Kamor’a ‘Mehla ea Bofelo’ Ke ʼMuso oa Molimo oa Messia!
1. (a) Polelo ‘mehla ea bofelo’ e biletsa eng bakeng sa mehla eo? (b) Na ‘mehla ea bofelo’ ea tsamaiso ea Sejode e ile ea fela?
MEHLA e bitsoang “mehla ea bofelo” e tlameha ho fela. Tabeng ea Bajode le tempele ea bona e tsosolositsoeng Jerusalema, mehla eo e felletse ka selemo sa 70 C.E. Ho seng joalo, ke hobane’ng ha e ne e ka bitsoa ‘mehla ea bofelo’? Empa ka pale e bile le bofelo (télos). Ha a bua ka mehla eo ea ho qetela ea tsamaiso ea Sejode ea lintho, Jesu o itse: “Mohlang oo, mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e-e-so ho ka e e-ba teng, ʼme ha e ka ke ea boela ea e-ba teng le ka mohla o le mong. Le hojane matsatsi ao a se ke a khutšofatsoa palo ho no ho ke ke ha phonyoha motho; empa ka baka la bakhethoa, matsatsi ao a tla khutšofatsoa.”—Matt. 24:21, 22; Mar. 13:19, 20.
2. (a) “Bakhethoa” e ne e le bo-mang bao ka baka la bona ‘mahlomola a maholo’ holim’a Jerusalema a neng a tla khutsufatsoa? (b) Ke pono efe ka phethahatso e etsang mantsoe a Jesu a boprofeta a senyehileng feela?
2 Kahoo ho boleloang, ho ne ho le teng Bajode ba 97 000 ka hare ho Jerusalema ba ileng ba pholoha ho thibelloa le ho timetsoa ha motse oa bona o halalelang le tempele ea eona e hahiloeng ke Morena Heroda. Leha ho le joalo, bana e ne e se “bakhethoa” bao ka baka la bona ‘mahlomola a maholo’ a neng a tla khutsufatsoa. Ho e-na le hoo, bana e ne e le Bakreste, bao, kamor’a hore ho tlohoe ha ho ne ho thibelletsoe ka lekhetlo la pele ka 66 C.E., ba ileng ba utloa temoso ea Jesu ka tšoanelo joalokaha e fanoe ho Mattheu 24:16-20 ʼme ba baleha motseng o tsuong ho ea libakeng tse kantle ho Judea. Hoo hohle morao koo ho bile hobe haholo. Empa haeba mantsoe a Jesu ka Mattheu 24:21, 22 le Mareka 13:19, 20 a fella feela bofelong (télos) ba Jerusalema ka 70 C.E., joale puo ea hae ka sena e fetoha mantsoe a senyehileng feela. Ruri e ne e se oona mahlomola a maholo ho ʼohle a kileng a etsahala paleng eohle e ngotsoeng ea batho.
3. Mantsoe a hlalosang a Jesu a nka tekanyo e a loketseng feela ha ho talingoa ho timetsoa ha Jerusalema tekanyong efe?
3 Mantsoe a Jesu a papiso a ba le tekanyetso ea oona e a loketseng ha feela re talima ho timetsoa ha Jerusalema e le ho tšoantšetsa kapa e le selelekela sa ‘mahlomola a maholo’ ao ho seng a lekanang le oona a nakong e tlang, ho timetsoa ha Bojakane, bo ipolelang hore joale bo atamela ho ba le litho tse limillione tse sekete. Ho timetsoa ha bona ho tla etella pele ha ʼmuso o moholo oa lefatše oa bolumeli ba bohata kaofela ho oona. Kapele kamor’a mona ho tla tla timetso ea mekha eohle ea lefatše e ikarotseng ʼmusong o moholo oa bolumeli ba bohata ba lefatše, empa e se tumellanong le ʼmuso oa Molimo oa Messia. Palo ea bophelo ba batho bo tlang ho felisoa “mahlomoleng a maholo” ao e tla feta hole ba ileng ba timetsoa moroallong oa mehleng ea Noe, ke hore, lilemong tsa 2370-2369 B.C.E.
