Jeremia
25 Selemong sa bone sa puso ea Jojakime+ mora oa Josiase, morena oa Juda e leng selemo sa pele sa puso ea Nebukadnezare* morena oa Babilona, Molimo o ile a bua le Jeremia ka sechaba sohle sa Juda. 2 Moprofeta Jeremia o ile a re ka* sechaba sohle sa Juda le ka baahi bohle ba Jerusalema:
3 “Ho tloha selemong sa bo13 sa puso ea Josiase+ mora oa Amone, morena oa Juda, ho fihlela hona joale, ka lilemo tsena tse 23, Jehova o ile a bua le ’na. Eaba ’na ke bua le lona ka makhetlo-khetlo* empa le ne le sa mamele.+ 4 Jehova o ile a roma bahlanka bohle ba hae ba baprofeta ho lona. O ile a ba roma ka makhetlo-khetlo* empa ha lea ka la mamela kapa la sekeha tsebe hore le utloe.+ 5 Ba ne ba re: ‘Ka kopo e mong le e mong oa lona a ke a tlohele mekhoa ea hae e mebe le mesebetsi ea hae e mebe.+ Haeba le etsa joalo, le tla tsoela pele ho lula halelele naheng eo Jehova a e fileng lona le baholo-holo ba lona ho tloha khale. 6 Le se ke la latela melimo e meng. Le se ke la e sebeletsa le ho e inamela eaba le mo siteloa ka mosebetsi oa matsoho a lona. Ho seng joalo o tla le bakela tlokotsi.
7 Empa ha lea ka la ’mamela,’ ke Jehova ea chong. ‘Ho e-na le hoo, le ile la ntšiteloa ka mosebetsi oa matsoho a lona eaba le ipakela mathata.’+
8 Kahoo, Jehova oa mabotho o re: ‘Kaha ha lea ka la mamela mantsoe a ka, 9 ke bitsa batho ba lichaba tsohle tsa leboea,’+ ke Jehova ea chong. ‘Ke bitsa Nebukadnezare* morena oa Babilona, mohlanka oa ka.+ Ke tla ba tlisa hore ba futuhele naha ena,+ baahi ba eona le lichaba tsena tsohle tse e potolohileng.+ Ke tla le felisa ’moho le lichaba tsena, ke le etse ntho e tšosang le ntho e letsetsoang mololi, ke etse hore le senyehele ruri. 10 Ke tla felisa thabo le nyakallo har’a lona,+ ke felise lentsoe la monyali le la monyaluoa,+ molumo oa leloala le khanya ea lebone. 11 Naha ena eohle e tla felisoa, e fetohe ntho e tšosang ’me lichaba tsena li tla lokela ho sebeletsa morena oa Babilona ka lilemo tse 70.+
12 Empa ha lilemo tse 70 li fetile,+ ke tla otla morena oa Babilona le sechaba seo* ka lebaka la phoso ea bona+ ’me ke tla etsa hore naha ea Bakalde e se ke ea hlola e e-ba le baahi ka ho sa feleng,’ ke Jehova ea chong.+ 13 ‘Ke tla phethahatsa lintho tsohle tseo ke boletseng hore ke tla li etsa naha eo, lintho tsohle tse ngotsoeng bukeng ena tseo Jeremia a li profetileng ka lichaba tsohle. 14 Etsoe lichaba tse ngata le marena a maholo+ a tla etsa Bakalde makhoba+ ’me ke tla ba ahlola ho latela liketso tsa bona le mesebetsi ea matsoho a bona.’”+
15 Jehova Molimo oa Iseraele o itse ho ’na: “Nka senoelo sena sa veine ea khalefo letsohong la ka ’me u noese lichaba tsohle tseo ke u romang ho tsona. 16 Li tla noa, li thekesele, li itšoare joaloka mahlanya hobane ke etsa hore ntoa e qhome har’a tsona.”+
