1 සාමුවෙල්

17 පිලිස්තිවරු+ තමන්ගේ හමුදාව රැස් කරගෙන යුද්ධයට සැරසුණෝය. ඔවුහු යූදා දේශයට අයිති සෝකෝ නම් ප්‍රදේශයේ+ එක් රැස් වී සෝකෝ සහ අෂේකා+ අතර තිබූ ඒපෙස්-දම්මිම්+ නම් ප්‍රදේශයේ කඳවුරු බැඳගත්තෝය. 2 සාවුල් රජ සහ ඊශ්‍රායෙල් හමුදාව එක් රැස් වී පිලිස්තිවරුන්ට විරුද්ධව සටන් කරන පිණිස ඒලාහ් නම් තැනිතලාවේ*+ කඳවුරු බැඳගත්තෝය. 3 පිලිස්තිවරු එක් කන්දක රැස්ව සිටියෝය. ඊශ්‍රායෙල්වරු තවත් කන්දක රැස්ව සිටියෝය. එම කඳු දෙක අතර නිම්නයක් තිබුණේය.

4 පිලිස්තිවරුන් වෙනුවෙන් සටන් කිරීමට ගොලියත්+ නම් මිනිසා ඉදිරියට ආවේය. ඔහු ගාත්හි+ වැසියෙකි. ඔහුගේ උස අඩි නවයහමාරක් පමණ විය.*+ 5 ඔහු තඹ තොප්පියක් සහ යුධ ඇඳුමක් පැළඳ සිටියේය. එම ඇඳුම පුරාම ලෝහ කැබලි අල්ලා තිබිණ.+ එහි බර තඹ ෂෙකෙල් පන්දහසක්* විය. 6 ඔහුගේ පාදවල දණහිස් දක්වා තඹ වැස්මක් තිබිණ. ඔහුගේ පිටේ තඹ හෙල්ලයක්ද+ තිබිණ. 7 ඔහුගේ මහා හෙල්ලයේ මිට රෙදි විවීම සඳහා භාවිත කරන පොල්ලක් මෙන් විය.+ එහි තලයේ බර යකඩ ෂෙකෙල් හයසියයක්* විය. ඔහුගේ විශාල පලිහ රැගෙන ගිය තැනැත්තා ඔහුට ඉදිරියෙන් ගමන් කළේය. 8 ගොලියත් ඊශ්‍රායෙල් හමුදාව ඉදිරියට ඇවිත් කෑගසමින් මෙසේ කීවේය.+ “නුඹලා මොකටද සටන් බිමට ආවේ? නුඹලා සාවුල්ගේ සේවකයෝ නේද? මම පිලිස්තිවරුන් වෙනුවෙන් තනියෙන් සටන් කරන්න සූදානම්. ඉතින් දැන් නුඹලා වෙනුවෙනුත් සටන් කරන්න එක් කෙනෙක්ව තෝරාගෙන මා ළඟට එවන්න. 9 එම තැනැත්තා මාව මරලා දැම්මොත් පිලිස්තිවරුන් නුඹලාගේ දාසයෝ වෙනවා. නමුත් මම ඔහුව මරලා දැම්මොත් නුඹලා අපේ දාසයන් වෙන්න ඕනේ.”+ 10 පිලිස්තියා තවදුරටත් මෙසේ කීවේය. “මාත් එක්ක සටන් කරන්න පුළුවන් කෙනෙක් ඉන්නවා නම් දැන් ඉදිරියට එන්න+ කියා මම ඊශ්‍රායෙල් හමුදාවට අභියෝග කරනවා.”+

11 සාවුල් රජ+ සහ ඊශ්‍රායෙල් සෙනඟ පිලිස්තියා පැවසූ දේ ඇසූ විට බොහෝ සෙයින් භය වූහ.+

12 යූදා දේශයේ බෙත්ලෙහෙම්හි ජීවත් වූ එෆ්‍රාත්වරයෙකු+ වන යෙස්සේට පුත්‍රයෝ අටදෙනෙක් සිටියෝය.+ දාවිත්ද ඔහුගේ පුත්‍රයෙකි. සාවුල් රජකම් කළ කාලයේදී යෙස්සේ මහලුව සිටියේය. 13 යෙස්සේගේ වැඩිමල් පුත්‍රයෝ තුන්දෙනා සාවුල් රජු සමඟ යුද්ධයට ගියෝය.+ ඔහුගේ කුලුඳුලා එලියාබ්ය.+ දෙවෙනියා අබිනාදාබ්ය.+ තුන්වෙනියා ෂම්මාහ්ය.+ 14 දාවිත් ඔහුගේ බාල පුත්‍රයාය.+ සාවුල් රජු සමඟ යුද්ධයට ගියේ යෙස්සේගේ වැඩිමල් පුත්‍රයන් තිදෙනාය.