4. (a) “Lintoa le melumo ea lintoa” tseo Jesu a buileng ka tsona boprofeteng li ne li tla etsahala nakong efe? (b) Hore e bitsoe “qalo feela ea tlokotsi” ho supa eng?
4 Boprofeteng ba Jesu ba Mattheu 24:4-22, “lintoa le melumo ea lintoa” tseo a buileng ka tsona li ne li fella nakong eitseng feela. Tabeng ea tsamaiso ea Sejode ea lintho, eo barutuoa ba hae ba ileng ba botsa ka eona pele, ena e ne e le nako ea ‘mehla ea bofelo’ ho tloha ka 29 C.E. ho ea ho 70 C.E. Nako ena ruri e ile ea tšoauoa ka “lintoa le melumo ea lintoa,” hammoho le litlala, mafu a seoa le litšisinyeho tsa lefatše. Ntle ho pelaelo Bajode ba ile ba utloa liphello tse ling tsa lintho tseo tse bohloko. Empa Jesu a bolela feela hore tseo e tla ba “qalo feela ea tlokotsi.” (Matt. 24:8) E ne e ke ke ea e-ba bohloko bo qetellang ba lefu.
5. (a) Na lintho tseo tse tepeletsang morao koo li ile tsa isa ho ‘beng teng ha Kreste’ le ho “fela ha lefatše”? (b) Hape, na boboleli ba ʼMuso bo entsoe ho isa ntlheng e boletsoeng kapa che, hona hobane’ng?
5 Lintho tseo tsa tlokotsi tsa isa bofelong (télos) ba tsamaiso ea Sejode ea lintho e Palestina. Empa, joalokaha re bona kajeno, ha lia ipaka e le “pontšo . . . ea ho tla ha [Kreste] le ea ho fela ha mehla ea kajeno,” lintho tse neng li akarellelitsoe lipotsong tsa barutuoa. (Matt. 24:3, phet. e ncha; Mar. 13:4) Hape, “mehleng ea bofelo” ea tsamaiso ea Sejode, ho boleloa ha ‘evangeli lefatšeng lohle e le bopaki ho lichaba tsohle’ ho ne ho le honyenyane haholo, ka baka la ho fokola ha baboleli ba ʼMuso, ʼme ho bolela hona ho ne ho etsoa tlas’a mahloriso. (Matt. 24:9-14) Empa, lefatše lohle e ne e le tšimo e ba bulehetseng, hobane boboleli ba ʼmuso bo ne bo ke ke ba lekanyetsoa feela ho Bajode ba bolotseng. Hoba Jesu a tsohe bafung, barutuoa ba hae ba oela taelong ea hae ea ho ‘etsa lichaba tsohle barutuoa.’ (Matt. 28:19, 20) Kahoo boboleli ba ʼMuso lefatšeng lohle e ne e le hona bo tlang, kamor’a 70 C.E.
6. (a) Ke lintho life tse hlileng tsa boleloa hore li tla etsahala kamor’a hore ho be le mahlomola holim’a Bajode morao koo? (b) Ke hobane’ng ha “bakhethoa” ba sa ka ba ikopanya le “lichaba tsohle tsa lefatše” ho lleng ha tsona?
