Mareferensiya Ya “Xibukwana Xa Mintlhanganu Ya Mahanyelo Ni Ntirho”

Mareferensiya Ya Xibukwana Xa Mintlhanganu Ya Mahanyelo Ni Ntirho

1 KU YA KA 7 KA JULHO

XUMA XI NGA KA RITO LA XIKWEMBU TIPISALEMA 57-59

Yehovha A Wonhetela Maplanu Ya Valala Va Vanhu Va Yena

“Anze Amagamu Ya Misava”

¹⁴ Stefano a chumayele mahungu ya ku tsakisa na a nga chavi nchumu nkama na a nga se dlayiwa hi valala va yena. (Min. 6:5; 7:54-60) Nkama va nga sungula ku “xanisiwa swinene” vadjondzisiwa hinkwavu na ku nga kontiwi vapostolo va hangalakile va ya Yudiya ni Samariya. Kambe leswo a swi zanga swi wu nyimisa ntirho wa ku chumayela. Filipi a ye Samariya lani a nga fika a “djondzisa hi Kreste,” naswona vanhu va vanyingi va ma yamukelile mahungu ya ku tsakisa. (Min. 8:1-8, 14, 15, 25) Handle ka leswo, Bibele li li: “Lava nga hangalaka hi mhaka ya ku hluphiwa loku nga sungula nkama Stefano a nga dlayiwa, va fambe va ya fika ni le Fenisiya, aKipra ni le Antiyokiya, kambe a va chumayela Vayuda ntsena. Kambe van’wani va vavanuna lava a va li na vona, lava a va li va Kipra ni le Kirena, va ye Antiyokiya va fika va vulavula ni vanhu lava vulavulaka Xigriki ni ku va chumayela mahungu ya ku tsakisa ya Hosi Yesu.” (Min. 11:19, 20) Ka nkama lowuyani ku xanisiwa ku yendle swaku mahungu ya ku tsakisa ya Mfumu ma ya ma hangalaka.

¹⁵ Ku yendleke swa ku fana ni ka masiku ya hina, khale ka União Soviética. Kolomuyani ka malembe ya ma 1950, Timboni ta Yehovha ta tinyingi ti hlongoliwile ka matiko ya tona ti yisiwa aSibéria, ti fika ti hangalasiwa ka tindhawu ta tinyingi. Leswo swi yendle swaku mahungu ya ku tsakisa ma chumayeliwa ka tindhawu ta tinyingi ka tiko leliyani. A swi nga ta koteka swaku Timboni ta Yehovha ta tinyingi ti kuma male ya ku yendza kolomuyani ka 10.000 wa makilometru ti ya ka tiko leli swaku ti ya chumayela mahungu ya ku tsakisa. Kambe mfumu wu ti rhumelile. Makwerhu mun’wani a te: “Hi ku famba ka nkama, tihosi ti yendle swaku swi koteka kuva vanhu va vanyingi va timbilu tatinene aSibéria va djondza ntiyiso.”

Lavetela Xuma Ka Rito La Xikwembu

Murindzi 07/23 mapaj. 18-19 mapar. 16-17

‘Tiya, U Nga Tsekatsekisiwi’

¹⁶ Nyima u tiyile. Hosi Davhida a vule swaku a a nga ta tshika ku rhandza Yehovha. Ka lisimu la yena a te: “Mbilu ya mina yi tiyile, Xikwembu xa mina.” (Pis. 57:7) Na hina hi nga nyima hi tiyile hi tshemba Yehovha hi ku helela. (Lerha Tipisalema 112:7.) Pimisa hi xikombiso xa makwerhu Bob lweyi se hi nga bula hi yena. Nkama lowu vadotori va nga mu byela swaku loko ku tshuka ku laveka ngati leswaku a hambiwa operação a yi ta va kona, a yo vhela a ku: ‘Loko mo tshuka mi lava ku ni chela ngati, ni to vhela ni famba.’ Bob a game a vula leswi: “A ni tiyiseka swaku leswo hi swona leswi a ni swi lava naswona a ni nga chavi leswi a swi ta tshuka swi yendleka.”

¹⁷ Bob a swi kotile ku tama a tiya hileswi se a a tiyendlele xiboho na a nge se ya xibelhela xa leswi a a ta swi yendla. Xa ku sungula, a a lava swaku xiboho xa yena xi tsakisa Yehovha. Xa wumbirhi, a djondzile leswi Bibele li swi vulaka ni leswi mabuku ya nhlengeletanu ma swi vulaka mayelana ni ku kwetsima ka ngati ni lisima la wutomi. Xa wunharhu, a a tiyiseka swaku ku landza minkongomiso ya Yehovha a swi li swinene ka yena. Na hina hi nga swi kota ku nyima hi tiyile ku nga na mhaka swaku hi kumana ni swikarhatu swa ku tshamisa ku yini.

8 KU YA KA 14 KA JULHO

XUMA XI NGA KA RITO LA XIKWEMBU TIPISALEMA 60-62

Yehovha Wa Hi Hlayisa, A Hi Vhikela A Tlhela A Hi Yendla Hi Tiya

Perspicaz vol. 2 paj. 1143 par. 3

Prediyu La Ku Tiya

Ndlela Ya Ku Fanekisela. Phela vanhu hinkwavu lava va lavetelaka Yehovha, va kombisa lipfumelo va tlhela va mu yingisa va vhikeliwa swinene, ku nga leswi Davhida a nga swi vula nkama a nga yimbelela a ku: “[Wena Yehovha] u ndhawu ya mina ya ku tumbela, prediyu la ku tiya leli li ni vhikelaka ka nala.” (Ps 61:3) Phela lava va twisisaka a ntlhamuselo wa vito la Yehovha, va mu tshemba va tlhela va mu nyimelela a va nge chavi nchumu hikusa “vito la Yehovha li fana ni ndhawu ya ku tiya ya ku tumbela ka yona. Lweyi wa ku lulama a tsutsuma a ya ka yona naswona wa vhikeliwa”. — Swiv 18:10; vona ni 1Sa 17:45-47.

Perspicaz vol. 2 paj. 1106 par. 1

Tende

Minkama ya yinyingi a rito leli nge “tende” a li tirhisiwa hi tindlela ta ku fanekisela. A tende la munhu a ku li ndhawu leyi a a humula ka yona a tlhela a tivhikela ka swidzedze ni swilo swin’wani swa ku fana ni swoleswo. (Gen 18:1) Hi ntolovelo loko ku vulavuliwa hi ku yamukela vapfhumba, vanhu a va titwa va hlayisekile va tlhela va hloniphiwa loko va yamukeliwa ka matende ya munhu. Hi mhaka leyo, loko buku la Nhlawutelo 7:15 li vulavula hi “xitshungu xaxikulu”, li vula swaku Xikwembu xi ‘ta gwimba tende la xona ahenhla ka vona,’ leswi swi vulaka swaku va ta hlayisiwa va tlhela va vhikeliwa. (Ps 61:3, 4) Esaya a vulavula hi malulamiselo lawa nsati wa Xikwembu ku nga Siyoni, a faneleke a ma yendlela vana va yena. A rhumiwa swaku a fanele a ‘yengetela tende la yena.’ (Esa 54:2) Leswi swi vulaka swaku a a ta yengesela ndhawu leswaku a vhikelela vana va yena.

