ක්‍රියා

19 අපොලොස්+ කොරින්තියේ සිටියදී පාවුල් කඳුකරය හරහා ගොස් එෆීසයට+ ගියේය. එහිදී ඔහුට ගෝලයන් කිහිපදෙනෙකුව හමු වූ අතර, 2 “ඔබ යේසුස්ගේ අනුගාමිකයන් වූ විට ඔබට දෙවිගේ බලය ලැබුණාද”+ කියා ඔවුන්ගෙන් ඇසුවේය. ඔවුහු, “දෙවිගේ බලය ලැබෙන්නේ කොහොමද කියා අපි කවදාවත් අසා නැහැ”+ කියා ඔහුට කීවෝය. 3 එවිට ඔහු, “එහෙමනම් ඔබ බව්තීස්ම වුණේ කොහොමද” කියා ඇසුවේය. “යොහන් තමයි අපිව බව්තීස්ම කළේ”+ කියා ඔවුහු පිළිතුරු දුන්නෝය. 4 පාවුල් මෙසේ කීවේය. “යොහන් මිනිසුන්ව බව්තීස්ම කළේ ඔවුන් පසුතැවිලි වී ඇති බව පෙන්වීමටයි.+ ඔහු මිනිසුන්ට කිව්වේ තමාට පසුව එන තැනැත්තාව+ එනම්, යේසුස්ව විශ්වාස කරන්න කියායි.” 5 ඒ දේවල් ඇසූ විට ඔවුහු ස්වාමීන් වන යේසුස්ව පිළිගෙන බව්තීස්ම වූහ.+ 6 ඉන්පසු පාවුල් ඔවුන් මත අත් තැබූ විට+ ඔවුන්ට දෙවිගේ බලය ලැබුණු අතර ඔවුහු වෙනත් භාෂාවලින් කතා කරන්නත් අනාවැකි කියන්නත් පටන්ගත්තෝය.+ 7 එහි පුරුෂයන් දොළොස්දෙනෙක් පමණ සිටියෝය.

8 ඔහු සිනගෝගයට ඇතුල් වී+ සියලුදෙනා ඉදිරියේ නිර්භීතව උගන්වමින් දෙවිගේ රාජ්‍යය පිළිබඳ කාරණා+ ඉතා පැහැදිලි ලෙසත් නිවැරදි ලෙසත් අවබෝධ කර දුන්නේය. ඔහු කතා ඉදිරිපත් කරමින් එහි මාස තුනක් ගත කළේය. 9 නමුත් සමහරුන් තුළ තිබූ මුරණ්ඩුකම නිසා ඒවා විශ්වාස කිරීමට පෙලඹුණේ නැත.+ ඔවුන්, සියලුදෙනා ඉදිරියේ ‘ස්වාමීන්ගේ මාර්ගය’+ ගැන අපහාසාත්මක දේවල් කියන්න පටන්ගත් විට පාවුල් ඔවුන්ගෙන් ඈත් වීමට පියවර ගෙන+ ගෝලයන්වද ඔවුන්ගෙන් ඈත් කළේය.+ ඔහු ගෝලයන් සමඟ තිරනස්ගේ සම්මන්ත්‍රණ ශාලාවේ දිනපතා රැස් වී ඔවුන්ට කතා ඉදිරිපත් කළේය. 10 ඒ දේ අවුරුදු දෙකක් පුරා සිදු විය.+ ප්‍රතිඵලයක් ලෙස ආසියා ප්‍රදේශයේ+ යුදෙව්වරුන් සහ ග්‍රීකවරුන් යන දෙපාර්ශ්වයම දෙවිගේ පණිවිඩය ගැන දැනුවත් වූහ.

