Tšebeletso e Halalelang le le Lelapa
“Kea le rapela . . . le ke le o beele ’mele ea lōna, e be sehlabelo se phelang, se halalelang, se khahlisang Molimo; ke eona tšebeletso e le tšoanetseng.”—Ba-Roma 12:1.
1, 2. (a) Ho etsa “tšebeletso e halalelang” e amohelehang, lelapa la Bokreste le lokela ho khahlametsa litlhokahalo life? (b) Thathamisa mathata a mang a ka ’nang a khathatsana le “tšebeletso e halalelang” ea lelapa la Bokreste.
Ka PHUTHEHONG ea Bokreste lelapa le nkoa e le motso oa motheo. Ha lerato, khotso le kopano li le teng ka lapeng le ho hlokomela bohlokoa ba ho etsa ‘tšebeletso e halaleleng’ ho Jehova, joale lelapa e ka ba tlatsetso e ntle phuthehong ea Bokreste. (Ba-Roma 12:1) Phephetso ke ho haha le ho boloka motso o joalo oa lelapa.
2 Ho na le lintho tse ngata tse sebetsang khahlanong le katleho ea malapa a Bakreste mehleng ea rōna. Ka mohlala, monna le mosali hangata ba utloa ho hlokahala ho hiroa e le hore ba ka ba le ho lekaneng ho phelisa lelapa. Boemong bona, malapa a sekamela ho arohaneng. Ka linako tse ling, ka baka la ho tosolla ha tsamaiso ena ea lintho, lelapa le ka ba ’na la senngoa ke takatso ea ho phela ka holimo ho seo le nang le sona, ho e-na le ho ela hloko keletso ea Bibele ea ho khotsofalla “lijo le liaparo.” (1 Tim. 6:8) Moea oa boipuso le takatso ea hore e mong le e mong a etse seo a se ratang, ho e-na le ho sebetsa hammoho, ke mabaka a mang a arohanyang malapa ho e-na le ho a kopanya kopanong. Ho sa tsotellehe hore na tšusumetso ke efe, ho na le tsela eo, haeba e lateloa, e ka bang thuso e khōlō lelapeng la Bokreste.
3. Ho khothalletsoa tsela efe?
3 Tsela ena e beiloe polelong e entsoeng thutong ea thabeng. Morena Jesu a re: “Le mpe le batle ’muso oa Molimo le ho loka ha oona pele; ’me lintho tseo tsohle le tla li ekeletsoa.” (Matt. 6:33) Puisano ena e tla ameha ka tsela eo. E ke ke ea sebetsana le litšobotsi tsa bophelo ba lelapa empa le mekhoa e sebetsang eo lelapa le ka e latelang ha le batla ’Muso pele le ho ntšetsa pele lintho tse fellang ka lelapa le thabileng le le lerato la Bokreste, leo ka ho molemo le ka etsetsang Molimo ‘tšebeletso e halalelang.’
‘Ho Batla ’Muso Pele’
4. Ke ka baka la boemo bofe bo futsitsoeng re tšoanelang ho kenngoa sekolo sa ho khahlisa Jehova? (Jer. 10:23)
4 Haeba ntho e ’ngoe e le ea pele bophelong ba motho, ke eona ea mathomo, ea bohlokoa ba pele. Jesu o itse: “Ekare ha e mong a rata ho ntatela, a ke a itele, a ipelese sefapano sa hae ka tsatsi le leng le le leng, ’me a ntšale morao.” (Luka 9:23) Ho ba molateli oa ’nete oa Jesu le ho itela ho hloka hore motho kannete ‘a batle ’Muso pele.’ Ka baka la likelello tsa rōna tse sekametseng ho se phetheheng le lipelo ho tloha tsoalong ho ea pele ka baka la sebe se futsitsoeng, bohle re tlameha ho kenngoa sekolo kapa re rutoe ka se lebelletsoeng ho rōna e le hore re khahlise Molimo. (Gen. 8:21; Ba-Roma 5:12) Re tlameha ho rutoa ho ‘batla ’Muso pele,’ hobane, ha re tlohetsoe e le rōna, ntle ho khethollo re tla batla pele seo re se lakatsang le seo re se batlang. Jehova ka baka leo o fane ka taeo e tlang ho rōna ka Lentsoe la hae ’me le fana ka tataiso e nepahetseng.
5. Ho Deuteronoma 6:6-9, lenaneo la thuto leo Jehova a neng a le neile Baiseraele ba boholo-holo le ne le le batsi hakae?
