දානියෙල්

4 ලෝකයේ සෑම තැනකම ජීවත් වන සියලු ජාතීන්ට, ගෝත්‍රයන්ට හා විවිධ භාෂා කතා කරන මිනිසුන්ට+ නෙබුකද්නෙෂර් රජ මෙසේ දැනුම් දෙන්නේය. “ඔබ සියලුදෙනාටම බොහෝ සමාදානය ලැබේවා!+ 2 මහෝත්තම දෙවි මට පෙන්වූ ලකුණුද ඔහු කළ අරුම පුදුම ක්‍රියාද ඔබ සියල්ලන්ට දැන්විය යුතුයයි මම සිතුවෙමි.+ 3 ඔහු පෙන්වූ ලකුණු මොන තරම් පුදුමාකාරද! ඔහු කළ අරුම පුදුම ක්‍රියා මොන තරම් බලවත්ද!+ ඔහුගේ රාජ්‍යය සදාකාලයෙන් සදාකාලයටම පවතින්නේය.+ ඔහුගේ පාලනයද පරම්පරාවෙන් පරම්පරාවට පවතින්නේය.+

4 “නෙබුකද්නෙෂර් වන මම, රජමාලිගාවේ+ සැප සම්පත් භුක්ති විඳිමින් සතුටින් කල් ගෙවමින් සිටියෙමි.+ 5 ඒ කාලයේදී මම සිහිනයක් දුටුවෙමි. ඒ සිහිනය නිසා මම මහත් සේ බියට පත් වුණෙමි.+ සිහිනෙන් මා දුටු ඒ රූප හා දර්ශන නිසා මගේ සිත කැලඹුණේය.+ 6 ඉන්පසු ඒ සිහිනයේ අර්ථය දැනගන්නා පිණිස බැබිලෝනියේ සිටින සියලු බුද්ධිමතුන්ව මා වෙතට කැඳවන ලෙස මම නියෝග කළෙමි.+

7 “එවිට මන්තර ගුරුකම් කරන පූජකයෝද පේන කියන්නෝද කල්දිවරුද+ ජ්‍යෝතිඃ ශාස්ත්‍රඥයෝද+ මා ඉදිරියට පැමිණියහ. මා ඔවුන්ට මගේ සිහිනය විස්තර කළ නමුත් ඔවුන් කිසිවෙකුට එහි අර්ථය පැහැදිලි කර දීමට නොහැකි විය.+ 8 ඉන්පසු බෙල්ටෂසර්+ යන නමින්ද හඳුන්වන දානියෙල් මා ඉදිරියට ආවේය. (බෙල්ටෂසර් යනු මගේ දෙවියන්ගේ නමින් සාදාගත් නමකි.)+ ශුද්ධ දෙවිවරුන්ගේ බලය ඔහුට තිබේ.+ ඒ නිසා මා දුටු සිහිනය ඔහුට මම විස්තර කළෙමි.

9 “‘බෙල්ටෂසර්, මන්තර ගුරුකම් කරන පූජකයන්ගේ ප්‍රධානියා+ වන ඔබට ශුද්ධ දෙවිවරුන්ගේ බලය තිබෙන බව මම හොඳින් දන්නෙමි.+ ඔබට හෙළි කරන්න බැරි රහසක් නැත.+ එබැවින් මම සිහිනයෙන් දුටු දර්ශන හා ඒවායේ අර්ථය මට කියා දෙන්න.+

10 “‘මා නිදාගෙන සිටිද්දී මා දුටු දර්ශනය මෙයයි.+ පොළොව මැද විශාල ගසක්+ තිබිණ. එය ඉතා උස ගසකි.+ 11 ඒ ගස වැඩී ශක්තිමත් විය. කල් යත්ම එය අහස උසට වැඩුණේය. පොළොවේ සතර දිශාවෙන්ම එය දැකගත හැකි විය.+ 12 එය ඉතා අලංකාර කොළවලින් පිරුණු, පලවලින් බර වූ ගසකි. සියල්ලන්ටම කන්න ඇති තරම් පලතුරු එහි තිබිණ. වනසත්තු+ එහි සෙවණ සොයා ආවෝය.+ කුරුල්ලෝද එහි අතුවල ලැගුම් ගත්තෝය.+ සෑම ජීවියෙක්ම එයින් කෑවෝය.