11 දෙවි පාවුල් මාර්ගයෙන් පුදුම කරවන බලවත් ක්‍රියා දිගටම සිදු කළේය.+ 12 එහෙයින් ඔහු භාවිත කළ රෙදිකඩ සහ වැඩවල නියැලෙද්දී උඩින් පැළඳ සිටි වස්ත්‍ර අසනීප වී සිටි අය ළඟට ගෙන ගිය පමණින්+ ඔවුන්ගේ රෝග සුව වූ අතර භූතයෝද ඔවුන්ගෙන් පිට වී ගියෝය.+ 13 මේ අතර තැනින් තැන සංචාරය කරමින් භූතයන් දුරු කළ යුදෙව්වන් පිරිසක්ද සිටියෝය.+ ඔවුහුද ස්වාමීන් වන යේසුස්ගේ නාමය භාවිත කරමින් භූතයන්ව දුරු කළ අතර,+ “පාවුල් දේශනා කරන යේසුස්ගේ නාමයෙන් පිට වෙන්න”+ කියා පැවසීමට පුරුදුව සිටියහ. 14 ඒ දේ කරමින් සිටියේ යුදෙව් ජාතික නායක පූජකයෙකු වූ සීවා නම් තැනැත්තෙකුගේ පුත්‍රයන් හත්දෙනෙකි. 15 ඔවුන් භූතයෙකු වැහී සිටි පුද්ගලයෙකුව සුව කිරීමට ගිය අවස්ථාවකදී ඒ පුද්ගලයාට වැහී සිටි භූතයා ඔවුන්ට මෙසේ කීවේය. “මම යේසුස් ගැනත්+ පාවුල් ගැනත් දන්නවා.+ ඒත් ඔබ කවුද?” 16 එවිට එම භූතයා වැහී සිටි මිනිසා ඔවුන්ගේ ඇඟට පැන,+ ඒ සියලුදෙනාවම බිම දැමුවේය. එයින් තුවාල ලැබූ ඔවුහු, ඇඳුම්ද නැතුව එම නිවසින් පලා ගියෝය. 17 එෆීසයේ විසූ සියලු යුදෙව්වරුන්ට සහ ග්‍රීකවරුන්ට එම සිද්ධිය ගැන ආරංචි වූ විට සියලුදෙනාම බියපත් වූහ.+ එයින් ස්වාමීන් වන යේසුස්ගේ නාමය දිගටම ප්‍රශංසාවට ලක් විය.+ 18 යේසුස්ගේ අනුගාමිකයන් බවට පත් වූ බොහෝදෙනෙක් පැමිණ තමන් කලින් කළ දේවල් ප්‍රසිද්ධියේ ප්‍රකාශ කර තම වැරදි පිළිගත්තෝය.+ 19 ඔවුන් අතර සිටි මන්තර ගුරුකම්වල නියැලී සිටි+ බොහෝදෙනෙක් ගුරුකම් සඳහා භාවිත කළ පොත් පත් ගෙනැවිත් සියලුදෙනා ඉදිරියෙහි පුලුස්සා දැමුවෝය. එම පොත් පත්වල වටිනාකම ගණන් බැලූ විට ඒ සියල්ල රිදී කාසි පනස්දහසක් වටිනා බව අනාවරණය විය. 20 මෙසේ යෙහෝවා දෙවිගේ පණිවිඩය සියලුදෙනා අතරේ දිගටම පැතිර ගියේය. එය යටපත් කිරීමට කිසිවෙකුට නොහැකි විය.+

21 එම සිද්ධියෙන් පසු තමා මැසිඩෝනියාවට+ සහ ඇකේයාවට ගොස් ඉන් අනතුරුව යෙරුසලමට යා යුතු බව+ පාවුල් තීරණය කළේය. එමෙන්ම යෙරුසලමට ගිය පසු රෝමයටත් යා යුතුයි+ කියා ඔහු තීරණය කළේය. 22 එහෙයින් තමාට උපකාර කළ දෙදෙනෙකු වූ තිමෝති+ සහ එරස්ටස්ව+ මැසිඩෝනියාවට යැවූ ඔහු, ආසියා ප්‍රදේශයේ යම් කලක් නැවතී සිටියේය.

23 ඒ කාලයේදී ‘ස්වාමීන්ගේ මාර්ගයට’+ විරුද්ධව උද්ඝෝෂණයක් ඇති විය.+ 24 මෙයට මුල් වූයේ රිදීකරුවෙකු වූ දෙමේත්‍රියස් නම් මිනිසෙකි. ඔහු ආටෙමිස්ගේ දේවාලය හා සමාන කුඩා රිදී රූප සෑදූ නිසා එයින් බොහෝදෙනෙකුට ඉමහත් ලාභ උපදවාගත හැකි විය.+ 25 ඔහු ඔවුන්වද ඒ හා සමාන කර්මාන්තවල යෙදී සිටි වෙනත් අයවද රැස් කරගෙන+ මෙසේ කීවේය. “සහෝදරයෙනි, මේ කර්මාන්තයෙන් අපි කොතරම් දියුණු වෙලා තිබෙනවාද කියා ඔබ හොඳින් දන්නවා.+ 26 නමුත් දැන් පාවුල් කියන මනුෂ්‍යයෙක් එෆීසයට ඇවිල්ලා.+ ඔහු එෆීසයේ විතරක් නොවෙයි මුළු ආසියා පළාතේ සිටින විශාල සමූහයක්ව වෙනත් දෙයක් පස්සේ යන්න පොලඹවා තිබෙනවා. ඔහු කියන්නේ මිනිසුන් සාදන දෙවිවරුන්+ ඇත්තටම දෙවිවරුන් නොවන බවයි. 27 මේ දේ අපේ රැකියාවට විතරක් නොවෙයි, උතුම් ආටෙමිස්+ දේවතාවියගේ දේවස්ථානයටත් මොන තරම් නින්දාවක්ද! මෙහෙම ගියොත් මුළු ආසියා ප්‍රදේශයෙත් මුළු ලෝකය පුරාත් ඇයට හිමි වී ඇති නමස්කාරය හා මහත් ගෞරවය නැති වෙලාම යයි.” 28 ඒ දේවල් ඇසූ ඒ මිනිස්සු කෝපයෙන් පිරී, “එෆීසයේ වැසියන්ගේ ආටෙමිස් දේවතාවිය සදා වැජඹේවා” කියා පවසමින් කෑගසන්න පටන්ගත්තෝය.