15 දාවිත් කලින් කලට සාවුල් රජුට සේවය කරන පිණිස මාලිගාවට ගියේය. ඔහු ඒ අතරතුර තම පියාගේ බැටළුවන් බලාගැනීම සඳහා+ බෙත්ලෙහෙමටත් ගියේය. 16 පිලිස්තියා උදේ හවා ඊශ්‍රායෙල් හමුදාව ඉදිරියට පැමිණියේය. ඔහු දවස් හතළිහක්ම එසේ කළේය.

17 යෙස්සේ තම පුත් දාවිත්ට මෙසේ කීවේය. “පුතා ඉක්මනට කඳවුරට ගිහින් මේ බැදපු ධාන්‍ය+ ඒපාවයි රොටි දහයයි ඔබේ සහෝදරයන්ට දෙන්න. 18 මේ මුදවපු කිරි* පංගු දහය ඔවුන්ගේ භට පිරිස භාරව ඉන්න ප්‍රධානියාට දෙන්න.+ ඔබේ සහෝදරයන්ගේ සැප දුක් කොහොමද කියලා බලගෙන එන්න.+ ඔවුන් කියන දේවල් ඇවිත් මට කියන්න.” 19 සාවුල් රජද දාවිත්ගේ සහෝදරයෝ තිදෙනාද ඊශ්‍රායෙල් හමුදාවේ අනික් පුරුෂයෝද පිලිස්තිවරුන්ට+ විරුද්ධව සටන් කරන පිණිස ඒලාහ් නම් තැනිතලාවේ+ රැස්ව සිටියෝය.

20 දාවිත් උදෑසනින්ම අවදි වී බැටළුවන්ව රැකවලෙකුට භාර දුන්නේය. පසුව ඔහු තම පියා දුන් ආහාර ටික රැගෙන කඳවුර වෙත ගියේය.+ ඔහු කඳවුරට ගිය විට+ හමුදාව එකිනෙකාව දිරිගන්වමින් යුධ පිටිය දෙසට ගමන් කරමින් සිටියෝය.+ 21 ඊශ්‍රායෙල් හමුදාව සහ පිලිස්තිවරුන්ගේ හමුදාව ඉදිරියට ඇවිත් එකිනෙකාට මුහුණ ලා සිටගත්තෝය. 22 දාවිත් තමා ගෙනා බඩු මල්ල+ බඩු භාරව සිටි කෙනාට+ භාර දී යුධ පිටිය දෙසට දිව ගියේය. ඔහු එතැනට ගොස් තම සහෝදරයන්ගෙන් සැප දුක් විමසුවේය.+

23 දාවිත් ඔවුන් සමඟ කතා කරමින් සිටියදී ගාත්හි+ වැසියෙකු වන ගොලියත්+ නම් පිලිස්තියා ඉදිරියට ඇවිත් කලින් වතාවලදී මෙන් ඊශ්‍රායෙල්වරුන්ට අභියෝග කළේය.+ එය දාවිත්ටද ඇසුණේය. 24 ඊශ්‍රායෙල් හමුදාව ගොලියත්ව දැක මහත් සේ භය වී එතැනින් පලා ගියෝය.+ 25 ඔවුහු එකිනෙකා අතරේ මෙසේ කතා වූහ. “ඇවිත් ඉන්න අර මනුෂ්‍යයාව දැක්කාද? ඔහු නිතරම මෙතැනට ඇවිත් ඊශ්‍රායෙල්වරුන්ට අපහාස කරනවා.+ කවුරු හරි ඔහු සමඟ සටන් කරලා ඔහුව මරා දැම්මොත් එම තැනැත්තාට ධන සම්භාරයක් දෙන්න රජු පොරොන්දු වෙලා තියෙනවා. රජුගේ දුවවත් ඔහුට විවාහ කරලා දෙන්න පොරොන්දු වෙලා තියෙනවා.+ ඒ විතරක් නෙමෙයි ඔහුගේ පවුලේ අයව බදු බරෙන් හා රජුට කළ යුතු සේවාවන්ගෙන් නිදහස් කරනවා.”+

