Le se Ikenye Jokong e le ’Ngoe le ba sa Lumelang

“Le se ikenye jokong e le ’ngoe le ba sa lumelang. Hobane . . . motho ea tšepahalang o na le kabelo efe le ea sa lumelang?”—2 BA-KORINTHE 6:14, 15, “NW.”

1. Ho ile ha tla joang hore khaitseli e mong a nyaloe ke ea sa lumelang?

E MONG oa Lipaki tsa Jehova bohareng ba United States ho ea ka bophirimela o ile a hlokahalloa ke monna oa hae kotsing ea koloi lilemong tse ’maloa tse fetileng. O sa hopola: “Ke ne ke tsielehile qalong, empa ke ne ke ikemiselitse hore ke se ke ka lumella sena hore se khathatsane le tšebeletso ea ka ho Jehova. Leha ho le joalo, ka morao ho lilemo tse ka bang peli, ke ile ka qala ho ikutloa eka ha ke hlokahale ho banyalani ba ka phuthehong. ’Na le morali oa ka re ne re mengoa seoelo ha malapa a intša. Ha ke bona banyalani ba Bakreste ba bontšana kameho e mofuthu e mong ho e mong, ke ne ke ikutloa ke le ea lahluoeng le ho feta. Ho ne ho bonahala ho se ea hlokomelang hore ke ntse ke fokola haholoanyane moeeng. Ka hona ha monna oa lefatše eo ke neng ke mo tsebella mosebetsing a nkōpa hore ke ee lijong le eena, ke ile ka ea. Pele ke hlokomela, ke ne ke ratana le eena. Qetellong, ke ile ka fokola le ho hlōloa ke bolutu hoo ke ileng ka lumela ho nyalana le eena.”

2. Ke hobane’ng ha takatso ea ho nyaloa kapa ho nyala e le ea tlhaho, ’me lenyalo le ne le qapetsoe hore le thee eng?

² E, takatso ea ho kopanela bophelo le molekane e ka ba matla haholo, ’me hape ke ea tlhaho. Joalokaha Jehova ka boeena a ile a re: “Ha ho molemo hoba motho a lule a ’notši; ke tla mo etsetsa molekane ea tšoanang [“’mate,” ntho e ’ngoe e mo loketseng] le eena.” (Genese 2:18, New World Translation Reference Bible, botlaaseng ba leqephe) Lenyalo le ne le qapetsoe ho bōpa tlamahano e atamelaneng le ea ka mehla ea bonngoe pakeng tsa monna le mosali. Hase Adama empa ke Jehova ea ileng a re: “Monna o tla tlohela ntat’ae le ’m’ae, o tla khomarela mosali oa hae, ’me e tla ba nama e le ’ngoe.” (Genese 2:22-24; bapisa le Mattheu 19:4-6.) Mohlomong pelo ea hao e laba-labela ’mate ea joalo.

3, 4. (a) Bibele e lemosa khahlanong le ho thea kamano e atamelaneng le ba sa lumelang joang? (b) Ke ka tsela efe keletso ea Pauluse e buang ka joko e sa lekaneng e sebetsang lenyalong? (c) Bakreste ba Korinthe ba tlameha ba be ba ile ba utloisisa poleloana “ba sa lumelang” joang? (Bona botlaaseng ba leqephe.)

³ Leha ho le joalo, Bibele e fana ka temoso khahlanong le ho thea kamano e atamelaneng joalo le ba sa lumelang. Joalokaha moapostola Pauluse a boletse: “Le se ikenye jokong e le ’ngoe [“Le se ke la ipana jokong e sa lekaneng,” The Jerusalem Bible] le ba sa lumelang.a Hobane . . . motho ea tšepahalang o na le kabelo efe le ea sa lumelang.”b (2 Ba-Korinthe 6:14, 15, NW) Mohlomong Pauluse o ne a hopotse ka thibelo ea Molao oa Moshe e neng e le khahlanong le ho pana hammoho poho le esele bakeng sa ho lema. (Deuteronoma 22:10) Esele e nyenyane ka seemo ’me ha e matla joaloka poho ka hona e ne e tla utloa bohloko ka baka la ho panoa ka mokhoa o sa lekaneng joalo. Kaha lenyalo le tšoana le joko e tlamahanyang monna le mosali hammoho, hore Mokreste a nyalane le ea sa lumelang ho ne ho tla fella ka ho kena jokong e sa lekaneng. (Mattheu 19:6) Joko e joalo hangata e tlisa khatello e eketsehileng le boima lenyalong.—Bapisa le 1 Ba-Korinthe 7:28.

