මාක්
12 ඔහු උපමා යොදාගෙන ඔවුන්ට මෙසේ කීවේය. “මිදිවත්තක් වැවූ එක්තරා මිනිසෙක් සිටියා.+ ඔහු එය වටා වැටක් බැඳ,+ මිදි පෑගීම සඳහා වළක් හාරා, ටැඹක් ඉදි කර එය වැවිලිකරුවන් පිරිසකට බද්දට දී+ පිටරට ගියා.+ 2 පලදාව නෙළන කාලය පැමිණි විට මිදිවත්තේ පලදාවෙන් යමක් ලබාගැනීමට ඔහු ඒ වැවිලිකරුවන් වෙතට ඔහුගේ දාසයෙකුව යැව්වා.+ 3 නමුත් ඔවුන් ඔහුව අල්ලාගෙන ඔහුට තැළුවා. ඔහු එතැනින් පිටත් වූයේ හිස් අතින්.+ 4 පසුව ඔහු තවත් දාසයෙකුව ඔවුන් වෙතට යැව්වා. ඔවුන් මේ දාසයාගෙත් හිසට පහර දී ඔහුට නින්දා කළා.+ 5 ඔහු තවත් දාසයෙකුව යැවූ විට ඔවුන් ඔහුව මරණයට පත් කළා. ඉන්පසුව ඔහු දාසයන් බොහෝදෙනෙකුව යැව්වා. ඔවුන්ගෙන් සමහරදෙනෙකුටද ඔවුන් තැළුවා. තවත් සමහරෙකුව මරා දැම්මා. 6 අවසානයේදී ඔවුන් වෙත යැවීමට ඔහුට ඉතුරුව සිටියේ එක් කෙනෙක් පමණයි. ඒ ඔහුගේ ප්‍රේමණීය පුත්‍රයායි.+ ‘ඔවුන් මාගේ පුත්‍රයාට ගරු කරයි’+ කියා සිතාගෙන ඔහු ඔහුවත් ඔවුන් වෙතට යැව්වා. 7 එවිට ඒ වැවිලිකරුවන් තම තමන් අතරේ කතා කරගනිමින්, ‘මොහු තමයි උරුමක්කාරයා.+ එන්න, අපි මොහුව මරා දමමු. එතකොට ඔහුගේ උරුමය අයිති වන්නේ අපටයි’+ කියා පැවසුවා. 8 එමනිසා ඔවුන් ඔහුව අල්ලාගෙන මරා+ ඔහුව මිදිවත්තෙන් පිටතට ඇද දැමුවා.+ 9 මිදිවත්තේ අයිතිකරු පැමිණි විට ඔහු ඒ වැවිලිකරුවන්ට කුමක් කරයිද? ඔහු ඔවුන්ව විනාශ කර මිදිවත්ත+ වෙනත් පිරිසකට භාර දෙයි.+ 10 මේ දේ ඔබ ශුද්ධ ලියවිල්ලෙන් කවදාවත් කියවා නැද්ද? එනම්, ‘ඉදි කරන්නන් ඉවත දැමූ ඒ ගල+ ප්‍රධාන ගල වී ඇත.+ 11 එය යෙහෝවා දෙවි විසින්ම කළ මහත් ක්‍රියාවක්ය. අපේ ඇස්වලට එය අදහාගත නොහැකි තරම්ය.’”+
12 ඔහු එම උපමාව පැවසුවේ තමන් ගැන බව තේරුම්ගත් ඔවුහු, ඔහුව අල්ලාගන්න මඟක් සෙවූහ. නමුත් ඔවුහු සමූහයාට බිය වූ නිසා ඔහුගෙන් අහකට ගියෝය.+
