‘Ho Ema ka ho Itlhopholla Moleng oa Ntoa’
“Banna ba ntoa, ba tsebang ho ema ka ho itlhopholla, ba tla Hebrone ka pelo tse phethehileng, ho bea Davida morena oa ba-lseraele bohle.”—1 LIKRONIKE 12:38.
1. Ke boemo bofe bo potlakileng kajeno bo hlokang phalimeho?
TLEROLANG molumo oa ntoa! Lipaki tsohle tse koenneng tsa Jehova li folle tšebetso! Ntoa e loantšang sera e haufi le ho fihla bothateng. Linako li potlakile. Re ke ke ra ineela maikutlong a boiketlo kapa ra koeeetsoa ka ho nahana hore ntoa e kokobetse. Ke sona seo sera se ratang ha re se nahana, hobane se tseba hore nako ea sona e khutšoanyane. Ka lebaka leo, re ka ’na ra lebella hore sera se re oele holimo ka tšohanyetso ka tšepo ea hore se tšoase bahlabani ba ’nete ba sa elelloa.—1 Ba-Thessalonika 5:1-6.
2. Ke hobane’ng ha ho sa hlokahale hore Lipaki tsa Jehova li tšabe lira tsa tsona? (Pesaleme ea 24:8)
2 Jehova kajeno o bona lipaki tse khabane tsa hae e le bahlabani ba keneng ntoeng ea moea e potlakelang tlhorong. Ha a mengoa, Jehova o fetoha “mohale” eo letsoho la hae le letona le ka robakang le ho lahlela lira tsa hae fatše. (Exoda 15:3, 6, 7) Pallo ea hae ho Iseraele ea boholo-holo e neng e tla etelloa pele ke lengeloi la hae e ntse e eme: “Ha u mpa u mamelisisa lentsoe la lona, u etsa tsohle tseo ke tla u bolella tsona, ke tla ba sera ho lira tsa hao, ke loantše ba u loantšang.”—Exoda 23:20-22.
3. (a) Hlalosa boemo ba Jesu ho tloha ka 1914 C.E. (b) O kene ntoeng ea mofuta ofe? (c) Ke hobane’ng ha balateli ba tlotsitsoeng ba Jesu ba hlasetsoe kajeno?
3 ’Nete ea boprofeta e senolela mahlo a rōna a tumelo hore, ho tloha bofelong ba selemo sa 1914 C.E. Kreste Jesu ea tlotlisitsoeng o khethiloe ke Jehova e le Molaoli oa Mabotho oa makhotla a mangeloi a loanang a leholimo. (Pesaleme ea 110:1, 2; Mattheu 25:31) Ka potlako a etella pele makhotla ana ho loantša Diabolose le mangeloi a hae a fiela maholimo hore a hloeke boteng bo silafatsang ba bona ’me a ba qobella sebakeng sa lefatše. ’Me joale, ha a emetse pontšo ea ho qetela e tsoang ho Jehova hore a timetse sera, Kreste Jesu o tsamaisa mosebetsi o bonahalang lefatšeng lohle oo le oona o amang ntoa. (Tšenolo 12:7-9) Satane le makhotla a hae a bademona ba hlokomela hore nako ea bona e khutšoanyane, ka bohale ba loantša masala a balateli ba tlotsitsoeng ba Jesu. Hobane’ng? Hobane ka kutlo ba bolela ’Muso oa Molimo oa bona le Kreste oa oona.—Tšenolo 12:17.