5 Jehova a laela batho bao a ba khethileng, Baiseraele ba boholo-holo, hore ba rute bana ba bona melao le litaelo tsa hae. Ba ne ba lokela ho ruta bana ba bona lapeng, ha ba le hole le hae, ha ba phomotse leha ba sebetsa. (Deut. 6:6-9) Taelo eona eo e loketse malapa kajeno ha a etsetsa Molimo ‘tšebeletso e halalelang.’ Ha re rutoa ho ‘batla ’Muso pele,’ re ithuta ho jara boikarabelo. Bo bong ba boikarabelo boo ke ho arolelana.
Ho Arolelana
6. (a) Re hlile re amehile ka ho arolelana hofe mona? (b) Boikarabelo ba batsoali bo boholo hakae tabeng ea ho arolelana? (c) Ke tšitiso efe eo moapostola Pauluse a e thathamisitseng ho 2 Ba-Korinthe 2:14-16, ’me hona ho ka hlahisa boemo bofe ho ba bang?
6 Mona ha re batle ho lula ho se boleloang ke ho arolelana ka kutloisiso ea nama, hoo, koana, e leng habohlokoa le bakeng sa thabo ea ’nete. (Lik. 20:35) Kameho ea rōna ke ho arolelana ho feng ba bang monyetla oa ho ba le tšepo eo Bakreste ba nang le eona ’musong oa Molimo. E ’ngoe ea litšoaneleho tse ntle haholo eo motsoali a ka e kenyang ho ngoana oa hae ke takatso ea ho arolelana ‘litaba tse molemo’ tsa ’Muso le ba bang. Ho tloha qalehong bana ba ka rutoa ho ba le karolo ho bueng le ba bang ka ‘litaba tse molemo tsa ’muso.’ (Matt. 24:14) Hona ho nka boiteko bo matla ka lehlakoreng la batsoali ka baka la sebopeho sa molaetsa oa ’Muso sa hore ha o amohelehe habonolo kapa ha o ratehe ho ba bangata ba o bolelloang. Ke kahobane Satane, “molimo oa lefatše” lena, o foufalitse likelello tsa batho ‘evangeling e khanyang e buang ka Kreste.’ (2 Ba-Kor. 4:4) Moapostola Pauluse o buile ka hore re phethahatse boikarabelo bona le phello ea bona. A re: “Ho rorisoe Molimo o re neang ho hlōla ka mehla ka Kreste, o hasetsang hohle ka rōna monkho oa tsebo ea oona! Hobane ho Molimo re monkho o monate oa Kreste har’a ba bolokehang le har’a ba timelang; ho ba bang re monkho oa lefu, o bolaeang, ho ba bang re monkho oa bophelo, o phelisang.” (2 Ba-Kor. 2:14-16) Bothata ke hore boholo ba batho bo talima molaetsa ona o bohlokoa e le ntho e bolaeang, e sa amoheleheng ho bona. Ho kopanela ho jaleng molaetsa ona ho batho ba joalo ho ka ba thata le ho nyahamisa.
7. Ke khothatso efe eo bana ba e hlokang e le hore ba ka tsoela pele ho seo ba ithutang sona?
7 Hona ho etsa hore karolo ea batsoali ba Bakreste e be ea bohlokoa haholo ho koetliseng bana ba bona ho kopanela ‘tšebeletsong e halalelang’ ena. Tšebeletso e joalo e hasa ‘tsebo ka Kreste,’ e leng lebaka la thabo e khōlō ho ba seng bakae, empa e hanoang ho hang ke ba bangata. Batsoali ba na le monyetla le tlameho ea ho qala ho koetlisa bana ba bona qalong ea bophelo e le hore ba lokele le ho hlomelloa ho nka karolo ‘tšebeletsong e halalelang’ ena, ho jala molaetsa o buang ka Kreste le ’Muso ho ba bang. Bana ba hloka thuso e ngata ho ananela hore, le hoja ba bangata ba talima molaetsa o khanyang o tsoang ho Molimo e le o bolaeang, baboleli ba banyenyane ba ‘litaba tse molemo’ ba se ke ba ba felloa ke thabo le cheseho ea bona. Leha e le hore ba ka khoehlisa matsoho le ho khaotsa ho nka karolo ho etsetseng Jehova ‘tšebeletso e halalelang.’—1 Ba-Kor. 9:16, 17.
8. (a) Mohlala oa batsoali ke oa bohlokoa hakae ho etsoeng ha “tšebeletso e halalelang”? (b) Ke hobane’ng ha e le habohlokoa hore batsoali ba nke karolo e tobileng thutong e joalo?
