¿Yabal xjuʼ ya kotsestik jnopojeletik?

 1. ¿Bin spasoj ta jtojoltik te Jehová?

JNOP KAʼIYTIK te bin-utʼil ochotik ta testigo yuʼun Jehová. Ay machʼa la scholbotik «te lec yachʼil cʼop», jaʼniwan te jmeʼ jtatik, jtul joytik ta aʼtel o ta escuela o jtul Testigo te yak ta scholel skʼop Dios ta nanatik (Mar. 13:10). Ta patil ay machʼa la spas tulan sok la slokʼes tiempo yuʼun la snojptesotik ta Biblia. Jich kʼux la kaʼiytik ta koʼtantik te Jehová sok la jnoptik te kʼuxotik ta yoʼtan-euke. Te Jehová la yikʼotik tal ta stojol, jaʼ yuʼun te bitʼil jnopojelotikix yuʼun te Jesucristo ya xjuʼ ya xkuxinotik ta sbajtelkʼinal (Juan 6:44). Jaʼ yuʼun ya kalbeytik wokol te Jehová te ay machʼa la stuuntes yuʼun la snojptesotik sok te ya yakʼ te ya x-abatinotik ta stojol.

 2. ¿Bin ya jnoptik ta artículo ini?

² Te bitʼil la jnaʼbeytikix sba te Jehová ya xjuʼ ya jkoltaytik te yantik yuʼun ya xkuxinik ta sbajtelkʼinal-euk. Ay hermanoetik te ma wokol ya yilik te ya xlokʼik ta scholel skʼop Dios ta nanatik, pero jaʼ wokol ya yaʼiyik te ya sjapik sok te ya yakʼik nojptesel ta Biblia. ¿Jichbal ya kaʼiy jbatik te joʼotike? Teme jiche, jaʼ ya skoltayotik te bin ya yichʼ alel ta artículo ini. Ya kiltik bin ya stij koʼtantik yuʼun ya kotsestik jnopojeletik. Jaʼnix jich ya kiltik bin ya skoltayotik yuʼun ma wokol ya kaʼiytik te yakʼel nojptesel. Pero ta nail ya kiltik te bin yuʼun ma jaʼuknax ya skʼan ya jcholtik te lek yachʼil kʼop, jaʼnix jich ya skʼan ya xnojpteswanotik.

 3. ¿Bin yuʼun te ya jcholtik skʼop Dios?

³ Te kʼalal xtaluk ta Balumilal te Jesús, la yalbey te jnopojeletik yuʼun te ay cheb aʼtelil te ya skʼan ya spasike. Te sbabiale, jaʼ te la yal te yakuk scholik te lek yachʼil kʼop yuʼun te Wentainel sok la yakʼ ta ilel te bin-utʼil ya spasike (Mat. 10:7; Luc. 8:1). La yal te bin ya spasik kʼalal ay machʼa ya yaʼiyik te lek yachʼil kʼop sok te bin ya spasik te kʼalal ay machʼa ma skʼane (Luc. 9:2-5). Jaʼnix jich la yal te ya scholik te skʼop Dios «ta stojol spisil nacionetic» (Mat. 24:14; Hech. 1:8). Chikan te bin ya yalik te ants winiketik, yananix scholik-a te Wentainel yuʼun te Dios sok te bin ya spas ta pajel chaʼbej.

 4. Jich bitʼil ya yal te Mateo 28:18-20, ¿binxan ya skʼan ya jpastik?

⁴ ¿Bin-a te schebal ya skʼan ya spasik te jnopojeletike? Te Jesús la yal te akʼa snojptesik te ants winiketik ta schʼuunel te bin la yal ta mantale. ¿Jaʼnaxbal la scholik skʼop Dios sok nojpteswanik te jchʼuunjeletik ta sbabial siglo? Maʼuk, te Jesús la yal te mukʼ skʼoplal te ya yichʼ pasel jaʼto ta jkʼajkʼaleltik «cʼalal ta slajel bahlumilal» (kʼopona Mateo 28:18-20). Jich yilel te Jesús la yal te mantalil ini kʼalal stsoboj sbaik kʼaxem ta 500 ta tul jnopojeletik yuʼun (1 Cor. 15:6). Te najalsitil la yil te Juan la yakʼ ta ilel te Jesús ya skʼan te jnopojeletik yuʼun te yakuk snojptesik te ants winiketik yuʼun ya snaʼbeyik sba te Jehová (Apoc. 22:17).