‘Bahlabani ba Kreste Jesu’
4. Hlalosa hore na “mohlabani ea molemo” oa Jesu Kreste o etsoa ka eng?
4 Ho hlakile hore bohle ba kopanelang le ho tšehetsa masala a batho ba tlotsitsoeng ba Jehova ka ho tšoanang ba fetoha bahlaseluoa ba ntoa ena e bohale. Kahoo, ho e mong le e mong ea sebeletsang e le e mong oa Lipaki tsa Jehova ka tsela eo kajeno ho tla khothatso e susumetsang ea Pauluse: “Ha e le uena, mamella bothata ka mokhoa oa mohlabani ea molemo oa Jesu Kreste. Ea eang ntoeng ha a itšitise ka litaba tsa bophelo bona, a tle a khahlise ea mo memileng.” (2 Timothea 2:3, 4) Ntho eohle e ’ngoe bophelong e lokela ho nka sebaka sa bobeli tšebeletsong ea rōna bakeng sa Molaoli oa Mabotho a Jehova e moholo.
5. (a) Pauluse o hlalosa ntoa ea moea ea Mokreste joang? (b) Boikemisetso ba bahlabani ba Bakreste ke bofe, ’me ke eng e tla ba khothalletsa ntoeng?
5 Bonnete le sebopeho sa ntoa ena ea moea li re hlakela ha re nahana ka likhopotso tsena tsa moapostola Pauluse: “Hobane leha re tsamaea re le nameng, ha re loane ka nama; hobane libetsa tsa ntoa ea rōna hase tsa nama, empa li le matla ka Molimo ho liha liqhobosheane. Re liha ka tsona merero le liphahamo tsohle tse phahamelang ho loantša tsebo ea Molimo, . . . ’Me re itokiselitse ho khalemela ho se utloe hohle, mohla kutlo ea lōna e phethehang.” (2 Ba-Korinthe 10:3-6; bona hape Ba-Efese 6:12.) Joaloka bahlabani ba Kreste Jesu, re batla ho bontša hore bohle ba bone hore re ikokobeletsa litaelo tsa hae tsa ntoa ’me ka mehla re loketse ho kopanela le ho phethahatseng mahlale a ntoa ao a a khethang. Ho re khothatsa lebaleng la ntoa ea moea, re ke re phetle maqephe a Lentsoe la Molimo re khutlela morao ho se ileng sa etsahala paleng ea Iseraele ea boholoholo. Mona re ka fumana litšoantšo tse molemo tsa boprofeta tsa liketsahalo tse etsahalang hona joale.—Ba-Roma 15:4; 1 Ba-Korinthe 10:11.
Khetho ea Borena—e Fetileng le ea Hona Joale
6. Hlalosa liketsahalo tse khannetseng hore Davida a amoheloe e le morena le hore na hona ho ile ha ama batho ka bomong joang.
6 Nahana ka boemo mehleng ea Morena Davida, eo Molimo o neng o mo khethetse ho ba morena oa Iseraele eohle. Hoba Saule a shoe, banna ba Juda ke bona ba pele ba ileng ba hlokomela hore Molimo o khethile Davida hore e be morena oa bona. Meloko e meng ea khetha mora oa Saule Ishe-Boshethe e le morena, ’me hona ha fella ka khohlano e tsoelang pele. (2 Samuele 2:1-11; 3:1) Ka ho bolaoa ha Ishe-Boshethe lilemo tse peli hamorao, tsela joale ea hlekeha hore meloko e meng e ikopanye le Juda. Ka nako ea teng Davida a tlotsoa ka tšoanelo hore e be morena holim’a Iseraele eohle. (2 Samuele 4:5-12; 5:1-3) Empa nakong ena e lipakeng batho ba bangata ba tlameha ho inahana hore na ba tla sebeletsa mang. Ba ne ba tlameha ho nahana ka bopaki bo tšoanelang monna enoa e monyenyane Davida. Na ruri e ne e le motlotsuoa oa Molimo? Na ke eena ea neng a tla ba le tlhohonolofatso ea Jehova ha ho bapisoa le ho lahloa ha Saule ke Molimo? Na Davida o ne a tla atleha ho etella pele mabotho a Iseraele ho loantša lira tse ba potileng?
