希伯來書

11 信心係肯定希望嘅事一定實現，係睇唔見嘅事實嘅確鑿證據*。 2 憑住信心，古人*得到上帝嘅認可*。

3 憑住信心，我哋睇出各個制度*都因為上帝嘅話語而安排好，所以而家睇得見嘅都係嚟自睇唔見嘅。

4 憑住信心，亞伯將祭牲獻俾上帝，比該隱獻上嘅更好。由於呢種信心，佢得到上帝嘅認可*，表明佢係正義嘅，因為上帝接納咗佢嘅禮物*。雖然佢死咗，但係仍然憑住信心講說話。

5 憑住信心，以諾被帶走*，佢死嘅時候冇經歷痛苦。上帝帶走咗佢，就冇人搵到佢嘞。佢被帶走之前，上帝已經向佢表明*，佢贏得上帝嘅喜悅。 6 人冇信心，就冇可能贏得上帝嘅喜悅，因為到上帝面前崇拜佢嘅人一定要相信佢存在，亦都要相信佢會獎賞懇切尋求佢嘅人。

7 憑住信心，挪亞聽到上帝嘅警告、知道仲未睇見嘅事之後，顯出敬畏嘅心，建造方舟，救咗自己一家。佢嘅呢種信心表明當時嘅世界被毀滅係罪有應得嘅*，佢亦都因為信心而得到正義嘅地位。

8 憑住信心，亞伯拉罕受上帝呼召嘅時候就服從命令，去上帝俾佢做產業嘅地方。佢雖然唔知道要去邊，但係仍然離開自己嘅地方。 9 憑住信心，佢住喺上帝承諾賜予嘅土地*，就好似外族人住喺異鄉一樣，佢同埋得到同一個承諾嘅以撒、雅各都住喺帳篷。 10 亞伯拉罕一直等待嗰座有真正根基嘅城，亦即係上帝設計同建造嘅城。

11 憑住信心，撒拉雖然過咗生育嘅年紀，但係都能夠懷孕，因為佢相信賜承諾俾佢嘅上帝係值得信賴*嘅。 12 所以，佢丈夫嘅身體雖然同死咗冇分別*，仍然能夠生到子子孫孫，數目好似天上嘅星咁多，亦都好似海邊嘅沙一樣多不勝數。

13 呢啲人到死嘅時候仍然咁有信心，雖然仲未得到承諾嘅福分，但係遠遠見到，就好期待呢啲承諾實現*，亦都公開聲明自己喺當地係外來嘅，係寄居嘅。 14 噉樣講嘅人表明，佢哋懇切尋求一個屬於自己嘅地方。 15 如果佢哋念念不忘離開咗嘅家鄉，其實仲有機會返去， 16 不過佢哋竭力追求一個更好嘅地方，係隸屬於天嘅。所以，佢哋向上帝呼求，視佢為自己嘅上帝，上帝冇以佢哋為恥，反而為佢哋準備咗一座城。

17 憑住信心，亞伯拉罕受考驗嘅時候幾乎獻上咗以撒。當時，呢個開開心心噉得到承諾嘅人，準備好獻上自己嘅獨生子。 18 即使上帝同佢講過，「從以撒而出嘅先至會稱為『你嘅後代』」，佢依然噉樣做。 19 佢知道，就算以撒死咗，上帝都可以令以撒復活。結果，亞伯拉罕真係從死亡中得到返以撒，呢件事就成為象徵。

20 憑住信心，以撒祝福雅各同以掃嘅時候，預告咗未來嘅事。

21 憑住信心，雅各喺離世之前，扶住佢支杖*崇拜上帝，祝福約瑟嘅兩個仔。

22 憑住信心，約瑟臨終嗰陣提到以色列人會離開埃及，亦都留低指示*，點樣處理自己嘅骸骨*。

23 憑住信心，摩西嘅父母喺摩西出世之後，將佢收埋咗三個月。因為佢哋見佢生得好靚，亦都唔怕違反國王嘅命令。 24 憑住信心，摩西長大之後就唔肯被稱為法老個女*嘅仔。 25 佢選擇同上帝嘅子民一齊受虐待，而唔係享受犯罪帶嚟嘅短暫快樂， 26 因為喺佢眼中，即使成為受上帝任命嘅人*會受到羞辱，仍然比埃及嘅財寶有價值得多。佢注視嘅，係將來會得到嘅獎賞。 27 憑住信心，佢離開埃及，唔怕國王發嬲。佢堅定不移，就好似見到人睇唔見嘅上帝。 28 憑住信心，佢守逾越節，將血灑喺門框，以免天使執行毀滅嘅時候，傷害*以色列人當中頭生嘅人畜。

29 憑住信心，以色列人穿過紅海，好似喺乾地上面行一樣。埃及人都嘗試過去，但係就俾海水吞滅咗。

30 憑住信心，以色列人圍繞住耶利哥嘅城牆行咗七日之後，城牆就冧咗嘞。 31 憑住信心，妓女喇合友善噉接待咗探子*，結果冇同嗰啲唔服從上帝嘅人一齊失去生命。

32 唔通我仲需要舉多啲例子？如果我仲要講埋基甸、巴拉、參孫、耶弗他、大衛、撒母耳同埋其他先知嘅事跡，就唔夠時間嘞。 33 憑住信心，佢哋打敗敵國，伸張正義，得到上帝嘅承諾，封住獅子嘅口， 34 擋住烈火嘅威力，逃離刀劍嘅利刃，由軟弱變得強大，喺戰場勇猛作戰，擊潰入侵嘅軍隊。 35 有啲女人嘅親人死而復生。有啲人為咗得到更好嘅復活，寧願忍受酷刑，都唔肯為咗獲釋而背棄信仰*。 36 有啲人遭受考驗，例如被嘲笑、鞭打，甚至被鎖住、被囚禁。 37 佢哋俾人用石頭打死，受到考驗，俾人用鋸鋸開，用刀劍殺死。佢哋披住綿羊山羊嘅皮顛沛流離，陷於貧困，忍受患難，俾人虐待。 38 呢個世界根本配唔起佢哋。佢哋流落荒漠、山嶺、洞穴、地穴，漂泊無定。

39 由於有信心，呢啲人全部都得到上帝嘅認可*，但係仲未得到佢承諾嘅福分， 40 因為上帝一早打算俾更好嘅獎賞我哋*，令佢哋唔會早過我哋獲致完美*。