Murindzi 15/04/02 paj. 16 par. 14

Minawu Ya Xikwembu Ya Hi Pfuna

¹⁴ Swa tsakisa ku tiva swaku minawu ya Yehovha a yi txintxi. Ka masiku ya ku karhata lawa hi hanyaka ka wona, Yehovha a fana ni ribye la ku tiya leli li kalaka li nga tsekatsekisiwi hikusa a nga na masungulu funtshi a na nga magamu. (Ps. 90:2) Phela khambi lin’wani Yehovha a vule leswi: “Hikusa hi mina Yehovha; a ni txintxi.” (Mal. 3:6) A minawu ya Yehovha leyi nga tsaliwa ka Bibele, ya tshembeka minkama hinkwayu funtshi yi hambanile ni minawu leyi vanhu va tolovelaka ku yi veka hikusa yona yi tshamela ku txintxa. (Yak. 1:17) Hi xikombiso ku ringana malembe ya manyingi, tintivi a ti vula swaku vapsali va nga tshika vana va vona va yendla xin’wani ni xin’wani lexi va xi lavaka. Kambe hi ku famba ka nkama tintivi tin’wani ti swi vonile swaku mavonelo ya tona a ma hoxile. Phela leswi swi kombisa leswaku a minawu leyi vekiwaka hi vanhu ka mhaka leyi ya txintxa minkama hinkwayu, ku fana ni nchumu lexi biwaka hi moya xi hala ni hala. Kambe a Rito la Yehovha a li txintxi. Se ku hundza malembe ya manyingi na Bibele li nyikela minawu ya ndlela leyi vapsali va nga wundlaka vana va vona hi lirhandzu. Mupostolo Pawulo a te: “Na n’wina vapapayi, mi nga hlupheni vana va n’wina kambe va kuliseni hi ku va laya ni ku va djondzisa minawu ya Yehovha.” (Efe. 6:4) Phela swi tsakisa hintamu ku tiva swaku hi nga yi tshemba minawu ya Yehovha hikusa a yi txintxi!

Lavetela Xuma Ka Rito La Xikwembu

Murindzi 01/06/06 paj. 11 par. 7

Tipontu Ta Lisima Ta Buku La Tipisalema

62:11. Xikwembu a xi vileli matimba man’wani ma taka hi ka nchumu xin’wani. Matimba ma ta hi ka xona. “Matimba i ya Xikwembu.”

15 KU YA KA 21 KA JULHO

XUMA XI NGA KA RITO LA XIKWEMBU TIPISALEMA 63-65

“Lirhandzu La Wena La Yampsa Ku Tlula Wutomi”

Murindzi 15/10/01 mapaj. 15-16 mapar. 17-18

A Ku Na Lexi Nga Hi Hambanisaka “Ni Lirhandzu Leli Xikwembu Xi Nga Na Lona Hi Hina”

¹⁷ Lirhandzu leli Yehovha a nga na lona hi wena li ku pfunisa ku yini? Pimisa hi marito lawa Davhida a nga ma tsala nkama a nga te: “Hikusa lirhandzu la wena la yampsa ku tlula wutomi, nomo wa mina wu ta ku dzunisa. Se ni ta ku dzunisa wutomi la mina hinkwalu; ni ta khongela ni vitana vito la wena na ni tlakuse mavoko”. (Ps. 63:3, 4) Phela misava leyi a yi na nchumu xa ku yampsa lexi yi nga hi nyikaka xona lexi tlulaka lirhandzu leli Xikwembu xi nga na lona hi hina ni wunghanu leli hi nga na lona na xona. Hi xikombiso, indjhe swa yampsa ku tirhisa wutomi la hina swaku hi lwela ku ganya hi tlhela hi va ni swilo swa swinyingi ku tlula ku tikhorisa hi ku rhula ka mimpimiso ni wunghanu leli hi nga na lona na Yehovha? (Luk. 12:15) Phela ku ni vamakwerhu van’wani lava swi nga lava swaku va langa ka ku tshika ku tirhela Yehovha kumbe ku dlayiwa. Leswo swi yendlekele Timboni ta Yehovha hi nkama wa Nyimpi ya Wumbirhi ya Misava, nkama lowu a ti li ka tindhawu leti mfumu wa Alemanha a wu ti hlupha ka tona. Vamakwerhu va vanyingi va lange ku tama va va vanghanu va Yehovha funtshi a va tinyimiselile hambi hi ku fa swaku va nga tshiki ku tirhela Yehovha. Lava va tamaka va tshembeka ka Yehovha va nga tiyiseka leswaku va ta kuma minkateko ya ku kala yi nga heli ka nkama lowu taka ku nga swilo leswi misava leyi yi nga ta kala yi nga swi koti ku hi nyika swona. (Mar. 8:34-36) Kambe loko hi tshembeka ka Yehovha a hi nge te kuma wutomi la ku kala li nga heli ntsena hikusa ku ni minkateko yin’wani ya yinyingi leyi hi nga yi kumaka hambi hi swoswi.

¹⁸ Phela a swi koteki swaku hi kuma wutomi la ku kala li nga heli loko hi nga nyikiwanga hi Yehovha, kambe pimisa hi swaku a wutomi a li ta tshamisa ku yini loko a hi nga kongomisiwi hi Yehovha. Phela wutomi a li nga ta tsakisa naswona a li nga ta va ni xikongomelo. Yehovha a hi nyike ntirho wa ku tsakisa swaku hi wu yendla ka masiku lawa ya wugamu. Hi mhaka leyo hi nga tiyiseka swaku nkama Yehovha Muhetisisi Wamukulu wa Swikongomelo a nga ta hi nyika wutomi la ku kala li nga heli, wutomi li ta tala hi swilo swa ku hlamalisa, swa ku tsakisa leswi hi nga ta swi djondza ni ku swi yendla. (Ekl. 3:11) A ku na mhaka swaku hi ta hanya nkama wa ku leha swinene ka misava ya nyuwani kambe a hi nge te tshuka hi yi twisisa hi ku helela “ku tala ka minkateko, wutlharhi ni wutivi la Xikwembu!” — Rom. 11:33.

Murindzi 12/19 paj. 28 par. 4

Vana Munhu Lweyi A Khensaka

I swa lisima naswona swa fanela kuva hi khensa Xikwembu. Aswi kanakanisi swaku minkama yin’wana wa pimisa hi swilo leswi Yehovha a tshamelaka kuhi nyika swona akuva hi tiyisa wunghanu la hina na yena ni swilo leswi ahi nyikaka swona leswaku hi kota kuhanya. (Det. 8:17, 18; Mint. 14:17) Kambe kuhambana ni kupimisa nyana hi swilo leswinene leswi taka hi ka Xikwembu, tinyiki nkama wa kuyanakanyisisa hi swilo swotala swohlamalisa leswi Xikwembu xihi yendlelaka swona. Loko u yanakanyisisa hi kuhanana ka Muvumbi wa wena, switaku yendla umu khensa naswona uta tiyiseka swaku waku rhandza nakambe ani mhaka na wena. — 1 Yoh. 4:9.

Murindzi 15/10/15 paj. 24 par. 7

Tama U Pimisa Hi Leswi U Swi Djondzaka

⁷ Hi nga swi kota ku lerha hi ku vevuka kambe ku pimisa hi leswi hi swi lerhaka swa karhata. Ndlondo ya munhu yi talisa ku lava ku maha swilo swa ku vevuka. Hi mhaka leyo nkama wawunene wa ku pimisa hi leswi hi nga swi djondza hi loko hi nga karhalanga ni ka ndhawu ya ku rhula leyi yi kalaka yi nga na minchumu leyi nga hi phazamisaka. Ka mupisalema nkama wawunene wa ku pimisa hi leswi a nga swi djondza, a ku li nkama lowu a a li ka mubedu wa yena niwusiku. (Ps. 63:6) Yesu lweyi a a hetisekile a a swi tiva swaku swa pfuna hintamu ku pimisa hi leswi a nga swi djondza ni ku khongela ka ndhawu ya ku rhula. — Luk. 6:12.