6 A bua ka ‘mahlomola a maholo’ holim’a Jerusalema ka 70 C.E., Jesu o buile ka lintho tse neng li tla tla “hang-hang ka mora’ mahlomola a mehla eo.” (Matt. 24:29) Ho ne ho tla ba teng “pontšo ea Mor’a motho”; hape, ho lla, e seng feela ha meloko e 12 ea Bajode ba tlhaho e tletseng hohle, empa ha “lichaba tsohle tsa lefatše.” Hape, ho ne ho tla ‘bokelloa bakhethoa ba hae’ kaofela. “Bakhethoa” bana, ba ke ke ba ikopanya le “lichaba tsohle tsa lefatše” ho lleleng tlokotsi e ke keng ea qojoa ea lefatše. Ba ne tla thaba, ho e-na le ho lla, ha ba bona “pontšo ea Mor’a motho” leholimong. (Matt. 24:30, 31) Ba ne ba tla thabela hore ba na le bopaki ba hore ba “mehleng ea bofelo” ea tsamaiso ea khale ea lefatše. Ho tloha selemong sane sa ho lla sa 1914 C.E., selemo sa ntoa ea pele ea lefatše ea batho, re na le bopaki boo ka tekanyo e khōlō haholo.
7. Kamor’a ‘mehla ea bofelo’ ea tsamaiso ea lintho ea lefatše ha e felile, ho ka lebelloa eng, ho ea ka Thapelo ea Morena?
7 ‘Mehla ea bofelo’ ba eng kapa eng e lokela ho lateloa ke ntho e ʼngoe hape. Ke eng se tla latela ‘mehla ea bofelo’ ea tsamaiso ena ea lefatše lohle ea lintho? Ho sa tsotellehe hore na ba bolelang litaba tsa lefatše pele ho nako ba bona eng hore e tla ba boemo ba lefatšeng kamor’a ntoa ea boraro ea lefatše e lebelletsoeng, Lipaki tsa Jehova li bona e sa le pele ʼmuso oa Molimo oa Messia, o ileng oa rutoa ke Jesu hore barutuoa ba hae ba o rapelle Thapelong ea Morena.—Matt. 6:9, 10.
8. Ke hobane’ng ha Bakreste ba ntse ba rapela thapelo ea Morena ho sa tsotellehe se ngotsoeng ke Pauluse hoo e ka bang ka 60-61 C.E. ho Ba-Kolosse 1:13?
8 Re ntse re rapela thapelo eo ho sa tsotellehe se ngotsoeng ke moapostola Pauluse ho Ba-Kolosse 1:13, hoo e ka bang ka 60-61 C.E. O ngotse morao koo: “[Molimo] o re ntšitse matleng a lefifi, oa re falletsa ʼmusong oa Mora oa oona ea ratoang.” Hona ho bua ka ʼmuso oa moea oo Bakreste ba Kolosse, ha ba sa le nameng lefatšeng motseng o neng o le lefifing bolumeling oa Asia Minor, ba neng ba falliselitsoe ho ona. Ka ho ke keng ha latoloa, lefa leo la moea la bona lefatšeng tlas’a puso ea Satane Diabolose e ne e se phethahatso ea Thapelo ea Morena: “Ntat’a rōna . . . lebitso la hao a le ke le khethehe; ho tle ʼmuso oa hao.” (Luka 11:2; Matt. 6:9, 10) Hore thapelo eo e arabeloe ka botlalo, ho ne ho tlameha hore Mora ea ratoang oa Molimo a beoe teroneng ʼme ʼmuso oa hae o se qetelle feela ka ho ba ʼmuso oa moea o sebetsa holim’a barutuoa ba hae ba lefatšeng.
MORENA OA MESSIA LE BAFO BA HAE BA KANG LINKU
9, 10. (a) Setšoantšong sa hae sa linku le lipōli, Jesu o ne a bua ka borena ba hae ho fella kae? (b) Ke kamor’a hore Jesu a finyelle eng mosebetsi oo oa ho bokella o neng o tla etsahala, ʼme seo se finyelletsoeng se ne se tla kenyelletsa eng kapa se bolele eng?
