Ki he Kau Kalētia

5 Ko ia ai, mou hoko ko e kau faʻifaʻitaki ki he ʻOtuá,+ ʻi he tuʻunga ko ʻene fānau ʻofeina, 2 pea hokohoko atu ʻa e ʻaʻeva ʻi he ʻofá,+ ʻo hangē tofu pē ko e Kalaisí naʻá ne ʻofaʻi foki kitautolu*+ peá ne foaki ʻa ia tonu maʻatautolu* ko ha feilaulau namu-kakala ki he ʻOtuá.+

3 Ko e fehokotaki fakasino taʻetāú* mo e faʻahinga kotoa pē ʻo e taʻemaʻá pe mānumanú, tuku ke ʻoua naʻa fai ha talanoa ki ai ʻi homou lotolotongá,+ ʻo hangē tofu pē ko ia ʻoku totonu ki he kakai māʻoniʻoní;+ 4 pehē foki ki he tōʻonga fakamā pe talanoa launoa pe fakakata fakalielia+—ko e ngaahi meʻa ʻoku taʻefeʻunga—ka ke mou fai ha fakafetaʻi.+ 5 He ʻoku mou ʻiloʻi ʻa e meʻá ni, ʻo mahino kiate kimoutolu, ʻoku ʻikai ha tokotaha fehokotaki fakasino taʻetaau*+ pe ko ha tokotaha taʻemaʻa pe ko ha tokotaha mānumanu,+ ʻa ia ʻoku ʻuhingá ko ha tokotaha tauhi ʻaitoli, ʻe ʻi ai hano tofiʻa ʻi he Puleʻanga ʻo e Kalaisí mo e ʻOtuá.+

6 Tuku ke ʻoua naʻa kākaaʻi kimoutolu ʻe ha tangata ʻaki ha ngaahi lea ko e koto launoa, koeʻuhi ko e ngaahi meʻa peheé ʻoku hoko mai ai ʻa e houhau ʻa e ʻOtuá ki he ngaahi foha ʻo e talangataʻá. 7 Ko ia ai, ʻoua te mou kau fakataha mo kinautolu; 8 he ko kimoutolú ko e koto fakapoʻuli ki muʻa, ka ko e koto maama he taimí ni+ ʻi he fekauʻaki mo e ʻEikí.+ Hokohoko atu ʻa e ʻaʻeva ʻi he tuʻunga ko e fānau ʻo e māmá, 9 he ko e fua ʻo e māmá ʻoku ʻi ai ʻa e faʻahinga kotoa pē ʻo e leleí mo e māʻoniʻoní mo e moʻoní.+ 10 Hanganaki fakapapauʻi ʻa e meʻa ʻoku fakahōifua+ ki he ʻEikí; 11 pea tuku ʻa e kau ʻi he ngaahi ngāue taʻefua ʻo e fakapoʻulí;+ ʻi hono kehé, fakaeʻa honau tuʻunga totonú. 12 He ko e ngaahi meʻa ʻoku nau fai ʻi he liló ʻoku fakamā naʻa mo ha talanoa ki ai. 13 Ko ia ko e ngaahi meʻa kotoa pē kuo fakaeʻá* ʻoku fakahaaʻi mahino mai ia ʻe he māmá, he ko e meʻa kotoa pē kuo fakahaaʻi mahino maí kuo hoko ia ʻo maama. 14 Ko ia ai, ʻoku folofolaʻaki: “ʻĀ hake, ʻa koe ʻoku mohé, pea mālanga hake mei he maté,+ pea ʻe ulo atu ʻa e Kalaisí kiate koe.”+