7. Ho ne ho ameha eng ho amohela borena ba Davida?
7 Ho totobetse hore batho ba bang ba ile ba ikhethela ntlo e tsoiloeng ea Saule. Ba bang ba etsa qeto motheong oa melemo ea botho. Ba bang bona ba sala ba “palame terata.” Empa neng-neng ho ne ho tlameha ho khethoe, ’me ba ileng ba thaba ke ba ileng ba ikhethela ka pelo eohle ho tšehetsa borena ba Davida. Bana e ne e se baikhabi kapa mahoholi a eang le nōka feela. Ba ne ba sa tsila-tsile. Ho e-na le hoo, ho tšehetsa ha bona morena oa Jehova ha ba etsa hore ba nke karolo e chesehang e le bafo ba Davida le bahlabani. Joalokaha 1 Likronike 12:22 e tlaleha: “Ka matsatsi ’ohle, ha ’na ha fihla batho ho Davida ho mo tlatsa, ho fihlela ba ba ba etsa sera se seholo, se kang sera sa Molimo.”
8. 1 Likronike 12:32, 38 li tsebahatsa ba amohelang borena ba Davida joang?
8 Ka litlaleho tse qaqisang litaba re hlokomela hore har’a bongata bona e ne e le “ba neng ba ithutile ho khetha linako ho tseba seo ba-Iseraele ba tšoanetseng ho se etsa. ” (1 Likronike 12:32) Bana ba ne ba se foofo boineelong ba bona ho morena. Ba ne ba hlometse hantle e le hore ba ka itlhahisa e le ba ka eteIloang pele ke Davida ntoeng. Ba ne ba sa lebella bophelo ba boiketlo. ‘Ba khetha linako’ ’me ba tseba hore ’muso o likiloe ke lira tse ka ’nang tsa metsa Iseraele le ho felisa borapeli ba Jehova. Ba tsoang ka bochabela ho Nōka ea Jordane e ne e le “banna ba ntoa, ba tsebang ho ema ka ho itlhopholla” ’me ba lokile ho sebeletsa tlas’a Davida ka “pelo tse phethehileng.”—1 Likronike 12:38.
9. (a) Na re fumana ho e-na le boemo bo tšoanang le ba mehleng ea Davida? (b) Ke khang efe e talimaneng le batho bohle kajeno?
9 Ke ho thabisang ho bona kajeno ha ho phuthuloha ka pel’a mahlo a rōna boemo ba sebele bo neng bo tšoantšetsoa ke boo! Davida e Moholoanyane, Kreste Jesu, o khethiloe ke Jehova ’me hona joale o busa e le morena oa leholimo. Lichaba tsa lefatše li hanyetsana le borena ba hae. Li tšosa ka hore li tla felisa bafo ba Morena ba lefatšeng. (Pesaleme ea 2:1-3) Ka baka leo, batho ka bomong lefatšeng lohle ba biletsoa ho ema ka lehlakoreng lena kapa lane la khang. Khang ke ena: Na ba emela ’Muso oa Mora oa Jehova kapa baa o loantša? Ba bangata ba “palame terata.” Ba bang ba rera ka hore na ke eng e bonahalang e le molemong oa botho, ka boikhabi ba inahanela ka tšireletseho ea bona ea botho le phahello.—Sofonia 2:2, 3; Joele 3:14.
10. (a) Ke hobane’ng ha ba bangata ba palame “terata” tabeng ea ho amohela borena ba Kreste? (b) Ke boikarabelo bofe boo hona joale bo lutseng ho Lipaki tsa Jehova?
10 Ha botumo ba baemeli ba tšepahalang ba Molimo ba lefatšeng bo ntse bo ata hohle, batho ka bongata ba nolofaletsoa ho khetha ka bohlale. (Mikea 4:1-3; Zakaria 8:23) Ba bangata ba tsila-tsila ke hobane feela ba haelloa ke tsebo ea linnete; ba haelloa ke temoho ea hore na mehla ena e lemosa eng le hore ho hlokahala hore ka potlako ba eme ba tiile bakeng sa ’Muso oa Molimo. Ba bangata ka baka leo ba sa ntsane ba le tlas’a tšusumetso ea mashano a bosatane ’me ba kotsing ea ho hulanyetsoa timelong le Satane le bakhotsi ba hae. Kahoo, pitso e potlakileng e eang ho lipaki tsohle tsa Jehova ke hore li fole ka lehlakoreng la Davida e Moholoanyane, Kreste Jesu, li hlometse le ho ikemisetsa ho loana le sera.—Bapisa Mattheu 12:30.