13 “‘ඉන්පසු මම තවත් දර්ශනයක් දුටුවෙමි. ස්වර්ගයේ සිට මුරකරුවෙක්+ ආවේය. ඔහු ශුද්ධ තැනැත්තෙකි.+ 14 ඔහු හඬ නඟා මෙසේ කීවේය. “ගස කපා දමන්න.+ එහි අතුද කපන්න. එහි අතු සොලවා කොළ සියල්ල වැටෙන්න සලස්වන්න. පලද කඩා විසි කර දමන්න. එහි සෙවණේ සිටින සතුන්වද එහි අතුවල සිටින කුරුල්ලන්වද එළවා දමන්න.+ 15 එහෙත් එහි කඳ කොටස උගුල්ලා නොදමන්න. එය යකඩ හා තඹ පටිවලින් බඳින්න. එය පිනිවලට තෙමිතෙමී තණකොළ අතරේ තිබුණාවේ. තණකොළ කන සත්තුද ඒ අවට වාසය කරත්වා!+ 16 මිනිසෙකුගේ සිතක් වෙනුවට එයට මෘගයෙකුගේ සිතක් දෙන්න.+ කාලවල් සතක්+ පසු වන තුරු එය එම තත්වයේම තිබුණාවේ. 17 එය නියෝග කර තිබෙන්නේ මුරකරුවන්+ විසින්ය. දෙවිගේ ඒ තීන්දුව ප්‍රකාශ කර තිබෙන්නේ ශුද්ධ තැනැත්තන් විසින්ය. මනුෂ්‍ය ආණ්ඩුවලට වඩා ඉහළින් සිටින, පූර්ණ බලයක් ඇති එකම තැනැත්තා වන්නේ මහෝත්තම දෙවියි.+ දෙවි තමා කැමති කෙනෙකුට පාලනය භාර දෙන අතර+ ඉතාම පහත්යයි සලකන තැනැත්තාට වුවද පාලනය භාර දෙන්නේය.+ ලෝකයේ ජීවත් වන සියලු ජනයා ඒ කාරණා දැනගන්නා පිණිස ඒ තීන්දුව දී තිබේ.”

18 “‘නෙබුකද්නෙෂර් රජු වන මා දුටු සිහිනය එයයි. මගේ රාජධානියේ සිටින බෙල්ටෂසර්, බුද්ධිමතුන්ගෙන් එක් කෙනෙකුටවත් එහි අර්ථය පහදා දීමට නොහැකි වූ නිසා+ දැන් ඔබවත් එහි අර්ථය මට පැහැදිලි කර දෙන්න. ශුද්ධ දෙවිවරුන්ගේ බලය ඔබට තිබෙන නිසා ඔබට එය කළ හැකි බව මම දනිමි.’+

19 “එවිට බෙල්ටෂසර්+ එනම්, දානියෙල් ඒ සිහිනයේ අර්ථය නිසා හොඳටම කැලඹී පුදුමයෙන් බලා සිටියේය.+

“එවිට මම ඔහුට මෙසේ කීවෙමි. ‘බෙල්ටෂසර්, මා කියන දේ අහන්න. සිහිනය නිසාවත් එහි අර්ථය නිසාවත් භය නොවන්න.’+

“එවිට බෙල්ටෂසර් මට මෙසේ පිළිතුරු දුන්නේය. ‘මාගේ ස්වාමීනි, මේ සිහිනයෙන් ඔබ දුටු දේවල් ඔබට වෛර කරන ඔබේ සතුරන්ට සිදු වේවා!+

