රෝම
11 මා දැන් අසන ප්‍රශ්නය නම් දෙවි තම සෙනඟව සම්පූර්ණයෙන්ම ප්‍රතික්ෂේප කළාද යන්නයි.+ නැත. කිසිවිටකත් එසේ නොසිතන්න. මන්ද මාත් ආබ්‍රහම්ගෙන් පැවතෙන ඊශ්‍රායෙල් ජාතිකයෙකි.+ මා අයත් වන්නේ බෙන්ජමින් ගෝත්‍රයටය.+ 2 එහෙයින් දෙවි මුලින්ම පිළිගත් තම සෙනඟව+ ප්‍රතික්ෂේප කර ඇති බව කිව නොහැක. එලියා ගැන ශුද්ධ ලියවිල්ලෙහි සඳහන් දේ ඔබට අමතකද? ඔහු ඊශ්‍රායෙල්වරුන්ට විරුද්ධව දෙවිට මෙසේ කන්නලව් කළේය.+ 3 “යෙහෝවා දෙවියනි, ඔවුන් ඔබේ පූජාසන ගලවා දැමුවා. ඔබේ අනාගතවක්තෘවරුන්ව මරා දැමුවා. ඉතුරුව සිටින්නේ මා පමණයි. ඔවුන් මාවද මරා දමන්න සොයනවා.”+ 4 නමුත් දෙවි ඔහුට පිළිතුරු දුන්නේ කෙසේද?+ දෙවි මෙසේ පැවසුවේය. “බාල් ඉදිරියේ දණ නොනැමූ+ මට විශ්වාසවන්ත වූ හත්දහස්දෙනෙක් තවමත් ඊශ්‍රායෙල් දේශයේ ජීවත් වෙති.” 5 ඒ ආකාරයටම මේ කාලයේදීත් කුඩා පිරිසක් ඉතුරුව සිටිති.+ ඔවුන්ව තෝරාගෙන තිබෙන්නේ+ දෙවිගේ මහත් කරුණාව නිසාය. 6 එසේ තෝරාගෙන තිබෙන්නේ+ ඔවුන්ගේ ක්‍රියා නිසා නොවේ.+ ඔවුන්ගේ ක්‍රියා නිසා ඔවුන්ව තෝරාගෙන තිබුණා නම් දෙවි පෙන්වන කරුණාව මහත් කරුණාවක් ලෙස සැලකිය නොහැක.+
7 එසේනම් අපට මේ ගැන කිව හැක්කේ කුමක්ද? එනම් ඊශ්‍රායෙල් ජාතිය මහත් ආශාවකින් ලබාගැනීමට උත්සාහ කළ දේ ඔවුන්ට ලබාගත නොහැකි වූ බවය.+ ඒ දේ හිමි වූයේ ඔවුන් අතරින් තෝරාගත් පිරිසකට පමණි.+ සෙසු අය ක්‍රියා කළේ මුරණ්ඩු ආකාරයටය.+ 8 ඒ අය ගැන ලියවිලිවල සඳහන් වී තිබෙන්නේ මෙයයි. “දෙවි ඔවුන්ව තද නින්දකට වැටෙන්න සලස්වා ඇත.+ එහෙයින් අද වන තුරුම ඔවුන් ඇසූ දුටු මේ දේවල නියම අර්ථය තේරුම්ගන්න තරම් ශක්තියක් ඔවුන්ට දෙවිගෙන් ලැබී නැත.”+ 9 දාවිත් පවා මෙසේ සඳහන් කළේය. “ඔවුන් පිළියෙල කරගත් මේසය ඔවුන්ටම උගුලක් වේවා! එය ඔවුන්ගේ වැටීමටත් දඬුවමටත් හේතුවක් වේවා!+ 10 කිසිවක් දැකගැනීමට නොහැකි වන සේ ඔවුන්ගේ ඇස් අඳුරු කරන්න! ඔවුන්ගේ තුනටියේ ශක්තිය හීන වී යෑමට සලස්වන්න!”+
11 එසේනම් මා අසන්නේ, ඔවුන්ගේ වැටී යෑම ඔවුන්ව සහමුලින්ම නැති වී යෑමට+ හේතුවක් වූවාද යන්නයි. නැත. කිසිවිටකත් එසේ නොසිතන්න. නමුත් ඔවුන් ගත් වැරදි පියවර+ වෙනත් ජාතීන්ට අයත් මිනිසුන්ට ගැලවීමේ මඟ උදා කළේය.+ එය දුටු ඔවුන් තුළ ඊර්ෂ්‍යාවක් ඇති විය.+ 12 ඔවුන් ගත් වැරදි පියවර නිසාත් එහි ප්‍රතිඵලයක් ලෙස ඔවුන්ගෙන් තෝරාගත හැකි ගණන අඩු වී යන නිසාත් වෙනත් ජාතීන්ට අයත් මිනිසුන්ට එය ආශීර්වාදයක් විය.+ කෙසේවෙතත් මුළු සංඛ්‍යාව එකතු කරනු ලැබූ පසු ඊටත් වඩා බොහෝ ආශීර්වාද ලබාගැනීමට එය මාර්ගයක් වනු ඇත.+
