Mahlohonolo ke Afe Lefatšeng Nakong ea Lilemo Tse Sekete?
Ho tla ba joang ha ‘ho etsoa thato ea Molimo’?
Na u kile ua etsa thapelo ea mohlala e tsebisahalang e rutiloeng ke Jesu? O itse: “’Muso oa hao o tle, thato ea hao e etsoe lefatšeng, joale ka ha e etsoa leholimong.”—Matt. 6:10.
LE HOJA batho ba limillione ba ’nile ba pheta mantsoe ao hangata, na u nahana hore ba bangata ba kile ba tebisa maikutlo hore na ho tla ba joang lefatšeng ha Molimo o arabela thapelo eo ka botlalo? Na uena u kile ua ipotsa hore na ke lintho life tseo uena le lelapa la hao le tla li thabela haeba le neoa tokelo ea ho phela ha thato ea Molimo e etsoa lefatšeng joalokaha e etsoa leholimong?
Buka ea Tšenolo e ka re thusa mona. Khaolong ea eona ea 19 re bala ka ntoa e tlang eo ho eona Jesu Kreste a tla timetsa lira tsohle tsa Molimo tse lefatšeng. Khaolo ea 20 e re bolella hore joale ka nako eo Diabolose, ea ’nileng a susumeletsa bokhopo, o tla kenngoa litlamong sekoting ka lilemo tse 1 000. Nakong ea lilemo tse sekete tseo tsa khotso, Kreste o tla busa a le leholimong, tlhohonolofatsong ea bahlanka ba Molimo ba batho, ho akarelletsa ba tsositsoeng. Boemeli ba bokhopo bo tlositsoe, ho tla ba le “maholimo a macha le lefatše le lecha” moo ho loka ho tla ikahela teng.—Tšen. 20:11; 21:1; 2 Pet. 3:13.
Na u thahasella sebopeho se qaqileng haholoanyane sa mahlohonolo a lefatšeng nakong ea lilemo tse sekete tsa khotso? E, Tšenolo e tsoela pele ho fana ka tlhaloso e ’ngoe ea hore na ho tla ba joang ha Jehova Molimo a lebisa tlhokomelo ea hae tsamaisong e ncha ea lefatše ea barapeli ba ’nete. Rea bala:
“Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšen. 21:4.
Na ’nete ea hore meokho e ke ke ea hlola e e-ba teng ha e supe hore batho ba ke ke ba hlola ba otloa ka lihlōhō tse kang ho khahlapetsoa ha bana, basali, peto, bok’hothotsi, tlhekefetso, bokhukhuni le ntoa? Hape, Molimo o re tiisetsa hore bohloko le lefu—tseo hangata e leng metsoalle ea ho kula le likotsi—li ke ke tsa e-ba teng ho baka masoabi.
Bibele e boetse e re nea motheo oa ho lebella mahlohonolo a mang lefatšeng nakong ea lilemo tse sekete tsa khotso. Ntlheng ena, ha ho hlokahale hore re lebe litorong kapa khopolo-taba, joalokaha ba bang ba ile ba etsa lekholong la lilemo la bobeli le la boraro.
MAIKUTLO A PELE KA MAEMO A LEFATŠE
Joalokaha sehlooho sa pele se boletse, ho oa Bokresteng bo hloekileng ho etsahetse kamor’a ho shoa ha baapostola, ’me ba bang ba qala ho ruta lintho tse sothehileng. Hona, karolong e ’ngoe, ho tsoetsoe ke hobane ka phoso ba ne ba lumela hore Jesu le majalefa hammoho le eena ba tla busa lefatšeng. (Joh. 14:19; 2 Tim. 2:12; 1 Pet. 1:3, 4) Ka ho totobetseng ho ne ho nahanoa hore babusi ba joalo ba phahametseng motho ba tla hlahisa maemo a ke keng a hlalosoa lefatšeng.
Re fumana mohlala oa litlhaloso tse sa lumeleheng joalo mangolong a qotsitsoeng a Papias, mobishopo oa lekholong la bobeli oa Frigia. O ne a nahana hore lilemong tse sekete tsa khotso ho tla etsahala sena:
Ho tla lengoa merara, o mong le o mong o na le makala a sekete, . . . ’me lehlomela le leng le le leng le e-na le lihlopha tse likete tse leshome, ’me sehlopheng se seng le se seng merara ea litholoana tse likete tse leshome . . . Ka ho tšoanang koro e tla bea liqoapi tse likete tse leshome, ’me qoapi e ’ngoe le e ’ngoe e be le lithollo tse likete tse leshome, ’me thollo e ’ngoe le e ’ngoe [e ntše] phoofo ea liponto tse hloekileng tse leshome.”