Ke Bafe ba Tšoanelehelang ho Loana?
11. Hlalosa kamoo Jesu a bontšitseng tsela ea hore kutlo ea rōna ho Kreste e be e “phethehang.”
11 Ntoeng ea bona ea moea bahlabani bohle ba Kreste ba tlameha ho khahlametsa litlhokahalo tsa bohlokoa haholo. Ka mohlala, Pauluse o bontšitse kamoo kutlo ea bona ho Kreste e tlamehang ho ‘phetheha.’ (2 Ba-Korinthe 10:5, 6) Re lekanyetsa joang hore na hona ho bonahatsoa hona joale tseleng ea rōna le boikutlong? Lipotso tse latelang li lokela ho re thusa boikemisetsong ba rōna ka bomong:
Na kannete re etellelitse tšebeletso ea rōna ho Molimo le Kreste ka pele ho kamano efe kapa efe ea nama? (Mattheu 10:37)
Na re hlekile takatso leha e le efe ea ho rua lintho tse bonahalang kapa ho buuoa hantle ke lefatše? (Luka 6:20-26)
Na re chesehela ho khahlisa Moeta-pele oa rōna le Molaoli ho e-na le ho belaella lintho tseo Jehova a tšepisitseng hore o tla fana ka tsona—lijo, liaparo le ntlo? (Mattheu 6:25-32)
Na re khaolitse ho nyatsa bahlabani hammoho le rōna ba Kreste e le hore re se kenye likhaohano le ho hloka kopano ka har’a bahalaleli? (Luka 6:37; Pesaleme ea 133:1-3)
Na kannete re rata baena ba rōna le ho batlela bohle boiketlo ba ngolisitseng ntoeng ee ea moea e loantšang lira tsa Molimo? (Johanne 13:35; 1 Petrose 4:8)
Tsena ke lipotso tse batlisisang tseo balateli bohle ba Kreste ba tlamehang ho li arabela e le bona.
12. Metsoalle le lira tsa ’muso oa Molimo li ka tsejoa joang? (Mattheu 25:31-46)
12 Taba e ’ngoe ea bohlokoa eo re lokelang ho e nahanela ntoeng ea rōna ea Bokreste ke pono e hlakileng eo re lokelang ho ba le eona ea lekhalo le arolang phutheho ea Molimo e hloekileng ho liphutheho tse se nang khalemelo le tse boitšoaro bo bobe tsa lefatše lena. (Genese 3:15; Pesaleme ea 97:10) Makhotla a loantšanang ntoeng a lokela ho nolofalloa ke ho khetholla motsoalle ho sera. Hona ho nolofatsoa ke liaparo tsa oona le lihlomo tsa ntoa. Re rutiloe litholoana tsa moea oa Molimo. Re hlokomelisitsoe mesebetsi ea nama, eo hape e bonahalang feela joaloka litholoana. (Ba-Galata 5:19-24) Kahoo ha ho moo ho ka thoe’ng ha hoa hlaka hantle pakeng tsa phutheho ea Molimo le phutheho ea Satane.
13. Liboka tsa kamehla li sebeletsa morero ofe ntoeng ea rōna ea moea?
13 Ho feta moo, na re bontša ka mehla ka tsela eo re etsang lintho ka eona hore re ‘falimehetse seo re se hlokang moeeng’? (Mattheu 5:3; Ba-Heberu 10:25) Ntoeng ea lihlomo tse bolaeang hoa hlokahala hore baokameli le ba bang ba boholong ba be le linako tsa ho eletsana e le hore ba ka lula ba tseba litaba tsa morao-rao ka mehato lebaleng la ntoa le mahlale a morao-rao a sera. Ka ho tšoanang, libōka tsa rōna Holong ea ’Muso kapa kae feela ke tsa bohlokoa e le hore re ka matlafatsoa ka mehla ke Lentsoe la Molimo le moea oa oona o halalelang, hammoho le ho lula re falimehetse metsamao ea sera.—1 Petrose 5:8.
