1 Mbakorinte

15 Hegen yô, anmgbianev, m ngu umbur ne kwagh u loho u yange m pase ne, shi ne ngohol u, shi ne lu suen u kpaa la. 2 Ka sha u je ne kpa i lu yiman ne ye, aluer ne za hemen u lun a jighjigh u nan taveraa sha loho u dedoo shon u yange m ôr ne la yô, saa jighjigh u nan wen la una̱ lu u gbilinigh di je.

3 Gadia ken akaa a hiihii a yange m tese ne la, m ôr ne kwagh u mo kpa i tesem yô, mer Kristu yange kpe sha ci u asorabo ase, er Ruamabera kaa nahan; 4 i ii un, shi i nder un shin ku sha iyange i sha utar la, er Ruamabera kaa nahan; 5 a ande hen Sifa,* maa shi a ande hen Mbapuekaruhar mbara. 6 Anden hen mban kera yô, shi a ande hen anmgbianev mba hemban 500 hen shighe môm; ve mbagen kpishi mba a vese imôngo her, kpa mbagenev yô, kera mba uma hegen ga. 7 Anden hen a ve kera yô, shi a ande hen Yakobu, maa shi a ande hen mbaapostoli cii. 8 U masen yô, mo kpa a ande hen a mo. Sha nahan yô, m ngu inja er ka wan u i mar nan kôugh nahan.

9 Gadia m hemba gban ijime ken mbaapostoli cii, m kuma u a yilam ér apostoli ga, sha ci u yange m tôv tiônnongo u Aôndo a ican. 10 Kpa Aôndo tesem erdoo u sha mhôôn ve m lu kwagh u m lu ne ye. Shi erdoo u sha mhôôn u a tesem la saa ishe ga, kpa m hemba eren tom a ve cii; nahan kpa lu sha tahav av ga, lu sha erdoo u sha mhôôn u Aôndo, u a lu a mo la. 11 Sha nahan yô, a̱ lu mo shin ve kpaa, ka gbenda ne se pasen kwagh u u ye, man ka gbenda shon kpaa ne ne u jighjigh ye.

12 Nahan aluer mba pasen ér i nder Kristu shin ku yô, er nan mbagenev ken a ven ve kaan ér mba va nderen mbakpenev shin ku ga? 13 Aluer mimi je mba nderen mbakpenev shin ku ga yô, Kristu kpa i nder un shin ku ga. 14 Kpa aluer i nder Kristu shin ku ga yô, mimi je kwagh u se pasen la ka gbilinkwagh, shi jighjigh u nan wen kpaa ka gbilinkwagh. 15 Heela tseegh ga, shi á nenge ér se mba eren shiada u aiegh sha kwagh u Aôndo, sha ci u ka se kaa ser yange nder Kristu shin ku, man a nder un ga, aluer mimi je mba nderen mbakpenev shin ku ga yô. 16 Gadia aluer ka u a nder mbakpenev shin ku ga yô, Kristu kpa i nder un shin ku ga. 17 Shi aluer i nder Kristu shin ku ga yô, jighjigh u nan wen la ka gbilinkwagh; asorabo a en nga ne her. 18 Nahan mba ve kpe ken Kristu la kpaa ve tim kera je ve. 19 Aluer ishimaverenkeghen yase sha Kristu saa sha uma u hegen ne tseegh yô, se hemba kôron kunya a hanma orgen cii.

20 Kpa i nder Kristu shin ku, ngu iyiagh ki i hii sundan yô,* ken mba ve kpe la. 21 Gadia er lu or môm nan na ku va yô, shi ka sha or môm a nder ior shin ku ye. 22 Gadia er i lu Adam a ne ior cii ve lu kpen yô, ka sha Kristu di ior vea hide a lu uma ye. 23 Kpa hanma or sha shighe u nan, sha adondo adondo: Hiihii ka Kristu, u a lu iyiagh ki i hii sundan la, maa mba ve lu kwagh u Kristu la; a nder ve sha shighe u una lu vea ve imôngo la. 24 Ken masejime yô, a lu mkur, shighe u una gema Tartor una na Aôndo na man Ter na, zum u una tim hanma gomoti man hanma hemen kua tahav cii kera la. 25 Gadia gba keng u una tema tor zan zan Aôndo una kar nan un tahav mbu hemban mbahyomov cii.* 26 Man orhyom u a va mase timin kera yô, ka ku. 27 Gadia Aôndo “gema akaa cii wa sha ikyev na.”* Kpa er i kaa ér, ‘i gema akaa cii i wa sha ikyev na’ yô, tese wang ér akaa la wa Un u a we akaa cii sha ikyev na la ker ga. 28 Kpa zum u a va gema akaa cii a wa sha ikyev i Wan la, Wan di una gema iyol na una wa sha ikyev i Un u a gem akaa cii a we sha ikyev na la, sha er Aôndo una lu ityough sha akaa cii yô.

