ක්‍රියා

11 වෙනත් ජාතීන්ද දෙවිගේ පණිවිඩය පිළිගත් බව යුදයෙහි සිටි යේසුස්ගේ නියෝජිතයන්ට* සහ ඔහුගේ අනිකුත් අනුගාමිකයන්ට* ආරංචි විය.+ 2 පේතෘස් යෙරුසලමට පැමිණි විට චර්මච්ඡේදනය වීමේ පිළිවෙතට පක්ෂව සිටි අය+ ඔහු සමඟ වාද කරන්න පටන්ගත්තෝය. 3 ඔවුන් චෝදනා කරමින් කියා සිටියේ ඔහු චර්මච්ඡේදනය නොවූ කෙනෙකුගේ නිවසකට ගොස් ඔහු සමඟ ආහාර ගත් බවයි. 4 එවිට පේතෘස් සිදු වූ දේවල් විස්තර කරමින් ඔවුන්ට මෙසේ කීවේය.

5 “මම දිනක් යොප්පා නුවරේ යාච්ඤා කරමින් සිටියදී දර්ශනයක් දැක්කා. මම දැක්කේ විශාල ලිනන් ඇතිරිල්ලක් හා සමාන යම් දෙයක් පොළොවට පහත් කරනු ලබන ආකාරයයි. එහි කොන් හතර අහස දෙසට එසවී තිබුණා. එය තබා තිබුණේ මා ළඟින්මයි. 6 මම එහි ඇතුළට එබී බැලූ විට පොළොවේ ජීවත් වන සිව්පාවුන්ද වනයේ සතුන්ද බඩ ගා යන සතුන්ද කුරුල්ලන්ද එහි සිටින ආකාරය දැක්කා.+ 7 ඉන්පසු මට මෙසේ කියනවා ඇසුණා. ‘පේතෘස් නැඟිටින්න! උන්ව මරා කන්න.’+ 8 නමුත් මම, ‘ස්වාමීනි, මම කවදාවත් කිසිම අපවිත්‍ර දෙයක් කාලා නැහැ. ඒ නිසා මට ඒ දේ කොහොමටවත් කරන්න බැහැ’+ කියා පැවසුවා. 9 එවිට නැවතත් අහසින් පැමිණි ඒ හඬ මට මෙසේ පැවසුවා. ‘දෙවි පවිත්‍ර කර ඇති දේ අපවිත්‍රයි කියා තවදුරටත් කියන්න එපා.’+ 10 එයාකාරයට තුන් වතාවක් ඒ හඬ ඇසුණු පසු මා ඉදිරියේ තිබූ ඇතිරිල්ල අහසට ඔසවාගනු ලැබුවා.+ 11 ඒ වේලාවේදීම මාව හමු වෙන්න මිනිසුන් තුන්දෙනෙක් අපි නතර වී සිටි නිවසට ඇවිත් හිටියා. ඔවුන් පැමිණ සිටියේ සිසේරියෙන්.+ 12 එවිට දෙවි තම බලයෙන්+ මට දැනුම් දුන්නා සැක නොකර ඔවුන් සමඟ යන්න කියා. ඉතින් මම දැන් මා සමඟ සිටින මේ සහෝදරයන් හයදෙනාත් සමඟ ඒ මිනිසාගේ නිවසට ගියා.+

13 “ඒ මිනිසා නිවසේ සිටින විට දේවදූතයෙක් ඇවිත්, ‘යොප්පාවට මිනිසුන් කිහිපදෙනෙකුව යවා පේතෘස් යන වාසගම දරන සීමොන්ව කැඳවාගෙන එන්න’+ කියා පැවසූ බව ඔහු අපට විස්තර කළා. 14 ‘ඒ තැනැත්තා ඔබටත් ඔබේ නිවසේ සිටින සියලුදෙනාටත් ගැලවීම ලබාගත හැකි ආකාරය ගැන පැහැදිලි කර දෙයි’+ කියාත් ඔහුට පවසා තිබුණා. 15 නමුත් මා ඔවුන්ට කතා කරන්න පටන්ගත් විටම, මුලින්ම අපටත් ලැබුණා සේම ඔවුන්ට දෙවිගේ බලය ලැබුණා.+ 16 එවිට අපේ ස්වාමීන් වන යේසුස් පැවසූ දෙයක් මට මතක් වුණා. ඔහු කිව්වේ, ‘යොහන් බව්තීස්ම කළේ වතුරෙන්.+ නමුත් ඔබව දෙවිගේ බලයෙන් බව්තීස්ම කරනු ලබනවා’+ කියායි. 17 ස්වාමීන් වන යේසුස් ක්‍රිස්තුස් කෙරෙහි විශ්වාසය තැබූ අපට+ නොමිලේ ලබා දුන් දීමනාවම දෙවි ඔවුන්ටත් දුන්නා නම් දෙවිට හරස් වෙන්න මම කවුද?”+

18 ඒ දේවල් ඇසූ පසු ඔවුහු සිදු වූ දේ පිළිගෙන,+ දෙවිට ප්‍රශංසා කරමින්,+ “දෙවි වෙනත් ජාතීන්ට අයත් මිනිසුන්ටත් පසුතැවිලි වී ජීවනය ලබාගැනීමේ ප්‍රස්තාව උදා කර ඇති බව අපට පැහැදිලියි”+ කියා පැවසූහ.

