Daniel

12 “Sina nga tion magahulag* si Miguel*+ nga gamhanan nga prinsipe+ nga nagatindog para sa imo katawhan.* Magaabot ang tion sang kagamo nga wala pa gid matabo halin sang gintukod ang mga pungsod. Sa sina nga tion maluwas ang tanan sa imo katawhan+ nga nasulat sa libro sang Dios.*+ 2 Madamo ang magamata halin sa yab-ok sang duta. Ang iban magabaton sing kabuhi nga wala sing katapusan kag ang iban pakahuy-an kag pakamalauton tubtob san-o.

3 “Ang mga may paghangop magasilak pareho sang kasanag sang kahawaan, kag ang mga nagabulig sa madamo nga mangin matarong magasilak pareho sang mga bituon tubtob sa wala sing katubtuban.

4 “Apang ikaw Daniel, isira lang anay ang libro kag isekreto ang nasulat sa sini tubtob sa tion sang katapusan.+ Madamo ang magapakadto-pakari* kag ang matuod nga ihibalo magabugana.”+

5 Dayon ako, si Daniel, nakakita nga may duha pa ka anghel nga nagatindog sa pihak kag pihak nga pangpang sang sapa.+ 6 Ang isa sa ila nagpamangkot sa tawo nga nagasuksok sing linen+ kag nagatindog sa ibabaw sang sapa: “Daw ano kadugay tubtob matuman ining makatilingala nga mga butang?” 7 Dayon nabatian ko ang tawo nga nagasuksok sing linen kag nagatindog sa ibabaw sang sapa samtang ginabayaw niya ang iya tuo kag wala nga kamot sa langit nga nagapanumpa sa Isa nga nagakabuhi sing dayon:+ “Matuman ini sa gintalana nga tion, gintalana nga mga tion, kag tunga sa tion.* Kon matapos na ang pagdugmok sa gahom sang balaan nga katawhan,+ matuman na ining tanan nga butang.”

8 Wala ko mahangpan ang akon nabatian,+ gani nagpamangkot ako: “O ginuo ko, ano ang mangin katapusan sining tanan nga butang?”

9 Nagsiling sia: “Lakat ka, Daniel, kag isira lang anay ang libro kag isekreto ang nasulat sa sini tubtob sa tion sang katapusan.+ 10 Madamo ang magatinlo kag magapaputli sang ila kaugalingon kag pagatilawan.+ Ang mga malauton magahimo sing malaut. Wala gid sing malauton nga makahangop sini, apang ang mga may paghantop makahangop sini.+

11 “Halin sa tion sang pagkuha sa adlaw-adlaw nga halad+ kag pagbutang sing makangilil-ad nga butang nga ginabangdan sang kahapayan,+ may 1,290 ka adlaw.

12 “Malipayon ang nagahulat tubtob sa katapusan sang 1,335 ka adlaw!

13 “Apang ikaw, magmalig-on ka tubtob sa katapusan. Magapahuway ka, apang magatindog ka para sa imo bahin sa katapusan sang mga adlaw.”+