28 ASA
“O Ile a Sebeletsa Jehova ka Pelo Eohle Bophelo Bohle ba Hae”
E TLAMEHA ebe Morena Asa o ile a sehoa ke letsoalo ha a bona lebotho le leholo la Baethiopia le hlomme litente Juda, le tletse ho tla loana. E ne e se e le ka makhetlo a mangata Jehova a romela batho ba hae ntoeng, empa lena e ne e le lekhetlo la pele ba iphumana ba tlameha ho loana le lebotho le leholo hakaalo. Lebotho leo le ne le e-na le masole a milione, empa la Asa lona le ne le e-na le masole a ka bang 600 000 feela. Ebe Asa o ne a tla se fumana kae sebete sa hore a loanele sechaba sa hae?
Lena e ne e se lekhetlo la pele Asa a tlameha ho bontša sebete. Ha Asa a qala ho busa Juda, lilemo tse leshome pele ho moo, o ile a bontša hore o tšoana le moholo-holo oa hae Morena Davida. Joaloka Davida, ntho e kholo eo Asa a neng a amehile ka eona e ne e le ho thabisa Molimo oa hae, Jehova. Morena Asa ka boikokobetso o ile a mamela baprofeta ba Jehova, e leng Odede le mora oa hae Azaria. Morena enoa e monyenyane o ile a ba le sebete sa ho lokisa lintho tse mpe tseo esale batho ba li etsa ho tloha ha Morena Solomone a ne a fetohela Jehova. Ka sebete o ile a senya litšoantšo tse rapeloang, a ba a tlosa matekatse a tempele a banna Juda.
Asa o ile a lokisa esita le lintho tse mpe tse neng li etsoa ke ba lelapa labo. Nkhono oa hae Maaka o ne a le “boemong ba bofumahali” Juda. Empa o ne a entse setšoantšo se nyonyehang, mohlomong e le ho khothalletsa batho ho etsa boitšoaro bo bobe bo amanang le thobalano. Asa o ile a khetha ho tšepahalla Jehova ho e-na le ho tšepahalla ba lelapa labo. O ile a tlosa nkhono oa hae boemong ba hae ba bofumahali, a ba a chesa setšoantšo seo. Ka ho etsa joalo, o ile a thabisa Jehova. Kahoo, Molimo a mo hlohonolofatsa ka ho etsa hore ho be le khotso Juda ka lilemo tse leshome. Leha ho le joalo, lebotho le leholo la Baethiopia le ile la leka ho hlasela Juda. Ebe Jehova o ne a tla thusa Asa joang boemong boo?
Morena Asa o ile a tobana le lebotho la lira tsa batho ba Molimo le leholo ka ho fetisisa leo ho kileng ha buuoa ka lona ka Bibeleng
Ha Asa a bona masole a Baethiopia a milione tlase mola khohlong, o ile a rapela Jehova hang-hang. Nahana feela hore na masole a hae a ile a ikutloa joang ha a rapela a re: “Jehova, u thusa batho ho sa tsotellehe hore na ba bangata kapa baa fokola. Re thuse Jehova Molimo oa rona hobane re tšepetse ho uena ’me re tlile ho tla loantša masole ana a mangata ka lebitso la hao. Jehova, u Molimo oa rona. U se ke oa lumella motho hore a u hlole.” E tlameha ebe thapelo eo e tsoang pelong e ile ea thabisa Jehova haholo. O ile a hlokomela hore Asa o tšoana le Jonathane mora oa Morena Saule. Banna bao ka bobeli ba ne ba tseba hore haeba feela Jehova a le lehlakoreng la bona, ha ba hloke ho ba le lebotho le leholo e le hore ba hlole sera sa bona. (1 Sam. 14:6) Ha ’Musi oa lintho tsohle a le lehlakoreng la motho, motho eo ke eena ea nang le lebotho le matla ka ho fetisisa.
Asa o ile a etella masole a hae pele ntoeng. Joale ho ile ha etsahala’ng? Bibele e re ka lira tsa bona: “Ba ile ba hloloa ke Jehova le lebotho la hae.” Ha ho le le leng la masole ao le ileng la pholoha.
Ka mor’a moo, Asa o ile a ’na a khothalletsa batho ho rapela Jehova ka tsela e nepahetseng. Batho ba bangata ba hlahang ka leboea malokong a leshome a Iseraele ba ile ba fallela Juda e le hore ba ka boela ba rapela Jehova ka tsela e nepahetseng tempeleng e Jerusalema. Asa o ile a etsa hore batho bohle ba Juda ba ikane hore ba tla lula ba tšepahalla Jehova.
