Marko

13 Esi wòle dodom le gbedoxɔa me la, eƒe nusrɔ̃lawo dometɔ ɖeka gblɔ nɛ be: “Nufiala, kpɔ kpe siawo kple xɔ siawo gbegbe ɖa!”+ 2 Ke Yesu gblɔ nɛ be: “Èle xɔ gãgã siawo kpɔma? Womele kpe aɖeke gblẽ ge ɖe kpe dzi le afi sia, si womamu aƒu anyi o.”+

3 Esi wòbɔbɔ nɔ Amitoa dzi dze ŋgɔ gbedoxɔa la, Petro, Yakobo, Yohanes kple Andrea ɖeɖe va biae be: 4 “Gblɔe na mí, ɣekaɣie nu siawo adzɔ, eye nu kae anye nu siawo katã ƒe nuwuɣi ƒe dzesi?”+ 5 Eye Yesu gblɔ na wo be: “Mikpɔ nyuie be ame aɖeke nagaflu mi o.+ 6 Ame geɖewo ava yɔ nye ŋkɔ ɖe wo ɖokuiwo ŋu agblɔ be: ‘Nyee,’ eye woaflu ame geɖewo. 7 Eye ne miese aʋawɔwɔwo kple aʋawɔwɔwo ŋu nyawo la, dzika megatso mia ƒo o; ele be nu siawo nava eme, gake nuwuwu la meɖo haɖe o.+

8 “Elabena dukɔ atso ɖe dukɔ ŋu, eye fiaɖuƒe ɖe fiaɖuƒe ŋu;+ anyigba aʋuʋu le teƒeteƒewo; nuɖuɖu hã ave.+ Nu siawo nye fuɖuame ƒe gɔmedzedze.+

9 “Ke miawo la, mikpɔ mia ɖokui dzi nyuie. Amewo akplɔ mi ayi ʋɔnudrɔ̃ƒewo,+ eye woaƒo mi le ƒuƒoƒewo,+ eye woana miatsi tsitre ɖe nutodziɖulawo kple dufiawo ŋkume le tanye, ne wòanye ɖaseɖiɖi na wo.+ 10 Eye ele be woaɖe gbeƒã nya nyui la le dukɔwo katã me gbã.+ 11 Ke ne wokplɔ mi yina ʋɔnudrɔ̃ƒe la, migatsi dzimaɖi le nya si miagblɔ ŋu o; ke boŋ nya sia nya si woana mi le gaƒoƒo ma me la, migblɔe, elabena menye miawoe le nu ƒom o, ke boŋ gbɔgbɔ kɔkɔe lae.+ 12 Gawu la, nɔvi ade nɔvi asi be woawu, eye fofo ade vi asi, eye ɖeviwo atso ɖe wo dzilawo ŋu ahana woawu wo.+ 13 Eye amewo katã alé fu mi le nye ŋkɔ la ta.+ Ke ame si do dzi va se ɖe nuwuwu+ la, eyae akpɔ ɖeɖe.+

14 “Ke ne miekpɔ ŋunyɔnu si ahe aƒedozuzu vɛ+ la wòle afi si mele be wòanɔ o la, (nuxlẽla newɔ gɔmesese ŋu dɔ) ekema ame siwo le Yudea nasi ayi towo dzi.+ 15 Ame si le xɔ ta la megaɖi alo ayi eme be yeatsɔ nane tso yeƒe xɔ me o, 16 eye ame si le agble la nagatrɔ agbɔ be yeatsɔ yeƒe awudziwui o. 17 Baba na funɔwo kple ame siwo le no nam vi le ŋkeke mawo me!+ 18 Minɔ gbedodoɖa dzi be miaƒe sisiɣi nagadze vuvɔŋɔli me o; 19 elabena ŋkeke mawo anye xaxa+ si tɔgbi meva kpɔ tso esime Mawu wɔ xexea va se ɖe fifi o, eye etɔgbi megale vava ge ake o.+ 20 Le nyateƒe me la, ne ɖe Yehowa* metso ŋkeke mawo dzi o la, ŋutilã aɖeke makpɔ ɖeɖe o. Ke le ame tiatiawo ta la, etso ŋkeke mawo dzi.+

21 “Eye ne ame aɖe gblɔ na mi be, ‘Kpɔ ɖa, Kristo la le afii!’ alo ‘Kpɔ ɖa, eyae nye ema ɖaa!’ la, migaxɔe se o.+ 22 Elabena aʋatsokristowo kple aʋatsonyagblɔɖilawo ado,+ eye woawɔ dzesiwo kple nukunuwo bena, ne woate ŋui la, woaflu ame tiatiawo. 23 Eya ta minɔ ŋudzɔ.+ Mena toklã mi tso nya sia nya ŋu.

24 “Ke le ŋkeke mawo me le xaxa ma megbe la, ɣe ado viviti, eye ɣleti magaɖi o,+ 25 ɣletiviwo anɔ gegem tso dziƒo, eye woaʋuʋu dziƒowo ƒe ŋusẽwo. 26 Ɣemaɣi la, woakpɔ Amegbetɔvi la+ le alilikpowo me gbɔna kple ŋusẽ gã kpakple ŋutikɔkɔe.+ 27 Eye wòadɔ mawudɔlawo ɖa wòaƒo eƒe ame tiatiawo nu ƒu tso anyigba ƒe dzogoe eneawo dzi,* tso anyigba ƒe seƒe va se ɖe dziƒo ƒe seƒe ke.+

28 “Ke misrɔ̃ nu sia tso gboti ŋu: Ne eɖe alɔ fẽwo, eye wònya to aŋgbawo ko la, mienyana be dzomeŋɔli gogo.+ 29 Nenema kee ne miekpɔ nu siawo le dzɔdzɔm la, minyae be Amegbetɔvi la gogo ʋɔtruawo nu.+ 30 Vavã mele egblɔm na mi be, dzidzime sia nu mele yiyi ge akpɔ o, va se ɖe esime nu siawo katã va eme.+ 31 Dziƒo kple anyigba nu ava yi,+ ke nye nyawo ya nu mava yi akpɔ o.+

32 “Le ŋkeke ma alo gaƒoƒo la ŋuti la, ame aɖeke menyae o, mawudɔla siwo le dziƒo la menyae o, eye Vi la hã menyae o, negbe Fofo la ko.+ 33 Mikpɔ nyuie, minɔ ŋudzɔ,+ elabena mienya ɣeyiɣi ɖoɖi la o.+ 34 Ele abe ŋutsu aɖe si zɔ mɔ yi duta, eye wògblẽ eƒe aƒe ɖi la ene. Ena ŋusẽ eƒe kluviwo,+ ede dɔ asi na wo dometɔ ɖe sia ɖe, eye wòde se na agbonudzɔla la be wòanɔ ŋudzɔ.+ 35 Eya ta minɔ ŋudzɔ, elabena mienya ɣekaɣi aƒetɔ la le vava ge o,+ eɖanye fiẽ alo zãtiƒe alo do ŋgɔ na fɔŋli* alo ŋdi kanya o;+ 36 ale be ne eva ɖo le vo me la, wòagakpɔ mi le alɔ̃ me o.+ 37 Ke nya si gblɔm mele na mi la, amewo katãe mele egblɔm na be: Minɔ ŋudzɔ.”+