Tšepiso ea Molimo ea ’Muso oa Hae oa Lefatšeng E-ea Tšepahala
“Ho itsoe ke Jehova: Ha le ka felisa selekane sa ka letsatsi, le selekane sa ka le bosiu, hore ho se ke ha hlola ho e-ba motšehare le bosiu nakong ea teng, le hona selekane sa ka le Davida, mohlanka oa ka, se ka fela, hore a se ke a hlola a e-ba le mora ea busang teroneng ea hae.”—Jer. 33:20, 21.
1. Ke ka tsela efe lelapa la borena la Morena Davida le ipakang le e-na le tlaleho eo ho seng e tšoanang le sona?
LEFATŠE lena ha le es’o bone ntho e joalo! Efe? E, lesika la marena lelapeng le le leng le tsoela pele ka lilemo tse 470 ’me, kamor’a ho kenelloa ka lilemo tse 2 520, le boetse le nka matla a feletseng a borena. Lelapa le nang le tlaleho eo ho seng e tšoanang le eona joalo ke la Morena Davida oa Jerusalema, ntate moholo oa Jesu Kreste ea beang mohlala, ea ileng a tsoalloa moo Davida a tsoaletsoeng, Bethlehema.
2. Jeremia o ne a le hokae ka 608 B.C.E. nakong ea puso ea morena oa ho qetela lesikeng la lefatše la Davida, ’me ke mang feela ea neng a ka sebelisetsoa ho tsosolosa borena ba lesika la Davida?
2 Puso ea Davida holim’a batho bahabo e qalile ka 1077 pele ho Mehla e Tloaelehileng ea rōna. Empa ha moprofeta Jeremia a qala mosebetsi oa hae o matla ka 647 B.C.E., lesika la lefatšeng la marena la Davida la kena lilemong tsa lona tse qetellang tse 40 tsa puso Jerusalema. Jeremia e ne e le mophahamise ea matla oa tšepiso e hlapanyelitsoeng ea Molimo ea selekane le Davida bakeng sa ’muso oa ka ho sa feleng. Leha ho le joalo, ka selemo sa 608 B.C.E. Jeremia a iphumana a le kalosong ea bahlabani motseng oa moreneng. O ne a koaletsoe hona ka Lebaleng la Balebeli le hokahaneng le ntlo ea borena ea Morena Tsedekia, morena oa bo21 ea ileng a busa lesikeng la Davida, ha ho baloa ho tloha ho Davida ka boeena. Ka ho theoloa ha Tsedekia ke Bababylona ka 607 B.C.E., lilemo tse 470 tsa puso e tsoetseng pele ea lesika la Davida Hebrone le Jerusalema ea lefatšeng ea fela. Ke Jesu Kreste feela, ngoana ea hlileng a boleloa oa Davida, ea neng a ka sebelisoa ke Molimo ho tsosolosa ’muso oa Davida phethahatsong ea selekane sa Molimo le eena bakeng sa ’muso o sa senyeheng.
3. Ha a ntse a le litlamong, Jeremia o ile a buisana le mang, ’me puisano e joalo ea buleha joang ka lekhetlo la bobeli?
3 Ha a ntse a koaletsoe ke sesole moprofeta Jeremia o ne a se na puo ea letho le Bababylona ba neng ba thibelletse Jerusalema ka nako eo, empa a fela a buisana le Molimo oa hae, joalokaha re bala: “Lentsoe la Jehova la boela la tla ho Jeremia, ha a ntse a koaletsoe lebaleng la teronko, la re: Ho itsoe ke Jehova, ea tla etsa tseo, Jehova ea li lokisang, hore a tle a li sebetse, eo Jehova e leng lebitso la hae. Bitsa ho ’na, ’me ke tla u araba, ke u bontše tse kholo le tse patiloeng tsee u sa li tsebeng.”—Jer. 33:1-3.
4. “Tse kholo le tse patiloeng” e ne e le life tseo joale li neng li tla beoa?
4 Lintho life? Hore motse o tlhorong ea thaba oa Jerusalema o tla hlakoloa hore o fele ebe joale, kamor’a ho lula o le feela ka lilemo tse 70, o hahuoe hape. Ho feta moo, o tla boela o luloa ke batho bahabo oona ba neng ba isitsoe botlamuoeng hole ka lik’hilomithara tse fetang 1 600! Le hoja lesika la borena la Davida le ne le ke ke la hlola le khutlisetsoa teroneng ea lefatšeng, leha ho le joalo le ne le tla tsoela pele ka lilemo tse 639, ho fihlela ka 33 C.E., nako ea ho hlaha ha mojalefa oa ka mehla teroneng hore a buse ka ho sa feleng. Mojalefa eo a ipakahatsa e le Jesu Kreste!—Ba-Kol. 1:13.
