යොහන්
4 යොහන් තම ගෝලයන් ලෙස බව්තීස්ම කළ අයගේ සංඛ්‍යාවට වඩා වැඩි පිරිසක් යේසුස්ගේ ගෝලයන් ලෙස බව්තීස්ම වන බව+ පරිසිවරුන්ට ආරංචි විය. ඔවුන්ට එය ආරංචි වූ බව යේසුස් දැනගත්තේය. 2 ඇත්තෙන්ම බව්තීස්ම කළේ යේසුස් නොව ඔහුගේ ගෝලයන්ය. 3 යේසුස් යුදයෙන් පිටත් වී නැවත ගලීලය බලා ගියේය. 4 නමුත් ඔහු ගමන් කළේ සමාරිය හරහාය.+ 5 ඔහු සමාරියේ පිහිටි සිකාර් නම් නුවරට පැමිණියේය. එය පිහිටා තිබුණේ යාකොබ් තම පුත් යෝසෙප්ට දුන් ඉඩම අසලය.+ 6 යාකොබ්ගේ ළිඳ+ ලෙස හඳුන්වන ළිඳක් එහි තිබිණ. යේසුස් ගමනින් වෙහෙසට පත්ව සිටි නිසා ඔහු එම ළිඳ අසල ඉඳගත්තේය. එය හයවෙනි පැය පමණ විය.*
7 මේ අතරතුරේදී සමාරියේ ස්ත්‍රියක් වතුර ගැනීමට එතැනට පැමිණියාය. එවිට යේසුස්, “මට බොන්න වතුර ටිකක් දෙන්න පුළුවන්ද” කියා ඇගෙන් ඇසුවේය. 8 (ඒ අවස්ථාවේදී ඔහුගේ ගෝලයන් ආහාර මිල දී ගැනීම සඳහා නුවරට ගොස් තිබිණ.) 9 එවිට සමරිතානු ස්ත්‍රිය, “ඔබ යුදෙව් කෙනෙක් නේද? සමරිතානු ස්ත්‍රියක් වන මගෙන් ඔබ කොහොමද බොන්න වතුර ඉල්ලන්නේ” කියා ඔහුගෙන් ඇසුවාය. (ඇය එසේ පැවසුවේ සමරිතානුවරුන් හා යුදෙව්වන් අතර කිසිම ගනු දෙනුවක් නොතිබූ නිසාය.)+ 10 යේසුස් ඇයට මෙසේ පිළිතුරු දුන්නේය. “දෙවි නොමිලේ දෙන දීමනාව+ කුමක්ද කියාත්, ‘මට බොන්න වතුර ටිකක් දෙන්න’ කියා ඔබට පවසන්නේ කවුද+ කියාත් ඔබ දැනගෙන සිටියා නම් ඔබ ඔහුගෙන් ජීවනදායක වතුර ඉල්ලයි. එවිට ඔහු ඔබට ඒ වතුර දෙයි.”+ 11 ඇය ඔහුට මෙසේ කීවාය. “මහත්මයාණෙනි, ඔබට වතුර අදින්න බාල්දියක්වත් නැහැ. ළිඳත් ගැඹුරුයි. ඔබට මේ ජීවනදායක වතුර ලැබෙන්නේ කොහෙන්ද? 12 මේ ළිඳ අපට ලැබුණේ අපේ මුතුන්මිත්තෙක් වන යාකොබ්ගෙන්. මේ ළිඳ හාරලා තමයි ඔහුටයි, ඔහුගේ පුතුන්ටයි ඔහුට අයිති සතුන්ටයි අවශ්‍ය වතුර ලබාගත්තේ. ඔබ ඔහුටත් වඩා උතුම් කෙනෙක්ද?”+ 13 යේසුස් ඇයට මෙසේ පිළිතුරු දුන්නේය. “මේ වතුර බොන සියලුදෙනාටම ආපසු පිපාසය ඇති වෙනවා. 14 නමුත් මා දෙන වතුර බොන කිසිවෙකුට කිසි කලක නැවත පිපාසය ඇති වෙන්නේ නැහැ.+ මා ඔහුට දෙන වතුර නිසා ඔහු තුළ වතුර උනන දිය උල්පතක් සෑදෙයි.+ එයින් උනන වතුරෙන් සදාකාල ජීවනය ලැබෙයි.”+ 15 ඒ ස්ත්‍රිය ඔහුට මෙසේ පැවසුවාය. “මහත්මයාණෙනි, මට ඒ වතුර දෙන්න පුළුවන්ද? එවිට මට නැවත පිපාසය ඇති වෙන්නේ නැහැ. මට නැවතත් මේ ස්ථානයට ඇවිත් වතුර අදින්න අවශ්‍ය වන්නෙත් නැහැ.”