9 Boprofeteng ba hae ka “ho fela ha lefatše,” Jesu o buile ka borena ba hae ka kutloisiso e feletseng. Ho latela tlaleho ea moapostola Mattheu, Jesu o phethile boprofeta ba hae ka ho etsa setšoantšo sa linku le lipōli tsa tšoantšetso. Ho Mattheu 25:31, 32 o qala setšoantšo ka hore: “Mohla Mora’ motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ‘me o tla khetha ba bang [e seng lichaba] ho ba bang, joale ka molisa ha a khetha linku ho lipōli.” Hona ho etsahala kamor’a hore Satane Diabolose le bademona ba hae ba tebeloe sebakeng sa bona sa leholimo le litokelong ʼme ba liheloe sebakeng sa lefatše la rona ke Morena Jesu Kreste ea beiloeng teroneng. Hona hohle ho joalokaha ho hlile ha profetoa ka tšoantšetso ho Tšenolo 12:5-9. Hore na hoo ho tla phetha eng, rea bala:
10 “Joale [ʼna Johanne] ka utloa lentsoe le leholo leholimong, le re: Joale, ho hlahile poloko, le matla, le ʼmuso oa Molimo oa rōna, le matla a Kreste oa oona; hobane monqosi oa banab’abo rōna, ea neng a ba nqosa pel’a sefahleho sa Molimo motšehare le bosiu, o lihetsoe. Ba mo hlōtse ka mali a Konyana, le ka lentsoe la bopaki ba bona; ʼme ha ba ka ba re letho ka bophelo ba bona, le ho isa lefung. Thabang ke hona, maholimo, le lōna ba ahileng teng. Ho malimabe lōna ba ahileng lefatšeng le leoatleng; hobane Diabolose o theohetse ho lōna a halefile hampe, ka ho tseba hobane nako ea hae ha e sa le ekae.”—Tšen. 12:10-12.
11. (a) Ho latela liketsahalo, “banna ba bane ba lipere tsa Tšenolo” ba qalile ho palama neng? (b) Nako ea rōna ea lintoa ho tloha ka 1914 e lumellana le nako efe e khutšoanyane e hlileng ea boleloa boprofeteng ba Jesu ka ‘mehla ea bofelo’?
11 Ke motho ofe ea nang le tsebo ea litaba ea ka latolang hore ‘malimabe a sa tloaelehang joalo lefatšeng le leoatleng’ a tšoaile lekholo la rōna la lilemo la bo20 ho tloha ka 1914, selemo seo ka sona, ho ea ka bopaki bohle bo teng, ‘banna ba lipere tse ʼne tsa Tšenolo’ ba qalileng ho palama? (Bona Tšenolo 6:1-8.) Eo e tlameha hore e be “pontšo” e sa foseng hore ka 1914 ‘mehla ea bofelo’ ea tsamaiso ea lefatše lena ea lintho e ile ea qaleha le hore re kene ‘ho feleng ha lefatše.’ Hape, ka sebele, hoba Satane a lahloe le bademona ba hae leholimong, e bile ‘mehla ea bofelo’ bakeng sa bona pele ba liheloa sekoting pele ho puso e lilemo tse 1 000 ea Messia Jesu. (Tšen. 20:1-3, 7) Ka ho totobetseng, Ntoa ea I ea Lefatše ea 1914 le Ntoa ea II ea Lefatše ea 1939 le lintoa tse ngata tse ileng tsa latela ho tloha ka 1945 lefatšeng li tšoana le “lintoa le melumo ea lintoa” tsa nakong e fetileng (hammoho le litlala, mafu a seoa le litšisinyeho tsa lefatše) tseo Jesu a itseng li tla tšoaea lilemo tsa 29 ho ea ho 70 C.E. e le ‘mehla ea bofelo’ ea tsamaiso ea Sejode ea lintho e neng e likoloha Jerusalema le tempeleng e tsosolositsoeng ea eona.
12. Haeba, ka 70 C.E., Jerusalema e ile ea haelloa ke ho feta ho seo Jesu a hlileng a se bolela ho Mattheu 24:21, 22 ho thoe’ng ka seo tsamaiso ea lintho ea lefatše e talimaneng le sona kajeno?