5. Jehova Molimo o ile a tšepisa eng mabapi le motse oa Jerusalema o neng o thibelletsoe ka nako eo?
5 Ke feela Moetsi le Mothei oa lefatše, Molimo o laolang litaba tsa lona, o neng o ka bonela pele le hore o tšepise ntho e joalo. A etsa joalo. Kahoo, ho sa tsotellehe maikutlo ’ohle a lerootho ao ba shebelletseng ba neng ba ka ba le oona ka hore na litaba li tla fella ka’ng bakeng sa lesika la borena la Davida, ke Jehova enoa feela ea neng a ka bululela Jeremia hore a re:
“Hobane ho itsoe ke Jehova, Molimo oa Iseraele, bakeng sa matlo a motse le bakeng sa matlo a marena a Juda, a tlang ho qhaqhoa ka litutulu le ka libetsa: Ba tla kena ho ’ona ho loana le ba-Kalde [ba thibeletseng], empa ba tla a tlatsa litopo tsa batho, bao ke eang ho ba otla bohaleng ba ka le khalefong ea ka, bao ke patetseng motse ona sefahleho sa ka ka baka la bolotsana ba bona. Bona, ke tla o tlamella, ke o oke; ke tla ba folisa, ke ba nee nala ea khotso le ea boiketlo; ke busetse ba hapiloeng ba Juda le ba hapiloeng ba Iseraele, ke boele ke ba ahise joale ka mehleng ea pele. Ke tla ba hloekisa bokhopong bohle ba bona, boo ba ntšitetsoeng ka jona, ke ba leselle libe kaofela tsee ba ntšitetsoeng ka tsona, ba nkoenehetseng ka tsona. Motse ona [Jerusalema] ho ’na e tla ba lebitso la thabo le lithoko le khanya pel’a lichaba tsohle tsa lefatše tse tlang ho utloa molemo kaofela oo ke tla o etsetsa oona; li tla tšaba, li thothomele ka baka la molemo oohle le la boiketlo bohle boo ke tlang ho o etsetsa [Jerusalema].”—Jer. 33:4-9.
6. Ho hlaphoheloa ha Jerusalema kamor’a ho tšolleloa bohale ba Jehova le khalefo ho ne ho tla ba le phello efe ho sechaba, hona hobane’ng?
6 Ka Bababylona ba hapang lefatše, kapa Bakalde, Jehova Molimo o ne a tšolla bohale bohle ba hae le khalefo holim’a metse ea ’Muso oa Juda. Ka nepo joalo hobane, Bajode ba ne ba sitetsoe melao ea hae ’me ba tlōtse selekane se entsoeng le bo-ntat’a bona moholo. Kahoo Jerusalema e ne e tla senngoa ’me ba phonyohileng ba eona ba isoe Babylona ’me naha e siuoe e le feela e se na motho le phoofolo e thapileng. Ke mosa o sa tšoanelang oa Jehova feela o neng o ka etsa hore Jerusalema e hlaphoheloe le ho tsosolosoa ho ea bopheleng bo botle joaloka motse o tsositsoeng. Ho o phekola ha Jehova e ne e tla ba ho sa lebelloang ho hang le ho sa utloisisoeng ke lichaba tseo e seng tsa Bajode hoo li neng li tla tlala tšabo ea Molimo o sebetsang limakatso joalo. Seo hona ho neng ho tla fella ka hona bakeng sa bona ho ne ho tla ferekanya lichaba tsena.
7. Ke litšobotsi life tsa bophelo ba ka mehla ba Baiseraele tse neng li tla nchafatsoa linaheng tse neng li kile tsa hloka baahi tsa Juda le Benjamine le Jerusalema?