Murindzi 15/07/09 paj. 16 par. 6

Tekelela Yesu — Djondzisa Hi Lirhandzu

⁶ Hi swi rhandza hintamu ku bula ni vanhu hi leswi hi swi rhandzaka. Swa hi tsakisa hintamu loko hi vulavula hi swilo leswi hi swi rhandzaka na swi sukela mbilwini, leswo swa tikomba hambi hi ka nghohe ya hina ni hi ndlela leyi hi vulavulaka hi yona. Phela swi hi ku fana ni loko hi vulavula hi munhu lweyi hi mu rhandzaka hintamu. Hi swi rhandza hintamu ku bula ni vanhu van’wani hi munhu yelweyo hi va byela hi leswi hi swi tivaka hi munhu yelweyo. Phela hi vulavula kahle hi yena, hi mu nyimelela hi tlhela hi vulavula hi ndlela leyi kombisaka swaku ha mu hlonipha. Hi yendla leswo hikusa hi lava swaku ni van’wani va tiva wumunhu la yena lalinene va tlhela va mu rhandza ku fana na hina.

Lavetela Xuma Ka Rito La Xikwembu

Murindzi 15/11/07 paj. 15 par. 6

Indjhe Wa Va Tiyisa Vanhu Van’wani?

Phela swi vevuka hintamu ku diliza yindlo ku tlula ku yaka yindlo ya nyuwani. Swi hi ku fana ni mabulu ya hina, swi karhata hintamu ku tiyisa van’wani ku tlula ku va tshova hi leswi hi swi vulaka. Phela vanhu hinkwavu a va hetisekanga, hi mhaka leyo, hinkwerhu ha phazama minkama yin’wani. Hosi Solomoni a te: “Hikusa a nga kona munhu wa ku lulama misaveni lweyi a yendlaka swaswinene ntsena funtshi a kalaka a nga djohi.” (Ekl. 7:20) Swi vevuka hintamu ku vona swihoxo swa vanhu van’wani ni ku va gixa hi swona. (Ps. 64:2-4) Kambe ku va ni mabulu lawa ma tiyisaka swi lava minzamu yayikulu swinene.

22 KU YA KA 28 KA JULHO

XUMA XI NGA KA RITO LA XIKWEMBU TIPISALEMA 66-68

Siku Ni Siku Yehovha A Hi Rhwalela Mindzhwalu Ya Hina

Murindzi 05/23 paj. 12 par. 15

Yehovha A Swi Hlamulisa Ku Yini Swikhongelo?

¹⁵ Yehovha a nga toloveli ku hlamula swikhongelo swa hina hi ndlela ya ku hlamalisa, kambe a hlamula swikhongelo swa hina hi ndlela leyi nga ta hi pfuna ku tama hi tshembeka ka yena. Hi mhaka leyo hi fanele hi pfula matihlo, hi vona ndlela leyi Yehovha a swi hlamulaka hi yona swikhongelo. Makwerhu mun’wani lweyi a vitaniwaka Yoko a a pimisa swaku Yehovha a a nga swi hlamuli swikhongelo swa yena. Se a game a sungula ku yendla lixta la swilo hinkwaswu leswi a nga tshama a mu kombela swona Yehovha. Hi ku famba ka nkama, loko se a khoma lixta leliyani a nga li yendla, a tsumbule swaku ku tala ka swikombelo leswi a nga mu yendla swona Yehovha, se a a swi hlamulile, funtshi swin’wani hambi yena Yoko se a a patse ni ku swi khohlwa. Hi mhaka leyo, swi kahle kuva nkama ni nkama hi nyima hi pimisa hi ndlela leyi Yehovha a swi hlamulaka hi yona swikhongelo swa hina. — Pis. 66:19, 20.

Murindzi 01/12/10 paj. 23 par. 6

Kombisa Swaku U Ni Mhaka Ni Vapsali Lava Va Wundlaka Vana Na Va Li Voxe

Yehovha a kongomise vanhu swaku va tsala tinsimu ta ku kwetsima leti kumekaka ka buku la Tipisalema leti a Vayisrayele a va ti yimbelela nkama lowu a va mu gandzela. Pimisa hi leswi vavasati lava a va feliwe hi vanuna ni vana lava a va feliwile hi vapsali aIsrayele a va tiyisisiwa xiswona nkama na va yimbelela tinsimu leti. Phela tinsimu leti a ti va khumbukisa swaku Yehovha i “Papayi” a tlhela a va “muvhikeli” naswona a a ta va pepisa. (Tipisalema 68:5; 146:9) Na hina hi nga swi kota ku tiyisa vapsali lava va wundlaka vana na va li voxe. Loko hi yendla leswo a va nga ta swi khohlwa hambiloko ku hundza nkama wa wunyingi. Hi leswo swi nga yendlekela makwerhu Ruth. Hambileswi se a ku hundza 20 wa malembe, Ruth lweyi a wundlaka vana na a li yexe, a ha khumbuka leswi nga vuliwa hi papayi mun’wani. Papayi lweyo a byele Ruth a ku: “Wena u ma wundla kahle madjaha ya wena ya mambirhi. Tama u yendlisa xiswoleswo.” Makwerhu Ruth loko a vulavula hi mhaka leyi a li: “Phela marito lawayani ma ni tiyisile hintamu.” Leswi swi kombisa swaku “lirimi la ku rhula i nsinya wa wutomi” naswona marito lawa ma tiyisaka ma nga pfuna munhu hi ndlela ya ku a hi nga yi pimisi. (Swivuriso 15:4) Se swi ngo yini u pimisa hi ndlela ya ku tiyisa mamani kumbe papayi lweyi a wundlaka vana na a li yexe?

Murindzi 01/04/09 paj. 31 par. 1

Papayi Wa Vana Lava Va Nga Feliwa Hi Vapsali

“PAPAYI wa vana lava nga feliwa hi vapsali . . . i Xikwembu lexi tshamaka ka ndhawu ya xona ya ku kwetsima.” (Tipisalema 68:5) Marito lawa ma hi djondzisa mhaka ya lisima swinene ya leswaku Yehovha Xikwembu wa va twela funtshi a ni mhaka swinene ni lava va pfumalaka. Phela nawu lowu Yehovha a nga nyika Vayisrayele wu swi kombisa kahle leswaku Yehovha a ni mhaka swinene ni vana lava va nga luzekeliwa hi papayi kumbe mamani. A nawu wolowo hi wu kuma ku sungula ka Eksoda 22:22-24 lowu vulavulaka hi “n’wana lweyi a nga feliwa hi vapsali”.

Murindzi 01/23 paj. 19 par. 17

Yehovha A Ta Ku Pfuna

¹⁷ Lerha Tipisalema 40:5. Loko munhu a khwela nhava, xikongomelo xa yena i ku fika magamu ka yona. Hambileswo, nkama lowu a khwelaka, ku ni tindhawu tatinyingi leti a nga nyimaka ka tona swaku a vona ku saseka ka ndhawu yoleyo a nga nyima ka yona. Hilani ku fanaka, tinyiki nkama wa ku nyima u pimisa hi ndlela leyi Yehovha a nga ku pfuna hi yona swaku u tiyisela swikarhatu. Siku ni siku tivutisi leswi: ‘Yehovha a ni katekisise ku yini namuntlha?’ Loko swi ku u kumana ni xikarhatu tivutisi leswi: ‘Yehovha a ni pfunisa ku yini ndzeni ka xikarhatu lexi ni kumanaka na xona?’ Zama ku vona swaku Yehovha a ku pfunise ku yini swoswinyana.

