మత్తయి

18 ఆ సమయంలో శిష్యులు యేసు దగ్గరికి వచ్చి, “పరలోక రాజ్యంలో ఎవరు అందరికన్నా గొప్పవాడు?” అని ఆయన్ని అడిగారు. 2 అప్పుడు ఆయన ఒక చిన్న బాబును తన దగ్గరికి పిలిచి, వాళ్ల మధ్యలో నిలబెట్టి, 3 ఇలా అన్నాడు: “నేను మీతో నిజంగా చెప్తున్నాను, మీరు పరలోక రాజ్యంలోకి వెళ్లాలంటే మీ మనస్తత్వాన్ని పూర్తిగా మార్చుకొని చిన్నపిల్లల్లా మారాలి. 4 కాబట్టి ఈ చిన్న బాబులా ఎవరైతే తనను తాను తగ్గించుకుంటారో అతనే పరలోక రాజ్యంలో అందరికన్నా గొప్పవాడు. 5 ఎవరైతే నా పేరుమీద ఈ చిన్నపిల్లల్లో ఒకరిని చేర్చుకుంటారో అతను నన్ను కూడా చేర్చుకుంటాడు. 6 కానీ, నామీద విశ్వాసంగల ఈ చిన్నవాళ్లలో ఒకరు విశ్వాసం కోల్పోవడానికి* ఎవరైతే కారణమౌతారో, అతని మెడకు ఒక పెద్ద తిరుగలి రాయి* కట్టి, లోతైన సముద్రంలో పడవేయడమే అతనికి మంచిది.

7 “ప్రజలు పాపం చేయడానికి ఈ లోకం కారణమౌతుంది కాబట్టి దానికి శ్రమ! నిజమే, ఇతరులు పాపం చేయడానికి కారణమయ్యేవి తప్పకుండా వస్తాయి, అయితే అవి ఎవరి ద్వారా వస్తాయో ఆ మనిషికి శ్రమ! 8 కాబట్టి నీ చేయిగానీ కాలుగానీ నువ్వు పాపం చేయడానికి కారణమౌతుంటే,* దాన్ని నరికేసి నీ నుండి దూరంగా పడేయి. రెండు చేతులతో లేదా రెండు కాళ్లతో నిత్యాగ్నిలో* పడవేయబడడం కన్నా వికలాంగుడిగా లేదా కుంటివాడిగా జీవాన్ని దక్కించుకోవడం నీకు మంచిది. 9 అంతేకాదు, ఒకవేళ నీ కన్ను నువ్వు పాపం చేయడానికి కారణమౌతుంటే,* దాన్ని పీకేసి నీ నుండి దూరంగా పడేయి. నువ్వు రెండు కళ్లతో, మండే గెహెన్నాలో* పడవేయబడడం కన్నా ఒక కన్నుతో జీవాన్ని పొందడం నీకు మంచిది. 10 మీరు ఈ చిన్నవాళ్లలో ఏ ఒక్కర్నీ చిన్నచూపు చూడకుండా జాగ్రత్తపడండి. ఎందుకంటే నేను మీతో చెప్తున్నాను, పరలోకంలోవున్న వాళ్ల దూతలు పరలోకంలో ఉన్న నా తండ్రి ముఖాన్ని ఎప్పుడూ చూస్తుంటారు. 11 *——

12 “మీకేమనిపిస్తుంది? ఒక మనిషికి 100 గొర్రెలు ఉండి వాటిలో ఒకటి తప్పిపోతే, అతను మిగతా 99 గొర్రెల్ని కొండలమీద విడిచిపెట్టి తప్పిపోయిన గొర్రెను వెదకడానికి వెళ్లడా? 13 అది దొరికితే, తప్పిపోని 99 గొర్రెల విషయంలో కన్నా ఆ గొర్రె విషయంలో అతను ఎక్కువ సంతోషిస్తాడని మీతో ఖచ్చితంగా చెప్తున్నాను. 14 అలాగే, ఈ చిన్నవాళ్లలో ఒక్కరు కూడా నాశనం అవ్వడం పరలోకంలో ఉన్న నా* తండ్రికి ఇష్టంలేదు.

15 “నీ సోదరుడు నీ విషయంలో ఏదైనా పాపం చేస్తే, మీరిద్దరు మాత్రమే ఉన్నప్పుడు వెళ్లి అతని తప్పును అతనికి తెలియజేయి.* అతను నీ మాట వింటే, నువ్వు నీ సోదరుణ్ణి సంపాదించుకున్నట్టే. 16 కానీ అతను నీ మాట వినకపోతే, నీతోపాటు ఒకరిద్దర్ని తీసుకెళ్లు. అలా ఇద్దరు లేదా ముగ్గురు సాక్షుల సాక్ష్యం వల్ల* ప్రతీ విషయం స్థిరపర్చబడుతుంది. 17 అతను వాళ్ల మాట వినకపోతే, సంఘానికి ఆ విషయం తెలియజేయి. అతను సంఘం మాట కూడా వినకపోతే అన్యుడిని, పన్ను వసూలుచేసేవాడిని ఎంచినట్లే అతన్ని ఎంచు.