20 “‘රජතුමනි, ක්‍රමක්‍රමයෙන් අහස උසටම වැඩී ශක්තිමත් වූ විශාල ගසක් ඔබ සිහිනයේ දුටුවෙහිය. ඒ ගස මුළු පොළොවටම පෙනෙන්න තිබිණ.+ 21 එය අලංකාර කොළවලින් පිරුණු, පලවලින් බර වූ ගසක් බවත් සියල්ලන්ටම ඇති තරම් කන්න පලතුරු එහි තිබුණු බවත් වනසතුන් එහි සෙවණේ සිටි බවත් කුරුල්ලන් එහි අතුවල ලැග සිටි බවත් ඔබ පැවසුවෙහිය.+ 22 රජතුමනි, ඒ ගස ඔබයි.+ මන්ද ඔබේ රාජ්‍යය පොළොව පුරාම පැතිර තිබේ.+ ඔබ ඉතා ශ්‍රේෂ්ඨ මෙන්ම බලවත් පාලකයෙකි. ඔබේ තේජස මොන තරම්ද! එය අහස දක්වාම නැඟ ඇත.+

23 “‘රජතුමනි, ස්වර්ගයේ සිට ශුද්ධ මුරකරුවෙකු+ පැමිණෙනවා ඔබ දුටුවෙහිය. ඔහු මෙසේ පවසනවා ඔබට ඇසිණ. “ගස කපා විනාශ කර දමන්න. නමුත් එහි කඳ කොටස යකඩ හා තඹ පටිවලින් බැඳ තබන්න. එය පිනිවලට තෙමිතෙමී තණකොළ අතරේ තිබුණාවේ. කාලවල් සතක් පසු වන තුරු වනසත්තු ඒ අවට වාසය කරත්වා!”+ 24 මාගේ ස්වාමීනි,+ ඔබ ඇසූ දුටු ඒ දේවල අර්ථය හා මහෝත්තම දෙවි+ ඔබට නියම කර තිබෙන දේ මෙයයි.+ 25 මිනිස් වාසයෙන් ඔබව එළවා දමනු ඇත. ඔබ වනසතුන් සමඟ ජීවත් වන්නෙහිය.+ හරකුන්ට+ මෙන් ඔබටත් තණකොළ කෑමට සිදු වේ. කාලවල් සතක්+ පසු වන තුරු ඔබ පිනිවලට තෙමිතෙමී ජීවත් වන්නෙහිය. මනුෂ්‍ය ආණ්ඩුවලට වඩා ඉහළින් සිටින, පූර්ණ බලයක් ඇති එකම තැනැත්තා මහෝත්තම දෙවි බවත්+ දෙවි තමා කැමති කෙනෙකුට පාලනය භාර දෙන බවත්+ ඔබ පිළිගන්නා තෙක් ඔබ එම තත්වයේම සිටින්නෙහිය.

26 “‘ගසේ කඳ කොටස උගුල්ලා නොදමන්න කියා ඔවුන් පැවසූ නිසා,+ දෙවි ස්වර්ගයේ සිට පාලනය කරන බව ඔබ පිළිගත් පසු+ රාජ්‍යය නැවතත් ඔබේ අතට ලැබෙන බව ස්ථිරයි. 27 එබැවින් රජතුමනි, මගේ උපදෙස් පිළිගන්න.+ පව් නොකර ධර්මිෂ්ඨ ජීවිතයක් ගත කරන්න.+ අයුතුකම් නොකර දුප්පතුන්ට ප්‍රේමණීයව සලකන්න.+ ඔබ එසේ කළොත් දිගු කාලයක් පුරා සැපවත් ජීවිතයක් ගත කිරීමට ඔබට හැකි වනු ඇත.’”+

28 ඒ සියල්ල නෙබුකද්නෙෂර් රජුට එලෙසම සිදු විය.+

29 සිහිනය දැක මාස දොළහක් ගත වූ පසු නෙබුකද්නෙෂර් රජ බැබිලෝනියේ පිහිටි රජමාලිගාවේ සඳලුතලයේ ඇවිදිමින් සිටියේය. 30 එවිට ඔහු මෙසේ කීවේය.+ “මේ, මගේ තේජසත් ගෞරවයත් සියල්ලන්ටම පෙන්වන පිණිස+ මගේම බලයෙන් මා ගොඩනැඟූ+ රජවාසල වන මහා බැබිලෝනිය නොවේද?”

