Tok Blong Jeova i Wan Samting We i Laef

Ol Bigfala Poen Long Buk Blong Esikel—Haf 2

LONG manis Disemba blong yia 609 B.K.T.,a King blong Babilon wetem ol ami blong hem oli kamp raon long Jerusalem blong laswan taem. Mesej we Esikel i talemaot long fashaf blong buk blong hem, go long ol man Isrel we oli wok slef long Babilon. Bigfala tingting blong mesej ya hemia se: ol ami blong Babilon bambae oli spolemgud Jerusalem, we ol man Isrel oli laekem tumas, mo bambae oli flatemgud taon ya. Be naoia, ol profet tok blong Esikel oli tokbaot wan narafala samting. Oli tokbaot trabol we bambae i kasem ol hiten neson from oli glad blong luk we neson blong God i kasem trabol. Afta we 18 manis i pas mo ol ami oli flatemgud Jerusalem, bigfala tingting blong mesej we Esikel i talemaot, i jenis bakegen. Naoia hem i talemaot se: trufala wosip bambae i stanap bakegen.

Esikel 25:1–48:35 i tokbaot ol profet tok long saed blong ol neson raonabaot long Isrel mo olsem wanem God bambae i sevem ol man blong hem.b Olgeta stori long ol japta ya oli folem stret oda olsem we oli hapen long histri, be ol tok long Esikel 29:17-20, hemia nomo we i no hapen semtaem wetem ol samting we ol narafala vas long semfala japta ya oli tokbaot. Be, folem ol profet tok fofala vas ya oli stap long stret ples long buk blong Esikel. From we buk blong Esikel i kamaot long God, tok blong hem i “wan samting we i laef, mo i stap wok.”—Hibrus 4:12.

‘PLES YA I KAM OLSEM GUDFALA PLES YA LONG IDEN’

(Esikel 25:1–39:29)

Ol ami oli no spolem Jerusalem yet, be Jeova i save finis wanem tingting we ol man Amon, Moab, Edom, Filistia, Taea, mo Saedon bambae oli gat long saed blong Jerusalem taem samting ya i hapen long hem. Taswe, Jeova i givim wok long Esikel blong talemaot profet tok blong hem agens long ol neson ya. Ol enemi blong Ijip bambae oli kam stilim olting blong ol man Ijip ya long faet. ‘King blong Ijip wetem ol man blong hem’ oli olsem wan sida we “king blong Babilonia” bambae i katemdaon wetem naef blong faet blong hem.—Esikel 31:2, 3, 12; 32:11, 12.

Long yia 607 B.K.T., sikis manis afta we ol ami oli spolem Jerusalem, wan man we i ronwe long Jerusalem i kam talemaot long Esikel se: “!Ol enemi oli flatemgud Jerusalem finis!” Naoia profet Esikel i “save toktok bakegen” long ol man Isrel we oli wok slef long Babilon. (Esikel 33:21, 22) Hem i gat ol profet tok blong talemaot long saed blong wan taem we bambae ol samting oli kam niu bakegen. Bambae Jeova i “givim wan king long olgeta olsem King Deved.” (Esikel 34:23) Edom bambae i lus, be ples ya Juda, we bifo i bigfala bus, bambae i kam olsem “gudfala ples ya long Iden.” (Esikel 36:35) Jeova i promes long ol man blong hem we oli kambak long kantri blong olgeta se bambae hem i protektem olgeta, blong king ya “Gog” i no winim olgeta.—Esikel 38:2, NW.

Ansa Blong Sam Kwestin Long Saed Blong Baebol:

29:8-12—?Wetaem Ijip i bin stap olsem ples nating blong 40 yia? Afta we ol ami oli spolem Jerusalem long yia 607 B.K.T., ol man Juda we oli stap yet long taon ya oli ronwe oli go long Ijip, nating se profet Jeremaea i givim woning long olgeta blong no mekem olsem. (Jeremaea 24:1, 8-10; 42:7-22) Oli no sef taem oli go long Ijip from we Nebukadnesa i faet agensem Ijip tu mo hem i winim taon ya. Maet afta long faet ya nao, Ijip i bin stap olsem ples nating blong 40 yia. I tru se folem histri, ol man oli no faenem eni samting blong pruvum se Ijip i bin stap olsem ples nating long taem ya, be yumi save sua se samting ya i bin hapen from we Jeova i Man we i mekem ol profet tok blong hem oli kamtru.—Aesea 55:11.

