යොහන්
13 තමා මෙලොවින් සමුගෙන පියාණන් ළඟට යන්න+ නියමිත කාලය පැමිණ+ ඇති බව යේසුස් පාස්කු උත්සවයට කලින්ම දැන සිටියේය. ලෝකයේ සිටි තමාට හිතවත් වූ අයට ඔහු බොහෝ සෙයින් ප්‍රේම කළේය.+ ඇත්තෙන්ම ඔහු අවසානය දක්වා ඔවුන්ට මහත් සේ ප්‍රේම කළේය. 2 මේ අතරතුරේදී යේසුස්ව පාවා දීමේ අදහස+ යක්ෂයා මේ වන විටත් සීමොන්ගේ පුත් යූදස් ඉස්කාරියොත්ගේ+ සිතට ඇතුල් කර තිබිණ. ඔවුන් සන්ධ්‍යා භෝජනයට සහභාගි වෙමින් සිටියදී, 3 පියාණන් තමන්ට සියල්ල භාර දී ඇති බවත්+ තමා දෙවිගෙන් පැමිණි බවත් තමා නැවතත් දෙවි ළඟට යන බවත්+ දැන සිටි යේසුස්, 4 මේසයෙන් නැඟිට, තම පිට වස්ත්‍රය ගලවා තබා තුවායක් ගෙන එය තම ඉණ වටා බැඳගත්තේය.+ 5 ඉන්පසු ඔහු බේසමකට වතුර වත් කොට ගෝලයන්ගේ පාද සෝදන්නත්+ තම ඉණ වටා බැඳගෙන සිටි තුවායෙන් ඔවුන්ගේ පාද පිස දමන්නත් පටන්ගත්තේය. 6 ඔහු සීමොන් පේතෘස් ළඟටද ආවේය. “ස්වාමීනි, ඔබ මගේ පාදත් සෝදන්න ආවාද”+ කියා පේතෘස් ඔහුගෙන් ඇසුවේය. 7 යේසුස් ඔහුට පිළිතුරු දුන්නේ මෙසේය. “මම කරන දේ ඔබට දැන් තේරෙන්නේ නැහැ. නමුත් පසුව ඔබට එය තේරෙයි.”+ 8 එවිට පේතෘස්, “ඔබට කවදාවත් මගේ පාද සෝදන්න මම ඉඩ දෙන්නේ නැහැ” කියා ඔහුට කීවේය. යේසුස් ඔහුට පිළිතුරු දෙමින්, “මා ඔබේ පාද සේදුවේ නැත්නම්+ ඔබ හා මා අතර කිසි සම්බන්ධයක් නැහැ” කියා පැවසුවේය. 9 එවිට සීමොන් පේතෘස්, “ස්වාමීනි, මගේ පාද විතරක් නොවෙයි, මගේ අත් දෙකත් හිසත් සෝදන්න” කියා කීවේය. 10 යේසුස් ඔහුට මෙසේ කීවේය. “කෙනෙක් වතුරෙන් නාගෙන සිටිනවා නම්+ ඔහුගේ මුළු ශරීරයම පවිත්‍රයි. ඒ නිසා ඔහුගේ පාද සේදුවත් ඇති. ඔබ නම් පවිත්‍රයි. නමුත් සෑම කෙනෙක්ම පවිත්‍ර නැහැ.” 11 “සෑම කෙනෙක්ම පවිත්‍ර නැහැ” කියා ඔහු පැවසුවේ ඒ වන විට තමාව පාවා දෙන තැනැත්තා කවුද කියා ඔහු දැන සිටි නිසාය.+