 5. ¿Bin lokʼombakʼop la stuuntes te Pablo ta 1 Corintios 3:6-9?

⁵ Te jpuk-kʼop Pablo la spajbey skʼoplal te yotsesel jnopojeletik jich bitʼil stsʼunel sit awal tsʼunubil, tey la yakʼ ta ilel-a te ma tikʼuknax te la yichʼ tsʼunele. Jich la yalbey te corintoetik: «Hoʼon la jtsʼun, te Apolos la yaʼbe yaʼlel [...]. Te haʼexe stsʼunubex Dios» (kʼopona 1 Corintios 3:6-9). Te machʼatik ya x-abatinotik ta stojol te Jehová ma jaʼuknax ya jtsʼuntik te sit awal tsʼunubile, jaʼnix jich ya kakʼbeytik yalel sok ya kiltik teme yak ta chʼiele (Juan 4:35). Pero jnaʼojtik te jaʼ te Jehová te ya yakʼ chʼiuke.

 6. ¿Bin smakoj te yakʼel nojptesel?

⁶ Jaʼ ya jletik «te machʼatic tsahbilic te ya yichʼ scuxlejalic sbahtel qʼuinal» (Hech. 13:48). Yuʼun ya x-ochik ta jnopojel ya skʼan ya jkoltaytik 1) te yakuk xkʼot ta yoʼtanik, 2) te yakuk schʼuun yoʼtanik sok 3) te yakuk spas ta skuxlejalik te bin ya snopik ta Biblia (Juan 17:3; Col. 2:6, 7; 1 Tes. 2:13). Jpisiltik ya xjuʼ ya kakʼbeytik yil skʼuxul koʼtantik sok yutsil koʼtantik te estudianteetik kʼalal ya xkʼotik ta tsoblejetik (Juan 13:35). Te machʼatik ya xnojpteswanik yaniwan spasik tulan sok ya slokʼes stiempoik yuʼun ya skoltayik te estudiante yuʼun ya yijkitayik ta spasel te bintik schʼuunejik sok te costumbreetik te kʼuben ta yoʼtanik (2 Cor. 10:4, 5). Ma tojoluknax te ya jmaliytik bayal tiempo yuʼun ya sjeltay stalel te estudiante yuʼun ya yichʼ jaʼ.

 7. ¿Bin yuʼun te ya jcholtik skʼop Dios sok ya kotsestik jnopojeletik?

⁷ ¿Bin yuʼun te ya jcholtik skʼop Dios sok ya kotsestik jnopojeletik? Sbabial, jaʼ yuʼun te kʼux ta koʼtantik te Jehová. Kʼalal ya jpastik tulan te ban kʼalal ya xjuʼ kuʼuntik yuʼun ya jcholtik skʼop Dios sok ta yotsesel jnopojeletik, ya kakʼtik ta ilel te kʼux ta koʼtantik te Dios (1 Juan 5:3). Jaʼ ya stij koʼtantik te skʼuxul koʼtantik ta stojol te Jehová yuʼun ya jcholtik skʼop Dios. ¿Tulanbal la kaʼiytik schʼuunel te mantalil ini? Maniwan, te kʼalal sbabial buelta lokʼotik ta scholel skʼop Dios xiwotikniwan, pero la jpastik, melel jnaʼojtik te jich ya skʼan te Jesuse. Maniwan wokol ya kaʼiytikix te ya jcholtik skʼop Dios, pero ¿wokolbal ya kiltik te ya kakʼtik nojptesel? Yaniwan xiwotik. Pero teme ya jkʼanbeytik koltayel te Jehová, ya yakʼ yip koʼtantik ta sjapel jun nojptesel ta Biblia sok smulanelxan te yotsesel jnopojeletik.