26 පසුව දාවිත් ඔහු ළඟ සිටි මනුෂ්‍යයන්ගෙන් මෙසේ ඇසුවේය. “ජීවමාන දෙවිගේ+ සේනාවට අපහාස කරන්න+ අර පිලිස්තියාට+ තියෙන අයිතිය මොකක්ද? මේ අචර්මච්ඡේදිතයාව+ මරලා ඊශ්‍රායෙල්වරුන්ගේ නින්දාව+ ඉවත් කරන කෙනාට මොනවාද ලැබෙන්නේ?” 27 එතැන සිටි මනුෂ්‍යයෝ, “ගොලියත්ව මරන කෙනාට ලැබෙන්නේ මේවායි” කියමින් කලින් ඔවුනොවුන් අතරේ කතා කළ දේවල් ඔහුට කීවෝය. 28 දාවිත් එතැන සිටි මනුෂ්‍යයන් සමඟ කතා කළ දේවල් ඔහුගේ වැඩිමල් සහෝදරයා වන එලියාබ්ට+ ඇසුණේය. එවිට ඔහු දාවිත් සමඟ මහත් සේ කෝප වී+ මෙසේ කීවේය. “ඇයි ඔබ මෙහෙට ආවේ? පාළුකරයේ ඉන්න අපේ බැටළුවෝ කාට භාර දීලාද ඔබ මෙහේ ආවේ?+ ඔබ හරි හිතුවක්කාරයි. මෙහේ සිද්ධ වෙන දේවල් බලන්න නේද ඔබ ආවේ?+ ඔබ මෙතැනට ආවේ හොඳ චේතනාවකින් නෙමෙයි කියලා මම දන්නවා.”+ 29 එවිට දාවිත්, “මොකක්ද මම කළ වරද? මම ප්‍රශ්නයක් ඇහුවා විතරයි”+ කියා කීවේය. 30 ඉන්පසු දාවිත් වෙනත් කෙනෙකු වෙතට ගොස් තමා කලින් ඇසූ ප්‍රශ්නයම ඔහුගෙන්ද ඇසුවේය.+ එතැන සිටි මනුෂ්‍යයෝද කලින් වතාවේදී ඔහුට කියූ දේම නැවත කීවෝය.+

31 දාවිත් පැවසූ දේවල් සාවුල් රජුට ආරංචි විය. එබැවින් සාවුල් රජ දාවිත්ව තමා ඉදිරියට කැඳෙව්වේය. 32 ඉන්පසු දාවිත් සාවුල් රජුට මෙසේ කීවේය. “මගේ ස්වාමීනි, කිසි කෙනෙකුට භය වෙන්න හේතුවක් නැහැ.+ මම අර පිලිස්තියා සමඟ සටන් කරන්නම්.”+ 33 නමුත් සාවුල් රජ, “ඔබ කොහොමද ඒ පිලිස්තියා සමඟ සටන් කරන්නේ?+ ඔහු තරුණ වයසේ පටන් සටනට දක්ෂ කෙනෙක්. ඉතින් ඔබ වගේ පොඩි කොල්ලෙක්+ කොහොමද ඔහු සමඟ සටන් කරන්නේ” කියා ඇසුවේය. 34 එවිට දාවිත් සාවුල් රජුට මෙසේ කීවේය. “මගේ ස්වාමීනි, මම මගේ පියාගේ බැටළුවන්ව රැකබලා ගන්න විට සිංහයෙක්+ ඇවිත් බැටළුවෙක්ව ඩැහැගෙන ගියා. තවත් දවසක වලහෙක් බැටළුවන්ව ඩැහැගන්න ආවා. 35 මම උන් පස්සේ ගොස් උන්ට පහර දී+ උන්ගේ කටින් බැටළුවන්ව බේරාගත්තා. උන් මාව ගොදුරු කරගන්න හදද්දී මම උන්ගේ බෙල්ලෙන් අල්ලලා උන්ව පොළොවේ ගහලා මරලා දැම්මා. 36 සිංහයාවත් වලහාවත් මම මරලා දැම්මා. මේ අචර්මච්ඡේදිත පිලිස්තියාටත්+ මම කරන්නේ ඒ දේමයි. ජීවමාන දෙවිගේ+ සේනාවට+ තවදුරටත් අපහාස+ කරන්න මම ඔහුට ඉඩ දෙන්නේ නැහැ.” 37 දාවිත් තවදුරටත් මෙසේ කීවේය. “සිංහයාගෙනුත් වලහාගෙනුත් මාව බේරාගත් යෙහෝවා දෙවි මේ පිලිස්තියාගේ අතිනුත් මාව බේරාගනියි.”+ එවිට සාවුල් රජ, “එහෙනම් ඔබ දැන් යන්න. යෙහෝවා දෙවි ඔබට උදව් කරයි”+ කියා කීවේය.