16 යේසුස් ඇයට මෙසේ පැවසුවේය. “ගොස් ඔබේ ස්වාමිපුරුෂයා කැඳවාගෙන මෙතැනට එන්න.” 17 ඇය, “මට ස්වාමිපුරුෂයෙක් නැහැ” කියා පිළිතුරු දුන්නාය. යේසුස් ඇයට මෙසේ කීවේය. “‘මට ස්වාමිපුරුෂයෙක් නැහැ’ කියා, 18 ඔබ කියන දේ ඇත්ත. කලින් ඔබට ස්වාමිපුරුෂයන් පස්දෙනෙක් සිටියා. දැන් ඔබ සමඟ සිටින තැනැත්තා ඔබේ ස්වාමිපුරුෂයා නොවෙයි.” 19 ඒ ස්ත්‍රිය ඔහුට මෙසේ කීවාය. “මහත්මයාණෙනි, මට නම් හිතෙන්නේ ඔබ අනාගතවක්තෘවරයෙක් කියායි.+ 20 අපේ මුතුන්මිත්තන් නමස්කාර කළේ මේ කන්දේදීයි.+ නමුත් යුදෙව්වන් කියන්නේ ජනයා දෙවිට නමස්කාර කළ යුත්තේ යෙරුසලමේදී කියායි.”+ 21 යේසුස් ඇයට මෙසේ කීවේය. “මා කියන මේ දේ විශ්වාස කරන්න. එනම් ඔබ සියලුදෙනා පියාණන්ට කරන නමස්කාරය+ මේ කන්දේදීවත් යෙරුසලමේදීවත් නොකරන කාලයක් එනවා.+ 22 ඔබ නමස්කාර කරන්නේ හරියට කාරණා තේරුම්ගෙන නොවෙයි.+ නමුත් අපේ නමස්කාරය පදනම් වී තිබෙන්නේ නිවැරදි අවබෝධය මතයි. මන්ද ගැලවෙන ආකාරය මුලින්ම එළිදරව් කළේ යුදෙව්වරුන්ටයි.+ 23 නමුත් සැබෑ නමස්කාරකයන් දෙවි ලබා දෙන මඟ පෙන්වීමට+ හා දෙවි එළිදරව් කරන සැබෑ දැනුමට එකඟව+ දෙවිට නමස්කාර කරන කාලයක් පැමිණෙනවා. ඒ කාලය දැනටමත් පැමිණ තිබෙනවා. ඇත්තෙන්ම පියාණන් තමන්ට නමස්කාර කිරීම සඳහා සොයමින් සිටින්නේ එවැනි අයවයි.+ 24 දෙවි නොපෙනෙන දෙවි කෙනෙක්.*+ ඔහු සිටින්නේ ස්වර්ගයේයි. දෙවිට නමස්කාර කරන අය ඔහුට නමස්කාර කළ යුත්තේ ඔහු ලබා දෙන මඟ පෙන්වීමට* හා ඔහු එළිදරව් කරන සැබෑ දැනුමට එකඟවයි.”+ 25 එවිට ඒ ස්ත්‍රිය ඔහුට මෙසේ කීවාය. “ක්‍රිස්තුස්,+ ඒ කියන්නේ මෙසියස්+ අනිවාර්යයෙන්ම පැමිණෙන බව මම දන්නවා. ඒ තැනැත්තා පැමිණි විට කිසිම දෙයක් නොසඟවා සෑම දෙයක්ම අපට ප්‍රකාශ කරයි.” 26 එවිට යේසුස්, “දැන් ඔබත් සමඟ කතා කරමින් සිටින මමයි ඒ තැනැත්තා”+ කියා ඇයට පැවසුවේය.