 8. Jich bitʼil ya yal te Marcos 6:34, ¿bin yuʼun ya jnojptestik te ants winiketik?

⁸ Schebal, ya xnojpteswanotik melel kʼux ta koʼtantik te ants winiketik. Ta jun buelta te Jesús sok te jnopojeletik yuʼun lujben la yaʼiy sbaik te kʼalal sjunal kʼajkʼal la scholik skʼop Dios, jich yuʼun la sleik te banti ya xkux yoʼtanik. Pero bayal ants winiketik yakik ta maliywanej. Tijbot yoʼtan te Jesús, jaʼ yuʼun «bayel bin hahch yaʼbe snopic» (kʼopona Marcos 6:34). ¿Bin yuʼun te jich la spas te Jesuse? La snaʼbey yoʼbolil sba te ants winiketik sok la skʼan la skoltaylan. Snaʼoj te ayik ta wokol sok te ya skʼan smukʼul yoʼtanik. Ta ora ini te ants winiketik ya skʼan smukʼul yoʼtanik manchukme tseʼel yoʼtanik yilel. Jich kʼoemik bitʼil tuminchijetik te chʼayemik sok te maʼyuk machʼa ya xkanantayotik yuʼun. Te jpuk-kʼop Pablo la yal te maʼyuk Dios yuʼunik sok te maʼyuk smukʼul yoʼtanik (Efes. 2:12). Yakik ta bael ta «be te ya xbaht ta chʼayel» (Mat. 7:13). Kʼalal ya xjul ta koʼtantik te ants winiketik ta jterritoriotik sok te bitʼil maʼyuk schʼuunel yoʼtanik, te skʼuxul koʼtantik sok te ya jnaʼbeytik yoʼbolil sbaik jaʼ ya stij koʼtantik ta skoltayel. Te bin ya xjuʼ ya jpastik, jaʼ te ya japbeytik jun nojptesel ta Biblia.

 9. Jich bitʼil ya yal te Filipenses 2:13, ¿bin-utʼil ya skoltayotik te Jehová?

⁹ Yaniwan xiwotik ta sjapel nojptesel yuʼun te Biblia, melel bayal tiempo ya yichʼ. Teme jich ya kaʼiy jbatike, kalbeytik te Jehová te bin yaʼiyel ya kaʼiy jbatik sok te yakuk skoltayotik ta stael te machʼa ya smulan snopel te Biblia (kʼopona Filipenses 2:13). Teme jich ya jpastike, te jpuk-kʼop Juan la yal te ya yakʼbotik te Jehová te bin ya jkʼanbeytike teme jaʼ ta swenta te skʼanojel yoʼtane (1 Juan 5:14, 15). Jaʼ yuʼun ya jnaʼtik te ya skoltayotik te Jehová yuʼun ya jmulantik yotsesel jnopojeletik.

10, 11. ¿Binwan ya xjuʼ ya smakotik yuʼun ya kakʼtik nojptesel ta Biblia?

¹⁰ Ya jnaʼtik te mukʼ skʼoplal yotsesel jnopojeletik, pero ayniwan wokoliletik te ya smakotik yuʼun ya jpastik. Kiltik cheʼoxebuk sok te bin-utʼil ya jsitintaytik.

¹¹ ¿Jichbal yaʼiyel te ma xjuʼ kuʼuntikxan spasel ta swenta te bin yak ta kʼaxel ta jkuxlejaltik? Ayniwan hermanoetik te ayix yaʼbilalik o ayik ta chamel. Teme jich yak ta kʼaxel ta jtojoltik, jnop kaʼiytik te bin yakʼoj jpastik te chamel COVID-19, te ya xjuʼ ya kakʼtik nojptesel yuʼun Biblia ta teléfono o ta Internet. Jich yuʼun ya xjuʼ ya kakʼtik nojptesel yuʼun te Biblia kʼalalto ta jnatik. Pero ma jaʼuknax-abi, ay machʼatik ya skʼan ya snopik te Biblia, pero ma xjuʼ yuʼunik-a te kʼalal ya scholik skʼop Dios te hermanoetike. Ya xjuʼ ya jap jbatik ta yakʼel nojptesel te kʼalal ya xjuʼ yuʼunik, ta sabniwan, ta mal kʼajkʼal o ta ajkʼabal. Te Jesús la snojptes ta ajkʼabal te Nicodemo, melel jich la skʼan te Nicodemo (Juan 3:1, 2).