38 ඉන්පසු සාවුල් රජ තම ඇඳුම් දාවිත්ට අන්දවා ඔහුට තඹ තොප්පියක් පැළඳෙව්වේය. ඔහුට යුධ ඇඳුමක්ද ඇන්දුවේය. 39 දාවිත් සාවුල් රජුගේ කඩුව තම ඉණේ බැඳගෙන ඇවිදින්න උත්සාහ කළේය. ඔහු එම ඇඳුම් සහ ආයුධ මීට පෙර භාවිත කර නොතිබූ නිසා ඒවා පැළඳගෙන ඔහුට ඇවිදින්න අපහසු විය. එවිට ඔහු සාවුල් රජුට, “මීට කලින් මම මේවා ඇඳලා නැති නිසා මට ඇවිදින්න අමාරුයි” කියමින් ඒවා ගලවා දැමුවේය.+ 40 ඉන්පසු දාවිත් නිම්නයෙන් රවුම් ගල් පහක් අහුලාගෙන ඒවා තමන් ළඟ තිබූ මල්ලේ දමාගත්තේය. ඔහු එක අතකට සැරයටියද අනික් අතට ගල්පටියද+ ගෙන පිලිස්තියා සිටි ස්ථානය දෙසට ගියේය.

41 පිලිස්තියාද දාවිත් සිටි ස්ථානය වෙතට ඇවිදගෙන ආවේය. ඔහුට ඉදිරියෙන් ඔහුගේ පලිහ දරන්නා ගමන් කළේය. 42 පිලිස්තියා, දාවිත් තරුණයෙකු බව දුටු විට+ ඔහුට සමච්චල්+ කරන්න පටන්ගත්තේය. මන්ද ඔහු රතට හුරු සමක්+ තිබූ කඩවසම් තරුණයෙක් විය.+ 43 පිලිස්තියා දාවිත්ට මෙසේ කීවේය. “පොල්ලක් අරගෙන නුඹ මගේ ඉස්සරහට එන්නේ මං බල්ලෙක්+ කියා සිතූ නිසාද?” එසේ කියා පිලිස්තියා තම දෙවිවරුන්ගේ නමින් දාවිත්ට ශාප කළේය.+ 44 පිලිස්තියා තවදුරටත්, “මා ළඟට වර. මං තගේ මස් පක්ෂීන්ටත් වනමෘගයන්ටත් කන්න දෙනවා”+ යයි දාවිත්ට කීවේය.

45 එවිට දාවිත් පිලිස්තියාට මෙසේ කීවේය. “නුඹ මා ළඟට එන්නේ කඩුවක්, ලොකු හෙල්ලයක් හා කුඩා හෙල්ලයක්+ රැගෙනයි. නමුත් මම නුඹ ළඟට එන්නේ නුඹ නින්දා කළ+ ස්වර්ගයේ සේනාවල අධිපති වන යෙහෝවා දෙවිගේ නාමයෙන්.+ ඊශ්‍රායෙල්වරුන්ගේ සේනාවේ දෙවි ඔහුයි. 46 අද යෙහෝවා දෙවි මගේ අතට නුඹව හසු කර දෙන බව ස්ථිරයි.+ මම නුඹව මරලා නුඹේ හිස කපලා දානවා. මම අද පිලිස්තිවරුන්ගේ මළ සිරුරු පක්ෂීන්ටත් වනමෘගයන්ටත් කන්න දෙනවා.+ ඊශ්‍රායෙල්වරුන්ට දෙවි කෙනෙක් ඉන්න බව පොළොවේ සියලු වැසියන් එයින් දැනගනීවි.+ 47 යෙහෝවා දෙවි ගැලවීම ලබා දෙන්නේ කඩුවෙන්වත් හෙල්ලයෙන්වත් නෙවෙයි කියලා මේ මුළු සේනාවම දැනගනීවි.+ මේ යුද්දේ යෙහෝවා දෙවිගේයි.+ ඔහු අද නුඹලාව අපේ අතට හසු කර දෙන බවට කිසිම සැකයක් නැහැ.”+

