එස්රා
7 පර්සියාවේ රජු වන අර්තක්ෂස්තාගේ+ පාලන සමයේදී ජීවත් වූ එස්රාගේ පෙළපත් වාර්තාව මෙයයි. එස්රාගේ+ පියා සෙරායාය.+ සෙරායාගේ පියා අෂරියාය. අෂරියාගේ පියා හිල්කියාය.+ 2 හිල්කියාගේ පියා ෂල්ලුම්ය.+ ෂල්ලුම්ගේ පියා සාදොක්ය. සාදොක්ගේ පියා අහිතුබ්ය.+ 3 අහිතුබ්ගේ පියා අමරියාය.+ අමරියාගේ පියා අෂරියාය.+ අෂරියාගේ පියා මෙරායොත්ය.+ 4 මෙරායොත්ගේ පියා සෙරහියාය. සෙරහියාගේ පියා උස්සියාය. උස්සියාගේ පියා බුක්කීය. 5 බුක්කීගේ පියා අබිෂුවාය.+ අබිෂුවාගේ පියා පිනෙහාස්ය.+ පිනෙහාස්ගේ පියා එලියාසර්ය.+ එලියාසර්ගේ පියා නායක පූජක+ ආරොන්ය.+ 6 එස්රා හොඳින් පුහුණුව ලැබූ දක්ෂ පිටපත්කරුවෙකි.+ ඊශ්‍රායෙල්හි දෙවි වන යෙහෝවා මෝසෙස්ට දුන් නීතිය+ ඔහු මැනවින් පිටපත් කළේය. එස්රාට තම දෙවි වූ යෙහෝවාගේ ආශීර්වාද තිබුණු හෙයින් ඔහුගේ ඕනෑම ඉල්ලීමක්+ ඉටු කරන්න රජ කැමති විය. එස්රා බැබිලෝනියෙන් පිටත්ව යෑමට තීරණය කළේය.
7 අර්තක්ෂස්තා+ රජුගේ පාලන සමයේ හත්වන අවුරුද්දේදී ඊශ්‍රායෙල් ජනයාගෙන්ද පූජකයන්ගෙන්ද+ ලෙවීවරුන්ගෙන්ද+ ගායකයන්ගෙන්ද+ දොරටු පාලකයන්ගෙන්ද+ නෙතිනිම්වරුන්ගෙන්ද+ කිහිපදෙනෙක් එස්රා සමඟ යෙරුසලමට ගියෝය. 8 එස්රා ඔවුන් සමඟ යෙරුසලමට පැමිණියේ අර්තක්ෂස්තා රජු පාලනය කළ හත්වන අවුරුද්දේ පස්වන මාසයේදීය. 9 එස්රා බැබිලෝනියේ සිට යෙරුසලම බලා පිටත් වූයේ පළමුවන මාසයේ පළමුවන දිනයේදීය. ඔහුට දෙවිගේ ආශීර්වාදය ලැබුණු නිසා+ පස්වන මාසයේ පළමුවන දිනයේදී ඔහු යෙරුසලමට පැමිණියේය. 10 එස්රා යෙහෝවා දෙවිගේ නීතිය+ සෝදිසි කර බැලීමට තම සිත යොමු කළේය.+ එහි සඳහන් දේ හොඳින් පිළිපැදීමටත්+ ඊශ්‍රායෙල්වරුන්ට දෙවිගේ අණපනත්+ හා යුක්තිය+ ගැන ඉගැන්වීමටත්+ ඔහු තම සිතින් අදිටන් කරගත්තේය.
11 යෙහෝවා දෙවි ඊශ්‍රායෙල් සෙනඟට දුන් අණපනත් සහ නීතිරීති පිටපත්+ කළ පූජක එස්රාට අර්තක්ෂස්තා රජු ලිපියක් භාර දී තිබිණ. එහි සඳහන් දේ මතු දැක්වේ.