Lavetela Xuma Ka Rito La Xikwembu

Murindzi 01/06/06 paj. 10 par. 5

Tipontu Ta Lisima Ta Buku La Tipisalema

68:18 — A ku li vamani ‘vavanuna lava a va li tinyiko’? A ku li vavanuna lava a va nga li Vayisrayele, lava va nga kumiwa nkama Vayisrayele va nga hlula va nghena ka Tiko la Xitshembiso naswona hi ku famba ka nkama va vekiwile swaku va pfuna Valevhi ka ntirho wa vona. — Ezra 8:20.

29 KA JULHO KU YA KA 4 KA AGOSTO

XUMA XI NGA KA RITO LA XIKWEMBU TIPISALEMA 69

Buku La Tipisalema 69 Li Vule Leswi A Swi Ta Yendleka Ka Yesu

Murindzi 15/08/11 paj. 11 par. 17

A Va Nyimela Mesiya

¹⁷ Mesiya a a ta nyenyiwa na ku nga na xivangelo. (Ps. 69:4) Hi ku ya hi leswi nga tsaliwa ka buku la Yohani, Yesu a vule leswi: “Loko a va nga vonanga masingita lawa ni nga ma yendla lawa ku kalaka ku nga na munhu lweyi a nga tshama a ma yendla, a va nga ta va ni xidjoho; kambe swoswi va ni vonile va tlhela va ni nyenya naswona va nyenye ni Papayi wa mina. Kambe leswi swi yendlekile swaku ku hetiseka marito lama nga tsaliwa ka Nawu wa vona lama nge: ‘Va ni nyenyile na ku nga na xivangelo.’” (Yoh. 15:24, 25) Minkama ya yinyingi a rito leli nge “Nawu” li vula swilo hinkwaswu leswi nga tsaliwa ka Bibele. (Yoh. 10:34; 12:34) A Tievhangeli ku nga mabuku lawa ma vulavulaka hi wutomi la Yesu nkama na a li lani misaveni ma swi kombisa kahle swaku Yesu a nyenyiwile ngopfungopfu hi varhangeli va wukhongeli la Xiyuda. Naswona hambi hi yena Yesu a vule leswi: “Misava a yi na xivangelo xa ku mi nyenya, kambe mina ya ni nyenya hi mhaka ya leswi ni fakazaka swaku mintirho ya yona yi bihile.” — Yoh. 7:7.

Murindzi 15/12/10 paj. 8 mapar. 7-8

Hisekela Wugandzeli La Ntiyiso

⁷ Ka wutomi la Yesu ku ni xiyendlakalu lexi xi nga kombisa hi ku helela swaku wa hiseka. Ku ve hi nkama lowu a nga sungula ntirho wa yena wa ku chumayela ka Paxkwa, hi lembe la 30 E.C. Yesu ni vadjondzisiwa va yena va ye Yerusalema naswona nkama va nga fika tempeleni, va ‘kume vaxavisi va tihomu, va tinyempfu, va swituvani ni lava a va txintxisa male na va tshame kolanu’. I mpsini leswi Yesu a nga swi yendla, naswona leswo swi va khumbise ku yini vadjondzisiwa na yena? — Lerha Yohani 2:13-17.

⁸ Leswi Yesu a nga swi yendla ni ku swi vula hi nkama lowuyani swi khumbukise vadjondzisiwa va yena hi marito ya wuprofeta ya pisalema ya Davhida lawa ma nge: “Ku hisekela yindlo ya wena ku ni dlile.” (Ps. 69:9) Hi mhaka muni? Hikusa leswi Yesu a nga swi yendla a swi li ni nghozi. Phela varhangeli va tempele, vaprista, vatsali ni vanhu van’wani hi vona a va rhangela negosiyu liyani ya wukanganyisi. Hi ku va Yesu a vule maplanu ya vona ya ku biha, a a tiyendla nala wa varhangeli va wukhongeli va nkama lowuyani. Phela vadjondzisiwa va Yesu va vhele va swi vona swaku impela Yesu a a ‘hisekela yindlo ya Xikwembu’, leswi vulaka swaku a a hisekela wugandzeli la ntiyiso. Kambe i yini ku hiseka? Ku nga va swaku swa fana ni ku yendla nchumu hi ku hantlisa?

Khindlimuka! 22/10/95 paj. 31 par. 4

Ku Vaviseka Mbilwini Swa Dlaya?

Vanhu van’wani va vula swaku swilo swin’wani leswi nga yendla leswaku Yesu a fa ku ve hileswi a a vaviseke hintamu mbilwini. Bibele li profetile hi mhaka leyi loko li te: “Xirhuku xi tshove mbilu ya mina naswona xilondza xa kona a xi daheki.” (Tipisalema 69:20) Marito lawa ma fanele ma twisisiwa hi ku kongoma? Kumbexana, hikusa ka mawora ya wugamu na Yesu a nga se fa a hluphekile swinene ku nga li muzimbheni ntsena kambe ni hi leswi a a tshoveke mbilu. (Matewu 27:46; Luka 22:44; Vaheberu 5:7) Naswona leswi a nkama lowu Yesu a nga tlhaviwa rheve ku nga huma “ngati ni mati” na se a file, swi kombisa swaku a mbilu ya yena ya hikakunene se a yi vavisiwile. Phela loko mbilu kumbe nsiha wa lisima swi vavisiwile swi nga humesela ngati kusuhi ni lani ku nga ni mbilu, se loko munhu o tlhaviwa ka tindhawu toleto swi nga yendla swaku ku humetela swa ku fana ni “mati ni ngati”. — Yohani 19:34.

Perspicaz vol. 2 paj. 660

Xinsinyani Lexi Nga Ni Vhenenu

Ku profetiwe swaku Mesiya a a ta nyikiwa “xinsinyani lexi nga ni vhenenu”. (Ps 69:21; ntlhamuselo) Leswo swi yendlekile nkama lowu Yesu na a li kusuhi ni ku gongondzeliwa ka mhandzi ya nxaniso, va zame ku mu nyika a vhinyu leyi a yi patsiwe ni nyongwa kambe nkama Yesu a nga li ringa a nga pfumelanga ku li phuza. Swi nga yendleka va mu nyike vhinyu leyo swaku va pumba ku vava loku Yesu a a ku twa. Nkama Matewu a nga vulavula hi ku hetiseka ka wuprofeta lolelo ka buku la Matewu 27:34 a tirhise rito la Xigriki leli nge kho·lé (nyongwa) leli tlhelaka li humelela Septuaginta la Xigriki ka buku la Tipisalema 69:21. Kambe ka mhaka yoleyi ya yin’we leyi kumekaka ka buku ya Marka ku vulavuliwa hi mira (Mar 15:23), leswo swi yendla swaku van’wani va pimisa swaku swi nga yendleka a “xinsinyani lexi nga ni vhenenu” kumbe “nyongwa” a ku li “mira.” Mavonelo man’wani hileswaku swi nga yendleka leswi va nga swi nyika Yesu swaku a swi phuza a swi ni nyongwa ni mira.