27 ඒ අවස්ථාවේදී එම ස්ථානයට පැමිණි ඔහුගේ ගෝලයෝ යේසුස් ස්ත්‍රියක සමඟ කතා කරමින් සිටිනවා දැක පුදුම වූහ. නමුත් “ඔබ ඇය සමඟ කතා කරන්නේ ඇයි” කියාවත්, “ඔබට මොනවාද අවශ්‍ය” කියාවත් ඇසීමට කිසිවෙක් ඉදිරිපත් වූයේ නැත. 28 තම වතුර භාජනය එතැන තබා නුවරට ගිය ඒ ස්ත්‍රිය, එහි සිටි පුරුෂයන්ව හමු වී මෙසේ කීවාය. 29 “මා කළ හැම දෙයක්ම මට පැවසූ මිනිසෙක් මට හමු වුණා. ඇවිත් බලන්න. සමහරවිට ඔහු ක්‍රිස්තුස් විය හැකියි.”+ 30 නුවරින් පිටත් වූ ඔවුහු, යේසුස්ව හමු වීමට ආවෝය.
31 මේ අතර යේසුස්ගේ ගෝලයෝ, “ගුරුතුමනි,+ කෑම ටිකක් කන්න” කියා ඔහුගෙන් ඉල්ලා සිටියහ. 32 නමුත් ඔහු, “ඔබ නොදන්නා කෑම වර්ගයක් මා ළඟ තිබෙනවා” කියා ඔවුන්ට කීවේය. 33 එහෙයින්, “වෙන කවුරු හරි ඔහුට කෑමට මොනව හරි ගෙනාවද” කියා ගෝලයෝ තම තමන් අතරේ විමසීමට පටන්ගත්හ. 34 එවිට යේසුස් ඔවුන්ට මෙසේ කීවේය. “මාව එවූ තැනැත්තාගේ කැමැත්ත කිරීමත්+ ඔහු මට දුන් කාර්යය සම්පූර්ණ කිරීමත්+ මම සලකන්නේ මගේ කෑම ලෙසයි.+ 35 සාමාන්‍යයෙන් ඔබ කියන්නේ අස්වැන්න නෙළන්න තව මාස හතරක් තිබෙන බවයි. නමුත් මම දැන් ඔබට කියන්නේ, ඔබේ ඇස් ඇර බලන්න කියායි. අස්වැන්න නෙළන කාලය දැන්මම ඇවිත්. කරල් පැසී තිබෙන හැටි බලන්න.+ 36 අස්වැන්න නෙළන තැනැත්තාට මේ වන විටත් කුලියක් ලැබෙනවා. ඔහු නෙළමින් සිටින්නේ සදාකාල ජීවනයට මඟ පාදන පලදාවක්.+ ඒ නිසා වපුරන තැනැත්තාටයි+ අස්වැන්න නෙළන තැනැත්තාටයි එකවරම ප්‍රීති විය හැකියි.+ 37 ඇත්තෙන්ම වපුරන්නේ එක් කෙනෙක්. නමුත් අස්වැන්න නෙළන්නේ තවත් කෙනෙක් යන කීමත් සැබෑ වී තිබෙනවා. 38 මන්ද අස්වැන්නක් නෙළීමට මම ඔබව යවනවා. නමුත් වපුරන්න වෙහෙසුණේ ඔබ නොව වෙනත් අයයි.+ ඔවුන්ගේ වෙහෙසින් ප්‍රයෝජන ලබන්නේ ඔබයි.”