12 මෙසේ යේසුස් ඔවුන්ගේ පාද සෝදා අවසන් වූ පසු තම පිට වස්ත්‍ර ඇඳගෙන නැවතත් මේසය අසල ඉඳගත්තේය. එවිට ඔහු ඔවුන්ට මෙසේ කීවේය. “මම ඔබ වෙනුවෙන් කළ මේ දේ ඔබට තේරුණාද? 13 ඔබ මට කියන්නේ, ‘ගුරුතුමනි’+ සහ ‘ස්වාමීනි’+ කියායි. මම ඔබේ ගුරුතුමා හා ස්වාමීන් වන නිසා ඔබ එහෙම කියන එකත් හරියි.+ 14 ඔබේ ස්වාමීන් සහ ගුරුතුමා වන මම ඔබේ පාද සේදුවා නම්+ ඔබත් එකිනෙකාගේ පාද සේදිය යුතුයි.+ 15 මා ඔබට කළා වගේ ඔබත් කළ යුතුයි. ඔබට අනුගමනය කරන්න මම තබන ආදර්ශය එයයි.+ 16 ඇත්තෙන්ම මම ඔබට කියන්නේ, දාසයෙක් තමාගේ ස්වාමියාට වඩා උතුම් නොවන බවයි. එවන ලද තැනැත්තාත් ඒ වගේමයි. ඔහුත් ඔහුව එවූ තැනැත්තාට වඩා උතුම් වන්නේ නැහැ.+ 17 ඔබ මේ දේවල් දැන සිටින නිසා ඔබ ඒවා පිළිපැද්දොත් ඔබට සතුටු විය හැකියි.+ 18 නමුත් මම කතා කරන්නේ ඔබ සියලුදෙනා ගැන නොවෙයි. මා තෝරාගත් අය කවුද කියා මම දන්නවා.+ ශුද්ධ ලියවිල්ලේ සඳහන් දේත් ඉටු විය යුතුයි.+ එහි පවසන්නේ, ‘මගේම කෑම කෑ තැනැත්තා මට ද්‍රෝහි වී ක්‍රියා කළේය’+ කියායි. 19 මම මේ දේවල් ඔබට දැන්ම එනම්, ඒවා සිදු වෙන්නත් කලින් කියන්නේ+ ඒ දේ සිදු වන විට එන්න සිටින තැනැත්තා මම බව ඔබට විශ්වාස කරන්න පුළුවන් වෙන්නයි. 20 ඇත්තෙන්ම මම ඔබට කියන්නේ, මා යවන ඕනෑම කෙනෙක්ව පිළිගන්නා තැනැත්තා මාවත් පිළිගන්නා බවයි.+ ඒ වගේම කෙනෙක් මාව පිළිගත්තොත් ඔහු ඇත්තටම මාව එවූ තැනැත්තාවත් පිළිගන්නවා.”+
21 ඒ දේවල් පැවසූ පසු යේසුස් සිතින් කැලඹී කිසිවක් නොසඟවා මෙසේ පැවසුවේය. “මම ඇත්තෙන්ම ඔබට කියන්නේ, ඔබ අතරේ සිටින කෙනෙක් මාව පාවා දෙනවා කියායි.”+ 22 ඔහු එසේ පැවසුවේ කවුරුන් ගැනද කියා සිතමින් ගෝලයෝ කලබල වී, එකිනෙකා දෙස බලන්න පටන්ගත්හ.+ 23 මේ අතර යේසුස්ගේ එක් ගෝලයෙකු හාන්සි වී සිටියේ ඔහු අසලින්මය. යේසුස් ඔහුට බොහෝ සෙයින් ප්‍රේම කළේය.+ 24 සීමොන් පේතෘස් හිසෙන් ඔහුට සංඥා කර මෙසේ ඇසුවේය. “ඔහු කා ගැනද මේ කතා කරන්නේ?” 25 එවිට ඔහු යේසුස්ගේ ළයට හේත්තු වී, “ස්වාමීනි, ඒ කවුද”+ කියා ඔහුගෙන් ඇසුවේය. 26 යේසුස් මෙසේ පිළිතුරු දුන්නේය. “ඒ මා රොටි කැබැල්ලක් පොඟවා දෙන තැනැත්තායි”+ කියා පැවසුවේය. ඉන්පසු ඔහු රොටි කැබැල්ලක් පොඟවා, සීමොන් ඉස්කාරියොත්ගේ පුත් යූදස්ට දුන්නේය. 27 රොටි කැබැල්ල කෑ ඔහු, ඒ මොහොතේම සාතන්ගේ බලපෑමට හසු විය.