Leha ho le joalo, ha re bala pale ea Asa rea hlokomela hore ho na le liphoso tse kholo tseo a ileng a li etsa. Ha morena oa Iseraele a ne a batla ho hlasela Juda, Asa ha aa ka a kopa thuso ho Jehova, ho fapana le hoo, o ile a fa morena oa Siria tjotjo e le hore a hlasele Iseraele. Eitse ha Jehova a roma seboni kapa moprofeta ea bitsoang Hanani ho eena hore a mo khalemele, Morena Asa o ile a halefa eaba o kenya moprofeta eo teronkong. Ha Asa a se a holile, o ile a kula haholo empa ha aa ka a kopa hore Jehova a mo thuse. Ho e-na le hoo, o ile a kopa thuso ho lingaka. Ho bonahala eka ka nako eo tumelo ea Asa e ne e se e fokola.
Leha ho le joalo, Jehova ke Ntate ea nang le mamello ka ho fetisisa. Ha Lentsoe la hae le akaretsa puso ea Asa ea lilemo tse 41 le re: “Leha ho le joalo, Asa o ile a sebeletsa Jehova ka pelo eohle bophelo bohle ba hae.” Tlaleho ena ea bophelo ba Asa ea bontša hore Jehova o rata batho ba mo ratang. E boetse e re ruta hore le ka mohla ha rea lokela ho lebala lintho tseo Jehova a re etselitseng tsona. Ha lilemo li ntse li ea, Jehova o re fa mabaka a eketsehileng a hore re be sebete le ho feta.
Bala litemana tsena:
U ka re’ng?
Asa o ile a bontša joang hore o sebete?
Etsa Lipatlisiso
1. “Palo e halalelang” ke’ng, hona bopaki ba lintho tse epollotsoeng bo tiisa joang hore batho ba neng ba fetohetse Molimo ba ne ba rapela molimotsana ea emeloang ke palo eo? (1 Mar. 15:12, 13; w08 6/1 10 ¶1-5) A
Setšoantšo A: Asa o ile a tlosa nkhono oa hae boemong ba bofumahali a ba a senya le palo e halalelang
Setšoantšo A: Asa o ile a tlosa nkhono oa hae boemong ba hae bo phahameng a ba a senya palo e halalelang
2. E ka ’na eaba mora oa Hanani e ne e le mang, hona o ile a bontša joang hore o sebete joaloka ntate oa hae? (it “Hanani” No. 2-wcgr)
3. Le hoja Asa a ile a etsa liphoso, o ile a etsa’ng ho bontša hore o ne a “sebeletsa Jehova ka pelo eohle”? (1 Mar. 15:14; w17.03 19 ¶5-6)
4. Baiseraele ba ne ba sa tloaela ho chesa bafu. Joale ke hobane’ng ha Bibele e re ba ile ba etsetsa Asa “mollo o moholo lepatong la hae”? (2 Likron. 16:14; w05 12/1 20 ¶5)
Nahana ka Seo u Ithutileng Sona
Mantsoe a khothatsang a moprofeta Azaria a ile a susumelletsa Asa ho khothalletsa motho e mong le e mong Juda ho tsosolosa borapeli ba ’nete. Uena u ka khothatsa batho ba bang joang ka mantsoe a hao? B
Setšoantšo B
Asa o ile a tšepa Jehova ha a ne a hlaseloa ke lebotho le leholo la masole, empa hamorao ha a hlaseloa ke lebotho le lenyenyane o ile a tšepa batho. Taba ee e re ruta’ng ka ho itšetleha ka Jehova linthong tsohle? (Liprov. 3:5, 6)
U ka etsisa sebete seo Asa a ileng a se bontša joang?
Iphe Nako ea ho Nahana ka Jehova le ka Morero oa Hae
U ithutile’ng ka Jehova tlalehong ee?
Tlaleho ee e amana joang le morero oa Jehova?
U ka rata ho botsa Asa eng ha a se a tsositsoe?
Ithute Lintlha Tse Ling
Haeba u lula naheng eo ho eona u lumeletsoeng ho rapela Jehova ka bolokolohi, u ka sebelisa nako ea hao ka bohlale joang joalokaha Asa a ile a etsa?
Sheba hore na mohlala oa Asa o ka re khothatsa joang ha re loanela hore re lule re tšepahalla Jehova.
“Moputso o Teng Bakeng sa Mosebetsi oa Lona” (w12 8/15 8-10)