15 Ko ia mou mātuʻaki tokanga maʻu pē ki he anga hoʻomou laká ke ʻoua ʻe hoko ko e faʻahinga taʻefakapotopoto kae hoko ko e faʻahinga ʻoku fakapotopoto, 16 ʻo ngāue lelei taha ʻaki ho taimí,*+ koeʻuhí ʻoku fulikivanu ʻa e ngaahi ʻahó. 17 ʻI he meʻá ni, tuku ʻa e hoko ʻo taʻefakapotopotó, kae hokohoko atu ke ʻiloʻi ʻa e meʻa ʻoku finangalo ki ai ʻa Sihová.*+ 18 Pehē foki, ʻoua ʻe hoko ʻo konā ʻi he uainé,+ ʻa ia ʻoku ʻi ai ʻa e anga-fulikivanú,* kae hanganaki fakafonu ʻaki kimoutolu ʻa e laumālié. 19 Mou lea ki he tokotaha taki taha* ʻaki ʻa e ngaahi sāmé, ʻa e ngaahi fakahīkihiki ki he ʻOtuá, mo e ngaahi hiva fakalaumālié,+ ʻo hiva mo tā fasi+ ʻi homou lotó kia Sihova,*+ 20 ʻo ʻoatu maʻu pē ʻa e fakafetaʻi+ ki hotau ʻOtua mo e Tamaí koeʻuhi ko e meʻa kotoa pē ʻi he huafa ʻo hotau ʻEiki ko Sīsū Kalaisí.+

21 Mou feanganofoʻaki ʻi he manavahē+ kia Kalaisi. 22 Tuku ki he ngaahi uaifí ke nau anganofo ki honau ngaahi husepānití+ ʻo hangē pē ko ʻenau anganofo ki he ʻEikí, 23 koeʻuhí ko ha husepāniti ko e ʻulu ia ʻo hono uaifí+ ʻo hangē pē ko e Kalaisí ko e ʻulu ia ʻo e fakatahaʻangá,+ ko ha fakamoʻui ia ʻo e sinó.* 24 Ko hono moʻoní, hangē pē ko e anganofo ʻa e fakatahaʻangá ki he Kalaisí, ʻoku totonu foki ke pehē pē ʻa e ngaahi uaifí ki honau ngaahi husepānití ʻi he meʻa kotoa pē. 25 Ngaahi husepāniti, hokohoko atu hoʻomou ʻofa ki homou ngaahi uaifí,+ ʻo hangē tofu pē ko e Kalaisí naʻá ne ʻofaʻi foki ʻa e fakatahaʻangá peá ne foaki ʻa ia tonu koeʻuhi ko ia,+ 26 ke ne fakamāʻoniʻoniʻi ʻa e fakatahaʻangá, ʻo fakamaʻa ia ʻi hono fufulu ʻaki ʻa e vai ko e folofolá,+ 27 koeʻuhi ke ne ʻai ʻa e fakatahaʻangá ke lāngilangiʻia ʻi heʻene vakaí, ʻo ʻikai hano ʻila pe ha meʻa pehē ʻe taha.+ Ko hono lotó ke hoko ʻa e fakatahaʻangá ʻo māʻoniʻoni pea ʻikai hano mele.+

28 ʻI he founga tatau, ʻoku totonu ki he ngaahi husepānití ke nau ʻofa ki honau ngaahi uaifí ʻo hangē ko honau sino ʻo kinautolú. Ko ha tangata ʻoku ʻofa ʻi hono uaifí ʻokú ne ʻofa ʻiate ia tonu, 29 he ʻoku ʻikai ha tangata ʻe faifai ange peá ne fehiʻa ki hono sino* pē ʻoʻoná, ka ʻokú ne fafanga mo tauhi ia, hangē tofu pē ko ia ʻoku fai ʻe he Kalaisí ki he fakatahaʻangá, 30 koeʻuhi ko e ngaahi kupu kitautolu ʻo hono sinó.+ 31 “Ko e ʻuhinga eni ʻe tuku ange ai ʻe ha tangata ʻene tamaí mo ʻene faʻeé pea te ne pīkitai ki* hono uaifí, pea ʻe hoko ʻa e toko uá ko e kakano pē taha.”+ 32 Ko e fakalilolilo toputapu+ ko ʻení ʻoku mahuʻinga. ʻOku ou lea ʻo fekauʻaki mo Kalaisi mo e fakatahaʻangá.+ 33 Ka neongo ia, kuo pau ki he tokotaha taki taha ʻo kimoutolu ke ne ʻofa ki hono uaifí+ ʻo hangē pē ko ʻene ʻofa ʻiate iá; ʻi he tafaʻaki ʻe tahá, ʻoku totonu ki he uaifí ke ne fakaʻapaʻapa loloto ki hono husepānití.+