12 Tsieleho e sehlōhō e ileng ea oela Jerusalema ka 70 C.E. e ile ea haelloa ke seo Jesu a se hlalositseng boprofeteng ba hae ho Mattheu 24:21, 22. Empa kajeno Bojakane bo neng bo tšoantšetsoa ke Jerusalema, e, ʼmuso oa lefatše oa bolumeli ba bohata kaofela ha oona, e, tsamaiso eohle ea lintho ea lefatše, e lebile ‘mahlomoleng a maholo ao ho seng a kileng a tšoana le oona ha e sa le lefatše le hloloa ho tla fihlela ka nako ena, leha e le hore a tla etsahala hape.’ Ha ho makatse, hore re bone ho phethahala boprofeta bo boletsoeng ke moapostola Pauluse hoo e ka bang ka 65 C.E. ʼme a bo ngola ho 2 Timothea 3:1: “[Uena Timothea] tseba hobane mehleng ea qetello ho tla hlaha linako tse bohloko.”
BOBOLELI BA HO QETELA LEFATŠENG LOHLE
13. Tumellanong le Tšenolo 12:11, ke tšobotsi efe e ʼngoe ea boprofeta ba Jesu e neng e tla bōpa “ho fela ha lefatše” ka ho totobetseng?
13 Ho latela Tšenolo 12:11, hoba Satane Diabolose a lahloe leholimong, Bakreste bao a neng a ba nqosa ba mo ‘hlola . . . ka lentsoe la bopaki ba bona.’ Ho phethahala ha sena, e bile tšobotsi e ʼngoe eo Jesu a itseng e tla bontša “ho fela ha lefatše” ka ho tsotehang. Tšobotsi efe? “Evangeli ena ea ʼmuso e tla boleloa lefatšeng lohle, e tle e be bopaki ho lichaba tsohle; ʼme e tla ba hona bofelo [télos] bo hlahang.” (Matt. 24:14) Hona ho etella pele bofelo ba ‘mehla ea bofelo.’
14. Bopaki ba ʼmuso bo fetile ba “mehleng ea bofelo” ea tsamaiso ea Sejode ea lintho joang?
14 Bopaki bo joalo, bo fanoeng ke Lipaki tsa Jehova ho tloha bofelong ba Ntoa ea I ea Lefatše ka la 11 Pulungoana, 1918, bo fetile hole bopaki ba lichabeng tsohle bo fanoeng “mehleng ea bofelo” ea tsamaiso ea Sejode ea lintho ka 29 ho ea ho 70 C.E. Morao koo bopaki bo entsoe Asia, Europe le Afrika. Kajeno ha boa etsoa feela mafatšeng ao empa hape le Amerika, Australia le lihleke-hlekeng tsa leoatle la Pacific, e, lefatšeng lohle.
15. Ho nyenyefatsa mosebetsi ona, basomi ba ka ʼna ba re’ng ka baromuoa ba Bojakane makholong a fetileng a lilemo?
15 Basomi ba sena ba ka ʼna ba nyenyefatsa sena le ho hatisa hore baromuoa ba Bojakane makholong a lilemo a fetileng ba fihlile libakeng tseo tsohle pele Lipaki tsa Bakreste li fihla. Ke ʼnete! Empa bopaki ba ʼMuso ba Lipaki tsa Jehova tsa Bakreste ho tloha ka 1914 e bile bo fapaneng le seo baromuoa ba Bojakane ba se phatlalalitseng pele le ho tloha ka 1914.
16, 17. (a) Ke ka tsela efe bopaki ba ʼMuso bo fanoeng ho tloha bofelong ba Ntoa ea I ea Lefatše ka 1918 bo fapaneng le se boletsoeng ke baromuoa ba Bojakane? (b) Ho paka sena, makasine oa Watch Tower o ile oa re’ng tokollong ea la 1 Phupu, 1920?
