේ ජනයෙනි, අපේ දෙවිගේ නීතියට සවන් යොමු කරන්න. 11 යෙහෝවා දෙවි ඔබට මෙසේ පවසයි. “ඔබ මට අනන්ත අප්‍රමාණ පුදපූජා ඔප්පු කළත් මට ඒවායින් කිසි ප්‍රයෝජනයක් තිබේද? දවන ලද+ බැටළු+ පූජා හා තර කළ සතුන්ගේ තෙල+ දැකීම පවා මට දැන් පිළිකුලකි. වසු පැටවුන්ගේද බැටළු පැටවුන්ගේද එළුවන්ගේද+ ලෙයින්+ මම කිසි සතුටක් නොලබමි.+ 12 මගේ මාලිගාවට පැමිණ මා ඉදිරියේ පෙනී සිටින්න කියා ඔබට පැවසුවේ කවුද?+ ඔබ මෙතැනට පැමිණ මගේ මාලිගාවේ මළුව පාගා දමන්නේ මන්ද?+ 13 ඔබ මා ඉදිරියට තවත් ධාන්‍ය පූජා රැගෙන නොඑන්න.+ ඒවායින් මට කිසි පලක් නැත. ඔබ මා ඉදිරියේ ඔප්පු කරන සුවඳ දුම්ද මට පිළිකුලක්ය.+ ඔබ නව සඳ පායන දවස්ද+ සබත් දවස්ද+ සමරන්නහුය. විශේෂ රැස්වීම්ද පවත්වන්නහුය.+ එහෙත් ඔබ මන්තර ගුරුකම්වලින්+ ඒ ශුද්ධ දවස් දූෂ්‍ය කර තිබේ. ඒ නිසා මම ඒ සියල්ල හෙළාදකින්නෙමි. 14 ඔබ නව සඳ පායන දවස් හා වෙනත් උත්සව සමරන විට එය මට මහත් පිළිකුලකි.+ එය මා පිට පැටවූ විශාල බරක් මෙනි.+ එය උසුලාගෙන යෑමත් මට දැන් වෙහෙසකරය.+ 15 ඔබ අත් දෙක ඔසවා+ මට කන්නලව් කළත් මම අහක බලාගන්නෙමි.+ ඔබ මොන තරම් යාච්ඤා කළත්+ මම සවන් නොදෙන්නෙමි.+ මන්ද ඔබේ දෑත්වලින් ඔබ බොහෝ ලේ වගුරුවා ඇත.+ 16 දැන් නාගෙන+ පවිත්‍ර වෙන්න.+ තවත් මා ඉදිරියේ දුෂ්ටකම් නොකරන්න.+ නපුරු දේ අත්හරින්න.+ 17 යහපත් දේ කරන්න ඉගෙනගන්න.+ යුක්තිය කුමක්ද කියා සොයා බලන්න.+ පීඩා කරන්නාට තරවටු කර ඔහුව හරි මඟට ගන්න.+ පියා නැති දරුවාට සාධාරණ විනිශ්චයක් දෙන්න.+ වැන්දඹුව වෙනුවෙන් කතා කර ඇයට යුක්තිය ඉටු කර දෙන්න.”+
18 යෙහෝවා දෙවි තවදුරටත් මෙසේ පවසයි. “ජනයෙනි, එන්න. අපි සාකච්ඡා කර මෙම ප්‍රශ්නය නිරාකරණය කරගනිමු.+ නැවතත් මා සමඟ හොඳ සබඳතාවක් ඇති කරගන්නා ආකාරය මම ඔබට කියා දෙන්නෙමි. ඔබේ පාප රතට රතේ තිබුණත් මම ඒවා හිම මෙන් සුදු වෙන්න සලස්වන්නෙමි.+ තද රතු සායම් යෙදූ වස්ත්‍රයක් මෙන් තිබුණත් ඒවා සුදු ලොම් මෙන් වීමට සලස්වන්නෙමි. 19 ඔබ මා පවසන දේට සවන් දී කීකරු වෙනවා නම් දේශයේ හොඳම පලදාව ඔබ භුක්ති විඳිනු ඇත.+ 20 නමුත් මට සවන් නොදී දිගටම මුරණ්ඩු ලෙස කටයුතු කළොත්+ ඔබ කඩුවෙන් මැරුම් කන්නහුය. මේ සියල්ල පවසන්නේ යෙහෝවා දෙවි වන මමය.”+