12* “රජවරුන්ගෙත් රජු වූ+ අර්තක්ෂස්තාගෙන්+ පූජක එස්රා වෙතටයි. ස්වර්ගයෙහි සිටින දෙවිගේ+ නීතිය පිටපත් කරන ඔබට සමාදානය වේවා!+ 13 මාගේ රාජධානියේ+ ජීවත් වන ඊශ්‍රායෙල්වරුන්ගෙන් කැමති ඕනෑම කෙනෙකුට ඔබ සමඟ යෙරුසලම බලා ගමන් කිරීමට මම අවසර+ දෙන්නෙමි. ඔවුන් අතරේ සිටින පූජකයන්ටද ලෙවීවරුන්ටද ඔබ සමඟ යෑමට අවසර ඇත.+ 14 යූදා දේශයේ හා යෙරුසලමෙහි පවතින තත්වය ඔබේ භාරයේ තිබෙන ඔබේ දෙවිගේ+ නීතියට+ අනුකූලව ඇද්දැයි සෝදිසි කර බැලීමට+ ඔබට නියෝග කළේ රජ්ජුරුවන් වන මා සහ මාගේ උපදේශකයන් සත්දෙනාය.+ 15 යෙරුසලමෙහි වාසය කරන+ ඊශ්‍රායෙල්හි දෙවිට රජ්ජුරුවන් වන මම සහ මාගේ උපදේශකයෝ බොහෝ රන් හා රිදී ලබා දී ඇත.+ අපි ඒ සියල්ල ඔබට භාර දෙන්නෙමු. 16 එමෙන්ම බැබිලෝනිය බලප්‍රදේශයට අයත් සියලු පළාත්වලින් ලබාගත හැකි රන් හා රිදීද ජනතාව සහ පූජකයන් යෙරුසලමෙහි පිහිටා ඇති තම දෙවිගේ ගෘහය වෙනුවෙන්+ සිය කැමැත්තෙන්ම පරිත්‍යාග කරන සියල්ලද+ ඔබට රැගෙන යා හැකියි. 17 පූජා ඔප්පු කරන පිණිස එම මුදල්වලින් ගවයන්,+ බැටළුවන්+ සහ බැටළු පැටවුන්ද+ මිල දී ගන්න. ඒ සතුන් සමඟ ඔප්පු කරන ධාන්‍ය පූජා+ හා පාන පූජා+ සඳහා අවශ්‍ය සියලු ද්‍රව්‍යද මිල දී ගන්න. යෙරුසලමෙහි+ පිහිටා ඇති ඔබේ දෙවිගේ ගෘහයේ පූජාසනය මත ඒවා ඔප්පු කළ යුතුයි.+
18 “ඔබේ දෙවිගේ කැමැත්ත+ පරිදි තවත් දේවල් කළ යුතු නම් ඉතුරු රන් හා රිදී+ ඒ සඳහා භාවිතයට ගන්න. ඔබටත් ඔබ සමඟ සේවය කරන අනිකුත් අයටත් ඒ සඳහා අවසර තිබේ.+ 19 ඔබේ දෙවිගේ ගෘහයේ භාවිතය සඳහා ඔබේ අතට භාජන+ භාර දෙනු ඇත. ඒ සියල්ල යෙරුසලමට+ රැගෙන ගොස් ඔබේ දෙවි ඉදිරියේ භාර දෙන්න. 20 ඔබේ දෙවිගේ ගෘහයට ඕනෑ කරන සෑම දෙයකටම අවශ්‍ය මිලමුදල් රජුගේ වස්තු ගබඩාවෙන්+ ලබාගැනීමට ඔබට අවසර ඇත.