7 Le hoja Jerusalema e ne e tla tloheloa e le lesupi ka lilemo tse 70, leha ho le joalo Jeremia, moprofeta oa Molimo ona o etsang mehlolo, o ne a sa bue ka tse ke keng tsa etsahala ha a bolela e sa le pele se neng se tla boleloa ha Jerusalema e sa thibeletsoe:
“Hobane ho itsoe ke Jehova: Ha e le nqalo ena eo lōna le reng: E sentsoe, ha e na batho leha e le likhomo; leha e le metse ea Juda, le literata tsa Jerusalema, tse lithako, tseo ho seng motho teng, leha e le moahi, leha e le khomo; ho sa tla utluoa teng lentsoe la thabo le lentsoe la nyakallo, lentsoe la monyali le lentsoe la monyaluoa, lentsoe la ba reng: Lebohang Jehova oa makhotla, hobane Jehova o molemo, hobane mohau oa hae ke o sa feleng.
“Ha ba ntse ba tlisa liteboho tsa bona tlung ea Jehova. Hobane ke tla busetsa ba hapiloeng ba lefatše lena, ba be joale ka mehleng ea pele, ho bolela Jehova. Ho itsoe ke Jehova. . . .
“Metseng e thabeng, le metseng e lehoatateng, le metseng e ka ’nqa Boroa, le naheng ea Benyamine, le mathokong a Jerusalema, le metseng ea Juda, ho sa tla feta mehlape ka tlas’a letsoho la ea e balang, ho bolela Jehova.”—Jer. 33:10-13.
HO TŠEPISOA MORENA EA TLANG OA LEFATŠE
8. Na ho hlaphoheloa ha Jerusalema ka 537 B.C.E. ho ile ha tlisa ho tsosolosoa ha ’muso oa Davida, ’me ke neng e sa le pele?
8 Ho hlaphoheloa ha Jerusalema ho qalile ka 537 B.C.E. empa ka nako eo ha e-ea ka ea e-ba le morena oa lesika la borena la Davida. E ile ea fumana feela ’musisi oa sebaka oa lesika la bana ba Davida. ’Musisi enoa o ne a le tlas’a ’muso o moholo oa Bamede le Bapersia bahapi ba ’Muso oa Lefatše oa Bababylona. Joale, ho thoe’ng, ka selekane sa Jehova seo a se entseng le Morena Davida bakeng sa ’muso o sa feleng baneng ba Davida? Ho sa tsotellehe ho theoloa ha lesika la borena la Davida ka nakoana, selekane sa ’Muso oa Jehova se ne se tiisa hore nako e khanyang ka ho fetisisa bakeng sa lesika la borena la Davida e ne e le hona e tlang.
9, 10. Hore ho be joalo, Jehova a tšepisa hore o tla hlahisa eng lelapeng le theohileng la Davida?
9 Rōna kajeno re ka thabela hoo hakaakang! Hobane’ng? Joale, sefate sa lelapa la borena la Davida se remiloe, empa kutu ea sona e ne e sa shoa. Molimo o matla ’Ohle o ne o tla e etsa hore e hlahise “lehlomela” le neng le tla fetoha Mojalefa oa Kamehla oa ’muso o tšepisitsoeng. A re mameleng sena:
10 “Bonang, ho bolela Jehova, ho tla matsatsi ao ke tlang ho etsahatsa lentsoe le molemo lee ke le boletseng bakeng sa ntlo ea Iseraele le bakeng sa ntlo ea Juda [ea hahabo Davida]. Matsatsing ao le mohlang oo, ke tla hlahisetsa Davida lehlomela la ho loka, ’me le tla etsa kahlolo le ho loka lefatšeng. Matsatsing ao, Juda [moloko oa habo Davida] o tla pholoha, le Jerusalema [hoba e hlaphoheloe] a ikahele ka boiketlo, ’me ke lona lebitso leo ba tla ’mitsa ka lona: Jehova, ho loka ha rōna.” Lebitso le tšoanang le leo Morena oa eona oa kamoso a neng a tla bitsoa ka lona.—Jer. 33:14-16; bapisa Jeremia 23:4-6.
11. “Lehlomela” le tšepisitsoeng le ile la hlahisoa e le mang, ’me, ka 1914 C.E., a ipaka kannete e le “lehlomela” la Jehova ka sebele joang?
