Epai ya Baefese
2 Lisusu, Nzambe azongisi bino na bomoi atako bokufaki na mabunga na bino mpe na masumu na bino,+ 2 oyo bozalaki kosala ntango bozalaki kosala makambo na kolanda mokili oyo.*+ Bozalaki kotambwisama na kolanda mokonzi ya nguya ya mopɛpɛ,+ elimo+ oyo ezali sikoyo kosala mosala na kati ya bana oyo bazangi botosi. 3 Ɛɛ, na kati na bango biso nyonso tozalaki komitambwisa kala na kolanda bamposa ya nzoto na biso.+ Tozalaki kosala makambo oyo nzoto mpe makanisi ezalaki kolinga,+ mpe tozalaki mpenza bana ya nkanda+ lokola bato mosusu. 4 Kasi Nzambe, ndenge atondi mpenza na motema mawa,+ mpo na bolingo na ye monene oyo alingaki biso,+ 5 azongisaki biso na bomoi elongo na Kristo, ata ntango tozalaki naino bakufi mpo na mabunga na biso;+ na nzela ya boboto monene nde bobikisami. 6 Lisusu, azongisaki biso na bomoi elongo na ye* mpe afandisaki biso elongo na ye* na bisika ya likoló na bomoko elongo na Kristo Yesu.+ 7 Nzambe asali yango mpo ete na mokili ya sika oyo ezali koya,* akomonisa bomɛngo ya boboto monene na ye oyo eleki nyonso wana azali kosalela biso makambo ya malamu, biso baoyo tozali na bomoko elongo na Kristo Yesu.
8 Na boboto monene wana nde bobikisami na nzela ya kondima,+ mpe kobika yango euti na bino te, ezali nde likabo ya Nzambe. 9 Ɛɛ, euti na misala te,+ mpo moto moko te azwa ntina ya komikumisa. 10 Mpo Nzambe nde asalá biso,* mpe azalisaki biso+ na bomoko elongo na Kristo Yesu+ mpo na misala ya malamu, oyo Nzambe abongisá liboso mpo biso tótambola na yango.
11 Na yango, bóbosana te ete kala bino bato ya bikólo na mosuni, bobengamaki bato ya “kozanga kokatama ngenga” epai ya baoyo babengami bato ya “kokatama ngenga,” oyo esalemi na mosuni na mabɔkɔ ya moto. 12 Na ntango wana bozalaki na Kristo te, botangwaki mosika na ekólo ya Yisraele, bozalaki bapaya na kondimana ya elaka;+ bozalaki na elikya te mpe bozalaki na Nzambe te na mokili.+ 13 Kasi sikoyo, na bomoko elongo na Kristo Yesu, bino bato oyo kala bozalaki mosika mpenza, bokómi penepene na lisalisi ya makila ya Kristo. 14 Mpo ye azali kimya na biso,+ moto oyo akómisaki bituluku wana mibale eloko moko+ mpe abukaki efelo ya katikati oyo ezalaki kokabola yango.+ 15 Na nzela ya nzoto na ye ya mosuni alongolaki bonguna, Mibeko oyo ezalaki na mitindo mpe na malako, mpo na kosala na bituluku yango mibale oyo ezali na bomoko elongo na ye moto moko ya sika,+ mpe mpo na kotya kimya, 16 mpe koyokanisa mpenza elongo na Nzambe bikólo nyonso wana mibale mpo ezala nzoto kaka moko na nzela ya nzete ya mpasi,*+ mpo abomaki bonguna+ na nzela ya nzoto na ye. 17 Mpe ayaki mpe asakolaki nsango malamu ya kimya epai na bino bato oyo bozalaki mosika, mpe kimya epai ya baoyo bazalaki pene. 18 Mpo na nzela na ye biso, bikólo yango mibale, tozwi nzela ya kopusana epai ya Tata na elimo kaka moko.
19 Na yango, bozali lisusu te bapaya to bato oyo bauti bisika mosusu,+ kasi bozali nde bana-mboka+ esika moko na basantu mpe bozali bato ya ndako ya Nzambe,+ 20 mpe botongami likoló ya moboko ya bantoma mpe basantu,+ nzokande Kristo Yesu ye moko azali libanga ya ntina mingi* ya moboko ya ndako.+ 21 Na bomoko elongo na ye, ndako yango mobimba, lokola esangani liboke moko na boyokani mpenza,+ ezali komata mpo na kokóma tempelo mosantu ya Yehova.*+ 22 Na bomoko elongo na ye, bino mpe bozali kotongama elongo mpo na kozala esika oyo Nzambe azali kofanda na elimo.+