⁴ Leha ho le joalo, joalokaha phihlelo e qalong e bontša, Bakreste ba bang ba khethile ho nyalana le ba sa lumelang. Ke hobane’ng ha ba bang ba fumana ho le thata ho nyala kapa ho nyaloa “feela Moreneng”?—1 Ba-Korinthe 7:39, NW.

Lebaka Leo ka Lona ba Bang ba Shebang Hosele

5. Bontša kamoo ba bang ba hapehang maikutlo ke ea sa lumelang.

⁵ Hase hore ba hlile ba tloha ba ikemiselitse ho hlokomoloha keletso ea Molimo. Nahana ka boemo ba khaitseli oa Mokreste ea ka ’nang a lakatsa ho nyaloa. A ka ’na a lakatsa ho ba le monna oa Mokreste, empa ha bonahala ho se baena ba bangata bao a ka khethang ho bona har’a metsoalle ea hae e lumetseng. O amehile ka lilemo tsa hae. Mohlomong o lakatsa ho ba le lelapa. Tšabo ea ho tsofala a le mong le tlhokahalo ea ho ikutloa a ratoa li ka mo memela tlhaselo. Haeba, he, monna oa lefatše a bontša ho mo thahasella, ho ka ba thata ho hana. Monna eo a ka ’na a bonahala a le mosa, a le bonolo. Mohlomong a sa tsube kapa hona ho sebelisa puo e mpe. Joale ho tle menahano ena ea boikemelo: ‘O rateha ho feta baena ba bangata bao ke ba tsebang!’ ‘O thahasella ho ithuta.’ ‘Ke tseba ka maemo ao ho oona khaitseli e mong a ileng a nyaloa ke ea sa lumelang ’me qetellong o ile a fetoha molumeli ’moho.’ ‘Ho na le manyalo a mang a Bakreste a sa atleheng!’—Bona Jeremia 17:9.

6, 7. (a) Khaitseli e mong oa lesooa o ile a hlalosa ho nyahama ha hae joang? (b) Ke lipotso life tse lokeloang ke hore re nahane ka tsona?

⁶ E, e ka ba ho nyahamisang haholo bakeng sa Mokreste oa lesooa ea batlang lenyalo. Ba bang ba bile ba ikutloa ba tsielehile. Khaitseli e mong oa lesooa ha a hlalosa boemo bona sebakeng sa habo o itse: “Palo ea baena bao nka khethang har’a bona e fokola haholo. Empa palo ea bo-khaitseli ba masooa e khōlō haholo. Ha khaitseli a bona bocha ba hae bo feta ka potlako, menyetla ea hae ea ho khetha e sala e le ho se kene lenyalong ho hang kapa ho nyaloa ha ho hlaha monyetla oa pele feela.”

⁷ Leha ho le joalo, keletso ea Bibele e hlakile: “Le se ikenye jokong e le ’ngoe le ba sa lumelang.” (2 Ba-Korinthe 6:14, NW) Na temoso ee ea bomolimo ea tlatlapa kapa ha e utloahale?

Pontšo ea Tlhokomelo e Lerato ea Molimo

8. Jehova o bontšitse joang hore o re hopoletse se molemohali?

⁸ Jehova o amehile ka botebo ka boiketlo ba rōna ba ka mehla. Na ka tšenyehelo e khōlōhali ho eena ha aa ka a fana ka Mora oa hae e le “topollo ea ba bangata”? (Mattheu 20:28) Na hase ‘Eena ea re rutang ho itsoela molemo’? (Esaia 48:17, NW) Na ha a tšepise hore ‘a ke ke a lumela hore re hlaheloe ke moleko o ka re sitang’? (1 Ba-Korinthe 10:13) Ka ho utloahalang, he, ha a re bolella hore re se ke ra kena jokong e le ’ngoe le ba sa lumelang, o tlameha a be a re hopoletse se molemohali! Nahana kamoo temoso ena e leng pontšo ea tlhokomelo e lerato ea hae ho rōna.

