Tetaplah Kam Sadar Sanga Kesetianndu Iuji

 1. Kai ertina tetap sadar? (2 Timotius 4:5)

SANGA kecewa kita, kesetianta man Jahwe bage pe man organisasiNa banci saja iuji. Kai si arus silakoken? Perlu kita tetap sadar janah nteguh sicikep kinitekenta. (Baca 2 Timotius 4:5.) Gelah tetap kita sadar, perlu kita tetap tenang, rukur alu mehuli, janah siusih perukuren Jahwe bas ngenen sada situasi. Alu bage, carata rukur la ipengaruhi perasanta.

 2. Kai kari sibahas bas artikel enda?

² Bas artikel sebelumna, enggo sibahas telu tentangen si rehna arah si la saksi si banci nguji kesetianta man Jahwe. Bas artikel enda, sibahas kari telu hal si terjadi bas runggun si banci nguji kesetianta: (1) sanga siakap la mehuli perbahanen turang seninata man banta, (2) sanga kita idisiplin, ras (3) sanga lit perubahen bas organisasi. Kai si arus silakoken gelah tetap kita sadar ras tetap setia man Jahwe bage pe man organisasiNa sanga siadapi tentangen si bage?

 3. Uga nge perasanta sanga siakap la mehuli perbahanen turang seninata man banta?

³ Pernah nge akapndu la mehuli perbahanen turang senina man bandu? Banci saja kecewa kam iban turang senina si lit tanggung jawapna bas runggun, misalna bagi pertua. Mungkin labo ia sengaja nakiti kam. (Rom. 3:23; Jak. 3:2) Tapi, enggo sempat kam sakit hati. Banci saja la kam banci medem perban ngukuri kerna si e janah tersungkun-sungkun kam, ‘Engkai maka bas organisasi Jahwe lit kalak si bage perbahanenna? Tuhu kin enda organisasi Dibata?’ Bage me ate Setan perukurenta. (2 Kor. 2:11) Perukuren negatip si bage banci nirangken kita arah Jahwe ras organisasiNa. Emaka, adi lit siakap turang seninata si la mehuli perbahanenna man banta, kai si arus silakoken gelah tetap kita sadar ras la negatip perukurenta?

 4. Kai si ilakoken Jusup sanga la mehuli perbahanen kalak man bana, janah kai pelajarenna man banta? (Kejadin 50:19-21)

⁴ Ula lalap siinget-inget kesalahen kalak. Sanga Jusup nguda denga, la mehuli perbahanen abang-abangna man bana. Segat kel ate kalak e ia, janah lit ka si atena munuh ia. (Kej. 37:4, 18-22) Bas pudi wari idayaken kalak e ia jadi budak, janah lit kira-kira 13 tahun dekahna iadapina erbage-bage masalah si mberat. Banci saja akapna la keleng ate Jahwe ia, janah tadingken Jahwe ia sanga perlu penampat. Tapi labo bage perukuren Jusup. Labo ka inget-ingetna kesalahen kalak. Tetap ia tenang janah usahakenna gelah banci ia rukur alu mehuli. Labo masalahna lalap si iukurina tapi ukurina kai sura-sura Jahwe. Sanga lit kesempatenna balas dendam man abang-abangna, la lakokenna. Tapi, keleng atena kalak e janah ampunina. (Kej. 45:4, 5; baca Kejadin 50:19-21.) Kai pelajarenna? Adi la mehuli perbahanen kalak man banta, ula sisalahken Jahwe ntah pe siakap maka tadingkenNa kita. Siukurilah uga Jahwe nampati kita megenggeng ngadapi masalah e. Siusahakenlah ngampuni kalak si la mehuli perbahanenna man banta. Ingetlah, “kekelengen nutupi melala dosa.”​—1 Pet. 4:8.

