Masalimo

46 Mulungu ndiye pothawira pathu ndi mphamvu yathu,+

Thandizo lopezeka mosavuta pa nthawi ya masautso.+

 2 N’chifukwa chake sitidzaopa, ngakhale dziko lapansi litasintha,+

Ndiponso ngakhale mapiri atagwedezeka ndi kumira m’nyanja yaikulu.+

 3 Ngakhale madzi a m’nyanjayo atawinduka ndi kuchita thovu,+

Ndiponso ngakhale mapiri atagwedezeka chifukwa cha phokoso la nyanja yaikuluyo.+ [Seʹlah.]

 4 Pali mtsinje womwe nthambi zake zimachititsa anthu a mumzinda wa Mulungu kukondwera,+

Chihema chachikulu chopatulika koposa cha Wam’mwambamwamba.+

 5 Mulungu ali pakati pa mzinda.+ Mzindawo sudzagwedezeka.+

Mulungu adzauthandiza m’bandakucha.+

 6 Mitundu ya anthu inachita phokoso,+ maufumu anagwedezeka.

Iye anatulutsa mawu ndipo dziko lapansi linasungunuka.+

 7 Yehova wa makamu ali ndi ife.+

Mulungu wa Yakobo ndiye malo athu okwezeka ndiponso achitetezo.+ [Seʹlah.]

 8 Bwerani anthu inu, onani ntchito za Yehova,+

Onani mmene wakhazikitsira zinthu zodabwitsa padziko lapansi.+

 9 Akuletsa nkhondo mpaka kumalekezero a dziko lapansi.+

Wathyola uta ndi kuduladula mkondo.+

Ndipo watentha magaleta pamoto.+

10 “Gonjerani anthu inu, ndipo dziwani kuti ine ndine Mulungu.+

Ndidzakwezedwa pakati pa anthu a mitundu ina,+

Ndidzakwezedwa padziko lapansi.”+

11 Yehova wa makamu ali ndi ife.+

Mulungu wa Yakobo ndiye malo athu okwezeka ndiponso achitetezo.+ [Seʹlah.]