16 “Bo fapaneng”—joang? Ka hore ha e-ea ba bopaki bo amanang le ʼmuso o boletsoeng ho Ba-Kolosse 1:13, “ʼmuso oa Mora oa” Molimo ea ratoang, oo ho oona Baiseraele ba moea ba 144 000 ba ‘tiisitsoeng’ ba seng ba falliselitsoe ho oona. (Tšen. 7:1-8) Ho boletsoeng ke Lipaki tsa Jehova tsa Bakreste lefatšeng lohle ho tloha ka 1918 ke ntho e ‘ngoe e fapaneng ho hang, ntho e ʼngoe e khethollotseng hore ena ke ‘mehla ea bofelo’ ea tsamaiso ea lintho ea bopolotiki, kahisano, boahloli le sesole. E bile bopaki bo etsoang lefatšeng lohle bo amanang le ʼmuso oa borena o hlomiloeng hona joale maholimong, o filoeng matla a ho liha Diabolose le bademona ba hae sebakeng seo terone ea oona e leng ho sona. (Tšen. 12:5-9) Nako e katlase ho lilemo tse peli kamor’a hoba Ntoa ea I ea Lefatše e lale, tokollong ea eona ea la 1 Phupu, 1920, The Watch Tower and Herald of Christʼs Presence e ile ea hatisa sehloho se etellang pele se reng “Molaetsa o molemo oa ʼMuso” ʼme e qotsa ho Mattheu 24:14, le tlas’a sehlohoana “Mosebetsi oa Bohle,” ea re:
17 “Evangeli e bolela litaba tse molemo. Litaba tse molemo mona li amana le ho fela ha taolo ea khale ea lintho le ho hlongoa ha ʼmuso oa Messia. Li bolela hore bosiu bo boholo ba sebe le masoabi boa feta. Li bolela hore ’muso oa Satane oa oa, o ke ke oa hlola o tsosoa.”—Maqephe 199, 200.
18. (a) Ho ea ka boprofeta ba Jesu, ‘bofelo bo tla hlaha’ kamor’a eng? (b) Ka Joele 2:28, 29, ‘mehla ea bofelo’ ea rōna e tsamaellane le mehla efe ea nakong e fetileng?
18 Ha ho boleloa ha litaba tse molemo tsa ʼmuso oa Messia joalokaha o hlomiloe maholimong ka 1914 ho entsoe ho fihla moo Molimo o ratang, “e tla ba hona bofelo [télos] bo hlahang.” (Matt. 24:14) Ka hona boboleli bona ba ho qetela ba ʼMuso bo etsoang lefatšeng lohle bo oela ka hare ho ‘mehla ea bofelo’ ea tsamaiso ena ea lintho. Ana ka hona ke matsatsi a loketseng bakeng sa phethahatso ea ho qetela ea boprofeta ba Joele 2:28, 29 hore bo etsahale, joalokaha bo ile ba phethahala ka lekhetlo le qalang mehleng ea moapostola Petrose le baapostola ba bang, joalokaha eena ka boeena a hlalositse ka Pentekonta ea 33 C.E. Kahoo ‘mehla ea bofelo’ ea rōna e tšoana le ‘mehla ea bofelo’ ea bona.
19. Ho etsa hore papiso ea ‘mehla ea bofelo’ e felelle litšobotsing tsohle, ke ketsahalo efe “mehleng ea bofelo” eo baapostola ba neng ba phela ho eona e tlamehang hore e phethahale hape kajeno?