29 එවිට ඒ නුවර පුරාම විශාල කෝලහලයක් ඇති විය. කෝපයට පත් ජනයා එකතු වී ගායස් සහ අරිස්තාකස්+ යන දෙදෙනාව බලහත්කාරයෙන් රංග භූමියට ඇදගෙන ගියෝය. මැසිඩෝනියානු ජාතිකයන් වූ ඔවුන්, පාවුල් සමඟ ඔහුගේ ගමන්වලට හවුල් වූ දෙදෙනෙකි. 30 පාවුල් රංග භූමියේ එකතු වී සිටි සමූහයා අතරට යන්න සූදානම් වුවත් එසේ යෑමට ගෝලයෝ ඔහුට ඉඩ දුන්නේ නැත. 31 පාවුල් සමඟ මිත්‍රව සිටි උත්සව සහ ක්‍රීඩා සංවිධායකයන් කිහිපදෙනෙක්ද ඔහුට පණිවිඩ යැව්වෝය. ඔවුන්ද ඔහුගෙන් ඉල්ලා සිටියේ රංග භූමියට ගොස් ඔහුගේ ජීවිතය අනතුරට පත් කර නොගන්නා ලෙසය. 32 රැස්ව සිටි සමූහය වියවුල්ව සිටි නිසා සමහරෙක් එක් දෙයක්ද අන් සමහරෙක් තවත් දෙයක්ද කියමින් කෑගැසුවත්+ තමන් එතැනට පැමිණියේ ඇයි කියා ඔවුන්ගෙන් වැඩිදෙනා නොදැන සිටියෝය. 33 එහෙයින් සිදු වූ දේ පැහැදිලි කිරීමට සමූහයා අතරින් යුදෙව්වරු ඇලෙක්සැන්ඩර්ව තෝරාගෙන ඉදිරියට තල්ලු කළෝය. එවිට ඇලෙක්සැන්ඩර් ජනතාවට නිහඬ වෙන්න කියා අතින් සංඥා කර තමන්ට යමක් කියන්න තිබෙන බව දැනුම් දුන්නේය. 34 නමුත් ඔහු යුදෙව්වෙකු බව තේරුම්ගත් ජනතාව, “එෆීසයන්ගේ ආටෙමිස් දේවතාවිය සදා වැජඹේවා”+ කියා එක හඬින් කෑගසන්න පටන්ගත්තෝය. ඔවුහු එලෙස පැය දෙකක් පුරා කෑගැසුවෝය.

35 අන්තිමේදී ඔවුන්ව සන්සුන් කිරීමට+ හැකි වූයේ නගරාධිපතිටය. එවිට ඔහු ඔවුන්ට මෙසේ කීවේය. “එෆීසයේ මනුෂ්‍යයෙනි, උතුම් ආටෙමිස්ගේ දේවස්ථානයටත් අහසින් වැටුණු රූපයටත් හිමිකම් කියන්නේ එෆීසවරුන්ගේ නුවර බව මෙලොවෙහි නොදන්නා කෙනෙක් ඉන්නවාද? 36 මේ කාරණය ගැන කවුරුත් විවාද කරන්නේ නැහැ. ඒ නිසා ඔබ කලබල වෙන්නේ නැතුව සන්සුන් වෙන්න.+ 37 ඇත්තෙන්ම ඔබ මෙහෙට ගෙනා මේ මිනිස්සු දේවස්ථාන කොල්ල කන අයවත් අපේ දේවතාවියට අපහාස කරන අයවත් නොවෙයි. 38 ඒ නිසා දෙමේත්‍රියස්ට+ සහ ඔහු සමඟ සිටින වැඩකරුවන්ට යම් කෙනෙක් ගැන පැමිණිල්ලක් කරන්න තිබෙනවා නම් ආණ්ඩුකාරයන් ඇවිත්+ නඩු අසන දවස්වලදී+ ඒ ගැන පැමිණිලි කළ හැකියි. 39 ඒ වගේම මේ මිනිසුන්ට විරුද්ධව වෙනත් චෝදනා ඔබට තිබෙනවා නම් ඒ සම්බන්ධයෙන් නිල රැස්වීමකදී තීරණයක් ගත හැකියි. 40 නමුත් අද මෙහෙ සිදු වුණු දේ රටේ නීතියට විරුද්ධයි. ඒ සඳහා දඬුවම් පවා ලැබෙන්න පුළුවන්. ජනතාව මේ වගේ රැස් වෙලා කලබලයක් ඇති කිරීමට කිසිම සාධාරණ හේතුවක් නැහැ.” 41 ඔහු ඒ දේවල් පවසා+ රැස්ව සිටි සමූහයාව විසුරුවාහැරියේය.+