13 යේසුස් පවසන දෙයකින් ඔහුව වරදකට අසු කරගැනීම සඳහා+ ඔවුහු, පරිසිවරුන් පිරිසක් සහ හෙරොද්ට පක්ෂව සිටි+ අයගෙන් කිහිපදෙනෙකුව ඔහු වෙතට යැවූහ. 14 ඔවුහු පැමිණ ඔහුට මෙසේ කීවෝය. “ගුරුතුමනි, ඔබ සත්‍යය කතා කරන බවත් මිනිසුන්ගේ බාහිර පෙනුම දෙස බලා කිසිවෙකුට විශේෂ සැලකිල්ලක් නොදක්වන බවත් අපි දන්නවා. දෙවි පෙන්වා දෙන මාර්ගය ඔබ උගන්වන්නේ සත්‍ය කාරණා පදනම් කරගෙනයි.+ ඒ නිසා සීසර්ට බදු ගෙවිය යුතුද නැද්ද කියා අපට කියන්න පුළුවන්ද? 15 අප ගෙවන්නද නැත්නම් නොගෙවා සිටින්නද?”+ යේසුස් ඔවුන්ගේ කුහකකම අවබෝධ කරගෙන, “ඔබ මගේ වරදක් අල්ලගන්න උත්සාහ කරන්නේ ඇයි? ඩිනාරි* කාසියක් මට දෙන්න”+ කියා ඔවුන්ට කීවේය. 16 ඔවුහු එක් කාසියක් ඔහුට දුන් විට, “මෙහි තිබෙන රූපයත් නමත් කාගේද” කියා ඔහු ඔවුන්ගෙන් ඇසුවේය. “සීසර්ගේ”+ කියා ඔවුහු පිළිතුරු දුන්නෝය. 17 එවිට යේසුස්, “සීසර්ට අයිති දේ සීසර්ටත්+ දෙවිට අයිති දේ දෙවිටත් දෙන්න”+ කියා පැවසුවේය. ඔහු පැවසූ දේ ගැන ඔවුහු මවිත වූහ.+
18 මිය ගිය අය නැවත නැඟිටින්නේ නැති බව කියන සද්දුසිවරුන්ගෙන්* කිහිපදෙනෙක් ඔහු ළඟට ඇවිත් ඔහුගෙන් මෙසේ ඇසූහ.+ 19 “ගුරුතුමනි, ‘කෙනෙකු දරුවන් නැතුව මිය ගියොත් ඔහුගේ සහෝදරයා+ ඔහුගේ බිරිඳව විවාහ කරගෙන තම සහෝදරයාගේ නමින්+ දරුවන් බිහි කළ යුතුයි’ කියා මෝසෙස්ට දෙන ලද නීතියේ සඳහන් වී තිබුණා. 20 එක්තරා පවුලක සහෝදරයන් හත්දෙනෙක් සිටියා. පළමුවෙනියා ස්ත්‍රියක් සමඟ විවාහ වුණත් ඔහු දරුවන් නැතුව මිය ගියා.+ 21 එමනිසා පවුලේ දෙවෙනියා ඇයව විවාහ කරගත්තා. නමුත් ඔහුත් මිය ගියා. ඔහුටත් දරුවන් සිටියේ නැහැ. තුන්වෙනියාත් ඇයව විවාහ කරගත්තත් ඔහුත් දරුවන් නැතුව මිය ගියා. 22 එයාකාරයට එම පවුලේ සිටි සහෝදරයන් හත්දෙනාම ඇයව විවාහ කරගත්තත් ඒ හත්දෙනාම දරුවන් නැතුව මිය ගියා. අන්තිමේදී ඒ ස්ත්‍රියත් මිය ගියා.+ 23 හත්දෙනාම ඇයව විවාහ කරගත් නිසා නැවත නැඟිටීමේදී ඇය කාගේ බිරිඳ වෙයිද?”+ 24 එවිට යේසුස් ඔවුන්ට මෙසේ කීවේය. “ඔබට මේ ගැන තිබෙන්නේ වැරදි වැටහීමක්. ශුද්ධ ලියවිල්ල ගැනවත් දෙවිගේ බලයේ ක්‍රියාකාරිත්වය ගැනවත් හරි අවබෝධයක් ඔබට නැති බව මෙයින් පෙනෙනවා.