19 Leha ho le joalo, hore ho hle ho tšoane ka mokhoa o phethahetseng litšobotsing tsena tse qetellang, na ho bile teng ho tšolloa ha moea o halalelang oa tlotso holim’a ‘batho ba mefuta eohle’ “mehleng ea bofelo” ea rōna? (Lik. 2:16-19) Re ke ke ra tsila-tsila hore ho bile teng ho phethahatsoa ho tšoaehileng ha Joele 2:28, 29 ho tloha selemong se sisintseng lefatše sa 1914. Nakong ea Ntoa ea I ea Lefatše lira tsa ʼMuso oa Messia, baruti ba Bojakane ka ho khethehileng, li ile tsa atleha hore ho thibeloe boboleli ba ʼMuso ba bahlanka ba tlotsitsoeng ba Jehova kapa bo sentsoe ka ho teba. Hona ho tšoana le nakong ea matsatsi a 51 ho tloha lefung la Jesu ka la 14 Nisane ho fihlela hoseng ka Pentekonta Sivane 6, 33 C.E. Ka letsatsi la bo50 Jesu a tsohile barutuoa ba hae ba neng ba bokane Jerusalema, ba fumana matla a tsoang holimo ha moea oa tlotso o theohela holim’a bona ʼme ba fetoha lipaki tsa hae tsa pontšeng.
20. Hoba bahlanka ba ka sehlohong ba Watch Tower Society ba lokolloe litlamong ka 1919, ho etsahetse eng e ileng ea lumellana le se ngotsoeng ho Tšenolo 11:7-13?
20 Ka ho tšoanang, kamor’a hore basebeletsi ba Watch Tower Society le batšoaruoa hammoho le bona ba lokolloe litlamong teronkong ea nakoana Atlanta, Georgia, U.S.A., ka Tlhakubele selemong sa kamorao ho ntoa sa 1919, moea o halalelang oa fetoha o sebetsang ka matla holim’a masala a bahlanka ba Jehova ba ineetseng le ba kolobelitsoeng ba lefatšeng. Tlas’a matla a susumetsang a oona ba ikenya mosebetsing oo ba o beetsoeng ho Mattheu 24:14, ho fanoa ha bopaki ba ho qetela ʼmusong o hlomiloeng oa Molimo ho fihlela ʻbofelong.’ Hona ho lumellana le se neng se tšoantšelitsoe ho Tšenolo 11:7-13.
21. (a) Ka Pentekonta ea 33 C.E., ho etsahetse eng ka baketeki ba Bajode ba likete Jerusalema? (b) Ka ho lumellana ho tloha ka 1919 ho ea pele likopano tse akaretsang li ile tsa tšoaea tšobotsi efe e hlokomelehang?
21 Morao koana ka 33 C.E., baketeki ba ka bang 3 000 ba Bajode ba mokete oa Pentekonta ba kolobetsoa Jerusalema ka “lebitso la Ntate, le la Mora, le la Moea o Halalelang” ʼme e le ka tiiso ea hore moea o halalelang o tla theoleloa holim’a bona. Hamorao palo ea baamoheli ba moea o halalelang oa tlotso ea phahamela ho ba ka bang 5 000. (Lik. 2:37-41; 4:4; Matt. 28:19, 20) “Mehleng ea bofelo” ea kajeno ea rōna le nako e ka tlase ho likhoeli tse tšeletseng kamor’a hore litho tsa basebeletsi ba ntlo-kholo ea Watch Tower Society ba lokolloe litlamong Atlanta, Georgia, ho ile ha tšoaroa kopano e akaretsang Cedar Point, Ohio, U.S.A., ka la 1-8 Loetse, 1919, ʼme kopanong ena ho ile ha kolobetsoa ba fetang 200 Letšeng la Erie ka tšepo ea ho kolobelletsoa ʼmeleng oa moea oa Kreste. Kopanong ea bobeli ea Cedar Point lilemo tse tharo hamorao ha kolobetsoa ba 361 e le ba lebelletseng ho ba litho tsa ʼmele oa Kreste oa moea le ka tšepo ea leholimo. Kopanong ea Columbus (Ohio) ea 1924 ha kolobetsoa ba 485.
22. Kopanong ea Indianapolis ea 1925, Joele 2:28, 29 e ile ea sebelisoa joang, ʼme ke eng se pakileng hore Molimo ke ʼMoloki oa nako ea nepahetseng le Moprofeta mabapi le boprofeta boo?