13 මා දැන් කතා කරන්නේ වෙනත් ජාතීන්ට අයත් මිනිසුන් වන ඔබටය. ඇත්තෙන්ම වෙනත් ජාතීන්ට අයත් මිනිසුන් වෙතට යවනු ලැබූ+ නියෝජිතයෙකු*+ ලෙස මම මට පවරා ඇති සේවය+ මහත් ගෞරවයකින් සලකමි.+ 14 මා එසේ කරන්නේ යම් විදිහකින් මගේම සෙනඟ තුළ ඊර්ෂ්‍යාවක් ඇති කර ඔවුන්ගෙන් සමහරෙකුව+ ගලවාගැනීම සඳහාය.+ 15 ඇත්තෙන්ම ඔවුන්ව ප්‍රතික්ෂේප කිරීම+ වෙනත් ජාතීන්ට දෙවි සමඟ සමාදාන වීමට මඟ පෑදුවේය.+ නමුත් ඔවුන්ව නැවත පිළිගත්තොත් ඔවුන්ට මරණයෙන් ගැලවී ජීවනය ලබාගත හැකි වේ. 16 මන්ද පළමු පල ලෙස+ පිටි පිඩෙන් ගත් මුල් කොටස ශුද්ධ නම් මුළු පිටි පිඩම වන ඔවුන් ශුද්ධ විය යුතුයි. එලෙසම මුල ශුද්ධයි කියා සැලකේ නම්+ එහි අතු හා සමාන වන ඔවුන්ද ශුද්ධය.
17 නමුත් ඔලීව ගසේ සමහර අතු කපා ඉවත් කර වල් ඔලීව ගසකින් ගත් ඔබව ඉතුරු වී තිබෙන අතු අතර බද්ධ කර+ ඒ ඔලීව ගසේ සාරවත් මුලෙහි+ කොටස්කරුවන් කර ඇත්නම්,+ 18 කපා ඉවත් කළ ඒ අතුවලට සිදු වූ දේ ගැන සතුටු නොවන්න. නමුත් ඔබ ඒවාට සිදු වූ දේ ගැන සතුටු වේ නම්+ මුල පවතින්නේ ඔබ නිසා නොව+ ඔබ පවතින්නේ මුල නිසා බව මතක තබාගන්න.+ 19 ඇතැම්විට, “අතු කපා ඉවත් කළේ+ මාව බද්ධ කිරීමටයි”+ කියා ඔබ පවසනවා විය හැක. 20 ඒ දේ සිදු වූ බව ඇත්තයි! නමුත් ඔවුන්ව කපා ඉවත් කරන ලද්දේ ඔවුන්ට විශ්වාසයක් නොතිබුණු නිසා+ බව මතක තබාගන්න. ඔබ දිගටම එයට සම්බන්ධ වී සිටින්නේ ඔබේ විශ්වාසය නිසාය.+ එහෙයින් ඔබ ගැන ඕනෑවට වඩා නොසිතන්න.+ පරෙස්සම් වන්න.+ 21 මන්ද දෙවි ගසේ මුලින් තිබූ අතු කපා ඉවත් කළා නම් ඔහුට ඔබවත් එලෙස කපා ඉවත් කළ හැක.+ 22 එහෙයින් දෙවි තම කරුණාව පෙන්වූ ආකාරය+ මෙන්ම ඔහු දැඩි පියවර ගත් ආකාරය+ සැලකිල්ලට ගන්න. එවැනි දැඩි පියවර ගත්තේ වැටී ගිය අයට විරුද්ධවය.+ නමුත් ඔබට දෙවිගේ කරුණාව ලැබී තිබේ. ඔබට එය දිගටම ලැබෙන්නේ ඔහුගේ කරුණාව ලබන්න ඔබ සුදුසු තත්වයක දිගටම සිටියොත් පමණි.+ එසේ නැතහොත් ඔබවත් කපා ඉවත් කරනු ලැබේ.+ 23 මීට අමතරව මුලින් තිබූ අතු නැවතත් විශ්වාසයක් ඇති පුද්ගලයන් බවට පත් වුවහොත් ඔවුන්වද නැවත බද්ධ කරනු ලැබේ.+ මන්ද එසේ බද්ධ කිරීමට දෙවිට හැක. 24 ඔබව වල් ඔලීව ගසින් කපා වත්තක වවනු ලබන ඔලීව ගසකට බද්ධ කරනු ලැබුවා නම්+ එම ඔලීව ගසේ මුලින් තිබූ අතු නැවත ඒ ගසටම බද්ධ කිරීම ඊටත් වඩා කොතරම් පහසු වේද!+
