約翰一書

2 我嘅仔女，我寫呢啲說話俾你哋，係唔想你哋一時犯罪。不過，如果有人真係一時犯罪，喺天父嗰度有一位會幫助我哋*，就係正義嘅耶穌基督。 2 佢為我哋嘅罪成為求恩嘅祭牲*，其實唔單止係為咗我哋嘅罪，亦都係為咗世上所有人嘅罪。 3 如果我哋時刻遵守佢*嘅誡命，噉就證明我哋已經認識佢。 4 邊個話「我已經認識佢」，但係唔遵守佢嘅誡命，就係講大話，真理亦都唔喺呢個人心入面。 5 邊個遵守佢嘅話語，呢個人心入面就真係對上帝有完美無缺嘅愛嘞。如果我哋都噉做，就表明自己係同佢聯合嘅。 6 邊個話自己時刻同佢聯合，噉基督點樣處世為人*，呢個人都應該點樣處世為人。

7 親愛嘅弟兄姊妹，我而家寫俾你哋嘅，唔係新誡命，而係舊誡命，係你哋一開始就有㗎嘞。呢條舊誡命就係你哋聽過嘅說話。 8 不過，我而家寫俾你哋嘅，其實都係新誡命，係基督同你哋都遵守*嘅。而家黑暗消逝緊，真光已經照耀嘞。

9 邊個話自己喺亮光之中，但係憎恨自己嘅弟兄*，就仲喺黑暗之中。 10 愛弟兄嘅，就留喺亮光之中，冇嘢會令佢失足跌倒*。 11 憎恨弟兄嘅，就喺黑暗之中，亦都喺黑暗中行走，唔知道自己要去邊度，因為黑暗令佢對眼睇唔到嘢。

12 我嘅仔女啊，由於基督嘅名，你哋嘅罪已經得到寬恕，所以我寫信俾你哋。 13 各位父老，我寫信俾你哋，因為你哋認識最初就存在嘅嗰位。各位年輕人，我寫信俾你哋，因為你哋戰勝咗撒但*。我嘅仔女啊，我寫信俾你哋，因為你哋認識咗天父。 14 各位父老，我寫信俾你哋，因為你哋認識最初就存在嘅嗰位。各位年輕人，我寫信俾你哋，因為你哋係堅強嘅，上帝嘅話語幾時都喺你哋心入面，你哋亦都戰勝咗撒但*。

15 唔好愛呢個世界同世界嘅事。邊個愛世界，對天父嘅愛就唔喺佢心入面； 16 因為世界嘅一切，例如肉體嘅慾望、眼睛嘅慾望、炫耀財物嘅行為，都唔係源自天父㗎，而係源自世界㗎。 17 呢個世界同世界嘅慾望已經消逝緊，但係遵從上帝旨意嘅人就永遠長存。

18 我嘅仔女啊，而家係最後嘅時刻嘞。你哋都聽過會有基督嘅敵人出現，其實而家已經有好多基督嘅敵人。呢個證明而家就係最後嘅時刻。 19 佢哋從我哋呢度出去，不過就唔係屬於我哋嘅*。佢哋如果係屬於我哋嘅，就會留喺我哋當中。不過佢哋離開咗，即係話，唔係所有人都屬於我哋。 20 你哋受到嗰位聖者任命*，人人都有知識。 21 我寫信俾你哋，唔係因為你哋唔認識真理，而係因為你哋認識，亦都因為冇大話係源於真理㗎。

22 噉講大話嘅係邊個呢？唔係就係否認耶穌係基督嘅嗰個咩？否認天父同上帝個仔嘅，就係基督嘅敵人。 23 邊個否認上帝個仔，佢就得唔到天父嘅認可*。邊個承認上帝個仔，佢就有天父嘅認可。 24 你哋要將一開始就聽到嘅，時刻留喺心入面。你哋一開始就聽到嘅，如果時刻留喺心入面，你哋就時刻同上帝個仔聯合，亦都同天父聯合。 25 上帝*承諾賜俾我哋嘅，就係永遠嘅生命。

26 我寫呢啲說話俾你哋，係因為有啲人企圖誤導你哋。 27 上帝用佢嘅神聖力量任命咗*你哋，呢股力量時刻留喺你哋裡面，你哋唔需要任何人教導。佢嘅呢股力量係真嘅，唔係假嘅*，教導緊你哋所有嘢。你哋要按照呢股力量嘅教導，時刻同佢聯合。 28 我嘅仔女啊，你哋要時刻同佢聯合。噉佢返嚟呢度嘅時候*，喺佢顯現嗰陣，我哋就可以充滿信心*噉發言，唔會因為羞愧而喺佢面前退縮。 29 你哋既然知道佢係正義嘅，就知道所有行事正義嘅，都已經從上帝而生嘞。