9. (a) Pauluse o fana ka temoso efe khahlanong le ho thea ha Mokreste tlamahano e haufi le ea sa lumelang? (b) Ke eng se boleloang ke lentsoe la Segerike le fetoletsoeng e le “tumellano,” hona le bontša joang bothata bo hlahang ha Mokreste a ikenya jokong e le ’ngoe le ea sa lumelang?

⁹ ’Mōpi o ne a reretse lenyalo hore le thee tlamahano e haufi-ufi pakeng tsa batho, monna le mosali ba fetoha “nama e le ’ngoe.” (Genese 2:24) Na ke bohlale ho Mokreste hore a thee tlamahano e haufi hakaalo le ea sa lumelang? Pauluse o arabela ka ho phahamisa letoto la lipotso tse phenyang maikutlo, tseo ho e ’ngoe le e ’ngoe ea tsona ho lebelletsoeng karabelo e hananang le taba e botsoang: “Hobane ho loka le ho hloka molao li na le botsoalle bofe? Kapa leseli le na le kabelo efe le lefifi? Ho feta moo, ho na le tumellano [sym·phoʹne·sis, ka Segerike] efe pakeng tsa Kreste le Beliale [Satane]? Kapa motho ea tšepahalang o na le kabelo efe le ea sa lumelang?” (2 Ba-Korinthe 6:14, 15, NW) Lentsoe la Segerike sym·phoʹne·sis le hlile le bolela “molumo o lumellanang” (ho tsoa ho syn, “le,” le pho·neʹ, “molumo”) Le supa tumellano e hlahisoang ke liletsa tsa ’mino. Kamoo ho ka lebelloang, ha ho na tumellano pakeng tsa Kreste le Satane. Ka ho tšoanang, jokong e sa lekaneng, ho thata haholo bakeng sa monna le mosali hore ba ‘otle linoto tse tšoanang.’ Ba tšoana le liletsa tse peli tsa ’mino tse sa lumellaneng, tse hlahisang melumo e sa nyalaneng ho fapana le ’mino.

10. Metsoako ea bohlokoa ke efe lenyalong le thabileng, ’me ke melemo efe e teng ha joko e lekana?

¹⁰ Ke joang, he, motho oa moea a ka thabelang tumellano e felletseng le motho oa nama? (1 Ba-Korinthe 2:14) Litumelo, melao-motheo, le lipakane tse tšoanang, ke metsoako ea bohlokoa lenyalong le thabileng. Ha ho letho le matlafatsang lenyalo ho feta boinehelo bo kopanetsoeng hammoho ho ’Mōpi. Moo ho nang le joko e lekanang, monna le mosali ba ka khothatsana borapeling. Ka bobeli ba ka sheba Mangolong ho rarolla liphapang tsa bona. Ka baka leo, na ha hoa hlaka hore e be Jehova o re bolella hore re se ke ra ikenya jokong le ba sa lumelang hobane a batla hore re thabele tlamahano e haufi-ufi e ka khonehang le balekane ba rōna ba lenyalo?

11. Ke hobane’ng ha ho ne ho thibeloa lilekane tsa lenyalo le bao e seng barapeli Iseraeleng, ’me ke potso efe e phenyang maikutlo e phahamisoang?

¹¹ Ho ela hloko temoso ea Bibele ho boetse ho re qobisa liphello tse bohloko tse atisang ho hlaha ha Mokreste a ikenya jokong le ea sa lumelang. Ka mohlala, ho na le kotsi ea hore ea sa lumelang o tla furallisa molekane oa Mokreste hore a se ke a sebeletsa Jehova. Nahana ka temoso ea Jehova ho Iseraele ea boholo-holo. Lilekane tsa manyalo le bao e neng e se barapeli li ne li haneloa. Hobane’ng? Jehova o ile a lemosa: “Hobane bara ba hao ba ka khelosoa ke bona, hore ba ntlohele, ’me ba sebeletse melimo esele.” (Deuteronoma 7:3, 4) Ha a talimane le khanyetso e tsoang ho molekane ea sa lumelang, ho ka ’na ha e-ba le tšekamelo ea ho khelohela nthong efe kapa efe e sekisetsang. Ho bonolo ho nahana, ‘ho ke ke ha etsahala ho ’na!’ Empa ho ile ha etsahalla monna ea bohlale joaloka Salomone. Na ho tšoanang ho ke ke ha u etsahalla?—1 Marena 11:1-6; bapisa le 1 Marena 4:29, 30.

