UmShumayeli

11 Phonsa isinkwa sakho emanzini, + ngoba uyophinde usithole ngemva kwezinsuku eziningi. + 2 Yipha* abantu abayisikhombisa noma ngisho abangu-8, + ngoba awazi ukuthi iyiphi inhlekelele eyoba khona emhlabeni.

3 Uma amafu egcwele amanzi, ayokwehlisa imvula emhlabeni; uma isihlahla siwela eningizimu noma enyakatho, endaweni esiwela kuyo yilapho esiyolala khona.

4 Obheka umoya ngeke ahlwanyele mbewu, nalowo obheka amafu ngeke avune. +

5 Njengoba nje ungazi ukuthi umoya usebenza kanjani emathanjeni osana olusesiswini* sowesifazane okhulelwe, + awuwazi nomsebenzi kaNkulunkulu weqiniso, owenza zonke izinto. +

6 Hlwanyela imbewu yakho ekuseni, ungasivumeli isandla sakho siphumule kuze kube kusihlwa; + ngoba awazi ukuthi iyiphi eyohluma, ukuthi yilena noma yileya, noma ukuthi ziyohluma zombili yini.

7 Kumnandi ukukhanya, kuhle nokuthi amehlo abone ilanga. 8 Ngoba uma umuntu ephila iminyaka eminingi, makayijabulele yonke. + Kodwa kufanele akhumbule ukuthi izinsuku zobumnyama zingase zibe ziningi; konke okuzolandela kuyize. +

9 Jabula nsizwa ebusheni bakho, inhliziyo yakho mayijabule ezinsukwini zobusha bakho. Hamba ezindleleni zenhliziyo yakho, uye lapho amehlo akho ekuholela khona; kodwa yazi* ukuthi uNkulunkulu weqiniso uyokwahlulela* ngenxa yazo zonke lezi zinto. + 10 Ngakho khipha ukukhathazeka enhliziyweni yakho, ugweme izinto ezilimazayo emzimbeni wakho, ngoba ubusha nobungqabavu bokuphila kuyize. +