12. Teme jich ya kaʼiytik te ma pʼijubenotik ta lek, ¿bin oxchajp ya xjuʼ ya skoltayotik?

¹² ¿Jichbal yaʼiyel te ma xjuʼ kuʼuntik yakʼel nojptesel ta Biblia? Yaniwan jkuytik te maʼyuk lek jpʼijiltik o te mato jnaʼtik ta lek pʼijubteswanej. Teme jiche kiltik oxchajp te bin ya xjuʼ ya skoltayotik. Sbabial, te Jehová ya snaʼ te pʼijubenotik yuʼun ya kakʼtik nojptesel (2 Cor. 3:5). Schebal, te Jesús akʼbilix yaʼtel ta chʼulchan sok ta Balumilal sok yalojbotik te yakuk xnojpteswanotik (Mat. 28:18). Yoxebal, ma jtukel ayotik. Jich bitʼil la spas te Jesús ya smukʼulin koʼtantik te Jehová te ya yakʼ ta koʼtantik te bin ya kaltike (Juan 8:28; 12:49). Jaʼnix jich ya xjuʼ ya kalbeytik te superintendente yuʼun grupo, jtul precursor o jtul publicador te pʼijubenix ta lek yuʼun ya skoltayotik ta sjachel jun nojptesel yuʼun te Biblia. Teme ya jokintik ta yakʼel nojptesel ta Biblia, jich ya xpʼijubotikxan ta lek ta yakʼel nojptesel.

13. ¿Bin yuʼun ya skʼan ya jtuuntestik te yachʼil aʼtejibal?

¹³ ¿Jichbal ya kaʼiytik te wokol ta tuuntesel te yachʼil aʼtejibaletik yuʼun nojptesel? Te bitʼil ya kakʼtik nojptesel ta Biblia jelonemix. Te libro Mulana te ya jtuuntestik ta ora ini, ya skʼan ya jchajpan jbatik ta lek, melel ma jichukix ya kakʼtik te nojptesel bitʼil ya jpastik ta nailale. Ma bayalukix párrafo ya jkʼopontik, jaʼ ya xkʼopojotikxan sok te estudiante. Jaʼ bayalxan ya jtuuntestik te videoetik sok te bintik ay ta JW Library^®. Teme wokol ya kaʼiytik stuuntesel te aʼtejibaletik ini, jkʼantik koltayel. Wokolniwan ya kaʼiytik te kʼalal ay bin ya xjelone, jaʼniwan ya jkʼan ya jpastik te bin kʼayemotik ta spasele. Pero ya skoltayotik te Jehová sok te hermanoetik, jich ma wokol ya kaʼiytik sok ya jmulantikxan yakʼel nojptesel ta Biblia. Jtul precursor la yal te «xkuxet kʼinal ya yaʼiy te estudiante sok te machʼa ya yakʼ te nojptesel» te bitʼil ya yichʼ tuuntesel te yachʼil aʼtejibal.

14. 1) ¿Bin ya skʼan ayuk ta koʼtantik te ya xkʼot ta pasel ta jterritoriotik? 2) ¿Bin-utʼil ya yakʼbotik smukʼul koʼtantik te 1 Corintios 3:6, 7?