Lavetela Xuma Ka Rito La Xikwembu

Murindzi 15/01/99 paj. 18 par. 11

Khensani Yehovha Hi Xikhongelo

¹¹ Ku tala ka vanhu loko va yendla xikhongelo vo kombela ntsena, kambe hina, lirhandzu hi nga na lona hi Yehovha Xikwembu xa hina li fanele li hi yendla hi khensa hi tlhela hi mu dzunisa loko hi yendla swikhongelo na hi li hoxe kumbe hi ni vanhu van’wani. Mupostolo Pawulo a tsale leswi: “Mi nga vileli hi nchumu, kambe ka hinkwaswu kombelani Xikwembu hi xikhongelo swaku xi mi pfuna, mi kombela na mi khensa; kutani ku rhula ka Xikwembu loku tlulaka ku twisisa hinkwaku, ku ta vonelela timbilu ta n’wina ni mimpimiso ya n’wina hi ku tirhisa Kreste Yesu”. (Filp. 4:6, 7) Loko hi yendla xikhongelo a hi lavi ku kombela ntsena kambe hi fanele hi mu khensa Yehovha hi swilo swaswinene leswi a hi nyikaka swona swaku hi tihlayisa ni leswi a hi nyikaka swona swaku hi tiyisa a wunghanu la hina na yena. (Swiv. 10:22) Phela leswo swi yendle swaku mupisalema a yimbelela a vula leswi: “Yendlela Xikwembu gandzelo hi ku xi khensa, yendla leswi u nga swi tshembisa Lweyi A Nga Tlakuka.” (Ps. 50:14) Davhida na yena a vule marito lawa, lawa ma khumbaka mbilu: “Ni ta dzunisa vito la Xikwembu hi tinsimu, funtshi ni ta xi dzunisa ni xi khensa.” (Ps. 69:30) Leswi swi kombisa leswaku hi fanele hi yendla leswi fanaka loko hi khongela ka Yehovha ku nga na mhaka swaku hi hoxe kumbe hi ni van’wani.

5 KU YA KA 11 KA AGOSTO

XUMA XI NGA KA RITO LA XIKWEMBU TIPISALEMA 70-72

Byela Majovhem Hi Ta Matimba Ya Xikwembu

Murindzi 01/09/99 paj. 18 par. 17

N’wina Majovhem, Djondzisani Matimba Ya N’wina Ya Ku Twisisa!

¹⁷ Leswaku mi nga phasiwi hi mintlhamu ya Sathana swi lava leswaku mi tshama na mi pfule matihlo naswona minkama yin’wani swi ta lava mi tiya nhlana mi nga chavi nchumu. Minkama yin’wani swi nga yendleka leswi u lavaka ku swi yendla swi hambanile ni leswi majovhem man’wani ma swi yendlaka kumbe vanhu van’wani. Davhida a khongele ka Yehovha a ku: “Hikusa ni tshembe wena, Yehovha Hosi Leyikulu; ni tshembe wena ku sukela na na ha li djaha. Xikwembu xa mina, u ni djondzisile ku sukela na na ha li djaha, ni swoswi na ha vulavula hi mintirho ya wena ya ku hlamalisa.” (Tipisalema 71:5, 17) Phela Davhida a tiviwa na a li munhu lweyi a a nga chavi nchumu. Kambe a swi kotise ku yini swoleswo? A swi yendlile leswo na wa ha li djaha! Phela na a nga se lwa na Goliyadi, Davhida a kombisile swaku a a tiya nhlana naswona a a nga chavi nchumu hikusa a vhikele ntlhambi wa papayi wa yena hi ku va a dlaya nghonyama ni ursu. (1 Samuwele 17:34-37) Kambe Davhida a vule leswaku a kotile ku va a yendla leswo hileswi Yehovha a nga mu pfuna, a vule leswaku ‘a a tshemba Yehovha ku sukela na a ha li djaha.’ Leswi Davhida a a tshemba Yehovha a swi kotile ku lwisana ni swikarhatu hinkwaswu leswi a nga kumana na swona. Na wena loko minkama hinkwayu u tshemba Yehovha a ta ku pfuna leswaku u nga chavi nchumu u tiya nhlana a tlhela a ku nyika matimba ya leswaku u kota “ku hlula misava.” — 1 Yohani 5:4.

Khindlimuka! 08/10/04 paj. 23 par. 3

Hi Fanele Hi Va Khomisa Ku Yini Lava Nga Guga?

Mupisalema a khongele a ku: “U nga ni txukumeti loko se ni gugile; u nga ni tshiki loko matimba ya mina ma hela.” (Tipisalema 71:9) Xikwembu a xi va txukumeti vanhu va xona va ku tshembeka hambiloko vona va pimisa leswaku se va kulile lakakuva va nga ha na lisima. Mupisalema a a swi twisisa swaku Xikwembu a xi nga mu tshikanga kambe yena a a fanele a kholwa swaku Muvumbi wa yena a a ta mu pfuna hambileswi se a a gugile. Yehovha wa swi maha leswo hi ku mu pfuna munhu ka wutomi la yena hinkwalu. (Tipisalema 18:25) Minkama ya ku tala a tirhisa vamakwerhu.

Murindzi 15/01/14 paj. 23 mapar. 4-5

Tirhela Yehovha Na Masiku Ya Khombo Ma Nge Se Fika

⁴ Loko u ni malembe ya manyingi na u tirhela Yehovha i swa lisima ku nyimanyana u tiyendla xivutiso lexi xa lisima: ‘Ni nga li tirhisisa ku yini wutomi la mina leswaku ni tirhela Yehovha na na ha ni ntamu?’ Leswi u nga ni xiperiyensiya xa wutomi la Wukreste u pfulekeliwe hi nkama wa ku van’wani a va na wona, ku nga ku hundzisela leswi u swi tivaka hi Yehovha ka majovhem. U nga tlhela u tiyisa vanhu van’wani hi xiperiyensiya lexi u nga na xona ka ntirho wa Yehovha. Leswo hi leswi hosi Davhida a nga swi kombela loko a te: “Xikwembu xa mina, u ni djondzisile ku sukela na na ha li djaha . . . hambiloko se ni gugile, ni ni misisi ya ku basa, u nga ni txukumeti, Xikwembu xa mina. Ni pfumelele ni byela lava nga ta va kona ka minkama leyi taka hi ta ntamu wa wena ni hi matimba ya wena ka hinkwavu lava nga ta psaliwa.” — Ps. 71:17, 18.

⁵ U nga yavelanisa ku yini ni van’wani wutlharhi leli u nga li kuma hi ku famba ka malembe? Swi ngo yini u rhamba majovhem ma ta kaya ka wena swaku u ma tiyisa, kumbe ku ma rhamba swaku mi huma xikan’we nsimu leswaku ma ta vona swaku ku chumayela swa ku tsakisa! Ku fana ni leswi Elihu a nga swi vula ka nkama lowu nga hundza loko a ku: “Lava nga vakulu a va vulavule, lava nga ni malembe ya manyingi a va kombise swaku va tlharihile.” (Yob. 32:7) Mupostolo Pawulo a byele vamakwerhu va xisati lava nga kula leswaku va pfuna vamakwerhu va xisati lava nga majovhem hi mavulavulelo ya vona ni leswi va hanyisaka xiswona, yena a te: “Vavasati lava nga kula va fanele . . . va djondzisa swaswinene.” — Tit. 2:3.