14. Mantsoe a Zakaria a ho Luka 1:74, 75 a hlalosa boikutlo ba rōna hantle joang?
14 Bohle re lokela ho leboha Jehova le Mora oa hae hakaakang ka ho re hlomellela ntoa ea moea hamolemo hakaale! Ho tšoana le ntate oa Johanne Mokolobetsi, Zakaria, re ikutloa re tlamehile ho rorisa Jehova ka ho re “ha re loetsoe matsohong a bao e leng lira ho rōna, re mo sebeletse, re sa tšabe letho, khalalelong le ho lokeng, pontšeng ho eena, ka matsatsi ’ohle a ho phela ha rōna.” (Luka 1:74, 75) Re pholositsoe ho Babylona e Moholo. ’Me joale, ha re honyelletse se hlokoang ke Moeta-pele le Molaoli oa rōna, re boemong ba ho ema re hlophollotsoe mabaleng a ntoa ho loana le lira tsa Molimo le Kreste.
15, 16. (a) Satane o hlomile ka metso ‘mehopolo’ le “liqhobosheane” life ka likelellong tsa batho? (b) Tsena li ka ‘lihuoa’ joang feela, ’me hona ho etsahala ho fihlela tekanyong efe?
15 Lihlomo tsohle le makhotla a hlometseng tsa lefatše lena ke lipopi feela tsa bana ha li bapisoa le likhopolo le lineano tsa batho ba bululetsoeng ke Satane le makhotla a hae a bademona. A iketsa eka o lekana le Molimo ka boholo le matla, Satane o jetse lithuto tsa hae tsa leshano hohle. O hanyetsa Molimo oa ’nete ’me ka mano o bolela hore eena ka boeena ke mohloli oa tsebo. O ruta hore motho ha a hloke Jehova, hore, ka boeena, motho a ka tsoela pele ho isa moo a ka tšoanang le Molimo. Diabolose o latola tokelo ea Molimo pōpong, a ntse a qhekella batho ka maikutlo a hore motho o bile teng ka ho fetoha libopeho ho tloha tlase. O khonne ho etsa hore ba bangata ba lumele hore ha ho lefu la sebele, hore ho bonahalang eka ke lefu ha e le hantle, ke ho fetohela bophelong bo bong. O ntšelitse pele mebuso e sa tšoaneng, kaofela e theiloe le ho mela boikhabing. Tsena tsohle le tse ling ke “liphahamo tsohle tse phahamelang ho loantša tsebo ea Molimo.”—2 Ba-Korinthe 10:5.
16 “Liqhobosheane” tsena kapa maikutlo a metseng ka metso ho hlokahala li heletsoe, li pepesoe, e le hore ba thetsitsoeng ba ka lokoloha kelellong le moeeng. (2 Ba-Korinthe 10:4) Re na le lihlomo tse hlokahalang—tumelo e le thebe, ’nete e le senyepa se matlafatsang, ho loka e le tšireletso bakeng sa pelo, tšepo ea poloko e le heleme, Lentsoe la Molimo e le lerumo le evangeli ea khotso, bakeng sa ho thusa ba batlang ho ipea tlas’a Morena ea khethiloeng ke Jehova. (Ba-Efese 6:14-17) Ka ho sebelisa lihlomo tse joalo tsa moea lipaki tsa Bakreste tsa Jehova li lokolla batlamuoa ba bangata!