Leha ho le joalo, bangoli ba bang ba pele ba ile ba supa tlhalosong e thabisang e ho Esaia, ba lumela hore tsena li fana ka pontšo ea seo puso ea Kreste ea lilemo tse 1 000 e tla se etsa.
Ka mohlala, bangoli ba lekholong la bobeli la lilemo Justin Martyr le Irenaeus ba ile ba qotsa boprofeteng ba Esaia 65:17-25 le 11:6-9. Sa pele lirapeng tsena se re:
“Ba tla haha matlo, ba lule ho ’ona; ba tla hloma merara, ba je litholoana tsa eona. Ba ke ke ba haha matlo, osele a lula teng, leha e le ho hloma merara osele a je tholoana tsa eona, hobane matsatsi a sechaba sa ka a tla lekana le matsatsi a lifate, . . . Phiri e tla fula hammoho le konyana, tau e tla fula joang joale ka khomo, . . . li ke tsa khathatsa, leha e le ho senya thabeng ea ka eohle e halalelang: ho bolela Jehova.”
Esaia khaolo ea 11 le eona e bua ka liphoofolo li phela hammoho ka khotso, ka tau e ja joang joale ka khomo. ’Me e bolela hore li tla qhojoa ke moshemane e monyenyane.
Irenaeus a hlokomela kamoo mantsoe ana e leng tlhaloso e loketseng ea kamoo ’nete ea Molimo e ka etsang liphetoho tsa botho ho “batho ba babe, ba lichaba tse sa tšoaneng le mekhoa e sa tšoaneng, ba lumelang, ’me ha ba lumetse, ba sebetsa tumellanong le ho loka.” Empa a boela a bea mabaka hore lilemong tse sekete tsa khotso liphetoho tsena ho batho, ba tlohela bobe ba e-ba le khotso, ka ho utloahalang li tla bontšoa ke ’mopo o liphofolo. A ngola:
“Ha taolo e bopiloeng e nchafatsoa, ka nako eo liphoofolo li tla ba tlas’a motho, ’me li khutlele lijong tseo Molimo o li neileng tsona qalong, tholoana ea lefatše, kaha li ne li le tlas’a motho li bile li ikokobeletsa Adama.”—Against Heresies V, 33, 4.
Ha rōna kajeno re bala litemana tseo ho Esaia tabeng eo ho neng ho buuoa ka eona, re ka ananela hore Esaia o ne a profeta pele ka ho khutlisoa ha batho bahabo botlamuoeng Babylona ka tsela e nyenyane kapa ea tšoantšetso, ’me, sa bobeli, ka ho tsosolosoa ha Baiseraele ba moea ho tsoa Babylona e Moholo “mehleng ea qetello” ka kutloisiso ea sebele le e feletseng. Phethahatso e nyenyane e tlile ka 537 B.C.E. Ka puso e ncha holim’a naha, Baiseraele ba khutlisitsoeng ba ne ba ka itšebelisetsa ho lema naha ea bona le ho thea ho bea ha eona, botle le khotso. (Esa. 35:1, 2) Jehova a ba thusa hore ba lahle litšoaneleho tsa bobe le tsa bophoofolo le hore ba bonahatse boitšoarong ba bona le litseleng khotso e loketseng har’a barapeli ba ’nete.—Mik. 6:8; bona Man’s Salvation out of World Distress at Hand!, maq. 320-322, par. 15-19; hape “New Heavens and a new Earth,” maq. 324-333, par. 18-29.
Kaha khotso e joalo e ile ea hōla har’a Baiseraele ba tsosolositsoeng ka nako eo, ’me e-ea bonahala har’a barapeli ba ’nete kajeno, na re ke ke ra tšepa e joalo ka tekanyo e bileng e leng kholoanyane lilemong tse sekete tsa khotso? Leha ho le joalo, litemana tse joalo li re nea ho hongata hore re ho nahane.
MEHLALA E TSOANG EDENE
Ha a supa maemo a macha a neng a tla thabeloa ke Baiseraele ba tsosolositsoeng, Esaia o nkile mohlaleng oa lehae la motho la tšimolohong, paradeise e neng e bitsoa tšimo ea Edene. A ngola:
“Ka mokhoa o joalo, Jehova o utloetse Sione bohloko, o utloetse nqalo tsohle tsa hae tse senyehileng bohloko; o fetotse nahathothe ea hae ea e-ba joale ka Edene, le naha ea hae e omeletseng, o e entse serapa sa Jehova.”—Esa. 51:3.