18 “నేను మీతో నిజంగా చెప్తున్నాను, మీరు భూమ్మీద వేటినైనా బంధిస్తే అవి అప్పటికే పరలోకంలో బంధించబడి ఉంటాయి; అలాగే మీరు భూమ్మీద వేటినైనా విప్పితే అవి అప్పటికే పరలోకంలో విప్పబడి ఉంటాయి. 19 నేను మీతో నిజంగా ఇంకో మాట చెప్తున్నాను. భూమ్మీద మీలో ఇద్దరు కలిసి ఒక ప్రాముఖ్యమైన విషయం గురించి ప్రార్థించాలని ఒక నిర్ణయానికి వస్తే, నా పరలోక తండ్రి దాన్ని వాళ్లకు దయచేస్తాడు. 20 ఎందుకంటే, నా పేరుమీద ఇద్దరు ముగ్గురు ఎక్కడ కలుసుకుంటారో అక్కడ వాళ్ల మధ్య నేను ఉంటాను.”

21 అప్పుడు పేతురు యేసు దగ్గరికి వచ్చి ఆయన్ని ఇలా అడిగాడు: “ప్రభువా, నా సోదరుడు నా విషయంలో పాపం చేస్తే నేను ఎన్నిసార్లు అతన్ని క్షమించాలి? ఏడుసార్లా?” 22 అందుకు యేసు అతనితో ఇలా అన్నాడు: “నేను నీతో చెప్తున్నాను ఏడు సార్లు కాదు, 77 సార్లు.

23 “అందుకే, పరలోక రాజ్యాన్ని తన దాసుల్ని లెక్క అప్పజెప్పమని అడిగిన ఒక రాజుతో పోల్చవచ్చు. 24 అతను లెక్క చూసుకోవడం మొదలుపెట్టినప్పుడు, అతనికి 10,000 తలాంతులు* అప్పు ఉన్న ఒక దాసుణ్ణి అతని దగ్గరికి తీసుకొచ్చారు. 25 అయితే ఆ అప్పు తీర్చే స్తోమత ఆ దాసుడికి లేకపోవడంతో అతన్ని, అతని భార్యని, అతని పిల్లల్ని, అలాగే అతని దగ్గర ఉన్నదంతా అమ్మి ఆ అప్పును తీర్చమని రాజు ఆజ్ఞాపించాడు. 26 దాంతో ఆ దాసుడు కిందపడి రాజుకు సాష్టాంగ* నమస్కారం చేసి, ‘నాకు సమయం ఇవ్వు, నేను మొత్తం తీర్చేస్తాను’ అన్నాడు. 27 అది చూసి రాజు జాలిపడి, ఆ దాసుడిని వెళ్లనిచ్చాడు, అంతేకాదు అతని అప్పును రద్దు చేశాడు. 28 అయితే ఆ దాసుడు బయటికి వెళ్లి తనకు 100 దేనారాలు* అప్పు ఉన్న తోటి దాసుణ్ణి చూసి, అతన్ని పట్టుకుని గొంతు పిసుకుతూ, ‘నా అప్పు మొత్తం తీర్చేయి’ అన్నాడు. 29 దాంతో ఆ తోటి దాసుడు అతని ముందు మోకరించి, ‘నాకు సమయం ఇవ్వు, నేను అప్పు తీర్చేస్తాను’ అని అతన్ని బ్రతిమాలడం మొదలుపెట్టాడు. 30 కానీ దానికి ఒప్పుకోకుండా అతను వెళ్లి, తన అప్పు తీర్చేంతవరకు ఆ దాసుడిని చెరసాలలో వేయించాడు. 31 జరిగింది చూసినప్పుడు తోటి దాసులు చాలా బాధపడి, రాజు దగ్గరికి వెళ్లి జరిగిన విషయాలన్నీ చెప్పారు. 32 అప్పుడు ఆ రాజు అతన్ని పిలిపించి ఇలా అన్నాడు: ‘చెడ్డ దాసుడా, నువ్వు నన్ను బ్రతిమాలినప్పుడు నేను నీ అప్పంతా రద్దు చేశాను. 33 నేను నీమీద కరుణ చూపించినట్టే, నువ్వు కూడా నీ తోటి దాసుడి మీద కరుణ చూపించాలి కదా?’ 34 దాంతో ఆ రాజుకు చాలా కోపం వచ్చి, అప్పంతా తీర్చేవరకు అతన్ని చెరసాల భటులకు అప్పగించాడు. 35 మీలో ప్రతీ ఒక్కరు మీ సోదరుణ్ణి మనస్ఫూర్తిగా క్షమించకపోతే నా పరలోక తండ్రి కూడా మీతో అలాగే వ్యవహరిస్తాడు.”