 5. Kai si ilakoken Miko sanga iakapna la mehuli perbahanen kalak man bana?

⁵ Perdiateken pengalamen sekalak pertua arah Amerika Selatan si gelarna Miko.b Pernah iakapna la mehuli perbahanen piga-piga turang senina si lit tanggung jawapna. Nina, “La pernah bagenda aku stresna. Kuatir kel aku. La aku banci medem, janah ngandung aku perban la kuakap banci kulakoken kai pe.” Tapi, tetap Miko tenang janah usahakenna ngendaliken perasanna. Rusur ia ertoto, pindona kesah si badia ras gegeh guna tetap megenggeng. Idaramina ka informasi bas publikasi si banci nampati ia. Kai pelajarenna? Adi akapndu la mehuli perbahanen turang senina man bandu, tetaplah kam tenang ras kendalikenlah perasanndu. Banci saja labo tehndu engkai maka pengerana ntah pe perbahanen kalak si deban la mehuli. Emaka ertotolah kam man Jahwe. Pindolah penampatNa gelah banci angkaindu perukuren kalak si deban. Alu bage, la iakapndu sengaja kalak si deban ngelakoken si la mehuli man bandu janah banci ampunindu ia. (Kua. 19:11) Ingetlah, iteh Jahwe situasindu, janah iberekenNa kam gegeh gelah banci tetap megenggeng.​—2 Kro. 16:9; Peng. 5:8.

 6. Engkai maka perlu siinget maka disiplin eme bukti kekelengen Jahwe? (Heber 12:5, 6, 11)

⁶ Disiplin banci erban kitik ukurta ras sedih kel siakap. Tapi adi bage lalap perasanta, banci mulai siakap disiplin e la adil ras lebihsa. Dungna lanai siinget maka disiplin e bukti kekelengen Jahwe man banta. (Baca Heber 12:5, 6, 11.) Adi sipediat perasanta si ngendaliken kita, sibereken kesempaten man Setan guna nyerang kita. Atena situlak min disiplin janah dungna reh dauhna kita arah Jahwe ras runggun. Adi dat disiplin kam, uga carana gelah banci kendalikenndu perasanndu?

 7. (a) Bagi bas gambar, kai hasilna sanga nggit Petrus idisiplin? (b) Kai pelajarenna man banta?

⁷ Alokenlah disiplin, janah robahlah kam. Labo sekali ngenca inasehati Jesus Petrus i lebe-lebe rasul si deban. (Mrk. 8:33; Luk. 22:31-34) Pasti mela kel akap Petrus sanga si e! Tapi, tetap ia setia man Jesus. Alokenna disiplin e janah erlajar ia arah kesalahenna. Dungna, iupahi Jahwe ia janah bereNa tanggung jawap si penting bas runggun. (Joh. 21:15-17; Perb. 10:24-33; 1 Pet. 1:1) Kai pelajarenna? Adi idisiplin kam, ula lalap ukurindu perasan si erban kam mela. Tapi alokenlah disiplin e janah robahlah kam. Alu bage, gejapkenndu me gunana janah reh buena si banci lakokenndu man Jahwe ras runggun.

8-9. Uga perasan Bernad sanga ia idisiplin, janah kai si nampati ia gelah benar perukurenna?

⁸ Perdiateken pengalamen Bernad, sekalak turang seninata i Mozambik. Idisiplin ia janah lanai jadi pertua. Uga perasan Bernad? Nina, “Tangtangna merawa teku perban aku idisiplin.” Kuatir ia negatip kari perukuren turang senina bas runggun nandangi ia. Nina ka, “Piga-piga bulan dekahna maka banci benar perukurenku kerna disiplin e, ras gelah tek ka mulihi man Jahwe ras organisasiNa.” Kai si nampati Bernad gelah benar perukurenna?

⁹ Iperobahi Bernad perukurenna. Nina, “Sanga aku jadi pertua, kugunaken Heber 12:7 guna nampati kalak gelah benar perukurenna sanga idisiplin Jahwe. Gundari kuukuri, ‘Ise si perlu ndalanken ayat e?’ Kerina umat Jahwe, termasuk aku.” Dungna, ilakoken Bernad ka perubahen si erban ia tek mulihi man Jahwe ras organisasiNa. Reh rusurna ia mbaca Pustaka ras ngukurisa. Amin pe kuatir denga ia negatip perukuren turang senina man bana, tapi tetap ia erberita ras kalak e janah mere komentar bas perpulungen. Dungna, ilantik ka Bernad jadi pertua. Bagi Bernad, nggitlah kam ngaloken disiplin, ula ukurindu lalap perasan si erban kam mela, nggitlah kam inasehati, ras banlah perubahen.c (Kua. 8:33; 22:4) Adi lakokenndu e, pasti kam pasu-pasu Jahwe perban tetap setia man baNa ras organisasiNa.