12. Ke joang molao oa Molimo o neng o thibela manyalo le bajaki, o neng o sebeletsa joaloka tšireletso ho Baiseraele? Bontša.

¹² Le haeba molumeli a sa furallisoe borapeli ba ’nete, ho sa ntsane ho e-na le mathata le likhatello tse amanang hangata le lelapa le arohaneng bolumeling. Nahana hape ka molao oa Molimo ho Iseraele. A re re ngoanana oa Moiseraele o ne a ile a lumela ho nyaloa ke monna oa Mokanana. A tloaetse mekhoa ea likamano tsa botona le botšehali e neng e tloaelehile naheng ea Kanana, o ne a ka ba le tlhompho efe bakeng sa molao oa Molimo oa ngoanana eo? Ka mohlala, na o ne a tla utloisisa ho tlohela likamano tsa botona le botšehali nakong ea ha mosali a iletse khoeli, joalokaha Molao oa Moshe o ne o hloka?c (Levitike 18:19; 20:18; bapisa le Levitike 18:27.) Tabeng ea monna oa Moiseraele ea neng a nyala ngoanana oa Mokanana, o ne a tla mo tšehetsa hakae ha a nka leeto ho ea Jerusalema hararo selemo se seng le se seng ho ea ba teng meketeng e neng e behetsoe linako? (Deuteronoma 16:16) Ka ho totobetseng, molao oa Molimo o neng o hanela manyalo a joalo o ne o sebeletsa e le tšireletso bakeng sa Baiseraele.

13. (a) Ke hobane’ng ha motho oa lefatše a sena letsoalo la Bokreste le koetlisitsoeng ka Bibele? (b) Ke likhatello life le mathata tseo ba bang ba talimaneng le tsona ka malapeng a arohaneng bolumeling?

¹³ Kajeno teng ho thoe’ng? Litekanyetso tsa boitšoaro tsa batho ba lefatše li fapane hōle haholo le tsa Bibele. Ho sa tsotellehe hore na batho ba bang ba lefatše ba bonahala ba hlompheha hakae, ha ba na letsoalo le koetlisitsoeng ka Bibele la Bokreste. Ha baa qeta lilemo ba ithuta Lentsoe la Molimo, ‘ba nchafatsa likelello tsa bona’ le ho ‘hlobola botho ba khale.’ (Ba-Roma 12:2, NW; Ba-Kolosse 3:9, TLP) Kahoo, Mokreste ea ikenyang jokong e le ’ngoe le ea sa lumelang hangata o ipepesetsa masisa-pelo le mahlomola a mangata. Ba bang ba talimane le khatello e sa khaotseng ho kopanela mekhoeng e nyelisehang ea likamano tsa botona le botšehali kapa ho keteka matsatsi a phomolo a lefatše. ’Me ba bang ba bile ba belaela ka bolutu. Joalokaha khaitseli e mong a ile a ngola: “Bolutu boo u bo utloang ha u nyalane le e mong ea sa rateng Jehova ke bolutu bo bobe ka ho fetisisa boo u ka bo nahanang. Taba ke hore, ha ho eo u kopanelang ’nete le eena, hoo e leng ntho ea bohlokoahali bophelong ba hao.”

14. (a) Lelapeng le arohaneng, ke hobane’ng ha ho le thata ho hōlisetsa bana ‘khalemelong le kelellong e laoloang ke Jehova’? (b) Phello e ka ’na ea e-ba efe baneng lelapeng le arohaneng?