11 Na tšepiso ee e amanang le ’muso oa lefatše e ipakahalitse e tšepahala? E! Le hoja lilemo tse fetang 640 li ile tsa tlameha ho feta, kutu ea lelapa la Davida le theotsoeng teroneng, la rolisoa moqhaka, la amohuoa lere la borena le ile la hlahisa lehlomela ka nako e loketseng ea Jehova. Ena e hlahile e le motho Jesu, ea neng a tsoaletsoe motseng oa habo Davida oa Bethlehema le ea ileng a kolobetsoa ke selelekela sa hae, Johanne ea neng a Kolobetsa, ’me hang kamor’a moo a tlotsoa ka moea oa Molimo hore e be Mojalefa oa Kamehla oa selekane sa ’Muso se neng se entsoe le Davida. (2 Sam. 7:4-16; Ezek. 21:21-27) Bonneteng a fetoha “Lehlomela” la Morena ’Musi ea Phahameng Jehova, hobane, kamor’a ho fela ha ‘mengoaha e baloang hasupa’ (lilemo tse 2 520) tsa borena ba Balichaba lefatšeng, ka 1914 C.E., Jesu Kreste ea tlotlisitsoeng o sebeliselitsoe ho tsosolosa borena ba Jehova bo amanang le lefatše phethahatsong ea selekane sa ’Muso.—Dan. 4:13-26; Zak. 6:12, 13.
12. (a) Jesu Kreste o pakiloe a lokile joang e le lehlomela? (b) A fetoha “Morena” oa mang, ’me poloko ea nolofaletsoa “Juda” joang le “Jerusalema”?
12 Hore “Lehlomela” lena le ne le “lokile” Jehova Molimo o ho pakile ha a tsosa Jesu Kreste lefung la ho shoela tumelo ka letsatsi la boraro ’me a mo phahamisetsa ka letsohong la Hae le letona maholimong. Kahoo Jesu Kreste, le hoja ka nako e ’ngoe e ne e le ‘mora oa Davida’ oa lefatšeng, ea e-ba “Morena” oa Davida. (Pes. 110:1-4; Matt. 22:41-45) Eare ha a nyolohela hape ka letsohong le letona la Ntat’ae oa leholimo, e bile ka molemo oa sehlabelo sa hae sa botho bo phethahetseng. Kahoo a ka tlisetsa “Juda” poloko, eo motse oa eona oa moreneng e neng e le “Jerusalema.” Ka sebele, he, Jesu a etsa hore borena ba ntlo ea Davida bo hlomele hape!—Tšen. 22:16.
13. (a) Jerusalema e lutseng ka boiketlo hona joale ke efe? (b) Lebitso “Jehova, ho Loka ha Rōna” le supa ho “loka” ha bo-mang, ’me ke hobane’ng ha lebitso lona leo ka nepo le boetse le sebetsa ho ea bitsoang “Lehlomela”?
13 Jesu Kreste o bitsoa “tau ea leloko la Juda.” (Tšen. 5:5) Ka baka la ho lahla le ho bolaea ‘tau ena ea leloko la Juda,’ Jerusalema ea lefatšeng ha e ka ea ‘lula ka boiketlo,’ empa ea timetsoa ka 70 C.E. (Matt. 23:37, 38; Luka 21:24) Leha ho le joalo, Jerusalema e holimo, “Jerusalema oa leholimo,” e thabela boiketlo bo joalo, bakeng sa bana ba eona ba moea, balateli ba tlotsitsoeng ba Jesu Kreste ba 144 000, ba lutseng ka boiketlo tlas’a tlhokomelo ea Jehova. (Ba-Heb. 12:22; Ba-Gal. 4:26-28) ‘Jerusalema enoa oa holimo’ ke phutheho e hlileng e bitsoang “Jehova, ho loka ha Rōna.” Kaha ke taba ea “ho loka ha rōna,” e seng ‘ho loka ha ka,’ ho suptjoa bana ba moea ba 144 000 ba Jerusalema ea leholimo, hobane Jehova Molimo o fela a lokafatsa bana kapa a ba bolela ba lokile ka baka la molemo oa sehlabelo sa Kreste. Lebitso la Jesu Kreste e le “Lehlomela” hape ke “Jehova, ho loka ha rōna,” e le eena moemeli oa balateli ba hae ba tlotsitsoeng ba 144 000.—Jer. 23:5, 6; bona hape 1 Ba-Korinthe 1:30, 31; Ba-Roma 3:21, 22.
14. Kaha Kreste le phutheho e nang le eena ba na le lebitso le joalo, ’muso o tlang oa Molimo oa lefatše e tla ba ’muso oa mofuta ofe ka ho tiileng?
14 Ka Morena ea tlotsitsoeng le phutheho e nang le eena ba bitsoa ka lebitso le fanoeng ke Molimo joalo, ’muso o tlang oa Molimo bakeng sa lefatše le batho bohle e tla ba ’muso oa mofuta ofe? Ha ho letho ha e se ’muso oa ho loka feela. Hoo re ka ho leboha hakaakang!
