ගලාති
1 පාවුල්+ වන මම යේසුස් ක්‍රිස්තුස්ගේ නියෝජිතයෙක්*+ වෙමි. මාව ඔබ වෙතට එව්වෙත් මාව පත් කළෙත් මිනිසුන් නොවේ. මාව පත් කළේ යේසුස් ක්‍රිස්තුස්+ සහ ඔහුව මරණයෙන් නැඟිටෙවූ+ දෙවි පියාණන්ය.+ 2 මා සමඟ සිටින සියලුම සහෝදරයෝද+ මමද ගලාතියේ තිබෙන සභාවන්ට මෙසේ ලියා එවන්නෙමු.+
3 අපගේ පියාණන් වන දෙවිගෙන් සහ ස්වාමීන් වන යේසුස් ක්‍රිස්තුස්ගෙන් ඔබට මහත් කරුණාවත් සමාදානයත් ලැබේවා!+ 4 අපගේ දෙවි හා පියාණන් වන තැනැත්තාගේ කැමැත්ත පරිදි+ යේසුස් අපගේ පව් උදෙසා තම ජීවිතය දුන්නේය.+ එසේ කළේ දැන් පවතින දුෂ්ට සමාජයෙන් අපව ගලවාගැනීමටය.+ 5 දෙවිට සදාකාලයෙන් සදාකාලයට සියලු ප්‍රශංසාව සහ ගෞරවය හිමි වේවා!+ ආමෙන්.*
6 නමුත් ක්‍රිස්තුස්ගේ මහත් කරුණාව මාර්ගයෙන් ඔබව කැඳවූ+ තැනැත්තාණන්ගෙන්+ ඔබ මෙතරම් ඉක්මනින් අහක් වී වෙනත් ශුභාරංචියකට+ සවන් දෙන්න පටන්ගත්තේ කෙසේද කියා මට සිතාගත නොහැක. 7 ඇත්තටම ඔබ සවන් දුන් ඒ දේ ශුභාරංචියක් නොවේ. ඔබ අතරේ ප්‍රශ්න ඇති කරන පිරිසක් සිටිති.+ ඔවුන්ගේ අදහස වන්නේ ක්‍රිස්තුස් පිළිබඳ ශුභාරංචිය විකෘති කර පෙන්වීමය.+ 8 නමුත් අපෙන් කෙනෙකු හෝ ස්වර්ගයේ දේවදූතයෙක් හෝ පැමිණ අප ප්‍රකාශ කළ ශුභාරංචියට වඩා වෙනස් ශුභාරංචියක් ඔබට ප්‍රකාශ කරනවා නම් ඔහුට ශාප වේවා!+ 9 මා පැවසූ දේ නැවතත් කියමි. එනම් ශුභාරංචියක් ලෙස ඔබ පිළිගත් දේට වඩා වෙනස් දෙයක්+ ඔබට ප්‍රකාශ කරන ඕනෑම කෙනෙකුට ශාප වේවා කියාය.
10 මා දැන් උත්සාහ කරන්නේ මිනිසුන්ගේ අනුමැතිය ලබාගැනීමටද? නැත්නම් දෙවිගේ අනුමැතිය ලබාගැනීමටද? මා උත්සාහ කරන්නේ මිනිසුන්ව සතුටු කිරීමටද?+ මා තවමත් මිනිසුන්ව සතුටු කරනවා නම්+ මා ක්‍රිස්තුස්ගේ දාසයෙකු කියා පැවසිය නොහැක.+ 11 සහෝදරයෙනි, මා ඔබට ඉතා පැහැදිලිව යමක් කියන්න කැමතිය. එනම් මා ශුභාරංචියක් ලෙස ප්‍රකාශ කළ දේ මිනිසුන්ගෙන් ලද දෙයක් නොවන බවය.+ 12 මා එය මිනිසෙකුගෙන් ලබාගත්තේවත් එය මට යම් කෙනෙක් ඉගැන්වූවේවත් නැත. එය මට එළිදරව් කළේ යේසුස් ක්‍රිස්තුස්ය.+
13 මා කලින් යුදෙව් ආගම ඇදහූ කාලයේදී කටයුතු කළ ආකාරය+ ඔබට ආරංචි වී ඇති බවට සැකයක් නැත. මම ඉතා දරුණු ලෙස දෙවිගේ සභාවට පීඩා කරමින්+ එය නැති කර දැමීමට පවා උත්සාහ කළෙමි.+ 14 මගේ පියවරුන්ගේ සම්ප්‍රදායන්+ සඳහා මට කොතරම් උද්‍යෝගයක්+ තිබුණාද කිවහොත් මගේ ජාතියට අයත් මගේම වයසේ සිටි බොහෝදෙනෙකුට වඩා මම යුදෙව් ආගම තුළ මහත් දියුණුවක් ලබමින් සිටියෙමි.+ 15 නමුත් මට මෙලොව එළිය දකින්න අවස්ථාවක් ලබා දුන් දෙවි මහත් කරුණාවක් පෙන්වමින්+ මාව කැඳෙව්වේය.+ ඔහු තීරණය කළේ, 16 මා මාර්ගයෙන් තම පුත්‍රයා ගැන තොරතුරු හෙළි කිරීම සුදුසු බවය.+ එහෙයින් ඔහු පිළිබඳ ශුභාරංචිය වෙනත් ජාතීන්ට අයත් අයට ප්‍රකාශ කිරීම සඳහා මාව තෝරාගන්නා ලදි.+ එසේ තෝරාගත් පසු මම ඉක්මනින්ම ගොස් කිසි මිනිසෙකුගේ උපදෙස් පැතුවේ නැත.+ 17 එසේම මට කලින් යේසුස්ගේ නියෝජිතයන් ලෙස පත් කර තිබූ අයව+ හමු වීමට මම යෙරුසලමටවත් නොගියෙමි. ඒ වෙනුවට මා ගියේ අරාබියටය. ඉන්පසු මම නැවත දමස්කයට ගියෙමි.+
18 ඉන් වසර තුනකට පසු සීෆස්ව හමු වීමට+ මම යෙරුසලමට ගොස්+ ඔහු සමඟ දවස් පහළොවක් ගත කළෙමි. 19 ඒ කාලයේදී නියෝජිතයන්ගෙන් වෙනත් කිසිවෙකුවත් මට හමු වූයේ නැත. මට හමු වුණේ ස්වාමීන්ගේ සහෝදරයා+ වන යාකොබ්ව+ පමණි. 20 මා ඔබට දැන් ලියා එවන මේ දේවල් බොරු නොවේ.+ දෙවි ඉදිරියෙහිම මා ඔබට පවසන්නේ සත්‍යයක්ය.
21 ඉන්පසු මම සිරියාවට සහ සිලීසියාවට අයත් පළාත්වලට ගියෙමි.+ 22 නමුත් ක්‍රිස්තුස් සමඟ එකට බැඳී සිටින යුදයේ සභාවල සිටි අය ඒ වන තුරු මාව දැන හඳුනා ගෙන සිටියේ නැත.+ 23 ඔවුන් දැනගෙන සිටියේ වෙනත් සහෝදරයන් මා ගැන පවසා තිබූ මේ දේ පමණි. එනම්, “කලින් අපට පීඩා කළ මිනිසා+ තමා නැති කර දැමීමට උත්සාහ කළ ආගම ගැන ශුභාරංචිය දැන් සියලුදෙනාටම ප්‍රකාශ කරයි”+ යන කාරණයයි. 24 එහෙයින් මා නිසා ඔවුහු දෙවිට ගෞරවය දුන්නෝය.+