8 Hoa totobala joale, hore batsoali ba na le boikarabelo bo tebileng le bo hlolang ka mehla ho bontša bophelong ba bona cheseho le boineelo tseo ba nang le tsona ka ho kopanela ka mehla mosebetsing oa ho bolela ’Muso. Ba lokela ho ho fetola karolo ea mokhoa oa bona oa bophelo ho ba le bana ba bona tšebeletsong ea ’Muso, ba sa rōme bana ba bona hore ba eo hlokomeloa ke ba bang ka linako tsohle. Ha ho e mong osele ea ka ba jarelang boikarabelo bona. Ho bea mohlala o nepahetseng ke tsela e molemo haholo ho kenya lipakane tse nepahetseng le tšusumetso ho bana. Hopola taelo ea Mangolo: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.” (Liprov. 22:6) Ho fana ka thuto e loketseng, ntate kapa ’mè, kapa ka bobeli moo ho ka etsahalang, ba lokela ho ba le bana ba bona. Ba kopanele ‘tšebeletsong e halalelang’ e le lelapa.
9. Thathamisa melemo e ’meli e hlahisoang ke ho kopanela tšebeletsong e halalelang ea ’Muso.
9 Ho arolelana ‘litaba tse molemo’ le ba bang hona ho na le liphello tse molemo, ntle ho ho fana ka khotsofalo ea hore motho a tsebe hore o etsa se laetsoeng ke Jehova. Ho nea bana ba motho lipakane tse loketseng hore ba sebeletse ho tsona bophelong. Ho phehella lipakane tse se nang letho ho etsoang ke bacha ba bangata ha ho ba tlisetse thabo ea ’nete le e tšoarellang. Ho phehella pakane e khahlisang Jehova ho tlisa le khotsofalo, pakane e tšoanelehang ho feta tsohle. Ha lefatše ka kakaretso le tsoma khotsofalo, malapa a bomolimo ka phuthehong ea Bokreste a e fumana e le haufi le oona, haeba feela a ka e nanabela. Ho na le mecha e mengata ea khotsofalo e fumanehang.—Ba-Ef. 5:15, 16.
Tšebeletso ea Bopula-Maliboho
10. Tšebeletso ea bopula-maliboho e ka khothalletsoa joang ka lelapeng la Bokreste, hona ka molemo ofe?
10 Lefatšeng lohle selemong sa tšebeletso sa 1980 ho bile teng ba fetang 137 000 ba Lipaki tsa Jehova ba ileng ba kopanela tšebeletsong ea mofuta o itseng ea nako e tletseng, tšebeletso ea bopula-maliboho. Batho bana ba ile ba khotsofala haholo hore ba be le karolo e feletseng joalo boboleling ba ’Muso. Mofuta ona oa ‘tšebeletso e halalelang’ oa ba tlisetsa mahlohonolo a mangata a tsoang ho Jehova. Ka linako tse ling, litho tsa lelapa li ka lokisetsa hore setho se seng se kenele tšebeletso ea nako e tletseng ea bopula-maliboho. Ho ka ’na ha hloka hore e mong le e mong a itele ka tekanyo eitseng, empa moputso oona oa tšoaneleha. Na u kile ua nahana ka hore e mong oa litho tsa lelapa la lona a kopanele karolong e joalo ea ‘tšebeletso e halalelang’? Batho ba bangata ba masooa le banyalani ba qalisang ka tšebeletso ea bopula-maliboho, pele e le bo-pula-maliboho ba thusang, joale e le ba kamehla le bo-pula-maliboho ba khethehileng ba fumana hore ba bile ba boemong ba ho atolosa tšebeletso ea bona ho kena mabaleng a mang a ‘tšebeletso e halalelang.’
Tšebeletso ea Boromuoa
11. (a) Ba bangata ba kene lebaleng lefe hape la “tšebeletso e halalelang”? (b) Hona ho ipakile e le hamolemo ofe ho ntšetseng pele “tšebeletso e halalelang”?