21 “අර්තක්ෂස්තා රජු වන මම මහ ගඟෙන් එගොඩ+ සිටින සියලුම භාණ්ඩාගාර නිලධාරීන්ට+ නියෝගයක්+ නිකුත් කළෙමි. ස්වර්ගයේ වෙසෙන දෙවිගේ නීතියේ පිටපත්කරුවෙකු හා පූජකයෙකු වන ඔබ+ ඉල්ලන සෑම දෙයක්ම වහාම ඔබට ලබා දිය යුතු බව මම ඔවුන්ට දැන්වූවෙමි. 22 රිදී තලෙන්ත* සියයක්,+ තිරිඟු ගබඩාවෙන් කෝර් මිනුම්* සියයක්,+ වයින්වලින්+ බාත්+ ඒකක* සියයක්, තෙල්වලින්+ බාත් ඒකක සියයක් හා අසීමිත ලුණු+ ප්‍රමාණයක් වුවද ඔබට ඔවුන්ගෙන් ලබාගත හැකියි. 23 ස්වර්ගයේ වෙසෙන දෙවි+ තම ගෘහය වෙනුවෙන් කිරීමට අණ කළ+ සෑම දෙයක්ම ඉටු කිරීමට වහාම+ පියවර ගත යුතුයි. එවිට රජ්ජුරුවන්ගේ රාජධානියට විරුද්ධවත් ඔහුගේ පුත්‍රයන්ට+ විරුද්ධවත් දෙවිගේ උදහස ඇවිළෙන්නේ නැත. 24 මීට අමතරව කිසිදු පූජකයෙකුගෙන්වත්+ ලෙවීවරයෙකුගෙන්වත්+ සංගීතඥයෙකුගෙන්වත්+ දොරටු පාලකයෙකුගෙන්වත්+ නෙතිනිම්වරයෙකුගෙන්වත්+ දෙවිගේ ගෘහයේ සේවය කරන වෙන කිසි කෙනෙකුගෙන්වත් බද්දක්+ හෝ ගාස්තුවක්+ හෝ අය නොකළ යුතු බවද මම ඔවුන්ට දැන්වූවෙමි.
25 “ඔබේ දෙවි ඔබට ලබා දුන් නුවණ+ පාවිච්චි කර, මහ ගඟෙන් එගොඩ ජීවත් වන සියලුදෙනා අතරේ නීතිය ක්‍රියාත්මක කිරීම සඳහා+ විනිසුරුවන්ව හා මුලාදෑනීන්ව පත් කරන්න. ඔවුන් ඔබේ දෙවිගේ නීතිය ගැන මනා අවබෝධයක් තිබෙන අය විය යුතුයි. ඒ නීතිය ගැන අවබෝධයක් නැති අය සිටී නම් ඔබ ඒ සියලුදෙනාව දැනුවත් කළ යුතුයි.+ 26 ඔබේ දෙවිගේ නීතිය+ හා රජ්ජුරුවන්ගේ නීතිය පිළිපැදීමට යමෙකු අපොහොසත් වුවහොත් ඔහුට වහාම දඬුවම් කළ යුතුයි. ඔහුට මරණය නියම කරන්න+ හෝ ඔහුව පිටුවහල් කරන්න+ හෝ ඔහුගෙන් දඩ මුදලක් අය කරන්න+ හෝ ඔහුව සිරභාරයට ගන්න හෝ තීරණය කිරීමට ඔබට අවසර ඇත.”
27 අපගේ මුතුන්මිත්තන්ගේ දෙවි වන යෙහෝවාට ප්‍රශංසා වේවා!+ මන්ද යෙරුසලමෙහි පිහිටි යෙහෝවා දෙවිගේ ගෘහය අලංකාරවත් කිරීම+ සඳහා මෙම නියෝගය පැනවීමට රජ්ජුරුවන්ගේ හදවත පෙලඹවූයේ+ ඔහුයි. 28 එසේම දෙවිගේ මහත් ප්‍රේමය*+ නිසා රජ්ජුරුවන්ගේද ඔහුගේ උපදේශකයන්ගේද+ ඔහුගේ බලවත් අධිපතීන්ගේද සිත දිනාගන්න එස්රා වන මට හැකි විය. මාගේ දෙවි වන යෙහෝවාගේ ආශීර්වාදය මට ලැබුණු නිසා+ මාගේ සිතට ධෛර්යයක් ආවේය. ඒ නිසා මම ඊශ්‍රායෙල් සෙනඟ අතරේ සිටි ප්‍රධානීන්ව රැස් කරවා ඔවුන් සමඟ පිටත්ව යෑමට සූදානම් වුණෙමි.