Lavetela Xuma Ka Rito La Xikwembu

Perspicaz vol. 1 paj. 892

Ewufrata

Lomu A Yi Gamela Kona Ndhawu Leyi Vayisrayele Va Nga Nyikiwa. Yehovha a tshembise Abrahamu leswaku vana va yena a a ta va nyika ndhawu leyi a yi ta “sukela ka nambu wa Gibita ku ya fika ka nambu wawukulu wa Ewufrata.” (Gen 15:18) Yehovha a tlhele a phindha xitshembiso lexi ka tiko la Israyele. (Eks 23:31; Det 1:7, 8; 11:24; Yox 1:4) A buku la 1 Tikronika 5:9 li vula leswaku na Davhida a nge se fuma, lani vatukulu van’wani va Rubeni a va tshama kona a ku famba anze “lani ku sungulelaka kona mananga ka Nambu wa Ewufrata”. Kambe aEwufrata a kumeka kolomuyani ka 800 wa makilometru loko u famba hi “tlhelo la le wuxeni la Jiliyadi.” (1Tik 5:10) Leswo swi nga yendleka swi kombisa leswaku vana ni vatukulu va Rubeni a va tshama ka ndhawu leyi a yi famba anze ka tlhelo la le wuxeni la Jiliyadi kusuhi ni mananga ya Siriya leyi fambaka anze Ewufrata. Se swa tikomba leswaku leswi Yehovha a nga swi tshembisa swi hetiseke nkama Davhida na Solomoni na va fuma, nkama ndhawu leyi Vayisrayele a va tshama ka yona a yi famba anze ka ndhawu leyi a yi fumiwa hi hosi ya Muaramu ya Zoba leyi a yi famba anze kusuhi ni nambu wa Ewufrata, naswona swi tikomba na ndhawu yoleyo a yi famba yi hundza hi ka mfumu wa Siriya. (2Sa 8:3; 1Tih 4:21; 1Tik 18:3-8; 2Tik 9:26) Phela ndhawu leyi minkama ya yinyingi a yi tiviwa tanihi “Nambu” ntsena. — Yox 24:2, 15; Ps 72:8.

12 KU YA KA 18 KA AGOSTO

XUMA XI NGA KA RITO LA XIKWEMBU TIPISALEMA 73-74

U Nga Naveli Ku Fana Ni Lava Kalaka Va Nga Tirheli Yehovha

Murindzi 12/20 paj. 19 par. 14

“Yehovha . . . Wava Ponisa Lava Pfotlokeke Mbilu”

¹⁴ Buku la Tipisalema 73 li tsaliwe hi Mulevhi. A ve ni nkateko wa ku tirha andlwini ya Yehovha, hambileswo, ku ve ni nkama a nga hela ntamu. A sungule ku navela vanhu lava a va ni mahanyelo ya ku biha hi mhaka leswi a swi tikomba na swilo swi va fambela kahle ka wutomi la vona. (Pis. 73:2-9, 11-14) Vanhu volavo a va tikomba na va ganyile, va hanya wutomi la ku tsakisa funtshi na va nga na swikarhatu. Leswo swi mu yentxe a ku: “Hi kakunene ni yi basise mahala mbilu ya mina naswona ni hlambhe mavoko na ni nga na nandzu.” Phela marito lawa ma kombisa swaku a a li kusuhi ni ku tshika ku tirhela Yehovha.

Murindzi 12/20 mapaj. 19-20 mapar. 15-16

“Yehovha . . . Wava Ponisa Lava Pfotlokeke Mbilu”

¹⁵ Lerha Tipisalema 73:16-19, 22-25. Mulevhi a nghene “ka ndhawu ya ku kwetsima ngopfu ya Xikwembu.” Loko a nghenile a kumane ni vanhu van’wani lava na vona a va tirhela Yehovha naswona a pimise kahle hi xiyimu xa yena a tlhela a khongela. Leswo swi mu yentxile a va ni ku rhula. A tsumbule swaku mapimiselo ya yena a ma hoxile, funtshi leswo a swi ta mu yentxa a lahlekeliwa hi wunghanu la yena na Yehovha. Xin’wana lexi a nga xi twisisa hi leswaku vanhu va ku biha a swi fana ni loko va li ka “ndhawu ya ku rhetemuka.” Naswona hi wugamu a va ta humeleliwa hi swilo swa ku biha. Leswi a nga txintxa mapimiselo ya yena, a a fanele a vona swilo ku fana ni leswi Yehovha a a swi vonisa xiswona. Leswo a swi ta yentxa swaku a va ni ku rhula a tlhela a tsaka. Hi mhaka leyo, a te: “Handle ka [Yehovha] a ku na nchumu xin’wana ni xi navelaka misaveni.”

¹⁶ Leswi hi nga swi djondzaka. Hi nga tshuki hi navela vanhu va nga ni mahanyelo ya ku biha lava va tikombaka na va ni wutomi la ku tsakisa. Ku tsaka ka vona a hi ka ntiyiso funtshi i ka nkamanyana naswona a va nga ta li kuma wutomi la ku kala li nga heli. (Ekl. 8:12, 13) Loko hi navela ku fana na vona, hi ta hela ntamu hi tlhela hi lahlekeliwa hi wunghanu la hina na Yehovha. Loko na wena u titwa ku fana ni Mulevhi, yentxa leswi a nga swi yentxa. Yentxa leswi Xikwembu xi swi lavaka u tlhela u tipatsa ni vanhu lava va xi tirhelaka. Loko u rhandza Yehovha ku tlula hinkwaswu u ta tsaka hikakunene naswona u ta kuma ‘wutomi la ntiyiso.’ — 1 Tim. 6:19.

Murindzi 15/04/14 paj. 4 par. 5

Tekelela Lipfumelo La Moxe

⁵ U nga yendla yini swaku u fambela kule ni “ku tikhorisa hi xidjoho swa nkamanyana”? U nga khohlwi leswaku a ntsaku lowu xidjoho xi nga ku nyikaka wona swoswi wu ta hundza. Minkama hinkwayu khumbuka swaku “misava ya hundza ni ku navela ka yona”. (1 Yoh. 2:15-17) Pimisa hi leswi nga ta yendlekela vadjohi lava kalaka va nga tisoli ka nkama lowu taka. Phela vona, swo fana ni loko va li ka “ndhawu ya ku rhetemuka” na va nyimela nkama lowu va nga ta helisiwa naswona nkama lowo se wu le kusuhi. (Ps. 73:18, 19) Se minkama hinkwayu loko u ringeka ku yendla xidjoho tivutisi leswi: ‘Ni navela swaku wutomi la mina li tshamisa ku yini ka nkama lowu taka?’

Murindzi 15/02/13 mapaj. 25-26 mapar. 3-5

U Nga Pfumeleli Nchumu Xi Ku Sivela Ku Yamukela Timpsalu Ta Xikwembu

³ Mupisalema a vule swaku wa tshemba swaku Yehovha a a ta mu khoma hi voko la yena la xinene naswona a a ta mu komba timpsalu. (Lerha Tipisalema 73:23, 24.) Yehovha a a ta swi yendlisa ku yini leswo? Yena a kombisa timpsalu ta yena ka vanhu va yena lava tivekaka hansi hi tindlela ta ku hambanahambana. Yehovha wa va katekisa hi ku va nyika ku twisisa ka ku rhandza ka yena. (1 Ko. 2:7) Lava yamukelaka rito la yena va tlhela va mu yingisa a va nyika nkateko wa ku va vanghanu va yena vavakulu. — Yak. 4:8.