25 සහෝදරයෙනි, මෙම පරිශුද්ධ රහස ගැන ඔබ අවබෝධයක් ලබාගන්නවාට මා කැමතිය.+ ඔබ ඒ ගැන අවබෝධයක් ලබා නොගත්තොත් ඔබ ඔබේම නුවණ මත රඳා සිටිනු ඇත. ඒ පරිශුද්ධ රහස නම් කැඳවනු ලබන වෙනත් ජාතීන්ට අයත් මිනිසුන්ගේ සංඛ්‍යාව+ සම්පූර්ණ වන තුරු+ ඊශ්‍රායෙල්වරුන්ගෙන් කොටසක් තම සිත් දැඩි කරගෙන සිටින බවය.+ 26 එලෙස මුළු ‘ඊශ්‍රායෙලයම’+ ගලවනු ලැබේ. ලියවිලිවල සඳහන් වන්නේ මෙයයි. “මිදුම්කරු සියොන්හි සිට පැමිණ,+ දෙවිට අගෞරවයක් ගෙන දෙන ක්‍රියා යාකොබ් අතරින් ඉවත් කරන්නේය.+ 27 මම ඔවුන්ගේ පාප ඉවත් කර දැමූ විට+ ඔවුන් සමඟ ගිවිසුමක් ඇති කරගන්නෙමි.”+ 28 ඔවුන් ශුභාරංචිය ප්‍රතික්ෂේප කළ නිසා ඔවුන් දෙවිගේ සතුරන් වන බව ඇත්තය.+ එයින් ප්‍රයෝජන ලබන්නේ ඔබය. නමුත් දෙවි ඔවුන්ගේ මුතුන්මිත්තන්ට දුන් පොරොන්දුව හේතුවෙන් ඔවුන්ගෙන් සමහරෙකුව තෝරාගනු ලබන නිසා ඔවුහු දෙවිගේ හිතවත් මිතුරෝ වනු ඇත.+ 29 මන්ද දෙවි තමන් දුන් දීමනා ගැන හෝ තමන් කැඳවූ අය ගැන හෝ කනගාටු වන්නේ නැත.+ 30 කලක් ඔබ දෙවිට අකීකරු වී සිටියත්+ දෙවිගේ දයාව ලබන්න ඔබට හැකියාව ලැබුණේ+ ඔවුන් අකීකරු වූ නිසාය.+ 31 ඔවුන්ගේ අකීකරුකම නිසා ඔබ දයාව ලැබුවා සේම ඔවුන්ටත් දැන් දයාව ලැබීමට අවස්ථාව උදා වී ඇත.+ 32 ඇත්තෙන්ම දෙවි ඔවුන් සියලුදෙනාටම අකීකරු වී සිටීමට ඉඩහැරියේය.+ ඔහු එසේ කළේ ඔවුන් සියලුදෙනාටම දයාව පෙන්වීම සඳහාය.+
33 දෙවි ලබා දෙන ආශීර්වාද කොතරම් ශ්‍රේෂ්ඨද!+ ඔහුගේ ප්‍රඥාවත්+ දැනුමත්+ කොතරම් පුළුල්ද! ඔහු දේවල් තීරණය කරන ආකාරය සහ ඔහු අනුගමනය කරන ක්‍රියාමාර්ග තේරුම්ගැනීම කොතරම් අමාරුද!+ 34 ඇත්තෙන්ම, “යෙහෝවා දෙවිගේ මනස තේරුම්ගත්තේ කවුද?+ එලෙසම ඔහුට ගුරුහරුකම් දිය හැක්කේ කාටද?”+ 35 “ඔහුගෙන් යමක් ලබාගැනීමට මුලින්ම ඔහුට යමක් දුන්නේ කවුද?”+ 36 මන්ද සියලු දේවල් සෑදුවේ ඔහුය. ඒවා දිගටම පවතින්නේ ඔහු නිසාය. එලෙසම ඒවා පවතින්නෙත් ඔහුගේ අරමුණ උදෙසාය.+ දෙවිට සදහටම ප්‍රශංසාවත් ගෞරවයත් ලැබේවා!+ ආමෙන්.