ක්‍රියා

1 හිතවත් තෙයොෆිලස්,+ මම මුලින් සකස් කළ වාර්තාවේ යේසුස් කළ ක්‍රියා හා ඔහු ඉගැන්වූ දේවල්ද,+ 2 ඔහු තෝරාගත් නියෝජිතයන්ට* දෙවිගේ බලය මාර්ගයෙන් මඟ පෙන්වීම් ලබා දුන් ආකාරයද+ අන්තිමට ඔහුව ස්වර්ගයට ඔසවාගනු ලැබූ ආකාරයද ඇතුළත් කළෙමි.+ 3 ඔහු වධ විඳ මිය ගිය පසු දවස් හතළිහක් පුරා විටින් විට තම නියෝජිතයන් ඉදිරියේ පෙනී සිටියේය. එහෙයින් තමා ජීවමානව සිටින බවට ඔහු ඉතා පැහැදිලි සාක්ෂි බොහොමයක් සැපයූ අතර+ දෙවිගේ රාජ්‍යය පිළිබඳව ඔවුන්ට බොහෝ දේවල් කියා දුන්නේය.+ 4 යේසුස් ඔවුන් සමඟ රැස්ව සිටි අවස්ථාවකදී ඔවුන්ට මෙසේ පැවසුවේය. “යෙරුසලමට වී බලාගෙන සිටින්න.+ එවිට මා ඔබට පැවසූ ලෙස පියාණන් පොරොන්දු වූ ඒ දේ ඔබට ලබා දෙයි.+ 5 යොහන්, බව්තීස්ම කළේ වතුරෙන්. නමුත් වැඩි දවසක් යෑමට කලින් ඔබව දෙවිගේ බලයෙන් බව්තීස්ම කරනු ලබනවා.”+

6 ඔවුන් එකට රැස් වූ තවත් අවස්ථාවක, “ස්වාමීනි, ඔබ ඊශ්‍රායෙල් දේශයට රාජ්‍යයක් ආපසු ලබා දෙන්නේ මේ කාලයේදීද”+ කියා යේසුස්ගෙන් ඇසූහ. 7 යේසුස් ඔවුන්ට මෙසේ කීවේය. “ඒ දේවල් සිදු වීමට නියමිත කාල වකවානු+ නියම කරන්නේ පියාණන්.+ ඒවා දැනගැනීමේ අයිතිය ඔබට දී නැහැ. 8 නමුත් ඔබට දෙවිගේ බලය ලැබුණු විට ඔබ ශක්තිමත් වෙයි.+ ප්‍රතිඵලයක් ලෙස ඔබ යෙරුසලමෙහිද+ මුළු යුදයෙහිද සමාරියෙහිද+ පොළොවේ දුර ඈත කෙළවරවලද+ මා ගැන සාක්ෂි දරයි.”+ 9 යේසුස් ඒ දේවල් කී පසු ඔවුන් බලා සිටියදීම ඔහුව ඉහළට ඔසවාගනු ලැබූ අතර+ වලාකුළකින් වැසී ඔවුන්ට නොපෙනී ගියේය.+ 10 ඔවුන් අහස දෙස බලාගෙන සිටියදී+ සුදු වස්ත්‍ර ඇඳ සිටි+ මිනිස්සු දෙදෙනෙක් ඔවුන් ළඟ සිටගෙන, 11 “ගලීලයේ මනුෂ්‍යයෙනි, ඔබ මෙතැන සිටගෙන අහස දෙස බලා සිටින්නේ ඇයි? අහසට ඔසවාගනු ලැබූ මේ යේසුස්, ස්වර්ගයට යනවා ඔබ දුටු ආකාරයෙන්ම+ නැවත පැමිණේවි” කියා කීවෝය.

12 ඒ අවස්ථාවේදී ඔවුන් සිටියේ ඔලීව කන්ද ලෙස හැඳින්වූ කන්දකය. ඉන්පසු ඔවුහු සැතපුම් භාගයක් පමණ දුරින්*+ තිබූ යෙරුසලමට නැවත ගියෝය.+ 13 පසුව ඔවුහු තමන් නැවතී සිටි උඩුමහල් කාමරයට+ ගියෝය. එසේ ගිය අය නම් පේතෘස් සහ යොහන්ද යාකොබ් සහ අන්දෘද ෆිලිප් සහ තෝමස්ද බාතොලමෙව් සහ මතෙව්ද අල්ෆෙවුස්ගේ පුත් යාකොබ්ද උද්‍යෝගයකින් දේවල් කිරීමට ප්‍රසිද්ධව සිටි සීමොන් සහ යාකොබ්ගේ පුත් යූදස් යන අයයි.+ 14 ඔවුන් සමඟ ඇතැම් ස්ත්‍රීන්ද+ යේසුස්ගේ මව වූ මරියාද ඔහුගේ සහෝදරයන්ද සිටි අතර+ ඔවුහු සියලුදෙනාම මහත් ඕනෑකමින් නොකඩවා එකට යාච්ඤා කරමින් සිටියෝය.+