29:18—?Wanem i mekem ‘hea blong ol soldia i kamkamaot evriwan, mo skin blong solda blong olgeta tu i kamkamaot’? Faet we Nebukadnesa i mekem agens long taon ya Taea i longfala mo i strong tumas. From samting ya, hat blong faet blong ol soldia blong Nebukadnesa i ravem hed blong olgeta gogo oli kam bolhed. Mo, skin blong solda blong olgeta i kamkamaot from we oli karem ol samting blong bildim ol wajhaos mo stonwol.—Esikel 26:7-12.

Ol Lesen Blong Yumi:

29:19, 20. From we ol man Taea oli ronwe oli go stap long taon blong olgeta long aelan mo oli karem ol sas samting blong olgeta i go wetem olgeta, i no gat plante samting i stap long Taea we King Nebukadnesa i save tekem. Nating se Nebukadnesa i wan man we i flas mo hem i wan hiten rula we i tingbaot hem wan nomo, Jeova i letem hem i winim Ijip olsem ‘pei blong ol soldia blong’ hem, from we hem i wok blong mekem jajmen blong Jeova i kamtru. I gud we yumi mekem olsem God mo yumi pem ol takis long gavman from ol wok we oli mekem blong givhan long yumi. Yumi mas pem ol takis blong yumi, nomata wanem fasin we ol haeman blong gavman oli gat mo nomata oli yusum mane ya olsem wanem.—Rom 13:4-7.

33:7-9. Grup we i olsem wajman long taem blong yumi—ol tabu Kristin we oli stap yet long wol—mo ol fren blong olgeta, oli neva mas letem wan samting i blokem olgeta blong talemaot gud nius blong Kingdom mo blong givim woning long ol man long saed blong “bigfala trabol” we i stap kam.—Matiu 24:21.

33:10-20. Ol fasin blong Jeova nomo oli stret oltaem. Taswe sipos yumi wantem kasem laef, yumi mas lego ol nogud fasin mo yumi mas obei long wanem samting we God i wantem yumi blong mekem.

36:20, 21. Ol neson raonabaot oli save se ol man Isrel oli ‘ol man blong Jeova’, be fasin blong ol man Isrel i no laenap nating wetem fasin blong Jeova, taswe oli spolem nem blong Jeova long fes blong ol neson ya. I nogud yumi kam ol man blong wosipim Jeova we yumi holem nem blong hem nomo, be laef blong yumi i no laenap nating wetem nem ya.

36:25, 37, 38. Paradaes ya long saed blong spirit we yumi haremgud long hem tede, i fulap wetem “wan bigfala kampani blong ol sipsip” we fasin blong olgeta i klin. Taswe, yumi mas wokhad blong mekem we yumi evriwan long kampani ya, yumi stap klin.

38:1-23, NW. !Ol man blong Jeova oli save gat strong tingting from we Jeova nao bambae i sevem olgeta taem Gog blong Magog i kam faet agens long olgeta! Gog i nem blong Devel Setan “we i stap rulum wol ya.” Hem i karem nem ya stat long taem ya we Jisas i sakemaot hem long heven. Kantri ya Magog i minim wol ya, hemia nao ples we Setan mo ol rabis enjel blong hem oli kam stap long hem taem Jisas i sakemaot olgeta long heven.—Jon 12:31; Revelesen 12:7-12.

“LESIN GUD LONG OLGETA SAMTING WE BAMBAE MI SOEMAOT LONG YU NAOIA”

(Esikel 40:1–48:35)

Long namba fotin yia afta long taem ya we ol enemi oli go spolem Jerusalem, Jeova i toktok long Esikel bakegen. (Esikel 40:1) Fifti sikis yia i stap yet blong ol man Isrel oli wok slef long Babilon. (Jeremaea 29:10) Klosap nao Esikel i gat 50 yia blong hem. Long wan vison, Jeova i tekem hem i go long Isrel. Wan man long vison ya i talem long hem se: “Man blong wol ya. Yu mas luklukgud mo yu mas lesin gud long olgeta samting we bambae mi soemaot long yu naoia.” (Esikel 40:2-4) !Esikel i luk wan vison we i mekem hem i glad tumas from we long vison ya hem i luk wan niufala haos blong God!

Naesfala haos ya blong God we Esikel i luk, i gat 6 doa blong hem, 30 rum we oli ples blong kakae, Rum we i Tabu, Rum we i Tabu we i Tabu, wan olta we oli wokem long wud, mo wan olta blong bonem sakrefaes. I gat wan wota we i stap ron i “kamaot” long haos blong Jeova, we biaen hem i kam wan bigbigfala reva. (Esikel 47:1) Esikel i luk wan narafala vison long saed blong graon we ol wanwan laen blong Isrel oli kasem—wanwan graon blong olgeta, mak blong hem bambae i stat long is i go kasem wes. Mo i gat wan spesel ples long medel blong graon blong Juda mo Benjamin, we long ples ya i gat ‘haos blong Jeova’ mo “taon ya” we nem blong hem Jeova-Sama, oli stap long hem.—Esikel 48:9, 10, 15, 35, futnot long NW.

