提摩太後書

2 所以，我嘅仔啊，你要不斷從基督耶穌嘅分外恩典獲得力量。 2 我傳講嘅事有好多人作證，你要將聽到嘅呢啲事交託俾忠信嘅人，等佢哋都可以勝任教導人嘅工作。 3 你身為基督耶穌嘅精兵，要準備好忍受逆境。 4 當兵嘅人為咗贏得徵召佢嘅人嘅認可，唔會掛住賺錢*。 5 參加體育競賽嘅人如果唔遵守規則，就得唔到冠冕。 6 勤力嘅農夫最先享用收成係好合理㗎。 7 你要不斷思考我嘅說話，主會令你喺一切事上都有理解力*。

8 你要記住，耶穌基督已經死而復生，佢係大衛嘅後代。呢個就係我傳講嘅好消息。 9 為咗呢個好消息，我忍受緊逆境，甚至俾人當成罪犯囚禁。不過，上帝嘅話語係冇人可以囚禁㗎。 10 所以，為咗上帝揀選嘅人，我事事忍耐，等佢哋都可以得到拯救同埋永恆嘅榮耀。呢種拯救係通過基督耶穌而嚟嘅。 11 有一句說話真實可信：如果我哋同死，就一定會同活； 12 如果我哋忍耐落去，就一定會一齊做君王；如果我哋唔認佢，佢都一定唔認我哋； 13 就算我哋唔忠信，佢都係忠信嘅，因為佢冇可能否定自己*。

14 你要不斷提醒大家呢啲事，喺上帝面前教導佢哋*唔好為字眼爭辯，因為噉樣做一啲用都冇，而且對聽嘅人有害*。 15 要竭盡全力成為上帝認可嘅人，做個無愧嘅工人，正確噉運用真理嘅話語。 16 你要避開褻瀆神聖事物嘅空洞言論，因為呢啲言論*會令人越嚟越藐視上帝。 17 呢啲說話會好似壞疽一樣擴散。許米乃同腓理徒就係有份講呢啲說話嘅人。 18 佢哋偏離真理，話復活已經係過去嘅事，破壞某啲人嘅信心。 19 雖然係噉，上帝奠定嘅堅固根基仍然屹立，根基上有噉樣嘅印記：「耶和華*認識屬於佢嘅人。」「所有呼求耶和華*聖名嘅人，都應該離棄不義。」

20 大戶人家嘅器皿*，有金嘅銀嘅，亦都有木嘅瓦嘅，有啲用喺體面嘅事，有啲用喺冇咁體面嘅事。 21 人如果避開後一類器皿，就會成為用嚟做體面嘅事嘅器皿*。佢會成聖*，對主人有用，準備好做各種美善嘅工作。 22 所以，你要遠避*年輕人嘅慾望，同嗰啲本住潔淨嘅心呼求主嘅人，一齊努力做正義嘅事，表現信心、愛心，亦都追求安寧*。

23 另外，要拒絕參與愚蠢無知嘅辯論，因為你知道呢種行為會引起爭拗。 24 主嘅奴隸唔應該同人爭拗，而係應該對所有人都和和氣氣*，具備教導嘅能力，俾人惡待嗰陣保持克制， 25 溫和噉教導對抗嘅人。或者上帝會容許佢哋悔改*，可以確切認識真理。 26 噉樣，雖然佢哋俾魔鬼活捉，按照佢嘅意思去做，但係都有可能醒悟，逃出魔鬼嘅陷阱*。