Habakuke
Ke tla emela ho utloa hore na o batla hore ke re’ng
Ke be ke inahane hore na ke tla re’ng ha ke khalemeloa.
2 Jehova a nkaraba a re:
“Ngola lintho tseo u li boleletsoeng ponong, u li ngole ka tsela e hlakileng holim’a matlapa+
E le hore batho ba li balang ba se ke ba thatafalloa ho li bala.+
3 Pono ena e sa emetse nako ea eona.
E haufi le ho phethahala, e tla fela e phethahale.*
Leha e ka bonahala eka ea lieha,* u ’ne u e lebelle.*+
Joang kapa joang e tla phethahala.
E ke ke ea siuoa ke nako.
4 Bonang motho ea ikhohomosang.
Ha aa loka ho tloha pelong.
Empa ea lokileng o tla phela ka lebaka la botšepehi* ba hae.+
5 Veine e etsa hore motho a etse lintho tse se nang kelello.
Kahoo, motho ea ikhohomosang a ke ke a atleha.
O meharo joaloka Lebitla.*
O tšoana le lefu, ha a khotsofale.
O ntse a bokella lichaba kaofela
Le ho hapa batho bohle.+
6 Batho bana kaofela ba tla mo soma ba sebelisa maele, mekhabo-puo le lilotho.+
Ba tla re:
‘Ho malimabe ea ipokellang ka lintho tseo e seng tsa hae,
Ea ntseng a eketsa sekoloto sa hae.
Ho tla ba tjee ho fihlela neng?
7 Batho bao u ba kolotang ba tla u tsometsa ba u tsohele matla.
Ba tla u tsukutla habohloko
Ba be ba u tlatlape.+
8 Batho ba bang kaofela ba tla u tlatlapa+
Hobane u tlatlapile lichaba tse ngata,
Oa bolaea batho ba bangata,
Oa senya naha,
Oa ripitla metse le ho bolaea baahi ba eona.+
9 Ho malimabe motho ea ithuisang ka bolotsana molemong oa ba ntlo ea hae
E le hore a ka beha sehlaha sa hae holimo-limo
Hore a pholohe tlokotsi.
10 U tlotlolotse ba ntlo ea hao ka merero ea hao.
U itšitetsoe ka ho timetsa lichaba tse ngata.+
11 Etsoe lejoe le tla hoeletsa le le lerakong,
Lepolanka le arabe le le marulelong.
12 Ho malimabe motho ea hahang motse ka tšollo ea mali,
Ea o tiisang ka lintho tse sa lokang.
13 Ke morero oa Jehova oa mabotho hore batho ba sehlele lintho tse tla felisoa ka mollo
Le hore lichaba li sebeletse lefeela.+
14 Etsoe batho bohle ba tla tseba matla a Jehova.
Tsebo eo e tla ba ngata joalokaha metsi a koahetse leoatle.+
15 Ho malimabe motho ea halefileng,
Ea fang metsoalle ea hae joala e le hore e tahoe
A tsebe ho e bona ha e hlobotse.
16 U tla khotsofatsoa ka ho tlotlolloa ho e-na le ho rorisoa.
Noa le uena, u senolehe hore ha oa bolla.*
Kopi e ka letsohong le letona la Jehova e tla pota e be e fihle ho uena.+
U tla tlotlolloa ho e-na le ho rorisoa.
17 U tla ripitloa ka tsela eo u ripitlileng Lebanone ka eona.
Tšenyo e ileng ea tšosa libata le uena e tla u fihlela
Hobane u bolaile batho,
U sentse naha,
U ripitlile metse le ho bolaea baahi ba eona.+
18 Seemahale se entsoeng ke motho se na le molemo ofe?
Motho oa se tšepa le hoja a iketselitse sona.
Ea se rapelang o lahlehile hobane o nahana hore se tla mo tataisa.
Empa ha se na thuso ho hang,
Ha se bue le ho bua.+
19 Ho malimabe ea reng ho patsi: “Tsoha!”
Kapa ea reng ho lejoe: “Phahama u re rupele!”
20 Empa Jehova o ka tempeleng ea hae e halalelang.+
Lona bohle ba lefatšeng, le thole ka pel’a hae.’”+