⁴ Yehovha a tlhela a nyika vanhu va yena xuma xa lisima swinene ku nga ntirho wa ku chumayela. (2 Ko. 4:1, 7) Phela ntirho lowu wu yendla leswaku vanhu va kombiwa timpsalu. Phela lava tirhisaka nkateko wa ku yendla ntirho lowu swaku va dzunisa Yehovha va tlhela va pfuna van’wani, Yehovha a va tshembisa leswi: “Lava va ni hloniphaka ni ta va hlonipha.” (1 Sa. 2:30) Phela vanhu volavo va tiyendlela vito lalinene ka Yehovha naswona va ni ndhuma yayinene ka Vakreste van’wani. — Swiv. 11:16; 22:1.

⁵ Se swi li yini hi lava ‘tshembaka Yehovha va landzela ndlela ya yena’? Yena a va tshembisa leswi: ‘A ta va tlakusa swaku va tshama misaveni, va ta swi vona loko vanhu va ku biha va helisiwa.’ (Ps. 37:34) Phela vanhu volavo va wu nyimele hintamu nkama lowu va nga ta nyikiwa wutomi la ku kala li nga heli. — Ps. 37:29.

Lavetela Xuma Ka Rito La Xikwembu

Perspicaz vol. 2 paj. 222

Xiharhi Xaxikulu Xa Lwandle

A buku ya Tipisalema 74 yi tlhamusela leswi Yehovha a nga va ponisisa xiswona vanhu va yena. Ka tindzimana 13 ni 14 yi tlhamusela hi ndlela ya ku fanekisela ndlela leyi Yehovha a nga ponisa Vayisrayele ka tiko la Gibita. A rito li nga tirhisiwa ka xiharhi xaxikulu xa lwandle hi Xiheberu li kombetela ka “Levhiyatani”, a kuva ku pfotlosiwa tinhloko ta xiharhi xaxikulu xa lwandle swi kombetela ka ku helisiwa ka Faru ni masonchwa ya yena nkama Vayisrayele va nga humesiwa ka tiko la Gibita. A mabuku ya Targum ya Xiaramu ka ndzimana leyi ma tirhise marito lama nge “masonchwa ya matimba ya Faru”, handle ka ku tirhisa “tinhloko ta xiharhi xaxikulu xa lwandle”. (Vona ni Eze 29:3-5, lani Faru a fanisiwaka ni “xiharhi xaxikulu xa lwandle” lexi nga xikarhi ka nambu wa Nilu; vona Eze 32:2.) A buku ya Esaya 27:1 yi tlhela yi tirhisa Levhiyatani na yi kombetela ka mfumu kumbe nhlengeletanu leyi rhangelaka misava hinkwayu leyi lweyi a yi rhangelaka a vitaniwaka “nyoka” kumbe “dragona”. (Nhl 12:9) A wuprofeta leli li kombetela ka ku pfuxetiwa ka tiko la Israyele. Hi mhaka leyo, leswi ‘Yehovha a dlayaka’ Levhiyatani swi lava ku vula swaku ku ta heliswa ni Babilona. Kambe tindzimana 12 ni 13 leti hi ti kambisisaka ti tlhela ti patsa ni tiko la Asiriya ni Gibita. Hi mhaka leyo a Levhiyatani kumbe xiharhi xaxikulu xa lwandle swi tikomba na swi kombetela ka nhlengeletanu kumbe mfumu lowu rhangelaka misava hinkwayu leyi lwaka na Yehovha ni vanhu va yena.

19 KU YA KA 25 KA AGOSTO

XUMA XI NGA KA RITO LA XIKWEMBU TIPISALEMA 75-77

Hi Mhaka Muni Hi Nga Fanelanga Hi Tibyela?

Murindzi 01/18 paj. 28 mapar. 4-5

Wa Ku Vona Ku Hambana?

⁴ Loko mupostolo Pawulo se a vulile swaku vanhu a va ta tirhandza, va rhandza male a game a vula swaku vanhu a va ta tibyela, va titlakusa. A vanhu lava va tibyelaka va tolovela ku tivona na va yampsa ku tlula vanhu hinkwavu. van’wani va vona va tibyela hi leswi va nga tshamisa xiswona, hi ntirho lowu va nga na wona, kumbe hi swilo leswi va tivaka ku swi yendla kumbe hileswi va nga ni male. Vanhu volavo va swi lava hintamu a ku hlamaliwa hi vanhu van’wani va tlhela va gandzeliwa. Buku lin’wani leli tlhamuselaka Bibele loko li vulavula hi vanhu va ku tibyela li vule leswi: “Ka timbilu ta vona swo fana ni loko ku ni xialtarani lexi vona va khizamaka ka xona swaku va tigandzela.” A ku tibyela swi bihe hintamu lakaku hambi hi vanhu lava tibyelaka a va swi rhandzi ku vona vanhu van’wani na va tibyela.

⁵ Bibele li vula swaku Yehovha wa va nyenya vanhu ‘lava tibyelaka’. (Swiv. 6:16, 17) Phela ku tibyela ku nga yendla munhu a nga lavi ku tiva nchumu hi Xikwembu. (Ps. 10:4) Phela moya lowu wa ku tibyela wu ta hi ka Sathana. (1 Tm. 3:6) Xa ku biha hi swaku hambi vanhu va Yehovha va ku tshembeka va khale va ngheneliwile hi moya lowu wa ku tibyela. Hi xikombiso, Uziya a tshembekile ku ringana malembe ya manyingi. Kambe Bibele li vula swaku “loko se a li ni matimba, a sungula ku tibyela se a tivangela khombo hi yexe, a nga tshembekanga ka Yehovha Xikwembu xa yena, a nghene tempeleni ya Yehovha a ya hisa swinun’hwelisu ka altari.” Mun’wani lweyi a nga ngheniwa hi moya lowu wa ku tibyela ku ve hosi Ezekiya. Kambe xa ku tsakisa hi leswaku hi ku famba ka nkama a game a tiveka hansi. — 2 Tik. 26:16; 32:25, 26.

Murindzi 15/07/06 paj. 11 par. 2

Tipontu Ta Lisima Ta Buku La Tipisalema

75:4, 5, 10 — Rito leli nge “limhondzo” li tlhamusela yini? Limhondzo la swiharhi i tlharhi la matimba. Hi ndlela leyo, rito leli nge “limhondzo” li fanekisela ntamu kumbe matimba. Yehovha a tlakusa limhondzo la vanhu va yena kambe a tsema “limhondzo” la vanhu va ku biha. Ha basopisiwa leswaku hi nga tlakusi limhondzo la hina kumbe ku tikulisa. Leswi ku nga Yehovha lweyi a hi tlakusaka loko hi yamukela mintirho bandleni hi fanele hi yi vona na yi ta hi ka Yehovha. — Ps. 75:7.

Lavetela Xuma Ka Rito La Xikwembu

Murindzi 15/07/06 paj. 11 par. 3

Tipontu Ta Lisima Ta Buku La Tipisalema

76:10 — Hi mhaka muni hi nga vulaka swaku “ku kwata ka munhu” ku yendla leswaku Yehovha a dzunisiwa? Loko Xikwembu xi pfumela leswaku vanhu va hi kwatela hileswi hi xi tirhelaka swi nga yendla leswaku ku humelela minchumu ya ku tsakisa. Phela loko hi hluphiwa swi nga yendla swaku hi djondza xan’wanchumu ka swoleswo. Yehovha o pfumelela leswaku hi hluphiwa leswaku hi trenariwa. (1 Pe. 5:10) ‘Ku kwata ka vona ku ta yendla leswaku Yehovha a tidzunisa.’ Se ku ta yendleka yini loko ho hluphiwa hi za hi fa ke? Ni swoleswo swi ta yendla swaku Yehovha a dzunisiwa hikusa lava nga ta vona swaku hi tiyiselile hi ku tshembeka anze hi ya fa va nga ha sungula ku dzunisa Xikwembu.