+ එහෙයින් යේසුස්, “ඔබට කරන්න තිබෙන දේ ඉක්මනින් ගොස් කරන්න” කියා ඔහුට කීවේය. 28 නමුත් කෑම ගැනීම සඳහා මේසය වටා ඉඳගෙන සිටි කිසි කෙනෙක් යේසුස් ඒ දේ ඔහුට පැවසුවේ කවර හේතුවකටද කියා දැන සිටියේ නැත. 29 යූදස් මුදල් පෙට්ටිය භාරව සිටි නිසා+ සමහරුන් සිතාගෙන සිටියේ යේසුස් ඔහුට, “උත්සවය සඳහා අපට අවශ්‍ය දේවල් මිල දී ගන්න” කියා පැවසූ බව හෝ දිලිඳුන්ට යමක් දෙන්න කියා ඔහුට පැවසූ බවයි.+ 30 යූදස් රොටි කැබැල්ල කෑමෙන් පසු විගස එතැනින් පිට වී ගියේය. ඒ අවස්ථාව වන විට අඳුර වැටී තිබිණ.+
31 යූදස් පිට වී ගිය පසු යේසුස් මෙසේ කීවේය. “මනුෂ්‍ය පුත්‍රයා තේජසට පත් වන අවස්ථාව දැන් ඇවිත් තිබෙනවා.+ එයින් දෙවිත් ගෞරවයට පත් වෙයි. 32 ඔහුව තේජසට පත් කරන්නේ දෙවියි.+ දෙවි ඒ දේ ඉතා ඉක්මනින්ම කරයි. 33 මගේ ආදරණීය දරුවෙනි,+ මම ඔබ සමඟ සිටින්නේ තව කෙටි කාලයකට පමණයි. ඔබ මාව සොයයි. නමුත්, ‘මා යන තැනට එන්න ඔබට බැහැ’+ කියා යුදෙව්වරුන්ට මා කලින් පැවසූ ලෙසම දැන් ඔබටත් කියන්න කැමතියි. 34 මම දැන් ඔබට අලුත් ආඥාවක් දෙන්න කැමතියි. එනම් ඔබ එකිනෙකාට ප්‍රේම කළ යුතුයි. මම ඔබට ප්‍රේම කළා වගේ+ ඔබත් එකිනෙකාට ප්‍රේම කරන්න.+ 35 ඔබ අතරේ ප්‍රේමය ඇත්නම්+ ඔබ මගේ ගෝලයන් බව සියලුදෙනාම දැනගනියි.”
36 සීමොන් පේතෘස් ඔහුගෙන් මෙසේ ඇසුවේය. “ස්වාමීනි, ඔබ යන්නේ කොහේද?” එවිට යේසුස්, “මා යන තැනට දැන්මම ඔබට එන්න බැහැ. නමුත් පසු අවස්ථාවක ඔබ එනවා”+ කියා පිළිතුරු දුන්නේය. 37 පේතෘස් ඔහුට මෙසේ කීවේය. “ස්වාමීනි, මට දැන්මම ඔබ පසුපස එන්න බැරි ඇයි? ඔබ උදෙසා මගේ ජීවිතය වුණත් දෙන්න මම ලෑස්තියි.”+ 38 එවිට යේසුස් මෙසේ කීවේය. “මා උදෙසා ඔබේ ජීවිතය වුණත් දෙන්න ඔබ කැමතිද? ඇත්තෙන්ම මම ඔබට කියන්නේ, කුකුළෙකු හඬලන්න කලින් ඔබ මාව හඳුනන්නේ නැහැ කියා තුන් වතාවක්ම කියන බවයි.”+