යොහන්
16 “මම මේ දේවල් ඔබට පැවසුවේ ඔබ පාපයට ඇද වැටෙනවා*+ දකින්න අකමැති නිසයි. 2 මිනිසුන් ඔබව සිනගෝගවලින් නෙරපා දමයි.+ ඇත්තෙන්ම ඔබව මරණයට පත් කරන අය එසේ කිරීමෙන් තමන් දෙවිට මහත් සේවයක් කළ බව සිතන කාලයක් එයි.+ 3 ඔවුන් ඒ දේවල් කරන්නේ ඔවුන් පියාණන්වත් මාවත් නාඳුනන නිසයි.+ 4 ඒ වුණත් මම මේ දේවල් දැන්මම ඔබට කියන්නේ, මේ දේවල් සිදු වන කාලය පැමිණෙන විට මම ඒ ගැන පැවසූ බව ඔබට මතක් වීම සඳහායි.+
“මම මුලින්ම ඔබට මේ දේවල් ගැන නොකිව්වේ ඒ වන විට මම ඔබ සමඟ සිටි නිසයි. 5 දැන් මාව එවූ තැනැත්තා ළඟට යන්න කාලය ඇවිත් තිබෙනවා.+ නමුත් ‘ඔබ යන්නේ කොහේද’ කියා ඔබෙන් එක් කෙනෙක්වත් මගෙන් අසන්නේ නැහැ. 6 මම මේ දේවල් ගැන ඔබට කතා කළ නිසා ඔබේ සිත් ශෝකයෙන්+ බර වෙලා. 7 කොහොමවුණත් මගේ පිටත්ව යෑම ඔබට ප්‍රයෝජනවත් වෙයි. මම මේ කියන දේ සත්‍යයක්. මන්ද මම පිටත්ව ගියේ නැත්නම් ඔබේ උපකාරයට ලැබිය යුතු දේ+ ඔබට ලැබෙන්නේ නැහැ. නමුත් මම පිටත්ව ගියොත් මම අනිවාර්යයෙන්ම ඒ දේ ඔබේ උපකාරය සඳහා ලබා දෙනවා. 8 ඒ උපකාරය ලැබෙන විට සියලුදෙනාටම පාපය ගැනත් ධර්මිෂ්ඨකම ගැනත් දෙවිගේ විනිශ්චය ගැනත් ඉතා පැහැදිලි අවබෝධයක් ලැබෙයි.+ 9 මුලින්ම පැහැදිලි අවබෝධයක් ලැබෙන්නේ පාපය ගැනයි.+ එය පැහැදිලි වන්නේ ලෝකයේ මිනිසුන් මා කෙරෙහි විශ්වාසයක් නොතබන නිසයි.+ 10 ඉන්පසු ධර්මිෂ්ඨකම ගැන+ පැහැදිලි අවබෝධයක් ලැබෙයි. එය පැහැදිලි වන්නේ මම පියාණන් ළඟට යන නිසයි. එසේම ඔබ තවදුරටත් මාව දකින්නේ නැහැ. 11 ඊළඟට දෙවිගේ විනිශ්චය ගැන+ සාක්ෂි ලැබෙයි. එනම් මේ ලෝකයේ පාලකයාව විනිශ්චය කර ඇති බවයි.+
12 “ඔබට කියන්න තව බොහෝ දේ මට තිබුණත් ඒවා දරාගන්න දැන් ඔබට බැහැ.+ 13 නමුත් ඔබට සත්‍යය එළිදරව් කරන දෙවිගේ බලය+ ලැබෙන විට සත්‍යය ගැන වඩාත් පූර්ණ අවබෝධයක් ලබාගැනීමට ඔබට මඟ පෙන්වීම් ලැබෙයි. නමුත් මේ බලය ස්වාධීනව ක්‍රියා කරන බලයක් නොවෙයි. එමගින් එළිදරව් වන්නේ ප්‍රකාශ කළ යුතු බව දෙවි තීරණය කරන දේවල් පමණයි. එමනිසා ඉදිරියේදී සිදු වන දේවල් ගැන ඔබට දැනගන්න ලැබෙයි.+ 14 මා ලබා දෙන මඟ පෙන්වීම් ඔබට ලැබෙන්නෙත් එහි ක්‍රියාකාරිත්වය තුළිනුයි.+ එයින් මාවද ගෞරවයට පත් වෙයි.+ 15 ඇත්තෙන්ම මා ලබා දෙන මඟ පෙන්වීම් ඔහුගේ බලයේ ක්‍රියාකාරිත්වය තුළින් ඔබට ලැබෙයි කියා මම කියන්නේ පියාණන් සතු සියල්ල මා සතු නිසයි.+ 16 කෙටි කලකින් ඔබ මාව තවත් දකින්නේ නැහැ.+ නමුත් ඉන් ටික කලකට පසු ඔබ මාව නැවතත් දකියි.”