48 පිලිස්තියා ටිකෙන් ටික දාවිත් ළඟට ආවේය. දාවිත්ද වේගයෙන් පිලිස්තියා දෙසට දිව ගියේය.+ 49 ඉන්පසු දාවිත් තම මල්ලේ තිබූ ගලක් ගෙන ගල්පටියේ තබා කිහිප වතාවක්ම එය කරකවා පිලිස්තියාට එයින් දමාගැසුවේය. ගල පිලිස්තියාගේ නළලේ තදින් වැදුණේය.+ එවිට ඔහු මුණින් අතට වැටුණේය.+ 50 මෙසේ දාවිත් පිලිස්තියාට වඩා ශක්තිමත් බව ඔප්පු විය. ඔහු ගල්පටියක් හා ගලක් පමණක් භාවිත කර පිලිස්තියාව බිම හෙළුවේය. ඉන්පසු ඔහු පිලිස්තියාට පහර දී ඔහුව මරා දැමුවේය. සටන් කළ අවස්ථාවේදී දාවිත්ගේ අතේ කඩුවක් නොතිබුණේය.+ 51 එබැවින් දාවිත් දුව ගොස් පිලිස්තියාගේ ඇඟ උඩට නැඟ ඔහුගේම කඩුවෙන්+ ඔහුගේ හිස කපා දැමුවේය.+ පිලිස්තිවරු ඔවුන්ගේ වීරයා මැරුණු බව දැක එතැනින් පලා දිව්වෝය.+

52 එවිට ඊශ්‍රායෙල්හි හා යූදාහි මනුෂ්‍යයෝ කෑගසමින් පිලිස්තිවරුන් පසුපස ලුහුබැඳ ගියෝය.+ ඔවුහු නිම්නය+ දක්වාත් එක්‍රොන්හි+ දොරටුව දක්වාත් ඔවුන්ව ලුහුබඳිමින් ගියෝය. දරුණු ලෙස තුවාල ලැබූ පිලිස්තිවරු ෂායරයිම්ට+ යන මාර්ගය දිගේ මැරී වැටුණෝය. ගාත් දක්වාත් එක්‍රොන් දක්වාත් යන මාර්ග දිගේ ඔවුන්ගේ මළ සිරුරු වැටී තිබිණ. 53 පසුව ඊශ්‍රායෙල් සෙනඟ පිලිස්තිවරුන් පසුපස ලුහුබැඳ යෑම අත්හැර පිලිස්තිවරුන්ගේ කඳවුරට පැමිණ ඔවුන්ගේ බඩු කොල්ල කෑවෝය.+

54 දාවිත් පිලිස්තියාගේ හිස+ යෙරුසලමට ගෙනාවේය. පිලිස්තියාගේ ආයුධ ඔහු තම කූඩාරමට ගෙන ගියේය.+

55 දාවිත්, පිලිස්තියා වෙත යන විට සාවුල් රජ තමාගේ හමුදාපති වන අබ්නේර්ගෙන්+ මෙසේ ඇසුවේය. “අබ්නේර්, අර තරුණයා කාගේ පුතාද?”+ එවිට අබ්නේර්, “රජ්ජුරුවනි, ඇත්තටම මම ඒ තරුණයා කවුද කියා දන්නේ නැහැ” කියා පැවසුවේය. 56 එවිට රජ, “ඒ තරුණයා කාගේ පුතාද කියා සොයා බලන්න” යයි කීවේය. 57 දාවිත් පිලිස්තියා මරා නැවත හැරී ආ ගමන්ම අබ්නේර් ඔහුව සාවුල් රජු ඉදිරියට ගෙන ගියේය. දාවිත් පිලිස්තියාගේ හිසත්+ එතැනට රැගෙන ගියේය. 58 සාවුල් රජ දාවිත්ගෙන් මෙසේ ඇසුවේය. “පුතේ, ඔබේ පියා කවුද?” එවිට දාවිත්, “මම බෙත්ලෙහෙම්හි+ ජීවත් වෙන ඔබේ සේවකයා වන යෙස්සේගේ පුතා”+ කියා කීවේය.