21 අනේ, විශ්වාසවන්තව සිටි නුවරට+ කුමක් සිදු වී ඇද්ද? ඇය දැන් ගණිකාවක් මෙනි!+ යුක්තියත්+ ධර්මිෂ්ඨකමත් රකිමින් සිටි නුවර+ දැන් මිනී මරුවන්ගේ වාසස්ථානයක් බවට පත් වී ඇත.+ 22 ඔබේ රිදී දැන් කිසි වටිනාකමක් නැති බොර මෙනි.+ ඔබේ බීරවලට වතුර දමා බාල කර ඇත.+ 23 ඔබේ පාලකයෝ මුරණ්ඩුය. ඔවුන් මිතුරුකම් පවත්වන්නේ සොරුන් සමඟය.+ ඔවුහු අල්ලසට ආශා කරති.+ තෑග්ගක්+ ලබාගැනීමට බොහෝ සෙයින් වෙහෙසෙති. පියා නැති දරුවාට සාධාරණ විනිශ්චයක් නොදෙන ඔවුහු වැන්දඹුවගේ පැමිණිල්ලවත් ගණනකට ගන්නේ නැත.+
24 එබැවින් සැබෑ ස්වාමීන්ද ස්වර්ගයේ සේනාවල අධිපතිද ඊශ්‍රායෙල්හි බලවත් තැනැත්තාද+ වන යෙහෝවා දෙවි මෙසේ පවසයි. “මගේ සතුරන්ට+ මම නිසි දඬුවම්+ ලබා දෙන්නෙමි. මට විරුද්ධව නැඟී සිටින සියල්ලන්ව මම නැත්තටම නැති කරන්නෙමි. 25 බොර වැනි වූ ඔබේ සියලු අපවිත්‍රකම් මම මගේම අතින් ඉවත් කරන්නෙමි.* ඔබේ සියලු කිලුටුකම්ද ඉවත් කර+ ඔබව පිරිසිදු තත්වයකට ගෙනෙන්නෙමි. 26 මම පෙර මෙන් ඔබ වෙනුවෙන් ධර්මිෂ්ඨ විනිශ්චයකරුවන්ව හා උපදේශකයන්ව පත් කරන්නෙමි.+ එවිට ඔබව ධර්මිෂ්ඨ නුවරක් ලෙසත් විශ්වාසවන්ත නගරයක්+ ලෙසත් හඳුන්වනු ඇත. 27 සාධාරණ විනිශ්චයකින් සියොන්ව මුදවාගනු ඇත.+ මා ධර්මිෂ්ඨකමින් පියවර ගන්නා නිසා ඇගේ සෙනඟ නැවතත් ඇය වෙතට පැමිණෙන්නෝය.+ 28 නමුත් ඒ කාලයේදී යෙහෝවා දෙවි වන මාව අත්හැර යන කැරලිකාරයන්ටත් පව්කාරයන්ටත් අත් වන්නේ විනාශයයි.+ ඒ සියල්ලෝම එක්ව විනාශ වී යන්නෝය.+ 29 ඔවුහු තමන් ආශා කළ විශාල ගස් නිසා ලැජ්ජාවට පත් වෙති.+ තමන් තෝරාගත් උයන් නිසා නින්දාවට පත් වනු ඇත.+ 30 ඔවුහු මැලවී ඇති විශාල ගසක් මෙන්ද+ වතුර නොමැතිව වියළී ගිය උයනක් මෙන්ද වන්නෝය. 31 බලවන්තයා හණ කෙන්දක් මෙන්ද+ ඔහුගේ ක්‍රියා ගිනිපුපුරක් මෙන්ද වන්නේය. ඔහුත් ඔහුගේ ක්‍රියාත් ගින්නෙන් දැවී විනාශ වී යනු ඇත. ඒ ගින්න නිවා දමන්න කිසිවෙකු සමත් නොවෙයි.”+