10. Perubahen kai nge si banci saja nguji kesetian kalak Israel mbarenda?

¹⁰ Sanga lit perubahen bas organisasi, e banci nguji kesetianta. Adi la sialoken perubahen e, e banci nirangken kita arah Jahwe. Cuba perdiateken perubahen si terjadi bas jaman Israel. Sope lenga lit Undang-Undang Musa, kepala keluarga me si ngelakoken tugas imam. Iban kalak e ingan persembahen ras ipersembahken kalak e korban man Jahwe guna keluargana. (Kej. 8:20, 21; 12:7; 26:25; 35:1, 6, 7; Jop 1:5) Kenca lit Undang-Undang Musa, lanai ilakoken kepala keluarga si e kerina. Enggo ilantik Jahwe keluarga Harun jadi imam guna mpersembahken korban. Kenca si e, adi lit kepala keluarga si labo keturunen Harun ngelakoken tugas imam, banci ia ihukum mate.d (Im. 17:3-6, 8, 9) E nge si erbanca Korah, Datan, Abiram, ras 250 peminpin Israel nentang Musa ras Harun? (Bil. 16:1-3) La siteh pastina. Tapi si jelas, Korah ras kalak si ikut ras ia la setia man Jahwe. Adi lit perubahen bas organisasi si banci nguji kesetianndu, kai nge si perlu ilakokenndu?

11. Kai si banci sipelajari arah piga-piga kalak Lewi keturunen Kohat?

¹¹ Dukunglah kerina perubahen bas organisasi. Sanga kalak Israel bas taneh mesawang, penting kel tugas keturunen Kohat. Tiap pindah perkemahen kalak Israel, piga-piga keturunen Kohat itugasken ngangkat peti perjanjin i lebe-lebe kerina kalak Israel. (Bil. 3:29, 31; 10:33; Jos. 3:2-4) Si e tuhu-tuhu tugas si istimewa! Tapi sanga kalak Israel seh bas taneh si ijanjiken, situasina enggo berubah. Peti perjanjin lanai perlu ipindah-pindahken. Emaka, sanga Raja Salomo merentah, keturunen Kohat lit itugasken jadi penyanyi, penjaga gerbang, ras ngurus gudang. (1 Kro. 6:31-33; 26:1, 24) La lit ikataken bas Pustaka maka jungut-jungut keturunen Kohat ntah pe pindona tugas si lebih mehaga. Kai pelajarenna? Dukunglah perubahen si lit bas organisasi Jahwe, termasuk perubahen si lit pengaruhna ku tugasndu. Ermeriah ukurlah kam la soal kai pe tugas si ibereken man bandu. Ingetlah maka labo perban tugasndu maka meherga kam akap Jahwe. Pentingen akap Jahwe kepatuhenndu asangken tugas kai pe si ilakokenndu.​—1 Sam. 15:22.

12. Uga nge perasan Zaina sanga berubah tugasna?

¹² Perdiateken pengalamen Zaina, sekalak turang seninata arah Timur Tengah. Enggo lebih 23 tahun ia ngelayani bas Betel janah meriah akapna ngelakoken tugasna. Dungna, ipindahken ia ku lapangen. Nina, “Sengget kel aku perban perubahen e. La kuakap erguna bangku janah lalap kuukuri kai nge salahku.” Si sedihna akap Zaina, lit ka piga-piga turang seninana si ngataken, “Adi sikap kam erdahin, labo kam ndarat arah Betel.” Piga-piga waktu dekahna, kitik kel ukur Zaina, ngandung ia tiap berngi. Tapi nina, “La pernah kupediat kai pe erban aku ragu man kekelengen Jahwe bage pe organisasiNa.” Kai si ilakoken Zaina gelah tetap positip perukurenna?

