2 ලේකම්
36 දේශයේ වැසියෝ යොෂියා රජු වෙනුවට ඔහුගේ පුත් යෙහෝයහාෂ්ව+ යෙරුසලමේ රජු ලෙස පත් කළෝය.+ 2 යෙහෝයහාෂ් රජකමට පත් වන විට ඔහුගේ වයස අවුරුදු විසිතුනකි. ඔහු යෙරුසලමේ සිට මාස තුනක් පාලනය කළේය.+ 3 ඒ අතරතුර ඊජිප්තුවේ රජ පැමිණ ඔහුව යෙරුසලමේ රජකමෙන් පහ කර,+ යූදා දේශයෙන් රිදී තලෙන්ත සියයක්+ හා රන් තලෙන්තයක් බද්දක් ලෙස අය කළේය. 4 පසුව ඊජිප්තුවේ රජ+ යූදා දේශයේ හා යෙරුසලමෙහි රජු ලෙස යෙහෝයහාෂ්ගේ සහෝදරයා වූ එලියාකීම්ව+ පත් කර ඔහුගේ නම යෙහෝයාකිම් ලෙස වෙනස් කළේය. ඉන්පසු යෙහෝයහාෂ්ව ඊජිප්තුවේ රජු වූ නෙකෝ+ විසින් ඊජිප්තුවට ගෙන යන ලදි.+
5 යෙහෝයාකිම්+ රජකමට පත් වන විට ඔහුගේ වයස අවුරුදු විසිපහකි. ඔහු යෙරුසලමේ සිට අවුරුදු එකොළහක් පාලනය කළේය.+ ඔහු තම දෙවි වන යෙහෝවා පිළිකුල් කරන දේවල් දිගටම කළේය.+ 6 බැබිලෝනියේ රජු වූ නෙබුකද්නෙෂර්,+ ඔහුට තඹ විලංගු දමා ඔහුව බැබිලෝනියට ගෙන යෑමේ+ අරමුණින් පැමිණියේය.+ 7 නෙබුකද්නෙෂර් රජ,+ යෙහෝවා දෙවිගේ ගෘහයේ භාවිත කළ ඇතැම් භාණ්ඩද+ බැබිලෝනියට ගෙන ගිය අතර ඒවා ඔහුගේ රජමාලිගාවෙහි තැබුවේය.+ 8 යෙහෝයාකිම් රජුගේ ජීවිතයේ අනිකුත් සිදුවීම්ද+ ඔහු කළ පිළිකුල්සහගත දේවල්ද+ ඔහු ගත කළ නරක ජීවිතය ගැනද ඊශ්‍රායෙල්හි හා යූදාහි රජවරුන්ගේ ඉතිහාසය වාර්තා කර ඇති ලියවිල්ලෙහි සඳහන් කර තිබේ.+ ඔහුට පසුව ඔහුගේ පුත් යෙහෝයාකින්+ රජකමට පත් විය.
9 යෙහෝයාකින්+ රජකමට පත් වන විට ඔහුගේ වයස අවුරුදු දහඅටකි. ඔහු යෙරුසලමේ සිට මාස තුනකුත්+ දවස් දහයක් පාලනය කළේය. ඔහු යෙහෝවා දෙවි පිළිකුල් කරන දේවල් දිගටම කළේය.+ 10 අලුත් අවුරුද්දක ආරම්භයත් සමඟම+ නෙබුකද්නෙෂර් රජ ඔහුගේ හමුදා පිරිස් යවා+ යෙහෝයාකින් රජුව බැබිලෝනියට ගෙනාවේය.+ ඔහු සමඟ යෙහෝවා දෙවිගේ ගෘහයේ තිබූ බොහෝ වටිනා දේවල්ද+ ගෙනෙන ලදි. ඉන්පසු නෙබුකද්නෙෂර් රජ, යෙහෝයාකින් රජුගේ බාප්පා වූ ශෙදකියාව+ යූදා දේශයේ හා යෙරුසලමෙහි රජු ලෙස පත් කළේය.+
11 ශෙදකියා+ රජකමට පත් වන විට ඔහුගේ වයස අවුරුදු විසිඑකකි. ඔහු යෙරුසලමේ සිට අවුරුදු එකොළහක් පාලනය කළේය.+ 12 ඔහුද යෙහෝවා දෙවි පිළිකුල් කරන දේවල් දිගටම කළේය.+ යෙහෝවා දෙවිගේ අණ පරිදි අනාගතවක්තෘ+ යෙරෙමියා ඔහුට කොතරම් අවවාද කළත්+ ඔහු නිහතමානීව ඒවා පිළිගත්තේ නැත.+ 13 ඔහු නෙබුකද්නෙෂර් රජුට යටත්ව සිටින බවට දෙවිගේ නාමයෙන් පොරොන්දු වුවත්+ පසුව රජුට විරුද්ධව කැරලිගැසීය.+ ඔහු දිගින් දිගටම මුරණ්ඩු ලෙස කටයුතු කළ අතර+ ඊශ්‍රායෙල්හි දෙවි වන යෙහෝවා වෙතට නැවත හැරී ආවේ නැත.+ 14 නායක පූජකයෝද+ ජනයාද අවට ජාතීන් කළ පිළිකුල්සහගත දේවල් අනුගමනය කරමින්+ දෙවිට විරුද්ධව බොහෝ පව් කළෝය. ප්‍රතිඵලයක් ලෙස පරිශුද්ධ නමස්කාරය සඳහා දෙවි විසින්ම තෝරාගත් යෙරුසලමෙහි පිහිටි යෙහෝවා දෙවිගේ ගෘහය ඔවුහු කෙලෙසුවෝය.+