¹⁴ ¿Jichbal ya kaʼiytik te wokol ta jachel jun nojptesel ta Biblia ta jterritoriotik? Ayniwan ants winiketik te ma smulanik te ya jcholtik skʼop Dios o ya skontrainik te kaʼteltik. ¿Bin ya skoltayotik yuʼun ma xchebaj koʼtantik? Ayuk ta koʼtantik te yanyantik te bin ya xkʼot ta stojol te ants winiketik, ayniwan machʼatik ma smulanik, pero ta patil ya skʼan ya snopik te skʼop Dios (Mat. 5:3). Ay ants winiketik te ma skʼan ya stsakik te publicación, pero ta patil la skʼanik nojptesel ta Biblia. Jnaʼojtik te jaʼ yajwal awal tsʼunubil te Jehová (Mat. 9:38). Ya skʼan te ma jkom jbatik ta tsʼunbajel sok te ya kakʼbeytik yalel, melel jaʼ ya yakʼ chʼiuk stukel (1 Cor. 3:6, 7). Manchukme ta ora ini ay maba yakotik ta yakʼel nojptesel ta Biblia, te Jehová ya yakʼbotik bendición, melel ya yil te yakal jpasbeltik tulan, jaʼ-abi ya yakʼbotik smukʼul koʼtantik.b

15. ¿Bin-utʼil ya yaʼiy sba Jehová te kʼalal ay machʼa ya skʼan nojptesel ta Biblia sok ya spas ta skuxlejal?

¹⁵ Te Jehová tseʼelnax yoʼtan te kʼalal ay machʼa ya skʼan ya snop te Bibliae sok te ya yalbey te yantik (Prov. 23:15, 16). Ya jnaʼtik te tseʼelnax yoʼtan te Jehová kʼalal ya yil te bin yak ta kʼoel ta pasel ta ora ini. Manchukme ta 2020 ay tulan chamel, la yichʼ akʼel 7,705,765 nojptesel ta Biblia sok la yichʼik koltayel 241,994 ta tul te la yakʼ sbaik ta stojol te Jehová sok la yichʼik jaʼ. Jaʼnix jich ya yakʼik nojptesel ta Biblia sok ya yotsesik jnopojeletik (Luc. 6:40). Te kʼalal ya jpastik te aʼtelil-abi, ya kakʼbeytik stseʼelil yoʼtan te Jehová.

16. ¿Bin ya skʼan ya kakʼ ta koʼtantik spasel?

¹⁶ Kʼalal ay machʼa ya jkoltaytik yuʼun kʼux ya yaʼiy ta yoʼtan te Jehová ya skʼan ya jpastik tulan, pero ya xjuʼ ya kotsestik jnopojeletik ta swenta te koltayel ya yakʼ te Jehová. ¿Yabal xjuʼ ya kakʼ ta koʼtantik te ya jachtik junuk nojptesel ta Biblia? Ya xjuʼ ya japbeytik nojptesel ta Biblia spisil te ants winiketik teme jich lek ya kiltike, ayniwan machʼa ya skʼan teme jich ya jpastike. Mame xchʼay ta koʼtantik te Jehová ya yakʼbotik bendición teme ya jpastik tulane.

17. ¿Bin yaʼiyel ya kaʼiy jbatik teme ya kakʼtik jun nojptesel ta Biblia?

¹⁷ Jaʼ jun majtanil te ya jcholtik skʼop Dios sok te ya kakʼtik nojptesel, jaʼme ya yakʼ stseʼelil koʼtantik. Te jpuk-kʼop Pablo la skoltay te ants winiketik ta Tesalónica yuʼun ya x-ochik ta jnopojel sok jich la yal te bin yaʼiyel ya yaʼiy sba: «¿Bin a te smucʼul coʼtancotic, te stseʼelil coʼtancotic soc te corona te ya jtoy qʼuinal caʼiycotic yuʼun ta stojol te Cajwaltic Jesucristo te cʼalal ya xtale? ¿Ma bal haʼuquex? Melel haʼex te cutsilalexcotic soc stseʼelilex coʼtancotic» (1 Tes. 2:19, 20; Hech. 17:1-4). Jaʼnix jich ta ora ini bayal hermanoetik tseʼel yoʼtanik-euk ta yotsesel jnopojeletik. Te hermana Stéphanie sok te smamalal bayal machʼatik skoltayejik yuʼun ya yichʼik jaʼ, jich ya yal: «Maʼyuk bin ya yakʼbatxan stseʼelil awoʼtan te ya akoltay te ants winiketik yuʼun ya yakʼ sbaik ta stojol te Jehová».