11 Ka lilemo tse fetang 38 Sekolo sa Bibele sa Watchtower sa Gileade se ’nile sa sebetsa, se koetlisa le ho hlomella batho hore ba ee masimong asele moo ba bileng le hona ho ‘batla ’Muso pele.’ Bontate le bo-’mè ba bangata ba Bakreste ba ’nile ba utloisisa ho tela monyaka oa ho ba le bana ba bona haufi, empa ba ba khothallelitse ho atolosa tšebeletso ea bona ’me kahoo ba thuse ba bang linaheng lisele. Likete tsa baena le likhaitseli ba masooa, hammoho le banyalani, ba hlohonolofalitsoe ka tokelo ea ho nkela tšebeletso ea boromuoa linaheng lisele. Ba hlohonolofalitsoe ka mahlohonolo a mangata mofuteng oo oa ‘tšebeletso e halalelang’ ’me ea e-ba likofuto ho jaleng ‘litaba tse molemo’ likarolong tse hole-hole tsa lefatše. Ho tla fihlela kajeno ho teng ba fetileng sehlopheng sa pele sa Sekolo sa Gileade ba sebeletsang linaheng lisele, ’me mabakeng a mangata ke bona ba etsang motheo oa mosebetsi o qaliloeng lilemong tse mashome-shome tse fetileng. Ha le phetha ‘tšebeletso e halalelang’ ea lōna le le lelapa, na le boemong ba ho khothalletsa leha e le ofe baneng ba lōna ho nahana ka lebala lee la mosebetsi?—Mal. 3:10.
Tšebeletso ea Bethele
12. Bethele e ka nka karolo efe “tšebeletsong e halalelang” malapeng a mang?
12 Lefatšeng lohle liofising tsa makala tsa Watch Tower Society ho na le mahae a Bethele a sebetsang moo bahlankana le baroetsana ba ineetseng ba ka sebeletsang ’Mōpi oa bona bohlankaneng le boroetsaneng ba bona. (Moek. 12:1) Mofuta ona oa ‘tšebeletso e halalelang’ le oona o tla le thabo e ngata ho ba o tšoanelehelang. Kaha ba na le hona ho neelana ka tšebeletso e halalelang lebitsong la baena le likhaitseli tsa bona ba tšebeletsong ea ho bolela le ho ruta. Malapa a mangata a hlohonolofalitsoe ka tokelo ea ho ba le bana kapa beng ka bona lehaeng la Bethele ba sebeletsa. Le hoja lebala lena la tšebeletso ea nako e tletseng le sa lumelle hore motho a kopanele tšebeletsong ea pontšeng ka tekanyo e tsoanang le mosebetsi oa bopula-maliboho kapa oa boromuoa, bao ba sebeletsang Bethele ba ntse ba kopanela boboleling ka ntlo le ntlo le ho jala molaetsa oa ’Muso. (Lik. 20:20) Ho feta moo, ba fana ka litšebeletso tsa bohlokoa tse thusang ho boloka mosebetsi oa boboleli lefatšeng lohle o tsoela pele.
U tla Etsa Joang?
13. Ke monyetla ofe o ntseng o tsoela pele ho ba teng malapeng a Bakreste?
13 Pauluse, lengolong la hae le eang ho phutheho ea Korinthe, o ngolile hore o lula Efese ka nakoana hobane o “buletsoe monyako o moholo oa tšebeletso e hlohonolofalang.” (1 Ba-Kor. 16:9) Ka pel’a batho ba Jehova kajeno ho tsoela pele monyako o moholo oa tšebetso, ‘tšebeletso e halalelang,’ e butsoeng. Re phela mehleng ea phethahatso ea ho qetela ea boprofeta bo bongata ba Bibele bo sebetsanang le ‘nako ea bofelo’ ea ha litaba tse molemo tsa ’Muso li lokela ho boleloa lefatšeng lohle e le bopaki. (Dan. 12:4; Matt. 24:14) Malapa a Lipaki tsa Jehova a Bakreste a tla etsa joang? Ho potlaka ho teng, hobane ho ileng ke nako. Litokisetso li teng, hobane Jehova o lokiselitse Lentsoe la hae Bibele le libuka tse hatisoang ke “mohlanka ea khabane, ea bohlale” molemong oa ba tšabang Molimo. (Matt. 24:45-47) Malapa a teng, ’me Jehova o tsoela pele ho eketsa ba likete ho ba nkileng karolo boboleling ba ’Muso.—Bapisa Esaia 60:22.
14. (a) Ke lipotso life tse loketseng tseo malapa a ka ipotsang tsona? (b) Ke joang re ka nkoang re tšoanelehela ho nka karolo “tšebeletsong e halalelang”?
14 Kahoo potso ke tsena: U etsa’ng? Na u itšoarelletse ka monyetla oo u nang le oona hona joale, le le lelapa hape le le motho ka mong, ho etsetsa ’Mopi ‘tšebeletso e halalelang’? Na le khothalletsa ba bang hore ba etse joalo? Na lelapa la lona ke le leng la ao ka phuthehong a fanang ka bopaki ba hore a theiloe motheong o tiileng, a lakatsang ho bea litholoana tsa ’Muso? Ha a bua ka libano tse monkho o monate o jalehang har’a ba bolokoang le ba lahlehang, Pauluse a tsoela pele ka hore a re: “Empa ke mang ea ka lokeloang ke tse kalo? Hobane ha re tšoane le ba bangata ba tsoakang lentsoe la Molimo; re ntse re bua re le ba ’nete, re le ba buisoang ke Molimo, pontšeng ea Molimo, re le ho Kreste.”—2 Ba-Kor. 2:16, 17.