26 KA AGOSTO KU YA KA 1 KA SETEMBRO

XUMA XI NGA KA RITO LA XIKWEMBU TIPISALEMA 78

Ku Kala Ku Tshembeka Ka Vayisrayele Ka Hi Basopisa

Murindzi 01/12/96 mapaj. 29-30

Hi Mhaka Muni Swi Li Swa Lisima Ku “Khumbuka Masiku Ya Khale”?

Xa ku biha lexi nga yendlekela Vayisrayele hi leswaku va khohlwile leswi Yehovha a nga va yendlela swona. Ku game ku yendleka yini? Bibele loko yi vulavula hi mhaka leyi yi li: “Va ringe Xikwembu hi ku phindhaphindha, va mu twise ku vava Mukwetsimi wa Israyele. A va ma khumbukanga matimba ya xona, siku leli xi nga va ponisa hi lona ka nala.” (Tipisalema 78:41, 42) Leswo swi yendle leswaku Yehovha a nga ha va yamukeli Vayisrayele hikusa a va khohlwe minawu ya yena. — Matewu 21:42, 43.

Mupisalema a hi vekele xikombiso xaxinene ka mhaka leyi, a te: “Ni ta khumbuka mintirho ya Yehovha; ni ta khumbuka mintirho ya wena ya ku hlamalisa ya khale swinene. Ni ta pimisa hi mintirho ya wena hinkwayu ni gayela hi leswi u swi yendlaka.” (Tipisalema 77:11, 12) Loko hi pimisa hi ntirho wa ku tshembeka lowu se hi nga mu yendlela wona Yehovha ni lirhandzu leli a hi kombaka lona, swa hi tiyisa swi tlhela swi hi yendla hi khensa hinkwaswu leswi hi nga kota ku swi yendla. Naswona, a ku “khumbuka masiku ya khale” swi nga hi pfuna swaku hi nga godoli hi tlhela hi yendla hinkwaswu hi nga swi kotaka ka ntirho wa yena, swi tlhela swi hi pfuna swaku hi tiyisela hi tlhela hi tshembeka.

Murindzi 15/07/06 paj. 17 par. 16

“Mi Nga Nguranguri”

¹⁶ Ku ngurangura swi yendla leswaku hi pimisa hi hina hoxe ni leswi hi karhataka, hi tshika ku pimisa hi minkateko leyi hi yi kumaka hi ku va Timboni ta Yehovha. Leswaku hi hlula swoleswo minkama hinkwayu hi fanele hi khumbuka minkateko leyi Yehovha a hi nyikaka yona. Hi xikombiso, hinkwerhu hi ni nkateko wa ku hlamalisa wa ku vitaniwa hi vito la Yehovha. (Esa. 43:10) Hi nga kulisa wunghanu la hina na Yehovha naswona hi nga vulavula ni “Mutwi wa xikhongelo” nkama wun’wani ni wun’wani. (Ps. 65:2; Yak. 4:8) Wutomi la hina li ni xikongomelo hikusa ha yi twisisa mhaka ya wuhosi la Yehovha naswona hi pimisa hi nkateko hi nga na wona wa ku tama hi tshama hi tshembekile ka Xikwembu. (Swiv. 27:11) Nkateko wun’wani i ku va kona ka ntirho wa ku chumayela mahungu ya ku tsakisa. (Mat. 24:14) Lipfumelo leli hi nga na lona la leswaku hi ta ponisiwa hi mhaka ya lifu Yesu li hi yendla hi va ni lipfalu leli nga basa. (Yoh. 3:16) Leyi i minkateko leyi hi nga na yona ku nga na mhaka swikarhatu leswi hi faneleke hi swi tiyisela.

Murindzi 01/07/11 paj. 10 mapar. 3-4

Yehovha Wa Khumbeka Hi Leswi Hi Swi Yendlaka?

Mupisalema a tsale leswi: “Va xi djohele makhambi ya manyingi amananga.” (Ndzimana 40) A tlhele a vula leswi ka ndzimana leyi landzelaka: “Va ringe Xikwembu hi ku phindhaphindha”. (Ndzimana 41) Ka tindzimana leti Mupisalema a vula swaku a Vayisrayele va djohele Yehovha makhambi ya manyingi funtshi leswo swi sungule nkama lowu na va li mananga nkama lowu va nga chunsiwa ka tiko la Gibita. Vayisrayele va sungule ku ngurangura va tlhela va kanakana swaku Xikwembu xi nga swi kota naswona xa swi lava ku va hlayisa. (Tinhlayo 14:1-4) Buku lin’wani leli pfunaka vahundzuluxeli va Bibele li vula swaku marito lawa ma nge “va xi djohelile” ma nga ha tlhela ma vula swaku “va tiyise timbilu ta vona va lwisana ni Xikwembu kumbe va yale leswi Xikwembu xi nga va byela swona.” Hambileswo, leswi Yehovha a nga Xikwembu xa timpsalu a va rivalelile vanhu va yena nkama lowu va nga tisola. Kambe vona a va ha tama va mu djohela hi ku phindhaphindha. — Tipisalema 78:10-19, 38.

Yehovha a a titwisa ku yini loko Vayisrayele va mu djohela hi ku phindhaphindha? Ndzimana 40 yi li: ‘A va mu twisa ku vava’. Wuhundzuluxeli lin’wani loko li hundzuluxela marito lawa li li ‘a va mu kwatisa’. Buku yin’wani ya mareferensiya ya Bibele loko yi nyikela ntlhamuselo ya ndzimana leyi yi li: “Ndzimana leyi yi kombisa leswaku leswi a Vaheberu a va swi yendla a swi tikomba ingi a vo swi yendla hi maxivomu leswaku va mu twisa ku vava ku fana ni leswi yendliwaka hi n’wana lweyi a kalaka a nga yingisi naswona a kalaka a nga lavi ku twa nchumu.” Ku fana ni leswi n’wana wa ku kala a nga yingisi a twisaka ku vava vapsali va yena, Vayisrayele lava a va nga yingisi a va ‘mu twisa ku vava Mukwetsimi wa Israyele.’ — Ndzimana 41.

Lavetela Xuma Ka Rito La Xikwembu

Murindzi 15/07/06 paj. 11 par. 4

Tipontu Ta Lisima Ta Buku La Tipisalema

78:24, 25; ntlhamuselo — Hi mhaka muni mana yi vitaniwa “swakudla leswi taka hi tilweni” ni “pawu la tintsumi”? Marito lawa hi mambirhi ka wona a ma lavi ku vula swaku tintsumi ti dla mana. Ku vuliwa swaku i “swakudla leswi taka hi tilweni” hikusa mana a yi ta hi le tilweni. (Ps. 105:40) Leswi tintsumi ti tshamaka tilweni rito leli nge “pawu la tintsumi” swi nga ha yendleka li lava ku vula swaku mana a yi ta hi ka Xikwembu lexi tshamaka tilweni. (Ps. 11:4) Swi nga yendleka Yehovha a tirhise tintsumi swaku ti nyika mana Vayisrayele.