15 එකසිය විසිදෙනෙකු පමණ රැස්ව සිටි අවස්ථාවක පේතෘස් සියලුදෙනා ඉදිරියේ නැඟිට, මෙසේ කීවේය. 16 “සහෝදරයෙනි, සෑම දෙයක්ම සිදු වී තිබෙන්නේ ශුද්ධ ලියවිල්ලේ සඳහන් වූ දේවල් ඉටු වීමටයි.+ යේසුස්ව අත්අඩංගුවට ගත් අයට සහයෝගය දුන්+ යූදස් ගැන+ කලකට පෙර දාවිත් දෙවිගේ බලය මාර්ගයෙන්+ කතා කර තිබුණා. 17 යූදස් අපේ කණ්ඩායමේ සාමාජිකයෙක් වූ අතර+ ඔහු අප සමඟ සේවයෙත් යෙදුණා.+ 18 (මේ මිනිසා තම අධර්මිෂ්ඨ ක්‍රියාවලට ලැබුණු කුලියෙන්+ පිට්ටනියක් මිල දී ගත්තේය.+ ඔහු වැටුණු විට ඔහුගේ හිස පොළොවේ වැදී,+ මහත් ශබ්දයකින් ඔහුගේ බඩ පැළී ඔහුගේ බඩවැල් සියල්ලම පිටතට විසි විය.* 19 එම සිද්ධිය යෙරුසලමේ සියලු වැසියන්ටද ආරංචි වූ අතර ඒ පිට්ටනිය හෙබ්‍රෙව් බසින් අකෙල්දමා යනුවෙන් හැඳින්වේ. එහි අර්ථය ලේ පිට්ටනිය යන්නය.) 20 ගීතාවලිය පොතෙහි, ‘ඔහුගේ නවාතැන පාළු වේවා! එහි කිසි වැසියෙක් නොසිටීවා’+ කියාද, ‘අන් අයව රැකබලා ගන්නා කෙනෙකු ලෙස ඔහුට හිමි වී තිබුණු වගකීම් වෙන කෙනෙකුට ලැබේවා’+ කියාද ලියා තිබෙනවා. 21 එමනිසා අප කළ යුතු දෙයක් තිබෙනවා. එනම් ස්වාමීන් වන යේසුස් අප අතරේ සිටි කාලය පුරාම අප සමඟ සිටි අය අතරින්,+ 22 එක් කෙනෙකුව තෝරාගත යුතුයි. ඒ පුද්ගලයා, යොහන් යේසුස්ව බව්තීස්ම කළ දා පටන්+ යේසුස් අපෙන් සමුගෙන ස්වර්ගයට ගිය දවස දක්වා අප සමඟ සිටි+ කෙනෙකු විය යුතුයි. එවිට යේසුස්ගේ නැවත නැඟිටීම ගැන අප සමඟ සාක්ෂි දැරීමට ඔහුටත් හැකියි.”+

23 ඉන් අනතුරුව ඔවුහු දෙදෙනෙකුගේ නම් යෝජනා කළෝය. ඒ ජස්ටස් යන වාසගම දැරූ බාසබස් ලෙස හැඳින්වූ යෝසෙප් සහ මතියස් යන අයවයි. 24 එවිට ඔවුහු යාච්ඤා කරමින් මෙසේ කීවෝය. “යෙහෝවා දෙවියනි, සියල්ලන්ගේ සිත් දන්නේ ඔබයි.+ මේ මිනිසුන් දෙදෙනා අතරින් ඔබ තෝරාගෙන තිබෙන්නේ කාවද කියා අපට පෙන්වන්න. 25 නොමඟ ගිය යූදස් අත්හැරිය මේ සේවය සහ නියෝජිතයෙකු වීමේ වරප්‍රසාදය+ ලබන්නේ ඔහුයි.” 26 ඉන්පසු ඔවුහු ඒ දෙදෙනාගෙන් කෙනෙකුව තෝරාගැනීමට දාදු දැමූහ.+ දාදුව වැටුණේ මතියස්ටය. එහෙයින් යේසුස්ගේ නියෝජිතයන් එකොළොස්දෙනාට+ ඔහුව එකතු කරන ලදි.