+ 25 මන්ද නැවත නැඟිටීමේදී මිනිසුන් විවාහ වන්නේවත් ස්ත්‍රීන්ව විවාහ කර දෙන්නේවත් නැහැ. ඔවුන් ස්වර්ගයේ සිටින දේවදූතයන්ට සමාන වෙනවා.+ 26 මිය ගිය අය නැවත නැඟිටුවනු ලබන බව මෝසෙස්ගේ ලියවිල්ලෙහි සඳහන් කටු පඳුර අසල සිද්ධියෙන් පැහැදිලි වෙනවා. ඒ ගැන ඔබ කියවා නැද්ද? එම වාර්තාවේ ‘මම ආබ්‍රහම්ගේද ඊසාක්ගේද යාකොබ්ගේද දෙවිය’ කියා දෙවි මෝසෙස්ට කිව්වා.+ 27 එයින් පැහැදිලි වන්නේ ඔහු මිය ගොස් ඇති අයගේ දෙවි නොව ජීවත් වන අයගේ දෙවි බවයි. එහෙයින් ඔබේ නිගමනය සම්පූර්ණයෙන්ම වැරදියි.”+
28 එතැනට ඇවිත් ඔවුන්ගේ විවාදය අසාගෙන සිටි නීතිය පිටපත් කරන්නෙක් යේසුස් ඔවුන්ට ඉතා හොඳින් පිළිතුරු දුන් බව තේරුම්ගෙන, “සියලු ආඥා අතරින් ප්‍රධානම ආඥාව කුමක්ද”+ කියා ඔහුගෙන් ඇසුවේය. 29 එවිට යේසුස් මෙසේ පිළිතුරු දුන්නේය. “පළමුවෙනි ආඥාව මෙයයි. ‘ඊශ්‍රායෙල්වරුනි, සවන් දෙන්න. අපගේ දෙවි යෙහෝවායි. යෙහෝවා යන නමින් සිටින්නේ එකම දෙවි කෙනෙක් පමණයි.+ 30 ඔබේ දෙවි වන යෙහෝවාට ඔබේ මුළු හදවතින්ම ප්‍රේම කරන්න. ඔහු වෙනුවෙන් ඔබේ මුළු ජීවිතයම කැප කරන්න. එලෙසම ඔබේ මුළු ශක්තියම ඔහු වෙනුවෙන් වැය කරන්න. නිතරම ඔබේ මනසේ මුල් තැන හිමි විය යුත්තේ ඔහුටයි.’*+ 31 දෙවෙනි ආඥාව මෙයයි. ‘ඔබට මෙන් ඔබේ අසල්වැසියාටද ප්‍රේම කරන්න.’+ ඒ ආඥා දෙකට වඩා උතුම් ආඥාවක් නැහැ.” 32 නීතිය පිටපත් කරන එම තැනැත්තා ඔහුට මෙසේ කීවේය. “ගුරුතුමනි, ‘දෙවි එක් කෙනෙක්. ඔහු හැර වෙන කිසි දෙවි කෙනෙක් නැහැ’+ කියා ඔබ පැවසූ දේ ඉතා නිවැරදියි. එය සත්‍යයක්. 33 ඔහුට මුළු හදවතින්ම ප්‍රේම කිරීමත් ඔහු වෙනුවෙන් මුළු ශක්තිය යොදා උපරිමය කිරීමත් ඔහුව සතුටු කිරීම ගැන නිතරම මනස යොමු කර තැබීමත් තමන්ට මෙන් තම අසල්වැසියාට ප්‍රේම කිරීමත් අවශ්‍යයි. ඒ වගේම ඒ දේවල් සියලුම දවන පූජා හා යාගවලට වඩා වටිනවා.”+ 34 එවිට යේසුස්, ඔහු බුද්ධිමත් ලෙස පිළිතුරු දුන් බව වටහාගෙන, “දෙවිගේ රාජ්‍යයට ඇතුල් වෙන්න ඔබට තව වැඩි දුර යන්න අවශ්‍ය නැහැ” කියා කීවේය. ඉන් අනතුරුව යේසුස්ගෙන් කිසි ප්‍රශ්නයක් අසන්න කිසිවෙකු තුළ ධෛර්යයක් නොතිබිණ.+