31 රජු එසේ කියමින් සිටියදී ස්වර්ගය දෙසින් හඬක් පැමිණ මෙසේ පැවසීය. “නෙබුකද්නෙෂර් රජතුමනි, මෙයට සවන් දෙන්න. ‘රාජ්‍යය ඔබේ අතින් පහ කර තිබේ.+ 32 මිනිස් වාසයෙන් ඔබව එළවා දමනු ඇත. ඔබ වනසතුන් සමඟ ජීවත් වන්නෙහිය.+ හරකුන්ට මෙන් ඔබටත් තණකොළ කෑමට සිදු වේ. කාලවල් සතක් පසු වන තුරු ඔබ ඒ තත්වයේම සිටින්නෙහිය. මනුෂ්‍ය ආණ්ඩුවලට වඩා ඉහළින් සිටින, පූර්ණ බලයක් ඇති එකම තැනැත්තා මහෝත්තම දෙවි බවත් දෙවි තමා කැමති කෙනෙකුට පාලනය භාර දෙන බවත්+ ඔබ පිළිගන්නා තෙක් ඔබ එලෙසම සිටින්නෙහිය.’”

33 ඒ මොහොතේම+ නෙබුකද්නෙෂර් රජුට ඒ සියල්ල සිදු විය. මිනිස් වාසයෙන් ඔහුව එළවා දැමුවේය. ඔහු පිනිවලට තෙමි තෙමී හරකුන් මෙන් තණකොළ කෑවේය. ඔහුගේ හිසකෙස් රාජාලියෙකුගේ පිහාටු මෙන්ද ඔහුගේ නියපොතු කුරුල්ලෙකුගේ නියපොතු මෙන්ද දික් විය.+

34 “කාලය ගත වූ පසු+ නෙබුකද්නෙෂර් වන මම ස්වර්ගය දෙස බැලුවෙමි.+ එවිට මම නැවත පියවි සිහියට ආවෙමි. ඉන්පසු මම මහෝත්තම දෙවිට ප්‍රශංසා කළෙමි.+ සදහටම ජීවත් වන ඒ තැනැත්තාණන්ට ප්‍රශංසා කර ඔහුට ගෞරවය දුන්නෙමි.+ මන්ද ඔහුගේ රාජ්‍යය සදාකාලයෙන් සදාකාලයටම පවතින්නේය. ඔහුගේ පාලනයද පරම්පරාවෙන් පරම්පරාවට පවතින්නේය.+ 35 පොළොවේ වැසියන්ව කිසිසේත් දෙවිට සම කළ නොහැක.+ ඔහු ස්වර්ගයේ සේනාවන් හා පොළොවේ මනුෂ්‍යයන් ඉදිරියේ ක්‍රියා කරන්නේ තම කැමැත්තට අනුවය.+ ඔහුට බාධා කරන්න කිසිවෙකුට නොහැක.+ ‘ඔබ මොනවාද කරන්නේ’ කියා ඔහුගෙන් ප්‍රශ්න කිරීමට අයිතිය ඇති කිසිවෙක් නැත.+

36 “මා නැවත පියවි සිහියට ආ දවසේදීම, මගේ රාජ්‍යය උසස් කරන පිණිස මාව පෙර සේම ගෞරවයට පත් කරන ලදි.+ මගේ රාජ්‍යයේ උසස් නිලධාරීහුද මගේ උපදේශකයෝද මාව සොයා ආවෝය. රාජ්‍යය නැවතත් මගේ අතට පත් විය. පෙරට වඩා ශ්‍රේෂ්ඨ තත්වයකට මාව පත් කරනු ලැබීය.+

37 “නෙබුකද්නෙෂර් වන මම දැන් ස්වර්ගයේ රජුට ප්‍රශංසා කරමින් ඔහුට නිසි ගෞරවය දෙන්නෙමි.+ දෙවි උඩඟු අයව පහත් කරන්නේය.+ ඔහුගේ සියලු ක්‍රියා යුක්තිසහගතය. ඔහු සැමවිටම විශ්වාසවන්තව ක්‍රියා කරන්නේය.”+