提摩太前書

4 上帝啟示嘅說話*清楚講到，將來會有人離棄信仰，留意嗰啲好似嚟自上帝而誤導人嘅言論*，亦都聽從邪靈嘅教導， 2 因為佢哋受到虛偽又講大話嘅人影響。嗰啲人嘅良心好似俾熱鐵焫過噉。 3 佢哋禁止人結婚，命令人禁戒某啲食物。其實，上帝創造呢啲食物，係要俾有信心而且確切認識真理嘅人，懷住感恩嘅心享用㗎。 4 上帝創造嘅一切都係好嘅，只要懷住感恩嘅心接受，就冇乜嘢係應該棄絕嘅。 5 憑住上帝嘅說話，通過禱告，呢啲食物就成聖嘞。

6 你用呢啲說話勸誡弟兄，就表明自己係基督耶穌嘅好僕人，亦都受真理*同埋優良教導嘅話語滋養。你一直都緊緊遵從呢種教導。 7 你唔好聽嗰啲羞辱上帝嘅無稽之談，例如有啲人*鍾意講嘅嗰啲故事。相反，你要以虔誠*為目標鍛鍊自己。 8 鍛鍊身體*嘅益處有限，但係虔誠就喺各方面都有益，能夠令人喺目前同未來嘅生命，都得到上帝承諾嘅福分。 9 呢句說話真實可信，值得完全接受。 10 為咗呢個目標，我哋努力工作，竭力奮鬥，因為我哋寄望於真實存在嘅*上帝。佢係各種各樣嘅人嘅救主，尤其係忠信嘅人嘅救主。

11 你要不斷吩咐同埋教導人呢啲事。 12 唔好俾人因為你後生而睇小你。要喺言談、行為、愛心、信心、貞潔*呢幾方面，做忠信嘅人嘅榜樣。 13 喺我嚟到之前，你要繼續努力提升喺朗讀、勸勉*、教導方面嘅能力。 14 唔好忽視你嘅恩賜*。呢個恩賜係通過長老團按手喺你身上賜俾你嘅，同關於你嘅預言一致。 15 呢啲事你要思考*，要全神貫注，等人人都清楚睇到你喺崇拜方面不斷進步。 16 你要經常留意自己同埋自己嘅教導。要堅持不懈噉做我吩咐你做嘅呢啲事，因為噉樣做唔單止救到你自己，亦都救到聽你講嘅人。