Bangoli ba bang ba Bibele, le bona, ba ile ba supa tšimo ea Edene e le e beang mohlala oa maemo a nang le litholoana le a hlohonolofetseng ao batho ba tla rata ho lula ho oona.—Ezek. 36:35; Joele 2:3; Gen. 13:10; bapisa Hosea 2:18-21.
Kahoo, ha re nahana ka mahlohonolo a lefatšeng a lilemo tse sekete tsa khotso, re ka hopola seo Jehova Molimo a faneng ka sona lelapeng la motho qalehong, tšimong ea Edene.
Tlaleho ea Genese e re bolella hore Molimo o beile Adama le Eva “tšimong” kapa “paradeiseng.” (Gen. 2:8, Septuagint Version) E ne e le tšimo e fetisang ho ba ea lipalesa. Rea bala: “Jehova Molimo a melisa lefatšeng lifate tsohle tse khahlisang mahlo, tse monate ha li jeoa.” Le hoja ho ne ho le teng lijo tse ngata tse atlehisang, tšimo ea Edene e ne e boetse e le sebaka sa mosebetsi o putsang. Adama le Eva ba ne ba tla lema le ho hlokomela tšimo, e leng ho neng ho tla eketsa ho khotsofalla ha bona ho ja tse ngata tse hlahisoang ke eona.—Gen. 2:9, 15, 16; bapisa Moeklesia 2:24; 5:12.
Ha Adama le Eva ba ntse ba phela tšimong eo e thabisang, na ba ne ba tšohile libatana tse hlaha? Na khotso ea bona e ne e thijoa ke liphoofolo tse janang ka sehlōhō? Se ngotsoeng ke Esaia ho khaolo ea 11 le ea 65 ha se fane ka maikutlo a joalo. Hape re na le boitsebiso bona ba pale bo ngotsoeng ho Genese:
“Molimo oa re [ho Adama le Eva]: Bonang, ke le neile limela tsohle tse beang peō, tse kahohle lefatšeng, le sefate se seng le se seng se beang litholoana tse nang le peō, e be lijo tsa lōna. Empa ha e le liphoofolo tsohle tsa lefatše, le tse rurang tsohle tsa maholimo, le lihahabi tsohle tsa lefatše, tse utloang, ke li neile joang bohle bo botala, e be lijo tsa tsona. ’Me ha e-ba joalo.”—Gen. 1:29, 30.
Joalokaha u tseba mohlomong, batho ba bangata kajeno, ho akarelletsa baruti ba bang, ha ba amohele se boleloang ke Bibele ka tšimo ea Edene le maemo a neng a le moo. Ba bang ba bolela hore tlaleho e buang ka Adama le Eva ke tšōmo feela kapa tlhaloso e ’ngoe e ipatileng ea moea. Kahoo ba loantšana le Jesu Kreste, hobane o ne a amohela tlaleho ea Mangolo e le ea ’nete, a bile a e qotsa. (Matt. 19:4, 5) Hape, baruti ba bangata ha ba lumele se boleloang ke Lentsoe la Molimo ka liphoofolo tšimong ea Edene. Mohlomong maikutlo a bona a amiloe ke khopolo ea hore lintho li ikentse—Hore seo re se bonang bophelong ba liphoofolo hona joale ke katoloso ea se ’nileng sa e-ba teng le hore “ho phela ha tse atlehileng” e bile oona molao ka mehla har’a liphoofolo le batho.
Empa ka ho lumela matleng a Molimo, le ho ithaopela ho amohela se boleloang ke Bibele, re ka kholoa hore Edene batho ba pele e ne e se baetsalibe, ba loanang le hore liphoofolo tse paradeiseng li ne li le khotso. Ho theiloe ho seo re se boneng ka borona polokelong ea liphoofolo, mananeong a thelevishene a liphoofolo tse hlaha kapa mapolasing, na re ke ke ra tiisa hore ho busa ha motho liphoofolo ka khotso paradeiseng ho ne ho phaella thabong ea bophelo?—Gen. 1:26.