22 Selemong sa 1925, kopanong ea Indianapolis, Indiana, ha hoa ka ha kolobetsoa ba bangata feela, hape ha fanoa ka puo ea bohlokoa haholo. E ne e re “Ho Tšolloa ha Moea o Halalelang,” ʼme ea sebelisa Joele 2:28, 29 bakeng sa kajeno. Ba baloang ka likete hape ba tlalehoa e le ba jang bohobe le veine moketeng oa selemo le selemo oa Selallo sa Morena. (Maqephe 339-344 a Watch Tower, ea la 15 Pulungoana, 1925) Kahoo, ‘mehleng ena ea bofelo’ ho tloha selemong se harasoantsoeng ke ntoa sa 1914 moea o halalelang o ʼnile oa tšolloa ka mokhoa o tšoailoeng ka ho khethehileng ho paka hore Jehova ke ʼMoIoki oa nako ea tšepahalang le Moprofeta ea sa foseng. Haufinyane ‘mehla ena ea bofelo’ e tla fihla ‘bofelong’ (télos) ba eona mahlomoleng a fetang ʼohle a kileng a e-ba teng lefatšeng.
23. Kamor’a lintho tsena, ho tla ba teng ʼmuso ofe, ka molemo ofe ho mahlatsipa a “mahlomola” le bakeng sa bafu bohle ba lopolotsoeng?
23 Qetellong, kamor’a sena sohle, ho tla etsahala joang? Tšenolo 19:11 ho ea ho 20:6 e-ea arabela: ʼMuso oa Jehova oa Messia oa lilemo tse sekete, o tlisang ‘khotso lefatšeng har’a batho bao o khahloang ke bona,’ pele har’a baphonyohi ba ‘mahlomola a maholo,’ e leng, masala a bao moea o halalelang o ileng oa tšolleloa ho bona “mehleng ea bofelo” hape le “bongata bo boholo” ba metsoalle ea bona e kang linku bo ileng ba tšoarella le bona ho isa bofelong (télos). (Luka 2:14; Matt. 24:21; Tšen. 7:9, 14, 15) Joale, ka nako ea teng, ha lilemo tseo tse sekete li ntse li tsoela pele ho ea bofelong ba tsona bo atlehileng ho tla latela tsoho ea bafu bohle ba batho ba tla arabela lentsoeng la Konyana ea Molimo, Morena oa Messia Jesu, ea tetseng bophelo ba hae ba botho bo phethahetseng e le topollo bakeng sa bona bohle.—Tšen. 20:11–21:4; Joh. 5:28, 29.
[Ntlha e qolotsoeng e leqepheng la 17]
Leha e bile mpe hakaalo, timetso ea Jerusalema ka 70 C.E. e ne e se oona “mahlomola” a maholo ho ʼohle paleng.—Matt. 24:21
[Lebokose le leqepheng la 20]
Boboleli ba ’Muso ba Lipaki tsa Jehova ho tloha ka 1914 bo fapane hole le ba baromuoa ba Bojakane, hobane:
Bo tlile “Mehleng ea Bofelo” ea tsamaiso ena e litšila ea lintho
Bo supa ho hlongoa ha ʼmuso oa Molimo e le ha sebele ka 1914
Bo tšoailoe ka ho tšolloa ho hlokomelehang ha moea oa Molimo ho tloha ka 1919, ka phethahatso e feletseng ea Joele 2:28, 29
Bo tla fihla tlhorong ka “bofelo,” télos, ba ‘Mehla ea Bofelo,’ mahlomoleng a maholo ho ʼohle a lefatše
Bo na le tšepo e khōlō ea ho pholoha ha masala a tlotsitsoeng le “bongata bo boholo” ho kena sebakeng sa ʼmuso oa Messia oa lilemo tse sekete
Bo supa ho phethahaleng ho haufi ha tšepiso ea Molimo ea tsoho ea bafu ba batho ho kena paradeiseng ea lefatšeng