3. Ku Naon Jalma Bageur Sangsara?
Urang Kudu Nyaho Jawabanna
Urang pasti teu resep ningali jalma bageur sangsara. Aya nu mikir, mun sarua sangsara mah, jang naon atuh jadi jalma bageur?
Pikeun Dipikirkeun
Aya nu nganggap jalma téh sangsara lantaran geus takdir. Ceuk maranéhna, kasangsaraan téh hukuman ti Gusti keur jalma-jalma nu jahat. Tapi aya ogé nu mikir, éta téh ujian iman keur nu balageur. Maranéhna nganggap ”dunya téh tempat pikeun nguji manusa”. Beuki nyaah Gusti ka saurang jalma, beuki loba ujianna. Tapi . . .
Mun kabéh geus ditakdirkeun, jang naon urang ngajaga kaséhatan jeung teu ngalakukeun hal-hal goréng?
Pan Gusti téh bageur jeung welas asih, naha bet téga nguji jalma-jalma ku kasangsaraan?
TÉANGAN LEUWIH LOBA
Tongton vidéo Ku Naon Aya Loba Kasangsaraan? dina jw.org/su.
Ceuk Kitab Suci
Kasangsaraan téh lain hukuman ti Gusti.
Justru lolobana mah datangna sok teu kasangka-sangka, misalna lantaran urang aya di tempat jeung waktu nu salah.
”Nu tarik lumpatna can tangtu meunang balap, nu kuat can tangtu unggul tarung, nu bijaksana can tangtu boga dahareun, nu pinter can tangtu beunghar, sarta nu loba kanyahona can tangtu suksés, da kabéh gé kapangaruhan ku waktu jeung kajadian nu teu kasangka-sangka.”—PANDITA 9:11, Terjemahan Dunia Baru.
Urang sangsara lantaran ngawaris dosa.
Ceuk jalma-jalma, ”dosa” téh kalakuan goréng nu dilakukeun ku saurang jalma. Tapi ceuk Kitab Suci, dosa gé bisa ngamaksudkeun hiji kaayaan nu diwariskeun ka kabéh manusa, boh ka nu bageur boh ka nu jahat.
”Ti awit dilahirkeun oge abdi teh parantos doraka, dosa ti lebet kandungan keneh.”—JABUR 51:7.
Dosa téh ngaruksak kahirupan manusa.
Éta teu ngan saukur ngaruksak hubungan urang jeung Gusti Nu Nyipta, tapi ogé ngaruksak hubungan urang jeung ciptaan Gusti nu séjénna. Dosa nyababkeun urang jeung kabéh jalma jadi sangsara pisan.
”Kuring hayang migawe anu hade, ari anu timbul dina hate ngan anu goreng.”—RUM 7:21.
”Saalam dunya humarurung ku kanyeri.”—RUM 8:22.