Ansa Blong Sam Kwestin Long Saed Blong Baebol:

40:3–47:12—?Haos blong God we Esikel i luk long wan vison i pija blong wanem samting? Man i neva bildim bigbigfala haos ya blong God we Esikel i luk long vison blong hem. Bigfala haos ya i pija blong haos blong God long saed blong spirit—i minim plan blong Jeova long saed blong trufala wosip long taem blong yumi. (Esikel 40:2; Maeka 4:1; Hibrus 8:2; 9:23, 24) Vison ya blong haos blong God i kamtru long “ol las dei,” taem God i mekem grup blong ol pris i kam klin. (2 Timoti 3:1, NW; Esikel 44:10-16; Malakae 3:1-3) Be, bambae vison ya i kamtru fulwan long Paradaes. Vison ya blong haos blong God i bin givim wan promes tu long ol man Jiu we oli wok slef long Babilon. Hemia se bambae trufala wosip i stanap bakegen mo evri famle blong man Jiu bambae oli kasem wan pis graon blong olgeta.

40:3–43:17—?Aksen blong man ya blong makem longfala blong haos blong God i soemaot wanem long yumi? Fasin blong makem longfala blong haos blong God i wan saen blong soemaot se stamba tingting we Jeova i gat long saed blong trufala wosip, i mas kamtru.

43:2-4, 7, 9—?Wanem ol “dedbodi blong ol king” we oli mas tekemaot long haos blong God? Ol dedbodi ya oli minim ol aedol. Ol rula mo ol man blong Jerusalem oli bin mekem haos blong God i doti wetem ol aedol—oli leftemap ol aedol ya olsem se oli ol king blong olgeta.

43:13-20—?Olta ya we Esikel i luk long vison blong hem, i pija blong wanem? Olta ya i wan saen nomo we i minim ol samting we God i wantem mekem, we oli joen wetem ransom sakrefaes blong Jisas Kraes. From ransom sakrefaes ya, ol tabu Kristin oli kam ol stret man long fes blong God, mo ol man blong “bigfala kampani” oli save kam klin long fes blong God. (Revelesen 7:9-14, NW; Rom 5:1, 2) Maet hemia nao from wanem “bigfala raon tang” blong wota we i stap long haos wosip we Solomon i wokem, i no stap long haos wosip ya we Esikel i luk long vison blong hem. “Bigfala raon tang” ya i wan bigbigfala raon besin we ol pris oli yusum blong wasem han mo leg blong olgeta long hem.—1 King 7:23-26.

44:10-16—?Grup blong ol pris i pija blong hu? Grup blong ol pris i wan sado blong grup blong ol tabu Kristin long taem blong yumi. Long 1918, Jeova i bin lukluk long ol tabu Kristin ya taem hem i kam blong ‘jekem mo klinim’ haos blong hem long saed blong spirit. (Malakae 3:1-5, NW) Olgeta we oli klin finis, no oli bin tanem tingting blong olgeta finis, oli save gohed blong holem wok we God i givim long olgeta blong mekem. Biaen oli mas wokhad blong oli “stap klin oltaem, we bambae ol rabis fasin blong wol i no spolem” olgeta. Taem oli stap klin oltaem oli ol gudfala eksampol long ol man blong “bigfala kampani.” Ol laen blong Isrel we oli no mekem wok blong pris oli pija blong bigfala kampani ya.—Jemes 1:27; Revelesen 7:9, 10, NW.

45:1; 47:13–48:29—?“Graon” mo wok ya blong seraot ol graon, oli pija blong wanem? Graon i pija blong eria we ol man blong God oli stap wok long hem. Nomata wanem ples wan man blong Jeova i stap long hem, sipos hem i gohed blong leftemap trufala wosip hem i stap long graon ya we i niuwan. Wok ya blong seraot ol graon bambae i kamtru fulwan long niufala wol. Long taem ya bambae evri man blong Jeova i gat graon blong hem.—Aesea 65:17, 21.

45:7, 16—?Wanem mining blong presen we ol man i givim long ol pris mo jif? Long haos blong God long saed blong spirit, presen ya i minim sapot we yumi givim long saed blong spirit—taem yumi glad blong givgivhan long yumi mo soemaot fasin ya blong wokgud tugeta.