29 Aluer ka u a nder mbakpenev ga yô, mba i lu eren ve batisema sha u ve̱ kpe la vea er nena? Aluer ka u a nder mbakpenev ga kuaa yô, ityôkyaa i ve kpa i lu eren ve imba batisema la yô ka nyi? 30 Ityôkyaa i ka se ver uma wase sha zongo hanma shighe* yô ka nyi? 31 Ka m tagher ishigh a ku hanma iyange. Man kwagh ne ka mimi, di vough er m te ihyagh sha kwagh wen, ne mba ne lu anmgbianev av mba ken Kristu Yesu Ter wase la nahan. 32 Aluer m nôngo num a inyamikyume ken Efese er mbagenev nahan* yô, kam a inja sha nyi? Aluer mba va nderen mbakpenev shin ku ga yô, “se gbaa yan kwagh shi man kwagh tsô, gadia se mba va kpen.” 33 I de tsughun ne ga. Ujende mba bov mba vihin aeren* a dedoo. 34 Nder lu nen tsevaa sha kwagh u perapera, de eren nen isholibo ga, gadia mbagenev mba a mfe u Aôndo ga. M ngu ôron kwagh ne sha u kunya u kôr ne a ayol a en.

35 Nahan kpa, orgen nana pine ér: “Ka u a va nder mbakpenev nena? Man ka iyol i nyi vea lu a mini?” 36 We or u kaven kwagh ga! Ka wea lôô kwagh yô, ze hemen u lun uma ga, saa ka a hii kpen. 37 Man kwagh shon u u lee la, u lôô ka iyol i una mende ve una lu a mi la ga, kpa ka ishange kwagh di tsô, a̱ lu ishange i alakema shin ishange i ma kwagh ugen kpaa; 38 kpa Aôndo ka a na un iyol er a nenge i doo un la, shi ka a na hanma ishange kwagh iyol i ia mende ve ia lu a mi yô. 39 Iyol* cii ngi inja i môm ga, iyol i uumace ngi kposo, i zendenya ngi kposo, i inyon ngi kposo, shi iyol i ishu kpa ngi kposo. 40 Akaa a sha nga a iyol i a, shi akaa a shin tar kpa nga a iyol i a; kpa iengem i akaa a sha ngi kposo a iengem i akaa a shin tar. 41 Iengem i iyange ngi kposo, iengem i uwer kpa ngi kposo, shi iengem i asan ngi kposo; jighilii yô, hanma ishan ngi a iengem i i kposo.

42 Kape kwagh u mnder u shin ku kpa a lu je la. Ka i ii* iyol i i hôôn ne, kpa i gema i nder iyol i i hôôn ga la. 43 Ka i ii* iyol ken mlu u kunya, kpa i gema i nder i ken mlu u icivirigh. Ka i ii* iyol ken mlu u gban kera, kpa i gema i nder i ken mlu u utaha. 44 Ka i ii* iyol i inyam man awambe, i gema i nder i ken iyol i jijingi. Aluer iyol i inyam man awambe ngi yô, iyol i jijingi kpa ngi. 45 Kape i nger je la, ér: “Adam, or u hiihii la, yange hingir oruma.” Adam u masetyô la hingir jijingi u nan or uma. 46 Nahan kpa, kwagh u ken jijingi la ka u hiihii ga. Ka kwagh u ken iyol i inyam man awambe la a lu u hiihii ye, maa dondo kwagh u ken jijingi la. 47 Or u hiihii la due shin tar, i er un sha inya; or u sha uhar la due ka sha. 48 Er un u i er un sha inya la lu nahan, kape mba i er ve sha inya la ve lu je la; man er un u a dugh sha la a lu nahan, kape mba ve lu sha la kpa ve lu je la. 49 Man er se lu ibyeen i un u yange i er un sha inya la yô, kape se va lu ibyeen i un u a dugh sha la kpaa je la.

50 Kpa me ôr ne, anmgbianev, iyol i inyam man awambe ia fatyô u yan dyako u Tartor u Aôndo ga, kwagh u a hôôn ne kpaa una fatyô u yan dyako u kwagh u a hôôn ga la ga. 51 Nenge! Ka icighan kwaghmyer m lu ôron ne ye: A lu se cii se kpe ga, kpa se cii a va gema se 52 fele, er or ka nan pelegh ishe nahan, sha shighe u a mase tôngon busa la. Gadia busa ua gba imo, maa a nder mba ve kpe la ken iyol i i hôôn ga la, shi a gema se. 53 Gadia gba keng u kwagh u a hôôn ne una hingir kwagh u a hôôn ga la, shi gba keng u kwagh u a kpen ne una hingir kwagh u a kpen ga la. 54 Kpa zum u kwagh u a hôôn ne una hingir kwagh u a hôôn ga, shi kwagh u a kpen ne una hingir kwagh u a kpen ga la, mkaanem ma i nger ne ma a kure vough, ér: “I tim ku, ua kera lu ga gbem sha won.” 55 “Ku, mhembe wou shi ngu hana? Ku, soho wou shi ngu hana?” 56 Soho u u ne ku la, ka isholibo; tahav mbu isholibo gema ka Atindi.* 57 Kpa i̱ wuese Aôndo, gadia ne se mhembe ken Ter wase Yesu Kristu!

58 Sha nahan yô, anmgbianev av mba doon mo ishima, tile nen dông, de tenger nen ga, luun nen a akaa a eren kpishi ken tom u Ter, gadia ne fa, ken Ter yô, ka gbilintom ne eren ga.