Ana yisyene kuti Yakobo jwaŵele mumsela wakupagwila Mesiya ligongo lyakuti ŵasumile ukumu wakuŵa mwanace jwandanda kupagwa kutyocela kwa Esawu?
Yiwusyo Yakutyocela Kwa Ŵakuŵalanga
Mundaŵi ja m’Baibulo, ana mundu kuti aŵe mumsela wakupagwila Mesiya ŵasosekwaga kuti aŵe jwandanda kupagwa?
Munyumamu tuŵele tuli mkusala m’yoyo. Yeleyi yaliji yakamulana ni yatukusaŵalanga pa lilemba lya Ahebeli 12:16. Lilembali likusasala kuti Esawu “nganayamicila yindu yapajika” soni “ŵapelece [kwa Yakobo] ukumu wakwe wakuŵa jwandanda kupagwa mwakucenganya ni cakulya ca kamope.” Yeleyi yatutendekasyaga ganisya kuti pakuŵa Yakobo ŵapatile “ukumu wakuŵa jwandanda kupagwa,” nikuti ŵaŵelesoni mumsela wakupagwila Mesiya.—Mat. 1:2, 16; Luk. 3:23, 34.
Nambope, pakuwungunya cenene yajikusasala Baibulo yikuwoneka kuti atamose mundu jwanganaŵa jwandanda kupagwa ŵaŵaga mumsela wakupagwila Mesiya. Kwende tulole maumboni gane gakusala ya nganiji.
Pa ŵanace ŵacalume ŵa Yakobo, jwandanda kupagwa kutyocela kwa Leya ŵaliji Lubeni. Kaneko, kutyocela kwa Lakele, jwandanda jwaliji Yosefe. Nambo Lubeni paŵatesile yindu yangalumbana, ukumu wakuŵa mwanace jwandanda kupagwa wapite kwa Yosefe. (Gen. 29:31-35; 30:22-25; 35:22-26; 49:22-26; 1 Mbiri 5:1, 2) Nambotu, msela wakupagwila Mesiya nganiwupitila mwa Lubeni kapena Yosefe. Nambo wapitile mwa Yuda, juŵaliji mwanace jwa mcece jwa Yakobo kutyocela kwa Leya.—Gen. 49:10.
Lilemba lya Luka 3:32 likusasala ya ŵandu msanu ŵali mumsela waŵapagwile Mesiya. Yikuwoneka kuti mundu jwalijose jwaliji jwandanda kupagwa. Mwambone, Bowasi ŵaŵelece Obedi, kaneko Obedi ŵaŵelece Jese.—Rute 4:17, 20-22; 1 Mbiri 2:10-12.
Nambotu, mwanace jwa Jese lina lyakwe Daudi nganaŵa jwandanda kupagwa. Jwalakwe jwaliji jwakumalisya pa ŵanace 8 ŵa Jese. Nambo msela wakupagwila Mesiya wapitile mwa Daudi. (1 Sam. 16:10, 11; 17:12; Mat. 1:5, 6) Mwakulandana ni yeleyi, nombe Solomoni nganaŵa mwanace jwandanda kupagwa kwa Daudi.—2 Sam. 3:2-5.
Nambo yeleyi ngayikugopolela kuti kuŵa jwandanda kupagwa kwaliji kwangali mate. Mwambone, mwanace jwandanda kupagwa, jwakwete ukumu wapenani mwiŵasa soni ndaŵi syejinji jwaŵaga jwakulongolela liŵasa naga babagwe awile. Jwalakwesoni jwapedwaga mbali jekulungwa pa cipanje ca liŵasalyo.—Gen. 43:33; Deut. 21:17; Yos. 17:1.
Nambotu ukumu wakuŵa jwandanda kupagwa, wakombolekagasoni kumpa mundu jwine. Mwambone, Abulahamu ŵamtopwele Isimayeli ni kumsumula ukumu wakuŵa jwandanda kupagwa ni kumpa Isaki. Soni mpela mwatuyiwonele, Lubeni ŵasumulidwe ukumu wakuŵa jwandanda kupagwa ni kumpa Yosefe.
Sambano, kwende tutagulilanesoni yayili pa Ahebeli 12:16. Paja lilembali litite, “Mlolecesye kuti pakapagwa jwalijose jwa msese, kapena jwangayamicila yindu yapajika, mpela Esawu juŵapelece ukumu wakwe wakuŵa jwandanda kupagwa mwakucenganya ni cakulya ca kamope.” Ana pa lilembali Paulo ŵagopolelaga cici?
Pandaŵiji Paulo nganasalaga ya msela wakupagwila Mesiya. Jwalakwe ŵalimbikasyaga Aklistu kuti ‘ajendelecele kongolela sajo syawo.’ Yeleyi yaliji yakamucisya kwa Aklistuwo kuti ‘akasumulidwa umbone mtima wa Mlungu,’ yayikatendekwe ligongo lyakutenda nawo ndamo sya msese. (Ahe. 12:12-16) Yikaŵe kuti Aklistuŵa atesile yeleyi akaliji mpela Esawu, juŵalepele “kuyamicila yindu yapajika.” Yeleyi yalosisye kuti jwalakwe nganayiwonaga yindu yausimu kuŵa yakusosekwa.
Esawu ŵatemi mundaŵi jele acalume ŵalongolelaga maŵasa gawo, soni ndaŵi sine ŵakwete upile wakupeleka mbopesi. (Gen. 8:20, 21; 12:7, 8; Yobu 1:4, 5) Nambo ligongo lya nganisyo syakwe syakusakala, Esawu jwajasile upile wosope wakuŵa mwanace jwandanda kupagwa ligongo lya mbale jimo ja cakulya. Jwalakwe akakombolece kuŵambala yakusawusya yele Mlungu ŵaliji ali amsalile kala Abulahamu kuti ŵanace ŵakwe cacisimana nayo. (Gen. 15:13) Esawu jwalosisyesoni kuti jwangayamicila yindu yausimu mwakulombela acakongwe ŵaŵili ŵangalambila Mlungu, yayatendekasisye kuti acinangolo ŵakwe akasangalalaga. (Gen. 26:34, 35) Yeleyi yaliji yakulekangana ni yaŵatesile Yakobo, juŵalolecesye kuti alombele jwamkongwe jwakulambila Mlungu jwakuwona.—Gen. 28:6, 7; 29:10-12, 18.
Mwakamulana ni yatutagulileneyi, ana mpaka tusale yamtuli pakwamba ya msela waŵapagwile Yesu, jwali Mesiya? Ndaŵi sine, mselawu wapitilaga mwa mwanace jwandanda kupagwa. Nambo ngaŵa ndaŵi syosope. Ayuda ŵayimanyililaga yeleyi, soni ŵayijiticisye. Jemanjaji ŵasasile kuti Klistu ŵapali kupitila mumsela wa Daudi juŵaliji mwanace jwakumalisya kupagwa jwa Jese.—Mat. 22:42.