39 මේ අතරේ ඒ නුවරෙහි සිටි සමරිතානුවන් බොහෝදෙනෙක් ඔහු කෙරෙහි විශ්වාසය තැබූහ.+ ඔවුන් එසේ කළේ, “මා කළ හැම දෙයක්ම ඔහු මට පැවසුවා”+ කියා ඒ ස්ත්‍රිය ඔහු ගැන සාක්ෂි දුන් නිසාය. 40 ඔහුව හමු වීමට පැමිණි සමරිතානුවරු, තමන් සමඟ නැවතී සිටින්න කියා ඔහුගෙන් ඉල්ලා සිටියෝය. එහෙයින් ඔහු දවස් දෙකක් එහි නැවතී සිටියේය.+ 41 ඒ හේතුවෙන් තවත් බොහෝදෙනෙක් ඔහු පැවසූ දේ අසා ඔහු කෙරෙහි විශ්වාසය තැබූහ.+ 42 ඔවුහු ඒ ස්ත්‍රියට මෙසේ කීවෝය. “දැන් අපි ඔහුව විශ්වාස කරන්නේ ඔබ පැවසූ දේවල් නිසා නොවෙයි. අපිම ඇසූ දේවලින්+ මේ මිනිසා ලෝකයේ ගැලවුම්කරු බව අපට දැන් හොඳටම විශ්වාසයි.”+
43 ඒ දවස් දෙක ගෙවී ගිය පසු ඔහු එතැනින් පිටත් වී ගලීලය බලා ගියේය.+ 44 (අනාගතවක්තෘවරයෙකුට තමාගේම රටේදී කිසිම ගෞරවයක් නොලැබෙන බව+ යේසුස් කලින් පවසා තිබිණ.) 45 ඔහු ගලීලයට ගිය විට ගලීලයේ වැසියෝ ඔහුව පිළිගත්තෝය. ඔවුන් එසේ කළේ උත්සවය සඳහා යෙරුසලමට ගිය විට+ යේසුස් එහිදී කළ සෑම දෙයක්ම ඔවුන් දුටු නිසාය.+
46 ඉන්පසු ඔහු ගලීලයේ පිහිටි කානා නම් නුවරට+ නැවත ගියේය. ඔහු වතුර වයින් බවට පත් කළේ එම නුවරේදීය.+ රජුගේ සේවකයෙක් එහි සිටියේය. කපර්ණවුමෙහි සිටි ඔහුගේ පුතා අසනීපයකින් පසු විය.+ 47 යේසුස් යුදයෙන් පිටත් වී ගලීලයට ඇවිත් සිටින බව ඔහුට ආරංචි වූ විට ඔහු යේසුස් ළඟට ගොස් මරණාසන්නව සිටි තම පුතාව සුව කරන්න කියා ඔහුගෙන් ඉල්ලා සිටියේය. 48 නමුත් යේසුස්, “ඔබ සියලුදෙනාම විශ්වාසය ඇති කරගන්නේ ලකුණු+ සහ පුදුම දේවල්+ දුටුවොත් පමණයි” කියා ඔහුට කීවේය. 49 එවිට රජුගේ එම සේවකයා, “ස්වාමීනි, මගේ කුඩා දරුවා මැරෙන්න කලින් එන්න” කියා ඔහුගෙන් ඉල්ලා සිටියේය. 50 යේසුස් ඔහුට මෙසේ කීවේය. “ඔබ දැන් යන්න.+ ඔබේ පුතා සුව වෙලා.”+ ඒ මිනිසා යේසුස් පැවසූ දේ විශ්වාස කරමින් එතැනින් පිටත්ව ගියේය. 51 ඔහු තම නිවස බලා යද්දී ඔහුගේ දාසයෝ මඟදී ඔහුව හමු වී, ඔහුගේ දරුවා සුව වී ඇති බව+ ඔහුට දැන්වූහ. 52 තම දරුවා සුව වුණේ මොන පැයේදීද කියා ඔහු ඔවුන්ගෙන් විමසූ විට ඔවුහු, “ඊයේ හත්වෙනි පැයේදී* ඔහුගේ උණ+ බැස්සා” කියා ඔහුට කීවෝය. 53 “ඔබේ පුතා දැන් සුව වෙලා” කියා යේසුස් තමාට පැවසුවේ ඒ පැයේදී+ බව ඔහු එවිට තේරුම්ගත්තේය. ඔහුද ඔහුගේ නිවසේ සිටි සියලුදෙනාද යේසුස් කෙරෙහි විශ්වාසය තැබූහ.+ 54 එය යේසුස් යුදයෙන් පිටත් වී ගලීලයේ සිදු කළ දෙවෙනි ලකුණ විය.+