HO LEBELLA KA TŠEPO
Re ka bona, he, hore Molimo o fane ka motheo oa ho lebella mahlohonolo a lefatšeng: Tšepiso e ho Tšenolo 21:4 e bolela hore re ka lebella ho fela ha masoabi, bohloko le lefu. ’Me, ka ho utloahalang, hoo ho ka bolela ho fela ha maemo a hona joale a hlahisang lintho tse joalo. Hape, re na le lintlha tse seng kae ka tšimo ea Edene. Tsena li re nea lebaka la ho lebella paradeiseng ea lefatšeng e tsosolositsoeng e nang le mosebetsi o putsang, lijo tse khotsofatsang le tse phelisang hantle le hore hape motho a buse libopuoa tsa liphoofolo ka khotso.—Luka 23:43; Pes. 72:16.
Maemo ana a ke ke a lekanyetsoa tšimong e sebakeng se le seng. Ho e-na le hoo, Molimo o tla phethahatsa morero oa hae oa tšimolohong, ho hlokomeloa le ho ntlafatsoa ha lefatše lohle. Ha ho mohla morero oa hae o hlōlehang.—Esa. 45:18; Gen. 1:28; bapisa Esaia 14:24.
Mahlohonolo a bonahalang ho hang ha se oona feela a tlang ho etsa puso ea lilemo tse sekete thabo. Jehova o bile o re tiisetsa lintho tsa bohlokoa haholoanyane bakeng sa bophelo bo khotsofatsang e le kannete—lintho tsa moea. Hopola seo Jesu a ileng a se bolella moleki: “Motho a ke ke a phela ke bohobe feela, empa o tla phela le ke polelo tsohle tse tsoang molomong oa Molimo.” (Matt. 4:4) Kahoo, re ka tšepa hore lilemo tse sekete tsa khotso li tla tšoauoa ka ho iphepa haholo ka lintho tsa moea tse theiloeng Mangolong. Ho loka le bonnete li tla tlala hohle, li tlatsetsa thabong ea ka ho sa feleng.—Pes. 72:1, 5-7, 17; Esa. 9:6, 7; 32:1, 16-18; bapisa Esaia 26:7-9.
TUMELO HONA JOALE
Hore re thabele mahlohonolo a lilemo tse sekete tsa khotso, kapa hona ho phela ho fihlela ka nako eo, re hloka tumelo. Molimo, bohlaleng ba oona, ha oa ka oa re nea lintlha tse qaqileng ka ho feletseng ka maemo a lefatšeng nakong ea lilemo tse sekete tsa khotso. Ha oa ka oa re bolella ka ho hlalosa kamoo o tla finyella seo hajoale se bonahalang se ke ke sa etsahala—ho etsolla maemo a lesupi ao hajoale a koahetseng libaka tse khōlō tsa lefatše, ho felisa boemo ba ho kula le kholofalo ba ’mele ea batho le ho tlisa khotso e leka-Iekaneng ’musong oa liphoofolo. Empa o akarellelitse boitsebiso bo lekaneng Lentsoeng la oona ho paka hore o na le matla a phahametseng a motho ho finyella mehlolo e joalo, ha esita le ho tsosa bafu. (Lik. 10:37, 38; Luka 7:14-16; 19:37, 38; Gen. 7:6-16) Ho le joalo, ho sebeletsa ha motho Molimo ho hloka tumelo, ho lumela hore o tla fana ka mahlohonolo a moea le a lefatšeng.—Ba-Heb. 11:1, 6.
Ka tumelo e joalo Lipaki tsa Jehova li phetha mosebetsi oa ho ruta lefatšeng ka bophara. Li thusa batho ho ithuta Bibele, ba fumane tumelo e tiileng ’me ba hōlise tšepo ea hore haufi Molimo, ka Kreste, o tla nka bohato ho felisa bokhopo. (Matt. 24:14) Ba bangata ho ba lumelang hona joale ba tla pholoha ho bona qaleho ea puso ea Kreste ea lilemo tse sekete tsa khotso ’me ba tla thabela mahlohonolo a lefatšeng ao re buileng ka ona. Re u memela ho amohela thuso ea thuto ea Bibele eo Lipaki tsa Jehova li fanang ka eona, hore le uena, ka tšepo u ka lebella mahlohonolo nakong ea lilemo tse sekete tsa khotso.
[Setšoantšo se leqepheng la 9]
Nakong ea Lilemo tse sekete tsa khotso Molimo o tla etsolla maemo a lesupi a lefatše, a felise ho kula ’me a tlise botsitso ba khotso ’musong oa liphoofolo