17 එහෙයින් ඔහුගේ ගෝලයන් කිහිපදෙනෙක් තම තමන් අතරේ මෙසේ කතා වුණෝය. “‘කෙටි කලකින් ඔබ මාව තවත් දකින්නේ නැහැ’ කියාත් ‘ඉන් ටික කලකට පසු ඔබ මාව නැවතත් දකියි’ කියාත් ඔහු කියන්නේ ඇයි? ඒ වගේම ‘මම පියාණන් ළඟට යනවා’ කියාත් ඔහු කියනවා. ඔහු කියන දෙයෙහි තේරුම මොකක්ද?” 18 එමෙන්ම ඔවුහු, “‘කෙටි කලකින්’ කියා ඔහු කියන්නේ ඇයි? ඔහු මොනව ගැනද මේ කතා කරන්නේ කියා අපට නම් තේරෙන්නේ නැහැ” කියා පැවසූහ. 19 ඔවුන්ට තමාගෙන් අසන්න යම් ප්‍රශ්න ඇති බව දැනගෙන සිටි යේසුස්+ ඔවුන්ට මෙසේ කීවේය. “ඔබ එකිනෙකා අතර කතා වෙන්නේ මොනව ගැනද? තව කෙටි කලකින් ඔබ මාව තවත් දකින්නේ නැහැ, නමුත් ඉන් ටික කලකට පසු ඔබ මාව නැවතත් දකියි කියා මම පැවසූ දේ ගැනද? 20 ඇත්තෙන්ම මම ඔබට කියන මේ දේට සවන් දෙන්න. ඔබ බොහෝ සෙයින් හඬා වැලපෙයි. ඒ වේලාවේදී ලෝකය නම් ප්‍රීති වෙයි. ඒත් මුලින් ඔබ ශෝක වුණත්+ පසුව ඒ ශෝකය ප්‍රීතියට හැරෙයි.+ 21 මේ උදාහරණය ගැන සිතන්න. සාමාන්‍යයෙන් දරුවෙක් බිහි කරන්න සිටින ස්ත්‍රියක් සිටින්නේ මහත් වේදනාවකින්.+ ඒ ඇගේ දරුවා මෙලොව එළිය දකින්න නියමිත වේලාව ඇවිත් තිබෙන නිසයි. නමුත් දරුවා ලැබුණායින් පසු ඇයට විඳින්න සිදු වුණු වේදනාව ඇයට මතක් වෙන්නේ නැහැ. ඇයට දැනෙන්නේ ප්‍රීතියක් පමණයි. ඒ ඇගේ දරුවා මෙලොවට බිහි වී ඇති නිසයි. 22 දැන් ඔබත් සිටින්නේ ශෝකයෙන්. නමුත් අපි නැවත හමු වන බව මතක තබාගන්න. එවිට ඔබේ සිත් ප්‍රීතියෙන් පිරී යයි.+ කිසිවෙකුටවත් ඒ ප්‍රීතිය ඔබෙන් සොරාගන්න බැහැ. 23 ඒ දවසේදී+ ඔබට මගෙන් කිසි දෙයක් විමසන්න අවශ්‍ය වන්නේ නැහැ. ඇත්තෙන්ම මම ඔබට කියන්නේ, ඔබ පියාණන්ගෙන් ඉල්ලන ඕනෑම දෙයක්+ ඔහු මගේ නාමයෙන් ඔබට දෙන බවයි.+ 24 මේ වන තුරු ඔබ මගේ නාමයෙන් කිසිම දෙයක් ඉල්ලා නැහැ. දැන් ඉල්ලන්න. එවිට ඔබට ලැබෙයි. ඔබ අද්දකින ප්‍රීතියද පිරී ඉතිරී යයි.+
25 “මම මේ දේවල් ඔබට පැහැදිලි කළේ උදාහරණවලිනුයි.+ නමුත් මම ඔබට උදාහරණවලින් නැවතත් කතා නොකරන කාලයක් එයි. ඒ කාලයේදී මම පියාණන් ගැන ඔබට පැහැදිලි ලෙස දන්වනවා. 26 ඒ කාලයේදී පියාණන්ගෙන් යම් ඉල්ලීමක් කරන්න අවශ්‍ය නම් එය මගේ නාමයෙන් ඔබට කරන්න පුළුවන්. එවිට ඔබ වෙනුවෙන් පියාණන්ට කතා කරන්න මට සිදු වන්නේ නැහැ. 27 මන්ද ඔබ මට බොහෝ සෙයින් ආදරය කළ නිසාත්+ මම පියාණන්ගේ නියෝජිතයා+ හැටියට පැමිණියා කියා ඔබ විශ්වාස කළ නිසාත් පියාණන්ට ඔබ ගැන තිබෙන්නේ මහත් ආදරයක්. 28 මම ලෝකයට ආවේ පියාණන් ළඟ සිටයි. දැන් මම මේ ලෝකයෙන් සමුගෙන නැවතත් පියාණන් ළඟට යනවා.”+
29 එවිට ඔහුගේ ගෝලයෝ මෙසේ කීවෝය. “දැන් ඔබ උදාහරණ යොදාගෙන කිසිම දෙයක් පැවසුවේ නැති නිසා අපට සියල්ල පැහැදිලි වුණා. 30 ඔබ සෑම දෙයක්ම දන්නා බවත්+ ඔබෙන් ප්‍රශ්න කරන්න කිසිවෙකුට අවශ්‍ය නැති බවත් අපි දන්නවා.+ ඒ නිසා ඔබ දෙවිගෙන් පැමිණි බව අපට විශ්වාසයි.”+ 31 යේසුස් ඔවුන්ට මෙසේ පිළිතුරු දුන්නේය. “ඔබ තුළ දැන් විශ්වාසයක් තිබෙනවා. 32 නමුත් ඔබ සියලුදෙනාම තම තමාගේ නිවෙස්වලට විසිරී යනවා.+ ඔබ මාව තනි කර දමනවා. ඇත්තෙන්ම ඒ දේ සිදු වන වේලාව අත ළඟයි. කොහොමවුණත් පියාණන් මා සමඟ සිටිනවා.+ ඒ නිසා මම තනි වන්නේ නැහැ. 33 මම ඔබට මේ දේවල් කිව්වේ මා මාර්ගයෙන් ඔබට සමාදානය ලබා දෙන්නයි.+ ඔබට මේ ලෝකයෙන් නොයෙකුත් පීඩා ඇති වෙයි. නමුත් කිසි දෙයකට අධෛර්යය වෙන්න එපා. මම ලෝකයෙන් ජය ගත්තා.”+