15, 16. (a) Ba bang ba ka tseba ho eketsa karolo ea bona ho ntšetseng pele lithahasello tsa ’Muso joang? (b) Mahlohonolo a “tšebeletso e halalelang” e atolositsoeng ke afe?
15 Ka ho ntšetsa pele lerato, khotso le kopano ka tikolohong ea lelapa, ka hore taba ea sehlooho ea bohlokoa e be ‘ho batla ’muso pele,’ ka ho lula fatše le ho lekanya litšenyehelo, malapa a Bakreste a ka fumana hore ka sebele a ka eketsa karolo eo a nang le eona ho ntšetseng pele molaetsa oa bohlokoa ka ho fetisisa o kileng oa boleloa lefatšeng, ‘litaba tse molemo’ tsa ’muso o hlomiloeng oa Molimo. Ka boiteko ba bona bo tiileng le bo kopaneng tlhohonolofatso ea Jehova e tla ba ntho ea bona, ’me ha a phaelle mahlohonolo ao a fanang ka oona ka bohloko ba letho.—Liprov. 10:22.
16 Ke hobane’ng ha le sa lule fatše le le lelapa ’me le nahane ka hore na le etsa’ng le hore na le ka etsa’ng? Botšepehi ntle ho pelaelo bo tla qobella ba bangata ho lumela hore boiteko bo eketsehileng bo ka atolosa karolo eo malapa a rōna a e nkileng ‘tšebeletsong e halalelang’ ea Jehova. Hopola hore Jehova ha a re kōpe hore re etse ho kaholimo ho ho utloahalang. Lerato la rōna ho eena, malapa a rōna le bakeng sa batho ka kakaretso le lokela ho re susumelletsa ho itlhahloba le ho lekanyetsa hore na re ka etsa’ng. Nahana ka litšobotsi tse fapa-fapaneng tsa ‘tšebeletso e halalelang’ ea hao, tšebeletso ea hao e khanyang u le morutuoa oa Kreste. (2 Ba-Kor. 4:7) Isa taba ho Jehova ka thapelo, u kōpa tataiso ea hae le thuso mabapi le boiteko boo u bo etsang. Hona joale mahlohonolo a mangata ka khotsofalo ea bomolimo, ’me nako e tlang e tšoere tšepiso ea bophelo boo e leng bophelo ka sebele, tsamaisong e ncha ea lintho ea Molimo.—Matt. 25:34; 1 Tim. 6:6, 17-19.
LINTLHA TSEO LE KA Ll BUISANANG LE LE LELAPA
• Ho feta tšebeliso ea rōna ea botho ea mantsoe a Jesu ho Mattheu 6:33, ke hobane’ng ha malapa a lokela ho ameha ka ho sebelisa ka kopano mantsoe ao?
• U ka ba le karolo e khōloanyane lenaneong la lelapa la ho ruta bana ho kopanela molaetsa oa ’Muso le ba bang joang?
• Ke litokiso life tse sebetsang tseo u nahanang hore li ka etsoa lapeng leo u leng ho lona e le hore bana ba ka ba le karolo e feletseng mosebetsing ona?
• Ke litšobotsi life tse khethehileng tsa ‘tšebeletso e halalelang’ tseo e ka bang lipakane tse molemo bakeng sa hao kapa setho se seng sa lelapa?
• Lelapa la rōna le ka sebetsa hammoho joang e le hore bonyane a le mong ho lona a ka finyella sepheo se joalo?
[Setšoantšo se leqepheng la 23]
Bacha ba ka ithuta thuto ea bohlokoa ea ho arolelana ha ba tsamaea le batsoali ba kopanetseng molaetsa oa Bokreste
[Setšoantšo se leqepheng la 24]
Bacha ba bangata ba thabetseng ‘tšebeletso e halalelang’ le malapa a bo bona ba fumane monyaka oa ho sebeletsa e le basebeletsi ba nako e tletseng ba bo-pula-maliboho
[Setšoantšo se leqepheng la 25]
Ho sebeletsa lehaeng la Bethele e ka ba mohloli oa khotsofalo e khōlō. Ke tlatsetso ea bohlokoa ‘tšebeletsong e halalelang’ e etsoang lefatšeng ka bophara