HO TŠEPAHALA HA TŠEPISO EA BOMOLIMO
15, 16. (a) Ho ea ka Jeremia 33:17, 18, Jahova a ke ke a hlōleha ho ba le bahlanka bafe ka molao? (b) Ke bo-mang ba tla lula litulong tseo tsa molao, hona ba tla sebeletsa Jehova hokae?
15 Jehova Molimo hape o tla ba le mofuta o nepahetseng oa boprista hammoho le ’Muso oa hae oo a o tšepisitseng. O re etsa hore re ikutloe re tiile ka sena ha a salisa sena sohle ka hore a re: “Hobane ho itsoe ke Jehova: Davida a ke ke a ba a hloka motho ea lulang teroneng ea ntlo ea Iseraele. Le baprista, bao e leng ba-Levi, ba ke ke ba ba ba hloka motho pel’a ka ea hlahisang licheso, ea chesang libano hammoho le linyehelo, ea etsang mahlabelo ka mehla.”—Jer. 33:17, 18.
16 Na ke ho tsotellehang he, hore ho tloha ho timetsoeng ha Jerusalema e tsosolositsoeng ka 70 C.E. ha hoa ba teng tempele e bonahalang ea Jehova lefatšeng ’me hape ha ho teng setho se ka khetholloang ka hore ke sa leloko la Levi le sa ntlo ea ngoan’abo Moshe Aarone hore se sebeletse tempeleng e joalo? Ho hang ha ho tsotellehe. Hobane joale Jehova o na le Moprista e Moholo oa hae le baprista ba tlase ba ileng ba tšoantšetsoa ke baprista ba Balevi ba boholo-holo Iseraeleng, e leng, Jesu Kreste le balateli ba hae ba khethiloeng ba tlotsitsoeng ho ea bopristeng ba moea ka moea oa Molimo. Maholimo ao ho oona Molimo o lutseng teroneng ke Sehalalelisiso sa tempele ea moea eo boprista bona bo sebeletsang ho eona.—Ba-Heb. 9:24; 1 Pet. 2:9, 10.
17. Joalokaha re ke ke ra thibela motšehare le bosiu ho tla, kahoo re ke ke ra thibela Jehova ho etsa joang ka borena le boprista?
17 Kahoo, ka nako ena eohle litšepiso tsa Molimo li ipakile li tšepahala, ’me li sa ntsane li tla ipaka li tšepahala ho rōna batho. Mamela: “Ho itsoe ke Jehova: Ha le ka felisa selekane sa ka le letsatsi, le selekane sa ka le bosiu, hore ho se ke ha hlola ho e-ba motšehare le bosiu nakong ea teng, le hona selekane sa ka le Davida, mohlanka oa ka, se ka fela, hore a se ke a hlola a e-ba le mora ea busang teroneng ea hae; ho joalo le ka selekane sa ka le ba-Levi, bao e leng baprista ba ntšebeletsang. Joale ka makhotla a maholimo a ke keng a baloa, le lehlabathe la leoatle le ke keng la lekanngoa, ke tla atisa litloholo tsa Davida, mohlanka oa ka, joalo, le ba-Levi ba ntšebeletsang.”—Jer. 33:20-22.
18. Ke halelele hakae kamor’a mehla ea Jeremia Jehova a ileng a boloka selekane sa hae ka boprista se ntse se tsoela pele, ho fihlela ho fihla mang?
18 Letsatsi le ne le ka fifala kapele lefatšeng la rōna ’me lefatše lena le ka khaotsa ho potoloha tselaneng ea lona ho e-na le hore Jehova a ka roba selekane sa hae mabapi le Davida le Balevi. Molimo o matla ’ohle oa fela oa atisa “leloko” la Davida ho theosa le lilemo tse latelang tse 600 ’me haholo ho fihlela ha Mojalefa oa Kamehla oa hae, Jesu Kreste, a fihla. Enoa ea e-ba phethahatso ea moprista e moholo Aarone ’me hape o fetohile moprista teroneng ea hae ea leholimo, ho tšoana le Melkisedeke. (Pes. 110:1-4; Gen. 14:18-20; Zak. 6:13; Ba-Heb. 6:20–7:3) Kahoo Jehova o etsollotse ho neng ho bonahala e le koluoa ho Jerusalema le tempele ea eona ’me a boloka selekane sa hae se tsoela pele.
