Hagai
2 Ka khoeli ea bosupa,+ ka letsatsi la mashome a mabeli a motso o mong la khoeli, lentsoe la Jehova la hlaha ka moprofeta Hagai,+ le re: 2 “Ka kōpo, bua le Zorobabele+ mora oa Shalatiele,+ ’musisi oa Juda,+ le moprista ea phahameng Joshua+ mora oa Jozadake,+ le ba setseng ba sechaba, u re, 3 ‘Ke mang har’a lōna ea setseng ea boneng ntlo ena khanyeng ea eona ea pele?+ Le e bona joang hona joale? Ha e bapisoa le eo, na hase lefeela mahlong a lōna?’+
4 “‘Empa joale e-ba matla, Uena Zorobabele,’ ho bolela Jehova, ‘’me u be matla,+ Uena moprista ea phahameng Joshua mora oa Jozadake.’
“‘Le be matla, lōna batho bohle ba naha,’ ho bolela Jehova, ‘’me le sebetse.’+
“‘Etsoe ke na le lōna,’+ ho bolela Jehova oa mabotho. 5 ‘Hopolang ntho eo ke ileng ka lumellana le lōna ka eona ha le ne le tsoa Egepeta,+ le ha moea+ oa ka o ne o eme har’a lōna. Le se ke la tšoha.’”+
6 “Etsoe sena ke seo Jehova oa mabotho a se boletseng, ‘Hang hape—ka mor’a nakoana e seng kae+—’me ke sisinya maholimo le lefatše le leoatle le mobu o omileng.’+
7 “‘Ke tla sisinya lichaba tsohle, ’me lintho tse lakatsehang tsa lichaba tsohle li tla kena;+ ’me ke tla tlatsa ntlo ena ka khanya,’+ ho boletse Jehova oa mabotho.
8 “‘Silevera ke ea ka, le khauta ke ea ka,’+ ho bolela Jehova oa mabotho.
9 “‘Khanya ea ntlo ena ea morao e tla ba khōlō ho feta ea ea pele,’+ ho boletse Jehova oa mabotho.
“‘Sebakeng sena ke tla fana ka khotso,’+ ho bolela Jehova oa mabotho.”
10 Ka letsatsi la mashome a mabeli a metso e mene la khoeli ea borobong, ka selemo sa bobeli sa Dariuse, lentsoe la Jehova la hlaha ho moprofeta Hagai,+ le re: 11 “Sena ke seo Jehova oa mabotho a se boletseng, ‘Ka kōpo, botsa baprista mabapi le molao,+ u re: 12 “Haeba motho a beha nama e halalelang molekeng oa seaparo sa hae, ’me ka moleka oa seaparo sa hae a ama bohobe kapa sechu kapa veine kapa oli kapa lijo tsa mofuta leha e le ofe, na li tla halalela?”’”+
Baprista ba araba ’me ba re: “Che!”
13 Hagai a tsoela pele ho re: “Haeba e mong ea sa hloekang ka lebaka la moea o shoeleng a ama leha e le efe ea lintho tsena, na e tla silafala?”+
Eaba baprista baa araba ’me ba re: “E tla silafala.”
14 Tumellanong le hoo Hagai a araba ’me a re: “‘Ke kamoo batho bana ba leng kateng, ’me ke kamoo sechaba sena se leng kateng ka pel’a ka,’+ ho bolela Jehova, ‘’me ke kamoo mosebetsi oohle oa matsoho a bona o leng kateng, le eng kapa eng eo ba e hlahisang moo. Ha ea hloeka.’+
15 “‘Empa joale, ka kōpo, behang lipelo+ tsa lōna ho sena ho tloha letsatsing lena ho ea pele, pele lejoe le behoa ka tempeleng ea Jehova,+ 16 ho tloha ha lintho tseo li ne li etsahala—e mong o ile a fihla qubung ea litekanyo tse mashome a mabeli, ’me e ne e le tse leshome; e mong o ile a tla sekhakeletsing sa sehatelo ho kha litekanyo tse mashome a mahlano tsa bate ea veine, ’me e ne e le tse mashome a mabeli;+ 17 ke ile ka le otla ka komello+ le ka phori+ le ka sefako,+ esita le mosebetsi oohle oa matsoho+ a lōna, ’me ho ne ho se ea nang le lōna ea retelehelang ho ’na,’+ ho bolela Jehova—
18 “‘Ka kōpo, behang lipelo+ tsa lōna ho sena ho tloha ka letsatsi lena ho ea pele, ho tloha ka letsatsi la mashome a mabeli a metso e mene la khoeli ea borobong, ho tloha ka letsatsi leo ka lona motheo oa tempele ea Jehova o ileng oa behoa;+ behang lipelo tsa lōna ho sena: 19 Na ho sa ntse ho e-na le peō ka sekoting+ sa lijo-thollo? Hajoale, sefate sa morara le sefate sa feiga le sefate sa likharenate le sefate sa mohloaare—ha sea beha, na ha ho joalo? Ho tloha letsatsing lena ke tla fana ka tlhohonolofatso.’”+
20 Lentsoe la Jehova la tsoela pele ho hlaha ka lekhetlo la bobeli ho Hagai+ ka letsatsi la mashome a mabeli a metso e mene la khoeli,+ le re: 21 “E-re ho Zorobabele ’musisi oa Juda,+ ‘Ke sisinya maholimo le lefatše.+ 22 Ka sebele ke tla liha terone ea mebuso le ho felisa matla a mebuso ea lichaba;+ ke tla liha koloi le bapalami ba eona, ’me ka sebele lipere le bapalami ba tsona ba tla lihuoa,+ e mong le e mong ke sabole ea mor’abo.’”+
23 “‘Ka letsatsi leo,’ ho bolela Jehova oa mabotho, ‘ke tla u nka, Uena Zorobabele+ mora oa Shalatiele,+ mohlanka oa ka,’ ho bolela Jehova; ‘ka sebele ke tla u beha joaloka lesale la tiiso,+ hobane ke uena eo ke mo khethileng,’+ ho bolela Jehova oa mabotho.”+