47:1-5—?Wota blong reva we Esikel i luk long vison blong hem i pija blong wanem samting? Wota ya i pija blong ol samting we Jeova i givim long yumi long saed blong spirit we oli lidim yumi blong kasem laef, olsem ransom sakrefaes blong Jisas Kraes mo save blong God we yumi faenem long Baebol. (Jeremaea 2:13; Jon 4:7-26; Efesas 5:25-27) Plante moa man oli stap joen long trufala wosip, taswe reva ya i stap kam moa dip blong givim samting we olgeta man ya oli nidim. (Aesea 60:22) Long taem blong Taosen Yia Rul blong Kraes, wota blong laef we i stap ron long reva ya bambae i karem moa blesing yet. Mo, wota ya i kam moa dip from we i gat sam moa save we bambae i kamaot long “ol buk” we bambae oli open long taem ya.—Revelesen 20:12; 22:1, 2.

47:12—?Ol tri ya we oli stap karem frut oltaem nomo, oli pija blong wanem? Ol tri ya oli pija blong ol samting long saed blong spirit we God i yusum blong ol man oli kam stretgud olgeta.

48:15-19, 30-35, futnot long NW—?Taon ya we Esikel i luk long vison blong hem i minim wanem? “Jeova-Sama” i stap long graon ya “we i no tabu.” Taswe, hem i pija blong wan samting blong wol ya. Taon ya i minim fasin blong lidim ol wok long wol ya blong givhan long olgeta we bambae oli laef long “niufala wol” we stret fasin nomo i stap long hem. (2 Pita 3:13) Ol bigfala doa we oli stap long evri saed blong taon ya oli soemaot se eni man nomo i save kam insaed. Ol Kristin elda we oli lukaot long ol man blong God oli gat fasin we i mekem se ol man oli no fraet blong kam toktok wetem olgeta.

Ol Lesen Blong Yumi:

40:14, 16, 22, 26. Ol pija blong ol pamtri we oli katem long ol wol klosap long ol doa blong haos blong God, oli soemaot se ol man nomo we laef blong olgeta i stret oli save kam insaed long haos wosip. (Ol Sam 92:12) Samting ya i tijim yumi se Jeova i akseptem wosip blong yumi nomo taem fasin blong yumi i stret.

44:23. !Yumi tangkiu long wok blong olgeta ya we oli olsem grup blong ol pris long taem blong yumi! “Slef we i stret mo waes” i givim ol kakae long saed blong spirit long stret taem we yumi nidim. Kakae ya i givhan long yumi blong luksave wanem i klin mo wanem i no klin long ae blong Jeova.—Matiu 24:45.

47:9, 11. Save, we i wan impoten haf blong wota ya, i stap mekem wan gudgudfala wok blong hilim ol man long taem blong yumi. Taem man i kasem save ya, i olsem we hem i laef bakegen long saed blong spirit. (Jon 17:3) Be, olgeta we oli no akseptem wota ya we i save givim laef, bambae oli “kasem sol”—min se bambae oli lus blong olwe. !I impoten tumas we yumi ‘traehad long evri rod blong kam wan man we i stap tijim ol man long trutok blong God long fasin we i stret gud.’—2 Timoti 2:15.

“Bambae Mi Leftemap Hae Nem Blong Mi”

Afta we trufala God i karemaot laswan king blong laen blong Deved, hem i letem longfala taem i pas bifo we Man ya ‘we God i jusumaot hem’ i kamtru blong rul olsem king. Nating se God i letem longfala taem i pas olsem, hem i no brekem kontrak we hem i bin mekem wetem Deved. (Esikel 21:27; 2 Samuel 7:11-16) Profet tok blong Esikel i tokbaot “Deved, we i man blong wok blong [God],” se hem i kam wan “man blong lukaot sipsip” mo wan “king.” (Esikel 34:23, 24; 37:22, 24, 25) Man ya hem i Jisas Kraes we i rul olsem king blong Kingdom. (Revelesen 11:15) Bambae Jeova i yusum Kingdom ya blong Mesaea blong ‘soemaot se hae nem blong hem i tabu we i tabu.’—Esikel 36:23.

Naoia yumi klosap nomo long taem ya we olgeta man we oli stap spolem tabu nem blong God bambae oli lus. Be, olgeta we oli wosipim Jeova long fasin we i stret, mo fasin blong laef blong olgeta i givim ona long nem blong hem, bambae oli kasem laef we i no save finis. Taswe, yumi wantem yusum fulwan wota blong laef we i ron bigwan long taem blong yumi mo yumi wantem mekem trufala wosip i kam stamba samting long laef blong yumi.

[Ol Futnot]

[Tok blong pija long pej 19]

Naesfala haos blong God long vison blong Esikel

[Tok blong pija long pej 20]

?Reva blong laef we Esikel i luk long vison blong hem i pija blong wanem samting?

[Credit Line]

Pictorial Archive (Near Eastern History) Est.