Tlhōlo e tla tla ka ’Nete
17. Pesaleme ea 45:3, 4 e supa phello efe ha Kreste a kena ntoeng ea ho qetela le sera?
17 Nako e ntse e atamela ea ha Jehova a tla etsetsa Morena eo a mo khethileng pontšo ea hore joale a loantše sera ntoeng ea ho qetela. Ha a bua le Moetapele eo oa makhotla a leholimo, Jehova o tla hooa ka mantsoe a Pesaleme ea 45:3, 4: “O mohale! u itlamelle sabole ea hao lehlakoreng la hao; ke hlopheho ea hao le khanya ea hao! Khanyeng ea hao u hloelle koloing ea hao ea hlōlo, u loanele ’nete le molemo le ho loka; letsoho le letona la hao le ke le u rute liketso tse makatsang! ” Phello ea ketso eo e tiile. Phutheho eohle ea Satane, e bonahalang le e sa bonahaleng, e tla tlosoa, ho tlosoa lefatšeng puso eohle e khopo le e hatellang. Leo e tla ba letsatsi la thabo e kaakang bakeng sa baphonyohi, ka bahanyetsi bohle, mahata, bafebi le basenyi ba lefatše ba ile ka ho sa feleng!—Tšenolo 11:16-18; 19:11-21.
18. Ho tloha ka 1914 C.E., ho bile le ho ‘hlopholloa moleng oa ntoa’ joang?
18 Ke ho hlollang hakaakang ho bona ha ho phethahala maemo ’ohle a tšoantšetso a ngoliloeng ka Mangolong hona joale! Mehleng ea rōna, baena ba tlotsitsoeng ka moea ba Kreste Jesu ke bona ba pele ho mo amohela e le Morena oa bona, kamor’a ho beoa teroneng ka 1914 C.E. Kaofela ba ‘eme ka ho itlhopholla ntoeng.’ Joale, haholo-holo ho tloha ka 1935, ha leseli le khanyetsa Tšenolo 7:9-17, “bongata bo boholo” bo hlokometse mohloli oa ’nete oa katleho le tlhohonolofatso ’me bo ‘eme ka ho itlhopholla!’ Bo ikopantse le Baiseraele ba moea ba kajeno, kaofela ba hlaha ba emetse ntoa, ba lokile ho kopanela mahlomoleng le mathateng a ntoa ea pontšeng ea moea le phutheho eohle ea Satane—tlotlisong le khanyeng ea Jehova.—Zakaria 2:11.
19. Joale paki ka ’ngoe e koenneng ea Jehova e ikemisetse ho etsa joang?
19 Ka ho hlakileng, he, linako li potlakile. Ena hase nako ea ho nahana hore ntoa ea moea e fetile. E se eka sera se ke ke sa re tšoara re sa hlokomela boemong bo atamelang bo thata ba tšebeletso e halalelang ea rōna. Hore na re ba masala a Baiseraele ba moea kapa ba “bongata bo boholo” ba metsoalle ea bona, re ke re ‘itlhopholleng hammoho moleng oa ntoa, ka pelo e phethehileng.’ E se eka re ka tsoela pele ka sebete ho utloahatsa mohoo oa ntoa hobane Jehova o re tiisetsa hore re tla hlōla!—2 Likronike 20:15.
Ka bokhutšoanyane:
◻ Ke hobane’ng ha ho potlakile hona joale ho ‘itlhopholla moleng oa ntoa’?
◻ Lipaki tsa Jehova li kene ntoeng ea mofuta ofe?
◻ Batho bohle kajeno ba talimane le khang efe ea bohlokoa?
◻ Ke bafe ba tšoanelehelang ho ba ‘bahlabani ba Kreste Jesu’?
◻ Ke tlhōlo efe e tiisoang hona joale?
[Setšoantšo se leqepheng la 15]
Ho kopana kamehla Holong ea ’Muso (1) ho re matlafaletsa ntoa ea moea, (2) ho re thusa ho ‘khetha linako’ ’me (3) ho re bontša hore na re ka sebeletsa ka “pelo e phethehileng” joang