17 Kahoo, ka nka senoelo letsohong la Jehova ’me ka noesa lichaba tsohle tseo Jehova a nthometseng ho tsona.+ 18 Ka qala ka Jerusalema le metse ea Juda,+ marena a eona le likhosana tsa eona e le hore li felisoe, li fetohe ntho e tšosang, e letsetsoang mololi le e rohakiloeng+ feela joalokaha ho tla etsahala kajeno. 19 Eaba ke leba ho Faro morena oa Egepeta le bahlanka ba hae, likhosana tsa hae, batho bohle ba hae+ 20 le balichaba bohle ba neng ba lula har’a bona, marena ’ohle a naha ea Utse, a naha ea Bafilista,+ Ashkelone,+ Gaza, Ekrone le batho ba Ashdode ba setseng, 21 Edomo,+ Moabe+ le Baamone,+ 22 marena ’ohle a Tire, a Sidone+ le a sehlekehleke se leoatleng, 23 Dedane,+ Tema, Buze le bohle ba kutileng litelu tse ka holim’a mehlahare,*+ 24 marena ’ohle a Maarabia+ le a lichaba tse fapaneng tse lulang lefeelleng, 25 marena ’ohle a Zimri, a Elame+ le a Bamede,+ 26 marena ’ohle a leboea, a hole le a haufi, kaofela ha ’ona ka ho latellana le mebuso eohle e meng ea lefatše. Morena oa Sheshake*+ o tla noa ka mor’a ’ona.
27 “U tle u re ho bona: ‘Jehova oa mabotho, Molimo oa Iseraele, o re: “Noang, tahoang, hlatsang le oe hoo le ke keng la tsoha+ hobane ke romela lira tsa lona hore li le hlasele.”’ 28 Ha ba hana ho nka senoelo letsohong la hao hore ba noe, u re ho bona: ‘Jehova oa mabotho o re: “Ho noa le tla noa. 29 Haeba ke qala ka ho tlisa tlokotsi motseng ona o bitsoang ka lebitso la ka,+ na lona nka le tlohela?”’+
Jehova oa mabotho o re: ‘Le ke ke la tloheloa feela etsoe ke tla tlisa sabole e tla bolaea batho bohle ba lefatše.’
30 U ba profetele mantsoe ana ’ohle ’me u re ho bona:
‘Jehova o tla rora joaloka tau a le holimo,
O tla phahamisa lentsoe la hae a le sebakeng sa hae se halalelang sa bolulo.
O tla puruma, a purumela sebaka sa hae sa bolulo.
O tla hoeletsa joaloka ba hatakelang morara ho etsa veine,
A binele holimo ka mor’a ho hlola batho bohle ba lefatše.’
31 ‘Lerata le tla utloahala ho ea fihla likarolong tse hole-hole tsa lefatše
Hobane Jehova o qosa lichaba.
O tla ahlola batho bohle ka boeena.+
O tla nehelana ka ba khopo hore ba bolaoe ka sabole,’ ke Jehova ea chong.
32 Jehova oa mabotho o re:
33 Letsatsing leo, ba bolailoeng ke Jehova ba tla fumanoa hohle, ho tloha pheletsong e ’ngoe ea lefatše ho ea ho e ’ngoe. Ba ke ke ba lleloa, ba phuthoa kapa ba patoa. Ba tla ba joaloka moiteli holim’a lefatše.’
34 Lona balisa llang, le bokolle.
Ipitikeng fatše, lona linku tsa bohlokoa har’a mohlape.
Nako ea hore le hlajoe le nako ea hore le hasanngoe e fihlile,
Le tla oa joaloka sejana sa bohlokoa.
35 Balisa ha ba na moo ba ka balehelang teng,
Ha ho na moo linku tsa bohlokoa mohlapeng li tsoang le teng.
36 Utloang! Balisa baa lla
Le linku tsa bohlokoa mohlapeng lia bokolla
Kaha Jehova o senya lekhulo la bona.
37 Metse e nang le khotso ha e sa na bophelo
Hobane Jehova o halefile haholo.
38 O tlohile moo a lulang teng joalokaha tau e kotsi e tloha moo e lulang.+
Kahoo, batho bohle ba tla makalla naha
Hobane o sebelisitse sabole e bohale e bolaeang batho ba bangata
Le hobane a halefile haholo.”