13. Kai si ilakoken Zaina gelah la negatip perukurenna?

¹³ Dungna lanai negatip perukuren Zaina. Kai si lakokenna? Ibacana artikel-artikel si lit bas publikasita si lit hubungenna ras situasina. Contohna, artikel bas Menara Pengawal 1 Februari 2001 si erjudul “Saudara Dapat Mengatasi Perasaan Kecil Hati!” Bas artikel e ijelasken maka Markus penulis Pustaka banci saja pernah kitik ukurna sanga berubah tugasna. Nina Zaina, “Contoh Markus bali bagi tambar si mpepalem pusuhku si luka.” Zaina pe terus ndeher ras teman-temanna. Labo ia nerapken bana, labo ka lalap salahkenna bana. Tehna maka kesah si badia kap si negu-negu organisasi Jahwe. Tehna ka maka turang senina si lit tanggung jawapna ermediate kel man bana. Iangkaina ka maka kerina keputusen organisasi Dibata tujunna guna ndukung Kerajan Dibata.

14. Perubahen kai si mesera akap Vlado ngadapisa, janah kai si nampati ia?

¹⁴ Vlado eme sekalak pertua arah Slovenia, si umurna 73 tahun. Mesera kel akapna sanga lit perubahen. Runggunna ipersada ras runggun si deban janah Bale Kerajan si biasa je kalak e perpulungen lanai ipake. Nina, “La kuangka engkai maka Bale Kerajan si bage jilena lanai ipake. Sedih kel kuakap perban mbaru denga irenovasi kami Bale e. Dahinku tukang, janah enggo kuban piga-piga barang-barang man Bale e. Selain si e, mesera iakap perberita si enggo metua bagi kami ngikutken perubahen.” Tapi kai si nampati Vlado ndukung perubahen e? Nina, “Adi sidukung pengaturen si iban organisasi Jahwe, lalap nge kita ipasu-pasu. Perubahen e nampati kita gelah siap ngadapi perubahen si terbelinen bas wari si pepagi.” Mesera nge kapndu ngikutken perubahen adi ipersada runggunndu ntah pe datndu tugas si mbaru? Teklah maka iangkai Jahwe perasanndu. Sanga idukungndu perubahen si terjadi janah tetap kam setia man Jahwe ras organisasiNa, ipasu-pasu me kam.​—Ms. 18:25.

15. Kai si banci ilakokenndu gelah tetap sadar sanga lit tentangen bas runggun?

¹⁵ Reh deherna kita ku kedungen jaman enda, reh buena tentangen bas runggun. Tentangen-tentangen e banci nguji kesetianndu man Jahwe. Emaka, tetaplah kam sadar. Adi akapndu la mehuli perbahanen turang senina man bandu, ula lalap inget-inget kesalahen kalak e. Adi sangana kam idisiplin, ula lalap ukurindu perasan si erban kam mela, alokenlah nasehat si ibereken, janah banlah perubahen. Sanga lit perubahen bas organisasi Jahwe si lit pengaruhna man bandu, alokenlah janah patuhilah e alu bulat ukur.

16. Kai si banci lakokenndu gelah tetap tek man Jahwe ras organisasiNa?

¹⁶ Sanga kesetianndu iuji banci kam tetap tek man Jahwe ras organisasiNa. Guna ngelakokensa, perlu kam tetap sadar. Maksudna, tetap kam tenang, rukur alu mehuli, janah usihndu perukuren Jahwe bas ngenen sada situasi. Pelajarilah ras ukurilah pengalamen kalak si lit bas Pustaka si berhasil ngadapi situasi si seri ras situasindu. Ertotolah man Jahwe mindo penampat. Ula pernah peserapndu bandu arah runggun. Adi lakokenndu si e, la soal kai pe si terjadi, labo banci sirangken Setan kam arah Jahwe ras organisasiNa.​—Jak. 4:7.