35 යේසුස් දේවමාලිගාවේදී සෙනඟට උගන්වමින් සිටිද්දී ඔහු ඔවුන්ගෙන් මෙසේ ඇසුවේය. “ක්‍රිස්තුස් දාවිත්ගේ පුත්‍රයා+ කියා නීතිය පිටපත් කරන්නන් කියන්නේ කුමන පදනමක් මතද? 36 දාවිත්ම දෙවිගේ මඟ පෙන්වීමට එකඟව+ මෙසේ පැවසුවා. ‘යෙහෝවා දෙවි මාගේ ස්වාමීන්ට මෙසේ කීවේය. “මාගේ දකුණු පැත්තේ ඉඳගන්න. මා ඔබේ සතුරන්ව ඔබේ පාද යට දමන තුරු එසේ සිටින්න.”’+ 37 දාවිත්ම ඔහුට, ‘ස්වාමීන්’ කියා පවසනවා නම් ඔහු දාවිත්ගේ පුත්‍රයා වන්නේ කොහොමද?”+
එතැන සිටි විශාල සමූහයා ඔහුට සවන් දෙමින් සිටියේ මහත් ආශාවකිනි.+ 38 ඔහු උගන්වන අතරතුර මෙසේද පැවසුවේය. “විශේෂ සළු ඇඳගෙන එහා මෙහා ඇවිදීමටත් වෙළඳපොළවලදී ආචාර ලබන්නත් කැමති නීතිය පිටපත් කරන්නන්ගෙන් පරෙස්සම් වන්න.+ 39 ඔවුන් කැමති වන්නේ සිනගෝගවලදී ඉදිරි ආසනවල සහ සන්ධ්‍යා භෝජනවලදී ප්‍රධානතම ස්ථානවල සිටීමටයි.+ 40 ඔවුන් අනුන් ඉදිරියේ මවාපෑමක් කරමින් දීර්ඝ යාච්ඤා ඉදිරිපත් කළත් වැන්දඹුවන්ගේ ඉඩකඩම් දේපොළ පැහැරගෙන යනවා.+ ඒ නිසා ඔවුන්ට වඩාත් බරපතළ විනිශ්චයක් ලැබෙයි.”+
41 ඉන්පසු ඔහු දේවමාලිගාවේ මුදල් බඳුන්+ පෙනෙන තැනක ඉඳගෙන සමූහයා ඒවාට මුදල් දමමින් සිටි ආකාරය බලාගෙන සිටියේය. ධනවතුන් බොහෝදෙනෙක් ඇවිත් කාසි බොහොමයක් දැමූහ.+ 42 ඊළඟට දිලිඳු වැන්දඹුවක් ආවාය. ඇය දැම්මේ ඉතා සුළු වටිනාකමක් ඇති කුඩා කාසි දෙකක් පමණි.+ 43 යේසුස් තම ගෝලයන්ව තමන් ළඟට කැඳවා, ඔවුන්ට මෙසේ කීවේය. “මා ඔබට කියන මේ දේට සවන් දෙන්න. ඇත්තෙන්ම මේ දිලිඳු වැන්දඹුව මුදල් බඳුන්වලට මුදල් දැමූ අනික් සියලුදෙනාට වඩා දැම්මා.+ 44 ඒ සියලුදෙනාම දැම්මේ තමන්ට වැඩිපුර තිබුණු දෙයිනුයි. නමුත් ඇයට අගහිඟකම් තිබුණත් තමන් සතුව තිබුණු සියල්ල එනම්, ජීවිතය ගෙන යෑමට තිබුණු සියල්ලම ඇය දැම්මා.”+