15 ඔවුන්ගේ මුතුන්මිත්තන්ගේ දෙවි වන යෙහෝවා, තම සෙනඟට අනුකම්පා කළ නිසාත්+ තම ගෘහය ගැන ඔහුට සිහි වූ නිසාත්+ පණිවිඩකරුවන්ව එවා ඔවුන්ට නැවත නැවතත් අනතුරු ඇඟෙව්වේය.+ 16 නමුත් ඔවුහු ඔවුන්ට සරදම් කරමින්,+ දෙවි තම අනාගතවක්තෘවරුන් මාර්ගයෙන් පැවසූ දේවල් හෙළාදුටුවෝය.+ ඔවුහු ඒ කිසිවක් පිළිගත්තේ නැත.+ එහි ප්‍රතිඵලයක් ලෙස අන්තයටම පිරිහී ගොස් සිටි ඔවුන්ට+ විරුද්ධව යෙහෝවා දෙවිගේ උදහස ඇවුළුණේය.+
17 ඒ නිසා දෙවි ඔවුන්ට විරුද්ධව කල්දිවරුන්ගේ රජුව එවීය.+ ඔහු පැමිණ ඔවුන්ගේ තරුණයන්ව දේවමාලිගාවෙහිදීම+ මරා දැමීය.+ තරුණ තරුණියන්ටවත් මහලු හෝ අබලදුබල අයටවත් ඔහුගෙන් කිසිම අනුකම්පාවක් නොලැබුණේය.+ මෙසේ දෙවි ඔවුන් සියලුදෙනාවම කල්දිවරුන්ගේ රජු අතට හසු වීමට ඉඩහැරියේය. 18 සැබෑ දෙවිගේ ගෘහයේ භාවිත කළ ලොකු+ කුඩා සියලු භාජනද+ යෙහෝවා දෙවිගේ ගෘහයේ රැස් කර තිබූ වස්තුද+ රජුට හා ඔහුගේ අධිපතීන්ට අයත් වූ වස්තුද+ බැබිලෝනියට ගෙන යන ලදි. 19 ඔහු සැබෑ දෙවිගේ ගෘහයට ගිනි තබා+ යෙරුසලමේ පවුරද බිඳ දැමීය.+ එහි සියලුම බලකොටුද එහි තිබූ වෙනත් වටිනා දේවල්ද ගිනිබත් කරන ලදි.+ මෙසේ ඔහු සෑම දෙයක්ම විනාශ කර දැමීය.+ 20 මීට අමතරව කඩු පහරින් මිය නොගිය අයව ඔහු වහලුන් ලෙස බැබිලෝනියට ගෙන ගියේය.+ එසේ වහල්කමට ගිය සියලුදෙනා පර්සියාවේ රාජකීය පාලනය+ පටන්ගන්නා තෙක් ඔහුටත් ඔහුගේ පුත්‍රයන්ටත් සේවය කළෝය.+ 21 මෙසේ යෙහෝවා දෙවි යෙරෙමියා මාර්ගයෙන් පැවසූ දේ ඉටු විය.+ දේශය අවුරුදු සැත්තෑවක් පුරා පාළුව පැවතිණ.+ පාළුව පැවති සියලු දවස්වලදී දේශයේ වැසියන් කලින් නොපැවැත්වූ සෑම සබතක් වෙනුවෙන්ම දේශයට විවේකයක් දෙන ලදි.+
22 පර්සියාවේ රජු වූ+ සයිරස්+ පාලනය කළ පළමු අවුරුද්දේදී යෙරෙමියා මාර්ගයෙන්+ යෙහෝවා දෙවි පැවසූ වචන+ ඉටු කරන පිණිස යෙහෝවා දෙවි සයිරස් රජුගේ සිත පෙලඹුවේය.+ ඒ නිසා සයිරස් රජ තම රාජධානිය පුරා ප්‍රකාශයක් පතළ කිරීමට පියවර ගත්තේය. ලිඛිතව දැනුම් දෙන ලද+ එම ප්‍රකාශයේ මෙසේ සඳහන් විය. 23 “පර්සියාවේ රජු වූ සයිරස් මෙසේ දැනුම් දී ඇත.+ ‘ස්වර්ගයේ සිටින යෙහෝවා දෙවි මේ පොළොවේ සියලු රාජ්‍යයන් මට දී තිබේ.+ යූදා දේශයෙහි පිහිටා තිබෙන+ යෙරුසලමෙහි ඔහුට ගෘහයක් ගොඩනැඟීමේ කාර්යයද ඔහු මට පවරා ඇත. ඔබ අතරේ යෙහෝවා දෙවිට නමස්කාර කරන සියලුදෙනාට+ ඔහුගේ ආශීර්වාද ලැබේවා!+ ඔවුන්ට එම නුවරට යෑමට මම අවසර දෙන්නෙමි.’”+