¹⁴ Lapeng le arohaneng, ho ka ba thata haholo ho hōlisetsa bana ‘khalemelong le kelellong e laoloang ke Jehova.’ (Ba-Efese 6:4, NW) Ka mohlala, na ea sa lumelang o tla utloisisa ho lumella bana ho ba teng libokeng kapa ho kopanela tšebeletsong ea tšimo? Hangata bana ba qetella ba ferekane kamehong ea bona e mofuthu—ba rata batsoali ka bobeli, empa ke motsoali a le mong feela ea ratang Jehova. Khaitseli e mong ea ileng a nyalana le ea sa lumelang o re: “Ke bile har’a masisa-pelo a mangata nakong ea lenyalo la ka la lilemo tse 20. Bara ba ka ba hōtse ba le ka har’a morusu o moholo ’me ba ferekane maikutlong ’me hona joale ke karolo ea lefatše. Morali oa ka o khopeha khafetsa ka hore a be sieo ho ’na hangata ka lebaka la litokelo tseo ntat’ae a li filoeng tsa hore a mo etele. Mathata ana ’ohle a teng hobane ha ke le lilemo li 18, ke ile ka ikhethela ho hlokomoloha o mong oa melao-motheo ea Jehova.” Molao-motheo ofe? Le se ikenye jokong e le ’ngoe le ba sa lumelang!

15. Ke hobane’ng ha Jehova a re eletsa hore re se ke ra ikenya jokong e le ’ngoe le ba sa lumelang?

¹⁵ Ka ho hlakileng, Jehova o batla hore re fumane ho hongata haholo bophelong. Seo a re kōpang sona, ho akarelletsa keletso ea hae ea hore re se kene jokong e le ’ngoe le ba sa lumelang, se molemong oa rōna. (Deuteronoma 10:12, 13) Ho nyalana le ea sa lumelang ke ho hlokomoloha keletso ea Mangolo, bohlale bo sebetsang, le phihlelo e atisang ho ba bohloko ea ba bang.

Lipotso Tseo ho Tloaelehileng Hore li Botsoe

16, 17. (a) Haeba re se hlokolosi, maikutlo a ka ’na a sitisa monahano o hlaphohileng joang? (b) Na keletso ea Molimo e lokela ho hlokomolohuoa ka lebaka la maemo a ikhethang ao ho oona Mokreste a ileng a nyalana le ea sa lumelang ’me hona joale ka bobeli ba sebeletsa Jehova? Hlalosa.

¹⁶ Leha ho le joalo, haeba re se hlokolosi, maikutlo a ka sitisa monahano o hlaphohileng hantle. Re ka ’na ra qala ho ikutloa hore ho ka ’na ha etsoa mokhelo tabeng ea rōna. Nahana tse ling tsa lipotso tseo ho tloaelehileng haholo hore li botsoe.

¹⁷ Ho thoe’ng ka maemo ao ho ’ona moena kapa khaitseli a ileng a nyalana le ea sa lumelang, ’me hona joale ka bobeli ba sebeletsa Jehova? Ho ntse ho le joalo, melao-motheo ea Jehova e ile ea tlōloa. Na qetello e lokafatsa qaleho ea taba? Se bontšang pono ea Molimo ka ba hlokomolohang keletso ea hae ke taba ea Bajode ba neng ba khutla botlamuoeng Babylona. Ha ba bang ba nka basali ba bahetene, bangoli ba Bibele Esdrase le Nehemia ha baa ka ba qenehela letho ha ba nyatsa liketso tsa bona. Bajode bao ba ne ba ‘entse ka ho hloka botšepehi,’ ba entse “bobe bo boholo,” ’me ba ipokelletse “molato.” (Esdrase 10:10-14; NW; Nehemia 13:27, NW) Ntho e ’ngoe hape e ka nahanoang: Ha re hlokomoloha keletso ea Molimo, re ka ’na ra intša kotsi moeeng, re ntša matsoalo a rōna kotsi. Khaitseli e mong eo monna oa hae ea neng a sa lumela a ileng a qetella a fetohile molumeli o itse: ‘Ke sa ntsane ke sebetsana le maqeba a maikutlo. Ke sitoa ho u bolella hore na ke ikutloa habohloko hakaakang ha ba bang ba re supa ’me ba re, “Empa bona ba ile ba atleha.”’