19. Kapele ho ne ho ka fela ponahalo efe mabapi le lefatše la rōna haeba Jehova a ka roba selekane sa hae le Davida bakeng sa ’muso o sa feleng?
19 Ka mohlala, ha lebotho la Bababylona tlas’a Morena Nebukadnezare le ne le patetse Jerusalema ka lekhetlo la bobeli, ho ile ha etsoa tlaleho e latelang: “Lentsoe la Jehova la tla ho Jeremia, la re: Na ha u bone seo sechaba sena se se bolelang, ha se re: Meloko e ’meli eo Jehova a neng a e khethile, o hlile o e lahlile! Ba nyelisa sechaba sa ka hore se se ke sa hlola se e-ba sechaba pontšeng ea bona. Ho itsoe ke Jehova: Ha ekaba ho se selekane sa ka le letsatsi le bosiu, ha ekaba ke sa ka ka tlisa melao ea leholimo le ea lefatše; le hona ke tla lahla litloholo tsa Jakobo le tsa Davida, mohlanka oa ka, ke se ke ka hlola ke nka baneng ba hae ea tla busa litloholo tsa Abrahama le tsa Isaaka le tsa Jakobo; hobane ke tla busetsa ba kholehong ba bona, ke ba hauhele.”—Jer. 33:23-26.
20. Ho etsahetse’ng mehleng ea Jeremia e ileng ea etsa hore ho bonahale eka Jehova a ke ke a hlola a e-ba le ’muso holim’a lefatše kapa hore borapeli ba hae bo ntšetsoe pele?
20 Selemo kamor’a boprofeta boo, Jerusalema ea kenoa ’me ea timetsoa. Ba phonyohileng ba Jerusalema ba isoa botlamuoeng ’me bongata ba bona ba isoa Babylonia e hole. Ka sebele ha bonahala eka Jehova o fela a lahlile “meloko e ’meli” eo a neng a e khethile ka nako e ’ngoe. Ha bonahala boemo bo se na tšepo bakeng sa lelapa la bana ba borena ba tsoang ho Davida le lelapa la baprista le tsoang ho Aarone, moprista oa pele e moholo oa Iseraele. Ho fapana le se neng se boletsoe ke ’Mōpi oa leholimo le lefatše, ha bonahala eka Jehova o robile lilekane tsa hae ka lelapa la borena le lelapa la boprista. E ne e le taba ea hore na ho sa tla ke ho boele ho be teng hape ’muso oa Jehova holim’a lefatše kapa ho tsosolosoa ha borapeli ba hae ba ’nete holim’a lona!
21. Jehova o ipakile a lumellana joang ho bolokeng lilekane, ka molemo ho Baiseraele ba botlamuoeng?
21 Leha ho le joalo, ho tloha koluoeng eo ea bosechaba, motšehare le bosiu le melao ea maholimo le lefatše ha e-ea khaotsa ho sebetsa. Kahoo ’Mōpi ea sa robang lilekane tsa hae mabapi le lintho tseo tse se nang phefumoloho tsa bokahohle ka nepo a ke ke a lebelloa ho roba lilekane tsa hae tse entsoeng le libopuoa tsa hae tse bohlale mabapi le ’muso oa hae le borapeli ba hae bo hloekileng. Leha e le hore o entse joalo! O ile a fela a utloela bohloko bana ba Abrahama Isaaka le Jakobo. Kamor’a lilemo tse 70 tsa botlamuoa ba bokelloa hape ho ea nanaheng ea habo bona eo ba e filoeng ke Molimo.
22. Molimo o phethahalitse ho batho bana ba khutlisitsoeng selekane sa hae ka “lehlomela la ho loka” joang, ’me hona ho paka eng ka tšepiso ea Molimo?
22 Ke ho batho bana ba tsosolositsoeng “lehlomela la ho loka,” Jesu Kreste, le ileng la tla makholo a lilemo a 19 a fetileng. Ho shoela ha hae tumelo ka 33 C.E. ha hoa ka ha senya selekane sa Molimo, kaha Molimo o ile oa mo tlotlisa maholimong. Moo, o re, “Ke phela, ka mehla le mehla.” (Tšen. 1:18) O phetse ho fihlela nako eo ka eona Jehova a mo beang e le Morena ’musong oa lefatše o tšepisitsoeng. Tšepiso ea Molimo ho sena e bile e tšepahalang.
[Setšoantšo se leqepheng la 20]
Joalokaha kannete letsatsi le chaba letsatsi ka letsatsi Molimo o tla boloka tšepiso ea oona