19 ස්තේපන්ගේ මරණයෙන් පසු හටගත් පීඩාව නිසා බොහෝදෙනෙක් ෆිනීෂියාව,+ සයිප්‍රසය+ සහ අන්තියෝකිය දක්වා විසිර ගියෝය.+ නමුත් ඔවුන් යුදෙව්වරුන්ට මිස වෙනත් කිසිම කෙනෙකුට දෙවිගේ පණිවිඩය ගැන කතා කළේ නැත.+ 20 ඔවුන් අතරින් සයිප්‍රසයෙන් සහ සිරේනියෙන් පැමිණි කිහිපදෙනෙක් අන්තියෝකියට ඇවිත්, ග්‍රීක බස කතා කළ ජනතාවට+ ස්වාමීන් වන යේසුස් ගැන ශුභාරංචිය ප්‍රකාශ කරන්න පටන්ගත්තෝය.+ 21 ඔවුන්ට යෙහෝවා දෙවිගේ උපකාරය+ ලැබුණු අතර බොහෝදෙනෙක් ස්වාමීන්ව විශ්වාස කරමින් ඔහුගේ අනුගාමිකයෝ වූහ.+

22 සිදු වූ දේ ගැන යෙරුසලමෙහි පිහිටි සභාවට ආරංචි වූ විට ඔවුහු බානබස්ව+ අන්තියෝකියට යැව්වෝය. 23 ඔහු එහි ගිය විට දෙවිගේ මහත් කරුණාව ඔවුන්ට ලැබී ඇති බව දැක+ ප්‍රීති වූයේය.+ ඉන්පසුව ස්ථිර අධිෂ්ඨානයකින් ස්වාමීන්ට විශ්වාසවන්තව සිටින්න කියා ඔහු ඔවුන් සියලුදෙනාටම දිරිගැන්වීය.+ 24 බානබස් ඉතා යහපත් මිනිසෙකි. ඔහු තුළ දෙවිගේ බලය ප්‍රබලව ක්‍රියාත්මක වූ අතර ඔහුට ශක්තිමත් විශ්වාසයක්ද තිබිණ. ඔහුගේ උපකාරයෙන් විශාල පිරිසක් ස්වාමීන්ව විශ්වාස කරන්න පටන්ගත්තෝය.+ 25 ඉන්පසු ඔහු සාවුල්ව සෙවීමට ටාසස් බලා ගියේය.+ ඔහු එහි අස්සක් මුල්ලක් නෑර සාවුල්ව සෙවූ අතර,+ 26 ඔහුව හමු වූ විට ඔහු සමඟම අන්තියෝකියට ආවේය. ඉන්පසු ඔවුහු අවුරුද්දක් පුරාම සභාවෙහි සිටි අය සමඟ රැස් වී විශාල පිරිසකට ඉගැන්වූහ. ගෝලයන්ව ක්‍රිස්තියානීන් කියා මුලින්ම හැඳින්වීමට පටන්ගත්තේ+ අන්තියෝකියේදීය. එසේ වූයේ දෙවිගේ මඟ පෙන්වීමට එකඟවය.

27 ඒ කාලයේදී යෙරුසලමේ සිට අන්තියෝකියට අනාගතවක්තෘවරුන්+ කිහිපදෙනෙක්ද පැමිණියෝය. 28 ඉන් එක් කෙනෙකුගේ නම අගබස්ය.+ ලොව පුරාම මහත් සාගතයක් ඇති වන බව දෙවිගේ බලය මාර්ගයෙන් දැනගත් ඔහු, ඒ ගැන සියල්ලන්ට දැන්වූවේය.+ එම සාගතය ක්ලෝදියස්ගේ කාලයේදී ඇති විය. 29 එවිට ගෝලයෝ තමන්ට හැකි පමණින්+ යුදයේ වෙසෙන සහෝදරයන්ට යම් සහනාධාර යැවීමට+ තීරණය කළෝය. 30 ඔවුහු එම සහනාධාර බානබස් සහ සාවුල් අත+ වැඩිමහල්ලන් වෙතට යැවූහ.