18. Tsela e bohlale ke efe haeba u hoheloa ke e mong ea e-song ho kolobetsoe, ’me ka hoo u tla be u bontša eng?

¹⁸ Ho thoe’ng haeba u hoheloa ke e mong ea ithutang Bibele ’me a e-ba teng libokeng, le hoja a e-s’o kolobetsoe? Re thabela ha e mong a bontša thahasello ’neteng ea Bibele. Leha ho le joalo, potso ke ena: Na u lokela ho phehella tšekamelo ea hao? Ka ho toba, tsela e bohlale ke ho ema nako e itseng ho fihlela ka mor’a hore motsoalle oa hao a kolobetsoe le hore a etse tsoelo-pele ho bontša litholoana tsa moea oa Molimo pele u laetsana le eena. (Ba-Galata 5:22, 23) Ho ka ’na ha se ke ha e-ba bonolo ho sebelisa keletso e joalo, empa ka ho etsa joalo u tla bontša boinehelo melao-motheong ea Bibele; hona ho tla rala motheo o motle bakeng sa thabo ea ’nete lenyalong. Haeba kannete motsoalle oa hao a u tsotella ’me kannete a tla rata Jehova, ha ho pelaelo hore o tla utloisisa ho ema ho fihlela ha lōna ka bobeli le le “Moreneng”—le inehetse ’me le kolobelitsoe—pele le ferehana. Hape, hopola hore lerato la ’nete ha le senngoe ke ho feta ha nako.—1 Ba-Korinthe 7:39; Genese 29:20.

19. Ke eng eo u lokelang ho e hopola haeba u e-na le bothata ba ho fumana molekane oa lenyalo har’a balumeli-moho le uena?

¹⁹ Ho thoe’ng haeba u thatafalloa ke ho fumana molekane ea tšoanelehang oa lenyalo har’a balumeli ’moho? Khaitseli e mong o ile a re, “ke lilemo li 26, ke lesooa, ’me ka sebele ke jeoa ke bolutu.” Ke ’nete, ho ba lesooa ho ka ’na ha e-ba thata ho uena, empa mathata a tlisoang ke ho ikenya jokong e sa lekaneng ea lenyalo a ka ba thata le ho feta moo! Ho mamela keletso ea Molimo ho ka ’na ha hloka tumelo, boitšoaro, le mamello, empa kholiseha hore Jehova o tseba se molemohali bakeng sa hao e bile o u lakaletsa sona. (1 Petrose 5:6, 7) Rapella taba ena, e be joale u letela Jehova. (Pesaleme ea 55:22) Tsamaisong ena ea lintho, ha ho na ea nang le bophelo bo khotsofatsang ka ho felletseng. Pelo ea hao e ka ’na ea laba-labela molekane. Ba bang, leha ho le joalo, ba na le a bona mathata, ao a mang a ’ona a ke keng a phekoleha tsamaisong ena. Ke lefatšeng le lecha le tlang feela moo ‘takatso ea ntho e ’ngoe le e ’ngoe e phelang’ e tla khotsofatsoa ka ho felletseng.—Pesaleme ea 145:16, NW.

20. Khaitseli e mong oa lesooa o ile a hlalosa boikemisetso ba hae joang, ’me ka ho ba le boikemisetso bo tšoanang u ka ba le khotsofalo efe?

²⁰ Ho sa le joalo, ikemisetse hore u ke ke ua ikenya jokong le ea sa lumelang. Khaitseli e mong ea lilemo li 36 o ile a hlalosa boikemisetso ba hae ka tsela ena: “Ke rapela Jehova letsatsi le leng le le leng bakeng sa molekane oa lenyalo. Ha ke na takatso ea ho sheba ka ntle ho mokhatlo o hlophisitsoeng oa Jehova, empa likeko li ntse li le teng. Khabareng, ke lokisetsa ho sebeletsa litšoanelehong tse tla nketsa hore ke ntlafatse botho ba ka e le hore nka ba mofuta oa mosali oa moea eo monna oa moea a ntseng a mo batla.” Na le uena u ikemiselitse ka ho tšoanang? Haeba ho joalo, u ka ba le khotsofalo e tlisoang ke ho paka botšepehi ba hao ho Molimo oa toka ea bomolimo.—Pesaleme ea 37:27, 28.

[Mongolo o botlaaseng ba leqephe]

Na u ka Hlalosa?

◻ Bibele e lemosa joang khahlanong le ho thea kamano e haufi le ba sa lumelang?

◻ Ke hobane’ng ha Bakreste ba bang ba inehetseng ba sheba ka ntle ho phutheho bakeng sa balekane ba lenyalo?

◻ Ke joang temoso ea Jehova ka joko e lekaneng e hlileng e leng pontšo ea tlhokomelo ea hae e lerato ho rōna?

◻ Ke lipotso life tseo ho tloaelehileng hore li botsoe ka ho fumana molekane, ’me u ka li arabela joang?